رواية بقراري ضيعت نفسي واحبابي -4
البندري: أنا طيبه... ـ وتناظر بطنها: وولدكـ مو مخليني بحالي... كل شوي يضربني
قرب تركي بسرعة وحط أذنه عند بطنها: ما أسمع حاجة
البندري: ههههه ولا راح تسمع لأنه سكت
جلس تركي جنبها وتنهد....
البندري: خير وش فيكـ
تركي: جا في بالي بسام الله يعطيه إن شاء الله
البندري: إن شاء الله... ما تتصور وش قد فرح هو ومشاعل لما عرفوا إني حامل... ومدري وش بيسوون لما يعرفون إن فيني ولد
تركي: بخليهم يربونه وأنا وأنتي نتأمر عليهم
البندري: هههههههههههه
تركي: ما قلتي لي وين أمتس
البندري: راحت لعند جارتها
دخل بسام ومشاعل من بعد ما فتحت الخدامة الباب....: السلام عليكم
تركي والبندري: وعليكم السلام... الحمد لله ع السلامة
بسام: الله يسلمكم... وش أخبار العصفور
البندري: العصفور بخير ويسلم عليكـ
بسام: سمعوا بما أنكم مو وجه زواج أنا باخذه عندي
تركي: ههههههه متى ما بغيته خذه حنا موافقين
البندري: تو تركي يقول بيخليكم تربونه وأنا وياه نتأمر عليكم
مشاعل: لا بالله ما عاد نبيه
الكل ضحكـ.... وخصوصا تركي لأنه فاقد الجو الأسري من صغره....
بعد شهرين
تركي كان بالدمام عند أهله.... كان جالس مع زوجة أبوه اللي لاحظت أنه مرتاح.... كان يسولف ويضحكـ وزيادة على كذا سمنان.... ما تدري وش السر اللي مخبيه تركي عنهم.... بس كانت مبسوطة له لأنها كانت سبب تعاسته وهو صغير....
بعد ما خلص تركي سوالفه راح غرفته ورن التلفون.... قفل الباب وراح يرد....
تركي: الوو
بسام: هلا تركي
تركي: هلا فيكـ
بسام: كيف حالكـ
تركي: بخير كيف حال بنووو
بسام: وأنا مالي رب تسأل عني
تركي: وش ابغي فيكـ أنت وخشتكـ
بسام: ههههه
تركي: وش أخبارها عساها بخير
بسام: لا والله بنوو بالمستشفى
تركي: وش فيها
بسام: أبشركـ جابت لكـ فيصل
فرح تركي: جد!!
بسام: إيوه مبروكـ يبو فيصل والله يبلغكـ فيه
تركي: الله يباركـ فيكـ... وإن شاء الله أبلغ فيه بوجودكـ
بسام: تسلم... هاه وش صار على شغلكـ بالشرقية
تنهد تركي لأن ما عنده شغل غير أنه يزور أهله.... أو بالأخص زوجة أبوه وأخته لأن علاقته بأبوه وإخوانه شبه مقطوعة....
تركي: تعبت والله... بس التعب راح من سمعت الخبر
بسام: ومتى ناوي تجي الرياض
تركي: الجمعة إن شاء الله
بسام: على خير إن شاء الله... يللا بروح أشوف الصغير
تركي: تكفى بوسه عني
بسام: أكيد ببوسه بس مو عشانكـ هههههه
تركي: بردها لكـ... يللا حط بالكـ عليه
بسام: أوكي فمان الله
سكر تركي الخط وهو مبسوط.... طلع من غرفته وشاف أخوه الصغير ماهر جالس بالأرض ويحط ألعابه بفمه.... اختفت ابتسامته لأن تذكر أمه.... تقدم وجلس على ركبه قبال أخوه....
نزلت مها أخته المجلة لما حست بحد.... ناظرت بتركي اللي جلس قبال ماهر ويناظره بسرحان.... فتحت عيونها ع الآخر لما سمعت تركي يتكلم....
تركي اللي تذكر أمه وش بتكون فرحتها لما تعرف أن ولدها صار أب.... مسح شعر أخوه وقال: يمه ما ولهتي علي... بس أنا مشتاق لتس وتمنيتس تكونين معي بها اليوم... فرحتي ناقصة بدونتس يمه، يا ليتني مت معتس ياليت
نزلت دمعت مها لما سمعت أخوها.... تركي اللي طول عمره طايش وما يهتم لأحد.... عرفت أنه يحس ويتأثر بكلام اللي حوله بس يبين العكس.... توقعت أنه يتأثر شوي بس مو لدرجة أنه يتمنى الموت.... ما عرفت وش اللي ذكره بأمه.... بس اللي فهمته من كلامه أنه صار له شي حلو ووده تكون أمه موجودة وتشاركه بفرحته.... توها بتسأله بس كلمت أبوها الجمتها....
أبو تركي: صادق يا تركي... يا ليتكـ ميت معها كان ريحتني منكـ ومن بلاويكـ
أبو تركي اللي سمع كلام ولده أنقهر.... ما يدري وش اللي قصر فيه على ولده وخلاه يتمنى الموت.... أملاكـ أمه عنده ومعطيه الحرية.... ومع ذلكـ حريته ضيعته.... فرح لما تعالج بس فرحته نقصت لما شاف تركي رجع ساكت عن حقه.... حاول يغير أسلوبه مع تركي بس صار يشوف تركي ضعيف شخصية مثل أمه.... عشان كذا صار يعامله بقسوة يمكن يتعلم تركي ياخذ حقه.... وما يدري أنه يطعن تركي بقسوته....
تركي ما تحركـ ولا التفت بس شد قبضة يده.... وبداخله يستغفر حتى ما يغلط على أبوه.... وقف وتو ينتبه بوجود أخته وعلى قد ما يقدر أرخى ملامحه.... التفت لأبوه وناظره ببرود....
أبو تركي يكره ها النظرة: وش فيكـ ساكت نفسي بيوم أسمعكـ ترد علي... نفسي أشوفكـ مثل أخوكـ أسد والكل يهابكـ... بس ما منكـ رجا لأنكـ طالع على أمكـ
تغيرت ملامح تركي لقهر" لو تدري إن أمي موصيتني ما يطلع صوتي بوجودكـ.. بس آآخ على من ينتظر رضاكـ "....
زفر بتعب ما يقدر يرد على أبوه اللي يكمل كلامه.... ختم أبو تركي كلامه وهو يحسب ويدعي.... مشى تركي لغرفته بدون ما يرد على أخته اللي تناديه.... شال شنطته ونزل تحت" أنا وش اللي خلاني أزورهم "....
شافته زوجة أبوه وقالت: تركي وين رايح
ناظرها تركي" سامحيني يا مرت أبوي.. مقدر أنسى عمايلتس فيني "....
زوجة أبوه: تركي وين رايح... مو أنت قايل أنكـ مشتهي سمكـ وأنا سويته عشانكـ
تركي شوي وتنزل دموعه.... قال وهو رايح: متضايق، أبي أمي... ما عليكم مني، أنسوني، أنا مو ولدكم
ما يدري وش يقول بس المهم أنه يهرب من المكان.... طلع من البيت وقرر أنه يرجع للرياض بدل الهم اللي بالدمام.... بس بآخر لحظة غير رايه وراح لبيت أمه.... أعصابه تلفانه وخاف تترمل البندري ويتيتم ولده وهو ما شافه....
بعد مرور أربع سنوات....
البندري كانت نايمه وشافت نفسها تمشي بالظلام.... وسمعت صوت تركي وراحت له.... خافت لما شافته يبكي وقالت: تركي وش فيكـ
تركي بصوت باكي: غصبن عني يا بندري... والله إني أحبتس بس ظروفي أقوى مني
البندري: أي ظروف وش فيكـ
تركي وهو يبعد: غصبن عني يا بندري... والله إني أحبتس بس ظروفي أقوى مني
حاولت البندري تلحقه: لحظه يا تركي فهمني وش فيكـ
ابتعد تركي وهو يعيد كلامه وهي تناديه وتحاول تلحقه الين اختفى.... سمعت صوت ولدها يضحكـ والتفتت وشافت مشاعل وبسام....
البندري: مشاعل وين فتووني
مشاعل وهي تلعب فيصل: فتوون عند أبوها وحنا عندنا فصولي
بسام كان معصب: أنا كنت حاس من قبل بس محد سمعني
خافت البندري: وش حسيت به... وش اللي صار
بسام: محد بيدفع الثمن غير فيصل وفاتن
صحت البندري من النوم وهي متروعه.... خافت من ها الحلم اللي يهدد بيتها.... تعوذت من إبليس وهي تتنفس بسرعة.... ناظرت تركي اللي كان نايم" وش اللي مخبيه يا تركي وتبكي عشانه.. أعوذوا بالله من الشيطان الرجيم.. أكيد هذي كوابيس ".... قامت وطلت على عيالهم النايمين باستهم ورجعت لسرير وهي تفكر بالحلم....
كالعادة آخر الأسبوع، وصل تركي من الدمام ودخل البيت.... كانت مشاعل موجودة مع أمها وأختها بالصالة ومع عيال البندري....
دخل تركي: السلام عليكم
الكل: وعليكم السلام
ركض فيصل ( 3 سنوات ) لأبوه.... اللي ضمه وباسه....
تركي: هلا بحبيبي فصولي... شلونكـ
فيصل: تيب... بابا أبي واوا
تركي: أبشر بشتري لكـ اللي تبيه... بس أنام شوي
راح تركي فوق وراحت وراه زوجته.... فضخ تركي ثوبه وجلس ع السرير والبندري تطلع أغراض من شنطته....
البندري وهي تطلع أغراضه: تركي... ما تلاحظ إن أغلب أشغالكـ ما تكون إلا بالشرقية
ناظرها تركي وهو مستغرب من كلامها....
البندري تكمل كلامها وما تدري عنه: يعني أنت دايما تسافر للمنطقة الشمالية أو جده بس أكثر وحده الشرقية وشهريا
تركي ويبي يعرف وش تبي توصل له.... قال بشوية حده: وش تبيني أسوي
استغربت البندري من نبرة صوته: تصدق في حياتي كلها ما قد شفت البحر... وأنت شهريا تروح الدمام وما قد فكرت تاخذنا معكـ
تنزفر تركي: وأنا أروح عشان أتمشى... ـ تمدد وقال: أسمعي أنا بنام صحيني لصلاة العصر
طلعت البندري وتأكدت من شكوكـ أختها.... في سر مخبيه تركي ورا سفره غير الشغل.... بتسكت الحين وبتحقق معه وقت ثاني....
تركي لما سمع الباب سكر بدا يفكر" لاحظت يا تركي.. وليه ما تلاحظ مو هي زوجتكـ اللي ما يدرون أهلكـ عنها.. وإذا دروا وش بيصير.. أبوي طول عمره حاقد علي جت على زواجي يعني.. بس البندري وأهلها وش بيسوون إذا عرفوا بموضوع أهلي.. بتكرهي وتطلب الطلاق وبتاخذ العيال.. ولا بتسكت وتنتظر المجهول مثلي "....
دخلت البندري وهي شايله بنتها وشافت تركي سرحان.... خافت أكيد شكـ أختها بمحله.... وملاحظتها طيرت النوم من عيونه وخلته يفكر....
قالت تنبهه: تركي وش فيك ما نمت... باقي ساعة ع الصلاة
استغرب تركي كيف مر الوقت بسرعة" هذي من متى هنا ": ما جاني نوم... وين فيصل
البندري: خذته مشاعل معها
عدل تركي جلسته وقال: بندري... تعالي أجلسي جنبي
جلست بعد ما حطت بنتها بسريرها اللي كله العاب.... وقالت: وش فيكـ
تركي: بندري في شي من تزوجتس وأنا ساكت عنه... والحين أبغى أقولتس إياه بس حطي في بالتس إني أحبتس ومالي غناة عنتس
انقبض قلب البندري: خير وش فيكـ
نزل تركي عينه وقال: سمعيني ولا تقاطعيني... أنا قلت لتس من قبل إني من الدمام مو من الرياض... أبوي عنده شركة كبيرة وأسمه كبير بالسوق... بس أنا حبيت أعتمد على نفسي واشتغلت هنا بعيد عن واسطات الوالد
البندري مفجوعه: وش ها الحكي أبوكـ حي
تركي: لا تقاطعيني... الحمد لله اشتغلت هنا وتيسرت أموري وأمي كانت....
قاطعته البندري: وأمكـ موجودة بعد... ـ شافت نظرته وسكتت....
تركي: وأمي كانت تبي تزوجني بس أنا ما أبغى أتزوج إلا بأختياري... وبعد ما شفتس وسألت عنتس... خطبتس بعد ما عرفت ظروفتس
كانت تسمعه ودموعها تنزل، طلع لتركي أهل أكبر كذبه بحياتها.... وقفت وهي تحس بكره له، راحت لسرير بنتها.... فاتن شافت أمها واقفة قبالها مدت يدينها لها عشان تشيلها.... ناظرت بنتها ودمعتها بخدها.... تتنفس بسرعة ومهيب مصدقة اللي تسمعه....
تركي يناظر ظهرها وقال: عندي أخوان، أخوي الكبير يوسف... وأخوي الثاني خالد... وأختي الوحيدة مها وأخوي الصغير ماهر... ما بينه وبين فيصل إلا كم شهر
التفتت البندري وهي تبكي: صار عندنا عيال يا تركي وتوكـ تتكلم عن أهلكـ
تركي بتردد: لأني... لأني تزوجتس من وراهم
غطت البندري وجهها بيديها وبكت بصوت مسموع.... قرب تركي وحط يده على كتفها.... بعدت البندري عنه وقالت: لا تلمسني ابعد عني
تركي: والله مو قصدي أتسلى فيتس
البندري منهارة: من ورا أهلكـ!!... ليه وأنا وش ناقصني حتى تتزوجني من ورا أهلكـ
تركي: مو ناقصتس شي... بس ظلم أخوتس لتس هو اللي خلاني أخطبتس
انقهرت البندري متزوجها شفقة: حياتي مع سعد أرحم من اللي سويته فيني
تركي: بندري أهدي شوي... وأنا بكلم أهلي عنتس الأسبوع الجاي
البندري: تستهبل أنت... بعد أربع سنوات بتقول أنا متزوج بنت فقر ومالها ظهر
سكت تركي وما عرف يرد....
البندري: أعرف أنكـ هدمت حياتي... أنت بالآخر بتتزوج البنت اللي بتشرف أهلكـ... بس تذكر إني أنا وعيالكـ بندفع ثمن طيشكـ يا تركي... خسارة على قلبي اللي عطيتكـ إياه خسارة
تركي ما عنده جواب مناسب لبس ثوبه.... وطلع من الغرفة ومن البيت كله.... البندري بكت بحسرة ما توقعت ها الشي منه.... شالت بنتها ونزلت تحت لغرفة أمها.... حطت بنتها وضمت أمها وبكت....
سألتها أمها عن السبب وصار اللي كانت خايفه منه وأنكشف المستور.... حاولت تهدي بنتها وهي خايفه من رد أبو تركي لما يعرف بزواج ولده من بنت خالته....
.
.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وصل الخبر لمشاعل وبسام اللي اتصل على شقة تركي....
بسام: ليه تسوي بالبنت اللي سويته
تركي: ما سويت شي
بسام: لااا ما سويت شي... وأكيد سعد عارف وساكت
ما قدر تركي يرد....
بسام: أنت وسعد أنذال هو أخذ الشركة وأنت تبي وناستكـ يا ..###
تركي ما عنده رد.... بس قال: بسام أنا بكلم أهلي عنها بالأسبوع الجاي
بسام: ولا تنسى تطلقها وتنسى عيالكـ... لا باركـ الله فيكـ يا..##
سكر الخط.... أما تركي ظل يفكر بموقف أبوه.... الين دق الجرس وجا له بدر.....
بسام اللي ركب سيارته وراح لبيت سعد....
بسام: وليه تزوجها له وأنت عارف أنه بيزوجها بالسر
سعد ببرود: وأنت وش يخصكـ
بسام: البندري أختي يا سعد
سعد: لا صارت أختكـ من أمكـ وأبوكـ تعال أحكي... ويللا تراكـ عطلتني
بسام: ذنب البندري برقبتكـ يا سعد وربكـ ما يرضى بالظلم وراح تعرف إني صادق
طلع من عند سعد وهو مقهور.... زيارته ما جابت نتيجة وكان ينتظر تركي يكلم أهله....
بالليل كان جالس مع ربعه وهم اللي مبسوطين ويضحكون.... أما هو كان تفكيره مشتت بين أهله وبين زوجته وعياله....
بدر: تركي
التفت تركي: سم
بدر: سم الله عدوكـ... التلفون لكـ
خذ تركي التلفون وراح الغرفة.... جلس بطرف السرير وقال: الو
البندري: تركي!!
تركي: إيوه... وش فيتس
البندري: متى تجي العشاء جاهز
تركي: عشاء!!
البندري: إيوه يللا أنا أحتريكـ
تركي يحس أنه ظلمها كثير: تحتريني يا بندري... تبين أجي وأتعشى معتس
البندري تحس أنها ما عطت تركي فرصة يبرر تصرفه.... فقالت: أكيد... يللا تعال
تركي: اوكي... باي
سكر تركي الخط وسلم على ربعه وطلع.... وصل البيت وبصعوبة دخل متفشل من البندري وأهلها.... دخل الصالة واستقبله ولده.... شال فيصل وراح لعند فاتن اللي رفعت يدينها له.... جلس وحطهم اثنينهم بحضنه وبوسهم.... ناظر بعيونهم وحس أنه ظلهم وظلم أمهم معهم....
ناظرته البندري من باب المطبخ وتحسرت على حظها.... خذت نفس وطلعت للصالة وبيدها سفرة الأكل....
البندري: هذا أنت جيت... أحط العشاء ولا تبدل قبل
تركي: إيوه حطيه
جلست البندري توكل عيالها أما تركي كان سرحان وما أكل إلا شوي....
بعد فترة لما ناموا عيالهم.... شالت البندري بنتها ولفت لتركي وقالت: تركي... هات فصولي فوق
قام وشال ولده وراح وراها.... خذت البندري فيصل ونومته جنب أخته.... التفتت وشافت تركي يجهز شنطته....
البندري: وين رايح
تركي: بروح عند واحد من الشباب
البندري: ليه
تركي: وبعد تبيني أنام هنا وأنتي عارفه كل شي
البندري: إيوه لأنكـ للحين زوجي... ـ قربت منه ومسكت ذراعه وقالت: اتركـ اللي بيدكـ وناظرني
ناظرها وشاف الدموع بعيونها....
البندري وتحس نفسها مخنوقة: عطني سبب واحد أعذركـ باللي سويته فيني
سكت تركي وهو يناظر بعيونها.... بس أنه رجع بذاكرته لثمان سنوات.... لما ضربه أبوه عشان صدم بالسيارة..... أنقهر من أبوه وطلع من البيت زعلان....
ناظر يده وتذكر كيف طاحت منه حبة المخدر.... لأنه خاف على نفسه بس أصحاب السوء خذوه لذاكـ الطريق....
راح تركي عند الكومدينه وقال: بندري... تدرين أنتس متزوجة واحد مدمن وله تاريخ مع الخمر والسوالف البطاليه
فتحت البندري عيونها ع الآخر: ايش!!
التفت لها وقال: بندري أسمعيني شوي... من فتحت عيوني وأنا عايش مع أمي لحالنا... وعشان أبوي تزوجها غصبن عنه وبسبب جدي... فكان يحط حرته فيها الين توفت وأنا بعدي صغير
سكتت البندري وهي متفاجأة، أول مرة تركي يتكلم عن أهله.... لأنه قايل لها أنه مقطوع من شجرة وهذا اللي شافته من تزوجها....
تركي: توفت أمي وصرت أنا أعاني بعدها لأن أبوي يذكرها إذا شافني... ما أقولتس أنه كان يضربني بس كلامه كان قاسي... ويفرق بيني وبين أخواني وكأني ولد الخدامة
البندري: ليه
تركي: مدري... بس زيادة على معاناتي مع الوالد طلعت زوجة أبوي... ما رحمت صغر سني وشفت معها أنواع العذاب... قالوا لي يا بختكـ أنت ولد العالي... وش استفدت من فلوسي دام إني أنام بالمطبخ... دام إني أتعاقب بسبب وبدونه... زوجة أبوي تعذبني وأبوي مو مهتم... ما عندي خوال أروح لهم ما عندي خالات أشكتي لهن... لأن أمي وحيدة أهلها... كنت دايما أقول يا رب تموت خالتي يا رب... بس ربي بلاها بسرطان الثدي وتغيرت معاملتها لي 180 درجة... بس بعد ايش بعد ما صار عمري 15 سنة
البندري تعاطفت معه بس قالت: صار ماضي يا تركي ولازم تنساه... ـ بتردد كملت: صحيح أنت مدمن
تركي: كنت مدمن وتعالجت
البندري: وليه تدمن
تركي: هواشات أبوي وصراخه علي تحملته... بس ما تحملت أنه يضربني وقدام أولاد عمي... فهربت من البيت وما وقفت إلا عند قطار رايح للرياض... ركبت فيه وجيت هنا وأنا عمري 17 سنة
البندري بصدمة: جد؟؟
تركي: إيوه وبعد هواشات مع الوالد نقلت ملفي هنا عشان أكمل الثانوية... وبرضوا درست بالجامعة هنا... بس مرة صدمت بالسيارة ومد أبوي يده علي للمرة الثانية... رجعت للرياض وأنا مقهور من كل شي... وما وقفت إلا وأنا أناظر 3 شباب يتاجرون بالمخدرات
شهقت البندري....
ناظرها تركي ثواني وصد: هه... رحت لهم وتعرفت عليهم وأنا ناوي أجرب المخدر... ما غابت عن عيني فرحتهم لما عرفوا إني ولد العالي... والأكيد عشان يستفيدون من فلوسي... ولما عطوني الحبوب كنت بجربها بس إني خفت على نفسي... وأنتي عارفه كيف يجرون الواحد معهم... بالبداية كانوا يعايروني إني بزر ومن ذا الكلام... وبعدها قالوا راح أنسى مشاكلي وجربتها... وبعدها صرت مدمن عليها ورافقت شباب فاشلين... ما همهم غير البنات والخمر والحشيش... ـ ناظر لبعيد وتذكر ذيكـ الأيام وقال: كم بنت عرفتها... وكم بنت كذبت عليها بحبي لها الين ما أخذت منها اللي أبي ورميتها بالشارع... أهلي وناس كثير حاولوا فيني عشان أتركـ ذا الطريق... وأولهم خويي بدر
البندري كانت تسمع وهي مصدومة بتاريخ زوجها....
تركي: بس ذاكـ اليوم لما دخلتي علي بالمستشفى قلبتي كل شي فيني... صرت ما أنام إلا وأنا أفكر فيتس... عشان كذا سألت عنتس وقررت أخطبتس لأني عرفت أنتس إنسانه طاهرة وشريفة... وأنا اللي كنت أظن أن ها النوع اختفى... بس خفت إني أظلمتس... عشان كذا كنت حريص أنتس ما تشوفيني منهار ومحتاج مخدر... ولما عرفت أنتس حامل...
خفت أنتس تجيبين طفل معاق أو مشوه... وفكرت أتعالج من إدماني لأنتس ما تستاهلين يكون زوجتس مدمن... وتركتس 3 أشهر إني مسافر للعمل وأنا أتعالج... لأني ما أبغى أفقد اللي كنت أدور عليه من سنين
قرب منها ومسكـ يدينها وابتسم: صدقيني عشانتس أنا تركت الخمر والبنات... تركت المزبلة اللي كنت مخاويهم... بس خفت إن أخوتس سعد يكشفني عند أهلي
ناظرته البندري وقالت: أربع سنين يا تركي... وأهلكـ ما يعرفون حاجة
تركي: قلت لتس هواشاتي مع أبوي وأخواني ما تنتهي... عشان كذا تركتهم وقطعت علاقتي فيهم... أروح الدمام شهريا عشان أزور زوجة أبوي... لأنها الوحيدة اللي تسأل عني وتبي تشوفني
ما شاف منها رد وقال: سامحيني يا بندري... ما كنت أبغى أتزوجتس وأهلي ما يدرون... بس إني وحيد بها الدنيا وما لي حد غيرتس أنتي والعيال
سكتت البندري لثواني وقالت: وحنا مالنا غيركـ... بس ممكن طلب
تركي: آمري
البندري: أجلس معي بالبيت الين تروح الشرقية... مو بس ها الليلة
تركي: طيب
يوم الأربعاء
اللي المفروض تركي يروح الشرقية... دخل البيت من بعد العمل وراح للصالة... وبما أنه شاف سيارة بسام موجودة فيمكن تكون مشاعل داخل.... تنحنح قبل ما يدخل....
تغطت مشاعل وقال بسام: أدخل يا تركي
دخل تركي وشاف الكل موجود: السلام عليكم
الكل: وعليكم السلام
ترك فيصل الألعاب وركض لأبوه.... ضمه تركي وباسه: منيب مصدق إن عندي عيال
بسام بحقد: حتى أهلكـ ما راح يصدقون
توجهت الأنظار لتركي اللي وقف وقال: لا تخاف اليوم بيعرفون
راح فوق بدون ما يناظر حد.... رمى نفسه ع السرير بتعب وما حس بشي إلا لما سمع البندري تناديه....
البندري: يللا يبو فيصل وش ذا النوم
سحب تركي نفسه وقال: طيب... طيب
قام وهو يناظر البندري وهي ترتب شنطته.... دخل الحمام وهو يمرر أصابعه بين شعره....
وقف تركي وبيده شنطته والبندري واقفة قباله....
تركي: بندري لا تتصلين علي أبد
البندري: ليه
تركي: بس كذا لا تتصلين... مهما تأخرت أنا اللي باتصل واحتمال إني أجلس أسبوعين بالدمام
البندري: طيب... تجي بالسلامة
تركي: الله يسلمتس... فمان الله
مشى عنها وهو يحس أنه آخر مرة بيشوفها وهي حاسه بنفس شعوره... وقف والتفت لها وشاف نظرات الخوف بعيونها رجع لها وضمها لصدره.... ضمها بقوة وكأنه يودعها الوداع الأخير.... مسكـ ذراعيها وقال: ما أوصيتس على نفستس وع العيال
انقبض قلب البندري وقالت: تركي لا تروح
تركي: إذا ما رحت اليوم بروح بكرة أو الأسبوع الجاي... لا تخافين ما راح يصير إلا اللي الله كاتبه... بس مثل ما قلت لتس لا تتصلين علي
دمعت عيون البندري: طيب اتصل أول ما توصل بالسلامة
تركي: طيب
جا فيصل لأبوه ضمه تركي وباسه.... صافح زوجته وناظرها، عيونهم اللي تتكلم.... خايفين من رد أهل تركي.... سحب تركي يده وضغط على نفسه أنه يمشي....
تركي: مع السلامة
طلع تركي، أما البندري ظلت محتارة.... سمعت ولدها يركض وهو ينادي خاله.... التفتت وشافت مشاعل داخله مع بسام....
بسام ومشاعل: السلام عليكم
البندري: وعليكم السلام
مشاعل وهي تبوس فيصل: وينه أبو فيصل
البندري: مشى للشرقية
بسام وهو شايل فاتن: من متى
البندري: من نص ساعة
بسام: كان نفسي أشوفه
طول الطريق كان يمشي نفسه يمشي للأبد.... وبعد ساعتين وصل لمدخل فيلاتهم من بعد ما فتح له الحارس الباب.... اتصل ع البندري: هلا بنوو
ارتاحت البندري: هلا فيكـ... وصلت
تركي: إيوه وهذا أنا عند الباب منيب قادر أدخل
البندري: توكل على الله وأدخل
تركي: طيب أكلمتس بعدين... فمان الله
أخوان تركي
>> يوسف أخوه الكبير متزوج.... خالد أخوه الثاني متزوج.... مها أخته الوحيدة أرمله وعندها بنت.... ماهر أصغر أخوانه 3 سنوات <<
نزل ودخل كانت أم يوسف زوجة أبوه بالصالة....
تركي: السلام عليكم
أم يوسف: وعليكم السلام... هلا بولدي
باس راسها: هلا فيتس... ـ جلس جنبها: شلونتس يمه
أم يوسف: أنا بخير دام أشوفكـ أنت وأخوانكـ بخير
جا يوسف مع مها والعيال وجلسوا معهم.... وبعد ساعة جا أبوهم مع خالد وجلسوا يسولفون.... وتركي طول الوقت يحاول يكون طبيعي....
بعد العشا....
أبو يوسف يكلم زوجته وهو يناظر تركي: بتقولين له ولا أنا أقوله
تركي حس أن الموضوع فيه إن....
أم يوسف: لا أنا بقوله... ـ التفتت لتركي وقالت: تركي وش رايكـ ببنت عمكـ
تركي: أي وحده
أم يوسف: غادة بنت عمكـ سلطان
ابتسم تركي بارتباكـ: وش عرفني فيها... علمي فيها لما كنت بابتدائي
فرحت أم يوسف لما شافته ابتسم وقالت: أجل استعد أنا وأبوكـ ناويين نخطبها لكـ
وقف تركي من الصدمه وقال: ايـــش
مها: هههه تركي وش فيكـ أمي قالت بتخطب لكـ غادة بنت عمي
انفجر تركي: أي خطبه وأي بطيخ... أنا متزوج
الصدمة خلت الكل ساكت ويناظر الثاني....
خالد بصدمه: متزوج!!
تركي: ايوه متزوج... يعني عندي زوجة
يوسف: متى وليه
تركي: من زمااااان وأنا متزوج
أبو يوسف: تركي
تذكر تركي وجود أبوه....
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك