رواية بقراري ضيعت نفسي واحبابي -5
انفجر تركي: أي خطبه وأي بطيخ... أنا متزوج
الصدمة خلت الكل ساكت ويناظر الثاني....
خالد بصدمه: متزوج!!
تركي: ايوه متزوج... يعني عندي زوجة
يوسف: متى وليه
تركي: من زمااااان وأنا متزوج
أبو يوسف: تركي
تذكر تركي وجود أبوه.... لأنه ظن أنه يتناقش مع زوجة أبوه واخوانه.... ناظر أبوه بتردد....
أبو يوسف: من بنته متزوج
خوف تركي من أبوه خلاه يسكت....
مثل ما توقع أبو يوسف بنت فقر.... وقف وقال: ما تقدر تقول من بنته صح... لأنكـ عارف أن ما فيه عايله محترمه تعطي بنتها لواحد مدمن مثلكـ
تركي: يبه ليه مهتم بالنسب... أهم شي الأخلاق والسمعة الطيبة
أبو يوسف: لا يا شاطر... عشان يسألوني عن أنسابكـ وأقولهم الهـ..## أنساب ولدي
أنقهر تركي: بس يا يبه أنا...
قاطعه أبوه: بلا كلام فاضي... من بكرة تروح تطلقها
تركي: لا... منيب مطلقها
أبو يوسف: طلقها يا تركي ولا البيت يتعذركـ
تركي: يبه ليه تحرمني من زوجتي وعيالي
ارتفع ضغط أبو يوسف وفتح أزرار ثوبه: عيالكـ؟؟ أي عيال... ـ ما قدر يكمل كلامه وجلس....
الكل: يبه
وقفوا وراحوا لأبوهم إلا تركي.... خالد ويوسف شالوا أبوهم ولحقم تركي.... جلسوا ينتظرون الدكتور يطمنهم.... مر الوقت وتركي جالس يفكر.... أخوانه مشوا من ساعتين إلا هو.... سند راسه بالجدار وما حس بنفسه إلا لما سمع صوت المؤذن.... ناظر ساعته كانت 4 الفجر.... صلى الفجر ورجع ناظر أبوه من النافذة.... يحس نفسه بين نارين، أبوه وزوجته.... حس بجوع وراح لكفتيريا المستشفى.... ولما رجع لغرفة أبوه شاف أخوانه داخلين الغرفة.... فكر يلحقهم بس تردد، ظل دقايق وبعدها دخل....
الكل التفت وبمجرد ما شافه أبوه قال: طلقها يا تركي... ـ كمل بتعب: ولا أنا... بري منكـ... ليوم الدين
يوسف خاف على أبوه: تركي أطلع بره
تركي: بس...
ما عطاه فرصه يتكلم وطلعه بره.... سكت تركي ومشى لبيتهم وعلى طول لغرفته ونام..... وما صحى إلا 8 العشا، نزل تحت وما شاف حد.... أكيد أنهم عند أبوه.... قال للخدامة تسوي له شي ياكله وبعدها راح المستشفى....
وصل لغرفة أبوه إلا يوسف طالع من الغرفة.... قال لما شاف تركي: نعم... وش عندكـ جاي، ما عندكـ دم أنت
تركي: وش فيكـ... أبغى أشوف أبوي
يوسف: تبي تموت أبوي ناقص عمر
تركي: أبعد واللي يرحم والديكـ
دخل تركي غصبن عن أخوه.... كان عمه وأولاد عمه موجودين....
أبو يوسف لما شاف تركي قال: بشر يا تركي عسى طلقتها
قرب تركي وقال: يبه عطني فرصه أشرح لكـ
أبو يوسف: يعني مالكـ نيه تطلقها صح... أطلع بره
تركي: زوجتي وعيالي مالهم ذنب
صرخ أبو يوسف: تركي أطلع بره لا باركـ الله فيكـ من ولد
وكالعادة سحبوه اخوانه وطلعوه بره....
يوسف بعصبيه: أسمع دام أبوي بالمستشفى... ما أبغى أشوف وجهكـ هنا فاهم يا تريكي
عصب تركي: منيب أصغر عيالكـ حتى تقول تريكي... وبجي لأبوي غصبن عن خشتكـ
يوسف: إذا فيكـ خير قرب
تقدم تركي ودفه يوسف.... توهم بيتضاربون بعدهم ولد عمهم....
فايز: يوسف تركي وش فيكم... احنا بمستشفى
تقدم فهد صديق تركي.... واللي شافهم من أول ما طلعوا من الغرفة.... مسكـ تركي من ذراعه وقال: تركي... تعال معي يللا
راح تركي مع صديقه لشقة وجلسوا....
فهد: تركي شلون تجي الدمام وما تقول لي
تركي: انشغلت مع أبوي وش أسوي... والله إني في حيره
فهد: ليه وش الجديد... هواشكـ مع الوالد مو جديد
تركي: لا مو جديد... بس خلني أقولكـ وأنت شور علي
بدا تركي يتكلم لصاحبه عن اللي صار....
تركي: وش رايكـ
فهد: والله وضعكـ يحير
تركي: شفت كيف
فهد: بس الأولوية لزوجتكـ وعيالكـ... وأبوكـ معه حق باللي قاله
تنرفز تركي: لا ماله حق... مو على كيفه يتحكم فيني
فهد: تركي لا تسوي شي الحين... انتظر على ما يطلع أبوكـ من المستشفى... وفي ها الفترة حاول تدور حل يرضي الطرفين
تركي: صعبه والله صعبه... أبوي مستحيل يرضى بزوجتي... وزوجتي مستحيل تعيش معي وهي عارفه أن أهلي رافضينها... أو أنها بتشوف أنها أقل منهم... محتار يا فهد
وقف فهد وحط يده على كتف تركي: ريح نفسكـ شوي... وقم اتصل بزوجتكـ وتطمن عليها وعلى عيالكـ
تركي: وين رايح
فهد: الأهل رايحين السوق بروح أجيبهم
بعد ما طلع فهد.... أخذ تركي السماعة وراح الغرفة واتصل ع البيت...
البندري: وينكـ يا تركي... ليه ما اتصلت
تركي: آآآه انشغلت مع أهلي
البندري: وش سويت معهم
سكت تركي....
البندري: تركي... رد وش صار
تركي: بندري لما عرف أبوي بزواجي تعب والحين هو بالمستشفى... يعني..
قاطعته البندري بصراخ: بس اسكت لا تكمل
رمت السماعة وراحت تبكي.... توقع تركي ردة فعلها وسكر الخط.... مال بجسمه لقاعدة السرير.... وشريط حياته يرجع له....
طلع من الغرفة لما سمع الجرس يرن.... استغرب لما شاف أخوه خالد جاي له....
تركي: نعم
خالد: تركي ممكن تجي معاي مشوار... أبيكـ بموضوع
تركي: إذا على أبوي ف أسمح لي... هذي مشكلتي وأنا اللي بحلها
خالد: طيب منت طالع معاي... قلي تفضل ولا بتوقفني عند الباب
ناظره تركي وقال: تفضل
خالد: تركي اللي سويته غلط وأنت عارف لنظرة أبوي
تركي: إيوه عارف
خالد: يعني تزوجتها وجبت عيال منها... ما فكرت بمصيرهم
تركي مو رايق: خالد سكر ها الموضوع
خالد: طيب يا تركي... أبوي يقول طلقها وبيسامحكـ
تركي: عناد منيب مطلقها ارتحت الحين
خالد: حرام يا تركي... ترا أبوي تعبان مو مثل قبل ما يتحمل... وإذا على معاملته معاكـ فهو بالنهاية أبوكـ
سكت تركي وحس أنه مضغوط وبينفجر....
خالد: وش قلت يا تركي
باليوم الثاني....
أخذ تركي أخته لمطعم حتى يسمع رايها....
تركي: مها كلمي أبوي... ما يصير أطلق زوجتي
مها: زواجكـ يا تركي مستحيل أبوي يرضى عليه... ولا في أمل يغير رايه
تركي: مو حرام عليه يفرق بيني وبين زوجتي
مها: وش تبيني أسوي
تركي: كلميه وخلي أمي تكلمه
مها: كلمناه يا تركي بس أنت تعرف أبوي
تركي: عيالي وزوجتي هم اللي بيدفعون الثمن
تنهدت مها: تركي لما بغيت تتزوج ليه ما قلت لأبوي أو حتى لأمي
سند تركي ظهره: بالله عليتس من متى أبوي يدري عني... حي ولا ميت
مها: تقوم تتزوج من وراه
تركي: وهذا اللي صار... وش الحل الحين
مها: طلقها وارتاح
تركي: سهل عليتس تقولين ها الكلمة... حطي نفستس بمكان زوجتي وش بتسوين
مها: الله يكون بعونها... بس لو تدري وش يقولون أهلنا ضغط مو طبيعي
تركي: وش أقول أنا... لا من عيال عماني ولا من عماتي وغير عيال خوالاكم
مها: فكر يا تركي وعسى أن تكرهوا شيئا وهو خير لكم
طول الأسبوعين والكل يحن على راس تركي.... آخرتها قرر يطلقها يمكن خيره مثل ما قالت له أخته.... كلم يوسف اللي كان ببيت أبوه....
يوسف: أنت متأكد
تركي: إيوه
أبو يوسف: وش قال
يوسف: بيطلقها
تركي يحس أنه بدوامه: وعيالي ما تبونهم
يوسف: يبه... يقول وعياله
أبو يوسف: عياله هم عيالنا... قله ياخذهم من أمهم
يوسف: سمعته
تركي: إيوه... فمان الله
سكر تركي السماعة وغطى عيونه بيده....
فهد منقهر من تركي: هذا اللي بيحط زوجته وعياله فوق كل شي
وقف تركي: وش أسوي يا فهد... خلوني ولد عاق عشان أبوي
راح للغرفة وجلس ع السرير وناظر السقف بسرحان.... يتمنى أنه يصحى ويصير كل شي حلم....
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وصل تركي للرياض وراح لبيت زوجته.... وهي كانت جالسه تنتظره على نار....
دخل تركي وقال: السلام عليكم
وقفت البندري: وعليكم السلام
ناظرته البندري من فوق الين تحت.... ضعف كثير ووجهه شاحب والسواد حول عيونه.... انتظرته يتكلم وما قدرت....
البندري: وش صار مع أهلكـ
صد تركي وعرفت هي الجواب.... جلست وبكت تقدم تركي وجلس عند رجليها.... ناظرها وندم أنه وافق يطلقها.... من كثر ما حنوا عليه يطلقها نسى من هي البندري.... مستحيل ينسى أيامه معها....
دمعت عيونه وهو يقول: غصبن عني يا بندري... والله إني أحبتس بس ظروفي أقوى مني
البندري تبكي بحسره....
تركي فكر بسرعه وقال: خلاص لا تبكين... أنا بجلس هنا وأهلي ما ردهم بيوافقون
البندري من بين دموعها: لا أنا ما أبغى أعيش مع واحد أهله رافضين أهلي
تركي جلس جنبها: صدقيني كلها مده وبيرضون... وبتعرفون عليتس وبيحبونتس
البندري: وكم ها المدة شهر ولا سنة... لا طلقني يا تركي خلاص
ناظر تركي بعيونها وقال: بندري آسف
وقفت البندري وقالت: تركي أبغى عيالي
وقف تركي: لا خلي فيصل معتس... أنا باخذ فتوونه معي
البندري: لا أنا أمهم وإذا تبي رح المحكمة وأشكتي
تركي: بندري أنا بنحرم منتس ليه تحرميني من ريحتس
البندري: لأن أهلكـ ما راح يتركوني بحالي إذا عرفوا أن فيصل عندي
تركي: بندري... أنا بقول لأهلي أن فيصل مات... ـ فتحت البندري عيونها ع الآخر وكمل تركي كلامه: عشان ما ياخذونه منتس
البندري مصدومة: بتقول لأهلكـ أن ولدكـ ميت
تركي: وش أسوي يا بندري... أنا مقدر على أبوي ممكن بكلمة وحده يدخلتس المحاكم... أو ممكن يورط أخوتس بشي بس عشان ياخذ فيصل منتس
انقهرت البندري.... اكتشفت أن تركي ضعيف قدام أهله....
تركي: بندري لا تناظريني تسذا... ردي علي
نزلت دمعه حارة بخد البندري: وش تبيني أقول... الله يسامحكـ، الله يسامحكـ
مسكـ يدينها وقال: ما عندي شي أقوله غير إني أشكرتس على كل حاجة سويتيها عشاني... ـ حب راسها وقال: أوعدتس يا بنوو طول ما أنا عايش ما راح أنساتس
تركـ يدها وعطاها ظهره وقال: بندري أنتي ط.. طالق
مثل ما دخل تركي طلع.... جلست البندري تبكي لحالها.... مهما صار بيظل تركي عزيز وله فضل كبير عليها....
بعد كم يوم وعند باب بيت أم سعد.... ضم تركي ولده وباسه.... حط مبلغ بجيب ولده وقاله: فصول عط هذول لماما طيب
فيصل: تيب... بابا أبي ألكب سياله
وقف تركي: بعدين يا بابا
أخذ فاتن من خالها وحطها بالسيارة.... سلم على بسام ومشى وهو يسمع صياح فيصل.... لأن أبوه أخذ فاتن وتركه....
وصل تركي لفيلا أبوه.... دخل الصالة وهو شايل بنته النايمه....
تركي كان مقهور عشان كذا دخل بدون ما يسلم.... خذت مها بنته وقالت: يسلم قلبها... كم عمرها
تركي: سنة
مها: ههه كبر أموري << تقصد بنتها أميرة....
أبو يوسف: صار لكـ أكثر من سنه متزوج... وتلومني لما قلت لكـ طلقها
تركي بخاطره" كيف لو شايف فيصل "....
يوسف: عسى ما شر... ليه جلست اسبوع بالرياض
أبوه: مو مهم وين ولدكـ
تركي" سامحني يا فيصل ": توفى
بأصوات متفرقه: مات؟؟ لا حول ولا قوة إلا بالله... عظم الله أجركـ
تركي: أجرنا وأجركم... عن أذنكم رايح أنام
راح تركي لغرفته وتمدد ع السرير.... تحسس الوسادة اللي جنبه وحس أنه خسر البندري....
صحت فاتن من النوم بالبداية خافت بس أنها التهت بالعب مع أميرة بنت عمتها وماهر عمها.... وبعد فترة فقد أمها وصارت تدور بالبيت وهي تبكي....
مها: حتى مدري وش أسمها تعالي ماما... ـ مدت الرضعه: خذي الحليب
زادت فاتن البكي الين نامت.... نزل تركي ونفسيته تعبانه.... قالوا له عن بنته وهو ولا اهتم، طلع من البيت وماله خلق أحد....
انفطر قلب مها: حرام اللي سواه أبوي في تركي
أم يوسف: والله قلت له حرام اللي تسويه بولدكـ... قالي النسب والنسب، آآه ما راحت إلا على تركي وزوجته
مها: يعني يا يمه أنتي ما ودكـ بغادة لتركي
أم يوسف: إلا ودي فيها، البنيه حليوه ومن أهلنا... بس تركي لما كان بالرياض كان لحاله... وأكيد لما تزوج شاف زوجته مهتمه فيه وقايمه به... وتعلق فيها
مها: والله مدري وين الخيرة فيه... ـ ناظرت فاتن النايمه: قلبي على ها الصغيرة مالها أي ذنب عشان تنحرم من أمها
دخل يوسف مع زوجته وعياله: السلام عليكم
الكل: وعليكم السلام
خوله زوجة يوسف: من ها الصغيرة
مها: هذي بنت تركي
يوسف: من جابها أبوها ما صحت... للحين نايمه
أم يوسف: صحت من شوي وجلست تلعب مع العيال... بس فقدت أمها وصاحت الين نامت
صحت فاتن من صوت العيال وبدت تدور أمها وتبكي.... الكل يناظرها بشفقه لأنهم عارفين أنها تبي أمها وما تعرفهم....
دخل تركي للصاله لأن زوجة أخوه ما تتغطى منه....
تركي: السلام عليكم
الكل: وعليكم السلام
فاتن سمعت صوت أبوها وراحت له وهي تحبي.... وصلت لعنده ورفعت يدينها وهي تبكي.... نزل لمستواها وضمها" حتى أنا أبي أمتس يا بابا ".... شالها ووقف....
مها تأثرت بحال أخوها: تركي... بنتك من صحت ما كلت شي
تركي: وين أكلها
عطته مها الحليب وراح غرفته مع بنته.... جلس يناظرها وهي تشرب الحليب.... كان باب غرفته مفتوح شوي.... خالد كان بينزل تحت مر من عند غرفة تركي وسمع صوت صغيرة....
فاتن وهي تلعب بازار ثوب أبوها: ااا...اا
تركي: آآه عارف يا عمري تبين أمتس... وأنا وش أقول الله يسامحكـ يا يبه
حز بخاطر خالد كلام أخوه.... بس أنه يبي يسكر الباب لأن لو أبوه سمع كلام تركي.... ما راح تعدي ها الليلة على خير.... طق الباب ودخل وتأثر لما شاف تركي.... اللي كان جالس بالأرض ويمسح شعر بنته ودمعته بخده....
قرب خالد وقال: تركي وش فيكـ
مسح تركي دمعته وقال: بديت أفقد زوجتي جد... أحس إني بكابوس ومنيب قادر أصحى منه... معقوله أنا طلقت بندري
خالد: انسى اللي راح وعش حياتكـ
تركي بغصه: مقدر يخوي... هذا أنت مبسوط مع زوجتكـ وعيالكـ... وش بتسوي إذا قالكـ أبوي طلق نهال
خالد" بسم الله علي ": مدري ايش أقولكـ... والله وضعكـ صعب
تركي: أجل لا تلومني
خالد وهو يسمح شعر فاتن: الحين ها الحلوه ايش أسمها
تركي: فاتن
طق الباب ودخلت الخدامه: بابا مدام في قول اشا
مرت الأيام سريعة.... وبعد 4 أشهر....
دخل تركي البيت واستغرب من الهدوء.... قال بخاطره" أكيد أمي طالعه ومها مع البنات فوق ".... تذكر شي بمكتب أبوه وراح ياخذه.... ولما قرب سمع صوت طفل يبكي.... فتح الباب لينها بنته جالسه بالظلمة وتبكي.... جلس قدامها على ركبه وضمها.... امتلت عيونه دموع وهو يفكر" لا تحط اللوم على أمكـ وأختكـ... اللوم عليكـ أنت يوم خذتها من أمها ".... شالها وراح غرفته....
حطها بسريره لأنها نامت.... جلس جنبها ودفن وجهه بين يدينه.... نزلت دموعه وهو يفكر" وش استفدت يابوي لما فرقت بيني وبين زوجتي... حرام عليكـ هذي حياتي وأنا حر فيها "....
بنفس الوقت كانت البندري جالسه مع أمها يتفرجون ع التلفزيون.... انتبهت لما سمعت صوت شي طاح وبكى ولدها.... راحت تشوف وش فيه، شافته طايح بالدرج وعلى يده....
شالته وزاد البكي، واستغربت لما شافت يده تورمت.... جابت كريم وتدهنها.... بس أنه يبكي بشكل غير طبيعي.... لاحظت أنه ما يقدر يحركـ يده وإذا حركتها صرخ من الألم....
أم سعد: وش فيه
البندري: طاح من الدرج... بس ناظري يده تورمت
أم سعد بخوف: لا يكون انكسرت
خافت يصير كلام أمها صحيح بس على من تتصل.... إذا أخوانها مسافرين وسعد بيدفنها بالحيا أن اتصلت عليه.... مالها إلا تركي حتى لو هو ساكن الصين طياري يجي لها.... راحت غرفتها واتصلت عليه....
تركي كان جالس بطرف السرير.... ضميره يأنبه لأنه تسرع بقرار الطلاق.... تاركـ لدموعه الحريه لأن نفسيته تعبانه والكل ضده....
زفر بحسرة: بقراري ضعيت نفسي وضعيت زوجتي وحتى عيالي
وقف وتوه بيدخل الحمام رن التلفون، ماله خلق يرد.... بس لما شاف رقم الرياض على طول رد....
تركي: بندررري!!
البندري وهي تبكي: الحق على ولدكـ يا تركي
خاف تركي: وش فيه
البندري ويا الله ينفهم كلامها من البكي: طاح من الدرج والظاهر يده انكسرت... الله يخليكـ أخواني مسافرين ومالي بعد الله غيركـ
تركي: ساعتين بالكثير وأنا عندتس... فمان الله
سكر الخط وجهز ملابسه.... وهو عارف أن أبوه بيدفنه أن عرف بسفره.... شال شنطته ومسكـ مسكة الباب....
وقف والتفت للسرير.... ناظر بنته النايمه وهو يفكر" محد أهتم فيها بوجودكـ.. من بيهتم فيها وأنت مسافر ".... شالها وطلع....
نزل تحت وشافته أم يوسف وقالت وهي تنزل عباتها: تركي وين رايح
رمى القنبله وهو طالع: لزوجتي
لحقته أم يوسف وحاولت فيه بس هو عنيد....
سكرت البندري الخط وهي خايفه من اللي سوته.... لا أكيد أخوانها بيعذرونها لأنهم عارفين أن ما لها أحد إذا سافروا.... هذي كانت أفكارها....
بعد ساعتين ونص وصل تركي لبيت أم سعد.... تفاجئ لما شاف سعد طالع من البيت ومبين أنه معصب.... وتأكد له ها الشي لما شاف سعد ركب سيارته وصفق الباب بقوة....
دق ع البيت وردت البندري وهي ترتجف من بعد كف سعد.... قالت وهي تناظر خدها بالمرايا: الوو
تركي: بنوو أنا ع الباب أطلعي
البندري: طيب... فمان الله
سكرت الخط ولفت الغطا على راسها....
أم سعد: وين رايحه
البندري: المستشفى
أم سعد: مع من
التفتت البندري: مع تر..تركي
عصبت أم سعد: وليه تتصلين عليه
غرقت عيون البندري: مالي إلا هو... وبعدين فيصل ولده... يللا أنا تأخرت فمان الله
طلعت البندري وهي شايله ولدها بحذر.... فتحت الباب اللي ورا وشالت بنتها ودخلتها عند أمها ورجعت وركبت قدام جنب تركي....
تركي: بندري ليه دقيتي على سعد
دمعت عيون البندري: مو أنا هذي أمي... وأصلا مالنا إلا هو
تركي: مد يده عليتس صح
بكت البندري لأن ما عندها حد يوقف بوجه أخوها....
انقهر تركي: الحـ..## الـ..##
بنفس الوقت دخل أبو يوسف البيت وشاف زوجته وبنته مها ويوسف جالسين يتقهون....
أبو يوسف: السلام عليكم
الكل: وعليكم السلام
أبو يوسف: يوسف عندنا اليوم
يوسف: كنت راجع من مشوار ومريت ع البيت... وقلت بسلم عليكم
جلس أبو يوسف: حياك الله... وين أخوانكـ خالد وتركي
يوسف: كلمت خالد من شوي وقال أنه بالرياض من أمس عشان الشركة... أما تركي مدري عنه
مها: يمكن تركي عند ربعه
أبو يوسف: إذا هو عند ربعه وين بنته
أم يوسف: يبو يوسف... تـ.تركي بالرياض
فار دم أبو يوسف: وش عنده بالرياض
أم يوسف: لما جيت من عند جارتي شفته بيطلع ومعه بنته وشنتطه... ولما سألته قال بروح لزوجتي
أبو يوسف: أي زوجة... مو هو طلقها
أم يوسف: إلا طلقها... ما شفت ورقة طلاقه
أبو يوسف: أنا كل خوفي أنه زور ورقة عشان أسكت عنه
يوسف وهو يدق بجواله: هد أعصابكـ يبه... هذا أنا أتصل به
تقطع قلب البندري وهي تسمع صياح ولدها اللي ملى المستشفى.... أما تركي كان بين نارين البندري وولده.... رن جواله لينه رقم أخوه سفهه وما رد وها الشي خلا أبوه يحوس البيت حوس....
ناظر البندري اللي تروح وتجي وقام لها....
تركي: بندري أهدي شوي... فيصل ما به إلا كل خير
البندري بصوت باكي: هذا ولدي يا تركي ولدي
تركي: وولدي بعد... أجلسي الحين يطلع الطبيب ويطمنا عليه
مشت البندري للكرسي وأنهارت ومسكها تركي....
حطوها بغرفه ترتاح فيها.... دخل تركي غرفتها وسمح لنفسه أنه يجلس بطرف سريرها ويمسكـ يدها.... تأمل وجهها نحفت كثير، أكيد نفسيتها زفت.... الدكتور قاله أنها ما تاكل كويس وهو عارف أنها إذا تضايقت تفقد شهيتها....
فتحت البندري عيونها ببطئ.... حست بيد رجال ماسكه يدها.... لفت راسها للجهة الثانية وشافت تركي عندها....
ناظرها تركي وقال بغصة: لا تحسبين إني مرتاح يا بندري... أنا باليوم أموت ألف مرة... حتى النوم انحرمت منه
لفت البندري وجهها عنه وبكت.... تضايق تركي وطلع ما يتحمل يشوف دموعها.... مشى وهو يعاتب نفسه" تسرعت يا تركي.. وش صار لو إني عاندت أبوي.. كان ارتحت من ها العذاب اللي عايش فيه "....
توه بيجلس شاف بسام عنده: تركي وش صار على فيصل
مشاعل من وراه: وين بندري
توه بيرد إلا وفتح الباب وطلعوا الممرضات يجرون السرير اللي نايم فيه فيصل....
دقايق والكل بغرفة البندري.... ناظرهم تركي وهم يدخلون وزفر بحسرة.... طلع من المستشفى وركب سيارته.... صار يدور بالشوارع وهو يعاتب نفسه ومتحسر على حاله.... ما لقى نفسه إلا عند استراحة ربعه الفاشلين....
توه وقف سيارته عند الفندق.... إلا وجا له أمر يدور تركي دامه بالرياض....
استغرب خالد" وش عنده تركي جاي الرياض ".... حركـ سيارته وماله إلا بدر يسأله عن تركي....
بدر: تركي هنا؟؟ من متى
خالد: اليوم المغرب
بدر: غريبه ما جالي... خلني اتصل عليه
رد تركي بصوت ثقيل وغير ازعاج الأغاني عنده.... ها الشي خلا بدر يخمن مكانه....
بدر: تركي أنت وينكـ
ـ :.............
بدر: طيب... احاكيكـ بعدين
خالد: وينه
بدر: تعال معي
راحوا للاستراحة وبدر عارف الطريق.... بس متحسر على تركي اللي هدم كل شي سواه....
وصلوا ودخلوا الاستراحه عند الباب.... وقف خالد بمكانه مذهول.... يسمع ويقرا عن ها الاماكن بس لما شافها ع الواقع انصدم.... شباب وبنات سكارى وأغلبهم عيال حمايل.... الخمور بكل مكان والأغاني صوتها مرتفع بشكل لا يطاق.... خالد كان يناظر داخل بذهول بعكس بدر اللي متعود يشوف تركي هنا....
مسكـ بدر ذراع خالد وقال بصوت عالي: خالد خلنا نطلع بره
طلعوا بره وقال خالد: ايش هذا... ما كأني بالرياض ولا كأني بالسعودية كلها... ـ ما شاف رد وقال: ايش السالفه... وليه جايبني هنا
بدر: خالد لما أمكـ وأبوكـ يعاملون تركي بقسوة... ولما أنت ويوسف تخليتوا عنه لمن يروح وهو ما عنده أم أو حتى أهل أم يشتكي لهم... أكيد بيجي هنا، صحيح محد مهتم فيه بس المهم أنكم بعيدين عنه... المهم أنه يسكر عشان ينسى مشاكله ببيت أبوه
خالد كان يناظر المكان من برة بس كلام بدر خلاه يناظره....
بدر بعتب: لا تلوم تركي لما مشى بها الطريق لأنه منبوذ عندكم... ولا تلومه لما تزوج من وراكم لأن زوجته أعطته الأمان والاستقرار اللي ما شافه عندكم
تو ينتبه خالد: قصدكـ تركي داخل
بدر: با الله عليكـ واحد أهله مو سألين فيه... وفرقوا بينه وبين زوجته وش يسوي بحاله... ينتحر بس بالبطيء، رح أدخل وجبه
خالد: أنا أدخل... بس أنا... ـ شاف نظرة بدر وقال: وإذا ما رضى أخاف أسحبه ويتهجم علي... هذا إذا كان صاحي
بدر: إذا رفض قله الهيئة جايين بالطريق
ناظر خالد للمكان وبعدها دخل.... يدور تركي وهو مو مصدق الأشكال اللي يشوفها.... شاف تركي يرقص مع بنت وقرب منه....
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك