رواية قلوب تتراقص على انغام الالم -48

رواية قلوب تتراقص على انغام الالم - غرام

رواية قلوب تتراقص على انغام الالم -48

أروى بكل فضول:بيجتمعون موب على أساس اجتماعنا بيكون السبت ..؟!

ناظرتها أم تركي بكل ضيق:و من متى الرجاجيل يلتزمون بالوقت اللي نحدده إنا ..؟!

سكتت و علامات عدم الرضا على وجهها .. دققت فـ وجه أمها المتعب .. و رجع يتملكها الفضول:إلا وين كنتي يمة ..؟!

أم تركي و هي توقف:فـ بيت أبو ياسر ..؟!

أروى و بعيونها الاستغراب:من أبو ياسر ..

أم تركي:أبو لمى .. رحت أخطبها رسمي ..

أروى بكل ضيق:رحتي تخطبينها من غيري ..!!

أم تركي:ما كنت مخططة .. يا الله جت من الله ..-زفرت بكل ضيق و هي تبعد عنهم ..

.._.._.._.._.._..

ناظرت فـ ساعتها بكل توتر:طيب ما قالوا لك ليش ..؟!

بسام و هو يحرك كرسيه:لاء و محد يعرف بعد ..

ريناد بتوتر أكبر:اليوم جنى راحت لبيت عمي أبو تركي و الحين أنتوا بتجتمعون .. أكيد فيه إن ..؟!

بسام بكل ضيق:الله يهديك بس يا ريناد أنا وش اسوي لك يعني ..

قربت منه و بكل لوم:أسفه والله حبيبي .. بس وش أسوي خايفة على جنوو ..

زفرت:طيب دقيتي على ريان ..؟!

ريناد بكل توتر:دقيت بس ما راح يقدر يجي لأنه بيطلع من الشركة لبيت عمي أبو تركي ..

و أنت تعرف الطريق من الشركة لبيت عمي أسهل و غير عن طريق بتنا ..

زفر بكل ضيق:طيب بدر ..

ريناد:بدر ما يرد .. ما لك إلا سطام .. توني سمعت خالتي تكلمه برا ..

تنهد بكل ضيق:أخاف يكون راح .. تدرين بلاش من الجمّعة معهم ..

ريناد:بس عمي دق عليك حول الخمس مرات يحرصك تجي .. و بعدين وش فيك على سطام ..؟!

ناظرته بكل تفحص:من جيت من الشرقية و أنت لا تكلمه و لا تجلس معه حتى الأكل ما تطيقه بوجوده ..

بسام:تتخيلين الله يهديك ..

ريناد و بصوتها نبرة زعل:ما عليه كلها شهر شهرين .. إن شاء الله لو تمر سنة مصيري أعرف اللي صار لك بالشرقية ..

بسام:وش رايك تدفيني لبرا .. أحسن ..!!

ناظرته بلوم:إن شاء الله ..

.._.._.._.._.._..

نزل عيونه على ساعته .."كلها كم ساعة و أكون على أرضك يا أمريكا و يرتاح بالي للأبد .."

خذا مبارك نفس بكل راحة ..

لفت البتول عليه و الطفش متملكها:برووك حبيبي ..

لف عليها:خير حياتي ..

البتول:ما صار لنا ساعة من اقلعت الطيارة و أنا حاسة بالطفش .. كم بقي ..؟!

ابتسم:تونا بقي كثير .. ما تشوفينهم خففوا من الأنوار .. حطي رأسك حياتي و نامي ..

ناظرته بكل ضيق:اووف .. من جد طفش ..

مبارك و هو يهدي من نبرة صوته:حياتي عندك كمبيوتر الطيارة فيه العاب و إلا أقولك لاب توبي تحت رجلك طلعيه و العبي ضيعي وقتك ..

البتول بكل حماس:فيه نت ..!!

ناظرها بلوم:إذا الجوال ممنوع أكيد النت ممنوع ..

زفرت بكل ضيق:أووف أنام أحسن ..

ابتسم لها و هو يريح رأسه على كرسيه .. حتى يغط فـ النوم ..

ناظرته بلوم .."طبعا متعود على هالجو ..!!" ..

.._.._.._.._.._..

أروى بكل لوم:حسبي الله على عدوانك يا جنوو ..

جنى و هي تقلب فـ الأرواج:وش فيك يا الرجة ..؟!

ناظرت أروى فـ ساعتها:الحين كل الرجاجيل فـ بيتنا حرمتيني من الأخبار الحصرية ..

جنى:ارتاحي بس موب راجعة للبيت لحد ما يطلع الكل .. صدق عامر يوم أنه يخترع هالفكرة ..

أروى بكل عصبية:حسبي الله عليك أنتي و عامر ..

زفرت بكل ضيق:استغفر الله العلي العظيم ..- رن جوالها .. يكمل تعكير المزاج بصوته المزعج ..

لكن أول ما لمحت أسمها رجعت تبتسم من وراء النقاب ..

جنى و هي تبعد عن البايع:هلا و الله و غ ..

قاطعتها:يا الشينة يا المخيسة يا الخاينة ..!!!

جنى:الله .. !! الله ..! ... كل هذا لي وش سويت لك ..؟!

لمى:كلمتي زوجة اخوك عني ..!!

جنى و هي تقرب من الملابس:لا والله .. طلعت من البيت الصبح بدري و لما رجعت فاجأتنني بالموضوع .. أكيد انقلب البيت عندكم ..

لمى و هي تلعب بأطراف شعرها:انقلب البيت و بس ..!! كل البيت اعتفس فوق تحت .. دقت قبل لا توصل بعشر دقايق .. يا الله لحقنا نجهز ..

جنى:عاد وش دعوة .. فضحتي نفسك قدامهم .. و قلتي جاية تخطبك ..!؟

لمى:استغبي عليهم يعني .!! كلهم يدرون أنها جت لأمي و خطبتني شيء طبيعي تجي هي و ولده و أبوه عشان يخطبون رسمي ..

جنى:ايه .. عاد وش ذكرك فيني الحين .. من العصر للعشاء توني أجي فـ بالك ..

لمى:لا والله أنتي على بالي من صحيت .. بس من طلعت أم تركي من عندنا و مسكوني البنات مسكه الله لا يوريك ..

جنى:ايه عاد عرق اللقافة اللي ماله لا أصل و لا نهاية ..!!

لمى:لو موب التعب كان ما سمعتي صوتي بعد ..

جنى:اوف .. اووف اللي عندك أخطر من اللي عندي ..!!

لمى:عندنا و عندك خير ..

جنى بكل تردد:صح ما قلتك لك لموو ..

لمى:اطربيني ..

جنى:اليوم كنت عند جوري بالمستشفى ..

لمى:مستشفى .. سلامات عسى ما صار لها شيء ..

جنى:لا سليمة ..

قاطعتها:شكلها خذت ع المستشفيات ..

ضحكت جنى:هههههههههههههههههه .. لا ولدت أخيرا ..

لمى بكل صدم:احلفي ..!!

جنى:ايه والله .. جابت رشود ..

لمى:قهررررر ليش ما قلتي لي أجي معك ..

جنى:دقيت عليك ما رديتي ..

لمى:ايه وقتها كانت مرت أخوك عندنا ..

جنى:بقي أسبوع قدامها لحد ما تطلع .. و حتى لو طلعت .. تقدرين تزورينها فـ بيتها ..

لمى:و أنتي الصادقة بعد ..

مرت لحظة صمت .. رجعت تتكلم لمى:جنو محتاجة أقعد معك ..

جنى بكل حماس:الله .. الله ما أمداها تبدا العطلة اشتقتي لي ..

لمى:هههههههههههههههه .. دوباا ..-زفرت براحة:لا جد جنى أبي أكلمك باشياء كثيرة ..

جنى:بعد عمري تبين أجي لعندك عادي ..

لمى:لا بيت جدي زحمة و صعبة وش رأيك أنا أزورك ..؟!

جنى:ايه حيآك .. بسسس ..

لمى:بس وشو لا تقولين مرت أخوك بانت على حقيقتها و قلبت عليك ..

جنى:ههههههههههههههه متأثرة فـ الأفلام ..!!

لمى:لا جد أتكلم .. وش فيك ..؟!

جنى:اليوم نقلت لـ بيت أخوي أبو تركي يقولون مؤقت بس أشك ..

قاطعتها أروى بكل ضيق:أنتي وينك .. عامر داق علي يقول صار له نص ساعة يدق عليك ما تردين ينتظرنا برا ..!!

جنى:لموو حبيبتي .. أنا بطلع من السوق الحين أول ما أوصل البيت بدق ..

لمى:أوكي باي ..

.._.._.._.._.._..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ناظرت فـ ساعتها .."أوف 11 و خلصت عزيمتهم .. مدري الوقت اللي طار أو أنا اللي لهيت ..-زفرت بكل ضيق .."لا أمس و لا اليوم الصبح حسيت فيه ..

بس الحين خلاص المواجهة قرب وقتها .. إذا تكلم و كان طبيعي يعني كله خوف و توتر بس إذا نام فـ الصالة من جديد هاذي اهانة لي و دليل على أنه ما يبيني ..

قربت منها و همست:ليون ..

لفت ليان و ابتسمت لوعد:هلا ..

وعد و بعيونها نظرة خوف:بغيتك بكلمة رأس ..

ابتسمت لها:خير وش بغيتي ..

وعد و هي تمسك يدها و تجرها وراها:موب هنا تبينا ننفضح ..

دخلت للمجلس و سكرت الباب وراهم ..

ناظرتها ليان بكل خوف:وعد وش فيك ..؟!

وعد و هي تجلس و تجلّسها معها:أدري بتقولين عني ملقوفة .. بس صراحة أنا ما أعرف أوقف كذا و أتفرج من بعيد ..

ليان و الاستغراب يزيد بداخلها:وعود ما فهمت شيء ..!!

زفرت بكل ضيق:أنتي و راكان متهاوشين ..؟!

ليان بكل خوف:ليش قايل لك شيء ..؟!

وعد وهي تقرب أكثر و تهمس:اليوم وجوهكم تقول كذا .. حتى الخوف و التوتر ما يبين عليكم و كأنكم متهاوشين ..!!

ابتسمت بكل راحة:يتهيأ لك .. الله يهديك بس لا تقعدين تألفين يسمعك أحد يحسبها حقيقية ..

وعد بنبرة صوت أقرب للترجي:ليون أدري أنك حبوبة .. و مالك فـ المشاكل .. حتى ركون أخوي مثلك بس أنا متأكدة إذا موب متهاوشين فيه سوء فهم بينكم ..؟!

خذت نفس:وعود وش فيك وش هالاصرار ..؟!

وعد:راكان أخوي و خبز أيدي .. اليوم ما كان طبيعي .. هو مزاجه شوي صعب بس صدقيني قلبه أبيض و ما يحب المشاكل .. إذا هو قال لك شيء أكيد موب قاصد ..

ليان و هي تحس بكلام وعد يضغط على أعصابها أكثر:وعد وش فيك ..!!؟!!

وعد و اليأس يتسرب لداخلها:قلت لك ما أبي أتدخل ..

قطع كلامها دخلت أمها عليهم ..:وينكم الناس بدت تطلع .. قومي سلمي على الحريم ليان ..

وقفت ليان:إن شاء الله خالتي ..

ناظرت فـ بنتها بكل لوم:لاحقة ع السوالف قومي شوفي بنات خالتك عفسوا المطبخ الله يهديهم ..

وعد و هي تطلع وراء أمها:إن شاء الله ...

.._.._.._.._.._..

رمى باكيت السجاير على الطاولة بكل ضيق ..

رجع يسحب جواله و يدق عليها للمرة الألف من أمس ..

رنة ..

ثنتين ..

ثلاث ..

مشغوووووووول ..

نزل الجوال .. خذا مياف نفس من سيجارته يهدي أعصابة المتوترة ..

رن الجوال رد بكل حماس:ألو ..

من وراء السماعة:أخيرا رديت .. وينك من أمس ..؟!

زفر بكل ضيق:وسن موب فاضي لك ..

وسن بكل لوم:مياف وش فيك علي من يومين و أنت ما ترد علي ..!!

و كل ما كلمتك تسـ ..

قاطعها بكل عصبية:وسن قلت لك موب فاضي لك .. لما أكون فاضي برجع أدق عليك أوك .. باي ..

سكر الخط و رجع يدق على غزل من جديد ..

و على طول عطاه مشغول ..

رمى الجوال بكل قوته .. خبط فـ الجدار و تنثر على الأرض ..

فرك جبينه بكل توتر .. و رجع يسحب باكيت السجاير يولع سجارة ..

.._.._.._.._.._..

الظلام اللي يملاء المكان و نور الآبىجورة الخافت ..

معطي جو رومنسي للغرفة ..

يذكرها به مع أنها دايم ما تحب تتكلم مع عن الحب لكنها تفقده كثيير ..

ناظرت فـ جوالها بكل تردد ..

حست بإحساس الذنب لمجرد أنها فكرت ترجع تدق عليه ..

غطت ريتاج نفسها .. محاولة يأسه تشتت تفكيرها بها ..

سمعت رنة الجوال .. رجعت تجلس ..

سحبته و لمحت أسمها ع الشاشة .. ردت بكل خيبة أمل:ألو ..

أروى بكل حماس:ألو أهلين .. نمتي ما كأنه بدري وش منومك من الحين ..؟!

ريتاج بكل ضيق:اوووف .. وش تبين مني ..؟!

أروى:يووه شكلي أزعجتك خلاص أدق بعدين ..

ريتاج:وش فيك خلاص أنا جالسة الحين وش بغيتي ..!!

أروى بكل توتر:أبي أعرف وش صار اليوم بين الرجاجيل ..

ريتاج و هي تلعب بأطراف شعرها بكل طفش:مدري .. ريان و بدر من رجعوا على طول طاروا لغرفهم ..

أروى بكل ضيق:اووف محد متكلم يعني ..!!

ريتاج:يا خبر اليوم بفلوس بكرة بلاش .. و بعدين أنتي وينك موب الجمّعة فـ بيتكم ..

أروى بكل ضيق:جنوو الدوبا لعبت علي قالت بتطلع تشتري غرض و سنترت فـ السوق ..

صرخت من بعيد:ووجع لا تحشين فيني أنتي معها ..

ابتسمت بتلقائية:طيب .. إذا الموضوع مهم لازم يقولون لنا أنتي حطي رجلك و يدك بموية باردة و ..

قاطعتها:هالكلام تقولينه لـ ريناد لـ جنى .. ليان لكن أنا ..!!

ريحت ظهرها على ظهر السرير:طيب وش بتسوين يعني ..!!

أروى بكل ضيق:مدري ..

ريتاج:أروى .. جد جد يبيلك علاج ..

أروى بكل ضيق:فاارقي بس ..

ريتاج:هههههههههههههههههههههه .. والله جد حالتك صعبة ..

أروى:الشرهة علي داقة عليك ..

ريتاج:ايه صادقة ..

أروى:شف ..!! .. طيب باي ..- سكرت الخط من غير ما تسمع ردها ..

زفرت بكل ضيق و طيف فيصل يرجع لخيالها ..

"حتى الهذره مع أروى ما خلتني انساه .."تنهدت بكل ضيق .."رتوج تعوذي من بليس و نومي أبرك يكفي اللي صار" ..

.._.._.._.._.._..

مشت بخطوات هادية .. تحاول تتأخر على شقتها .. على قد ما تقدر ..

بس هذا قدرها المحتوم .. همست ليان فـ خاطرها .."يارب يكفيني اللي شفته بحياتي .. ما أبي مشاكل أكثر" .. توكلت على ربها و فتحت باب شقتها و دخلت ..

دخلت للصالة .."محد فيه .. الحمد لله شكله ما رجع .." ..

انفتح باب الغرفة .. طلع راكان و هو يمسح شعرها المبلول بطرف الفوطة المرتخية على كتفه ..

صوت الباب أرعبها .. و طلعت راكان منها شلت حركتها و خلتها واقفة متسمرة فـ مكانها ..

رفع عينه بعد ما لاحظة طيف شخص .. ناظر فـ ليان بكل تعجب .. و هو يحاول يفسر تعابير وجهها المتجمدة ..

زفر بكل راحة وهو يرمي طرف الفوطة و يشد على الروب:وش فيك .. كأنك شايفة جني ..؟!

ليان بكل خوف اختلط بالتردد:لا .. بس فاجأتني ..!!

جلس على أقرب كنبة له:من متى و أنتي هنا ..؟!

ناظرت فيه و فكرها يسبح بها فـ عالم ثاني .."وش بيفكر فيه الحين .. بس أنا ما سويت شيء بس شكله متضايق ..

علا صوته بكل ضيق:ليااان ..

انتبهت له .. ارتبكت:خير ..!!

راكان و هو يرمي الفوطة بعيد:ساعة أكلمك ما تردين ..؟! و بعدين ليش واقفة مكانك تعالي اجلسي ..!!

ارتبكت أكثر .. و مشت بخطوات مغصوبة .. جلست قريب منه ..:ما سمعتك ..!!

راكان بكل ضيق:سألتك من متى و أنتي هنا ..؟!

حست بأنفاسها تضيق بها:قبل لا تطلع من الغرفة بدقيقة ..!

ناظرها بتفحص ... اخيرا جت اللحظة الي تمناها من صحى .. يشوفها و يتأكد من جمالها اللي ساحر أمه و أخته .."عادية وجهها كله مكياج ..

قطعت تفكيره بوقفتها ..

راكان و هو متفاجأ:على وين ..؟!

ليان بكل توتر و خوف من نظرة راكان لها:بغيّر ملابسي ..

راكان بنبرة أقرب للأمر:لا تغيرين اجلسي ..

رجعت تجلس بهدوء .. عكس موجة الخوف الهايجة بدخلها .. حاس بصوت أنفاسها البطيئة و دقات قلبها السريعة .. كيانها متلخبط مثل تفكيرها بالضبط ..

كمل راكان فحصه لها بعيونه .."ألحين كل العايلة شبعت منها و أنا يا زوجها توني أشوفها .. بس مشكلة أبي أشوف شكلها من غير مكياج .. لو قلت لها تقوم تبدل بتعصب علي ..

حست بقلبها راح يوقف من الخوف و التوتر .. للحظة حست بدموعها راح تخونها ..

وقفت للمرة الثانية .. و بنبرة صوت اقرب للحدة:أنا تعبانة .. بدخل أغير و أنوم ..

ناظر فيها بكل هدوء .. حرقها:طيب روحي .. بس ارجعي لأني ما فيني النوم و أبي أسولف معك ..

زفرت بكل ضيق و هي ترفع طرف فستانها حتى ما تطيح فيه .."طيعا ما فيك النوم من أمس و أنت ما وراك شغلة غير النوم" ..

دخلت الغرفة و للحظة حست على نفسها و كبحت توترها و هي تسكر الباب بكل هدوء ..

سندت ظهرها على الباب .."يا الله وش اللي يدور فـ باله يا ليتني أعرف .."

.._.._.._.._.._..

حط رأسه ع المخد و نظرة التوهان فـ عيونه ..

زفر بدر .. بكل ضيق ..

قرب ريان و جلس على طرف سريره مقابل لأخوه ..:وش فيك متضايق ..؟!

فرك جبينه بكل توتر:الحين عرفت ليش أبوي كان ساكت لي كل ذيك المدة ..؟!

ريان:اللي يشوفك و أنت متفاجأ .. ما يقول أنك أنت اللي كنت تقول كذا ..

لف بدر عليه:تتوقع عرفت ..!!

هز رأسه بالنفي:ما ظنتي .. هالموضوع يبيله جلسة و تركيز ..

وأنت شفت عماني=أعمامي" كلهم كانوا معنا و بالموت فهّمونا ..

زفر بضيق أكبر:بديت أخاف ..

ريان و الاستغراب بصوت:وش يخوفك ..؟!

بدر:كل شيء ..

زفر و هو يوقف:أنا بالنسبة لي الموضوع سهل ..

رفع عينه و نظرة التفكير ترتسم فيها .."حتى أنا صار سهل .. بس ما أعرف شلون و كيف ..

فطع نفسه و هو يسحب الجوال ..

يدور أي شيء ممكن يلهي فكره به ..

سحب ريان فوطته و دخل للحمام ..

.._.._.._.._.._..

ناظر فـ ساعته .. "1 آخر الليل" .. تلفت يمينه و يساره .. :الشوارع فضت ..

زفر تركي بكل ضيق .."وش فيني اليوم موب طبيعي .."

نزل رأسه على الدركسون .."وشلون أكون طبيعي و هي مع غيري ..!! " ..

تنهد بكل ضيق:كلها خمس أيام و تكون زوجتك عندك .. وشلون بـ أعيش مع غزل و صوت و صورة ليان عايشة بداخلي .!.!!!

زفر بكل ضيق .. و هو يتمنى لو يقدر يرجع خمس سنين لوراء ..

ويتزوج ليان من غير ما يعطي لـ هالتقارير أي بال ..

.._.._.._.._.._..

نثرت شعرها يمين و يسار تعمدت تستشوره حتى تتاخر عليه ..

ناظرت في ساعتها "وحدة ونص" .. "أكيد نام .. أمس هالحزة نايم أنوم بس و أتركه .. لا أخاف يعصب علي كأني ناقصة يعني .. أطلع و أمري لربي" ..

خذت لفة تتفحص فستانها الناعم .. "أخاف يعلق تعليق سخيف ع الفستان بس هذا فستان بيت يالله وش هالتوتر .. لو كان تركي -.. نفضت رأسها حتى تطلع تركي منه ..

"وش تفكرين به يا ليان .. الحين أنتي على ذمة واحد غيره" ...

.. قرت كل المعوذات في نفسها ما بقى دعاء تحصين و لا استعاذة إلا و ذكرتها ..

سمت بالله و طلعت و هي تحس بدقات قلبها تعد الوقت معها ....

سمعت صوت التلفزيون عالي "أكيد نام و نسى يقصر" .. مشت خطوتين بعد و طلعت للصالة .. شافته جالس و مغير ملابسه ولابس سبورت .. ناظرته بتعجب"متى أمداه يغير و أنا كنت في الغرفة طول الوقت" ..

زفرت براحة .. حتى الروب اللي كان عليه موترها ..

حس بوجودها .. رفع عينه من على الشاشة بعد ما كان مركز .. و لف عليها ..

تنح لثواني .. حس بالمفاجأ تشله .. "صادقة وعود .. طالعه من غير مكياج أحلى" ..

خانها تفكيرها وظلت واقفة فـ مكانها و نظرته تحرجها أكثر و أكثر ..

راكان و هو يتدارك نفسه:وشلون يعني كل مرة لازم أقول تعالي اجلسي ..؟!

بكل إحراج قربت وجلست قريب منه .. ابتسمت بكل توتر:تأخرت عليك ..

ناظر في ساعته:تونا بدري .. –ناظرها بتعجب: لا يكون تنومين بدري؟؟

ليان بكل هدوء:على حسب ..

استانس .. حس بالسوالف جت لعنده من غير تعب:وشلون على حسب ..؟

ليان و هي تحاول تسترسل مع الموضوع و تنسى التوتر:يعني إذا كان وراي مناسبة اعمل حسابي إني بسهر أما إذا ما وراي شيء أنوم بدري ..

راكان و بصوته خيبة أمل .. حس أنه ما في مجال يطول هالموضوع:اهاا .. زين ..

ناظرته بكل تعجب لحد هاللحظة موب عارفة وش يبي منها ..!!

لحظة صمت طويلة خيمت ع المكان .. حس بتوتر غريب يتسرب لداخله ..

خذا نفس و تكلم من غير تفكير:بالنسبة لأمس كنت حاب إنك تأخذين راحتك .. أكيد ما راح يزعجك اليوم ننوم في غرفة وحدة ..؟!

ليان حست الموضوع بيأخذ طريق ما يعجبها حبت تغير المسار.. بكل تردد:يعني ما كنت منزعج ..؟!!

راكان بكل تعجب:ما في شيء يزعجني ..!!

ليان بكل إصرار:غريبة كان واضح عليك إنك متضايق حتى وعد حست ..-رجعت سكتت حست أنها تمادت بجرأتها الغريبة عليها ..

و خافت يقلب الموضوع على وعد المسكينة ..

رفع حاجب:وعد وش فيها ..؟!

بلعت ريقها بكل خوف:كم مرة تسألني إذا في شيء مزعجك ... أو مثل كذا ..... اليوم العصر كان واضح عليك أنك متضايق .... عشان هي وأمك يسولفون و أنت مو معبرهم ..

رجع يهدا بعد ما حس بأعصابه راح تنفجر من الضيق على وعد:ايه اليوم ..

ما أحب العزايم عشان كذا كنت متضايق شوي ..

ليان"ويوم الملكة وش كنت ..؟!" ..

راكان .. أخيرا وصل للي يبيه:أنتي اللي أمس كنتي متضايقه .. فيك شيء ؟! ..

ليان بكل خوف:شيء طبيعي اتضايق .. تركت أهلي وأخواني .. أنت شايف أنه ما يستحق إن أتضايق عشانه ؟! ..

راكان:لاء .. بس ..

ليان بكل خوف .. :بس ايش!!

راكان:ولا شيء .. – حب يغير السالفة:تعشيتي زين .. أكيد عماتي ضايقوك بنظراتهم ..

ليان بكل إحراج:لا عادي ..

راكان:هاذي عادت الكل إذا صار في شخص غريب الكل يناظر فيه ..

ارتسمت علامات استفهام كبيرة على وجه "وش تبي توصل له بالضبط مو قادرة أفهم شيء من كلامك .. يا الله ع الأقل يذوب الجليد ..!!" ..

راكان .. بعد لحظة صمت رغم قصرها حس بها طويلة:في فيلم بدا من دقايق .. نتابع ..

خذت نفس:براحتك ..؟!

بعد تردد:طيب وش رأيك تشوفين إذا في شيء فـ المطبخ ينوكل لأني ما تعشيت زين..؟!

وقفت:إن شاء الله ..-مشت بخطوات سريعة للمطبخ ..

زفرت بكل راحة .. رفعت يدها و هي تراقب أطراف أصابعها المرتجفة .."يا الله وش هالخوف .. اوووف الحمد لله للحين الليلة راح تعدي على خير" ..

ريح ظهره على الكنبة .."وش فيك يا راكان .. اللي يشوفك يقول أول مرة تتزوج ..-زفر بكل ضيق و هو يذكر مرام ..

سحب الريموت و علا ع الصوت حتى يشتت فكره ..

.._.._.._.._.._..

سحبت غزل جوالها و هي تحس بطفش من إصرار مياف ..

ناظرت فـ الشاشة الجوال .. مسج جديد ..

فتحته .."تكفين وقفي كل شيء .. قلت لك مستعد أجي أخطبك و أتزوجك .. أنت تبينه صح؟! ..

كل اللي بيننا كان لعب بس أنا ما كنت ألعب و إذا أنتي تلعبين أنا بكشف اللعبة"

جلست مصدومة .. هذا أبدا موب أسلوب مياف ..

زفرت بكل ضيق و هي تسحب نفسها من الغرفة ..

دقت عليه .. أول ما رفع السماعة:أنت انهبلت ..؟!

مياف بكل حسرة:يعني لازم أستخدم معك هالأسلوب حتى تردين ..؟!

زفرت بكل ضيق:مياف صدقني ما كان بيدي أنا مدري شلون وافقت ..

مياف بكل لوم:ليش توك تقولين لي .. ليش ملكتي و أنتي تعرفين أني أحبك شاريك ..

اختنق صوتها:و الله ما عرفت وش أسوي .. يعني أجي و أقط نفسي عليك ..

مياف:كان يكفي أنك تقولين ولد خالي خطبني ..!

غزل:ما عرفت .. و الله العظيم حسيت بفكري ينشل و ما عرفت وش أسوي ..

مياف:لازم تسوين شيء .. لازم تطلقين منه ..

غزل بكل توتر:مياف صدقني هو نصيبي ..

صرخ بكل عصبية:لا تقولين كذا .. قلت لك أنا شاريك ..

قاطعته و صوت شهقاتها يسبقها:صدقني مياف من قالوا لي ولد خالي يبيني و أنا مو قادرة أسوي شيء .. هاذي قدرة رب العالمين ..

خذا نفس و هو يحس بصوت غزل يلعب بمشاعره ..

مياف:تبين تنهين كل شيء ..؟!

بلعت ريقها حتى تضيع عبراتها:إذا تحب لي الخير .. أنساني و أدع لي ..

.._.._.._.._.._..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أكثر من ساعة معلقة عيونها بشاشة الاب توب ..

رجعت تزفر بكل ضيق:اوووف ..

لفت جنى عليها:لا حول و لاقوة إلا بالله .. من جد صادقة ريتاج ..!!

أروى تغير الموضوع:موب سالفة جمعة الرجاجيل ..

جنى و هي تقرب و تجلس جنبها:أجل ..؟!

أروى:الـلاب توب كان معلق ..

ناظرته بطرف عين:أيه واضح ..

سكرت الاب .. :الحين أنتي وش تبين ناشبة ..؟!

جنى:مالت عليك بس من أول يوم كذا .. شكلي بشيل قشي و أرجع لبيت أبو بدر ..

أروى بكل لوم:وش فيك صايرة زعول من كلمة وحدة تزعلين ..؟!

جنى:الله أعلم من اللي يحترق من الصبح ..

وقفت أروى:أوف لا تذكريني .. بنزل أسوي لي شيء أشربه .. تبين شيء ..

جنى و هي تسحب الاب:أي شيء يطلع من يدك ..

طلعت برا الغرفة .. و هي تسكر الباب:أوك ..

يتبع ,,,

👇👇👇