رواية نوح الحمام -42
عوق طيب با اكل الي اقدر عليه..
زيادبتسم مو مشكله وعندي لك مفاجئه ان شاء الله تعجبك..
عوق بتذمر ما ابي مفاجئات بشوف امي وبنتي ..
زياد انتي اكلي بس وبنشوف وش بتقولين عن المفاجئه..,
نادى زياد ممرضه وطلب اكل واكلت منه بس علشانه..
الممرضه فكت المغذي من يدي وخلت بس الابره
عوق تمسك يدها باالم طيب ليش مفكيتوها كلها يدي مره تألمني..,
زياد يبتسم لا خليه افضل علشان لسا باقي لك علاج بنعطيك مضاد ..,
عوق بخوف انا وش فيني ما احس بشي..
زياد بعد الولاده اضطرينا نعملك عمليةالمشيمه اتعبتنا مانزلت مع الطفل كلها..
عوق بذعروخوف عمليه ..,
زياد ايوا عملية تنظيف عملتها لك دكتوره سديم وكل شي كويس الحمدلله..,
عوق بهلع والبنت ..!
زياد يضحك البنت طيبه الحين تشوفينها ماشاء الله عليها مره كبيره..,
عوق تحاول تنزل من السرير ياالله بنشوفها..,
زياد انتظري بجيب لك عربيه انتي تعبانه..
جلست على كرسي متحرك وزياد معاه كيس فيه عبايه وطرحه لبستهم..
واخذتني ممرضه وزياد قدامي يمشي دخل داخل عند الاطفال..
وقبل ادخل استراحة قسم المواليد شفت امي جالسه كنها تنتظرني فز قلبي يوم شفتها ووقفت على عصاها..
كنت بقوم لكن هي حلفت ما اتحرك وسلمت علي..
ام عوق بفرحه مبروك ماجبتي..
عوق الله يبارك فيتس شفتيهايمه..,
ام عوق تضحك بحنان ايه ياويلي عنتس ياعوق ولدتس كبر الكف..؟
عوق با استنكار وش ولده يمه انا جبت بنت حتى زياد منهبل منها يقول مره كبيره..!
ام عوق بدهشه والله ما ادري يا امتس رجلتس دخلني داخل وقال هذاولد عوق وشفت لي لحيمتن حميرا..!
عوق ماهمني ولد والا بنت اهم شي يكون بخير..!
ام عوق الله كريم لا تيأسين من رحمة الله ..
طلع زياد من الحضانه
زياد يا الله عوق مستعده تدخلين تشوفين ..
عوق تعالي يمه ادخلي معي..
ام عوق لا استنظركم با الاستراحه..
دخلت داخل كل الموجودين اطفال صغارمره وعليهم اجهزه الي بخشمه والي بحلقه والي مسلطين عليه ضوء ازرق..
زياد بمزح يا الله اذا انتي ذكيه طلعي اي طفل هنا لنا..
عوق وعيونها على حاضنات الاطفال ما ادري لكن قلبي يقول انه الصغير الي با الزوايه الي كل جسمه اجهزه..
زياد يبتسم بدهشه ما شاء الله عليك اي والله ان هذا هو ولدك..
عوق ليش انا ماولدت بنت..,
زياد بضحك هالمره ولد ..,
والمره الجايه ان شاء الله بنت تعالي شوفيه من قريب ..
قربت من الحاضنه شفت طفل ماتبان ملامحه لا حول له ولاقوه كل جسمه اجهزه وتنفسه سريع ما ادري ليش قعدت ابكي..
كنت بعاتب زياد ليش يقول بنت كبيره لكن شكل ولدي قطع قلبي ونساني معاتبة زياد..,
زياديبتسم بعطف ليه الصياح الولد طيب وكل شي عنده كويس..
عوق تبلع غصه بحزن وش كويس وهو ماهو باين منه شي من كثر الاجهزه..
زياد كل هذا شي طبيعي نسيتي انه انولد على آخرالشهرالسابع ..
عوق ما ادري حاسه ان فيه شي..,
زياد بتهدئه تعوذي من ابليس الولد طيب وهي مسألة وقت ويطلع..
طلعت من غرفة رعاية الاطفال الخدج وخليت قلبي مع ولدي الي مثل ما قالت امي كبر كف اليد..
رجعت لغرفه بجناح التنويم وامي كانت معي...
طلبت من زياد امي تتنوم معاي ما تتركني وافق انها تبات معاي حتى اطلع من المستشفى..
وقت الزياره اهل زياد كلهم زاروني بشرى ونجلاء وبناتهم حتى بنات ناجي الصغار..
الغرفه امتلت الي ما حضروا عبير وسناء كلموني على جوال نجلاء..
با الرغم من تعبي النفسي والبدني الا اني حسيت بدفئ العائله لما شفت اهل زياد مجتمعين عندي..
نجلاءبممازحه يا غياره غرتي من دينا ولدتي بسرعه..
ام عوق بحده امر الله يا ام راكان ما فيهانغاره..
نجلاء منحرجه ما كنت اقصد بس امزح مع عوق يا خالتي..
عوق تبتسم بتعب ماتوقعت اني با اولد با الوقت هذا..
ام عوق لا ماعليتس ان شاء الله الا العافيه ..
اردفت بشفقه لكن الولد صغيرن مره والله ما شفته من صغره..
بشرى الحمدلله يمكن خيره انه انولد صغير جاطبيعي
وبعدين الاجهزه متطوره بيحافظون عليه كنه في بطن امه ويطلع عادي..
دخل علينا زياد..
زياد بفرحه السلام عليكم ماشاء الله كلكم جايين..
مجدبمشاكسه اي خالي كلنا جايين علشان بنشوف ولدك والا انت وعوق شبعنا منكم...
زياد يرفع حواجب بممازحه مافيه ولدي شوفته بفلوس ..
نجلاء تبتسم خلك من مجد كيف الولد..
زياد لا الحمدلله طيب ننتظر يكمل 36 اسبوع ويطلع ان شاءالله..
عوق بوجع وتذمر كثير زياد يعني 6اسابيع..!
بشرى بممازحه يا شيخه ارتاحي من ازعاجه واشبعي نوم..
اصايل بمشاكسه ياليت خواتي مثل عوق
لا هم يولدون ويطلعون لبيتنا با ازعاجهم..!
تذكار با استنكار ليش ان شاء الله وش فايدتكن خوات..؟
اصايل بملامه يا اما خدامات يا اما ماتبونا..!
بشرى بحده وانتقاد انتوا جايين زياره والا ازعاج انتي وهي..؟!
عوق تبتسم عادي بشرى يا ليت كل يوم تزعجوني..!
وفاء تلتفت لزياد خالي وش بتسمي ولدك..؟!
اصايل بترجي خالي تكفى سمه اسم حلو والا بيحقد عليك اذا كبر..!
مجد بتهكم ارحموا ها الاطفال من اسامي اجدادكم القديمه وهم بخير..؟
نجلاء ليش وشفيها الاسامي القديمه والله كلها حلى ورزه وش تبينه يسميه..,
مجد بضحك عاد الا زعل ام راكان خالي سمه مرزوق على جد امي بيطلع فله..!
زياديبتسم لا الي بيسميه خالتي ام عوق..!
ام عوق الله يسلمك انا ما اعرف اسمي لكن ازين الاسامي ماحمد وعبد..!
زياد يعني مافي خاطرك اسم..؟!
ام عوق لا والله بكيفكم الي تبونه هو الزين..؟!
زيادالتفتت لخواته وبشرى ونجلاء في خاطركم اسم..؟!
نجلاء لا زياد الي يعجبكم انت وعوق يعجبنا..,
بشرى با امتنان الله يرفع قدرك ويجبر بخاطرك ..,
زياد بما ان ولدي انولد صغير بصراحه نفسي اسميه اسم كبير..
منان خالي سمه اسم مركب المعتصم بالله او سيف الاسلام
زياد لا صعبه شوي منونه ابي اسم الكل يقدر ينطقه..!
وانتي عوق في بالك اسم..,
عوق بوجع بكيفك اهم شي يطلع با السلامه..,
زياد يناظر عوق بطرف عين وش رايكم طيب با اسم نمر..؟!
مجد بتهكم الا خالي انت وش رايك بليث وولدك بيصير الليث الابيض..؟!
زياد بمداعبه لا يا حلوه النمر الابيض اسم مرعب ويخوف..,
نجلاء حلو الاسم وخفيف..؟!
زياد خلاص اجل اعتمدنا الاسم اذا ام راكان اختنا الكبرى معجبها..؟!
وقت الزياره مر بسرعه بين تعليقات خوات زياد وبناتهم وانتقادات امي للبنات
بعدها طلعوا يشوفون نمر..؟!
ام عوق بحب ارتاحي يا امتس نامي من صبح وانتي جالسه ..,
عوق با ارهاق مرتاحه يمه كلمتني ريم تقول بيجون زيارة الليل..,
ام عوق اي حياهم الله متى بيكتبون لتس خروج..!
عوق ما ادري عن زياد اكيد الخبر عنده..؟
ام عوق بدهشه والله يارجلتس ياهو ذهين ..,
عوق بضحك اكيد علشان اسم نمر..؟!
ام عوق مير مشاهاعلى اهله انه هو الي مسميه..!
عوق اسم نمر حلو ماهو عاجبتس نغيره..,
ام عوق بفخر لا بالله زين وش ازين من اسم ابوي نمربن هجاد طويل الاشبار...
اردفت وضحى بأمر لكن بقولتس كلمتين حطيهن حلق بذانتس..؟!
عوق يمه انتي كل كلامتس قدام عيوني ما اقدر اخالفه..,
ام عوق بتحذير حنا يا الحريم نسولف وننسى وش قلنا لكن الرياجيل يسجلونه ومرات يستدرجتس الرجال يشوف وش وراتس
ام عوق منه والا ماهو منه احذري تقولين لتس كلمة تورطين بها بليلة مزح وضحك وتجيبين الي وراتس وقدامتس..!
عوق بتهكم وش عندي من الاسرار ابي اقولها حياتي قدامه هو وغيره معروفه
ام عوق والله يا بنتي ماهو مقصد لكن مرات شي تشوفينه صغيروعند غيرتس كبير..!
زاروني ام ابراهيم وبناتهاوانبسطت معاهم يومي كان حافل ما توقعت با القى ها الاهتمام من الكل..,
من غير بوكيهات الورد الي ملت الجناح من زملاء زياد با المستشفى..
جلست في المستشفى يومين وطلعت بعدها لبيت امي..
امي حسيتها تعبانه ومرهقه وحتى اذا نامت اسمع لها آنين يوجع القلب ..,
اسألها تقولي مافي شي انتي توهمين..!
بفترة ها الاسبوع الكل زارني في بيت امي..,
ومن كثر الحريم الي طالعين داخلين خدامتي وخدامة امي ما صاروا يلحقون با الشغل..,
زياد كل مره يجي في بيت امي ما يكون في فرصه يشوفني..
التواصل بيني وبينه عن طريق الجوال الا اذا بغيت شي ضروري واحيان يدخل دقايق يشوفني ويطلع...,
ناس دخولهم عليك بلسم وناس دخولهم عليك يتركون وراهم هم وغم..
بعد اسبوع من ولادتي..
ام عوق كلمت وضحى بنت ناصر تقول انها با الطريق بتجي تشوفتس وتبارك لتس..
عوق بتذمر وش تبي هذي ليش تعني نفسها يكفي مكالمة جوال..؟
ام عوق لا والله حياها الله وش تبيني اقولها..
عوق بقهر سبحان الله من الله ها الانسانه يا ثقلها على قلبي..
ام عوق خليها عنتس اكلتي لحمها..
دخلت الخادمه وراها حرمه عرفتها
وضحى مبروك يا عمه ماجابت عوق..
ام عوق الله يبارك فيتس..
وضحى ان شاء الله انتس طيبه يا عوق..
عوق بتذمر الحمدلله ابشرتس اني بخير ونعمه
وضحى بتهكم ما اسرع ماولدتي يا عوق من عرستس ما كملتي ثمان شهور..,
ام عوق بغضب ورعها ناقص يا وضيحه ما بعد تم شهور حماله..,
وضحى هو وينه ذالحين ..
عوق بحزن با المستشفى با الحضانه ما بعد طلع..
وضحى يا ويلي عنتس يا شين الحرمه الوالده ورعها ماهو بمعها ..
ام عوق بسخريه وياشين بعد الي ما يثمن كلامه ولايقدر على لسانه..
وضحى منحرجه ياعمه ماقصدت شي..
ام عوق بتهكم قصدتي والا ما قصدتي كلامتس لاقام ولا قعد عندنا..
وضحى بتهكم بأي شهر ولدتي ياعوق...,
عوق بوجع با آخرالسابع
وضحى الحمدلله ماهو با الثامن والا كان مات وحتى السابع واجد الا طفال الي ينوجعون ويموتون..,
ام عوق بحده الله الي خلقه والله الي يدبره ومرات الفال يرجع بوجه قايله..,
وضحى با ارتباك يا عمه انا بمشي جيت بتطمن على عوق ولي رجعه ان شاء الله..
ام عوق كفيتي وفيتي ماقصرتي لاتتعبين نفستس عوق بتمشي لبيتها ماهي مطوله عندي..
وضحى مع السلامه اجل بيتها استحي مااقدرازورها فيه والا كان ودي اني اشوف وليدها اذا طلع..
ام عوق ان شاءالله نعلمتس اذا طلع ولدها سلمي على رجلتس شجيع وان شاء الله انه من الصابرين..
مشت وضحى بعد ما قهرتني بسوالفها...!
عوق ببكى ما قلت لتس انهاغثيثة وكلامها سم ..!
ام عوق بحده وانتي وارتس قمتي تصبين ها الدموع خليها تولي هي وهبالها..,
عوق بحرقه هي جايه تبارك لي والا تغثني...
ام عوق يا عوق كان كلمه بتسمعينها بتغتثين والله الي ما ارتحتي طول عمرتس..
عوق بوجع وش قصدها يوم تقول ماكملتي من عرستس ثمان شهور..
والا يوم تفاول على الولدهي ما تخاف الله يبلاها في بناتها..
ام عوق والله يا بنتي ان كل من استهزا با احدالا وربي ابتلاه..
عوق بضحك ما اقول الا الله يا صبر الارض بس ..؟
ام عوق بخوف بسم الله وش جاتس مره تبتسين ومره تضحكين..؟!
عوق كلامتس لو ضحى يوم جات تمشي...؟!
ام عوق بضحك وانا صادزه لاتنسين شجيع ادعي له با الصبر عليها..,
ترى آل ناصر والله ما كلهم شر هذولا بنياتهم دقن يباركن لتس وفرحانات بسلامتس
وماعلينا منهم ناخذ زينهم ونتناسى شينهم..,
مر اسبوعين من ولادتي طلبت من زيادواصريت ياخذني للمستشفى بشوف ولدي..
وهذي اول مره اشوفه فيها ..!؟
زياد كان يتهرب مني لاشوف ولدي ومرات تجيني حمى وتتعبني..
وفوق هذا كله امي الي احس تعبها زاد وحتى ونينها اسمعه وانا بغرفتي ومع هذا تكابر ماتبي تطلع للمستشفى..
كلمت زياد واصريت اني اشوف ولدي وافق و تجهزت وطلعت للمستشفى..
زياد في السياره هلا والله با ام نمر..,
عوق بفرحه هلابك اخيرآبشوف ها النمر..,
زياد ما عليه بتشوفينه ان شاء الله خلاص ان شاء الله كم اسبوع ويوصل للوزن المثالي ويطلع..
عوق كم باقي طيب نفسي اتخيل شكله ما اذكر منه الا اجهزه داخل حاضنه ..
زياد ماباقي شي ان شاءالله تدرين كم وزنه يوم انولد..
عوق بخوف كم ؟!
زياد كيلو كان مره صغير ..
عوق بحيره وتردد زياد الولد فيه شي..
زياد يبتسم لا ابدآليش تقولين كذا بتشوفينه الحين ترى غيروا مكانه..
دخلت قسم الاطفال واحس قلبي يدق بسرعه وخايفه..
وقفت قدام حاضنات الاطفال وقفت اناظر من فيهم ولدي..
دلني قلبي عليه مثل المره الاولى وقفت قدام حاضنته وجلست على كرسي احس رجولي ما تشليني من شوفته بها الوضع..؟
بكيت غصب عني شكله الي لآن صغير وحواليه اجهزه ويحرك ايديه ورجليه..
زياد بفرح ليش تبكين والله نموري احسن منك شوفيه يرحب فيك على طريقته..
عوق بحزن الحين عرفت السبب انك تتهرب ماتبيني ازوره..,
زياد قولي الحمدلله ولدك تتحسن حالته بشكل سريع وملحوظ..
عوق بحسره وين التقدم وها الاجهزه ليش مشبكه بجسمه..!؟
زياد الولد لاتنسين خديج والنزيف الي صار لك اثر عليه وفي اعضاء بجسمه الحين بدت تكتمل
وزنه زاد 500غرام يعني زيهم وان شاء الله يطلع..,
عوق بيأس معقوله نمر بيطلع من الحاضنه ويعيش..
زيادبطمئنه ان شاء الله ليش كذا فاقده الامل انا علشان كذا ما كنت ابغاك تشوفين الا بعد ما يقرب يطلع ..,
رجعت للبيت وانا نفسيتي تعبانه من الي شفته..!
ولدي عمره اسبوعين وحتى ملامحه ماهي باينه..,
ام عوق بترقب ها بشري عن الولد..؟
عوق با ألم والله ما ادري يمه شكله ما يطمن..
ام عوق تعوذي من ابليس وادعي له ..
عوق بخوف الله كريم لكن الولد الله يخلف علي فيه..,
ام عوق بحده بسم الله عليتس وش ها الطيره الي فيتس
وها المستشفيات الي مليانه وراعين انولدو قبل وقتهم وش مفتوحه له غيران فيهم الي مثل ولدتس ..,
عوق تتنهد بوجع والله يمه مهيئه نفسي لكل شي ان ربي خلاه حامده وشاكره وان اخذه حامده وشاكره..
وش بيدي لو عاش وجا فيه اعاقه يتعذب طول عمره الله يدبره من عنده با احسن التدابير..,
لكن انتي شكلتس تعبانه..
ام عوق والله يا بنتي ما مثل الرضا بقضى الله وانا ما بي غير الخير شوي ماغص يمكن خشة برد..
عوق اكلم زياد يجي ياخذك للمستشفى..
ام عوق لا بالله ريحينا من دوخة المستشفى..
عوق بخوف وش اريحتس يمه والله ان فيتس شي انا بروح معتس للمستشفى..
ام عوق بغضب فكينا ولاتطرين المستشفى ما نيب رايحه..
عوق با استعطاف يا ميمتي خلينا نروح وان شاء الله انه تعب بسيط..
ام عوق بوهن ان زاد تعبي رحت انتي بس ارتاحي ما عليتس مني..
خمس ايام على اخر زياره لولدي وكم مره يحاول زياداني ازوره
لكن ارفض احس اني اكتئبت وان ها الولد بيصير فيه شي وانا ما ابي اتعلق فيه ..
امي زاد تعبها احس وجها صاير اصفر ومهدود حيلها ..
كلمت زياد يحاول يقنع امي تراجع المستشفى ..
وبعد جهد من زياد ومني وافقت امي تطلع للمستشفى مع زياد وخادمتها..
رجع زياد وامي ماهي معاه..
عوق بتوجس زياد امي وينها
زياد بتوتر خالتي تعبانه وبعدين ليش ماخبرتيني شكل تعبها من فتره ..
عوق بخوف هي رفضت وتعاند تقول انا طيبه مافيني شي امي شفيها..
زياد ما ابي اكذب عليك خالتي لا زم تتنوم ..
عوق بخوف امي فيها شي..
زياد بحزن عملنا لها تحاليل واشعه وان شاء الله اليوم بشوف النتايج وعليهانقرر..
عوق طيب انت وش تتوقع فيها ..
زياد ما اقدر اشخص كذا لازم اشوف الفحص وهيئي نفسك لأسوء الاحتمالات..
عوق بتذمر كيف اسوء انت اكيد عارف وش فيها خبرني ولا تقعد تمهد..
زياد ماهو مسألة امهد لك خالتي كبيره با العمر وتوقعي اي شي حرمه تجاوزت 90سنه..
عوق حتى ولو واذا كانت كبيره هذي امي ما ابي افقدها لو عمرها مليون سنه ..
زياد ان شاء الله خير وبعدين ابشرك اليوم نمر افضل من الايام السابقه..
عوق بحده اهم شي امي نمر انولد قبل وقته ومهيئه نفسي اني افقده لكن امي لا..
زياد بعصبيه اعوذ بالله وش ها التشائم..,
غلطان حتى الي يجلس عندك..
طلع زياد وتركني بحيرتي وعذابي..
من ها الولد الي شكله الله اعلم انه ماراح يعيش ..
والا امي الي تعبت فجأها..
اذا فقدت امي كيف بعيش بعدها..
ما ابي لا نمر ولازياد ولا شي ابي امي تبقى لي انا الي رابطني با الحياه هي..
اذا صار لأمي شي من يبقى لي انا وين اروح..,
لا زم اشوفها واقول يمه لمين تتركيني زياد كلامه ارعب قلبي عليها..
كلمت السواق يجهز السياره بشوف امي وصلت للمستشفى سألت عن غرفة لقيتها بغرفه خاصه..
دخلت عليها امي لابسه لبس المستشفى وهذي اول مره تصير امي ماترضى الا لبسها لكن برقعها مانزلت ويدها فيهامغذي..,
وحتى جسم امي صاير هزيل ونحفانه ..!
عوق بوجع يمه اشلونتس الحين..
ام عوق بحده طيبه انتي وش طلعتس من البيت وتوتس والده..
عوق بخوف انا طيبه اهم شي انتي..
ام عوق بطمئنه ماعلي شر ان شاء الله لكن رجلتس الله يهديه ابلشني غصب نومني با المستشفى..,
عوق بخوف يمه وش تحسين فيه..
ام عوق ما احس بشي غير رجلتس الموسوس هو الي قوم الدنيا علي
بطني شوي يوجعني قلت عطوني علاج وطلعوني..
عوق من بين دموعها خليهم يمه يفحصون عليتس هم ادرى..
ام عوق وش عندهم الي يدري ويشفي الله وبعدين انتي وش بلاتس تبتسين..,
عوق بغصه لا عادي لكن تعرفيني ام دميعه..
ام عوق لايكون ولدتس فيه شي..
عوق بيأس ولدي ربي الي جابه وهو الي يدبره سبحانه ماعاد يهمني اهم شي انتي..
ام عوق تبتسم بوجع اعوذ بالله وش ها الكلام ان شاء الله يطلع با السلامه
لا يغرتس صغره يالبى عويناته الي كني اشوفها عويناتس..,
عوق وهي تشعر بمراره بحنجرتها يمه تكفين لا تتركيني ما ابي شي من الدنيا غيرتس ..,
ام عوق وهي تمسح دموع حاره يا بنتي انتي وش جاتس من من دَنَّتْ رحايله رَحَل كلنا هذا مصيرنا
عوق ببكى يمه تكفين لاتقولين ها الكلمه انامصيري ومصيرتس واحد بقعد هنا معتس نطلع مع بعض والا نتنوم مع بعض..
ام عوق بملامه وش يجلستس عندي المستشفى بارد والمكان ما يريح وانتي نفاس ارجعي للبيت..
عوق با اصرار انا حلفت ما ارجع الا انتي معي..
ام عوق با انتقاد وين ايمانتس وين علمتس وهذا وانتي حافظه القرآن..
عوق ببكى الحمدلله ايماني بربي قوي انا وش قلت ابي امي ابي امي..,
ام عوق تتنهد بحسره امتس يا بنتي مثل شمس النهار وقت مغربيه قرب زوالهاوانتي مثل اول النهار..,
عوق تمسح دموعها لاتقولين كذا عشنا مع بعض ونموت مع بعض انا هذا مكاني الي ماتحرك منه الا معتس..,
ام عوق تتنهد بقلة حيله دفي نفستس المستشفى بارد..
عوق ببكى يمه ابي انام بحضنتس مثل قبل يمه انا خايفه..
ام عوق بوجع لاحول ولا قوة الا بالله وش مخوفتس تعالي بحضني غديتي مره وعقلتس صغير..,
طلعت لسرير مع امي وحضنتها حبيت عيونها وشميت شعرها وهذا الشعور الي يجيني كل ماخفت من شي..,
لكن هذي ماهي ريحة امي هذي ريحة شي غريب عني ما تعودته ..
نمت بحضن امي صحيت على صوت زياد يتكلم مع امي..
زياد من متى وهي هنا..
ام عوق من عقب صلاة العصر وهي عندي ابي اقوم اصلي المغرب ماسكتني ماني قادره اتحرك صليت وانا بمكاني..
زياد ما قالت لي انها بتجيك والا كان انا جبتها لك..
ام عوق با استعطاف ماتقصر الله يرضى عليك ترفق عليهاترى هي ضعيفه مامن قلب ومتولعتن بي وتوها نفاس..
زياد يبتسم ماهي مشكل ام نمر تدلل لها الي يرضيها..,
اردف زياد بتردد خاله بنسوي لك اشعه..
ام عوق انتوا ما شوعتوني خلاص..
زياد لا هذي اشعه مقطعيه..
ام عوق سبحان الله هذا انتم تهولون وتكبرون الشي البسيط..
زياديبتسم با الم و ش نسوي غاليه عندنا لازم لك رعايه خاصه ..
عوق بتعب بروح مع امي للاشعه..
زياد ماشاء الله صحيتي ارتاحي يا عوق خالتي لا زم 4ساعات تكون صايمه قبل الاشعه..
عوق لا انا مع امي وين ما تروح ..؟
ام عوق بضحك خلها بكيفها لا تزعل عوق المزايين..
عوق تحتضن كتف امها من زمان ما سمعت ها الاسم منتس يمه..
ام عوق بضحك ابعدي ضايقتيني وش يقول عنتس رجلتس الحين
عوق بحده ما علي منه انا معتس..
زياد يبتسم خليها يا خالتي انا لي نمر الي بياخذ حقي منها..
ام عوق يا سقى الله يوم اشوفه يلعب بينا..
زياد يتنهدبحسره الله كريم يا خالتي..,
نبرة صوت زياد غريبه ليه قال كذا امي او نمر فيهم شي احساسي يقوله
زياد خالتي بكرا الاشعه لأنك لازم تصومين عندي شغل اذا خلصته مريتك..,
سهرت الليل وانا بحضن امي على ان زياد طلب من ادارة المستشفى سريرمرافق لي لكن مانمت عليه نمت مع امي..,
الممرضات جهزو امي وانا طلعت معاها لغرفة الاشعه احس زيادواطباء با المستشفى مهتمين بزياده
ماادري علشانها ام زوجة زياد او ان امي حالتها خطيره..
رفض زياد ادخل مع امي داخل غرفة الاشعه و جلست انتظرها ..
.
.
.
(كلمه اخيره)
س: كيف يسلم العبد بقضاء الله جل وعلا وقدره؟
ج: يوقن بأن ربه عز وجل منزه عن الظلم وأنه أرحم به من نفسه،
وأن الحياة الدنيا ما هي إلا طريق للعبور إلى الآخرة بعد الحياة البرزخية،
ويعلم بأن القلوب أوعية لا علاقة لحياتها بحياة الإنسان الظاهرة،
فقد ينعم ساكن الكهف رضا وقناعة، وتشقى قلوب من في القصور تسخطا وجزعا.
(صالح المغامسي)
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
تذكروني واحبابي بدعوه طيبه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بسم الله الرحمن الرحيم
اللهم انا نسألك بسطوة جبروت قهرك , وبسرعة اغاثة نصرك , وبغيرتك لانتهاك حرماتك ,
نسالك يا الله يا الله يا الله يا سميع يا قريب يا مجيب يا سريع يا منتقم يا جبار...
اللهم عليك ببشار واعوااانه الخونه,
اللهم لاترفع لهم رايه واجعلهم لمن خلفهم عبرة وآيه وفرق بين كلمتهم وفرق بينه وبين جنوووده,
اللهم اجعل تدبيرهم تدميرهم و اجعل الدائرة عليهم,
اللهم اجعل بأسهم بينهم و اقذف بينهم العداوة و البغضاء و سلط عليهم شرارهم و دمرهم بأيديهم,
اللهم ارمهم ببعضهم و اجعل نارهم تحرقهم اللهم إنا نشكوهم إليك يا جبار عجل لأخوننا في سوريا نصرك و فتحك المبين,
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,
او با الرسائل الي تجيني على الخاص ممتنه للجميع..,
البارت اهداء لكل من سطر في متصفح نوح الحمام ولو بكلمه وحده من دون استثناء..,
سواء مدح اونقد اوحتى يسأل عن مواعيد البارتات دليل اهتمامه با الروايه..,
واهداااء خاص للغوالي ارادة الحياة-نوف بنت نايف
.
.
اليوم بنشوف عوق المزايين والحدث الاكبر في حياتها
يا الله تعالوا معاي...!!
وسالفه جديدة؛
.
.
البارت السادس والثلاثين
.
.
رفض زياد ادخل مع امي داخل قسم الاشعه و جلست انتظرها..,
طلعت امي بعد فتره من غرفة الاشعه..,
الي غرفة التنويم دخلت ممرضه وقالت في دكاتره بيدخلون تغطيت ولبست عباتي..
دخل زياد ومعاه اوراق ومعاه ثلاث دكاتره وممرضات امتلت الغرفه..,
زيادبقلق خاله انتي من متى تحسين بوجع بطنك..,
ام عوق مبطي ..,
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك