رواية ياسادة العشق يكفي للحب مديت كفي -6
ابو نوره يالله وانا ابوك الرجال يبغى يشوفك
نوره مولازم شوفه خلاص بالملكه
علي احلفي بس يمكن ماتعجبيه
نوره على شحم متاكده يشوفني وينهبل
علي مره واثقه على ايش ينهبل
نوره على جمالي
ابو نوره يالله خلو المناقره الرجال ينتظرك
نوره طيب يالله جايه بس اعدل شكلي
علي هههههههه مو جميله ليش التعديل
نوره علي برا قبل احوسك
طلع علي وهو يضحك ونوره توجهة للمرايا تشوف شكلها
قبل تطلع..
نوره بنت جميله شعرها اسود وطويل لنهاية ظهرها
عيونها سوداء وواسعه شوي جسمها متناسق مع طولها
بشرتها بيضاء. انفها حكاية شموخ وكبرياء
بالمجلس عند الرجال
ابو نوره معليش ابطينا عليك بس تعرف البنات وسواليفهم
سلمان لا ماعليك ياعم
شوي والا نوره داخله بالعصير القت السلام وقدمت العصير
وجلست قريب من ابوها
ابو نوره استأذنكم وطالع بعلي وقاله قوم
علي مابطول شوي واطب عليكم هذي نظره بس
سلمان هههههه من البدايه ناشب لنا لاتخليني اهون
ارسلت له نوره نظره ناريه حسسته بغبائه ايش اللي اهون
سلمان باحراج قصدي اهون عن النظره
علي صدناك لاترقع
سلمان قفل الباب وراك
علي طرده يعني. يالله اخليكم
سلمان كيفك
نوره بنفسها بدري الحمدلله تمام
سلمان دوم يالغلا
نوره تدوم
سلمان وصفتك الوالده بس ماتوقعتك كذا حلوه
نوره تسلم
مرت فترة صمت مافي شي ينقال ونوره اجاباتها مختصره
ملت الوضع وقامت
نوره عن اذنك بنادي الوالد
سلمان خذي راحتك
طلعت نوره وتوجهت لصاله شافت ابوها وعلي
نوره بعصبيه متى كنتم ناوين تجون
علي قلت نتركم براحتكم
نوره ماصارت نظره
ابو نوره معليش علي الله يهديه اشغلنا
في الرياض في سيارة ابراهيم
ابراهيم انت تعرف شقته
خالد ايوه خليت واحد يراقبه طول هالشهر
ابراهيم مخطط من زمان
خالد تعرف ما ابغى اتأذى عشان واحد مايسوى
ابراهيم اجل حرك السياره خل نلحق قبل يجتمعون اخوياه
مشى خالد وابراهيم متوجهين لشقة عماد
اللي يجمع فيها البنات وشلة السكارى
عند ريم كانت متوتره حدها لانها عارفه
اللي بيسويه خالد وهوقالها تجهز شنطتها عشان يمر ياخذها على
طول
نزلت للخدامه اللي دايم تسولف معاها
وقالت لها اول ماهي تخرج على طول يجيبوا اغراضها لسياره
في بيت ابو نوره
نوره مايمدي اسبوع ايش اسوي فيه
ام نوره بيمديك
نوره مايمدي
ابو نوره خلاص يابنتي انا قلت تم لاتفشليني قدام الرجال
علي وعلى فكره زواجكم بعد شهر
نوره لا وربي ضغط مره
ام نوره كل شي وافقنا عليه وانتهينا ماتفيد اعتراضاتك
نوره وافقت باستسلام لحياتها الجديده اللي بتكون بدون خالد
بالرياض بشقة عماد
خالد اسمع انا جيتك قبل تشرب عشان تكون صاحي
والله ثم والله لو ماطلقتها لا ادق على الهيئه والمباحث
ويجون يشوفون شقتك وانت تعرف انك تعتبر مهرب
لان الكميات اللي عندك كثيره
عماد بخوف طيب المطلوب
خالد طلق ريم بالثلاث
عماد خلاص باروح لمحمد واطلقها
خالد بعصبيه الحين احسن لك
عماد اختك طلاق بالثلاث
راح عنده خالد وعطاه كف وتفل بوجهه
مسكه ابراهيم خلاص خالد طلقها
خالد مايستاهلها الكلب
ابراهيم خلينا نطلع وناخذ اختك قبل يقول لااحد
طلع خالد وابراهيم وتوجهوا لبيت الريم
بالنسبه لنوره كانت تستعد لملكتها وهي تتمنى
تصير معجزه وترتبط بخالد بدال هالسلمان..
توقعون ممكن تتحقق امنيتها
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الرابع عشر
يـــا عـمــي روح فـارقـنـي فـراقــك ثــالــث أعــيــادي .....
أبيك اليوم يا بــــايـــــع ولو لحظه تسمع لي
عشان أوضح لمثالك بأني شخص مو عـادي
أنا ما جيت أبي قربك ولا أبي منك تشفع لي
أنا أكبر من أمثالك وقلبي يعشق عــــــنادي
أنا لا زادت همومـــــي أبد ما أبيك تفزع لي
أعالج نفسي بنفســي وأحصل بيدي مرادي
أبيك تشيل من راسك بأنك راح ترجــــع لي
ولا أبي تتصل فيني ولــــو في يوم ميـلادي
في بيت ريم انتبهت لصوت جوالها
ريم هلا خالد
خالد بسرعه انزلي
ريم طيب
راحت ريم وقالت للخدم ينزلون اغراضها
ونزلت قبلهم لسياره
ريم بصوت هادي السلام عليكم
خالد وابراهيم وعليكم السلام
ريم الحين الخدم بينزلون الشنط
خالد تأخروا اخاف احد شافهم
ريم انتظر شوي اذا طولوا نروح
دقايق وكانت الشنط عند السياره ركبها خالد بالسياره ومشى
في مكه عند نوره اليوم ملكتها وبعد شهر
بتروح يعني خلاص مافيه امل تتغير الاحوال
اول حب بيظل حلم ومابيتعدى برواز الاحلام
مابيتمرد ويسير واقع
انتبهت نوره لمها تناديها
مها سلامات لي ساعه اتكلم
نوره الله يسلمك عروس واتغلى عندك اعتراض
الجوري تكفين جننيها زي ماحاستنا بملكتها
نوره تحرك حواجبها ابشري ماطلبتي شي
نادت امها اللي تغيرت معاملتها من يوم ملكة
ام نوره هاه يمه بغيتي شي
نوره يمه مها مسببه توتر ومكهربه الجو
تخوفني طلعيها برا
مها فتحت عيونها على اخرها نعم نعم تبغين تطلعيني
نوره اكيد لانك تخوفيني
الجوري صح عمه مها توترها زياده
مها جوري يامعفنه انا اختك
ام نوره اهدوا اش فيكم يمه مها لاتخوفينها ولاتوترينها
مها عمه والله ماقلت لها شي
نوره بلعانه طلعيها والا ترا وربي ما اطلع لناس
مها طالعه من غير شي بس يارب تطيحين
نوره دعوتك ماتعدت حدود الغرفه انقلعي بس
طلعت مها وهي تتحلطم
ونوره والجوري مبسوطين لانهم طفشوها
عند خالد وابراهيم بالمجلس
ابراهيم على البركه وانا بعد باخطب
خالد تصدق والله خايف لظلم بنت الناس معي
ابراهيم ليش تظلمها
خالد لان قلبي مو لها
ابراهيم مع العشره بتحبها وتنسى الماضي
خالد ما اتوقع ابد
ابراهيم اكيد هي نستك والا ماكان تركتك
خالد انا غيرت رقمي يعني يمكن لسى تدق عليه
ابراهيم لاتتوهم لو تبغاك كان دخلت الشات
وتذكرتك
خالد خطر في باله يدخل بالنك القديم ويكتب لها مدونه
وفعلا دخل وكتب لها
نامي وخليني انام ياول واخر غرام
مدام فرقانا قدر ليه نتمادى في الكلام
موضوعنا جارح جريح من طاري الفرقا يصيح
ماصح ويانا الصحيح اقري على الوصل السلام
خلاص يكفي ياغلاي لاتزود الاااااااااااااه بعناي
ادري بان قلبك معاي بس القدر ضد الغرام
عند نوره كانت تكلم امها
نوره هذا له اسبوع لاكلمني ولاطلب رقمي شكله مغصوب
ام نوره مدري والله انها غريبه
نوره باخذ رقمه من جوال علي وارسله
ام نوره مهبوله انتي اثقلي شوي
نوره بلا ثقل بلا بطيخ اذا مايبغاني نفركشها من بدري
ام نوره والله لوترسلين له لااقول لبوك
نوره قالت طيب تسكت امها والا في بالها تشوف ويش سالفته
بالرياض عند ريم نزلت من الدرج تجري
دقت باب المجلس على خالد وابراهيم
طلع لها خالد وانصدم من بكاها
خالد الريم ايش فيك
ريم عماد الزفت نشر صوري وارسلي
المواقع اللي نشرها فيها
خالد بدون مقدمات دخل المجلس واخذ مفتاحه وابراهيم لحقه
وركب معاه
ابراهيم خالد تريث واهدا
خالد نشر صورها تفهم ايش يعني نشر صورها
ابراهيم بتاخذ حقك لكن اهدى
في بيت ابو نوره
نوره اخدت رقم سلمان من جوال اخوها
وارسلت له
))اذا انت مغصوب على الزواج قول عادي))
رد عليها وهو مستغرب من قوة جرئتها
))انا رجال محد يغصبني على شي))
استمرت الرسايل بينهم وكان اسلوب سلمان قاسي
معاها وهذا الشي خلها تقارنه بخالد
بالرياض بشقة عماد
خالد والله مو انا جيت ولقيته مقتول
الظابط احنا جينا وانت متواجد بالشقه مع خويك
والرجال مقتول تفضل معنا للقسم وهناك قول اللي تبي
تتوقعون خالد قتل عماد
نوره وحياتها مع سلمان
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الخامس عشر والاخير
يا حب.. انا قلبي من البعد منصاب
مدري خفوقي بعدها وش مصيره
يا حب.. قلبي من عنى الوقت ما طاب
يا حب.. قلبي مايبي شخص غيره
يا حب .. قلي ليه ما تجمع احباب
يا حب .. قلي ليه قلبي اسيره
انا اشهد ان الوقت قطاع الارقاب
يومك تحب انسان وترضى بغيره
انا عزلت النفس عن كل الاصحاب
خوفي يشوفون الحزن فالبصيره
ودام الغلا فقلوبنا دوم جذاب
والقلب ضيع بعد فرقاك سيره
يظل قلبي بالغلا دوم عتّاب
وتظل عيني فالليالي سهيره
مدري شسوي لا غدى الوقت كذاب
العين تبصر بس ايديني قصيره
بعد مرور شهر على الاحداث زواج نوره اليوم
وخالد مازال مسجون هو وابراهيم
نوره لاتحطي كثير ابغى خفيف مره
الكوافير بس انتي عروس
نوره اعرف بس الكثير مايناسبني
مها نوره خليها تحط لك اللي يناسبك هي تعرف
لاتتشرطين
الجوري لا معها حق الكثير مايناسبها
نوره فديتك يالجوري ماعليك منها انفذ اللي براسي
مها ايش فيكم علي لايكوني بنت البطه السودا
نوره هههههههه يمكن
في شقه من شقق الفسق والفجور بالرياض
امال صدقيني مصيرهم يكشفونه واذا ماعلمنا عليه
بيجرنا وراه
سحر ليش احنا ماقتلناه
امال بس شفناها ودارينا عليه
سحر ايش نسوي ابلغ على زوجي
امال من حبك له بلغي وارتاحي منه
سحر الله ياخذه ماوصلني للمواصيل هذ الا هو
امال ليش تتسترين عليه هاه خليه يولي ومنها تاخذين راحتك اكثر
سحر وين اخذ راحتي بارجع لا اهلي بمكه
امال براحتك انا نصحتك
سحر هذي اللي كانت مع نوره ايام الدراسه
تزوجة واحد من اللي تكلمهم والاكيد ان بدايته في ضلام
لازم نهايته تكون سيئه
بالسجن عند خالد وابراهيم
ابراهيم شفت تسرعك فين ودانا
خالد تكفى ياابراهيم مو ناقصك
ابراهيم تدري الحين ممكن يقصون فينا بدون ذنب
ايش فادتك العصبيه
خالد قلتها مالنا ذنب وبإذن الله مارح ننظلم
باحد قاعة الافراح بمكه
مها يالله الزفه ياعروس
نوره بدري كان لطعتوني اكثر
مها هههههههه مستعجله على سلمان
نوره نقطينا بسسكاتك طفشت لحالي بالغرفه
جوري معليش ياقلبي انشغلنا
مها الا تعالي كيف كان التصوير حماس والا
نوره اذا طلع الالبوم شوفيه
مها ههههههههه ياشين الاخلاق
انزفت نوره على انغام اغنية سيرين عبد النور عمري معاك
وموسيقى كلاسيك
بالرياض عند امال
امال خلاص سحر دقيت من رقمي القديم
وكلمة الظابط وقلت له وكسرت شريحتي بعدها
سحر عطيتيه عنوان منصور
امال ايوه
قطع كلامهم صوت الباب
سحر تفضل
المشرفه على شقتهم انسه سحر في حرمه عند الباب تبغاك
سحر ماقالت مين هي
المشرفه لاوالله
راحت سحر وشافت الحرمه
وتكلمو برموزهم المعروفه عن مثل اشغالهم
دقايق وخرجة الحرمه وبلغت عن الشقه
خلال دقايق تم اقتحام الشقه والقبض على اللي فيها
بعد شهرين من الاحداث
خالد&& ملك على بنت خالته وعنده امل ينسى مع ان
القلب يعانده
ريم وابراهيم&&حياه هاديه مليانه حب ووفا
سحر وامال ومنصور&& نهايه مؤلمه تنتهي بأي شخص
يبتعد عن دينه ويطارد هواه وغرائزه
ماجد وعبير&&رغم محاولات تخريب زواجهم الا ان النصيب اقوى من كل شي
فاطمه&&مازالت تسبح في بحر المغازله
علي والجوري&&بداية عشق بريئ
عهود&& اختارت دراستها وخط احلام تتمنى تحقيقها في حياتها
العمليه
تهاني وعبد العزيز&&ايام سعيده ماتخلو من رجة تهاني
وهدؤ عبد العزيز
في بيت سلمان ونوره
نوره انت موصاحي يعني ماترحم
سلمان هذي حقوقي
نوره وحقوقي وين سلمان انت تعاملك مايدل اني زوجتك
وكأني عدوتك
سلمان موعدوتي بس انتي مدلعه وانا مااحب الدلع
نوره صدقني قلبك مولي والا كان ماقلت مايعجبك الدلع
سلمان لاتقعدين تتوهمين انتي زوجتي واحبك واحترمك
نوره صح مره واضح كسرك الاحترام
نسيت انك رميتني عند اهلي شهر ولاسألت فيني
نسيت انك ماتحترمني حتى قدام اهلك
سلمان فكينا بس والله من جد عقولكم ناقصه
نوره نعرف مين عقله ناقص
قام سلمان وطلع من البيت هذي دايم نهاية نقاشاته مع نوره
ماتنكر انها تقبلته واحترمته وحبته ودايم تعاقب نفسها اذا تذكرت خالد تحس انها تخونه
لكنه للاسف مو مراعي مشاعرها
راحت نوره لغرفة النوم طفشانه وموعارفه حل لحياتها ودها ترتاح
وتستقر
تعبت من التفكير قررت تغير ترتيب دولاب الملابس
وراحت نكشت كل اللي فيه شافت شنطه لسلمان
جاها فضول تفتحها وفعلاً فتحتها
شافت فلاش على طول نطت على جهازها وشغلت الفلاش
تفاجئت بصور بنت وباين انها خاصه
رجعت لشنطه ولقت صور البنت مع دفتر ذكريات سلمان
تأكدت شكوكها ان قلبه مو لها
في احدى صفحات دفتره كاتب
هي من ابعدتني عن عشقي
كم تمنيت رفضها
بسبب موافقتها قطعت اخر خيوطه
دقت على امها وحكتها ونصحتها بالصبر وانه رح ينساها مع الايام
توجهت لدفترها وسطرت فيه اخر حروفها قبل ان تتبلد مشاعرها
انُاس لان انساهم ماحييت
يامن اخطأت في اختياركم كصديقات@
علمتموني الحذر فليس الكل يستحق منا التضحيه
خالد@اقتحمت قلبي بقوتك غيرتني كثيراً واضعفتني
اعترف لك فأنت من اشعل اوردة قلبي
قد وعدتك بنشر روايتي وهاانا افي بوعدي
وجعلتها بنفس الاسم لا اعلم ربما تقرأها حتى
ولو بعد رحيلي عن الحياه
امي@ قتلتيني وانتي لاتشعرين لكن مازلت احمل لكي بقلبي كل الحب
سلمان@احببتك وحاولت نسيان غيرك لكنه قلبي يأمرني
كنت اتمنى ان تقتحمه وتبدله مثلما فعل غيرك لكنك فعلت الاسوء
فأنت من قطع اوردة قلبي واماته
تجبرت فقتلت
كلمات لان انساها
علمنى الحب وكيف أحب ... وكيف تكون آهاتي من القلب للقلب ...
يوم حبيته صحيح ترك ... قلبى جريح ...
ماحد من الناس صاحي ... يسهر يداوى جراحي ...
ياسادة العشق يكفى ... للحب مديت كفي ... النار تشعل بقلبي ...
وين اللى يقدر يطفى ... جيش الهموم امتحني والحب أضعف سلاحي
عايش فى ها الأرض وحدى ... أدور أرض المحبة ... ...
ادري المحبه بعيده ... مع اللى قلبى يحبه ...
العشق ناوي عذابي ... والجرح أصبح وشاحي ...
قفلت دفترها وتوجهت لغرفة النوم تعبت وودها تنام
بدون ماتصحى ودها يقرون رسالتها لهم يمكن يعرفون
حجم العذاب والالم اللي تركوها تغرق فيه
تمت
3\6\1433هـ
رواية ياسادة العشق يكفي للحب مديت كفي
بقلمي&& بقايا احاسيس
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تجميع / ♫ معزوفة حنين ♫ ..
اللهم لك الحمد حتى ترضى وإذا رضيت وبعد الرضى ,,, اضف تعليقك