رواية كثر ما قلتلك اكرهك كثر ما انا اهواك -31
آبتسم لي و مسح على راسي و أنا ناظرت بندر اللي ابتسم .. حضنته و سلمت عليه عقب مشينا أنا و تركي ..
ركبنا في أماكننا .. كنت جنب الدريشة و هو جنبي من الجهة الثانية .. خلاص الله يعين من الحين لازم
أحترم نفسي و أكون مؤدبة اذا كنت أبي روحي , بلعت ريقي للحين هو ساكت أكيد معصب / ما علي منه ..!
رفعت الغشوة و تحجبت بـ الشيلة و بس ..
و هو ناظرني يوم كشفت وجهي بس ما قال شيء و رد يناظر الفراغ ..
حسيت بالرجفة لما سمعت صوت الطيار يآمر أنا نربط الأحزمة عشان نقلع .. وينك يا عمي خالد وينك ..
حضنت يديني بعد ما ربطت الحزام و غمضت عيوني بقوة آآآآآآآآآآآآآه الحمد لله حصل خير ..
ناظرت تركي .. شفته يفك الحزام و يمسح على وجهه عقب رد رأسه لورى و غمض عيونه ..
هذا رايق ينام الحين .. ناظرت في المجلات و مسكت مجله أسلي روحي ..
************************************************** *
نهااية البارت الساابع و الثلاثيين ..
توقعاتكم للرحلةة ؟
- ايش حيصير بين ريم و تركي ؟
- هيثم ايش راح يسوّي ؟
الباارت الثاآمن و الثلاثين .. '$
************************************************** *
.. (( السعـ السـ 2:30 الليل ـاعة ـودية )) ..
نهى : بسك عاد فطوم قطعتي قليبي ..
فاطمة : هـ .. انـت لـو تـشـوفـيـنـه و هي تـنـزف له .. الفرررحه منوره وجهه ..
نهى : اووووووووهوووووووو فطومة زيــن انت ليش تتعبين نفسك .. دامه يحبها شتبين فيه ..
جلست فاطمة تشاهق و بس ..
نهى : فاطمة حبيبتي .. خلاص ..
فاطمة : .. .. .. .. .. " مافي رد .. بس تشاهق " ..
نهى : زين فطومة انت لا تتركينه لحاله و لو تزوج .. نشبي له ..
فاطمة : أيه .. جـاه عـلى بالي أسوي كذه ..
نهى : إنشبي لهم .. ترى كثر الدق يفك اللحام ..
فاطمة : ايه زين .. .. نهى ..
نهى : آمري ..
فاطمة : بروح أنام .. تبين شيء ..
نهى : لا سلامتك .. انتبهي على نفسك ..
فاطمة : زين يالله باي ..
نهى : باي و لا تجلسين تبكين ..
فاطمه : أوككي ..
*********************************
اووووووووووففففففف ملل ... رديت المجله مكانها و لفيييت أناظر تركي .. شكله نايم و في سابع نومه بعد ..
تروعت يوم سمعته يقول لي ..
تركي : أول مـره تـشـوفـيـنـي .. ؟!!
صديت عنه و ناظرت الدريشة بس مليييييييييييييييييت فـ رديت أناظره .. لقيته يسحب مجلة و يقرآها ..
رجعت و شلت عيني ما أبيه يظن اني ميته عليه .. أعوذ بالله .. هذا مو مثل هيثم , هذا يحس بي اذا جلست أناظره
لكن هيثم لا هزيت رأسي و كأني أبعد ذكرى ما أحبها عني .. . ناظرت تركي بعده يقرأ في المجلة ..
اوووووف ما لي خاطر أقرأ .. انتبهت له لما ناظرني .. همس ..
تركي : تبين شيء ..
ريمان : زهق متى بـ نوصل ..
رد عينه للمجلة و قال ببرود ..
تركي : أقرئي على ما نوصل .. و لاّ شوفي لك فيلم بس لا تناظريني ..
ريمان : ما أبي .. أبي أسولف ..
تركي : سولفي ..
ريمان : تتطنزّ ..
تركي بابتسامه : لا أبد طال عمرك سولفي إذا تبين ..
حسيته يتطنز .. ناظرته ثواني أتامّل ابتسامته / و لمّا رفع عينه يناظرني صدّيت عنه و ناظرت من الدريشه ..
و أنا أفكّر ربي يععين بس ..
************************************************
.. (( بيروت / الســ 6:20 الصبح ـــــاعه )) ..
قفلت جوالي و رميته بملل فوق السرير .. توي كلمت أمي و قلت لها اننا وصلنا من قبل أربع ساعات و أننا بخير ..
اوووف و الله طفش و قرف .. و ذاك من يوم وصلنا و هو نايم .. كنه ما نام من قبل أبد .. حنا الحين في شاليه ..
و زين ان هو بـ غرفة و أنا بـ غرفة .. بعد هذا القاصر أنام معه في نفس الغرفة ..
قمت و ناظرت من الدريشة بملل .. و انصدمت يوم شفته جاي و هو يركض على حد الشاطئ ..
هذا من متى قام ؟ ابتسمت بـ مكر زين قمت يا سيد تركي !!
هالحين تبدى لعبتي .. قمت و فتحت الدولاب , طلعت شوورت جنز فاتح و بلوزه بيضاء تنربط و نص البطن باين ..
مسكت شعري و رفعته ذيل حصآآن .. مسكت الكحل و رسمت شفايفي قبل لا البس صندل أبيض نــاعــــم حيل بدون كعب ..
وقفت و ناظرت نفسي .. للحظة ترددت أطلع له كذه أخاف أرتبك ..
بس رجعت و مسكت العطر و رشيته / و الله مثل ما حطيت ببالي لا أخليه يندم انه تزوجني ..
كان الشاطئ اللي على طول الشاليه خاص بنا .. رجعت و ناظرته من الدريشة قبل لا أنزل ..
شفته واقف و مغطس رجلينه في البحر و شكله ناوي ع السباحه .. كان لابس شورت للركبه و لونه أسود ..
و قميص مات ابيض .. مشيت بسرعة قبل لا يسبح .. خلاص من الحين تبدأ لعبتي .. !!
وصلت لباب الشاليه الزجاجي .. فتحته و طلعت / مشيت لين وصلت عنده كان يناظر المويه ..
و وااضح عليه مسرح .. انتبه لي لما وصلت لف و ناظرني .. بديت ألعن نفسي على الهبل اللي لبسته ..
صار يناظرني من فوق لتحت ببرود عقب شل عينه على البحر .. بلعت ريقي ..
تقدمت شوي يقالك أبي أسولف معه و أنا منيب طايقته بـ الأصل بس لازم أكمل لعبتي دامني بديت بها ..
ريمان : صباح النور اممممممممممم متى صحيت ما انتبهت لك ..
ابتسم و هو يطلع من البحر ماشي لي .. ارتبكت بس لما شفته جلس على الأرض هديت ..
تركي : صباح الفل .. قبل ساعة صحيت لو مشيت لغرفتي بـ تعرفين اني صحيت ..
ريمان : أنا أروح غرفتك هه !! هزلت أكيد ..
ابتسم و هو يحط عينه بـ عيني ..
تركي : ليش غرفتي تقرص ..
ريمان : ايييييه بها عقارب ..
تركي : هههههههههههههه زيــن انت يا أم عقارب .. اجلسي ليش واقفة ..
هزيت كتفي بـ دلع و الله ان ما ذبحتك هنا ما أكون ريمان ..
ريمان : ما أبي .. بعدين تخيس ملابسي من الرمل ..
تركي : هههههههههه و هذه تسمينها ملابس ..
حسيت بي أحترق من الحيا يوم أشر بـ أصبعه من فوقي لتحتي طنشت طنازته و انحنيت بدلع له ..
ريمان : هااااه .. عندك اسم ثاني ..
صار يناظرني كأنه أول مرة يشوفني ثمّ ابتسم و هو يدخل يده في جيبه و ينزل سيجارة و يولعها ..
نفث دخانها عقب ابتسم ..
تركي : أسمّيها مصخرتك ..!
زمّيت شفّتي / ما عليه تركي و الله لا أعلمك منهي ريمان .. ملت بجسمي بـ دلع و تخصرت ..
ريمان : يووووه تروك يعني أنا مصخرة .. كذه بـ تزعلني منك ..
تركي : أزعلي عادي ..
ريمان : تـــــررركـي ..
تركي : عيونه ..
حسيت بـ خدودي شابه ضوء .. مسكت نفسي شكله يلعب معي هو بعد .. زين نشوف أنا و لاّ انت ..
ريمان : فطرت ؟
تركي : لاااا .. كنت أحتريك تصحين من النوم ..
ريمان : أجل بـ أروح أسوي لك الفطور و أناديك زين ..
تركي : اي زين ..
ريمان : و قبل لا تدخل تسبح بمسبح عطر .. ترى ما أحب الدخان ..
تركي : اوكي .. أوامر ثانية حبي ..
ريمان : سلامتك ..
تركي : الله يسلمك ..
مشيت عنه بسرعة و دخلت الشاليه .. وصلت لـ المطبخ اللي به و وقفت أسحب نفس لا شكلي بـ أغير رأيي ..
اذا جلس يناظرني كذه بموت من الحيا .. عادته تركي هذه نظراته تخليك تولع ضوء ..
آآآه بس بعد أنا لازم أسوي اللي برأسي فتحت الثلاجة اللي بـ الشاليه ..
كان فيها حمص و فطور خفيف زيّ التوست و اللبنه و الشوكلت .. نزلته و حطيته على الطاولة اللي بـ البلكونة ..
و اللي تطل على البحر .. سويت عصير كوكتيل بعد و حمصت التوست قبل لا أرتب السفرة و أنا أفكر شسوي
في الأيام الجايه ..
ابتسمت لما شفتها تمشي لـ الشاليه بسرعة .. . نفثت الدخان و ما قدرت أمسك نفسي فـ انسدحت على ظهري
و جلست أضحك من قلب ..
تركي : هههههههههههههههههه كحححححح ..
قمت و أنا أكح عقب هديت رفعت عيني لـ الشاليه و أنا أبتسم .. تبين تحرقين أعصابي هااااه ما أنكر ..
انك صدمتيني بـ لبسك مب كنك اللي أمس ميته من الصياح و ما أنكر اني ما أشعلت السيجارة الا من توتري /
الله يغربل إبليسك من بنية .. ابتسمت و أنا أشوفها تأشر لي من البلكونة أجي عشان الفطور ..
أشرت لها بمعنى جاي و قمت و أنا أدوس السيجارة برجلي .. اوكي يا الحب ! انت بديتي بـ اللعبة /
و أنا بـ أكون اللاعب الثاني و في النهاية يـا أنا يا انت !!
*********************************
جلست أفرك يديني و أنا أحتريه يا ربي عونك !! انتبهت له و هو يطلع الدرج ..
ابتسم لي و جاه ..
تركي : الله الله السفرة تشهي ..
ابتسمت له بارتباك .. راح و جلس و أنا جلست مقابله .. جلسنا نأكل ..
تركي : شخبارك اليوم ..
ريمان : طيبه ايش تتوقع يعني ؟
آستغربت من سؤاله ذا .. أمّا هو آبتسم و هزّ كتوفه و هو يهمس ..
تركي : بعد شويّه تجهّزي بنطلع ..
ريمان : أوكي ..
رجع ناظرني من فوق لتحت و حسّيت بقلبي يوقف لمّا تأمل نحري و صدري ثوآني قبل
لا يردّ عيونه لكآس العصير .. آرتحت و تنهدّت بدون صوت قبل لا أسأله ...
ريمان : زين اشلون الكوكتيل ؟ عجبك ..
تركي : انت مسويته ..
ريمان : ايه أنا حلو ..
تركي : لااااا زيـــن تعرفين تسوين شيء ..
ريمان : أكيد شرآيك يعني ..
تركي : رآيي بآيشش ..
و ناظرني بنظره موتتني حيا بس انا استجمعت شجاعتي و رديت ببرود ..
ريمان : تتطنزّ هاه ؟ تدري المفروض تدفع ع الفطور ..
ناظرني بابتسامة و بـ نظرة خلت قلبي ينبض ..
تركي : كان تبين عمري يفداك ..
ريمان : لاااا خليه لك ..
تركي : هههههههههههههه زيــن حياتي ..
ريمان : انت شفيك .. صاير تخفف دمك ..
تركي : خير تبينه ثقيل مثل دم هيثم ..
ناظرته بسرعة و هو جلس يشرب الكوكتيل و يناظرني ببرود ..
ريمان : شدخل هيثم بـ السالفة ..
تركي : و لا شيء ..
ريمان : لا في شيء .. لا تطريه مرة ثانية فاهم ..
ناظرني بسرعة / عقب حط الكأس و قام ..
تركي : اذا تبين تطلعين قومي تجهزي ..
و مشي عني .. ناظرته لين دخل الغرفة .. رديت عيني على الطاولة و أنا أتنهد بـ تعب ..
عقب قمت و رحت تجهزت .. لبست بنطلون جينز و تي شيرت و لبست عبايتي و شيلتي
و طلعت و أنا أشيل شنطتي .. شفته واقف و لابس بنطلون و تي شيرت .. حسيت به طول و عرض و هيبة ..
بـ الذات كتوفه حيل عريضة .. أصلا تبون الصراحة .. تركي هو اللي يتميز بين عيال العايلة
بـ كتوفه العريضة و المستقيمة .. ما أدرري اشلون أفهمكم لكن تعرفون الكتوف اللي تجي هزيلة و مقوسة ..
هو العكس .. كتوفه عريضة و مستقيمة ..
انتبه لي و ابتسم و كنه ما صار شيء الحين ما رديت له الابتسامة و مشيت له طلعنا و ركبنا تاكسي ..
و صلنا لـ منطقة السوليدير [ منطقه كلّها مقاهي و مطاعم و محلاّت تجاريّه و ما تدخلها السيّارات
مبانيها كانت متشابهه و حلوه بطابعها العربي و كان الطريق مرصّف ] ..
نزلنا التاكسي عند البوابه و من مشي مسك تركي يدي و قربني له حاولت أسحب يدي منه بس ناظرني
بعصبية خلتني أهدى و أخلي يدي في حضن كفه ..
تمشينا في أماكن كثيره و شريت كذه شيء " هدايا لاهلي " عقب رحنا على مطعم تغدينا ..
و بعد الغداء طلبنا تحليه مع قهوه مرّه ... جلست أناظر الناس اللي حولنا .. شفت ثنين وااضح عليهم خليجيين ..
و كانوا داخلين على المطعم .. شفت الحب بـ عيونهم " شفت الشوق بـ عيونهم .. أي زوجين كل واحد شاري الثاني
بـ يكونون بهذه السعادة .. تنهدت / و فاجأني تركي يوم قال برنة غريبة ..
تركي : شفيك تتنهدين ..
ريمان : و لا شيء خلصت ..؟!
تركي : لا في شيء .. خير التنهيدة تجي من لا شيء ..
كان يتكلم بـ هدوء طنشته و هو طنش بعد و سكت .. قمنا عقب و مشينا على متنزه .. كان بـ وسطه نافورة كبيرة ..
و بالليل كان جــنــان و هادية و كأنها لـ العشاق .. جلسنا على كرسي خشبي بـ المتنزه ..
و كانت السـ 9:30 الليل ـاعة ..
ريمان : أشوفك تعرف أماكن كثيره .. جيت قبل ..
تركي : ايه مرتين ..
ريمان : مع مين ..
تركي : مع إلياس ..
ريمان : يا سلام لوحدكم ..؟
ناظرني و قال و هو يبتسم بطنازة ..
تركي : لا خذيت أمي و هو جاب أمه ..
ريمان : لا تستخف دمك ..
سكت و جلس يدخن .. جد انه بارد ..
ريمان : هييي لا تدخن .. ترى خربت الجو ..
جلس ينفث الدخان و بس و هو يناظر قدام عقب ابتسم .. شكيت ان كان عنده انفصام شخصية ...
بس تروعت يوم أشر بيده فجأة لـ النافورة ..
تركي : قبل سنة .. كنت أنا و إلياس جالسين هناك بـ الضبط ..
جلست ساكته أراقب ملامح وجهه و هو يتكلم ..
تركي : أذكر انه جاه بـ يحط يده بـ المويه .. بس انتبهنا لـ اللافتة ذيك ..
ناظرت اللافتة .. كان مكتوب تحذير أنّ المويه بها أسلاك كهربائيه و مدري آيش / كمّل كلامه ..
تركي : بس طبعا و بـ طبعنا أي شيء مفروض على الكل لازم نخالفه .. فـ سويت بيني و بينه تحدي
و على 2000 ريـال ..
شهقت .. جد مجنون يعني مكتوب تحذير و بعد يخالفونه ...
ريمان : مجانين انتم ؟ زين و من فاز ..
تركي : هههههههههههههههههه و لا أحد ..
ريمان بابتسامه : اشلون يعني .. جبنتم ؟
تركي : بشكل ما تتصورينه و الله خفنا .. عاد الكهرباء ما تحتري دقيقة دقيقتين على طول تذبحك ..
ريمان : ايه صادق ..
سكتنا للمرة الألف ..
جلست أناظر شلة بنات صغار يلعبون قريب منا .. كانوا يدورون في دائرة ..
و يشبكون أصابعهم في بعض .. آبتسمت و أنا أناظرهم و تذكّرت أنّي و جمون كنّا نلعبها
بعد شوي طاحت بنوتة فيهم .. و جذبتني ضحكة تركي الخافته و المبحوحه ..
تركي : هههههههههههههه رججّه !
ابتسمت و ناظرته عقب رديت عيني على البنات بس تركي فاجأني يوم قال ..
تركي : ما تبين تقولين ليش تنهدت قبل ..
ناظرته بسرعة و هو ناظرني بهدوء ..
ريمان : عادي ما في شيء كنت تعبانة و تنهدت ..
تركي : من وشو تعبانة ..
اووووووهووووو تركي أجاوبه على سؤال و يدخلني بـ سؤال ثاني ..
ريمان : من كل شيء ..
تركي : و مني ..
لااااااا و بعد يفهمها و هي طايره ..
ريمان : قلت لك من كل شيء ما قلت منك ..
سكت و هو يدوس على سيجارته عقب رد عينه على قدام ..
ريمان : من متى تدخن .. ما أحيدك تدخن قبل لا أروح لندن ..
تركي : الاا كنت ادخن بس وقفت بعد ما سافرتي ..
ريمان : وش معنى بعد ما سافرت ..
ناظرني ثواني و مسح وجهي بنظراته قبل لا يتنهد و يقوم / مد يده و انا قمت و مسكت يده و هو قربني له /
مشينا لبره و وقفنا نحتري سيارة تاكسي ..
ريمان : ما قلت لي وش المعنى ؟
تركي : أسباب كثيره ..
ريمان : مثل .. ؟!!
تركي : و لا شيء .. انسي !
ريمان : ليش مآ أبي أنسى .. قوول ..
سكت و هو يأشر لـ تاكسي و أنا هزيت ذراعه ..
ريمان : تركي أكلّمك قول ..
ناظرني بعصبية ..
تركي : هالحين يقالك يهمك .. تبين ترضين فضولك و بس ..
ريمان : آنـ ..
و سكت و بلعت ريقي و صديت عنه لـ الجهة الثانية ركبنا على التاكسي و قال له يردنا لـ الشاليه ..
جلست ساكتة و أناظر الشوارع و بس .. زين أنا سألت بس ما أحيد اني سويت شيء غلط ..
بس صح كأنّي تذكّرت بندر يوم يقول لعمّي خالد أنّ تركي ما يحب أحد يسأله عن شيء ..
يولّي يروح بعد ماله داعي يصرّخ و يعصّب عليّ ... وصلنا الشاليه .. دخلنا و طلعت بسرعة لغرفتي ..
فصخت عبايتي و شيلتي و علقتهم .. قبل لا ادور في الغرفه و انا اتمتم اضبطي أعصابك ريمان .. لا تصيحين ..
خير من أول شيء بـ تصيحين .. وين راحت أفكارك و مخططاتك .. خلك هادية خلك هادية ..!!
سحبت نفس و غيرت ملابسي و لبست قميص النوم .. كان يوصل لـ الركبه و لونه أبيض و كات بحبال ..
طلعت أشوف اذا يبي عشاء .. شفته جالس في الصالة ببرود و لا كنه سوى شيء ..
و بعد مغير ملابسه و لبس بنطلون أبيض قطني و تي شيرت أزرق .. تنهدت و وقفت قدامه ..
ريمان : تبي عشاء ..
بدون ما يناظرني رد و هو يقلب على قناة ثانية ..
تركي : لا روحي نامي ..
زمّيت شفّتي و مشيت على غرفتي .. أحسن بعد من مقابلة وجهه ..
*************************************************
.. (( الإمـاراتــــ السـ 2:30 الليل ـاعة ــ )) ..
فارس : أبـــــيــــــــه هيثم خلاص ذبحتني ..
طالعته و هو يحط يده على جبهته و يصخ و هو يبلع ريجه .. أدريبه محرج من داخل ..
فارس : هيثم خلاص و الله ما احب أجوفك جيه تعبان ..
طالعني بألم عقب تنهد ..
هيثم : أصلا أنا أستاهل ما ياني .. بـ يديني هاي يبته لـ نفسي ..
صخيت و لا رديت .. طبعه هيثم لا رمس ما يحب أحد يقاطعه ..
هيثم : أنا أخطيت يا فارس .. هيه ما أنكر بس هم أنا أحبها الا أعشقها .. شذنبي الحين ..
فارس : مالك ذنب ..
هيثم : امبلى , امبلى يا فارس عندي ذنووووووب .. ذنوب واايد يا فارس ..
صخيت و لا رديت .. أصلا ما عندي شيء أقوله له ..
هيثم : أول ذنوبي اني ..
فارس : خلاص هيثم لا ترمس .. تراك عذبتني واايد أنا قلت لك تزوج و أنساها ..
هيثم : ما أروم .. ما أروم أتزوج و لا تييب هاي السيرة مرة ثانية طلبتك فارس ..
فارس : برأيك لا تتزوج .. لكن ارحم نفسك جوف كيف ضعفت .. انت هب هيثم الأولي ..
ما رد .. و صد صوب الدريشة جنا ندور في شوارع ابو ظبي ..
هيثم : خلاص ردني عـ البيت فارس ..
فارس : متأكّد ؟
هيثم : هيه طلبتك ..
بركنت السيارة عند بيتهم .. ودعني و نزل .. يلست أطالعه لين دش داخل عقب مشيت بسيارتي لبيتي ..
خلاص ريمان تزوجت .. ما له أمل ترد له موليه لكن شوه يفهمه ..
************************************************** ***
نهآيةة الباارت الثاآمن و الثلاثين ..
الباارت التااسع و الثلااثين .. '$
ان شاء الله يعجبكم . .
************************************************** ***
.. (( لبنـان السـ 6:20 الفجر ـاعة )) ..
طبقت السجادة .. و ظلّيت مكاني على الأرض / ما فيني نوم أبد " خليني أطلع لـ البحر أحسن لي ..
عاد هو خيال في الفجر .. قمت و لبست فستان ناعم جدا لونه اصفر فاتح يةصل لركبي و اكمامه كات عريضه ..
رفعت شعري لقمة راسي و خليت خصلي على جبهتي قبل لا البس كعب عريض بنفس لون الفستان /
طلعت من غرفتي و ناظرت غرفة تركي .. كان الباب مردود و لما قربت منه حسيت ببرودة هواء المكيف ..
أهــااا أجل الأخ نايم .. مشيت على تحت نزلت عند الشاطئ و مشيت للبحر ..
و ظليت واقفة و أناظر الشمس لما تشرق .. حسيت بـ الهواء يداعب خدودي ..
يا ليتني جبت شال معي .. هذا الجو هو نفسه الجو اللي كنت عايشته في البحرين ..
الفرق الوحيد و الشاســـــــــع حـيـل .. اني كنت عايشته مع واحد غير عن تركي ..
واحد كنت أحبه .. و ما أدرري اذا بعدني أحبه .. تنهدت .. ما أبي أفكر في شيء ثاني ..
خلني في حالي و بس .. انتبهت لـ صوت جنبي ناظرت الجهة الثانية .. شفت تركي جاي و هو يركض بهروله ..
أبــــيه عليك تركي شكله كل صباح يركض .. كان يناظر البحر عقب لف على قدام .. و لما شافني ابتسم ..
رديت له الابتسامة .. و رديت أناظر قدام .. وصل لي و ركع يتنفس بتعب .. عقب جلس على الرمل و هو يتنهّد ..
و ناظرني من فوق لـ تحت قبل يهمس ببحه ..
تركي : تهبّلييين !!
طنشت مغازلته و ظلّيت اناظره امّا هو ابتسم و سال ..
تركي : شاللّي مقيمك ..؟
ريمان : عادي ما جاني النوم ..
تركي : زين تعالي أجلسي ..
و أشر لي جنبه أجلس .. بس أنا جلست مقابله ..
ناظرني و جلس يتأمّلني و هو يمسح وجهه بالمنشفه الصغيره اللّي على كتفه ...
توتّرت المشكلة ما عندي سالفة .. و أول مرة أجلس أنا و تركي بدون حواجز و لاّ هواش ..
قرب مني لين صارت ركبتيه ملاصقة لـ ركبتي كان قريب مرّه منّي / همست ..
ريمان : تركي أبـعـد ..
تركي : تخافين مني ..
ريمان : لا ..
تركي : زين خلاص ..
جلست أناظره عقب شلت عيني عنه و أنا أتحاشى نظراته بارتباك / و لما مليت حطيت يدي على خده
و لفيته للجهة الثانية ..
ريمان : بس حشا أكلتني ..
مسك يدي اللي على خده ..
تركي : ليش ما تحبين نظراتي ..
سحبت يدي منه .. و قمت من عنده مشيت شوي أبي أبعد عنه لأني بديت أتوتر قام و وقف قريب مني ..
تركي : ما جاوبتيني ..
ريمان : بس كذا أكرهها ..
لفني له .. و جلس ماسك كتوفي قربني منه و قال بنبرة ما فهمتها ..
تركي : و أنا . . تكرهيني ؟
هزيت رأسي بمعنى .. " ايييييه " ..
قربني أكثر منه لدرجة حسيت بـ دفا أنفاسه حطيت يديني على صدره .. عشان ما يقرب أكثر ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك