رواية دموع اسقطت حصون القصور -59

رواية دموع اسقطت حصون القصور -59

ناظرها بهدؤ وهي ترجع تجلس مع الحريم لف وارجع يجلس معه مستغرب ردة فعلها ماعندتت وحست بالقهر

مساعد:وش فيك رجعت بها

مفلح يجلس :سلمت عليها وكفاها

فهد بستهزاء:والله ماصدق ان لمياء تسوي كذا

مفلح :صدق الي يقوله لك عقلك

فهد :والله عقلي يقول انك خرشتها وعييت تعطيها اياه

مساعد :وش دخلك فيهم عيا ماعيا

راشد ماسك ضحكته:انفوسكم ماش اليله ...معاد به عزيمه اجل

مفلح يتربع ويوقف علياء على رجليها قدامه:حطو لهم سفره بلحالهم

راشد :ههههههه

ابو مفلح يلف لهم:وش فيكم

ابو فهد يناظر علياء :ماخذتها لمياء

مفلح :لا ماخذتها قمت مالقيتها ..انا بروح لهم الحين بعطيها اياها

فهد يناظره بستغراب وهو يشوفه يوقف ويلبس حذيانه مشى عنهم وفهد يلف لمساعد:موب قبل شوي يقول سلمت عليها ويكفي

مساعد:يارجال وده يروح لها

راشد يناظرهم ويضحك

تحنحن وهو مقبل على الحريم

ام فهد:اقلط حياك الله

شافته ومعه علياء تقدم افسخ حذيانه جنب الفرشه واجلس جنب ام فهد

ام فهد ويدها على فخذه:الجمعه المباركه الي شفناك فيها

مفلح :الله يبارك فيتس ..امسك يدها وباسه ..وش لونتس الله يرضى عليتس

ام فهد بحنان:طيب بشوفكم كذا

مفلح يرفع راسه للموجودين :وين لمياء

لمياء بصوت هادي:لبيه

مفلح :تعالي اخذي علياء..

ابتسمت وقامت تاخذها منه وقفت عنده ومدت يدها لعلياء الي تمسكت بكمام ثوبه وهي تكشر بتبكي

لمياء بفشله مدت يدها واسحبتها بشوي اسحب مفلح يديها الى ان تفككت منه كانت تفلت تبي ترجع له ..خذتها لمياء بحراج منه عطتها الهنوف وراحت من ورى السيارات بسرعه

خذت نفس بسرعه ويدها على قلبها من نظرته الجامده وعصبيته بتفكك يدين علياء منه

ساره بستغراب:لمياء وش فيتس

لمياء تلف مننها:مافيني شي

ساره :صلو العشاء

لمياء تبلع ريقها وتفكيرها مشتت:مدري عنهم انا بروح

ساره :خلتس انا الي بروح ..راحت منها ساره وهي حست بتعب وجلست في الارض بدون فرش عنزت راسها على باب السياره

....

جالسين على كراسي بمطعم عربي بجلسات خارجيه

ناصر: بروح انا وسطام

ام سلطان:وين تروحون

سطام يوقف:اقريب خاله نبي نشتري اشرطة بلاستيشن

موضي:خليهم يروحون وحنى ببنتظرهم

ام سلطان :روحوو

رفيف توقف:بروح معهم

موضي تلف لشغالتها:روحي معها

الشغاله:حاضر مدام

موضي:انتبهو عليها

سطام :لاتوصين حريص

راحو وموضي تلف لامها:النايفه كلمتتس امس مارديتي عليها

ام سلطان:دقت متاخره

موضي ببتسامه:مابشرتتس انها حامل

ام سلطان بفرحه:جعله امبااااارك لبى روحها ..يالله يارب انك ماتحملها شر اضحكت ...قد الناييفه بتصير ام

موضي تضحك:فديتها اني ماستوعبت انها بتجيب طفل

ام سلطان تاخذ جوالها:بكلم سلطان وابشره...دقت عليه تاخر مارد

سلطان بعد ماتاخر وبصوت هادي:هلا والله

ام سلطان :هلاا فيك وش لونك

سلطان :بخير بشريني عنتس

ام سلطان بفرحه:الحمدالله وش ابشرك به

سلطان ببتسامه:بخير انشالله

ام سلطان :النايفه حامل

سلطان بعدم استيعاب وفرحه:جعلها ذريه صالحه ..ماعلمتني

ام سلطان:هههه حتى انا قالت لي موضي

سلطان :افااا ماهقيته منها تعلمني بنفسها..

ام سلطان:بتستحي منك ..ادق عليها ماترد

سلطان :لادقون وقتهم ليل..

ام سلطان :اجل مع السلامه

سلطان :مع السلامه ...

صكه منها ولف لدلال

سلطان :ماله داعي ناخذ موعد

دلال تكمل حديثها قبل يقطع عليه التلفون وترفع حواجبها بقهر:ليه مانعالج وش ننتظر..

سلطان يتنهد وينفخ فمه بهدؤ:موب الوقت المناسب

دلال :بس الاسبوع الجاي بروح ايطاليا مايمدي

سلطان يوقف وياشر لها توقف:قضينا من السالفه ..خلينا نتمشى ابرك

انصدمت منه كيف يرفض علاجها وهو مدخل لندن ضمن الرحله عشان العلاج

باحد شوارع لندن وفي طريق اللعاب الكمبيوتر

سطام :عندي ذالشريط دور غيره

ناصر يلف للراعي المحل ويكلمه:اخرج لنا اشرطه اخرى لانريد مصارعه

راعي المحل:حسناا ..

ناصر يناظر لرفيف وراه ومعها الشغاله

ناصر:مايا امسكيها مع يدها لاتبعد

مايا :اوكي سير..

لفو وكملو تشري

رفيف بصوت عالي :ناصر خالووو سلطان شوف

اسحبت يدها من الشغاله بقوه وراحت تركض له

اطلعت من المحل وناظرت بتجااه سلطان الي مر معه تركض له :خالوووو سلطان

وقف ولف لورى شافها ابتسم بحب ونزل فارد يديه لها احظنته بقوه وهي تضحك بفرح

ابعدها منه باس يديها:يسلم لي ربي عيونتس ماخطتني

رفيف مبسوطه:شفتك بعيوني

سلطان يناظر دلال ويضحك:الله يحفظها لتس ..وقف وناظر لناصر وسطام الي اقبلو عليه

ناصر يلفلف شفايفه بعدم رضا وهو يشوف دلال سلم على سلطان وابعد من سطام الي سلم عليه بدوره

سلطان يكلم سطام:الله يحيك مع الاهل ولا تخليها الاخيره .

سطام برجوله:انتو اهلي واخواني مابينكم فرق..

سلطان يمسك كتفه ويبتسم بتشجيع:رجال ولا فيك قصور

ناصر يناظر دلال ويناظر سلطان :متى بترجعون

سلطان :الوقت الي يصلح لنا ..وش تسون

سطام:بنشتري اشرطه بلاستيشن وبنروح لخالتي وموضي يحترونا

ناصر :موب رايح اتسلم عليهم

سلطان:بالرياض انشالله..لف لدلال..ياله

رفيف:انا بروح معك

سلطان :انا مشغول مره ثانيه..اشر لشغالتها تمسكها تقدمت الشغاله وامسكته ورفيف تناظر الشغاله وتسحب نفسها منها

رفيف ببكى :خلها تتركني خالووو مابيهم بروح معك

سلطان ينحني ويبوسها ابتسم وراح وهي تصيح بصوت عالي

ناصر بستغراب:شفتها

سطام:من هي

ناصر:دلال كاشفها

سطام يهز اكتوفه:بالعكس متحجبه وساتره

ناصر بتفكير:لا خلك انت ماتعرفها بس لو اقول لموضي ..لف لسطام بعجله ..خلاص خلنا نرجع لهم ابي اقولهم

سطام يهز راسه بنتقاد ويلف راجع معه

دلال توقف جنبه وتناظره :ماسلم علي ناصر..ولاكاني موجوده ونظرته ماعجبتني

سلطان ناظرها بسخريه وصد منها:فاقده سلامه

دلال :من حقوقي اهتمام اهلك فيني

سلطان ببرود:لااا وش ذالحقوق الي اخترعتيه ..مايهمتس بحياتتس الا انا وبس اهلي وغيرهم مالتس فيهم..

دلال بحراج:ابيهم يتقبلوني

سلطان بنزعاج وتافف ارفع يده وعينه على النهر بمعنى خلااص ...اسكتت وهو يتنهد بقلة صبر

ناصر يجلس جنب موضي وبسرعه:لقيت سلطان يتمشى هنا

ام سلطان بستغراب:سلطان هناا

ناصر:هي ودلال معه ماعليها غطاء

سطام:ماعليكم منه متحجبه

موضي تناظر ناصر:وش قصدك

ناصر:عليها احجاب بس وجهها كاشف

ام سلطان بنظرة تعجب:انا عارفه انه متغير وهذا اول دليل

موضي :وينه فيه ليش ماقال لنا

سطام:يمكن حب تكون سفره له وهو زوجته

موضي تنهد:صادق لهم حياتهم بعد

...

اوصلو للبيت متاخر لان مفلح اجبر الهنوف ترجع معهم وفهد ومساعد بعد وكان يمشي على راحته وبعد مانزلهم مر واحد من اخوياه ياخذ اوراق

جالس على المركى وجنبه واقف علي يوريه بعض الاوارق الي لازم يكون على بينه منها

علي :مفلح معي

مفلح يرفع انظره له:لا والله موب معك وش كان تقول

علي يتنهد :اصلن مجيك تالي ذاليل غلط بجيك انا بكره

مفلح بعناد :بجلس لين افهم وبعد ابي اتقهوى

علي يناظر ساعته 12 وبستغراب:ابشر بالقهوه

اسكت مفلح وعلي اطلع منه وقف متجه للباب الخارجي تردد يطلع انفخ بفمه ورجع داخل..

برى عند لمياء تناظرلقدام بملامح جامده ملتزمه الصمت من شافته يروح للهنوف ويجبرها تروح معهم وفهد ومساعد كانو يتكلمون في السياره وهي حاطه نفسها نايمه الى ان اتجه لبيت صديقه وقالها تنتظره ولها ساعه تنتظره ماجاء

ومستحيل تدق عليه يطلع لانها عارفه انه متعمد يتاخر وهو على علم بوجودها معه

علي يحط القهوه قدامه:تقهوى والله مدري وش مقصدك من طلبها

مفلح يوقف:انا ماشي

علي يوقف بسرعه:منتب صاحي والقهوه ماشربت شي

مفلح يتعداه يبي يطلع:السموحه اعذرني منيب في عقلي..اسكت علي ومفلح يطلع للباب الخارجي اسمعت صكت الباب البيت الرئيسي خذت نفس وتنهدت

مفلح يركب ويصك بابه :تاخرت

لمياء تبلع ريقها وبكذب:لا نمت شوي فماحسيت ..

مفلح يناظرها وبهدؤ وتاكيد:مانمتي وعلى هالحال لين جيت

لمياء بستغراب :الي يرضيك ..جلست على هالحال لين جيت فرحان!!..

حرك السياره واسكت مشو للبيت وهو يسترق النظرات لها متصلبه بجلستها وعاقده حواجبها

وصلو للبيت انزل انتظرها عند الباب الى ان جاته وقفها بيده ناظرته بستنكار

وقف برى على عتبة الباب الرئيسي :قبل ندخل للبيت اسحبي كلامتس الي قلتيه

لمياء بعناد:ليش انا... وانت ياحبيبي ..!!

مفلح يفسخ شماغه ويحطه على كتفه بزهق:لان كلامتس كله غلط

لمياء:تاسف على كلامك وانا مستعده اسحبه

مفلح يقرب يده منها بتهديد:اتاسف انسي انسيييي ..الظاهر انتس خرمانه مافيتس امل..ادخل لداخل البيت غمضت عيونها بعبره خذت نفس والحقته بسرعه ادخلت جناحهم افسخت عباتها علقتها على المعلاق ورى الباب شافته جالس بالصاله وازرار ثوبه العلويه مفتوحه وشماغه محذوف على الكنب

مشت بتجاهه ابلعت ريقها ووقفت عنده وبنبره حزينه وكسيره:انا اسفه اسحب كلامي..

ناظرها بجمود ووقف جنبها:وكاني الظالم وانتي المظلومه..

لمياء ترفع عيونها فيه بألم مدت يديها لعيونه وغطتها برعشه غمض بهدؤ:ليش تقسي نظرتك لي ..انا اسفه الي تبي بسويه والكلام الي تبي بقوله لاتزعل..

ابعد يديها عن عيونه:انا ماقصدت امشيتس واخليتس اله تسوي الي ابي وبس..قرب منها ويده تحاوط ظهرها ..اعرفي الغلط وتغاضي اشوي اعرفي ان انا الرجال ولي شخصيه ماقدر اتنازل عن شي هاذي بيئه وهذا مجتمع عشتي فيه وهذا طبع ارجاله ..قربها منه اكثر وضمها له بهدؤ..تبين يعني ابكي واعتذر وانوح عند بابتس عشان تدرين اني غلطة في حقتس ..

لمياء ببكى:موب قصدي..بس انك تحط الغلط علي كله

مفلح :ماقلت كذا انا غلطان ومشيت في غلط قلت لتس تقطعين الموضوع مامانه فايده نفتحه وكل شي واضح انتي بريئه وانا استعجلت في حكمي انتي عارفه اني الغلطان ..ابعدها منه وناظر لعيونها المليانه دموع..ليش تصرين تفتحينه وعندتس الثقه من برائتس

لمياء تنزل عيونها بحراج وصوت بكاها يزيد:لانه بصدق ماثر فيني للحين

مفلح يهزها بخفيف:ليه ماثر فيتس ليش قولي لي ..انتي غلطانه

لمياء تهز راسها بلااا

مفلح بنبره قويه:ماثر فيتس من ناحيتي اومن ناحيته النجس..

لمياء بعبره:منك انت

مفلح يلف براسه وينفخ بفمه بتوتر:طبيعي تصير ردة فعلي كذا فكرت بشي اجعني وفي البنت الي احب ...نزل راسه لها وهي يطل عليها لانها منزله راسها...محد يعرفني الا اسئلني وش سبب تغيري وضيقي حتى مدير عملي اصر يعطيني اجازه لوولا رفضي ..ليه كلهم شافو تغيري وحزني وانتي ماشفتيه ..ضمها له بفقده وشوق..انا حسيت بندم وقهر بيوم العيد وانا اشوفتس تناظريني بحقد وكره حسيت اني فقدتتس ..لمياء انا رجل ناضج وكبير بمافيه الكفايه اني اقول لتس كلام صادق ..رجاءن عطيني على قد ثقتي فيتس

لمياء تشهق بخفيف:مراح اعيدها ووواوعدك ..

مفلح ببتسامه:خلاص راح الزعل

ابتسمت ورفعت راسها له بطفوله:راح اهم شي انت

مفلح يضمها له وبنظره جذابه:انا عتبان بس ..مازعل منتس ابد ..

بعد مامضت الاسابيع

فتحت ابواب المدارس دوامت الهنوف بكليتها القديمه مع لمياء حست براحه وهي تاخذ اول راتب لها تصدقت عن عمها مضحي وشكر لله لانها شالت همها وهم حاجايات علياء مع ان ابوها رافض انها تشتري اي شي لعلياء

في نص ارمضان وبعد صلاء التراويح

لمياء تنزل تحت بعباتها وقفت جنب خالتها:ياله خاله

ام مفلح :ياله

اطلعن لجمعيه الخيريه لتحفيظ القران موديهم مساعد

اسمعت جوالها يدق طلعت من شنطتها وردت

لمياء :هلا وغلاا

الهنوف:هلاا فيتس ..وينكم

لمياء :طلعن للجمعيه ..

الهنوف بحباط:مراح تجون اليوم

لمياء :بكره بنجي انشالله..وش لونها علياء

الهنوف:طيبه ومشتاقه لتس

لمياء ببتسامه:تشتاق لها العافيه ياحبي لهاا ..

الهنوف:بكره انشا الله موب تغيرون وعدكم

لمياء :لا مراح نغيره جاين انشالله ..باي

الهنوف:باي ..

ام فهد :جهزتي شي من اغراضتس

الهنوف بدون اهتمام:لااا ..وينها علياء

ام فهد بنبره قويه:وش تنتظرين

الهنوف بزهق:بالله يمه وش تبين اجهز

ام فهد :وش باقي على العيد مايمديتس

الهنوف بقهر:انا ماتملكت اجهز ايش

ام فهد :بس عطونا مهرتس وكل شي رسمي

الهنوف بجمود:اذا تملكت مالتس الا الي يرضيتس

ام فهد تناظر علياء وبعتب:خليني احس انتس راضيه لو قدامي على الاقل

الهنوف بملل:ماقدر ..الايام جايه ماندري عنها..وقفت لعلياءء الي تحبي ومتجهه لدرج البيت خذتها وحطتها بالمشايه

ادخلت عليهم غزيل وبزرانها وحامل باالشهر الرابع

منصور بفرحه:خاله شوفي خذيت ممتاز

الهنوف تاخذ ورقته وببتسامه تشجيع :حبيبي انت شطوور ..ارفعت عيونها له..يوم الخميس اغمزت له بمرح ..المفاجاه

منصور يضحك مبسوط

غزيل:يوم الخميس معزومين

الهنوف:روحو انتو منصور مايبي عزيمتكم

منصور يجلس بحظن الهنوف:ايه بروح مع الهنوف وعلياء مابيكم

غزيل:اناا راضيه كيف ابوك

منصور:ابوي بخليه يوافق غصب

ببيت موضي عندها النايفه وجنبها سلطان الصغير تأكله

موضي:شفتها كاشفه بعد مروحنا للمطار جالسين بمطعم بس ماقلت له شي..وماستغربت لاان ناصر قايل لنا من قبل.

النايفه بستغراب:سبحان الي يتغير ولا يغير سلطان عاد

موضي تنهد بحزن:اسلوبه استفزازي ومستهزي حتى بمشاعرها قدامنا ..

النايفه بتفكير:اخافه تعبان او شي

موضي تهز راسها بعدم تركيز:انا بحاول اخليه يقري عند شيخ

النايفه تضحك بستبعاد:لوتموتين مارضى مستخبله انتي

موضي تاخذ الجوال بتحدي وتناظر النايفه الي تهز اكتافها

النايفه:خبله انتي

سلطان:مرحبا

موضي:السلام عليكم

سلطان :وعليكم السلام

موضي:وينك بالرياض

سلطان:ايه نعم ..بغيتي شي

موضي:ابيك تمرنا لو فاضي

سلطان :مشغول ...

موضي بحباط:متى تفضى..؟؟

سلطان:عندي رحله للقاهر ..

موضي:متى الرحله..؟؟

سلطان:بكره الفجر..مع السلامه

موضي بستغراب:مع السلامه

صكته ولفت لنايفه:الظاهر اني بستسلم

النايفه:ارسلي له رساله مهدي لموضوعتس والله حاسه لو يدري انتس تبين تودينه لشيخ ان يزعل عليتس زعله كبيره

موضي بتردد:خوفتني مالت عليتس ماتخلين الواحد يصمل...بس برسله

النايفه :وريني قبل تروح له

اكتبتها موضي على عجله

موضي :اسمعي(سلطان اتمنى انك تاخذ الموضوع بلطافه واعرف انه في الاخير لك القرار انا حابه تعرض نفسك على شيخ ماقصدت بكذا ان فيك شي بس حتى تحس بالراحه في نفسك وترتاح اتمنى تاخذ القرار الصح لصالح نفسك)

النايفه تضحك:بلطافه ..يالخوافه ..

موضي ترسله وتلف لنايفه:يارب يوافق مع اني اضن انه بيمسحه من يقراء بدايته

رفيف تدخل عليهن بصياح وصت عالي :مامااااا

موضي :وش فيتس

رفيف:مايا خذت دفتر الواني

موضي بصوت عالي:مااااايااااا

النايفه بقرف:ياررربي ازعاجكم وانتو ماعندكم الابزرين..

موضي تناظرها بستهزاء:خلينا نشوف الي ببطنتس

الناييفه بحب تحط يدها على بطنها:ياحبيي له بس..غرفته مجهززه من الحين

موضي بحنان لاخوها وبحزن على حاله:ارسلها لكم

النايفه تنهد:قلت له اني مادري وين بولد بسترالياا ولا هناا وقالي باخره الى قرب الولاده وتكفل بكل شي بالغرفه حتى العاب الي بالغرفه

موضي:شفتيها

النايفه:ارسلي صورتها بالكتالوج اذا بتعجبني او يبدلها..بس اعجبتني الله يحفظه فديت روحه الله يخليه لنا..

جات الشغاله بدفتر الوان رفيف وراحت للباب الي يطق

النايفه:لايكون احد جايتس ماقلتي لي

موضي بستغراب:لا ماعطيت احد موعد ولا احد قال بجي

سلطان يدخل من باب الرئيسي المطل على صالات الكبيره وجالسات فيها البنات ناظرت النايفه موضي بهدؤ..

موضي بصوت واطي وخوف:يممه..

تقدم منهن قامن سلمن عليه واجلسو

سلطان يناظر موضي ببتسامه مستهزي مستغرب ناقد:وش اعتراضتتس علي ياأم سلطان..

موضي بحراج ماتوقعته بيجي ابددد:مالي اي اعتراض عداك العيب بس حالتك ماتسر ضعفان وحتى وجهك مسود وخاطرك ماش...

ساكت ويناظرها

توترت وكملت:حتى بعض اطبوعك تغيرت مع ان هذا شي يخصك بس استغربنا تبدل رايك فيه

عنز يديه على ركبته وبهدؤ :دلال ماتخصني ولا راح اجبرها على الغطاء في اي مكان..

موضي بسرعه:هاذي مرتك وتخصك ليش تقول هالكلام..

سلطان يسحب اشماغه لقدام:ماتخصني ابددد..

موضي تنهد بقهر:طيب هاذي الهنوف تغطت ونفس دلال

سلطان ببرود:الهنوف تغطى غصبن عن خشمها..

النايفه بعد صمت وبتردد:اصلن الهنوف بتغطى لو ماقلت لها

موضي بتردد ممزوج بقهر:ماخذ السالفه اعناد مع الهنوف الى ان راحت وهي زعلانه منا

سلطان بنقباض في صدره لف لها وبعقد حاجب وسخريه:هي الزعلانه ولا حنا..

موضي تستجره بالكلام لعدم معرفتهم للحين لطلاقها:الهنوف ماتسوي شي يزعل انا متاكده

سلطان يوقف ويتنهد:الي هو ..هي الزعلانه ولاحنى راحت لحياتها..وش بينفعتس لو عرفتي سبب زعلها..لف لموضي اسكتت وصدت منه

اطلع من البيت وصك الباب بهدؤ

لفت النايفه على موضي وبزعل:هي الزعلانه شفتي وش قال

موضي تناظرها بستغراب

النايفه:وش بيفيدتس لو عرفتي سبب زعلها اكيد هو الي بادي

موضي تنهد بهم:لو نواف يقدر يكلمه يغير حياته شوي

النايفه :اذا احملت دلال انا متاكده انه بيتغير

موضي تلف لها:ارفض انها تعالج

النايفه بصدمه وصوت عالي :ليييش

موضي :مدري

ام سلطان جالسه في الصاله وعندها دلال وناصر معه كتاب الانجليزي حاطه قدامه ويناظر بالتلفزيون

ام سلطان:امتس عندها احد من خواتس

دلال تنفخ اظافرها:كلهم برى انا الوحيد الي هنا

ام سلطان :وانتي ليش ماقدر روحتي لها تزورينها

دلال تناظر لها:روحت لها لما رجعنا من لندن

ناصر يلف لها:ليش ماروحتو ليطاليا ماكنتي تقولين بنروح

دلال بنرفزه:كله من اخوك دق علينا وخرب رحلتنا

ناصر بصوت عالي:احترمي نفستس تقولين عنه كذا

ام سلطان ساكته وتناظر لتلفزيون

دلال بستطراد وتوضيح:يعني كنا رايحين ترويح عن الشغل ومن حق سلطان بعد يرتاح

ام سلطان:صادقه ماكان لازم يدق نواف هذا اجازه سلطان وعطلهم

دلال توقف :انا بطلع لفوق بكره عندنا سفره تعويض عن الي خربتوه

ناصر بقهر يناظرها رقت فوق وناصر يلف لامه

ناصر:يمه وش صادقه بعد اجل يرضيتس تقول عن نواف خرب علينا

ام سلطان :اذا راضي سلطان انت بعد ترضى

ناصر بستنكار:وش الي يخلي سلطان راضي والله لو يدري ان تزعل

ام سلطان بنظره شارده:لو بيزعل غطاءها بلندن

عند دلال فوق تروشت البست بجامها بيضاء فكت شعرها حطت مكياج ناعم خلصت ولفت طالعه من غرفة مشت بالردهه الواسعه وادخلت بغرفة الجلوس تلفتت بملل ترددت تدق عليه خذت نفس واضغطت رقمه انتظرت شوي الى ان سمعت صوت الرنين باسياب الجناح تسكر من جهة سلطان ادخل بالغرفه لفت له وراحت بسرعه تضمه بشوق

سلطان بحنان:ملاانه صح

دلال بدلع:مررره انتظر بكره بفراغ الصبر

سلطان يمسك يديها ويبوسها:على خير ..

دلال بحب:تحت استار الكعبه بدعي من كل قلبي ربي يرزقنا بولد

سلطان ببتسامه:الله يقبل منتس ..خلينا نرتاح الحين تستعدين للعمره

دلال بضحكه:يعني انت مستعد وتحمل

سلطان :انا تحملت اقوى من كذا.. تنهد ولف عنها..بنام نعساان حدي

دلال تمشي ورءاها:وين افطرت

سلطان :بالشركه

دلال :طيب بتنام عن السحور

سلطان :مالي نفس حتى لكوب مويه ..ادخل بالحجره وهي وقفت بنص الردهه بزهق تشوفه يلبس بجامته ويدخل بسرير

لمياء بضحكه وحب:فديتهااا علويه ماحلاها

الهنوف تمشط شعرها وترجع تمسكه واحد بربطه كبيره

لمياء تناظرها :صغنونه الجديله

الهنوف:هههه ماتوصل لرقبتي قصيته مره

لمياء بعجاب:بس غيررر وكانتس بيبي

الهنوف تاخذ علياءء وتبوسها :هذا من حظه عبدالعزيز ..تمنيت لوه للحين طويل وارفعه مثل العجايز واصير رفله والبس جلابيات

لمياء تضحك:حتى لوتسوين كذا شكلتس مايهئ

الهنوف توقف علياء قدامه وتمشيها بشويش:مدري وش اسوي اكتب وجودها معي شرط بالعقد

لمياء :اكيد اكتبيه..عشان لو لا سمح الله يرفض وجوده بالبيت تجبرينه بالعقد

الهنوف بستبعاد:لو يرفضها اطلع قبلها..موب مجبوره فيه

لمياء :واذا صار لتس اعيال منه وش بتسوين بهم بعد

الهنوف تحس بمغص في بطنها امسكته بقووه وبالم:مستحيل مابيهم..

لمياء تخزها بنظرات:اذا حبيتي ابوهم بغيتيهم

جلست علياء ولفت لها افتحت فمها بتكلم ادخلت امها ونوف معها ولدها عقب ماجاءت من وحده تقهوويها ومرو نوف بطريقهم جايبينها

نوف تحط ولدها جنبها وهو يخطي متمسك بالكنب:وش لونتس على الدوام

الهنوف براحه:كل شي زين خاصه ان كل دكتوراتي واغلب الاداريات يعرفوني فتاقلمت معهم بسرعه

ام فهد:روحتي امس لموعد علياء

الهنوف:ايه الحمدالله كل شي سليم واحمرار الداخلي لعينها يقول الطبيب اسبوعين ادوام على قطره وبيروح

ام فهد:من ارسلت سميره لنا المويه مقري فيها وهي متعافيه

الهنوف:حتى النوم صارت طبيعيه ..

يتبع ,,,

👇👇👇