رواية الفتاة الهاربة -2
منار بالغرفه تنشف جسمها وشعرها والبست ملابسها واقعدت عالسرير اتفكر بالحاله اللي اهي فيها ووين اوصلت
منار : ( بقلبها ) اشفيج يا منار قاعده بشقة شخص غريب توج امس صادفتيه .. الله يسامحك يا أحمد ( حست ان ودها تنفجر و تبجي بس تعوذت من ابليس وقررت تطلع حق علي )
دشت منار الصاله التفت عليها علي وقعد يطالعها ( كان شعرها القصير مبلل ويهها حلو بريء و مافيه مكياج )
علي : ها اشلونج اليوم؟؟ ان شاءالله نمتي عدل؟
منار : ( اقعدت بطرف القنفه ) معني ما اذكر متى نمت بس الحمدلله نمت وارتحت ..
علي : ( يسوي روحه يفكر ويعصر مخه ) نمتي بالظببط يوم البطه السوده تبجي اتدور اهلها
منار : ( تظحك )
علي : ( بقلبه ) حلوه ظحكتها
علي : زين خل اييب الطاوله اللي بالغرفه عشان احط الاكل عليها
منار : لا خلك .. انا اييبها
منار راحت يابت الطاوله ( الكوميدينا الصغيره ) وحطتها جدام علي
علي : ها تسمحيلي اكل معاج؟؟ تره ماتغديت والله
منار : ( تبتسم ابتسامه فيها حزن ) اي اكيد
علي بطل الاكل وقطع لها دياي واهي قاعده تاكل عالبطيئ وتسمعه ياكل و يسولف بس بالها ماكان معاه وسرحانه
علي : ( يحرك ايده جدام ويه منار ) هاا وين رحتي
منار : ( تهد القفشه ) ولا شي بس الحمدلله شبعت
علي : ماكليتي شي؟؟
منار : بلى الحمدلله شبعت .. و مشكور وايد انا لازم امشي الحين
علي : تمشين!! .. وين بتروحين؟
منار : ( تدور اي عذر عالسريع ) بروح بيت رفيجتي
علي : اكيد عندج مكان تروحين له؟؟
منار : ( اوقفت ) اي ويللا انا ماشية
علي : ( وقف معاها ) يللا عيل اوصلج بطريجي
منار : لا لا مابي اكلف عليك انا اروح بروحي
علي : في احد معين بياخذج يعني؟؟
منار : لا ماكو .. بس انا اتصرف انت ماقصرت معاي مشكور
علي : ( قعد عالقنفه واشر لها ) قعدي شوي
منار : ( اقعدت واهي ساكته ماقالت شي )
علي : منار صارحيني ولا تقصين علي .. انا ادري ان ماعندج مكان تروحين له وانج ماتبين تقعدين بشقة شخص غريب عدل ولا لأ؟؟
منار : تهز راسها .. عدل
علي : والله يا منار اني ماراح اضرج بشي وهالشقه اعتبريها لج لين الله يفرجها عليج .. و لو تبيني ما ايي حااضر من عيوني اييب ثلاجه صغيره واعبيها اكل وماي وماتشوفيني واتطمن بالتلفون بس .. زين جذي؟
منار : ( منزله راسها بالارض وتحس بعوار ببلعومها لأنها حابسه دموعها غصب )
منار : لا مابي تسلم ماقصرت بس انا لازم امشي من اهني
علي : زين فرضا سمحتلج وخليتج اتروحين وقعدتي تمشين بالشارع وماعندج مكان محدد تروحين له .. ووقف واحد حقير وركبج معاه غصب واذاج؟؟
منار : ( ارفعت راسها وطالعته بعصبيه وغصب ماسكه البجية )
علي : اي لاتطالعيني جذي انا شاب واعرف ان في شباب وصخين وايد محذفين بالشوارع
منار : ( لفت ويهها عنه عشان لايشوف دموعها ) لا تحاتي ما اركب الا مع مره
علي : ( يظحك ظحكة استهزاء ) لا يعني الحريم الحين مسكتين .. يا كثر ماسمعنا سوالف ان حريم خدروا بنات وودوهم حق رياييل ..
منار : ليش تخوفني اكثر ؟؟ ماحب اسمع جذي كلام
علي : اي لأن هذا الصج
منار : ( انفجرت واقعدت تبجي من قلب )
علي : ( يطالعها ومايدري اشلون يواسيها قعد يدور كلينكس بجيس الاكل وعطاها اياه )
علي : هاج مسحي دموعج ولا تبجين .. انتي اهدي وقوليلي مشكلتج وانا والله مستعد اساعدج على قد ما اقدر
منار : ماتقدر تساعدني محد يقدر يساعدني
علي : انتي بس جربي وقوليلي اشتخسرين
منار : ( تبجي من قلب ) انا.. امي من قبل سنتين (تبجي وتناشق وتمسح خشمها )
علي : لحظة مسحي دموعج وتنفسي ارتاحي بعدين سولفي على راحتج
منار : ( تتنفس وتمسح دموعها ثواني بس وترد تبجي مثل الياهل اللي ضايع من اهله )
علي : لا جذي عيل خلاص يبه هونت مابي اعرف الموضوع .. قومي غسلي ويهج وامشي معاي
منار : ( تحاول تسيطر على نفسها وماتبجي ) ( بصوت مخنوق ..) : وين؟؟
علي : نتمشى اتشمين شوية هوا وارجعج اهني
منار : بس ..
علي : ( يقاطعها ) لا بس ولا شي مابي اسمع اعتراض يللا قومي غسلي ويهج ناطرج
منار دشت الحمام وغسلت ويهها واقعدت اتطالع عيونها بالمنظره كانو متفوخين وحمر من كثر البجي مشطت شعرها باصابع ايدها اساسا اهو كان ناعم بس لأن توه بدى ينشف منه الماي فصاير متعفس شوي
اطلعت من الحمام لقت علي واقف يم باب الشقه وبيده مفتاح سيارته
علي : يللا نمشي؟
منار : يللا
اطلعوا واهو قفل الباب وانزلوا تحت والحمدلله ماصار لهم اي موقف بايخ مثل اللي صار امس
اركبت بالسياره يمه وكل شوي تتلفت
علي : ( لاحظ انها مرتبكه ) لا تخافين ان شاءالله مايصير الا كل خير
علي : ( طلع نظارة شمسية من درج السيارة ) هاج لبسيها شمس الكويت مشكلة
منار : ( خذتها منه والبستها وتمت اتطالعه واهو يسوق من غير لا ينتبه لها )
( علي طويل وعريض.. اسمر حنطاوي شعره اسود حواجبه عراض ومرتفعين مخليته يبين جنه عصبي خشمة مسلول .. و شواربه اخفاف ولحيته ديرتي يعني ملامحه على بعضها ماعطيته جاذبيه غريبه )
منار : وين راح نروح ؟
علي : تبين نتمشى عالبحر؟؟
منار : لا اخاف اشوف احد اعرفه اهناك
علي : زين انتي ماكليتي شي .. امشي انروح نتغدى
منار : لا مو يوعانه كليت
علي : زين انا يوعان اشلون يعني اموت من اليوع ما اكسر خاطرج؟
منار : انت اطلبلك أكل .. انا شبعانه مابي آكل
علي : لا انا خاطري بأبل بيز
منار : اوكي
( أغلب الطريج كان هدوء ومرات علي يقط قطات مليقه يحاول يظحكها بس اهي اغلب الوقت سرحانه بالشارع )
( اوصلوا عند ابل بيز البحر علي سفط السيارة وطالع منار )
علي : يللا مشينا واذا ماتبين تفصخين النظاره خليج لابستها لين نقعد داخل
منار : اوكي
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
** البارت السادس **
علي : يللا مشينا واذا ماتبين تفصخين النظاره خليج لابستها لين نقعد داخل
منار : اوكي
( علي اختار طاوله بعيده عن العيون عشان منار تاخذ راحتها اكثر )
علي : ها شنو تبين تطلبييين؟
منار : شبعانه مابي آكل مشكور
علي : زين ما اجبرج بس عالاقل اكلي معاي من اكلي ماحب اكل بروحي وبطلبلج عصير اوكي؟
منار : ( ابتسمت بحزن ) اوكي
علي : ( يظحك و يأشرها على ريال قاعد ياكل بروحه ) شوفي هذا.. تلقين حبيبته عطته طناش لين استسلم وقرر ياكل
منار : ( ابتسمت )
وصل الاكل وعلي غصبها الا تاكل معاه .. كلت شوي و تمت تسمع سوالفه اللي ماتخلص وتشرب عصير
علي : ( يظحك ) مو جني اسولف وايد ؟ لا صج ما انعطه ويه بسكت
( منار ابتسمت وبعد فترة قصيرة اسألته )
منار : علي .. عندك حبيبة ؟
علي : ( بلع لقمته غصب ماكان يتوقع تسأله جذي سؤال )
علي : حاليا لأ
منار : يعني كان عندك؟
علي : ( ابتسم ) اي كان عندي
منار : و تخليت عنها؟
علي : أحمد تخلى عنج؟
منار : ( حست جنه سجين دش بقلبها وماقدرت اترد عليه بس ارفعت عينها اتطالعه مصدومة ويت على بالها الف فكرة وفكرة )
منار : اتعرف احمد ؟؟
علي : ( يظحك ) اعرف احمد خالد واحمد الوحش و احمد بوناجي .. انتي أي احمد تبين؟
منار : ( حست بهاللحظة ودها تطعنه بالسجينة اللي عالطاولة لأنها بحاله ماتسمح ان يلعب بأعصابها بهالطريقة )
منار : علي اكلمك جد مو وقته الغشمرة الحين .. اشلون عرفت عن أحمد؟
علي : ( بعصبية ) يبه لا اعرفه ولا شي .. يوم اغمى عليج كنتي تنادينه واتقولين ليش يا احمد
منار : ( قامت والدم كله صاعد بمخها ) عن اذنك بروح الحمام
قامت منار راحت الحمام وعلي قعد يكمل اكله .. بالحمام منار تحس انها مختنقه ودها تنفجر من البجي بس تعوذت من ابليس وغسلت ويهها
واهي قاعده اتنشف ويهه بالكلينكس دشو بنتين الحمام يعدلون مكياجهم
البنت1 : طيبوووه والله انه حلو دام تركتو بعض بخزه عشان يرقمني
البنت2 : ( تحط حمره فوشيه ) حبيبتي حدي مستعيلة انا اعطيج رقمه وخلاص دقي عليه
البنت1 : والله انج عسل
اطلعت منار من الحمام وارجعت حق علي
علي شافها ابتسم
علي : يللا اكلي ماكلتي شي
منار : لا بس شبعت الحمدلله
علي : انا اعتذر اذا ضايقتج يللا اكلي
( يو البنتين نفسهم اللي كانو بالحمام وام حمره فوشيه طالعت علي بنظره وابتسمت وطقت جتفه بجنطتها وهي ماشيه )
منار : تعرفها ؟
علي : اي كنت اعرفها
منار : هذي اللي حبيتها ؟
علي : لا مو اهي
منار : اللي معاها راح اتدق عليك
علي : شنو؟ منو؟
منار : البنت اللي توه كانت معاها .. سمعتها بالحمام اتقول تبي تاخذ رقمك من اللي تعرفها وبتدق عليك
علي : ( يبتسم ) الحمدلله والشكر .. زين اطلب الحساب ولا تبين شي؟
منار : لا مابي شي تسلم
علي دفع الحساب ومشو من المطعم
علي : الحيين بنروح المركز العلمي
منار : لا ..
علي : راح انروح غصب مو كيفج
منار : بس ..
علي : راح انروح يعني راح انروح
( راحو المركز العلمي وتمشو بالاكواريوم وكل شوي يقول شي يخليها تظحك )
خلصو و ردو السياره وبالطريج كان مشغل الاف ام ويسولف عن اللي صار معاهم بالمركز العلمي
منار : ( لافه ويهها عالشارع وبالها مع الاغنية اللي بالاف ام )
كانت انغام تغني (هاتمنالو الخير ..ايه يعني يفوتني و ينساني ..ماهو ياما تحمل علشاني .. ما هو ياما كان ألبو عليا .. هاتمنالو الخير
ماهو أبل ما يجرحني داواني ..كان عمرى و كان هو زماني ..كان ألبي و روحي و عينيا )
منار : ( تبجي وعلى قد ماتقدر حابسه الصوت عشان لا يسمع شي )
علي : ( انتبه عليها ودش واجهة من واجهات البحر وسفط السياره )
علي : منار ؟؟ مو اتفقنا انج تنسين شي اسمه بجي؟؟ مافي شي يسوه عطي المشاكل طاف
منار : سهل عليك تقول جذي لأنك مو بمكاني .. ( تبجي و ترفع صوتها ) وحتى لو صرت بمكاني انت ريال تقدر تدبر الف حل
علي : زين لاتبجين هدي شوي .. واعتبريني اخوج وماراح اخليج بروحج بهالمشكله
منار : وليش تكون مسؤول عني ؟؟ مو ملزوم فيني انت
علي : بلا من يوم طحتي عند سيارتي صرت ملزوم فيج
منار : ( ساكته مده ) .. ممكن استخدم تلفونك؟
علي : بتدقين على منو؟
منار : رفيجتي .. بقعد عندها
علي : ( يعطيها تلفونه ) هاج
منار دقت الرقم وناطره احد يرد عليها
منار : الو .. مها ؟
علي يمها وقاعد يسمع
منار : اي انا منار .. مايهم انا وين بس داقه ابي منج خدمة
(بطلت باب السياره وانزلت وسكرته وراها عشان تكلم رفيجتها ومايسمعها علي )
منار : مها انا محتاجه فلوس وملابس داخليه وبدله وحده مو اكثر .. وانا اردلج كل شي بعدين
علي : ( تعمد ينزل من السياره عشان يسمعها ويتطمن ان كل شي تمام معاها )
منار : ( شافت علي و صوتها بدى يتغير من العبره اللي فيها ) زين اقدر انام عندج اليوم بس؟ ودي اسولف معاج محتاجه اقولج اللي صايرلي
منار : ( ساكته تسمع مها و انزلت دمعتها ) اوكي مشكورة ( وسكرت الخط )
علي : ها اشقالت؟
منار : ( تسمح دموعها وتبتسم له ) قالت حياج الله
علي : ( يبتسم ) الحمدلله .. ارتحتي الحين ؟
منار : اي ارتحت الحمدلله
علي : راح تكونين بعيده عن المشاكل اهناك؟؟ يعني مكانها امان؟
منار : ( تبتسم وعينها متروسه دموع ) اي مها اعز رفيجه عندي
علي : عيل يللا وين بيتهم؟
( دلته منار البيت .. يوم اوصلو وقف السياره شوي بعدين عن الباب عشان لايشوفونها راكبه معاه )
منار : ( طالعة علي ) مشكور على كل شي والله يوفقك يارب ويفتحها بويهك
علي : ( يبتسم ويحاول يظحكها ) جنج امي على هالدعاوي
منار : الله يخليها لك والله ان الأم نعمة ماتتعوض
علي : تسلمين ويخليلج اهلج
منار : والله مادري اشلون اردلك الجميل ..
علي : بس لاتكملين لا انزلج وانا مزعلج .. ( ابتسم لها ) انا ماسويت شي اي واحد مربى بيسوي اللي سويته واكثر من جذي .. يللا روحي وديري بالج على نفسج
منار : اوكي .. ( انزلت من السياره )
علي : ( يفتح دريشة السياره ) منار ؟؟
منار : هلا ؟
علي : والله ودي اقولج شي واخاف تفهميني غلط ( سكت شوي ) بس رقمي عند رفيجتج اي شي يصير معاج تذكري اخوج علي وكلميني ولا تتردين
منار : ان شاءالله .. مشكور على كل شي امش لحد يشوفك انا الحين بدش بيتها
علي : يللا اوكي انا ماشي ديري بالج على نفسج .. باي
- - - - - - - - - -
بالطريج علي يكلم نفسه ..
علي : انا ليش متضايق؟؟ بالعكس المفروض استانس لها لأنها عند رفيجتها وبوسط عايله مو ابروحها .. الله يوفقها
( وصل بيتهم و دش )
ام علي : ييت يا علي والله يابك تعال شوف هالاثنين دوخووني كله يتهاوشون سكتهم والله تعبت معاهم
عالية : ( اتصرخ ) يمه انا ماسويت شي اهو كله مناشبني
عثمان : جب لا تعلين صوتج لا اييب المقص واقص السانج
علي : ( يصرخ ) عثمان .. عالية خلاص مابي اسمع حسكم يعلا لا والله اطلع كل الحره اللي فيني على روسكم فاهمين ؟؟
عثمان : علي بس هالبنت يبيلها طق مو بس صراخ تخيل شاغله التلفون ساعتين كاملين ؟؟ وانا بره وبكلم امي مو قادر تلفونها مغلق وتلفون البيت كله مشغول؟؟ منو تكلم كل هالوقت ؟؟
عالية : قاعده ادرس امتحان مع رفيجتي بالتلفون فيها شي؟؟
عثمان : دراسه بالتلفون وين صارت انتـ....
علي : ( يصارخ من قمة راسه ) خلاص لاتزيد حرف والله مالي خلق ومابي اسمع صوت لا منك ولا منج
عالية وعثمان اسكتو
ام علي : يمه اشفيك ليش متضايق ؟
علي : ماكو شي يمه بس بروح داري ارتاح .. وانتو والله اذا سمعت صوت هواش انزل واطلع الحره فيكم
عثمان : انا بطلع واريحكم
( علي صعد غرفته وانسدح بفراشه يفكر بمنار .. شوي الا يسمع رنة مسج واصله )
فتحه وكان هذا المكتوب :
منور والله تعرفين اشكثر معزتج بقلبي وحايشني تأنيب ضمير و ودي اساعدج بس والله ماقدر .. اخوانج يو بيتنا اكثر من مره يسألون عنج وامي محلفتني اني لو كلمتج اقولها بسرعه , فكلش ما اقدر اسوي شي.. آسفه لأني ماقدرت أخليج تنامين عندي وآسفه لأني ماقدرت اعطيج ملابس وفلوس .. وآسفه لأني ماسمعتج وخليتج اتطلعن اللي بقلبج .. آسفه على كل شي .. ادري مايخفف عنج هالمسج ويمكن يكدرج اكثر بس والله احبج منور ومابيج تشيلين بقلبج علي
( علي انصدم من المسج وحس دمه يغلي .. فز بسرعه من سريره ونزل تحت )
أم علي : يمه علي وين رايح توك راد من بره
( علي طلع من البيت ومارد عليها .. وركب سيارته ودايس بيروح المكان اللي نزلها عنده )
علي : ( يطق السكان بيده ) ليش سويتي جذي يا منار ليش جذبتي وقلتي انها وافقت تنامين عندها.. ليييييييييييييش ( دايس ويسب الناس ويدق هرنات حق العالم حتى بالاشاره الحمره )
بعد فتره وصل المكان اللي نزلها فيه وقاعد يتلفت يمين ويسار ويدورها والمفاجأة ان لقاها قاعده بممر كله زرع بين بيتين ..
علي : ( مو مصدق عيونه نزل من السياره من غير لا يطفيها وقعد يحمد ربه ان لقاها وانها بخير )
( أول ما وصل لها لقاها قاعده متربعه عالارض وماتتكلم .. قعد جدامها )
منار ارفعت راسها وشافته جان تفجر كل اللي بقلبها وتبجي
علي : ( بصوت هادي ) ليش يا منار؟؟ مو اتفقنا تعتبريني اخو لج؟؟ ليش ماقلتيلي الصج؟؟
منار مغطيه ويهه بايدها وتبجي وماقالت ولا كلمة
علي : ( يمسكها من زندها ) يللا قومي معاي
منار : ( قامت )
ركبها السياره وقعد يطالعها واهي بس تبجي
علي مشى وماقال شي وطول الطريج اهي تسكت شوي وترد تبجي بعد دقايق
اوصلوا لي الشقه ونزلها معاه
مصطفى ( الرسيبشن ) : ( يطالع منار واهي دموعها على خدها وويها أحمر ومتفخ من البجي ) الله ؟؟ خير يا استاز علي ؟؟
علي حقره وصعد مع منار بالاصنصير ودشو الشقه
علي : ( بهدوء ) منار ليش سويتي جذي ردي علي
منار : ( ماترد بس تبجي وتوخر ويهها عنه )
علي : منار والله بديت اعصب لا تخلين اعصابي تفلت وتكلمي ليش سويتي جذي ؟؟
منار : ( ماترد )
علي : ( يصرخ عليها ) انتي اشفيج ؟؟ مهما كانت مشكلتج كبيرة يعني قعدتج بالشارع بتحلها لج؟؟ ينيتي؟؟؟؟
منار : ( واقفه ومنزلة راسها ودموعها ماتوقف )
علي : ( مسك منار من جتفها وقعدها عالقنفه ويصرخ ) بس لاتبجين كلميني ردي علي .. هذا تصرف وحده عندها مخ؟؟
منار : ( ماترد )
علي : ( يعلي صوته اكثر ) اكلمج انا ردي علي تره والله وصلت حدي
منار : ( اركضت غرفة النوم واهي تبجي واقفلت عليها الباب )
علي : ( يعلي صوته عشان تسمعه ) سمعي يا منار انا بخليج اليوم ترتاحين وراح ارد باجر بس والله يا منار والله اذا رديت ولقيتج طالعه ماتلومين الا نفسج
( طلع من الشقه واهو معصب ورقع الباب وراه )
ومنار انسدحت عالسرير وبجت وااايد لين نامت
- - - - - - - - -
علي رجع البيت وانسدح يفكر باللي صار ..
علي : ( بقلبه ) انا ليش صرخت عليها بهالطريقة وليش هددتها ؟؟
انا مو مسؤول عنها واهي اذا بتطلع كيفها .. بس انا ليش سويت جذي
علي : افففف اشصاير لي وايد قاعد افكر فيها مو قادر انام
( وتم يتقلب ويفكر فيها مده لين نام )
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
** البارت السادس **
علي : افففف اشصاير لي وايد قاعد افكر فيها مو قادر انام
( وتم يتقلب ويفكر فيها مده لين نام )
- - - - - - - - - - - - -
ام علي : يمه حبيبي علي قوم تغدى معانا منزمان ماقعدت معانا عالأكل
علي : ( يدفن ويهه بالمخده ) يمه مابي غدا بنام
ام علي : الساعه وحده يعني لي متى بتنام ؟
علي : ( يستوعب كلامها ) الساعه وحده؟؟
ام علي : ( تبتسم ) اي يا حبيبي يللا قوم غسل عبال ما احط الغدا
علي : ( قام ) لا يمه انا بتغدى مع الربع
ام علي : اشطاري عليك هالايام ماتشتهي اكل امك؟
علي : والله لو الف الكون كله طول بعرض ما القى احلى من اكلج يا الغالية انتي .. بس والله مستعيل ( ودش الحمام – عزكم الله - )
ام علي : على راحتك يمه ( اطلعت من غرفته )
( على طلع من البيت ودق عالشقه )
منار : ( ردت عالتلفون بس ماتكلمت )
علي : منار؟
منار : هلا علي
علي : ( بقلبه ) اشوه ماراحت .. والله فشله مادري اشفيني امس صرخت عليها
علي : ها شنو خاطرج تاكلين؟
منار : أي شي عادي
علي : لا مايصير قولي شنو تحبين
منار : اطلب الغدا على ذوقك
علي : اوكي نص ساعه واكون عندج
( علي دش الشقه ويايب معاه بيتزا )
علي : مساء الخير اشلونج اليوم ان شاءالله احسن ؟؟
منار : الحمدلله
علي : عيل قعدي خل ناكل لأني ميت من اليوع
منار : ( اقعدت عالقنفه )
علي : ( بطل البيتزا وشال قطعه وعطاها منار ) ديري بالج تره حاره
منار : ( خذتها واقعدت تاكل )
علي : منار ؟
منار : ( ارفعت راسها اتطالعه )
علي : آسف عاللي صار امس
منار : انا بعد آسفه
علي : عفية لا تسوين شي من غير لا تقوليلي
منار : ان شاءالله
( خلصو الاكل وغسلو ايدهم واقعدو بالصاله يسولفون )
منار : علي انت ماقصرت معاي وابسط شي اقدر ارد لك فيه الجميل اني اقولك سالفتي
علي : انا ودي اعرفها عشان اساعدج بس اذا مالج خاطر مو لازم تقولين والله
منار : لا انا ودي اقولك سالفتي كلها اذا لك خلق تسمعها
علي : ( يبتسم لها ) أكيد لي خلق .. ودي اعرف كل شي عنج
منار : ( تاخذ شهيق طويل وزفير وتحاول تسيطر على اعصابها عشان تقوله سالفتها وماتبجي )
علي : اذا مو مرتاحه خليها وقت ثاني
منار : لأ انا بقول الحين
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
** البارت السابع **
علي : اذا مو مرتاحه خليها وقت ثاني
منار : لا انا بقول الحين
منار : ( تتكلم بهدووء عشان تسيطر على نفسها ) انا كنت اعيش مع امي وما اشوف ابوي الا نادر يمر دقايق ويمشي وماعندي خوال ولا اعرفهم لأن امي بحرينية وتزوجت ابوي واهلها مو راضين فقاطعتهم من يومها وعاشت بالكويت بس ابوي طلع متزوج وصارت مشاكل بين امي وابوي وبعد سنه من زواجهم طلقها وخلانه نعيش بروحنا
ماكان لي الا اهي وأحمد .. ( تدمع عينها ) .. هذيله اللي كنت معتبرتهم عايلتي الوحيده
علي : أحمد منو بالظبط؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك