رواية صوت دقات الخوافق -13
حس قلبه بيوقف دكتور !! شو صار ليكون ماتت هي بعد : انا . . . . اخوها
دكتور : يالها انهيار عصبي و هي مرقده فالمستشفى كانت جدام العنايه
يلس ع الارض بعد ما هدت دقات قلبه : خلاص احينه ياي
رفع راسه لما سمع حد يناديه شاف منصور بلبس الكابتن ياي صوبه
منصور بغصه : يعني صدق !!! مات سعيد
وقف و راح حضن منصور اللي صاح بصمت : انا ساير المستشفى ميره يالها انهيار عصبي
بعد منصور و مسح دموعه : ميره هني !!
نهيان : هيه راحت عند سعود فالمستشفى عشان تشوفه و شكلها تاثرت وايد بروح اشوفها
منصور : توكل
خذ سياره منصور و راح المستشفى و هو يسال عمره . . ليش يالها انهيار عصبي ؟! ليكون سعود ستوى به شي ؟!
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت السابع عشر
( عنصر جديد !! )
وصل المستشفى و ركض سأل عن سعود و خبره انه ع حالته ما تغير شي زفر براحه و راح عند ميره شافها نايمه ع سرير ابيض و دموعها ناشفه ع خدها . . مد ايده و مسح ع خدها . . شو فيج يا ميره كل هذا عشان سعيد !! لا فيج شي ثاني و سالفه سعيد و سعود زادت عليج . . تنهد قعد ع الكرسي فالحجره و هو يطالعها بصمت كانت حجه عشان يبتعد عن جوو العزا شوي . . حس بصوت سعيد يرجع له غمض عيونه و تعوذ من بليس و خذ نفس انتبه لما حس بصوت طالعها كانت تتحرك فقام وقف عند السرير و فتحت عينها طالعته و رفعت نظرها طالعت السقف و ملامحها . . بارده , جامده , بلا روح . .
همس : ميره
بس ما تحركت بعدها جامده مد ايده و مسك ايدها و رص عليها بس ايدها ما تحركت حس بشويه شكوك و كرده فعل رفع اصبعه و حطه مكان النبض ع معصمها كانت تنبض بس ليش ما تتحرك !! طلع بهدوء و سأل عن الدكتور وراح مكتبه
نهيان : انا اخو ميره عيسى اللي يالها انهيار عصبي
دكتور ابتسم : هلا
نهيان : ممكن اعرف كيف حالتها احينه !! ما تتجاوب ويايه جنها . . بيلا روح
دكتور : يالها انهيار عصبي و النتايج غير متوقعه ممكن اعرف شو صاير ؟!
نهيان : اخونا توفى و الثاني مطعون فالعنايه
دكتور : قراب منها واايد !!
نهيان : عادي لا قراب و لا بعاد هي الشهور الاخير كانت مسافره و يا ريلها يكملون دراستهم
دكتور : انزين ريلها كيف يعاملها !! يعني ممكن هو سبب التراكم
نهيان عقد حواجبه و تذكر كلامه " عبدالله فالمستشفى " : قالت انه هو فالمستشفى بس ماادري ليش
دكتور : يمكن مريض !!
نهيان هز جتفه : مااعرف
دكتور : ع العموم انا بشرف ع حالتها و بكلمها
نهيان : مشكور
قام و طلع و راح صوب غرفه العنايه كانت الساعه 5 العصر لازم يتريون لين الساعه 12 الظهر عشان يتعدى مرحله الخطر . . خذ نفس حس ان شل هم اكبر عنه يحسه بثجيل ع صدره . . حس بهزه الفون فطلعه من جيبه ( شويخ يتصل بك )
ابتسم ورد : مساء الخير
شيخه : مسا النور حبيبتي . . شحالك ؟!
تنهد : شو اقول و شو اخلي الحمدالله ع كل حال
شيخه : نهيان لا تفكر واايد ريح اعصابك . . وينك احينه ؟!
نهيان : فالمستشفى ميره يالها انهيار عصبي
شيخه بصدمه : خيييير !!!!!!
نهيان : شيخه تعالي و خلي خوالج ايون انا ما اروم اشيل كل هذا ميره تعبانه
شيخه : فاي مستشفى ؟!
نهيان : نفس المستشفى
شيخه : خلاص فديتك مسافه الطريج
سكر عنها و سند راسه ع اليدار و غمض عيونه . . يبي ينام يبي يغرق فعالم ثاني غير اللي عايشه احينه بس هب رايم من البارحه هب راقد حاول يرقد بس ماشي فايده قام خذله قهوه سوده و راح لحجره ميره شافها متسدحه ع ينبها اليسار و مثبته عينها ع الفراغ يلس بهدوء و ويهه مجابل ويهها . . حس بهزه فجيبه و طلع فونه كانت شويخ عطاها رقم الغرفه والطابق و خلال دقيقه كانو فالحجره . .
يلس صقر ع السرير و حط ايده ع جتفها يبي يلفت انتبها انه هو موجود بس ما تحركت فسحبها برقه و حضنها و هي كانها لعبه تنشال و تنحط و ما تتحرك حضنها بقوه بس ما تحركت . . كان يبها تصيح تصرخ تنفعل تسوي اي شي يثبت ضعفها و حاجتها لهم . . رجعها ع السرير فتحركت لفت صوب اليسار
صقر : شو فيج حبيبتي ؟!
ما ردت عليه . . طالع نهيان هز كتفه بمعنى انه ما يدري . . مشى يوسف صوبها و انحنى باسها ع راسها و مسح ع خدها
همس : عظم الله اجرج
الكل توقع انها بتصيح بس مافي اي رده فعل . . و يت شيخه سلمت عليه و عزتها
نهيان : يا المعاريس يلا انتو وراكم عرس بعد يومين
صقر : ماشي عرس اجلناه
نهيان عقد حواجبه : ليش ؟!
صقر : افا يا نهيان ترانا اهل
نهيان : صصقر ماله داعي
صقر : امبله له داعي نحن اهل و سعيد اخونا
يوسف حط ايده ع جتف نهيان : بنعرس رباعه ان شالله
نيهان حضن يوسف اللي تبطبطب ع جتفه جنه يحثه انه يطلع كل اللي فقلبه و مع الوقت انسمعت صوت شهقات خفيفه من نيهان مما خلى شيخه تصيح وياه و يوسف ادمعت عينه اما صقر راقب ميره اللي متحجره فمحلها ضيق عيونه وده يدخل فمخها ويعرف شواللي معذبنها شواللي مخليها توصل لها الحاله . . سكتهم رنه الفون الكل التفت للفون اللي ع الطاوله اللي ينب السرير كان فون ميره فمدت ايدها و شافت المتصل بس ما ردت و حطت الفون ع الطاوله . .
،
كان . . عبدالله اتصل اكثر من ثلاث مرات و الكل ساكت يطالعني بس ما رديت ما عت ابي اسمع اخبار اي احد ماابي اعرف اذا سعود بيقوم و لا بيموت و ماابي اعرف اذا عبدالله بيموت و لا بيعيش و ماابي اعرف اي شي عن اللي حولي . . ابي انساهم ابي حبهم فقلبي يقل و يكونون فحياتي و لا شي كلهم كلللهممم . . قلبي تحمل واايد و تعب خلاص هب راميه اتحمل اكثر انا انسانه و لي حدود و هاذي حدودي . .
امايه شوفي حالي نايمه فالمستشفى و ريلي مريض و اخوي مات و اخوي الثاني فالعنايه و انتي رحتي و ابويه راح و غربتي . . و يبوني اتحمل ما عادت فيني قوه يا اميه انتي اكيد حاسه فيني صح !! اكيد انتي امي و اكيد حاسه فيني تصدقين ودي اصيح بس احس الدموع نشفو كلهم يصيحون حولي يا اميه بس ما احس اني ابي اصيح وياهم . .
حاسه بتبلد و جمود غريب داخلي احس اني بدون قلب . . بدون احساس شي صعب و مريح . . سمعتهم يكلموني و صقر يسالني ليش ما ارد ع عبدالله بس ما عطيت اي رد فخلنو بروحي و طلعلي . .
،
مر شهر على نهياري العصبي و انا لين احينه عايشه البرود و التبلد و عدم الاهتمام بحد . . رجعت لندن و عبدالله حالتها متحسنه و سعود . . سعود هني معاي فلندن لما وعى محد قدر يقوله و انا بكل برود خبرته بموت سعيد تعب و صاح و طلب اني اخاذه معاي لندن لانه يبي فتره يبتعد عن ذكرات سعيد و المكان اللي كان يجمعهم بس بعده الكئابه ما راحت عنه . . ازور عبدالله فالاسبوع مره و فكل مره يسالني و يحاول انه يتقرب مني بكلمات حلووه و لمسات دافيه بس ما استجيب لشي و اظن انه سعود قاله شو صار فيني و يقول كل يوم شو اسوي لانه بعد ما انا اطلع منه يتم سعود ويا عبدالله عشر دقايق و ما شفت اي علامات زعل من برودتي ع ملامح عبدالله . .
طلعت من حجرتيه و رحت الحجره الثانيه اللي كانت صاله صغيره صارت حجره لسعود دقيت الباب و دخلت وعيته و قام يتسبح و يتلبس لانه يداوم فالمدرسه بيكمل هني . . نزلت تحت عشان اسوي ريوق طلعت جبن و مربى و عسل و سويت الجاي و فورت البيض و من استوى البيض و شفته و شميت ريحته حست بلوعه حاولت اني ما افكر فيلست و كلت و يا سعود و كل خلاف قمنا هو راح يشل كتبه و انا غسلت المواعين ع السريع و ردت لي اللوعه و ها المره ما قدرت ركض للحمام ورجعت . .
طالعت ويههي فالمرايه كان اصفر ليكون مرضت !! طلعت من الحمام شفت سعود واقف
سعود : شبلاج ؟!
: ماشي رجعت
سعود : مريضه !!
: يمكن خذ مفتاح السياره و شغلها
كان مفتاح السياره ع الطاوله خذ المفتاح و طلع و انا رحت فوق لبست شيلتي و نعالي و خذت شنطتي و طلعت ركبت سيارتي و وصلت سعود المدرسه و رحت الجامعه هناك شفت فكيتوريا حتى هي ما سلمت من برودي واايد تسألني لكني ما ارد عليها بس مع ذالك ربيعات
فكيتوريا : هل انتِ بخير ؟! تبدين شاحبه !!
: استفرغت اليوم ربما مرضت
فكيتوريا : اذهبي الى المشفى
: ان شعرت بالسوء سأذهب
فكيتوريا : انك تهملين نفسك
: مجرد اعياء لا تقلقي
اليوم سعود بيرجع ويا الباص لانه عندي كلاس لساعه 5 العصر و طول ها الوقت ما كلت شي احس اني برجع . . سويت العشا مبجر اليوم و تعيشنا و نفس الحاله رجعت تذكرت عبدالله و ترجيعه ورى كل اكل خفت يلست ع ارضيه الحمام بخوف ليكون ياني سرطان !! بس هو ما يعدي بس يمكن انا بعد ياني . . لا لا اعوذ بالله من الشيطان الرجيم . . احس اني يوعانه و من اكل ارجع و عبدالله كان يحس انه ما يشتهي و اذا كل يرجع . . هيه انا مافيني شي قمت طلعت من الحمام و تسدحت ع السرير و رقدت بسرعه
،
وعيت الصبح و انا لايعه جبدي رحت رجعت معنه بطني فاظي بغيت اطيح فالحمام لانه دار راسي . . لا انا فيني شي فيني شي لازم اروح المستشفى نزلت تحت سويت ريوق و وعيت سعود هو تريق بس انا لا
: كل ما كلت ارجع لايعه جبدي
سعود : انزين كلي يمكن لانج يوعانه
: كل ما اكل ارجع مااقدر اكل
سعود : ميره انتي فيج شي !! روحي المستشفى
: بروح ان شالله قوم بوصلك
قمت غسلت الصحون و لبست شيلتي و قررت ما احضر اليوم بروح المستشفى . . وصلت سعود و رحت المستشفى و دخلت عند الدكتور اللي طلب مني تحليل دم و تريت ساعه تقريبا لين ماتتطلع النتايج . . اكيد فايروس و برقدوني بيركبولي سيروم اووف مشوار طووييل تميت يالسه اتريا حالي حال غيري لين ما يا دوري و ظهرت النتايج بس حولني ع دكتوره ثانيه
دكتوره ابتسمت : انتِ حامل
طالعتها بدهشه حامل !!!!!
دكتوره : هل انتي عزباء !!
بغيت افلعها بالمزهريه اللي ع الطاوله : لا متزوجه
دكتوره : اوه حسنا انتِ في شهرك الاول سأكتب لك بعض المثبتاات و الفيتامينات
حامل !!! طالعت بطني ليش ليش يا ماما ليش !! انا اخاف احب اللي حولي و انت اتي و تزيد عليه تباني اتولع بك و انت بعدك فبطني تباني اخاف دوم عليك حتى و انت فبطني حبيبي والله قلبي ما يتحمل . . ارحمو حالي يارب يارب قويني يارب . . سحبت ورقه الادويه و طلعت و ركبت سيارتي خذت نفس اللي داخلي صار يربطني فعبدالله اكثر
همست : والله احب ابوك بس خايفه وربي خايفه . . خايفه يختفي والله ان اختفى بضيع حبيبي شو رايك اخبر بابا و لا بعدين !!
رحت الصيدليه و خذت الادويه و رجعت البيت كلت لي شي و خذت الادويه وراهن و رقد . .
،
فتحت عيوني بكسل و طالعت الساعه كانت 6 المغرب فزيت امبيه سعود !! طلعت من الحجره و نزلت تحت شفته يالس تحت يذاكر
: انا اسفه ما مريت عليك و لا سويت لك شي تاكله رقد
سعود : هب مشكله لا تحطين فبالج
: اسسفه بروح اصلي و اسويلك عشا
سعود : رحتي المستشفى ؟!
وقفت : هيه رحت
سعود : شو طلع فيج .!
ستحيت اقوله ماادري ليش بس حسيت باحراج : حـ . . حامل
سعود ابتسم : مبرووك
: الله يبارك فيك
رحت صليت الظهر و العصر و المغرب و سويت له عشا و تعشينا بس ما وحالي اتهنى بعشاي الا و انا مطلعته . . ليش ماما ابي اشبع والله يوعانه كل ما كلت اطلع يا حبيبي هب عايبنك الاكل يعني !!!!! بس مااحس اني مشتهيه شي معين . . فجأه يا فبالي اكل رمان خاطري رمان فتحت باب الثلجه حصلت اشوه ما خلص طلعته و بديت اقشر و كلته بشهيه مفتوحه و ما حسيت بلوعه وييي حبيبي خاطرك فرمان هههههههه احس اني خبله و انا ارمسه و هو بعده فبطني . .
رحت يلست فالصاله سعود كان يالس و يذاكر اكثر وقته مكرسه فالدراسه ادري به يحاول ينسى . . آآآآه يا سعود مهما حاولت بي يوم بتألم و مستحيل تنسى انا اللي ما اذكر امايه اتالم لفراقها الدنيا جذا يا سعود الدنيا جذا . .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الثامن عشر
( احتاجك )
يلست ع المنشفه اللي فارشتها ع ارضيه الحمام حاسه بدوخه قويه و هاذي ثاني مره رجعت ياربي وحامي صعب . . عضيت ع شفايفي يا ريتج يا اميه هني تساعديني فحملي و تقوليلي سوي جذا ولا تسوين جذاك . . كلي هذا و لا تاكلين هذاك وربي هب رايمه ادبر اموري بروحي يالغاليه انا وحيده عبدالله هب حولي و سعود له همه و بعيده عن امايه مهره و عن يدووه . . مسكت المغسله و وقفت شوي شوي و طلعت من الحمام رحت تسدحت ع سريري . . ابي ارجع الامارات ابي الكل حولي و يدير باله علي خاايفه اخاف اسوي شي يأذي البيبي و اكل شي المفروض ما اكله و شو اللي بيساعدني عشان ابعد اللوعه عني . . مسكت فوني اتصلت فيها بدون تردد
: سلام عليكم
امايه : و عليكم السلام هلا بنتي شحالج ؟!
: بخير فديتج انتي شحالج و اخواني و حمود ؟!
امايه : كلنا بخير فديتج شخباره عبدالله ؟!
: الحمدالله
امايه : و سعود !!
: بخير كل وقته يقضي فالدراسه يالس يشد حيله لا تحاتينه يالغاليه . . اتصل بج ؟!
امايه : هيه فديته يتصل كل يومين
تنهد : امايه
امايه : امري فديتج ؟!
: انا . . . حامل
امايه : مبروووك حبيبتي تستاهلين الف مبروك
: مااعرف شو اسوي خايفه
امايه : ليش يا اميه ما في شي يخوف قوليلي كيف وحامج ؟!
: كل ما كلت شي ارجعه و تلوع جبدي من واايد اشياء و ارقد واايد .. اميه اخاف اتحرك اخاف يستوي شي لبيبي
امايه : لا توسوسين بس لا تتحركين واايد و بسرعه لا تركضين و . . .
بدت تهل عليه بالنصايح و انا اسمع بحذر ابي احفظ كل شي تقوله . . و بعد نصايحها خبرتها عن مرض عبدالله و حلفتها ما تقول لحد و نصحتني اخبره اني حامل يمكن يكون له دافع اقوى عشان يكمل العلاج . . ارتحت واايد لما رمستها قمت شوي شوي احاذر فحركتي رحت بدلت لبس شي مريح و لبست حجابي و طلعت نزلت تحت
: سعودي بروح اشوف عبود بتي ؟!
طالعني بذهول هههه : هاا !!
ضحكت : بروح عند عبود بخبره بالبيبي
ابتسم سعود : لا روحي انتي
طلعت و انا متحمسسه ركبت السياره رحت المستشفى و نزلت رحت لحجرته شفت نايمه شكله واايد تغير . . شعره طاح و ضعف بزياده و شكله صار باهت بعده علاجه ما خلص بس قاعد يتحسن الحمدالله . . قربت و يلست ع طرف السرير و مسكت ايده النحيله و شبكت اصابعي باصابعه ابي يستانس ابي يفرح و يكون عنده الاراده القويه عشان يتعلاج و يقوم بالسلامه و يشيل ولده و يسميه هب مهم ان كان ولد او بنت . . حبيبي المهم انه قطعه منك تميت يالسه نص ساعه لين ما صحى ابتسمت . . كانت اول مره ابتسم فيها بعد الانهيار هيه البيبي غير نفسيتي ابي اعيش عشانه و عشانك . .
عبدالله بتعب : يا حلاه ها الصباح بشوفتج غناتي
ابتسمت : هلا حبيبي شحالك اليوم ؟!
عبدالله : الحمدالله ع كل حال . . فديت ها الضحك يا ناس
نزلت راسي مستحيه حسيت باصابعه تمسح ع ايدي و قال : اشتقت لج
طالعته : البيت بدون ما يسوى و حياتي فاظيه بدونك
ابتسم عبدالله و مد ايده الثانيه مسح ع خدي
: عندي لك خبر
عبدالله : ونسيني
مسكت ايده و حطيته ع بطني صح ما بيحس بشي يعني ماشي انتفاخ و لا حركه بس اكيد بيفهم
انصدم عبدالله خفت . . بس شوي شوي بدت ابتسامته تكبر و تكبر
عبدالله : حلللللللفي
ضحكت : والله
عبدالله : عشان جذا ويهج اصفر يا عمري ؟! انزين لا تتحركين واايد وكلي عدل و ارتاحي
تنهد : ولدك هب مخليني فحالي مااروم اكل شي الا واطلعه و احس بالملل بسرعه و ارقد واايد ههه
عبدالله : هههههه يتغلى ما عليج منه اممم اكيد فشهرج الاول ؟!
هزيت راسي بهيه
عبدالله : ان شالله اقوم بالسلامه و اكون وياكم
شديت ع ايده : امييييين
،
لبس كندورته البيضه و حط قحفيته ع راسه و شل الغتره و العقال و حطهم ع راسه بدقه . . رش العطر الرجالي ع ملابسه و مسك دهن العود و مسح ع رقبته و ورى اذنه . . سحب بوكه و مفتاح سيارته و حطهن فجيبه بس قبل ما يحط فونه فجيبه رن بأسمها
ابتسم صقر و رد : مسا الخخيير
وصله صوت عهود باكي : صقر طلبتك صصقر تلاحق عليه
صقر انقبض قلبه : خير شو مستوي بلاج تصيحين ؟!
عهود : ابويه طاح علينا ما يتحرك دخلييك صقر تعااال
صقر طلع من الحجره : خلاص هدي عمري . . لا تصيحين ياعمري اهدي و لا توترين امج مسافه الطريج و اكون عندكم
عهود بصياح : بسرعه الله يخليييك
نزل الدري مثل هبه الريح و ركب سياره بسرعه و شخط لبيت عمه ابو حرمته . . و بثلث ساعه وصل البيت اتصل بها و خبرها انه فالبيت بلغته انه ما يتحرك فدخل بعد ما تنحنح و راح فوق لحجرته عمه شافه منسدح بدون حراك . . ريال قصير و نحيف و الشيب تارس راسه و ماله غير ها البنت و ها الحرمه اللي يابو ها البنت ع كبر . . فتح غترته و لفها عدل ع عقاله و بكل قوه شل الشايب بين ايدينه و نزل فيه الدري و حطه فالسياره و عهود ركبت جدام و امها يلست ورى و راس بو عهود ع فخذها . . حرك السياره للمستشفى بسرعه و هو يسمع صوت صياحها مد ايده و مسك ايدها يطمنها و هو يسرع . . و اول ما وصل ركض طلب نقاله و دخلوه للقسم الطوارئ
قرب من عهود المتغشيه : حبيبتي اهدي انتي جذا توترين امج وياج ان شالله ما في شي
عهود همست : خاايفه طاح مره وحده ماادري شو يااه
صقر : ان شالله شي بسيط و بيعدي اذكري الله
عهود : لا اله الا الله . . يارب اشفيه
مسك جتفها و يلسها ع الكرسي عند امها اللي تتدعي بصوت هادي و هب شايف ويهها مول من النقاب غير عيونها الغرقانه . . تنهد تم واقف و هو مجتف ايده لين ما ظهر الدكتور من غرفه الكشف فتجدم و عهود و امها وقفو فمكانهم
صقر : بشر ؟!
دكتور : ارتفاع فالسكر و قدرنا عليه شي بسيط لا تحاتون بس من اليوم و ساير لازم ياخذ ابر الانسولين و ينتبه للسكر
صقر : يعني مافي شي جايد
دكتور ابتسم : لا تحاتي حتى تقدرون تاخذونه
صقر ابتسم : تسلم
دكتور : واجبنا
التفت و راح عندهم : ما قلتلكم مافي شي بس ارتفاع فالسكر و السكر صار مثل الانفلونزا و من اليوم و ساير بياخذ ابر
عهود : يعني هو احينه بخير ؟!
صقر ابتسم : هيه حتى نروم نظهره
ام عهود : الله يبشرك بالخير ياولدي و جزاك الله الف خير ما قصرت
صقر : ولو عمتيه هذا واجبي
ام عهود : ياولدي اكيد مافي شي يعني عادي نظهره !!
صقر : هيه عمتيه نروم مافيه الا العافيه
دخلوا ع بو عهود اللي منسدح ع السرير بضيج : ياولديه ظهروني من هني ريحه المستشفى تيب المرض
تقرب صقر و هو مبتسم باسه ع راسه باحترام : سلامتك يا عمي سلامتك
بو عهود : مافيني شي ترى يقصون عليكم الا يبون بيزات بعطيهم اللي يبونه بس لا يطلعون فيني عله
ضحك صقر من تذمر عمه
عهود الباكيه : خوفتني عليك ابويه " حبت راسه "
بو عهود بحنيه : مافيني شي فديتج اجرب غلاتي
ام عهود تمسح دموعها : غلاتك معروفه هب لازم تجرب
بو عهود مد ايده و صقر مسك ايده : يلا ولديه ظهرني مافيني شي يقول سكر بلا سكر بلا هم
صقر ابتسم : بس عمي لازم تاخذ ابر السكر
بو عهود تنهد : امري لله . . تعبناك ويانا يا ولديه تسلم جزاك الله الف خير
صقر : واجبي يا عمي انتو اهلي و لا تقولون تعبانك
،
ابتسم و هو يشوف محمد يرمس بالفون : انزين عذبه بتييين بيتناااا
عذبه ضحكت : ان شالله بي حبيبي قولي زعلت بابا !!
محمد طالع منصور : لا ما زعلته انتي زعلتي يدوتج !!
عذبه ابتسمت : لا حبيبي ما زعلتها لاني احبها ماابي ازعلها
محمد : حتى انا احب بابا . . انزين متى بتيين ؟!
منصور ضحك : خلاص طفرتها بتي ان شالله ليش مستعيل
محمد : متى بلبس البشت وياااك !!!!
منصور ابتسم و همس : حبيبي عمك سعيد مات تعرف صح ؟!
محمد ودر الفون : هيه مات ما نقدر نشوفه مره ثانيه
منصور مسح ع راسه : صح عشان جذا ما يستوي نسوي عرس احينه بعدين بنسوي
محمد هز راسه
شل منصور الفون : الوو
عذبه بخجل : هلا
منصور تنهد
عذبه : اذكر الله . . هب زين اللي تسويه يا منصور ادعيله
منصور : فكل صلاتي ادعي له بس ذكرى هب رايمه تروح و زاد علينا روح سعود للندن
عذبه : هو يبي يشرد من شبح سعيد لانه ها البيت يذكره به
منصور : بس ما بيتم فلندن طول عمره مرده يرجع
عذبه : يمكن اذا رجع تكون جورحه برت
منصور تنهد : ان شالله
سمعت عذبه صوت يدتها تناديها فسكرت عن منصور بعد ما ودعته . . فشل محمد و نزل تحت صدق البيت صار هادي و كئيب بعد سعيد و سعود . . واحد مات و الثاني هاجر و ما هتمو باللي حولهم هم متألمين اكثر لفقدهم اثنيناتهم . . شاف امه يالسه و نهيان ينبها و اثنيناتهم سرحانين كلن بعالمه طالع نهيان بألم اللي لين احينه هب رايم تخلص من كوابيس اصوات سعيد اللي اتيله كل ليله . . نزل محمد ع الارض اللي راح و يلس فحضن يدته و قومها من سرحانها . .
،
تسدح ع السرير و الفون فأذنه و هو مبتسم . . يحس اعجابه بها يزيد كل ما زاد خجلها يوصله صوتها بهمس و خجل و اذا تغزل بها تسكت و يضيع كل الكلام وتتلعثم . . يحب اذا قعد عندها يمسك معصمها و يبدا بجس النبض و مع كل كلمه حلووه يزيد نبضها و يزيد حمره خدودها
يوسف تنهد : فديييت ها الصوت و راعيته
سكتت و هي مستحيه من كلامه
يوسف : حياتي . . عمري . . قلبي . . عيوني
صرخت بهمس : بسسسس
ضحك بصوت عالي : ياقلبي ع اللي يستحون . . قوليلي خدودج صارن ورديات و لا حمر حمر
سمع صوت ضحكه خفيفه : ماادري
يوسف : احينه تبين تينني و لا تينني !! سمعي بيج اليوم لازم اشوفج
شهقت : لااا بابا شو بيقول من يومين انت عنا
يوسف : ابوج عطاني الضوء الاخضر قال لو تبى تاخذها بعباتها خذها
روضه : مسستحيل بابا ما يقول جذا
يوسف ضحك : قلتي جمله كامله
روضه ضحكت بخجل : يوسف مطره اسكر بروح اغير الماي لاخويه المسخن
يوسف : ما يشوف شر انزين عطي مسكن
روضه : عطيته حراراته مرتفعه و لازم احط كمادات متعوده كلها يومين و بيرجع شرات الحصان
يوسف : ان شالله عيل ما اطول عليج فديتج
روضه همست : مع سلامه
يوسف : ربي يحظفج
،
يلس بكل اريحيه ورى مقود الطياره . . حاليا حالته تسمح يسوق الطياره يتذكر كل شي و هب خايف من انه ينسى شي و بعدين المساعد يالس ينبه في حال احتاج يتذكر شي و اقعلت الطياره فثبت كل شي و ركز . . تنهد و هو يتذكر حال ميره اخر مره شافها فيه لما شافها تصيح جدام العنايه و فالبيت كمن مره شافها بس هي ما شافته حاول قد ما يقدر ما يظهر جدامها خلاص لازم ينساها و هي لازم تنسى و هب المفروض تشوفه احينه ع اقل هب قبل ما يتزوج و يثبت لها انه صارت شي من الماضي بس ماضي حلوو ولو بيده يرجعه و يعيشه بشكل صح و تكون حليلته . . بس مستحيل الزمن يرجع و هي هب من نصيبه . .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الأخير
( عمر جديد )
خلصت الجوكليت الثالث . . مديت ايدي و سحبت شبس و فتحته و بديت اكله
صرخت فكيتوريا : هذا يكفي ستنفجرييين
حطيت الشيبس فحلجي : اشعر بالجوع ان طفلي جائع
سعيد طالع فكيتوريا بحقد : لا شأن لكِ في ذالك دعيلها تأكل ما تشأ
ابتسمت : فدييت الله يدافع عني
فكيتوريا : لا لن أدعها تاكل ما تشاء فهذا ربما سيضر الطفل
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك