رواية دموع اسقطت حصون القصور -45

رواية دموع اسقطت حصون القصور -45

نوف برتباك:ترى موب شوي الي صار لها عمر وكلام الناس ..اذا استقرت بحياتها مع مفلح اكيد بترتاح

مشى وبيده لمياء الي تتبعه ونوف وراءها تساعدها بالفستان واطلعو لسيارة الي موقفها بالحوش

مفلح:انا بنروح الحين

ام مفلح :اصبر الى ان تبدل ملابسها ..

مفلح برفض:لا ..جيبو عباتها بس

اقعد يسولف مع خالته الى ان جابو العبايه ومدوها لها

لمياء تسحب يدها منه وهو رافض

لمياء بقهر وصوت واطي:بلبس عباتي ..

اترك يدها ولف يركب بمحله ..البست عباتها ونوف رافعها معها هالفستان البلشه الى ان ادخلت بمحلها وحركو متجهين للخبر

تحس حلقها يوجعها من كثر مالعبره واقفه فيه وبدون صبر:ليش سويت كذا

مفلح يلف لها ويرجع يناظر الطريق:وش سويت

لمياء بفك يرجف:بالله هذا عرس

مفلح بضحكة :واحلى عرس..وش ناقصه انا جنبتس وهذا المهم وش تبين بالناس وخويات ماخويات ..

دخلت يدها تمسك فكها الي يرجف بقوه واحساس انها موب مهمه يرمونها عليها كذا :على الاقل يصير عندي خبر بهالمهزله

مفلح بهدؤ:ريحي افكارتس وهدي صوتتس اتعبتي حنجرتس ..

لمياء بقهر من نبرة صوته المليانه سخريه :وين رايحين

مفلح يتنهد بقوه:رايحين لشرقيه

لمياء بقرف :لو ماروحنا ماابيها خوتك..احسن لو نرجع للبيت

مفلح بستهزاء وقهر:لو ماحلف ابوي اتمشى والله ماتشوفينها ..

غمضت عيونها وغيض يحتوس بصدرها على اهلها قبله ..امي كل هذا حب فيه مساعدته ومرتبه له الوضع وخاشين عني الموضوع انا رخيصه لهاالحد انجبر عليه واعرس سكيتي وكانهم يبون يتخلصون مني ..غمضت عيونها بقوه ويدها بحظنها تهدي رجفتها ساعه ونص بينهم وبين الجبيل كل هذا ولمياء بفستانها اوصلها بساعه ووقف عند فندق ببداية الجبيل على الطريق فاضي وقف ولف لها

مفلح :بننام هنا اليله ..انزل وهي ترفع عيونها في الفندق ناظرته وافتحت بابها انزلت واطلعت بفستانها نصه بالارض اسحب شنطته الصغيره ومشى عنها

ناظرت لشنطتها وفستانها الغثيث افتحت الباب ورى وطلعت شنطتها برى السياره مشت بتناديه قبل يبعد وابتلشت بالفستان ناظرته وبغيض وبصوت عالي:مفللللح

ابتسم ابتسامه خفيفه ووقف:خير

لمياء بقهر :ساعدني ..

لف واتجه لها تعداها واسحب شنطتها من ورى ومر من جنبها:ماحد قال لتس البسيه ..

ناظرته بحقد وكره واتبعته وهي تعثر بفستانها احجز غرفه وادخل بلاصنصير وهي توها بتدخل الفندق الفاضي انتظرها تمشي بشويش طاح نص الفستان من يدها وقفت ودموعها تنزل بقهر

مفلح يناظرها واقفه وبستغراب :امشي

لمياء بقهر:ماتشوفني تعال ساعدني

مفلح بغضب:لمياء امشي..

لمياء بعصبيه :مانيب جايه..

اطلع والاصنصير يتسكر وراه امسكها مع عضدها بقوووه واظافره تنغرس بجسمها اسحبها وراه ادخل بلاصنصير ودزها بقوه لداخل ..

ترنحت شوي ماسكه عضدها الي صك بحديد الاصنصير من داخل وعيونها تطالعه بعتب ملقيها ظهره ويده تهتز من العصبيه انفتح الباب واطلع مطنشها افتح باب شقه وادخل وهي تتبعه اترك الباب مفتوح وادخل بغرفه اتركت فستانها يطيح على الارض وعيونها تدور بالشقه الصغيره غرفه حمام صاله صغيره تنهدت بتعب وامسدت عضدها مرتين يامفلح توجع الثالثه متى بتنهيها ..مشت بهدؤ لشنطتها ارفعتها للكنبه افتحتها وخذت ابجامه افسخت عباتها واحذفتها على الكنب اي كلام وراحت للحمام افسخت الفستان واتركته طايح بالارض ..ارفعت شعرها بيدها لفوق وتروشت ازالت اي اثر للمكياج وامسحت شفايفها بقوه..جففت نفسها البست البجامه واجلست على الفستان الي طايح بالارض ضامه اركبها لحظنها وحيلها ومشاعرها كلها مهدوده

تحسست وجهها المتعب بضعف مايكفي انه اخدعني ورايح يسحبني وراه ماكلف نفسه يرفعه شوي ويساعدني..انزلت دموعها بقهر الله ياخذه والفستان معه وقفت لمت الفستان على جنب ناويه تطلع برى وتدور اي كيسه زباله تحذفه فيها ..

اطلعت ووقفت وهي تشوفه قريب من الحمام وكانه ينتظرها تطلع ابعدت من طريقه وهو ادخل الحمام

اسرعت لشنطتها تدور اي شباصه ترفع شعرها لفوق انفتح باب الحمام واتركت كل شي بيدها وكانها مسويه جريمه

مفلح بتساؤل:هالفستان وش بتسوين به

لمياء وظهرها له وببرود:بحذفه

قرب منها وامسك كتوفها بيديه وبجمود:ليه..

مدت يدها ليديه وابعدتها منها لفت له وشعرها يحاوط وجهها:ماابيه ..كرهته

مفلح يرفع حاجبه بسخريه:وبعد ليه ؟..

لمياء برفعة حاجب:كرهتني فيه موب من زين الذكرى احتفظ به..

مفلح يقرب منها ويديه تحاوط وجهها وبهدؤ:اجل ليش تشرينه..

لمياء برتباك ناظرته:ماهوب انا الي شاريته..

مفلح برفعة حاجب:ماشفتيه الا اليوم صح..

لمياء تنزل عيونها وبغرور:ايه ..

مفلح بسخريه وقرف:اهاا اليله هاذي تبعي موب لازم تشرفين عليها..تنتظرين الحفله الكبيره وتهتمين فيها عشان الناس والمظاهر..

لمياء ساااكته صح ماكانت مهتمه اليوم كثير بااي شي يخص هاليله من فستان لمكياج لاني انتظر العرس الثاني وبطلع فيه لصديقاتي والناس بقاعة حلوه..بس اقلبها علي

مفلح يناظرها بنظره غريبه نزل يديه من وجهها واتركها على رقبتها وبهدؤ:خربت مخططاتس..

لمياء تهز راسها باايه وجفاف بحلقها مانع صوتها يطلع مادري وش جاني معدت قادره اتكلم مع ااني اقدر ارد عليه بس ماقدرت انطق ..

مفلح يعض شفايفه بقهر وبنرفزه:هذا السكوت خجلانه من نفستس او مستهتره فيني ..

لمياء تعقد حواجبها بخوف بعد بسكت لااني مادري وش اقول..

مفلح يرجع يده ورى ارقبتها ويناظرها بتوتر:لو عمر العريس كنتي اسعد..وكنتي مختاره كل شي بنفستس

لميا ترفع راسها بسرعه:لو كان عمر كان سوى لي عرس مثل الناس موب يلعب علي..

مفلح يرص على اسنانه بغيض:ماتستاهلين العرس..

لمياء تبعد نفسها منه وبقهر وغيض:ابعد عني بس..

اسحبها صوبه بقوه ويديه على ظهرها وعيونه منزلها لعيونها وبخبث وشر:ابعد منتس..!!هاذي ليله يبعد فيها الحبيب من حبيبه!!..

لمياء تناظره بخوف واشمزاز:وش تبي..

مفلح يبتسم وهو يقربها منه الى ان حست باالاختناق

لمياء بصوت ضعيف وقلة حيله:ابعد ..

اذان الفجر يرتفع من المسجد القريب اسمعته بس ضلت بمكانها مانامت ولو دقيقه وليلتها ترجع تذكرها.. تحس بحراج شديد وكانها موب مفلح الي دايم تراده ويقهرها اسمعت صوته يقوم ويروح للحمام غطت نفسها بالحاف تمثل النوم بعد ربع ساعه اسمعت صوت الحمام ينفتح وصوته بالحجره

ارمشت بعيونها بقوه تفتح ذهنها الي تحس انه من اسبوعين وهو مقفل ..وقف عندها ناظرها اشوي ارفع الحاف غمضت عيونها بسرعه

مفلح يناظره عيونها ورموشها الي تحرك:صاحيه ..

لمياء تهز راسها باايه

مفلح ببتسامه:طيب افتحي عيونتس ..

لمياء :ماابي افتحها

مفلح بقهر واصرار:لمياء افتحيها..

لمياء بقهر افتحتها وناظرت لقدام

مفلح :ناظريني ..

لمياء بقهر:موب معجبني طيب مابي اناظرك ..

مفلح بعصبيه وقهر منها:ناظرررريني ..

ارفعت عيونها بخوف له وناظرت باأنفه

امسك لحيها وارفعه له بقوه رص على اسنانه بغيض:ناظري بعيوني ..

لمياء ودموعها تنزل بضعف غمضت عيونها:مااقدر

مفلح باصرار وجمود:ليه ماتناظريني ..

لمياء بقلة حيله وقهر بكت:مستحيييه..

اسحب يده بسرعه من فكها وكانها لامس شي حار ناظرها بجمود ومشى عنها

وقف عند الباب :ااذا جيت خلتس جاهزه بنمشي..واطلع برى ..

تنفست بقوه وشهقه قويه تطلع منها غطت نفسها وبكت بقووه ليش يحرجني كل هذا يبي يقهرني امسحت دموعها وقامت بتعب للحمام تروشت بسرعه جففت شعرها ووالبست بنطلون سكيني رمادي وبلوزه بدون اكمام بيضاء مقلمه برمادي ..

صلت وارجعت تنزل شعرها مشطته وارفعته واحد لفوق امسحت وجهها بيدها بقوه وناظرت للمرايه رتبت حواجبها وحطت مرطب وردي لفت له واقف عند الباب ويناظرها ارتبكت ولفت لعباتها ادخل خذا الشنطه واطلع

لفت طرحتها والبست البرقع ماكان موجود تنفست برتياح واطلعت لبرى لمت نفسها من الهواء البارد الصقيع كان ضلام شوي تلفتت تدوره اضرب بوري ولفت لسياره شافته فيها غضت عنه ومشت لسياره

وقف عند الكشك بنهاية المحطه ولف لها

مفلح :تبين شي..

لمياء :لا..

مفلح :الطريق بعيد ..اخذي كافي او اي شي..

لمياء:ماابي شي..

صد منها واطلب له كافي حطه بالمركى بينهم ومشى فاتح دريشته ويدخل هواء بااااارد دخلت يدها لفمها وانفختها تدفيها وراسها رطب

لمياء بتردد:سكر الدريشه برد

مفلح بهدؤ:اسف ..معجبني الوضع..

صدت تناظر لبرى بتعب

مفلح يوقف فجاءه:اووف نسيت ..لف وارجع لبقالة المحطه وقف عندها وادخل

انفخت بفمها ولفت تناظر لقدام وتراخت بكرسيها شافت كوبه بجنبها ابتسمت بخبث وانظرت له داخل يشتري عدلت جلستها ارفعته بسرعه وصارت تمسح الكوب بيدها عشان يبرد ودفاه يتعمق بيديها ويدفيها ترددت وارفعته لفمها بسرعه استنشقت ريحته الحلوه واشربت يالله ماحلاه ناظرت له للحين داخل اشربت مره ثانيه بستمتاع ..ياليتني طلبت ..رجعته لمكانه بأسى

حاسب واطلع لبرى افتح الباب وحط بحظنها كيسه بها كروسانات وعصاير

مفلح يحرك السياره ويمشي:ماجاء في بالي انتس تبين هاذي

لمياء بهدؤ:حتى هاذي مابيها

مفلح بقهر:يعني لازم اجبرتس تاكلين ..

لمياء بسرعه:مااحب اكل شي بالسياره ولاطريق..

لف منها وخذا كوبه ارفعه لفمه ووقفه ناظره شوي ببتسامه ولف لها

مفلح :وش هاذا

لمياء تناظره وتناظر الكوب وقلبها يرجف بقوه انه اعرف انه ناقص وتمثل البرائه :وشو..

مفلح ياشر لطرف الكوب:شاربه منه

ناظرت لكاس ومرطب شفايفها واضح عليه حست بفشله واحرااااج عنيف وصدت عنه بقوه

مفلح يفتح الدريشه ويحذفه:خلاص معاد ابيه عقبتس..

لمياء بقهر وتمثل البرود:والله لو كان مسممته

مفلح :تسوينها ..

ياخيبتي توني اقول ماابي شي ليتني ساكته ..

مفلح يلف لها :افتحي لي بيبسي..

افتحت الكيسه وطلعته منه ومدتها له

مفلح :افتحيه

افتحته ومدته له مره ثانيه

مفلح يطلع صوت بفمه بمعنى التافف:الظاهر ماتشوفين زين..شايفتني فاضي شربيني ..

افتحت عيونها بقوه وبقهر:ابوي يسوق ويشرب بنفسه

مفلح :طايب انا منيب ابوتس ..

لمياء بغيض:تبيه اخذه ماتبيه بحطه

مفلح بقهر:لاتحديني اسوي شي مايرضيتس..

انفخت بفمها بقهر ولفت له مدت يدها لفمه وشربته

مفلح :ارفعيه مايجيني ..

ارفعته بقهر وحقد وبقوه الى ان انكب عليه وعلى ثوبه

لمياء بأسف مفتعل واحراج:ااووه اسفه ..ابتسمت من داخل بفرحه وشكله المرتاع وقف على جنب ولف لها

مفلح يمسح فمه بيده وبغيض:عطيني اياه

لمياءء ببرائه مدته له :مادريت ..

خذاه وارفع برقعها فجاءها بقوه الى افسخه وانزلت خصلات من شعرها على وجهها وهي تناظره بصدمه

مفلح بقهر:اشربيه ..

لمياء براعه:لااوووع

مفلح يقربه من فمها وبصوت عالي:افتحي فمتس

لمياء بخوف ورجى:تكفي يامفلح نصه ادخل بفمك وارجع ..كيف اشربه

مفلح بعصبيه قربه منها وخلاها غصب تفتح فمها اشربت منه ونصه ينكب على عباتها ورقبتها ابعد عنها بنتصار وعدل مكانه وهو يناظرها تناظره بقهر ودموعها ترقرق بعيونها..

لمياء بصوت باكي:ترى ماسويت جريمه

مفلح ببرود:كان احترمتي نفستس وشربتيني مثل خلق الله..

لفت عنه طلعت منديل من شنطتها امسحت وجهها وملامحها توحي بالتقزز عطته نص جسمها وهي تلف وتناظر لبرى عايفه هالمشوار والساعه الي مشو فيها..

اوصلو للخبر وقف عند احد الفنادق وانزلو ادخلو باحد الشقق ادخل قبلها للحجره وهي ضلت واقفه بالصاله

مفلح يطلع مره ثانيه بعجله:انا بطلع ..لف منها واطلع لبرى تنفست برتياح وادخلت للحجره افتحت شنطتها واطلعت لها ملابس تغير هالي مليانه بيبسي راحت للحمام تروشت ووبدلت اطلعت تمشى بالشقه حلوه ومرتبه طلت من الشباك البحر من بعيد بس منظره حلوه والشمس ساطعه فوق خاصه انا حنى بوقت القيلوله لفت لتلفزيون وشغلته واجلست على الكنب حست بالنوم يداعب اجفانها من كم يوم مانمت حطت على قناة المجد للقران الكريم حطت مخده تحت وانزلت قدام التلفزيون ونامت..

موضي بترحيب:هلا والله ومرحبا..

ريم تسلم عليها :مرحبا فيك ..

موضي :تفضلي اجلسي..

ريم تجلس وتلف لموضي:وش اخباركم وش اخبار ترتيبات النايفه لزفاف ..

موضي بتوتر:على اكمل وجه ..

ريم :وينها مأشوفها هناه ..الظاهر هناك ببيتهم ماعندهم مراكز ..

موضي بصوت عالي وتصريفه:ماااياااا جيبي عصير لهناه..الله ياخذهن هلاخادمات ماينفع معهن اي تعليمات..

ريم تحط رجل على رجل:رهف او ايش اسمها زوجة سلطان ..

موضي ببتسامه:الهنوف ..ياحبي لها مشالله كل شي حلو تلقينه فيها جمال واخلاق ..امي ماغير تكلم فيها ماترضى فيها ابد

ريم ببتسامه مجامله:انشالله مبسوطه عندكم

موضي ببرائه:وليش ماتنبسط ماخذه شيخ ال..ولايقين على بعض وتبين الصراحه احسم ملايقين على بعض بقوه

ريم :يعني هو مرتاح لها

موضي:مررره ماتشوفيه لما يشوفها رايحه او راده مع النايفه ماغير يتابعها بعيونه ..ولا بعد وكانها شوي وبياكلها هههههههه

ريم بدون نفس:هههههه ..من متى ماخذها

موضي:من العطله الصيفيه ..اذا ماخاب توقعي..

ريم :ولا الحين ماحلمت

موضي برحمه:لا والله عاد سلطان ميت ويجيه طفل ..

ريم بتمثيل خوف:اخاف فيها شي ماتنجب او شي..

موضي:لا لا الله لايقوله ..بس تبين الصدق يمكن اثر عليها احبوب منع الحمل لان الظاهر ببداية حياتها ماكانت كويسه معه فاحس انها كلتها ولا ليش للحين ماحملت ..

ريم:اخافها عقيم..وبتردد..يعني ولا سلطان ..وماعليش على التدخل

موضي بطيبه:لا مافيه شي..بس سلطان احملت نوف مرته ماخذها بالشمال بس سقطت توى مالها الا كم يوم ..وتشوفيه هاك الايام وكانه اخسر الدنيا كلها

ريم :ياحرااام ..الا شوفو الهنوف اذا فيها مشكله ولا يدور غيرها

موضي:تبين الصدق هو صح يحبها بس بيروح الحب لو يدري فيها مشكله..وبياخذ عليها كم وحده ..

ريم :ياحسرتي لهالحد يبي اطفال

موضي:اصلن هو يحب الاطفال خلقه ..كيف ولد له ..

ادخل لشقه شافها نايمه بعمق وشعرها مغطي وجهها اتجه للغرفه بدل ملابسه وناظر الساعه عشر باليل اطلع لبرى واجلس على الكنبه وراءها

تردد يقومها ومايبي يقومها تلفت يدور اي شي شاف ريموت التلفزيون دور قناه رياضيه ايوه هذا حط على مباره اوربيه وصوت المعلق يلج وطول اخر شي ..

افتحت عيونها بشويش وابعدت شعرها مغطت يديها بقوه وارجعت تمدها جنبها واخلدت لنوم مره ثانيه

مفلح بتافف :وقف وجاء من قدامه ابتسم لاشعوري على شكلها البري والناعم وشعرها المتثر على المخده انزل بجسمه وابعد خصلات شعرها امسح خدها بنعومه وباسها

مفلح بصوت خافت:لمياءءء..

كانت نايمه على ظهرها لفت على جنبها ووجها له ونامت ويديها بحظنها

مفلح اكب عليها ماء ..لا لا وين انا اقوم مساعد ..

انفخ بفمه لف على التفزيون وطول عليه اخر شي وارجع للكنب خذا الريموت وطول عليه اخر شي

افتحت عيونها بسرعه وناظرت لقدام شوي تستوعب لفت لتلفزيون وهي على وضعها حكت شعرها واجلست ابتسم اخيرن قامت..

لفت ثاني مره لتلفزيون بخوف انا كان حاطه قناة القران ..

مفلح :صح النوم ..

لفت له بخوف:خوفتني

مفلح :نايمه من رحت الى ان جيت ..!!

لمياء:ايه ..ليه كم الساعه

مفلح :عشر اليل

لمياء بعفويه حطت يدها على فمها وابتسمت :ماحسيت كان توني نمت ..

مفلح ببتسامه حلوه:اجل مانمتي امس زين..

اندم عقب ماشافها عقدت حواجبها وقامت بسرعه

لمياء :انا بروح اصلي..

ابتسم لحراجها اول مره اشوفها منحرجه لكذا بس ياحلوه سحى البنات له طعم ويعطي لها مظهر حلو وبرئ..

صلت وترددت تطلع له بس انا مافيني نوم عشان انام بطلع يمكن يجي عشان ينام خذت نفس واطلعت لبرى

شافته يناظرها وهي مقبله لفت من قدامه واجلست على الكنبه المنفرده من جنبه

عم الجو هدؤ الا من صوت التلفزيون والاخبار تعلمهم بعلوم العرب..

لمياء يارب يقوم يرقد ماصارت اجعتني رقبتي وانا لافتها صوب التلفزيون ولا ليته شي يسوى اخبار ..

عدلت جلستها رطبت شفايفها شكله نام لفت تناظرها مسترخي بكرسيه ويناظرها بهدؤ..صدت عنها بسرعه وهي تحس بنظراته تحرقها وتخترق كل ديفعات مشاعرها ..

مفلح يرجع اشماغه لورى وبهدؤ:لاتاخذين سؤالي على محمد الجد ..اعتبريه فضول شديد..

لمياء تبلع ريقها ونظرها لتلفزيون:وشو..

مفلح يزم شفايفه:ايت مشاعر تحسين فيها وانتي تحتفضين بصوره من صوري عندتس..

لمياء ماتحسون اني اليوم انحرجت اكثر من الازم من شربةكوب ..لبيبسي والحين هاذي الخاتمه ..

مفلح يناظره بملل:لا السكوت مايشبع فضولي

لمياء تنفس بهدؤ:كانت سميره زوجة صاحبك تبي تشوفك

مفلح ببتسامة استهزاء:لااا ..وجبتيها لها

لمياء :ايه وش فيها..

مفلح :بس الصوره كان عندتس وماقالت لتس هي جيبيها

لمياء بقهر وبسرعه :وانت وش دراك انها ماقالت لي..

مفلح :وين حصلتيها طيب..

لمياء تصد عنه وبحراج وتردد:في سيارتك ..

مفلح :ومتى ركبتيها سيارتي

لمياء بغيض تصرف:هاذا تحقيق..ترى صوره لا راحت ولاجات

مفلح :هههههههه طايب رجعيها لي ترى فقدتها..

لمياء بقهر ترص على اسنانها:شقيتها ..(بالفعل انا شقيتها اليوم الثاني الي طقني فيه يوم شك فيني

مفلح :كذابه ماشقيتيها

لمياء تلف لها وببرود:وريتها صديقتي وحطيتها بالدرج وفي نص ارمضان شقيتها ورميتها في الزباله

مفلح يناظرها بهدؤ شوي وصد عنها

لمياء:نص ارمضان يوم مميز عندي ..

مفلح يوقف ويلف لها :امحيها ذكرى نص ارمضان ترى بتوجعتس جدا..لف عنها وراح لحجرته

ناظرته بقرف رايح يهرب من هالسالفه اخيرن لقيت شي يحرجه مثلي..

وقف عند الباب وبصوت هادي:تعالي نامي بكره بنطلع

لمياء تلف عنه:مافيني نوم توني قايمه..

مفلح بهدؤ مبطن بتهديد:تجين او كيف..!!

وقفت ومشت له هاذا الي منحرج.. يبي له هداوه عشان اطلع منه بدون اضرار

وقفت عنده ونزلت راسها:اذا تبي تنام نام بس لاتجبرني على النوم ..يجيني قلق..

مفلح يتنهد:انا رحت لمكان اليوم اعجبني وابيتس تشوفينه اخاف اذا رحتي لصديقاتس ماتلقين سالفه تعلمينهن بها ولا توصفين لهن مكان..امسك يدها اجلس على السرير واجلست جنبه

لمياء تسحب يدها بغيض وتقوم :لا معليه بكذب ماعندي مشكله ..

مفلح :كيفتس انا عرضت عليتس ..والحين انا دايخ برقد ...بس موب معناته اطلعي

لمياء طنشته وببرود:حنى قريبين من الرياض لو اروح للهنوف ابرك من جلستنا اهناه

مفلح وهو يفسخ ثوبه وينسدح وبتفكير:الهنوف

لفت له وناظرت فيه عيونه بغيره :ايه الهنوف مرة سلطان

لف وجهه لها وببتسامه :تعالي اجلسي هناه

لمياء برفعة حاجب:لا

مفلح بعصبيه خفيفه :تعالي ..

ناظرته بغرور وراحت تجلس عند مكان يده على السرير

مفلح :يوم العزيمه الي حط ابوتس انتي الي دخلتي علي بالمبطخ !!..

ابلعت ريقها ونزلت راسها :ايه

مفلح :بكيتي وكنت احسبتس الهنوف تضايقت ليش تبكي مني وانا اعزها

ارفعت وحده من حواجبها باألم واسكتت

مفلح :قلت لنوره تسالها بس راحت قبل تسالها نوره ..وعقب دريت انها انتي

لفت له وبررود:طيب دريت انها انا ..تضايقت عشاني بكيت

مفلح :لا ماتضايقت..

هزت اكتوفها ببتسامه وقامت منه

مفلح :طفي النور بناام

طفت النور واطلعت برى داهمت الدموع عيونها اسرعت للمطبخ ادخلت وبدون تحمل اجهشت بالبكاء واجلست جنب الثلاجه اطلع كل الي في خاطرها بكت بندم انها ماجابت كل الي تقدر عليه وترفضه وتوقف في وجيهم انشجت بقوه ودموعها تملى وجهها لو رفضته كان بنساه بيوم من الايام موب افضل من حالي الحين وهو يتهزا بي.. وقف وراها بهدؤ

مفلح :لاتصيحين ...

حاولت تمنع صوت بكاها لايطلع وصار صوت شهيق صوتها مولم وحزين قرب منها ووقفها بقوه

مفلح عاقد حواجبه :خلاص يكفي

حطت يدها على فمها ودموعها تنزل بستمرار

طلعها برى المطبخ اسحبت يدها منه بقوه ووقفت صاده منه

مفلح ببرود:ماخبرتس حساسه لذا الدرجه

لمياء ببكى ناظرت له وفجاءه وبدون مقدمات:يعني عشان كذا تجرح ولا تداوي توقع اني بعيش معك وانت اسلوبك كذا او انك تبي تاخذني فتره في حياتك وتطلقني..انا جماد ماحس بالي حوالي ماخبرتني حساسه..!! عشان كذا خذيت راحتك تطلقت من عمر عشانه داشر وراعي شقق وكل الناس اعرفو والظاهر انك تحسب اني ماحسيت باالام ..اشهقت بقوه..وعلى طول جيت انت يعني انا النشمي السنافي الي بفزع لها من كلام الناس وباخذها ولا سويت لي عرس مثل البنات وحطمتني بكلامك وكاني مهمشه مافيني مشاعر وانت الي مليان مشاعر وتحس ...صاحت بقوه ...كمل ذالحياه وكمل التجريح ولاتنسى تخلي في بالك اني بدون احساس ...

مفلح وقشعرير بارده تكتسح جسمه تنفس باألم تردد يقرب صوبها مشت رجليه غصب لفها له بهدؤ ويدها عل وجهها ابعد يديها عن وجهها وهي رافضه ضمها بحنان وامسح ظهرها

مفلح بجمود:قلتها وانا زعلان منتس لاتاخذينها في خاطرتس كل ذالحد...

ابعدت منه ومازال صوت شهقاتها متواصله راحت للكنب واجلست عليه ووجهها لبرى تناظر انوار الشارع الهادي

ناظرها شوي وراح لحجرته

.....

فاطمه ماسكه دموعها:والله بنفقدش

ساره ببتسامه:ماتفقدين غالي فديت روحتس ..سلمت عيلها وسلمت على البنات الباقيات

واطلعت برى في الساحه بشناطها تنتظر راشد يجي

جاتها فاطمه واجلست جنبها :سعود اخطب نهله تعرفينها

ساره تبتسم وبصدق:صدقيني فكرت زين في الموضوع حسيت انه مايهمني جدا اصلن ماحسيت نفسي منجذبه له بدون شعور

فاطمه ببتسامه:اجل الله يوفقش..امس مضاوي تعلمني هو الي يطلبها بنفسه يبي صغيره

ساره بضحكه:نهله اعرفها اول ماجيت هناه هي واختها كانت كانها معجبه فيه زين الله يسعدها معه..كنت عارفه ان الي يسويه حركات شباب طلعها من نفسه وراحت

اسمعت صوت البوري برى سلمت على فاطمه واطلعت له برى

راشد عقب ماركبت :والله انتس سويتي خير

ساره تضحك:شكلي صدق تعبتك طالعه من الخاطر

راشد عقب مامشى :تين الصدق مشوار يهلك ..بس الحمدالله كبرتي عقلتس خلاص معاد لتس حاجه هناه

ساره :خلاص..خلصت مره وحده

راشد وهو يغير ويلف من بين البيوت :خلينا نسلم على سعود مستحي نروح وكانهم موب راعين فضل عليتس

ساره :صادق ماجات في بالي

وقف راشد عند الباب دقت ساره على مضاوي اطلع سعود وهي تشوف مضاوي تاشر لها داخل ابتسمت وانزلت لها ادخلت ضمتها مضاوي

مضاوي :والله بنفقدش ياحماره

ساره :هههههه تسب وهي تودع

مضاوي :فديتش حرام تتركين الوضيفه تعز المره

ساره براحه:لاالحين ارتحت مابيها ابي اهلي ابرك منها

مضاوي :ايه الله يسعدكم

ساره :سلمي لي على امش وكل الحريم والله اني حبيتكم من قلبي وماقصرتو ..

مضاوي :وحنا بعد حبيناش

ساره تضمها:يالله مع السلامه ..

مضاوي :مع السلامه الله يحفظكم

ساره وهي ترجع:متى عرستس

مضاوي تضحك:خليه يجي اول

ساره بضحكه:بيجي بيجي انشاالله .. زورو مهرجان النعيريه ولاتنسونا مرو علينا

مضاوي :ابشري ذالسنه طابينها طابينها

ساره :هههههه في امان الله ..اطلعت لراشد واركبت محلها

سعود:مع السلامه ..لاتنسى العرس وجيب الاهل بحطه بالدمام برسلك متى ماتحدد

راشد:ايه ابشر ..اسمح لنا ماشينا

سعود:في امان الله ماتشوفون شر

ساره وهي تناظره معقوله كنت احس بتجاهه بشي او جاني الاحساس وراح الله مايكتبه ربي يصد به

يتبع ,,,

👇👇👇