رواية جوهر حضورك اعلن ميلاد قلبي -4
فتحت عيوني ورفعتهن بخوف وتوسل , شفته يقبض صبوعه ويهوس بهن في بطن يديه بقوه يمنع عمره أنه يمد يده عليه ..
نزل يديه , ورص عيونه وهوس بضروسه وقال : من وين يايه ؟؟
قلت بخوف: كنت رايحه مع ربيعتي الصالون ..
علي : لاوالله وراده الحين , ماشفتي الساعه كم , ماحيد عندنا بنات يسترغدن لين الحين ؟؟
أطالعته بحتقار لكلمة يسترغدن ورديت عليه: بس أمي تعرف وهي ولاية أمري مب أنته ...
علي: بــعد أطولين لســانج , صدق محد رباج زين ..
تجمعن الدموع في عيوني وقلت بصوت مخنوق : هيه توك تدري أن محد رباني ترا ماعندي أبو يربني ويهتم فيني...
شفت في عيون علي الصدمه من كلامي , سكت ولا رد عليه ..وهو يطالع الدموع الي نزلت على خدي ..
مسحت دموعي بسرعه ,ورحت صوب غرفتي..
سمعت صوته : نوره , صبري!!
بس أنا ماأهتميت له , ودخلت غرفتي بسرعه وسكرت الباب وغفلته ..
يلست على شربيتي وأنا أمسح دموعي الي كانن ينزلن بدون توقف , تذكرت أبويه , أبويــه ....
أبويه الي كان يضمني, الي كان يلبي كل طلباتي , تذكرت يوم كنت أنام في حضنه ..
صح ذكريات السبع سنين وثمان سنين مشوشه , بس ما اقدر أنسى أبتسامته الحنونه , صوته إلي لين الحين كأني أسمعه ...
في اشياء ماأقدر أنساها , ابدا ...
صرخت : أبـــويه وينك , ليش خليتني , ليــش؟؟؟
أبا حنــان , أبــا حب , أبــا حد يهتم فيني ...
زاد صياحي , بذكريات وأنا أشوف أبويه تعـبان حاط يده على صدره ويعاني من ضيق تنفس , وأعمامي حوله ... مع أني كنت صغيره بس ها الموقف أنطبع في ذاكرتي ..
أندسيت ورا الباب بخــوف , من منظر أبــويه المتألم , ويلست اصــيح بضيق .
كانت أيام تخوف , بعدها بكم يوم توفى أبويه ...
ماكنت أعرف شو فــيه أبويه , بس بعدين عرفت أنه كان فيه أرتخاء في عضلة القلب , وأرتفاع في ضغط الدم ..
سبب له جلطه , وماقدروا ينقذونه وماااات ....
والمشكله أن محد راعى صغر سني وخبروني أنه مات بكل بروده , كانت هذيج الايام قاسيه , وماكنت مستوعبه أن أبويه خلااااص مات , أول شي كذبتهم ولكن مع مرور الايام صدقت لان أبويــه مارد لنا...رحل عنا خلاااص ..
مسحت دموعي بألم..
أستويت صدق ماأطيق علي, ووايد يدخل فيني , ويبا يتحكم فيني...
سرت خذيت لي شاور و لبست بجامتي وأنسدحت على شبريتي..
ماياني رقاد , أففف أحس بالضيقه ,قمت وحطيت شيلتي على راسي وطلعت من غرفتي ...
كانت الساعه وحده...
سرت الصاله وشغلت التلفزيون , لقيت لي فلم رومنسي, ويلست اطالعه....
غمضت عيوني ...
أحلام غير مفهومه , أشخاص ماأعرفهم .....
فتحت عيوني , على صوت خالي ...
خالي سعيد: نوره شو مرقدنج هنيه ؟؟
حطيت يدي على ويهي وأنا أتمتم: هاا..
أبتسم خالي ومسح على شعري ,وقال: سيري غرفتج ورقدي..
قمت بتعب , وأنا أسحب ريولي سحب ...
وصلت غرفتي , وعين وحده مسكره ..
حطيت يدي على راسي أحك شعري , بس لفت أنتباهي ظل شخص واقف قريب مني ..
أطالعت صوبه , وأنا مش مستوعبه من هذا ..
تأففت يوم عرفت الواقف, كان يتأملني بنظرات غريبه ...
ما أهتميت له , دخلت غرفتي , وسيده طحت على شبريتي ..
ورحت في سابع نومي ..
فتحت عيوني على ضوء الشمس إلي أزعاجني , والذبــابه الي كانت تزن فوق راسي ...
أففففففففف الواحد مايقدر يرقد براحه , رحت الحمام وغسلت ويهي ..
رديت الغرفه وأطالعت الساعه كانـت 10 ونص ...
يلست على شبريتي , وأنا أحاول أتذكر , شو أستوا أمس ..
أممم خالي وعاني وسرت غرفتي , بس في واحد كان واقف عدال الغرفه , أيوا علي , أميييييييي ليكون شافني بدون شيله يالفضيحه ..
الصراحه ماأكذب , مها لها تأثير عليه , أستويت أطلع قصتي جدام عيال خالي , بس قصتي مب شعري كله ....
لبست جلابيتي , وطلعت من الغرفــه , نزلت تحت أممم مالقيت حد ...
دخلت الصاله , لفت نظري واحد يالس على الكراسي ويقرأ جريده ...
تقربت منه , ودقات قلبي تزيد , رفع راسه صوبي ...
بلعت ريجي بصدمه , اخر أنــسان أتوقعه جداااامي الحين هذاااا ...
أترجفت بعنف , وأنا أشوفه وقف متردد وخايف , زاد تنفسي , والرعب تملكني
أطالعني بنص أبتسامه : شحالج نوره ...؟؟
فتحت عيوني على وسعهن , صدق أنه بلا أحساس بلا مشاعر , كيف يكلمني
رديت على ورا بخوف , أطالعني بعيون تمثل الحزن وقال: نوره ..
قاطعته بصرخه: أسكت , ما ابا اسمع صوتك ...
تقرب مني وقال : نوره والله أني أسف..
رديت على ورا أكثــر وأنا أرتجف وقلت: لالا, لاتقترب مني .. لاتقترب..
رد مكانه , وتكلم : معقوله تخافين لها الدرجه مني ؟؟ أدري أني غلط بس صدقــيني كنت مراهق و..
بس قبل مايقول أي كلمه ثانيه أنطلقت لغرفتي , ماأقدر أستحمل أشوفه , أخاااف منه لدرجه فضيعه...
الصراحه بديت أكره الريايل بسببه , أحسهم كلهم نفس الشيء ..
مرت الايام , وبديت أقلد مها باللبس , الصراحه أستايلها يعيبني ...
مره كنت اتمشى معها في المدرسه ورحنا ورا المدرسه عند ملعب الرياضه ..
ويلسنا نسوالف , بس مها ها المره بدت تكلمني عن الشباب , وكيف تقص عليهم , وعن الجات ..
أنا أول شي أستغربت شو ها الجات , وياني فضول , ومن كلامها تشوقت أدخله ..
قلت : خاطري أدخله ...
ضحكت مها: أوكي بطرش لج الرابط على المسن اليوم الساعه 10 فليل وبنحدر أنا وأنتِ رباعه ...
قلت بفرحه: أوكيه ...
ردينا صفنا , شفت نظرات البنات لنا غريبه , كانهم يحتقارونا ...
كملنا اليوم الدراسي بشكل عادي ,بس البنات ماكانن يكلمني , فما عطيتهن أي اهتمام لان علاقتي بهن مب لين هناك ...
رديت البيت , ومن التعب سيده نمت ...
نشيت العصر , وصليت صلاتي , وبعدها نزلت تحت ...
لقيت الكل تقريبا يالس من غير سلطان وأمي ..
جذبني أن محمد كان يبتسم هو يكلم أمه , فرحت بشكل محد يتصوره ..من زمــان ماشفت أبتســامت محمد ...
التفت محمد لخالي سعيد وقال : أبويه خلاااص السفره بتكون الاسبوع الياي ..
خالي سعيد: أن شاء الله ..
عقدت حواجبي وقلت: من بيسفر؟؟
أبتسم محمد وقال: أنـــا ...
البارت الســابع..
أطالعته بعدم أستواعب : هاا!!ليش؟؟
محمد : بسير أكمل دراستي ..
حسيت بحزن فضيع, دمعت عيوني , وأنا أطالع محمد مش مصدقه ...
كنت أتوقعه بعد سنه بيسافر ,ومــب بها السرعه , صح أحتملت عندم اهتمامه فيني بس أنه يســافر وماشوفه الا في السنه مره , صدق شي ماقدر أتحمله ..
قمت ورحت غرفتي , وأنا أحاول أن دموعي ماتنزل ....
دخلت غرفتي , وطحت على شبريتي ويلست أصيييييييييييح , ليش بروح وبخليني , ليش مايــحس فيني ..
بعد ما ماتوفت نوال حسيت محمد أبتعد عني بدرجــه كبيره , صار مايهتم فيني ومايسأل عن حالي , ولا كأني موجوده أصلا...
أحــس أني وحيــده في ها الدنيــا , محد يحس فيني , محد يهتم فيني ...
سمعت باب الغرفه يتبطل , مسحت دموعي بسرعــه , وحاولت ما أصد صوب الي دخــل...
تكلم بصوت خشن : نوار ...
دقات قلبي زادت سرعتهن, ألتفت صوبه , أبتسم أبتسامه حنونه وقال : تصيحين ؟؟
نزلت عيوني تحت وما قلت شي ..
تجرب صوبي , ويلس على أقرب كرسي موجود في الغرفه, تم يطالعني فتره بعــدين تكلم : نوره , والله أني أحبــج وبعد يمكن أكــثر عن عايشه أختي ...
من قال كلمة أحبج رفعت راسي ... بس يوم كمل فهمت انه مجرد حب أخوي.. حسيييت بالحزن أكــثر..
سكت شوي وكمل : خاطري أســير أكمل دراستي , وصدقني بيي في الأجازات أزوركم ..
هزيت راسي متفهمه ...
أبتسم بحــزن : وصدقيني بشتاق وااايد لج ...
وقف وطلع من غرفتي , مر عليه ها الاسبوع وأنا حزينه ومب طايقه شي , حتى أني غبت عن المدرسه معظم الايام...
يا يوم الاحد وهو يوم سفرت محمد , ماقدرت أتحمل ها اليومين كله يالسه في غرفتي وأصييييييح ..
محد أستغرب لان الكل يعرف أني متعلقه بمحمد ووايد , على أنه أخويــه ...
وقفت عند الدريشه أنتظر محمد يطلع , سمعت دق على بابي رحت صوب الباب وأنا انتفض فتحته طلع علي في ويهي ..
قال: مابتودعين محمد؟؟
نزلت راسي وماقدرت أتحمل ويلست أصيييح ...
رحت صوب شبريتي أحاول أكتم شهقاتي ...
تكلم علي: نوره يعني لين متى بتمين جي ؟؟؟
سكت ولارديت عليه ..
سمعت بنرت علي المطنزه : صدقيني لو تصييحين من اليوم لين باجر مابحس فيج...
رفعت راسي صوبه , وأنا مستغربه منه , معقوله يعرف اني أحب محمد؟؟
قلت له بصوت يرتجف: شو تقول أنته .؟؟
ابتسم علي نص أبتسامه وقال: لاتحريني ما أعرف أنج تحبين محمد , كل شي واضح , تصرفاتج ومشاعرج صوبه كل شي باين ... بس هو مايعتبرج الا مجرد أخت ..
توترت وقلت : انته تتوهم أنا ما أحب محمد ..
قال يقهرني : بعد تجذبين , حبيبتي كل شي واضح وأنا متأكد 100% أنج تحبينه ..
قــهرني , صرخت عليه بدون حاسيه : هيه أحبــه ..
حطيت يدي على فمي ,وأنا أشــوف إلي كان واقف عند الباب يطالعني بصدمه ..
طاحت الشنطه من يده ...
وعقد حواجبــه وقال بصوت عالي: شـــوه ؟؟
صد علي صوبه بصدمــه ..
أطالعته وتميت أرتجف مب عارفه شو اسوي محمد سمع كل كلامنا ....
قلت بتوتر : محمد ..
علي قاطعني وهو يطالع محمد: يالله أعترفي أنج تحبينه ..
محمد يلس يطالعني بنظرات أرعبتني , بلعت ريجي وأنا اشوف نظراته ..
قلت بتوتر: محمد أنا صح أحــبك بس والله مب بيدي صدقني حبي لك مب بيدي ..
حسيت الصدمه شلت حواسه وهو فاتح عيونه ..
ماتكلم بس تم يطالعني بعدم أستواعب , أبعد عيونه عني وأطالع علي ..
وبعدها شل شنطته وطلع برع غرفتي ...
نزلن دموعي , ويلست تحت , وحطيت يدي على ويهي أصيييييح ...
رفعت راسي صوب علي وصرخت: كله منك ..
أطالعني علي بنظره مافهمتها , وراح ...
وقفت , وطلعت من غرفتي وركضت وأنا نازله من السلم , شفته واقف عند باب الصاله وضام خالوه مهره , يودعها وهي تصيــح ..
تقربت منهم , شفته يضم عايشه وبعدها علياء وعبدالله ..
عايشه يلست تصيح ومعاها علياء ...
أثر فيــني ها الموقف , تميت أطالعهم من بعيد , رفع محمد عيونه صوبي وبعدين نزلهن وكأنه ماشافني ...
تجدمت منه يوم شفت الكل أبتعد, وقفت قريب منه وقلت: محمد..
رفع عيونه صوبي وأطالعني حوالي دقيقه وبعدها قال: أســف ..
وراح صوب الباب وطلع ...
ركضت صوب الباب ..
شفته ركب السياره مع خالي وعلي وراح ....
تميت أراقب الســياره لين أختفت ,حسيت بالحزن كلمة أسف شو تعني , يعني يمكن تكون رفض لحبي , ليــش سوا جي حرااام عليه ...ورحت غرفتي أصــيح لقساوة محمد ورفضه لي ...
مرت الايــام , صح كنت أحس بفراغ بعد ماراح محمد ...
بس ها الفــراغ كان ليوم وواحد ...
لان مها علمتني على الجــات , من أرد من المدرسه أيلس في حجرتي طول اليوم على الكمبيوتر ...
صح كلامهم (( قليل الادب )) ماعيبني بس الضحك والمسخره كانــت صدق حلوه ..
بس بصراحه , مهما كانت وناستي أحس أني يالســه اسوي شي غــلط أخاف أندم عليه , بــس خلااااص أحس أني أدمنت عليه ...
صرت اغيب وااايد عن المدرسه مــثل مها , يعني نتواعد على الغايب , ويوم نروح المدرســه يكون كلامنا كله عن الشبــاب الي في الجات ...
الخميس ...
الساعه 10 ونص ,الفسحه , كنا أنا ومها يالسات نسوالف مثل كل يوم ..
اليوم قررت مها نروح حديقة ألعاب وأنا عيبتني الفكره ..
أقتربت وحده من البــنات منا , كانت سلمى بنت أخو حرمة خالي مهره وقفت وسلمت عليها .. شفت نظارتها لي غريبه ..
سلمى :نوره ودي أكلمج بروحج ..
أطالعتها وبعدين حولت نظري لمها وقلت: بروح دقايق وبيي ..
رحنا أنا وسلمى شوي بعيد عن مها ..
شفت ويه سلمى المتوتر ,وهي أطالعني , ثواني وتكلمت : نوره أنا سمعت رمسه عنج..
عقدت حواجبي: شو رمسته ؟؟
سلمى : البنات وايد يرمسن عنج يعني أنج راعيت شباب مثل مها ...
أنصدمت , راعية شباب قويه الصراحه ,أنا صح أدخل الجات بس مب لدرجه أني أكلمهم في التلفون أو أطلع معاهم ...
قلت : لالالا ليش يتكلمن جي , حراام عليهن يخربن سمعتنا , والله أني مش راعية شباب ..
سلمى : تعرفين عاده مها سمعتها ووايد مب أوكيه ..
رديت عليه بضيقه: لا فديتج مها حليلها , يعني علشان شكلها يرمسن جي , مادري ها البنات ليش بموتن أن ماطلعن اشاعات بس الصراحه قويه هاي تمس الشرف..بروح أخبر الاخصائيه عليهن ..
سلمى : الصراحه أنا مادري بهن , وبعد تحيدين من فتره أنتي ومها طلعتن ورا صوب الملعب , كانت هناك سياره واقفه والبنات شافكن وقالنا أنكن سايرات لها ..
أطالعتها بصدمه : والله , مب لها الدرجــه , ليش جي يرمسن والله حراام عليهن نحنا السياره ماشفناها أصلا ..
سلمى : عني انا ماشفت شي بس سمعت ها الرمسه ..
قلت: قولي لي البنات الي تكلمن بخبر عليهن الاداره ..
سلمى بتوتر : أخاف والله يسون لي مشــكله ...
قلت بعصبيه : سلمى والله محد بيدري أنج انتي إلي خبرتني , حراام جي يطلعن عنا رمسه ..
سلمى : أوكيـه بليز بس محد يعرف أني أنا إلي خبرتج ..
خبرتني سلمى أسامي البنــات الي تكلمن عنا أنا ومها ..
رحت صوب مها وخبرتها الســالفه , عصبت وقالت: والله لاأدبهن ..بشوفن ..
قلت : خليــنا نروح الأداره ونخبر عليهن ..
مها: أوكيه , بس صدق بخليهن يندمن ..
رحنا الادراه وخبرنا عليهن , وطبعا الادراه أستدعتهن ....
وتمينا نتكلم وياهن ,ليش يطلعن عنا الاشاعات ..
قالت وحده منهن: والله هذا الي شفناه بعيونا ...
قامت مها معصبه : جذببببببببببببه ,وكملت بحتقار: ليكون أنتي الي طالعه تشوفينه ورديتي علينا..
عصبت البنت ووقفت : تحيدين عمرج يالي محد رباج شوفي شكلج اول كيف..
مها والشرر يطاير من عيونها: مربايه أحسن عنج , الا أنتي الفقيره شوفي أبوج شو يشتغل أول شي ..
صرخت الاخصائيه : بـــس أسكتن أحترمني شوي ..
يلسن كل من مها والبنت معصبات , وتمينا نتناقش , لين أعتذرن لنا البنات بصعوبه , وبتهديد من الاخصائيه أن تكتبهن تعهد ..
والكل عرف اننا بريئات , الحمدالله ...
رديت البيت بعد يوم شاق , نمت لي ساعه ...
الساعه ثلاث يلست أرتب عمري حق الطلعه , لبست عباه عمليه شوي وتحتها بنلطون بنفسجي سكيني ,وقيمص رمادي مع بنفسجي..
حطيت لي جحال , وبودره , الصراحه مها تقولي الجحال ووايد حلو في عيوني .
وصلت أربع ,صليت صلاة العصر ,و شيلت شنطتي ولبست شيلتي على السريع .. ونزلت تحت ..
أنتظر مها تي مع الدريول ...
مرت ربع ساعه , دخل علي الصاله , وعقد حواجبه يوم شافني ...
وقال: وين سايره ؟؟
أطالعته بخوف أنه يمنعني عن الطلعه :بسير مكان ..
علي بعصبيه: وين ها المكان ؟؟؟
توترت: الحديقه ..
علي : أي حديقه ؟؟
قلت : حديقة ******...
علي : ويا منوه ؟؟
تنفست برعب وجذبت : ويا ربيعاتي مع دريول وحده منهن ..
سكت علي يفكر وبعدين قال: أوكــيه بس لالاتتأخرين لو يتي بعد تسع ياويلج .
أبتسمت بفرحه : أوكــيه ..
كنت بروح بس علي وقفني : نوره ..
أطالعت صوبه, وقال: ماعندج تلفون صح ؟؟
قلت : هيه ..
قال وهو يمد يده صوبي بموبايل : خذي هذا , تلفون ما احتاجه فيه رصيد وبطاقه , ورقمي مخزن فيه لو محتاجه أي شي أتصلي ..
بترددت خذته منه وقلت: شكرا ...
وشوي وأسمع صوت هرن سيارة مها , أول ماركبت السياره ...سلمت على ومها ...
أطالعت مها التلفون الي بيدي وقالت: مبرووووووك أخيراً ...
أبتسمت : الله يبارك فيج , ولد خالي توه عاطني أياه ..
مها: والله زين أفتكر فيييج ...
رحن الحديقه والصراحه قضينا وقت حلووو , ماخلينا لعبه مالعبناها...
على الساعه سبع , حسيت بمها متوتره , ومالها بارض تلعب ...
يلسنا على العشب خمس دقايق, ساكتات ...
وبعدها وقفت مها بعد مايتها مكالمه , ويلست تتكلم بتلفون فتره , وبعدها سكرت ويت صوبي ..
وقالت: تعالي نطلع من الحديقه أنا الصراحه ملليت , بروح نتحوط بالسياره شو رايج ..
وقفت : أوكــيه ..
طلعنا برع الحديقه , ننتظر السياره بس شوي تأخرت , ويلست مها تتصل ..
بعد ماخلصت الاتصال أطالعت صوبي وقالت: أخوي بيي يشلنا ..
خفت وقلت: عيــل انا بخلي حد أيي يشلني و ..
قاطعتني مها وقالت: أخويه مابياكلج وأنا وياج لا تخافين ...
قلت بتردد : بس أستحي ..
مها: ماعليج عادي مثل اخوج ..
سكت ولا رديت عليها صدق خايفه أركب مع واحد غريب , بس عادي مابسوي فيني شي ومها معايه ..
وقفت سيارت رنج جدامنا , أطالعتني مها وقالت : يالله هاذي السياره ركبي..
ركبت مها وركبت وراها في الكرسي الوراني ...
قلت : السلام عليكم ...
أطالع صوبي بلا مستحى وقال: مــرحبــا الســاع ... شحالج نوره ؟؟
أنصدمت منه كيف يعرف أسمي وقلت : الحمدالله .. وسكت مستحيه منه ...
شفت نظراته الي قهرتني , في المنظره الصغيره , شوي ويبتسم لي..
الصراحه ندمت اني ركبت معااااااااااه أشد ندم , وأني سمعت كلام مها , نظراته خايسه , ومقرفه , تم يسوالف ويحاول معايه أني أسوالف وياه بس انا ماأرد الا بكلمات مختصره ...
خذنا لنا عشاء عباره عن سندويشات ...وكلينها في السياره , وبعدين وصلوني البيت ...
أرتحت يوم وصلت البيت لاني صدق كنت مختنقه يوم كنت وياهم ...
سرت غرفتي وبندت الباب وغفلته ويلست على شبريتي أفكر بالي سويته اليوم ركبت مع ريال غريب ماأعرفه بس لمجرد أني أعرف أخته ...
أه أحس نفسي تأنبني , خنت خالي إلي ميلسني في بيته , بس أنا ماسويت شي غلط يعني ماخنته...
أبعدت نفسي عن ها الافكار وسرت خذيت لي شاور وصليت ,ووطيت راسي ورقدت ....
مر أسبـــوع عادي مافيه شي يديد الا من المدرسه إلى البيت ...
الاربعاء أتصلت عليه مها الساعه 10 فليل ..
رديت عليها : هلا مها ..
مها: أهلين كيفج ؟؟
قلت: الحمدالله نعسانه شوي ..
ضحكت وقالت : ههههه مي تو حبيبتي ..
سكتت مها دقيقه وبعدين تكلمت : أممم شو رايج باجر نطلع مع ناصــر أخويه ..
قلت بسرعه: لالا ماقدر ..
مها : نوره تخلــيج , والله بس ها المره , بودينا البر ويمكن نسوق الدراجات بعد..
سكت شوي , شو بخسر أنا ترا معايه أخته عادي: أوكــيه خلااااص..
سكرت عن مها وانا ندمانه أني واقفت , مادري حاسه بخوف فضييييييييع من هاي السيره ...
يا يوم الخميس ومرت الساعات الدراسيه بسرعه وردينا البيت , الصراحه ماقدرت ارقد الظهر خايفه , صح حاولت مع مها في المدرسه أني خلاص ماأبا أروح , بس قالت أنها بتزعل مني أن مارحت وأن أنا عطيتها كلمه وخلااااص ...
تلبست بنطلون كالعاده ,وفوقه عباه عمليه ...
على الساعه خمس يت مها , وأتصلت لي تلفون..
طلعت برع , وركبت السياره وأنا متوتره ..
قال ناصر: هلا والله توها منوره السياره ..
أستحيت منه ,وانقهرت من تغزيله فيني ...
رحنا صوب البر, ووقفنا عدال مطعم ..
أطالعنا ناصر وقال :شو من العصاير تبون ؟؟
مها قالت : برتغال ..
أنا سكت أصلا مستحيــه اطلب منه ...
ناصـر: نوره الحلوه شو تبا ؟؟
أطالعته مها بقهر وقالت : أي شي صح نوره ..
قلت بتردد : هيه ..
ناصر: لالالا قولي لي شو في خاطرج ..
بعد محاولات من ناصر قلت : عصير ليمون نعنان ..
نزل ناصر وبعد ربع ســاعه يا وبيده أكياس ..
عطا كل وحده عصيرها , فجيت عصيري بمسحتى ويلست أشرب منه ...
كنا في الدرب , ياااربي أحــس أني ما اقدر افتح عيوني , فيني نعاااس فضيييع , بدون ما احس غمضت عيوني ..
نهاية البــارت الســابع...
البارت الثامــن ..
كنا في الدرب , ياااربي أحــس أني ما اقدر افتح عيوني , فيني نعاااس فضيييع , بدون ما احس غمضت عيوني ..
: شكله المنوم سوى مفعوله ..
: لا تحلم أول شي تعطيني إلي أباه وبعدين أسلمك أياها ..
: مها فكينــا بعديــن بعطيج أياه , الحين مش موجود عندي ..
:قلت لك تعطيني أياه وأسلمك نــوره ..أما غير هذا فلا ..
: بــس اليوم ماعندي باجــر بيوصلني وبعطيج اياه , يالله نزلي ..
: نــاصر , أنــا متفقه وياك أنه سلم وأستلم وغير هذا ماشي ..
: يعني ماتفهمين أقولج اليوم مستحيــل أيبلج أياه ..
: عيل خلااااص مره ثانيه , اليوم مابتلمسها ..
: مها , صدقيني بــاجر بيبلج أياه ..خليــني اليوم أخذ إلي أباه ..
: أسفه , ماشي ...
.................................................. ..............................
فتحت عيوني بصعوبه , وراسي يعورني مــادري ليش...
كنت طايحه على ريول مها , عقدت حواجبي شو يابني هنيه ..
أبتسمت مها : صح النوم ...
قمت عن ريولها وقلت : كيف رقدت ..
مها : ما أدريبج شكلج ماتتحملين السياره ..
أستغربت أول مره يستوي فيني جي , ياربي بعــد أحس بتعب غريب ...
يلست وأنا صدق يالله أفج عيوني ..
قالت مها : وصلنا بيتكم ...
أطالعت مها بستغراب : ليش مابروح البر ...
مها: شوفي الساعه كم ..
أطالعت ساعتي , حطيت يدي على فمي يوم شفت الساعه , كانت الساعه6 ونص .. يااربي كيف رقدت ها الكثر ..
كان ناصــر ساكت ولاقال شي , نزلت وأنا صدق دايخه ..
رحت غرفتي وغفلت الباب عليه , ونمت ...
صوت دق الباب وعاني , قلت بصوت مرتجف: من ؟؟
سمعت صوت حرمة خالي : نوره قومي تعشي ؟؟
يلست على شبريتي بتعب وقلت: أن شاء الله يايه ..
طالعت الساعه كانت 8 ونص ..
قمت بكسل ورحت الحمام وغسلت ويهي , وبعدها لبست شيلتي وطلعت ..
كنت نازله من السلم , يتني دوخه بغيت أطيح بس الحمدالله أني تمسكت بحد السلم ...
ياربي شو فيني يمكن لأني ماكلت شي طول اليوم ...
وصلت غرفة الطعام , لقيت علي وحرمة خالي, وعايشه وعلياء وعبدالله الموجودين بس ..
يلست على واحد من الكراسي ..
حطوا العشاء, من شفته أنسدت نفسي , مالي أخاطر أكل شي أبدا , مع أني أحس باليوع ..
وقفت , أطالعتني حرمة خالي وقالت : وين , يلسي كلي ؟؟
قلت وأنا أحاول ما ابين التعب الي فيني : مالي نفس , شبعانه ..
مشيت شوي ...
ماحسيت بعمري الا والدنيا مظلمه ..
فتحت عيوني وأنا أشوفهم ملتفين حولي ...ورحت في عالم ثاني ..وكأني في حلم
: محــمد وينك ,ليــش روحت وخليتني ..
: شو فيها البنت بسم الله ..
:علي أكرهك تفهم ما احبك ليش تخلي محمد يزعل عليه كله منك أنته .
: أمي لالالا شكلها البنت مب صاحيه خلوني أوديها المستشفى ..
: يالله بســرعه عايشه يبي عباتها ...
...............................
فتحت عيوني , على صوت علي ...
قمت بتعب , أستغربت وين أنا ...
اطالعت المكان , سياره !! ...
قالي علي : تقدرين تمشين ولا أيب لج كرسي ...
هزيت براسي بنعم , عقدت علي حواجبه : يعني تقدرين تمشين متأكده ؟؟
هزيت راسي بنعم مره ثانيه , ووقفت بتعب أحس عمري تعبــانه صدق ...
حسيت بدوخه , مسكت بالسياره بسرعه عن أطيح , تقرب علي مني بخوف وقال: شو فيج..؟؟
قلت : مــاشي ..
عدلت وقفتي , وحاولت أتغلب على التعب الي فيني , مشيت وأنا أحس عمري شوي وبطيح , بس حاولت قد ما أقدر أني أتماسك ...
وصلنا الطواري , وقفت عدال علي وهو يرمس الرسبشن ...
وبعدها يت النيرس , وودتني غرفه وخذت مني دم ....
وبعدها وصلتني غرفة الانتظار, يلست صدق وأنا أحس أن حيلي منهد ..
مرت 15 دقيقه أوأكــثر, سمعت النيرس تناديني ..
طلعت لقيت علي واقف , أطالعني وقال : تعالي ..
رحنا غرفة الدكتور , دخلنا أنا وعلي مع بعض ...ويلسنا على الكراسي الي مجابله طاولة الدكتور ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك