رواية قلوب تتراقص على انغام الالم -50

رواية قلوب تتراقص على انغام الالم - غرام

رواية قلوب تتراقص على انغام الالم -50

كملت كلامها و ابتسامتها ما فارقت وجهها:من فترة كنت دايما اتشكى من أبوي ..

ويوم من الايام قالت لي وحدة من صديقات كلام ما قدرت أنساه لليوم "" كل مره أشوف أبوي فيها أحس أنه الأخيرة من عقبها صرت أخاف أضايقه أو حتى أزعله ..

مياف:أنتي أبوك كان فعلا أب لك .. أم أبوي ما كان عايش غير لنفسه ..

غزل:تتكلم عنه كأنه موب موجود ..!!

مياف بكل برود:بالنسبة لي متوفي من زمان ..

غزل بكل إصرار:بس الفلوس اللي تجيك من كل جهة هاذي تعب أبوك وشقاه ..

مياف:أولا هاذي فلوس أمي و ثانيا كلها تعب الرشاوي و الواسطات ..

غزل و إصراره يتحول للعناد:إذا طلعت كم إشاعة موب معناها أنها الحقيقة .. وإذا كان فيه كم موظف في شركة أبوك مستوى أخلاقهم بهالدنائة الذنب موب ذنب أبوك ..

طلع من المطبخ و رمى نفسه ع الكنبة:لما تخلصين طبخ قوميني ..

غزل:مخلصة من زمان و كل شيء جاهز .. والحين أنا رايحة .. تبي شيء ..؟!

سحبت عبايتها ولبستها و هي تطلع:أنا رايحة مع السلامة ..

فتح عيونه و هو يرجع لواقعة"لو كنت داري أنها أخر مرة أشوفك فيها ما كنت تركتك تطلعين" ..

جلس و رمى الجوال بعيد عنه .. بنبرة كلها عصبية:ما كنت تركتك تطلعين ..

.._.._.._.._.._..

نهى بكل لوم:وينك يومين ما نزلتي ..

أميرة:ايه بدت حركات العروس من الحين ..

ناظرتهم لمى بنص عين:كنت تعبانة .. يعني حرام الواحد ما يتعب ..!!

الجوهرة بكل ضيق:عاد أقلقتينا عليك .. حتى عزوز لما نسأله ما قال أنك تعبانة ..!!

كان طلعنا لك ..

نهى:احمدي ربك أنك نزلتي و إلا كنا فعلا ناويين نطلع لك و نحوس الشقة عليك .. عاد شوفي من بينضفها لك ..

لمى بكل ثقة و هي تنضم لهم:الله يخلي سوما .. كم ريال تضف بيت جدي كله ..

أميرة بكل غيض:لا تجيبين طاريها الله يقلعها ..

لمى بكل استغراب:ليه وش فيها ..؟!

الجوهرة:تهاوشت معها أمس ..

نهى:كلهم ملاسين .. بغوا يشبون البيت من هواشهم ..

لمى:عاد حرام سوما طيوبة ..

أميرة:بس ملسونة ..

ابتسمت:الله يهديها بس .. على طاري الملاسين .. أسوم بتجي هالأسبوع ..

أميرة:ايه بتجي .. الأسبوع اللي راح ما جت عشان زواج ولد عمه ..

نهى:اها .. عشان كذا ..!!

لمى:و نوف وينها ..؟!

نهى:فـ الغرفة هذا وقت الـ مدري وشو حقها ..

الجوهر:الآيبروبك ..

أميرة:وووع .. اسمه يجيب المرض .. قاعدة تسوي تمارين وبس ..

لمى:حرام والله جسمها بيعضل .. مو حلو كذا ..

نهى:بح صوتي وأنا أكلمها لكن لا حياة لمن تنادي ..!

لمى:الله يهديها بس ..

دخلت عليهم و هي تنزل عبايتها:زين كلكم موجودين ..

وقفوا حتى يسلمون عليه ..

نور و هي تسلم ع البنات:السلام عليكم . سوري نسيت ..

الجوهرة:و عليكم السلام .. خير عميمة .. موب من عادتك تنسين كذا ..!

جلست بينهم:ايه والله .. من دريت عن السالفة و أنا بالي منشغل ..

نهى بكل خوف:عمتي تكفين اختصري ..

العمة:نور .. مشاري قدم على منحة حتى يكمل دراسته برا ..

أميرة:وين المشكلة ..

العمة نور و هي تأخذ نفس:جايتك .. من زوود زين الحظ قبلوها و بيسافر قريب ..

لمى:للحين ما فهمنا ..

العمة نور:عمكم .. رأسه و ألف سيف يتم زواجه على نوف و تسافر معه ..

ارتسمت الصدمة على وجهه الكل ...

نهى بكل ضيق:مستحيييييييييييييييييييل ..!

الجوهرة:نوف مستحيل توافق ..

زفرت بكل ضيق:و أنا وش اللي مقلقني ..!!

ناظروا فـ بعض بصدمة و محد قادر يعبر ..

.._.._.._.._.._..

جمعت كتبها .. و بكل تردد:يمة ..؟

أم جمان:أمري يمة ..

جمان بعد تردد كبير:بكرة زواج صديقتي .. أقدر أروح لها ..

أم جمان بعد تفكير طويل:ما ظنتي تقدرين ..

جمان بكل اندفاع:ليه يمة ..؟

أم جمان و التعب بصوتها:عمتس قال بيجي يأخذتس ..

ارتسمت نظرة الصدمة بعيونها:يأخذني لـ وين ..؟؟!

أم جمان و هي تأخذ أنفاسها:يبي يمشيتس ويعوضتس على كل اللي راح من عمرتس _تنهدت بضيق:هذا اللي قاله ..

جمان بكل تردد:بس شكلك تعبانة ..!!

أم جمان .. ارتسمت على وجهها ابتسامة باهتة:لاا ما فيني إلا العافية ..

جمان بكل ماس:طيب وش رايك تجين معنا ..!

أم جمان:لا طبعا .. أبيتس تروحين و تشوفين الدنيا و تأخذين حقتس منها ..

جمان:شكل تعبك من الضيقة .. ليش متضايقة ..؟!

زفرت بكل ضيق:راح يكون أول يوم لي أقضيه لحالي ..

جمان:خلاص أجل موب لازم أروح مع عمي ..

أم جمانة:لا يا يمة .. هذا اللي كنت أبيه من وزمان تعيشين بين أهلتس و تشوفين الدنيا .. و بعدين ترآهآ كم ساعة و ترجعين ..؟؟!

هزت رأسها بالتأكيد ..

.._.._.._.._.._..

نزل الكاب على عيونه أكثر ..

محد يعرف بـ سالفة و لا أحد يعرف سبب وجوده .. لكنه يحس بالخوف لأنه يعرف أنه على خطأ ..

زفر عادل بكل ضيق و هو يرفع يده .. حتى يشوف الساعة ..

"صار لي خمس ساعات أنتظر محد بين ..؟!" ..

رفع عينه و ارتبك و هو يشوف واحد من سكان العمارة يقرب لعنده ..

ناظرة بكل شك:أنت من المغرب هنا ..!! وش عندك ..؟!

ارتبك عادل أكثر:أنتظر واحد من قرايبي ..؟!

..:وش ينقال له قريبك هذا ..؟!

عادل و هو يتسرب فـ كذبته من غير تفكير:خالتي ساكنة هنا مع بناتها و عيالها و هي مطلقة .. من شهر توفى ولدها الصغير .. و أنا واقف هنا أنتظرهم إذا بـ ..

قاطعه:أم ياسر ..؟!

عادل بكل حماس:ايه اهييييي ..

... زفر بكل ضيق و بنات نظرة حزن بعيونه:أنت وينك .. !! صار لهم شهرين هاجرين هالبيت .. البنت الصغيرة توفت و الكبيرة راحت تعيش مع أبوها مع ياسر ..

قاطعه و الصدمة تربكة أكثر:توفت .. مممم من اللي توفى ..!!

..:الصغيرة مغير لحظة .. وش اسمها .. –بعد تفكير عميق بان بـ عيونه:ايه ألمى ..!!

رمى بثقل جسمه على باب السيارة .. بسبب رجوله اللي فجأة ما عاد تطيق تشيلة ..

كمل جارهم بكل استرسال:و بعد أمهم دخلوها لـ ذاك المستشفى حق المجانين .. اللي ينقال له الطب النفسي .. مدري هي مصدومة صدق و إلا تتهرب من يدونها وو ..-رجع يسكت رفع عيونه على عادل و بنظرة كلها شك:الحين وشلون ولد خالتهم و ما تعرف شيء عنهم ..

سحب نفسه و دخل سيارته .. للحين مو مستوعب اللي سمعه .. ضل فـ السيارة ساعة .. ثنتين ثلاث .. ما يدري كم ..!!

صرخت نوف بكل عصبية:عدوووووووووووووول ووجع ..

لف عليها و نظرة السرحان تتلاشى من عيونه:خير ..!!

نوف بكل ضيق:بـ نتأخر على العرس استعجل ..

بلع ريقه بكل ربكة و إحساس الصدمة يتملك من أول و جديد بعد ما تذكر كيف وصل ه لـ خبر ألمى ..

زفر بكل ضيق .."يا الله يآرب ترحمها و تغفر لها كل اللي صار من سببي ..

قطع تفكيره و هو ينفض رأسه .. وقف"أنزل لهم أحسن لي قبل لا يبدا الشيطان شغله معي " ..

.._.._.._.._.._..

حطت اللسمة الأخيرة على وجهها .. ابتسمت ليان بغرور" .. لو كنت عارفة إن المكياج يحلي كذا كان حطيت من زمان" ..

زفر بكل ضيق و هو يجمع أغراضه بـ جيبه .."ما خلصتي" ..

ليان و عيونها ع التسريحة بـ تركيز .. :اممممممم .. ثواني ..

زفر بكل ضيق و هو يطلع:أنتظرك فـ الصالة ..

رفعت عيونها من ع التسريحة راقبته و هو يطلع .. تنهدت بكل ضيق ..

و حوارهم الحادة إلي صار أمس .. تسمع صداه بأذنها من صحت ..

نزلت صينية القهوة .. من ثواني سكرت السماعة من جنى ..

حاسة بالحماس و الروقان ..

استغرب ابتسامتها اللي ما لها أي داعي .. ليش ما يركز على انفعالاتها البسيطة و هي الشيء الوحيد اللي سارق كل تفكيره .. بهالفترة ..

راكان بنبرة خلت من التعابير:ليش تتبسمين ..؟!

استغربت سؤاله:ليش ممنوع ..؟!

راكان بكل ضيق:أشوف الجلسة مع وعد طولت لسانك ..؟!

حست بـموجة الروقان تتلاشى:ليش شايفني بزر حتى أتأثر بوحدة مراهقة ..!!

ابتسم بكل سخرية:واضح ..!

حست بدمها يفور:وش اللي واضح ..!! تتمسخر علي ..!!

لف وجه للجهة الثانية و زفر:لا حو و لا قوة إلا بالله ..!!

وقفت:تدري أنا الغلطانة من البداية و جاية أجلس معك ..!!

رجع يرفع نظره عليها و تعابير وجهه تعبر عن الصدمة:نعم ..!

زفرت:مثل ما سمعت ..-لفت و توجهت لغرفتها .. تنهدت بضيق أكبر و هي تسكر الباب .. و تقرب للسرير و تجلس ..

"وش فيك يا ليان انهبلتي لا با الله انهبلتي ..!! ..وش أسوي فيه إذا هو يتعمد ينرفزني ..

زفرت بكل ضيق و هي تسحب عبايتها من على المعلاق .."و زعلان بعد ..!" ..

.._.._.._.._.._..

من وراء السماعة بكل إصرار:أنتي وش دخلك قلت لك عطيني العنوان وبس ..

قاطعته لوجين و هي تراقب الفلبينة .. اللي واقفة وراها تضبط تسريحتها:وش يضمني أنك ما تتعرض لي ..!

فيصل:و ليش أتعرض لك وش بيني و بينك .. أنا واصل حدي من ريتاج و أبي أأدبها ..

لوجين بكل غرور:قلت لك أنها لعابة ما صدقتني ..!

فيصل:غلطان يا عمري و إن شاء الله ما راح يتكرر ..-رجع يذكرها بكل إصرار:و أبي أربيها من أول و جديد عشان تعرف مع من تلعب ..

لوجين بعد تردد واضح:طيب بعطيك عنوان بيتهم بس بشرط ..

فيصل:أنتي تآمرين ..

لوجين:تعلمني باللي راح تسوية ..

فيصل:لا يا عمري أنا أبيك تتفرجين و أنتي مستانسة .. أعلمك و أخرب عليك ..؟!

ابتسمت بغرور:اوك .. أكتب عندك ..

.._.._.._.._.._..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لا احلل مسح اسمي من على الرواية ..

تجميعي : ♫ معزوفة حنين ♫..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صرخت فيها بكل عصبية:أووووووووووووه .. و بعدين معك يا أروى ما تفهمين ..

أروى بكل إصرار:أنتي اللي ما تفهمين .. فيه عروس بالدنيا يوم زواجها ما تحط مناكير ..

غزل بكل ضيق:ايه أنا ..

أروى:لا يكثر بس .. الحين وش بتخسرين أنتي .. مدي يدك و أنا بحطه ..

غزل:و أنا فاضية لـ جاء وقت الصلاة أقعد أشيل فيه ..

أروى بكل ضيق:يا فضيك بعد .. بس لا تشيلين هم أنا أجيك لغرفتك برسم الخدمة و أشيله لك ..

غزل بنبرة أقرب للترجي:أروى و قسم با الله ما لي خلقك ..

أروى بكل إصرار:مدي يدك ..

زفرت بكل ضيق و سلمتها يدها .. ما عاد له خلق لأي نقاش و لو بسيط ..

طقت الباب بكل هدوء ..

أروى و هي مركزة بيد غزل:أدخخخخخخخخخل ..

دخلت و سكرت الباب وراها:هاا .. خلصتوا ..؟!

أروى:بقي المناكير بس ..

جلست ريتاج:ما شاء الله عليك يا غزل خلصتي بدري ..

غزل و عيونها على أروى:الله يسر ..

أروى و هي تناظر فيها بنص عين:هذا اللي ما يهتم و لا يشيل همّ يخلص كل شغله بثواني ..!

ريتاج:لا يغرك شكله تلقينها ترتجف من جوا .. مهما كان الليلة ليلتها ..

غزل:بتسولفون فيني سكروا السيرة يرحم أمكم ...

أروى:فجر وينها ..؟!

ريتاج و هي تراقب شغل أروى:مع خالتي أم تركي تستقبل المعازيم ..

أروى:و البنات وصلوا ..

ريتاج:كلهم تقريبا .. و أنا أدخل شفت ليان تدخل للقصر ..

غزل:ليان ..!! ما سافرت ..؟!

أروى:دامها أجلت سفرها أسبوع .. أكيد بتجلس عشان زواجك ..

غزل:ما دريتوا ليش ما سافرت ..

ريتاج:لا و الله مدري ..

أرور:و لا أنا ..

ناظرتها غزل بنص عين:ما تدرين ..!!

ناظرتها بكل حدة:ايه مدري ..

ريتاج:خلكم من ليان الحين و خلونا بجنى ..

أروى:وش فيها جنوو ..؟!

ريتاج:ما لاحظتوا شيء ..!

غزل:لاء .. ليش ..؟!

ريتاج:راحت لـ بيت عمي أبو تركي و بنفس اليوم اجتمعوا الرجاجيل و ما صار شيء ..!

أروى:وش تبين يصير يعني ..!

ناظرتها غزل بنص عين:اللي يشوفك يقول موب أنتي اللي بغيتي تحرقينا عشان تعرفين وش صاير ..؟!

ريتاج:ايه والله ..

أروى بكل ضيق:أقول اهجدوا علي أنتي وياها ..

غزل بكل جدية:لا صدق أبي أعرف وش اللي صار ..؟!

ريتاج:يا خوفي بس .. يكون كلام بدر صحيح ..

أروى و غزل:بدر ..!!

ارتبكت من ثواني بس استوعبت كلامها:لا ولا شيء..

أروى:شوفي عاد دامك قلتي بدر بتنطقين وش قايل و إلا ترا بـ تندمين ..

ناظرتها بنص عين:تهدديني ..

غزل:لا جد رتوج وش يقول بدر ..

خذت نفس:بقول لكم بس الكلام اللي بقوله لا يطلع برا ..

أروى و هي تنفخ على أظافر غزل:سرك فـ بير ..

ريتاج:هذا الله يسلمكم .. من فترة بدر كان يطلع كلام على جنى و يقول أنها موب عمتنا ..

غزل بكل صدمة:موب عمتنا .. أجل وش تطلع ..؟!

ريتاج:مدري .. بس الشيء اللي كان يلفت النظر إن أبوي ساكت له و جدتي الله يرحمها .. كانت تعصب عليه .. و تكرهه ..

أروى بكل برود:أخوك مخرف ..!!

غزل:بس ترا بدر .. إنسان عاقل و كلن يمدح فيه ..

أروى بنفس البرود:يمكن قرر ينهبل ..!

على بعد كم باب .. وسط صالة الأفراح ..

جالسين بطاولة بنص القاعة ..

ريناد:يا قوات قلبك يا جوري تجين و تخلين ولدك ..!؟

جوري و هي تنزل كوب العصير:وش أسوي احرم نفسي من الجمّعة معكم و انا عارفة أني موب شايفتكم إلا بعد الإجازة ..

جنى:الله بعد الإجازة ..!

جوري:ايه .. أنا و نواف قررنا نسافر للشرقية الأسبوع الجاي .. خلاص بنقول لأهله ..

لمى بكل حماس:قولي والله ..

ابتسمت جوري:ايه والله ..

جنى:حلو ..

جوري:ايه والله أحس إني حيل استانست .. بس بنفس الوقت خايفة ,,

ريناد:وش يخوفك ..؟! و الولد معك ..

جوري بكل لوم:نفس كلام نواف .. بس حتى ولو ..

قاطعتها لمى:لا تشيلين هم و لا تحطين فـ بالك أنا متأكدة أنهم بـ يحيونك و بسبب هالولد بيتعلقون فيك ..

جوري و الخوف يتملكها:بس عمة و زوجته ..!

ريناد:أنتي أهم شيء عندك أهل نواف .. و أنا أضمن لك مليون بالمية أنهم معك ..

جنى:و هم أهم من عمه و بنته ..

ابتسمت و القلق بعيونها:الله يسهل ..

قربت ليان منهم:مساااااااء الخير ..

وقفوا و سلموا عليها بحماس ..

جنى:دوبااااااا جيتي ..!

ليان:تبون تستانسون من غيري ..!

ريناد:لا و الله ما تكمل الفرحة من غيرك ..

جلست ليان:خمس دقايق و بروح عند خالتي أمي إلا تبيني أنشب فيها ..!!

ابتسمت جوري بكل حزن و عينها تلتقي بعين .. خالتها .. أم راكان ..

جنى:ايه خلاص صرتي تبعهم .. لازم تجلسين و تقومين معهم ..

ريناد:الحمد لله إني خذيت من العايلة ..

ليان .. نطقتها و هي تحس بها تجرح فيها:يا حظك يا رنود ..

جوري:قسمة و نصيب ..

جنى:أجل متى بتسافرون ..؟!

ليان:بكرة الصبح ..؟!

لمى:على وين ..؟!

ليان:والله مدري .. سفر و بس ..

ريناد:عاد موب لهالدرجة ما تدرين وين مسافرة ..

ليان:عساني بس اكلمه ..!

جوري:ليش الوضع بينكم متوتر ..

ابتسمت باحراج:لاا بس لحين ما تعودنا على بعض ..

جوري:اها ..

وقفت لمى:جنو وش رايك توديني للعروس ..

جنى و هي توقف:ايه والله حتى أنا أبي أشوف وش صار عليها الله يستر من أروى عسى ما هبلت فيها ..

مشوا لـ بعيد ..

همست لمى لـ جنى:هاذي اللي بتزورني ..؟!

ضربت على جبينها على خفيف:و الله نسيت .. انشغلت مع أورى بتجهيز العرس ..

لمى:تراا للحين أنتي مطلوبة بموعد ..

جرته لجلسة جانبية بعيد عن الناس و جو الزحمة ..

جنى:يا الله قولي وش عندك ..؟!

لمى بكل صدمة:هنا ..!

جنى:أنتي ما لقتي ذاك اليوم ما تبين بيت جدك حتى اتفقنا أنك تجين لي بس عقب غيرتي رايك .. هنا أحن من بيت أخوي و بيت جدك محدب يسمع ..

بربكة واضحة:أخاف أحد يسمعنا ..

جنى بكل جدية:لموو تراك وترتيني الموضوع كبير يعني ..

زفرت بكل ضيق .. و هي مترددة كيف تفاتحها بالموضوع ..

.._.._.._.._.._..

ابتسمت بكل إحراج و هي ترفع الغطاء عن وجهها ..

اتسعت ابتسامة عم جمان .. أبو محمد:وش فيك .. مستحيه من عمك ..؟!

ابتسمت باحراج:أول مرة أطلع لحالي مع ..

قاطعها:بتقولين غريب .. !! أنا عمك ..

جمان:مو غريب .. بس أنا يبي لي وقت على بال ما أتعود عليك ..

ابتسم:طيب وش رايك فـ المطعم عجبك و إلا نروح لمكان ثاني ..

تلفتت فـ المكان الفخم .. و و حست بالدهشة تتملكها ..

"مكان مثل هذا .. ما يجيه إلا الهايات .. معقولة أهل أبوي أغنياء صدق ..!! .. طيب وش بيصير لو اعترفوا بي كـ وحدة منهم" ..

أبو محمد:شكله ما عجبك ..؟!

جمان بكل اندفاع:لا بالعكس أنا أأأأأ ..-رجع تسكت ..

ابتسم:من يوم و رايح إن شاء الله ما تشوفين إلا كل اللي يسر خاطرك ..

ابتسمت .. ثواني و نزلت يدها على الساعة ..

تكلمت بكل تردد:مطولين هنا ..؟!

أبو محمد:ليش وراك شيء ..؟!

ابتسمت بإحراج:لا بس ما أبي أتأخر على أمي ..

رجع يبتسم:خمس دقايق يوصل العشاء .. نأكل و نمشي ..

ردت له الابتسامة . .. و الخوف على أمها يتسرب لداخلها ..

.._.._.._.._.._..

شرب الكأس الخامس من الغرشة السادسة ..

رغم أنه حلف لها أنه ما عاد يدخل لـ شقته .. لكنه ما قدر يتحمل حزنه و ألمه ..

مسح مياف طرف دمعة كانت بتخونه ..

.:شلون طاوعها قلبها .. شلون قدرت ..

رمى الكاس على الأرض و تنثر القزاز:الحقيرة الخاينة .. كلهم مثل بعض ..

دفن وجهه بين كفوف يده .. حس بعبراته تخونه ..

قطع عليه جوه الأليم صوت جواله ..

ركض لها بكل حماس .. "أكيد هي .. أكيد انحاشت من العرس" ..

هذا كل اللي كان قادر يفكر فيه ..

زفر بكل ضيق و هو يلمح اسمه على الشاشة ..

رد بكل ضيق:ألو ..

من وراء السماعة .. عبد الملك بكل لوم:أنت وينك ..؟!

مياف بكل ضيق:فيه شيء مهم ..

عبد الملك:ايه فيه أشياء مهمة ..

مياف بكل ضيق:مليك ترا مالي خلقك ..

قاطعه:عشانك مالك خلقي أنا بكون عندك بعد نص ساعة ..

مياف:عبد الملك .. وفر محاضراتك لنفسك ..

عبد الملك بكل إصرار:مناوبتي تنتهي بعد ربع ساعة .. عشر دقايق طريق و أكون عندك باي ..

.._.._.._.._.._..

ناظرت فيها مصدومة ..

لمى بكل إحراج:جنى لا تناظرين فين كذا ..

جنى و الصدمة تسيطر على صوتها:لمى أنتي كذا ..

لمى:صدقيني الموضوع ما يتعدا المكالمات و أسماء مستعارة بس ..

جنى:بس أنتي يا لمى ..!!

لمى:صدقيني سلطان هو الوحيد اللي كلمته بصدق و حبيته و للحين أحبه ..

جنى:أنا ما تفرق معي سلطان و إلا غيره .. بس اللي كنتي تسوينه ..

قاطعتها:أدري غلطي و هذا أنتي قلتيها كنت .... يعني مصدقتني ..!

جنى:مصدقتك و نص .. بس شلون علاقة تبدا بهالطريقة تتوقعينها بتنجح ..!!

زفرت بكل ضيق:هذا الهاجس اللي شاغل بالي .. شلون بكمل حياتي عقب .. بس سلطان يحبني .. و لو كان حاط موضوع المكالمات فـ حساباته ما كان تقدم لي ..

جنى:هو يحبك .. و مشاعره مسيطرة عليه .. بس بكرة لما تكونون تحت سقف واحد .. بـ يحط لعقلة وزن .. و أتوقع أنك فاهمة الباقي ..

لمى بكل خوف:أنا خايفة يصير شكاك و حياتنا تخرب بدال ما ..

قاطعتها:أنتي مستوعبة الواقع بنفسك ..

لمى بكل لوم:خايفة أرفض سلطان و أظل ندمانة طول العمر و خايفة أقبل به و أندم ..

جنى بكل لوم:كل الطرق تؤدي إلا روما*مثل* .. كذا و إلا كذا الندم صايبك ..

اندمي على شيء ما حصلتيه أحسن من أنك تحصلينه و لا تتهنين فيه ..

لمى:يعني أرفض ..

جنى:أنا عطيتك رأي الشخصي ولو أني للحين مصدومة منك .. بس أنا ما جبت شيء من عندي الشك واقع .. هو مستقبلكم دام هاذي بدايتكم ..

زفرت بكل ضيق:أنا ناوية أرفض .. بس ما عندي غيرك أتجرأ و أطلب مشورته و إلا اللي كنت أسويه شيء يفشل ..

ابتسمت بأمل:يكفي أنك معترفة بغلطتك قومي .. نروح لـ غزل ..

وقفت معها .. رغم أنها عزمت على رأيها لكن للحين مترددة ..

القسم الثاني من القصر .. عرس الرجاجيل ..

واقف بين المعازيم .. ابتسامته مأخذ أكبر مكان بوجهه ..

و الكل يحسده على فرحته ..

لكن بداخله إنسان ثاني .. إنسا ن محطم .. و كاره للدنيا ..

مضطر يجامل لأنه صار حافظ درس المجاملة زين بسبب خبرته فـ العمل ..

من بعيد يناظره بكل غيض .."كان المفروض أكون مكانك يا تروك بس فجأة احلوو العرس بعيونك ..

قطع تفكيره و هو يضربه على خفيف على كتفه:وين سرحان .. اللي مأخذ عقلك يتهنى به ..

لف سلطان على عامر:موب وقتك كلللش ..

عامر:بعرس أخوك و موب رايق .. وش عليك بعد كم شهر بتصير مثله ..

زفر بكل ضيق:رح بس عن وجهي .. رح لصديقك البزر ريان ..

عامر:الحين أنا وريان بزران .. بلاك ما شفتنا و أبوي شلون فرحتن فينا و بشغلنا ..

سلطان:قاعد يسلك لكم عشانكم بزران ..-دفه مع كتفه و هو يبعد:فارق عني بس ..

عامر ..:وش فيهم .. كلهم أخلاقهم فـ الأرض ..!

قرب ريان منه:تهاوشت مع سلطان كملتها ..!!

عامر:الحمد لله و الشكر .. لا بدر و لا بسام و لا سلطان .. كلهم مكشرين تقول كأنهم يصرفون علينا ..!!

ريان:لا تلومهم يمكن سالفة جنى للحين مأثرة فيهم ..

عامر:على طار يجنى درت ..!

ريان:لا للحين .. اليوم أبوي ناوي يجي لبيتكم عشان يكملها مع أبوك ..

زفر بكل ضيق:الله يستر لا يصير فيها مثل ما صار يوم صار له الحادث ..

حس بكلام عامر يسلب فرحته بهاليوم .. تذكر سالفة الهيئة و الحادث ..

..:امش خلنا نروح مع حسن و ربعه نشوف وش عندهم ..!!

.._.._.._.._.._..

زفرت بكل ضيق و هي تحرك فستانها الأبيض المنفوش ..

موب قادرة تجلس على راحتها .. جلست على طرف السرير ..

وهي تتأمل غرفة تركي اللي تغيرت شوي من آخر مرة دخلتها مع أروى ..

دخل و سكر الباب وراها ..

حست بالخوف يقبض قلبها حالها حال أي عروس .. لكن إحساس الخوف ما يجي شيء عند إحساسها بالاكتئاب .. و الحسرة على نفسها ..

جلس جنبها بكل هدوء .. احتار وش يقول لها ..

زفر بكل ضيق .."يمكن لو كانت ليان ..كان بـ .." ..

وقفت و هي تحس بأنفاسها تضيق بها ..

لف عليها .. و وجه لها نظرة تساؤل ..

ترددت وش تقول له .. أحاسيس بداخلها متلخبطة .. يمكن لو كان فـ بيت لحالها كانت بتترك له الغرفة و تطلع ..

يتبع ,,,,

👇👇👇