رواية اهات جروح حزينة -7
محمد: إلايابختها, أقول بروح للبقاله يالله سلام.
(عندبيت أبوفهد):
بندروخالد ملطوعين عند باب الشارع ومعصبين على البنات
خالد: صدق البنات قلق.
بندر: توك تدري يبيلهم ساعتين عشان يجهزون.
خالد:ياليتني رحت مع الشباب.
بندر: لا والله تبيني أبلش بهم الحالي وبعدين لاتنسى أن كل اللي بيروحون من محارمك أماأنا اللي بيروح من خواتي نوره وبس وأماالبقيه هم خواتك وبنات خواتك وبنات أخوك يعني المغثه جايتك رضيت أم أبيت.
خالد: أف الله يعين بس.
فجأه رن جوال بندر والمتصل أخته نوره رد عليها وقال: هاه يالمصلحجيه ركبتوا.
نوره: احترم ألفاضك.
بندر:أقول أخلصي علينا ركبتوا كلكم.
نوره:إيه كلنا ركبنا.
بندر: معكم الشاي والقهوه والحلا .
نوره: معنا كل شي.
بندر: حتى الكيس المليان حلويات.
نوره: هومعنا لاكنه مب لنالعهود.
بندر: أها...... طيب هي مومذوقتنا منه.
نوره: لا أقول أخلص علينا ملينا وحنا ننتظر.
بندر: يالله باي.
خالد : هاه بشر أركبوا كلهم.
بندر: إيه.
خالد: وأخيرآ يالله فم يارجال وورنا شطارتك بالسواقه.
بندر: خالد أبيك تسوق الفان.
خالد: ليه.
بندر: لاتنسى أني دايخ وراسي مصدع.
خالد: ليه عسى ماشرياخوي وش بلاك.
بندر: لابس تعبت من الدوران بالسياره وبعدين لاتنسى أني مفتر ساعتين في سوق الغنم.
خالد: أوكيه أجل انا اللي بسوق وأمري لله , أجل خلنا ندخل عشان أطلع الفان من الحوش.
بندر: لا أنت أدخل وطلع الفان وأنابنتظرك هنا.
(في الفان):
نوره: أف يقول جينا ولا جو.
عهود: منهو.
نوره: بندرمن غيره يعني.
ندى:بدق على عمي خالد.
عهود: لاتتعبين نفسك هذا هوشرف.
خالد: هلا صبايا كيفكم.
ندى: بخير بس ننتظركم.
خالد: أوه ريم ونوف بيروحون معنا.
ريم أستحت وغرام قالت: ياخالي عجل علينا.
خالد: وش عندها المسترجله.
غرام: ورانا تتطعيس وفلات.
خالد: أقول ريحي لاأحوسك.
غرام:جرب بس أنااللي بحوسك.
خالد:ههههههه جربي ترا تندمين.
نوف:أقول ياخالد يالله ودنا ترانا مبسوطين بالحيل.
حالد:هههههههاي إيه ماألومك و من قدق فاز الهلال أمس.
عهود: خالد ترا معنا نوره أخت بندر.
خالد طاح وجهه ظن أن اللي بالسياره بس بنات أخته وأخته وبنات أخوه مادرى أن نوره معهم فجأه رن جواله والمتصل بندر رد عليه وقال:هلا أناالحين طالع جيتك يالله سلام.
طلع خالد السياره وركب بندروقال: سلام.
خالد:هلا.
بندر: كيفكم يابنات.
الكل:تمام.
خالد: بندر أفتح درج السياره.
بندر: تصدق عاد ضاع مفتاحه.
خالد بهمس: بكيفه المهم وين بنروح حنا.
بندربهمس:والله مدري بس تصدق أن بر الشمال زين وش رايك نروح للعماريه ولاالدرعيه ولاالعيينه ولا رماح .
خالد: لايارجال بس وش رايك نروح للثمامه.
بندر: لا لا كلها شباب.
خالد:ياأخي البنات يبون دبابات.
بندر:أسأل وحده منهم ولا أقولك دق عليهم.
خالد أتصل على ندى وقال لها:عطيني عهود.
بندرفز قلبه وطالع المرايه يبي يعرف عهود في أي مقعد جالسه ولما عرف وين جالسه هي جلس يطالعها وهي ماتدري.
خالد:هاه عهود وين تبونا نروح.
عهود:لحظه خلني أفكرأمممممممم.... أقول بنات وين بنروح.
ندى بهمس: نبي الثمامه.
نوره بهمس: إيه قولي له الثمامه.
عهود:أوكيه بقول له, خالد الكل يبي الثمامه.
خالد:عاد بندر يقول أن الثمامه كلها شباب.
عهود:حنا نبي الثمامه ماعلينا من بندر.
خالد: خلاص سكري صرفتي علي.
بندربهمس:هاه وش قالولك؟.
خالد:يبون الثمامه.
بندر:يااخي كلها شباب وراك أنت, ماتغار على محارمك.
خالد:إلا أغاربس ماسكه بروسهم يبون دبابات وثمامه.
بندر:دق على الشباب شف وين راحو؟.
خالد:طيب وأمري لله.
البنات يتتساسرون لأنهم مايبون بندر وخالد يسمعون سوالفهم,
نوره: هاه بنروح للثمامه.
عهود: ماأعتقد.
نوره شهقت وقالت: ليه؟.
عهود: البركه في أخوك بندر.
نوره: ليه وش فيه؟.
عهود: حظرته رافض والسبب أن الثمامه كلها شباب.
نوره: عاد بندر إذا قال شي يسويه.
غرام: مب على كيفه بتصل على عمي سعود يقنعه.
نوره: لا لابدق على أخوي بدرهوالوحيد اللي يقدر يقنعه .
غرام: لاماأعتقد.
نوره: نسيتوا أنه أخوه التوأم والتوائم يفهمون بعض ويقدرون يقنعون بعض.
نوف: دقي عليه وش تنتظرين.
نوره أتصلت على بدرورد عليها مشاري أخونوف
قالت: هلابدر وينكم فيه حنا نبي نروح للثمامه وبندرعيا ألوه وش فيك ماترد.
مشاري: أااااا....أنامشاري تبين بدر لحظه شوي.
عهود: نوره وش فيك؟.
بدر: ألو مين.
نوره: هلا بدوري هلابحبيبي.
بدر: هاه يالمصلحجيه وش بغيتي؟.
نوره: حنا البنات نبي نروح للثمامه.
بدر: أيوه.
نوره: وبندر رافض يودينا للثمامه بحجه أنها مليانه شباب.
بدر: أها.
نوره: عاد أتفقنا حنا البنات نتصل عليك.
بدر: اخلصي وش المطلوب؟.
نوره:المطلوب نبيك تقنعه.
بدر: ماعلي منكم أنتوا أقنعوه أناالحين أسوق الجمس وماأقدر أركز وأنااسوق يالله سلام يامصلحجيه.
نوره: طيب حنا....ألوه ألوه, أبن اللذين سكر السماعه في وجهي.
عهود:ندى عطيني جوالك.
ندى:ليه؟.
عهود: بكلم خالد.
أتصلت عهود على خالد وخالدماأنتبه لجواله
قال له بندر:خالد جوالك يرن.
خالد:وش أسوي البنات طفشوني ياأخوي.
بندر:اقول رد ولاتهتم.
خالدرد على عهود وقالت له:خالد تكفى أقنع ولدعمك يوديناللثمامه.
خالد:أنتي عارفه بندرإذا قال شي يسويه.
عهود:تكفى أقنعه.
خالد:لحظه شوي, هاه بندروش قلت.
بندر:لا مستحيل ياأخوي الثمامه كلها شباب وهم بنات صعبه ياخالد لاتحاول.
خالد:عهود سمعتي وش قال.
بندرفز قلبه يوم سمع أسم عهود.
عهود:تكفا ياخالد اقنعه.
خالد:أقنعيه بنفسك.
خالدنطل جواله على بندر وقال:خذ غثوني كلمهم بنفسك وفهمهم اناطفشت من هالمسأله ياليتني رحت مع الشباب.
بندر: وش أسوي به.
خالد:روسهم يابسه ومايقتنعون وأنت تقدر تقنعهم .
بندر:ألو.
عهودأرتاعت وسكرت السماعه في وجهه.
خالد:يااخوي تكلم.
بندر:أنقطع الخط.
أتصلت عهودعلى خالد مره ثانيه بجوال ندى وقال لبندر:من المتصل.
بندر:مكتوب ندى .
خالد:يااخي رد عليها والله أنقرفت من هذي التمشيه.
رد بندر وقبل مايقول ألوقالت عهود:ألوه الحين انامليون مره قلت لك لاتسفهني, ياأخي حرام عليك والله أني متلهفه لهذي التمشيه ونفسي من زمان أروح للثمامه وأركب دباب ياأخي ماتحس ماعندك ضمير اناأختك عهودتك حبيبتك ليه تحرمنا من شي نبيه لأن ولدعمك رفض يخليك تودينا للثمامه ليه تحرمونا من شي نتمناه من زمان والله أنك قهرتني أنت وولد عمك .
بندرلزم الصمت وعهود ضايقه وتتكلم وهي معصبه ومن القهراللي فيها بكت في السماعه ويوم بكت ضاق صدره وبدون شعور بندر نسى نفسه وقال لهابصوت خافت:أناأسف ماكان قصدي أزعلك.
عهود أرتاعت يوم سمعت صوت بندروقفلت بوجهه السماعه.
خالد:وش قالوا لك البنات , ومن اللي كلمتك.
بندر تنهد وقال: اللي دقت يوم سمعت صوتي رمت الجوال على أختي نوره .
خالد: وش قالت لك أختك.
بندربضيقه: تبي الصراحه.
خالد:الزبده ياأخوي.
بندر:خلاص بكيفك تبي توديهم الثمامه ودهم أصلآ من زمان ماركبنا الدبابات.
خالد:غريبه وش اللي غيررأيك.
بندرحب يصرف الموضوع وقال:بصراحه أنا مواعد نوره اوديها للثمامه وهي ذكرتني بوعدي لها.
خالد:متى وعدتها.
بندربضيقه:أف ياخالد خلني بحالي تراك طفشتني بأسألتك,أقول دق على بدر شف وينهم فيه.
خالد:ياأخي ليه معبس وجهك ومعصب أضحك شوي لوعلى شاني.
بندرلزم الصمت ومارد على خالد وحس بتأنيب الضميروقال بينه وبين نفسه:ياليتني مافرضت رايي عليهم, ياألله ياليتني ماضيقت صدرهاأف وش السوات الحين شكلها خذت عني فكره شينه.
قطع تفكيره صوت رنين جواله والمتصل بدرأخوه .
بندر: هلابدر وش تبي.
بدر:بندرفيك شي.
بندر بضيقه: أخلص وش بغيت.
بدر:بندراناأخوك اعرفك زين أنت حاس بضيقه صدر.
بندر: أف مافيني شي وراك انت.
بدر: ماتقدرتخبي عني حزنك لاتنسى أنك اخوي التوأم.
بندر:أف والله ماني رايق لك , أقول خذ كلم خالد.
خالد:وراك ياخي نطلت جوالك بوجهي بغيت أصدم بالسياره اللي قبالنا.
بندر:اقول كلم بدر شف وش يبي.
خالد: هلابدر وينكم مالكم حس وبعدين وش ذا الإزعاج اللي عندك.
بدر: حنا بالثمامه وينكم.
خالد:قريبين منكم.
بدر:يالله سلام.
البنات يتساسرون مع بعض
ندى:عهود ليه بكيتي وأنتي تكلمين خالد.
غرام:ياأختي لاتلومينها من القهراللي فيها بكت.
عهود:أقول قفلوا على الموضوع.
بندررسل رساله لأخته نوره كتب فيها بنوديكم للثمامه بس لاتغثونا.
البنات من الفرحه أصرخوا ماعدا عهود ضاق صدرها لأن بندر قهرها.
وبعد عناء وصبرطويل وصلوا للثمامه والكل نزل لاكن بندر مانزل لأن صدره ضايق,
أماعهود جلست ورا ومادرت أن بندر في السياره, نوره جت مسرعه وقالت: عهود ليه مانزلتي الكل نزل إلا إنتي.
بندريوم شاف نوره جت نزل تحت المرتبه اللي قدام يبي يسمع كلام عهود.
عهود:الحين مافيه أحدبالسياره؟.
نوره:لا بس أنتي وش فيك ضايقه؟.
عهود:ياأختي أنامقهوره.
نوره:ليه مقهوره وش صاير؟.
عهود: العاده الإربعاء أحلى الأيام عندي إلاهالإربعاء كل المصايب جتني فيه.
نوره: وش صايرلك انتي.
عهود:أولآ صقعت في أخوك في الحوش الظهر وهزئني وغيركذا توسخت عباتي وثانيآضاع جوالي والقهرأن أرقام صديقاتي فيه وثالثآوهو اكبر قهرضاع دفترالتحضيرحق الجامعه والمصيبه أن فيه صورتي , كيف تبيني أستانس وكل هالأمور صارت لي.
بكت عهود وشالت الطرحه عن وجههاونوره ضمتها أمابندريطالعها من ورا المرتبه وهومقهورمن نفسه ,
جت غرام تركض وتقول: نوره تعالي بسرعه هناك فيه حصان كبير.
نوره صرخت وقالت:عهود أمسحي دموعك وتعالي موحلوه تقعدين ألحالك باالسياره , لاتجيبين لنفسك الشبهه يالله أنابأسبقك أمسحي دموعك وتعالي, يابنات لحظه أنا جايه.
راحت نوره وسكرت باب الفان وعهود تبكي وتحاول توقف دموعها ماقدرت أمابندر ماتحمل يشوفها بهذا المنظر طلع من تحت المرتبه اللي قدام وهومنزل راسه ويطالع بالأرض قال:عهودأمسحي دموعك ماأقدرأتحمل أشوفك وأنتي تبكين,أناأسف لأني سببت لك الحزن سامحيني, عهود لاتنزلين من السياره بعدي على طول عشان ماتجيبين لنفسك الشبهه يالله في أمان الله.
ونزل من السياره وهومنزل راسه وراح يجلس مع الشباب.
أماعهود قالت:أف ياربيه حتى هنا طالع لي.
نزلت عهود من السياره بعد نص ساعه من نزول بندر.
الشباب كلهم راحو يركبون دبابات وبندر جلس على الرمل وهومتضايق من نفسه ولماحس أن الجو برد قام شب حطب وجاء محمد مسرع بالدباب وفاتح فمه ومن الوناسه يضحك بصوت عالي وغبر على بندر لاكن بندر ماأهتم منه.
جلس بندربينه وبين نفسه ويفكرفي حالته ويفكربنفسه وهويطالع هبال الشباب وهم يتسابقون بالدبابات ويسأل نفسه ليه ماتضحك مثلهم ليه تحس بهم وضيقه صدر وليه إذا سمعت أسمها قلبي يفزلها ويخفق بسرعه معقوله تكون يابندرطحت في حبها.
فجأه قطع تفكيره صوت صراخ البنات وراح لهم وهويركض عشان يعرف وش السالفه.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بندر:نوره وش صاير؟.
نوره وهي تبكي: عهود أغمي عليها والمشكله أن وجهها مزرق لونه وهي الحين ماتتحرك أخاف أتكون ماتت.
بندرأرتجف جسمه وتلعثم وشال عهود وقام يركض بها للسياره ونادى الشباب عشان يحملون الأغراض وأركبوالبنات معه وراحو لأقرب مستشفى وهم في قسم الطوارىء مرتبكين ينتظرون الدكتور عشان يبشرهم عن حاله عهود
ويوم طلع الدكتورراح له بندروسأله عن حالتها.
بندر: كيف حالها يادكتور.
الدكتور:الحمدلله أننالحقنا عليها.
بندر:ليه وش صاير؟.
الدكتور: والله هي تعاني من أنيمياحاده والظاهرأنها ماذاقت شي وطلعت في جو بارد وجسمها ماأستطاع تحمل البرد وهذا الأمر أدى إلى إرتفاع حرارتها .
بندر:لاحول ولاقوه إلابالله طيب وش السواه يادكتور.
الدكتور:أنت خلهااليوم عندنا وانشاء الله إذا تحسنت حالها كتبنالها خروج.
نوره:بندر وش نقول لأمهاإذا رحناللبيت.
بندر: واحد من أخوانهابيعلمها, لأنهاكبيره باالسن وفيهاضغط وصعبه نفاجئها باللي صار.
نوره: طيب يابندر......
بندربضيقه: خلاص قفلي على الموضوع.
نوره: بس حنا....
بندر: خلاص ماتفهمين قولي للبنات يركبون السياره وأنتي أركبي معهم.
نوره: طيب فهمنا بس لاتنافخ.
جاء خالد وعيال أخواته وأخوه والشباب جوكلهم مسرعين.
خالد:بندر وش فيهاعهود.
فيصل:ياخي وش فيها عمتي.
مشاري:تكلم يابندر لاتفقع مرارتي خالتي عهود فيهاشي؟.
طلال بضيقه:تكلم ياخوي.
بندر: لابس يقول الدكتور أن فيها أنيميا حاده ومع الجوالبارد أرتفعت حرارتها.
مشعل:مافيه خطرعلى حياتها.
بندر: لا.
بدر: طيب ليه أنت متضايق؟.
محمد:لهاالدرجه يهمك أمرعهود.
بندرتوهق وحب يصرف الموضوع فقال لهم: ياأخي لاتنسى اني مانمت من الصباح واليوم مفتر4ساعات بسوق الغنم وتروشت والعصررحنا للثمامهوالحين ابتلشنابذا المصيبه وتبيني أبتسم وانا دايخ.
مشاري:ياشباب أذن العشاء خلونا نروح نصلي وواحد منكم يودي البنات للبيت.
مشعل:والله السياره من دون خالتي عهود ممله فأعذروني ياشباب ماراح أوديهم.
مشاري:أقول ياشباب اللي جابهم يوديهم.
خالد:أنا بجلس بالمستشفى إلين أطمن على حالتها.
بندر:أجل بجلس معك.
الشباب والبنات لاحظو أن بندر مهتم لأمر عهود ولمالاحظ أن نظراتهم كلها عليه حب يصرف الموضوع وقال:كنت بجلس عشان أسليك بس تبون الصراحه بروح أودي البنات لأني طافي بالحيل ودايخ بس ياليت يجي معي سعود.
سعود:ليه؟.
بندر:لأنك محرم لبنات أخوك وبنات خواتك يالله أنابسبقكم للسياره.
بدرهمس في أذن محمد وقال:غريبه...... أخوك اليوم فيه شي غيرطبيعي.
محمد: لا شكل اللي فيه بسبب تأثير ريحه الغنم.
بدر: لايامحمد أناأعرف وش في بندر.
محمد:وكيف عرفت وش فيه؟.
بدر:أولآ لاتنسى أني أخوه التوئم ثانيآأن أناوياه تكوننا من بويضه وحده وثالثآتفكيرنا واحاسيسنا وحده وقلبي وقلبه متشابهين
وأي شي يحس فيه بندر أناأحس به وهذا الإحساس جاي لنا من الله.
محمد:الزبده خلصناالرجال راح وانت تتفلسف.
فيصل: بدرأبسألك سؤال.
بدر:تفضل أسأل.
فيصل:الحين هذا الإحساس وشلون يصير.
بدر:إذا جاءمرض لبندربعد يوم أويومين أويمكن في نفس اليوم أمرض نفس المرض اللي هوجاه وأنابعيد عنه.
فيصل:يعني حتى في الحب, طيب إذا أنت حبيت وحده بندريحبها في نفس الوقت وهومايدري.
بدر:إيه.
فيصل: معقوله بدر أنت تتكلم جد.
بدر:وانت شايفني ألعب عليك.
محمد:طيب ليه ماتقولنا بندر وش فيه اليوم هوموعلى عادته.
بدريعرف أخوه وش فيه لاكن حب يصرف الموضوع وقال: مثل ماقلت يامحمد بسبب تأثير ريحه الغنم صارت حالته كذى.
فيصل:بدر أنت تتكلم جد فيمايتعلق بالأحاسيس شكلك تستهبل.
بدر:هذا الشي مايصير إلاللتوائم سوائآ كانومتشابهين أو لا.
فيصل:كلامك مايخش العقل.
بدر: خلاص اجل بجيب لك كتاب متخصص في هذا المجال وبتعرف أشياء تخوف وغير طبيعيه عن التوائم.
فيصل:ماراح أقتنع إلا لما أشوف الكتاب بنفسي.
فجأه رن جوال مشعل والمتصل وافي ورد عليه وقال:هلا وافي كيفك تمام.
وافي: الحمدالله وأنت عساك بخير.
مشعل:الحمدالله بخير.
وافي:دق علي عمي سعود ويقول أن عمتي عهود بالمستشفى عسى مافيها شيآ شين.
مشعل:لا بس أنيمياحاده وحرارتها مرتفعه.
وافي: إيه الله يشفيها.
مشعل:وافي حنا متوهقين .
وافي:ليه وش صاير.
مشعل:ياخي حناماندري وشلون نعلم جدتي والمشكله ان جدتي تعبانه مثل ماأنت عارف وحناماندري كيف نعلمها.
وافي:انا بتصل عليها وبقول لهابطريقتي.
مشعل:الله يعطيك العافيه وماقصرت.
وافي:انتوا خلكم طبيعيين وروحوللبيت اواطلعوا مع اخوياكم وخلوا الموضوع علي اليوم أربعاء فلوها وانبسطوا ترى الأنيمياء والحراره مب اول مره تجي عهود.
مشعل:خالد بيجلس معها.
وافي:اساسآ جلوسه ماراح يغير شي أقول بس أطلعوا من المستشفى وروحوا مع أخوياكم وبكره الصبح بيكتب لها الدكتور خروج.
مشعل:طيب خالد يبي يجلس.
وافي:بكيفه بس انتوا اطلعوا من المستشفى ترى مالها داعي وقفتكم في الطوارىء وخالد الدكتور بيقنعه يروح للبيت.
مشعل:أوكيه الله يعطيك العافيه ياحبيبي.
وافي:الله يعافيك يالله تامرني بشي.
مشعل: سلامتك.
وافي:يالله في أمان الله.
مشعل: مع السلامه.
(في الفان):
بندريسوق وهوفي حاله صمت ويقول بينه وبين نفسه:أنت السبب في اللي صار لها ليه سويت كذى يابندرليه سويت كذى والله البنت ماتستاهل ياحياتي والله ماتستاهلين اللي صارلك ياليته فيني ولافيك أه بس.
سعوديطالع بندر بنظره تعجب فحب يستهبل عليه وقال:الحلو ليه ساكت وزعلان.
بندرطنشه ولارد عليه.
سعود:أقول بندروش فيك.
بندرمازال لازم الصمت وسعود يحاول يكلمه يبيه يتكلم ولاتكلم , وبعد محاولات عديده فاشله لزم سعود الصمت واستسلم.
البنات يتساسرون مع بعض كالعاده,
غرام:يابنات أقص يدي كلها أن كان بندرمافيه شي.
ندى:أساسآ واضح عليه ان فيه شي غير طبيعي.
نوف: هومرهق لاتلومونه.
غرام:لاشكله يحب عهود.
ندى:لاماأعتقد.
نوره لزمت الصمت وهي تطالع بندرمن بعيد وهي تقول بينها وبين نفسها: أول مره أشوفك ياخوي بهالحاله شكلك فعلآ يوحي بأنك تحب عهود معقوله يانوره أخوك يحب عهود؟...لا لا لاتظلمينه يمكن هو متضايق من شي ثاني...بس هويوم شاف عهود مغمى عليها أرتاع روعه شينه وشالهاوركبهابالسياره وهوخايف عليها....أساسآ عهود دايم تجيهاالحراره والأنيميا وتتنوم بالمستشفى ولايهتم لاكن هالمره غيرشكله حبها.
قطع تفكيرها صوت غرام وهي تقول:نوره وش فيك سرحتي ساعه أكلمك ولاأنتي يمي.
نوره: وش بغيتي مني.
ندى:كنا نتناقش في موضوع أخوك بندر.
ريم:خلاص يابنات حكمتوا على بندروعهود بشي ماأقترفوه يمكن يكون بندر تعبان ودايخ ماتدرون بالظروف صح ولاأناغلطانه.
غرام: أخيرآ تكلمت الدلوعه.
ريم: غرام خلاص أنتي موطفله أسلوب الدفاشه هذا خلاص أنسيه.
غرام:خلك بأفلامك الهنديه أحسن لك ياريم.
ريم:الحمدلله اللي عافاني ممابلاك.
ندى:أقول تتوقعون أن بندريحب عهود يابنات شوفوا شكله حاط يده على خده ومتسندعلى الباب شكله يهوجس.
ريم:بصراحه أنادايم أشوف أفلام هنديه وإذا حب البطل البطله وصارمهيوم فيهاوفجأه أمرضت حبيبته تطلع في عيونه نظره تدل على أنه يحب حبيبته وضايق صدره عليها وهذي النظره أناأشوفها الحين في عيون بندر.
نوف:قصدك لمعان العين وكأن فيها دموع والسرحان.
ريم: إيه.
غرام:من قدك ياعهود فيه أحد يحبك.
نوره حبت تصرف الموضوع فقالت:لاحب ولاهم يحزنون بندراليوم مفتربسوق الغنم 4ساعات وراح للجامعه وهومواصل وهوالحين دايخ ويبي ينام لأنه مرهق أناأعرف أخوي زين إذا صار مرهق تصير ملامحه كذى.
نوف:إيه صادقه نوره ترى حرام كذا نتهمهم وهم ماسوو شي.
نوره:خلاص قفلوا على الموضوع وفكروا كيف نتصرف مع أهلنا إذا اسألونا عن عهود.
(في الجمس):
الكل ضايق صدره على عهود إلامحمد وبدر يسولفون.
محمدبإستهبال:الحين ذي مالقت إلاهاليوم تمرض فيه.
مشعل:محمدلايكثرماأرضى أنك تتكلم على خالتي.
محمد:ياأخي لاتلومني كنا مبسوطين نطعس ونتسابق ونستهبل ومستانسين مره وفجأه سمعنا بندرينادينا والبنات يصارخون ياأخي وش تبيني أسوي أصيح وأحزن الحين يوم جاهاأنيميا حاده وإرتفاع حراره حزنو عليها أجل إذا ماتت وش بيسون بينيحون ويشققون ثيابهم.
مشعل:محمدأسكت مادام النفس عليك طيبه.
مشاري:لاتفقع مرارتي بدلاختك يامحمد.
عبدالعزيز:لاتتفاول على عمتي لاأقوم أتوطى بطنك هنا.
محمد:وش تبوني أسوي تبوني أصيح وأحزن معكم يعني.
بدر: لابس راعي شعورهم وحاول تونسهم.
محمد:لا شايفني مهرج ولاشايفني واحد مهبول.
فجأه دق خالد على طلال ورد عليه وقال: هلاخالد طمني على عهود عساها بخير.
خالد:أنخفضت حرارتها وسيطروا على الوضع .
طلال أبتسم وقال: بيطلعونهااليوم.
خالد:الدكتوركتب لها خروج لاكنه يقول الأفضل أنهاتنام اليوم بالمستشفى وبكره بيكتبون لها خروج.
طلال ضحك وقال:الله يبشرك بالخير طيب أنت الحين وينك؟.
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك