رواية دموع اسقطت حصون القصور -63
الهنوف توقف وتبتسم:اكيد اني امي جايعه ..بنجيب لها شي خفيف
ام فهد تبتسم:وشو بسكوت مابيه
الهنوف:لا بسوي لتس سندويتش خفيف
ساره :باخذ علياء وبروح للكشك ..
لمياء :بروح معتس ..
ام فهد:وانا بروح معكن
ارفعن طرحاتهن من اكتافهن تغطن وراحن للكشك
...
ام سلطان :ياله خلصتو
النايفه :بدري موب وقتاء عشاء
موضي:الساعه تس وش بعد
النايفه :هالمكان وبالوقت هذا متاخر شوي..وبعدين وينه انويصر والله انه دج
ام سلطان:بنكلمه يجينا اهناك
اتجهن لسيارتهم المركونه بمواقف الشاليهات واتجهو للمطعم بنتاظرهم نواف اوصلو لهناك بتمام التاسعه والنص وادخلو لداخل
النايفه :واوو روعه المكان فاضي
موضي:محجوز
تقدم منهم النادل واشر لهم على الطاوله
اجلسو والنايفه تلفت :محجوز لمن
انفتح الباب الكبير للمطعم وادخل منه نواف وناصر وبالجهه الثانيه عربه كبيره متجه لهم بها تورته كبيره مليانه شموع
وقفت النايفه بضحكه
وهي تشوف نواف يغمزه لها اتجهت له وضمته بقوه
نواف :عقبال مية سنه
النايفه تصيح :تسلم لي الله يخليك
نواف يمسح راسها:لاتبكين ..اضحكي.
اضحكت امسحت دموعها ولفت لناصر الي سلم عليها واتجهو لطاولتهم راح نواف لامه وسلم عليها وموضي
موضي بمزح :الله يخلي لي ابو سلطان..انت ناسيني مره
نواف:ههههه افاااا انتي الاوله
موضي تبتسم بحب:الله يخليك ويرزقك بنت الحلال
ام سلطان :امين ..
وقفو حول الطاوله قطعت لهم النايفه التورته
نواف :وين سكنتو
موضي:امي بغت الشاليهات
نواف:ازعاج لكم ماكان رحتو لها
ام سلطان :اشتقت اجلس على البحر من قريب
ناصر:اانا قلت لهم لو ماجينا لهنا وروحنا للبيت اقرب اللاسواق
لف له نواف ببتسامه:تبي تسكع بها
ام سلطان:ايه ماعجبه البحر يبي ربعه بكل مكان
ناصر :لا البيت هادي والبحر نشوفه بعيونا ..ماله داعي هنا
نواف :لا اختيار موفق تغييره وانا بنفسي ودي اروح لشاليه
النايفه :العام سلطان قال لنا بنروح معكم وراح وخلانا
نواف بضيقه:ماله داعي هالكلام ..
ناظرتها موضي بقهر والنايفه نزلت راسها بفشله
ام سلطان بحنين :ماكلم
نواف يتنهد ويناظر النايفه بعتب:لا ماكلم
ام سلطان بتعب:ماكان سلطان ذي سواياه يغيب ويعيف
موضي بغيض:ماعرفتوه ولزمتو احدودكم
ام سلطان بحزن:يجي وبنسكت عنه
نواف:ماهمه كلامكم هذاه..الرجال عنده اشغال ويقضيها
ام سلطان بتردد:اعرس
نواف:مدري
ناصر بصوت عالي:خلااااص خلونا نستمتع وماعليه شر موب بزر
موضي:اووف جانا نسخته كلن يمشي على زمل رايه
ام سلطان :الله يعيني اذا بحاتي من جديد واحد ثاني
النايفه :سلطان بحقتس اما هذا طنشيه يمه
ناصر:ياليت هههههه بس ماتقدر
لمياء بصوت عالي :يممه نشب ضونا
ام فهد :لا شوي
الهنوف:يمه كليتي السندويتشات وشبعانه
ساره :الساعه قدها عشر ياخاله بنشبها
ام فهد:ههههه شبنها ..
الهنوف توقف وتتجه لعلياء :برقدها وبنجيب الشوايه
لمياء :طلبه خليها معنا
الهنوف:موب مخليتني استانس
لمياء تناظر علياء الي مدنقه على التراب وتحاول تاصله :خلييها شوفيها هاديه
ام فهد:سهريها معتس عشان تنام متى مانمتي
الهنوف ببتسامه تقرب من علياء وتبوسها :شوركم وهداية الله..ارفعت علياء راسها واضحكت مدت يديها تبيها ترفعها
الهنوف :لا لا هناه ظمان نظافه
ساره :ياله خلينا نجيبها
راحن لداخل جابن محمل الشوايه ومعه اللحم متبل وخالص حطنه وشبن ضوهن
الهنوف :يمه شلي لنا بصوتتس
لمياء :ايه تكفين يمه
ساره :مابعد سمعت صوتتس خاله
الهنوف:صوتي امي حلوو بالشله
ام فهد :بجيب لكن على اختياري
لمياء :انتي وراءها ياالهنوف..
الهنوف تغمز لها:اوكي اول امي
وقف بعيد عنهم يناظر للبحر واصواتهم يوصلها له هواء البحر ماكان يهتم وش يقولون سرحان وامواج البحر هاديه لف لصوت ام فهد العالي
ام فهد بصوت عالي شوي على انغام الشيلات القديمه:ياليتني وادعتهم قبل يمشون..او ليتهم قبل السفر وادعوني..لو الموادع نظرات بالعيون..يكفيني املى من عيونه اعيوني..جاني خبرهم في السفر يوم يبكون ..ولولا غلاي عندهم مابكوني..وانا بلايه فالسفر يوم يبطون ..البعد زود في الضماير شطوني..ومن كثر مااغليهم علي يعزون..حسبي على الي من اوصاله حدوني ....ابتسمت الهنوف بشوق لصوت امها العذب وناظرت للبنات الي يناظرن للبحر ومنصتات وبما انهم شافو المكان فاضي والشاليه الي جبنهم فاضي خلن الطراح على اكتافهن وليل موب واضح الشكل جدا...
ام فهد تستنشق الهواء :خلاص عجزت
ساره :عشتي صوت روعه مشالله..
ام فهد :ههه هاياله الهنوف دورتس
الهنوف :لحني ترى موب مثل امي كلن يغني على زمانه
ساره :احسن تنويع الحان..
لمياء :ساره انتي وراءهم
ساره :ابطيتي ماسمعتيه..
لمياء :هههه نشوف بعد الهنوف
انزل يبعد الطحالب من حذيانه بعد ماجابها الموج لتحته
الهنوف:احم احم ..عزي لمن مثلي جفى النوم عينااااه ..يسهر وهمه بين الاضلاع يجفاه.. قلبي من الفرقى تبيج كنينه..فرقى الخليل الي خياله على البال.. وجدي على شوفه وضحكت جبينه ..وانشده عقب البطى كيف الاحوال ..وين الزمان الي جمعنا وسنينه..روح وعيني دمعها سال همال..دار المحبه والطبايع دفينه ..
لف براسه صوبهم بنات جالسات ونور الضوء عاكس عليهم رطب شفايفه بتوتر ورجع راسه للبحر كلهن جابنها على الجرح الي يوجع مابرى
ساره تلف راسها لها :كملي
الهنوف ببتسامه محرجه:لا خلاص ..بروح اشوف النار ..وقفت وراحت لها
لمياء بشرود:ياما سمعتها تغنيها بكل ليله
ام فهد بزجره :انتهينا لاحد يفتح مواضيع ثانيه ..
ساره بتفهم:تلعبين معي سوبر
لمياء:ياله جمعي لي الاعواد
انسف اشماغه على راسه ولف راجع لشاليه حس بكتمه ترجع له ونفسيته شانت فضل انه يطلع من الشاليه قبل يجون اهله ويدرون انه موجود ونفسيته ترجع تنتكس اطلع بدون اي اثر يدل على وجوده وارجع لرياض
دق جواله دوره بمخباته وتحت المركى بالوسط مالقاه وقف السياره على جنب وافتح الباب دوره تحت المقعد ولقاه..2مكالمه من نواف 7 من النايفه ..حطه بمخباته وارجع يجلس بمكانه شغل الراديو اوصل لمسامعه صوت محمد عبده افتح باب السياره ودزه الى اخر شي وطلع رجليه لبرى وعيونه تشبح بخيام بدو واصوات بزران وعرب فيها..ومشاعره ترف لكلمات الاغنيه:مرت سنه
مرت سنه والعين يعشقها السهر.. ومرت سنه والشوق باقي مانمحى ..ومرت سنه والقلب ذابحه الهجر..ومرت سنه والهجر عيا ماستحى ومرت سنه مرت سنه وانا انتظر ومرت سنه والوصل نايم ماصحى ومرت سنه ماجا من الغالي خبر ودارت على حب المحبين الرحى ..
مرت سنه صابر وعذري في الصبر شماتت اصحاب الشوارب واللحى ..وعيونه السود وشفايفه الحمر وجبين يضفى فوق متنه لاانتحى وصدر يسد اليل عن نور القمر..وخد يسد الصبح عن شمس الضحى ومرت سنه واخاف لايروح العمر واناااا أنتظر والشوق باقي مانمحى..
وحده سنه وحده سنه ياالهنوف ماشفت لتس زول حتى بحلمي ليه ليييه ماتجين بالحلم حتى ..امسح وجهه بقوه وازفر بقهر ادخل لسياره وكمل مشواره
في المطعم بعد ماتعشو واطلعو
ناصر:انا بكمل السهره مع اخوياي
ام سلطان:لااا
ناصر:وليش
نواف:خليه يروح يمه
ام سلطان:لاا الساعه 1 وين بيروح هاالحزه
ناصر:بالله نواف قل شي
نواف :مابيدي شي مشينا كلنا ..
اطلعو منه متجهين لشاليهم الي هادي نوع ما
عند البنات شابات الضو ويشون بعد ماقامن من الشاطئ وجلسو حول النار
ام فهد :مابعد اخلص لونكن تشون تيس قد انجح
الهنوف تقطع وتاكل شوي:لا باقي شوي
لمياء :ياليلنا الساري
ساره تفتح عيونها بقوه:خلونا نسهر شوي ..
لمياء :خخخخ
الهنوف :انا بقعد الى ان تشرق الشمس
ساره ترفع حواجبها:اجل انا معتس..خلينا نركب جتكسي بالصبح..
الهنوف:ماعندي مشكله بيصير الوقت بدري مابه احد..صاحت علياء تبي النوم لفت لها الهنوف شالتها من عربيتها وادخلت داخل
اوصلو لشاليهم واطلع ناصر ونواف لبرى ومعهم النايفه لجلسات في ردهة شاليهم
نواف يناظر للي يشون :ليش ماتسون مثلهم تمشيتكم بارده
ناصر:وتقولون ليش تروح ماتجلس معنا
النايفه بقهر:وش نسوي فيكم ماتجمعنا ولا مره سوى
نواف:طيب بكره خلونا نشوي
النايفه بغيض تصد منهم
ناصر :عصبت البنت
النايفه بدموع تحاول تخفيها وصوت خانقته العبره :كلموه خلوه يجي شوي ويرجع..
نواف يتنهد بتعب:النايفه والله وبالله لو بيدي او اعرف مكانه جبته لتس حتى لو انومه واسحبه تسحيب
ناصر بعصبيه يوقف ويصارخ في وجههاا :خلااااص اكلي تراااب جبتي الهم لاامي لوه يبي يجي جاء مايبينااااا ..مايبينااا..افهمي
لمياء تلف براسه لهم :شوفوهم معصبين
لفن لهن واقعدو يناظرونهم وكان عندهم مشكله
ام فهد :الله يعافينا من ماجرى لهم
ساره :خلاص الميه شكلهم اكباريه لفي براستس لو يشوفونتس جاووو يهاوشون
لمياء بغرور:بنهاوش بعد حنى ..
ام فهد تخزها بمنقود:اهجدي
ساره :ههههه لا خليها خاله خليهم بس يجونها
لمياء :جاءنا ولدهم اليوم الظهر ياربي من الدشاره ..
نواف بصوت واطي :ناصر روح ادخل الوقت متاخر
ناصر بغيض:خلها تفهم موب بزر هي
النايفه تناظر له بحقد :اكثر واحد مرتاح انه راح انت عارفه وش تبي تدج لا سال ولا مسؤل
ناصر يرفع وحده من حواجبه :لاتمادين بكلامتس وتندمين
نواف يوقف ويمشيه قدامه:روح روح هاذي اختك احترمها ..
لف لها ناصر :تحترم خصوصيات غيرها احترمها ..ادخل ناصر لاداخل ونواف تعدا النايفه يمشي على شاطء البحر
تنفست بقلة حيله ووقفت لداخل الشاليه
اقعدت جنبهن ومعها صحن ترفع فيه الحم الناضج
لمياء :فاتتس هواش
الهنوف :وين
ساره :يمه منها ماحبها للهواش
ام فهد :كانها رجلها
الجميع :ههههههه
لمياء :الله يهديتس يمه اعلمها بسالفه
الهنوف :ههه خليها تعلمني
لمياء تلف لها وتعلمها:شفتي الشاليه جنبنا صوتهم واصلنا لهناه متهادين شكلهم ولا بعدددد البزر هو الي يصايح
ام فهد تلف للمياء :موب هوين من شفته يقرب منا ويخز
الهنوف تلف لشاليه :مافيه احد
لمياء :الي ادخل والي راح يتمشى
ساره تشاور الهنوف:يهبل اخوهم الكبير رزه
الهنوف تناظرها:انشاالله اعزوبي ههههههه
ساره :يارب هههههه
..بعد ماخلص الشوي وتعشو راحت ام فهد ترقد والبنات اجلسن وراءها اشوي وراحت لمياء ترقد وبقى الهنوف وساره والفجر ينشر اضؤاه ويغير لون البحر الداكن
ساره :يجنن الجو دافي وحلو
الهنوف:خلينا نمشي شوي لاخر الشاليه
ساره توقف وتمد يدها للهنوف :ياله
امسكتها ووقفن يمشن للجه الفاضيه من الشاليهات
ساره :بحجز لي جتكسي الحين
الهنوف:ههه اصبري لين نصلي الفجر
ساره :اجل لانبعد
الهوف:نرجع نصلي ونجهز انفسنا
ساره :ياله مدام قراب ..ارجعنا لداخل الشاليه كل وحده راحت تصلي وتغير لبسها
اطلعن سوا من غرفهن بعد ماحطت الهنوف علياء عند لمياء
الهنوف :نفطر
ساره :اطلعت الشمس ياله اخاف يكثرون الناس
الهنوف :ماحد جاي يابنت الحلال شي خفيف
ساره:امري لله ..
ادخلن للمطبخ يفطرن
مر على غرفة ناصر الجالس على سريره وبيده جواله يقلبه
نواف:شكلك مارقدت للحين
ناصر منزل راسه :لا مارقدت
نواف:اطلع معي انا طالع
ناصر ينسدح بسريره :مالي نفس
نواف:على راحتك ..
واقفات عند الهندي ويعلمنه بالي يبن
ساره :محمد جيب اهناك عند شاليه اخر واحد انا هناك
الهندي:طيب ماما انتا روح انا جيب
ساره :ماغيرتي رايتس
الهنوف:لا والله هونت مابيه
ارجعن لشاليه وقفن عند الشاطي قريب افسخت ساره حذيانها ولفت للهنوف
ساره :افسخ عباتي..
الهنوف :اربطي عباتس على خصرتس ولفي الطرحه على راستتس بس مافيه احد
لفن لصوت الجتكسي ابتسمت ساره بفرحه وخوف نزلت الطرحه على وجهها وقربت من الشط وقف عندها صاحبه انزل وخلاها تقدم تركب
ساره بخوف:يممممه
الهنوف:ههههه ارجعي ارجعي
ساره بعناد وخوف :لا لا خلاص ..
ابعد منهن الهندي راجع افسخت الطرحه ولفتها على راسها وحركت الدباب بصراخ وهي تدخله البحر اضحكت عليها الهنوف ارجعت لورى شوي واجلست تناظرها تمشي بلابحر بشويش وعقب قامت تسرع بها ابعدت منها مغطيها احجار الشاطئ الكبيره
عند ساره الي ارتاحت وتجرئت عليه تحررت طرحتها شوي مدت يدها تمسك طرفها اختل توازنها وانقلب فيها حست براعه وهي تشوف نفسها بالماء وعباتها متشققه نصفها باالمحرك الاسفل تمسكت بالجتكسي المنقلب وشعرها على وجهها تنفست بسرعه وخوف وهي تشوف البحر ممتد حولها ماتشوف احد تلفتت ودموعها تنزل بغزاره حست بملمس برجليها ناظرت لتحت باسماك تصقع فيها وتقفز من حولها اصرخت بقوه وتفكيرها يروح فيها لايجيها سمك القرش حاولت ترقى فوق الجتكسي المنقلب ماقدرت ارفعت راسها لصوت محرك من وراءها حست براحه ودموعها مازالت تنزل شافته يخفف سرعته ويوقف جنبها
نواف بهدؤ:سلامات صابتس شي..
ساره منزله راسها ودموعها مختلطه بالمويه :لا
نواف ببتسامه:لاتبكين مابه شي ..
صدت بوجهها عنه ويديها على الجتكسي تبعها
نواف :ماقدر اقلبه لتس واعدله ليش تاخذين واحد كبير
ساره ساكته بحراج وخجل وخوف
نواف:عطيني يدتس بوصلتس
حطت يدها على راسها وبصوت خانقته العبره :لف عني لاتشوفني..
نواف يناظرها:بحاول اني اقلبه هديه وابعدي..
ساره ببكى:ماقدر اهده بغرق
ميل نفسه وحرك المحرك اسحبه اتجاهه بيبعده منها ماقدر انفخ بقوه وارفع راسه لها
:ماقدرت
ساره برجفه :وين طرحتي
لف يدورها وبضحكه:اووووه شوفيها اغرقت ..مد يده لها بدون اهتمام ..تعالي قبل تسوين سواتها
ابلعت ريقها ارفعت عيونها له شافته يناظرها بدون خجل دق قلبها بقوه نزلت عيونها بسرعه وبضيقه:كلم احد يجي ياخذني
مد يده لعضدها ارفعها بقوه لف شوي الى ان حطها وراءه :للاسف مامعي جوال للبحر..ياله عدلي نفستس..
ساره بصدمه وعدم استيعاب:وش اسوي
نواف :ثبتي نفستس وتمسكي ..
ساره بدموع :طيب ابعد شوي
ابتسم وهو يحس بجسمها على ظهره:اذا ابعدت طحت ..اصبري الى ان ناصل..
ارتجفت شفايفها وبكت :بطيح اذا مشيت
نواف بقهر خفيف:ايه بطيحين تمسكي فيني
ساره تصيح مره ثانيه:ماابي
نواف يتنهد :طيب بمشي شوي شوي لعلتس تقعدين ماطييحين
لفت بعيونها على نفسها لازقه فيه اللهم اني مامديت يدي امسكه اسحبت شعرها بقوه وضعف يافضحي ياويلي الحمدالله ان راشد موب موجود
مشى بشويش عض شفايفه مانع ضحكته وهو ييمل نظره لها ويديها على جنب الجتكسي
حس بالجتكسي يتعتع بيوقف عطاه عزم واسرع شوي اصرخت بخوف وهي تميل لورى مدت يدها لعضده الثنتين وتمسكت فيها بقوه
نواف بخوف وفشله :اسفين بس ماقدر اخفف السرعه
ساره براعه والمويه يصقع بوجهها :عارفه ودك ودك..
نواف يرفع وحده من حواجبه :ماتبين هديني
نزلت عيونها ليديها الي متمسكه بعضده العاري نزلتها بسرعه لبلوزته من تحت وتمسكت فيها مبعدتها من ظهره شافت ظهره بان صاحت بصوت عالي
ساره :اسرع خلاص تمسكت
نواف يحس بيديها على قميصه ترتخي وبجديه :انا مالعب معتس مدي يدتس ..مد يده ليديها الى على بلوزته واسحبها بقوه مادها لبطنه من قدام وارجع يسحب يدها الثانيه حط يده على يديها
نواف :صار الي صار تمسكي وخلصينا..
غمضت عيونها بقوه وهي تشهق بخفيف رصت على بطنه عقب ماسرع حست بالم في رقبتها من كثر ماهي مبعدتها عن لاتلامس ظهره
تأوهت بالم وضعف ربع ساعه الى ان قرب لموقعها
نواف يهدي السرعه ويلف راسه لها نص التفاته :كيف تغطين احنى وصلنا
افتحت عيونها وبصوت قصير:وش اسوي
نواف ينزل راسه:افسخ القميص تاخذينه
ساره تبرطم بتصيح :لا ...مافيه احد اهناك انزل وروح جيب لي شي
نواف يرفع راسه للمواقف :لا فيه .. اخاف يشوفونتس ويجون ..اصبري اصبري
رجعت راسها ورى ظهره وهو مشى ال ان قرب لشاطئ وقف واقفز الى البحر ورجليه يثبتها بالتراب تحته
لف لها وناظرها منزلها يديها قدامها ماسكه مقعده ارفعت عيونها له ترمش ببلاهه
نواف يبتسم وينزل راسه حست بقلبها يرجف عقدت حواجبها لقلة حيله وقهر
افسخ القميص واحذفه عليها :حطيه على راستس..انا منيب رايح .. نزليه من قدام لو يطلع شعرتس الاشقر من تحته
ساره تاخذ القميص بسرعه وتحطه على راسها
نواف :ياله انزلي هناه ..موب لازم نوديه له
ساره بتردد وخوف:بيشتكيني
نواف :مايقدر ..امشي معي بسرعه ..
نزلت راسها بهدؤ وانزلت طاح القميص منها في الماء انزلت تاخذه من المويه ببرود تحس بخنجر في قلبها من حالته وهو ماخذ راحته ولا تحسس من شكلها كاشفها لقته ظهرها افردت القميص من المويه ورجعته لراسها خذت نفس وعطته جنبها :ياله
مشى قدامها بظهره العاري وشورته قرب من الشاليه الفارغ ولف لها
طنشته واسرعت من قدامه متجهه لشاليهم تلفتت تدور الهنوف ماشافته ادخلت للشاليه افسخت القميص واحذفته بخوف على الارض ماقدرت توقف اكثر من كذا اجلست على الارض وركبها ترجف
افتحت الباب وادخلت عليها
الهنوف بخوف تقرب منها:وش فيتس وش صار
ساره بفك يرجف:مدري مدري..نزلت دموعها بقوه .وين رحتي مافقدتيني
الهنوف تضمها لها:واالله اني رحت للهندي اقوله يدورتس بس انه قال ماعندي شي الحقها عليه كله خربان
ساره بدموع:ليتني غرقت ولا صار لي الي صار
الهنوف براعه :وش فيتس ؟؟؟
وقفت ساره ارفعت القميص تبعه واتجهت للمطبخ والهنوف تتبعها افتحت الزباله واحذفتها فيه
الهنوف بستغراب:وش ذاه
ساره تمرر السانها على شفايفها:امانه لاتعلمين احد منحرجه منهم
الهنوف بحنان:اسم الله عليتس وشفيتس
ساره تنزل راسها:طحت بالمويه وطاحت مني طرحتي لاسفل المويه جا واحد وساعدني
الهنوف:هاذا قميصه
ساره تهز راسها بايه
العنود برحمه:وليش تصيحين هدي نفستس
ساره تنزل دموعها مره ثانيه:حطي نفستس بمكاني وهو ماينزل عيونه مني ومعنز يديه على جنوبه ماخذها فرجه
الهنوف ببتسامه هاديه:اهم شي ماصار شي كايد غسلي وجهتتس وخلينا نروح نرقد انا نعسانه
امسحت دموعها واطلعن لفوق لغرفهن يرقدن
عند شاليه ام سلطان ادخل لشاليه شاف امه قايمه وجالسه بالصاله
ام سلطان بستغراب:وش فيك طالع كذا
نواف :حر وفسخته ..انا بطلع لفوق تامريني شي الغاليه
ام سلطان :مانمت للحين
نواف :لا
ام سلطان :سلامتك اجل نوم العافيه
رقى لحجرته خذا له حمام ولبس بجامه انسدح على السرير امسك بطنه ببتسامه فيها عرق موب سعودي يابنت سفير او مقيمه ..ناظر ساعته بهتمام لازم ادق على بدر قبل انسى
..
في وقت العصر
لمياء وام فهد جالسات ببساط قريب من البحر ومعهن علياء بدراجتها
اقبلت عليهن ساره واجلست بتعب
ام فهد:تعبانه
ساره ببتسامه:لا فديتس
لمياء:حلووو الجتكسي
ساره بحباط:لااا ماتوقعته كذا
لمياء :ليش
ساره بدون اهتمام :بس ماعجبني ..بنزل علياء من الدراجه..وقفت واتجهت لعلياء شالتها من دراجتها وعودت تجلس وهي بحظنها
اقعدو يسولفون حطتها جنبها ومدت يدها للقهوه تقهوى خذاهم الوقت بالسوالف والجو هادي
ام فهد تلفتت :وين راحت علياء
ساره توقف وتلف بعيونها حول المكان :وين راحت
لمياء توقف جنبها وبخوف:مامدانا ننساها
ام فهد براعه :ياويلي لاتكون راحت للبحر
ساره بندم وخوف:ليتني ماطلعتها ..
ام فهد :كل وحده تروح لها في جهه قبل تقوم الهنوف
لمياء :ايه بسرعه اذا درت بتموت ..
تفرقنا كلهن ادخلت الحمامات مافيها احد وين راحت مامدها تبعد لوها تركض .لفت من ورى الحمامات مافيه احد ارجعت لمكانها وجوالها يدق ارفعته لعينها
ساره تهدي نفسها:هلا يمه
ام راشد :السلام عليكم
ساره :وعليكم السلام وش لونكم
ام راشد:طيبين وبخير نسال عنتس
ساره تدور بعيونها للمنطقه حولها فاضيه وناس شوي تمشي:طيبه طيبه ..يمه فديتتس بدق عليتس بعدين
ام راشد:طيب مع السلامه اجل
ساره :مع السلامه..صكته واتجهت صوبه
ساره تاخذ نفس مايعرفني مايعرفني ثبتت غطاها على وجهها ووقفت قريب شوي:لو سمحت عطني البنت
نواف شايل علياء بحظنه لف لها :لكم
ساره ارجف قلبها وبصوت مرتبك:ايه هاتها
نواف ببتسامه:الله يخليها لكم..لقيتها تحبي لوحدها وفضلت ارفعها من الارض ..باسها ووصلها لساره
مدت يدها برجفه تاخذها منه حست بتوتر وهي تقرب منه
نواف يناظر اسفل رقبتها ورفع عيونه لها رجع علياء لحضنه بسرعه :انتي الي اليوم بالبحر
ساره تبلع ريقها بصعوبه:لا ماجيت البحر..وبعصبيه خفيفه ...هاتها
نواف بضحكه:اشوي اشوي ترى موب انا الي حاذفتس بالبحر
ساره بتطنيش لكلامه:عطني اياها
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك