رواية صوت دقات الخوافق -8
شل ايده عني و خطف جدامي .. يلست ع الارض من الزيغه .. بيتزوجها !! بتتحطم اذا عرفت انه يحبني و ما يباها و فوق هذا بيجذب عليها عضيت ع شفايفي بغضب خلي يجرب يسوي جي والله برويه شغل الله .. قمت احاول اقوي عمري و حدرت حجره بشرى اللي صوت ضحكها عالي .. يعلها دوم ها الضحكه اااه ياربي ..
بشرى : ميره شبلاج !!
جنه كنت اتريا منها ترمس عشان اصيح
بشرى شهقت يت يلست عندي : شبلاج ليش تصيحين !!
روضه : فديتج شوفيج حد قالج شي !!
ودي اصرخ و اقول هو شو سوى بي و شو بيسوي فبشرى ودي ..
،
ما ياني نووم خايفه من ياسر و اللي بيسوي فبشرى .. وخايفه من يوم العرس احس بتوتر خصوصا اني ما اعرف عبدالله .. و السفر و عقدتي وياه ياربي ><" , قمت من سريري و نزلت تحت كانت الساعه 3 الفير .. ساعه 8 رقدت و ع ساعه وحده وعيت مره ثانيه ما اعرف شو ياني هذا وباجي يوم ع العرس لو باجر العرس شو بيتسوي بي !! سمعت صوت تحت خفت تيبست فمكاني لو كنت فبيت يدووه كنت بتوقع انه صقر , ياربي منو بي ها الوقت ليكون حرامي !! امييييه لفيت و صعد اول درج و انا اسمع الصوت يقترب خفت حسيت ريولي هب شايلتني و ثجال ..
.. : ميره
فزيت و حطيت ايدي ع قلبي التفت : زيغتني حسبالي حرامي
منصور ضحك : شها الحرامي المتحرم يدخل من الباب
ابتسمت و ركضت و لويت عليه : حمدالله ع سلامه كابتن
منصور لوى عليه بزياده : الله يسلمج يالعروس
وخرت عنه طالعته بنص عين : هب وقته ها الطاري روحي زايغه
منصور ضحك : عروس عروس عروس هههههه
: اقول سير ارقد احسن لك
منصور : وين محمد !!
: راقد فحجرتيه لا تحاول تشيله مافيني يقوم و بعدين ابيه يرقد عنديه الليله و باجر بعد
منصور غمز لي : ان شالله يا حرم عبدالله المصون
ضربت ريلي بالارض و منصور يضحك .. رجعت حجرتيه شفت محمد و هو راقد بعمق فديته يا ناس رحت تسدحت عند و مسحت ع خده شوي شوي و لما تحرك شليت ايدي بسرعه ههههه كانت ملامحه منزعجه خلاف رقدت ..
،
لبست قميص كت لونه ابيض ساده و شورت فوق الركب لونه اسود جينز و لبست عبايه ساده و لبست شيلتي و سحبت مفتاح سياره يوسف اللي لين احينه ويايه .. نزلت تحت و انا اربع ظهرت بسرعه و ركبت السياره و بسرعه لبيت خالوو .. وصلت باب الحوي كان مفتوح فدخلت داخل بسرعه شفت واحد واقف فالحوي سويت طاف و دقيت هرن عشان تتطلع شيخه بس يحليله فز و التفت بسرعه و عقد حواجبه كان حمدان .. ياويلي احراج لفيت ويهي اوني اعابل فشنطتيه
فزيت لما سمعت صوت دق ع الزجاج التفت تروعت لما شفت حمدان ضحك عليه .. نزلت الجامه وانا منحرجه
حمدان : مبروك
: الله يبارك فيك عقبالكم
حمدان ابتسم : خلي شويخ تعرس خلاف بنتفرغ لعمارنا و بعدين عنا شيبه ما تزوج لين احينه
كانت اول مره ارمس حمدان بها الطريقه , كل اللي بينا رسميات .. ابتسمت
حمدان : ربي يسعدج و ان شالله بقلب عرس لحدث جمهوري " غمز لي "
امبيه هذا شو ناويه : ههه لا تقصرون
حمدان طالعني لثواني و قال : تصدقين لما كنتي صغيره كنت تخافين مني !!!
ماادري ليش تحمست احب حد يرمس عن طفولتي اللي ما اذكرها : والله !! ليش !!
حمدان ضحك : كنت متوحش فالنسبه لج هههه كنت بس ادور اي شي عشان اضربج
طالعت بنص عين : عيل صدق متوحش
حمدان انحنى يضحك عليه و انا ضحكت
سمعت صوت شيخه محتشره : ياللي ما تستحي تغازلها اشركه و لا باجر عرسها يا الثور
حمدان اعتدل فوقفته : لا تخليني امنعج من الروحه والله اسويها ما يخصج
امبيه تبدل هه اشك انه عنده انفصام فالشخصيه ..
حمدان طالعني : شوي شوي فالدرب لا تسرعين ابي امايه ترى
ابتسمت : لا توصي
ركبت خالتي ورى و شويخ جدام و تحركنا جدا الصالون كنت حاجزه لما دخلت على طول بدت الحنايه تحنيني بعد ما فصخت عبايتي و شيوخ اونها محتشره ليش انه خالوو ما تخليها تلبس جذا وما تقولين انا شي هههه .. عطتى فالوييه " عرسي خلاص لبسي لريلج " نقعت ضحك عليها كانت معصبه و مسويه سالفه ..
يلست شويخ عندي تتريا دورها : بشتاقلج
طالعتها : شويخ والله بصيح لا تذكريني احس بشتاق للكل حتى لمنيره و سعود
ابتسمت : حني ع راسه ع كل اجازه تعالي ههه
ابتسمت ..
تميت اطالع الحنايه و هي تحني كانت بطيئه شوي بس كبدايه حسيت نقوشها حلووه .. حنيت لكتفي و ريلي لركبتي و تميت يالسه و انا ماده ايدي و ريلي خلاف بدت فشويخ اللي بتحني لنص ايديها و بتنقش نقوش بسيطه ع ريلها و بعدها خالوو اللي طلبت حنا خفيف فايدها و ريلها .. و فوني يرن اكثر من عشر مرات و محد منا يروح يطلع الفون طالعنا بعض نضحك .. شوي و شفت بنت بعشر سنوات تقريبا تقرب من شنطتها تفتحه و طلعت الفون و حطته ع اذنها
: فدييتج تسلمين حبيبتي .. الوو
صقر : تراني هب ربيعتج
ضحكت : ما ارمسك .. بلاك تتصل !!
صقر : بخصوص الحلويات طلبت تقريبا ست انواع تبين اكثر !!
: تريا " طالعت خالتيه " خالوو ست انواع حلويات يكفي !!
خالتيه : ماادري !! خليي ياخذ نوعين زياده
: خذ نوعين زياده ع ذوقكك , هيه شو ستوى ع فستاني !!
صقر : هاذو فالسياره لا تحاتين .. تبين اودي بيتنا و لا بيتكم !!
: لا حطته فبيتنا
صقر : خلاص صار منصور فالبيت صح !!
: هيه
صقر : خلاص بمر احينه مع سلامه
: ربي يحفظك ..
حطت البنت فوني فالشنطته و شكرتها فديتها قمر .. تمينا يالسات تقريبا ثلاث ساعات تعبت و مليت بس خالتيه مصره اني اتم اكثر عشان يثبت اللون خلاف رحت غسلت فحمام الصالون و ظهرنا رجعنا البيت ع ساعه سبع المغرب .. دخلت حصلت سعيد و سعود مارين بيدهم كنادير شلكهم يايبنه من الدوبي و محمد ماشي وراهم ههه فديته انا .. رحت صوب حجرتيه حصلت فستاني فكيس خاص و محطوط ع السرير بشكل مرتب رحت فتحت سحاب الكيس طالعته .. ياربي شقايل بلبس ها جدامه اوووف احس نفسي بينقطع .. شليته و علقته فالكبت ..
ظهرت المسكه و الكعب حطيتهم فمكان .. شفت شنطتي الصغيره باجي الشنط حطوها فسياره نهيان عشان ما يتغربلون بها باجر .. حسيت بتوتر ما اروم ايلس بروحي بدلت لبست مخوره و نزلت تحت حصلتهم يالسين ما عدا امايه مهره
اببتسم منصور : عروس عروس
ياربي ويههي احترق مول ما يقدر ><" .. رحت يلست و انا مطنشيته لو عطيته مجال بصيحني .. نزل محمد من حضن منصور و يلس فحضني تم يطالع حناي ..
محمد : أعموو بابا يقول ماما ما بتي ليش !!
طالعت منصور يت عيني فعينه ثم طالعت محمد : ماما مشغوله حبيبي " رديت طالعت منصور " دوم يسأل عنها !!
منصور : ها الفتره هيه
غلا ما يت تشوف محمد من يوم اللي خذ منصور محمد عنها .. هاي اللي متمسكه به هاي اللي يت صرخت و احترشت لانها تباه !! هه شكله الريل اليديد نساها محمد و طوايف محمد .. شو تبى به اكيد بتيب عيال من ريلها الثاني و بتنسى محمد .. و بينسيها مع الايام .. تعشينا مبجر اليوم ع اساس انا العروس لازم ارقد عدل لانه وراي لويه باجر و فوق هذا السفر ساعه 3 الفير ><" ..
نهيان : سيري ارقدي احس بنقطع لج عرج من كثر التفكير لهدرجه متوله " و نقع ضحك "
قبل ما ارمس يته فلعه ع راسه من امايه مهره : صدق ما تستحي امسك لسانك
نهيان ضحك : خليني امايه شوفيها والله مره فالعمر اشوفها جذا
بشتاق لغيره نهيان و مغثته لي طالعته و الدمعه فعيني ..
نهيان ابتسم بحنان : لازم ترتاحين قومي ارقدي
هزيت راسي و قمت رحت جدا حجرتيه و انا ساحبه محمد ويايه .. تم يتعبث باغراض بس ما خليته يلمس المسكه مافيني تخترب هب وقته .. بحركته روح توتري تميت اطالعه و اضحك ع حركته قمت التعبث باغراضي وياه لين ما داخ و رقد .. طالعت الساعه كانت 12 رحت تسدحت عنده تميت اطالع ملامحه لين ما دوخت و رقدت ..
توتر .. خوف .. ارتجاف .. برد .. حراره .. احس اني اعاني من امراض الدنيا ااه ياربي خلاص اليوم .. الليله بتنتهي حياتي هني فها البيت اللي شاركني احزاني و افراحي .. البيت اللي حتواني طول سنين عمري الاولى و الناس اللي شاركوني حياتي بفتقدهم واايد .. احس الدموع بتنزل فاي وقت بدون سابق انذار .. قبل ساعه كتبنا العقد صرت حرمته حلاله خلاص صرت ملكه .. خبروني انه بيدخل بعد شوي عشان نتصور بس بلغني منصور انه بي قبله هو و نهيان اللي ما شفتهم من الصبح .. خلصت دارين من المكياج و التسريحه و لبست فستاني و كعبي و الطرحه اللي ضبتطها دارين ع التسريحه بها اللحظه اندق الباب الخارجي و دخل منصور و نهيان بعد ما اذنت لهم ..
تجدم منصور وحبني ع راسي : ربي يحفظج من كل حاسد و ربي يوفقج دنيا و اخره
قبل ما ارد تبطل الباب الثاني و دخلت شويخ بفستانها و تسريحتها و مكياجها , شهقت : شوووييييخ
شهقت زين ما شفط الهوا كله و ظهرت بسسسرعه منصور كان معطيها ظهر بس نهيان كان ويهه ع الباب طالعته كان يطالع الباب اللي دخلت منه شيخه بسرحان خخ مسرع ما ثبت شكلها ..
منصور : طلعت !!
ضحكت : هيه هيه
التفت نهيان : هااه !!
منصور ضحك : ول عليك شو هب شايف بنت فحياتك بلاك مبهت
نهيان : خوز عن دربي " حبني ع راسي " ربي يوفقج و يحفظج اقري ع عمرج عن اطيحين ع ويهج و انتي ع الكوشه
ضربته ع جتفه : لا تفاوول ترى ما بطلع
خذنا كمن صوره و خلاف يو صقر و يوسف سلموا عليه و باركولي و تصورنا يميع .. تموا يسولفون ويايه و يضحكوني شكلهم يحاولون يشيلون التوتر عني بس رجع التوتر بلحظه دخول عبدالله الحجره نزلت نظري للارض حسيته اقترب و حبني ع راسي
عبدالله همس : مبروك يا عروس
همست : الله يبارك فيك
ظهروا كلهم ما عدا عبدالله اللي لبسني الدبله و المصوره تصور و بدت الصور الماصخه و انا كل شوي أأشر لها تخف و بلا مصاخه بس هب راظيه بس فالحه تضحك عليه و عبدالله ساكت ما قال شي ذكرني ها الشي بأول يوم شفته فيه ما رمس بهذاك اليوم !!
و طلع .. طلعت نفس و يلست ع الكرسي و دارين و المصوره يضحكون عليه هزبتهم و هم بس يضحكون .. تذكرت شويخ اتصلت بها يتلي و هي معصبه هزبتني بغت تصييح دمعتها فعينها هي خبله انا شو يخصني منو قالها تتدخل جذا تعرف انه ملجنا و قالوا بعد ساعه بيون انا شوي يخصني والله بريئه خخ .. اندق الباب و دخلو ثلاث بنات مبين انهم فالعشرين وحده منهن حامل ..
شيخه : هايل حريم اخوان ريلج
يو سلموا عليه ما شالله كل وحده احلى عن الثانيه ..
وحده الحامل : انا وديمه حرمه مايد الكبير و هاذي شما حرمه سالم و هاذي أحلام حرمه حامد
كنت اعرف انه عنده ثلاث اخوان غيره بس ما كنت اعرف اساميهم ابتسمت لهم
شما : استريحي يحليلج شكله الفستان ثجيل علييج روحج صغيرونه
ابتسمت
وديمه يت يلست عندي و حطت ايدها ع كتفي : هدي اعصابج و كل شي بيعدي ع خير لا تفكرين واايد لانه ما بودي و لا يب
يااه نبره صوتها تهدي الروح فابتسمت لها بأمتنان
شيخه : لو تشوفين يدووه ما خلت حد فحاله تبا كل شي يكون مثل ما تبا يحليلها
عضيت ع شفايف لما يت فبالي : فديت روحها
وديمه : يارب عن اربي
أحلام شهقت : ليكون تتويعين !!
وديمه غمضت عيونها بألم : هيه رجع العوار
خفت امبيه بتربي !! طالعتها برعب : وقت ولاتج !!
وديمه : هيه والله بذبحك يا عبدالله ان ربيت الليله
شما : قومي تسدحي
وديمه : خلاص راح الألم
أحلام : واايد تحركتي قومي تسدحي
وديمه : خلاص ما فيني شي
دخل محمد فدييييته طالع كيووت لابس كندوره بيضه و مغترينه و بيده سلاح ع قده يا صوبي و خاشمني فدييته يا ناس :$ .. شوي و دخلن بنتين وحده بعمر خمس سنوات و الثانيه بعمر محمد عرفت انهن بنات مايد و شما عندها بيبي عمره 3 شهور اما احلام اللي عرفته انها متزوجه من ست شهور .. تمو يالسات ويايه و وديمه شوي تتويع و شوي تنصحني و تهديني ..
شوي و صرخت وديمه : مااروم خلاص بربي شما شما اتصلي بمايد شمووو
خفت فوق خوفي امبيه اول مره اشوف وحده بها الحاله كلنا توترنا اتصلت شما فريلها سالم و خبرته يخبر مايد و طلعوا من الباب الخارجي و انا اسمع انينها ياربي خفت واايد خفت يمكن اعيش ها الدور فيوم من الايام !! و قبل ما ترجع شما اللي راحت ويا وديمه توصلها لسياره خبروني انه لازم انزل .. دارين عدلت مكياجي شويه و طلعت و انا ارجف من الخوف و سالفه وديمه و ترتني زياده يارب سترك !! بصيييييييح ><" ..
نزلت ع شعر مكتوب باسمي و اسم عبدالله كانت هديه من يوسف .. مشيت و انا راسمه ابتسامه ع شفاتي و صرخه وديمه لين احينه فراسي .. شفت بنات ما اعرفهم اظن من اهل عبدالله !! و شفت يدووه رحت حبيتها ع راسها و سمت عليه و ركبت الكوشه كان طاغي عليه اللون بطيخي و الرصاصي كان فخم و راقي وهادي شويه .. و اخيرا وصلت و يلست و من يلست يو البنات يلسمون عليه و احلام واقفه فوق راسي و تقولي هاي فلانه و هذيج علانه كلهن بنات عم و عمات و خوال و خالات عبدالله ماشاالله عايلتهم كبيره .. و يت يدووه تصورت ويايه و امايه مهره ..
يت شما سألتها : شو ستوى ع وديمه !!
شما يلست عندي و ابتسمت : لا تحاتين ان شالله ما عليها شر
احلام : عاد حرام ما ستانست
شما : مقدر و مكتوب ان شالله يوصل عبدالله بالسلامه
طالعته باستغراب , عبدالله وين سار عيل !!
احلام ضحكت : مايد حالف ان ياه ولد بيسمي عبدالله
نزلت راسي مستحيه منها و ابتسمت ان شالله يوصل البيبي بالسلامه : ليش ما عرفت شو فطبنها !!
احلام : لا اونه خلي مفاجاه
بعد نص ساعه قالو المعرس بيدخل .. دخل و وياه صقر , يوسف , منصور , نيهان , سعيد , سعود , عمي جاسم , عمي عيسى , عمي حمدان .. شوي و انقلب المكان لميدان كل الشباب يالس يولون و ابهرني يوسف مول ما توقعت انه عنده كل ها المواهب كان احسن واحد فيهم بيولته تخبل و منصوور ماسك ايد محمد و بيده الثاني ايول و محمد يول بسلاحه و سعيد و سعود ع تشابهم مسوين دوتيو نفس الحركات و اشوف البنات يأشرون عليهم ههه صار عندهم معجبين , اما صقر و نهيان حسيتهم مالهم فالسلاح يعني شوي يرقصون عشان خاطري و عمي حمدان شل البقعه بحركاته ..
خلاف انسحب الكل و تمينا يالسين بشكل هادي .. يت عمتيه ام مايد سلمت علينا و باركت لنا .. خلاف قصينا الكيكه و المراسيم الثانيه و حانت النهايه خلاص احينه و بنتهي .. مسك ايدي حسيت بكهربا تسري فجسمي كانت ايده اكبر عند ايدي و ادفا مشينا لفوق صوب الحجره ..
عبدالله : تعشي و بدلي باجي ع الطياره ساعتين ونص
هزت براسي و عيني ع الارض و ظهر .. بدلت الفستان بفستان بسيط حرير خفيف لونه رصاصي بكم واحد و مسحت دارين مكياجي وحطت لي مكياج خفيف و بسيط و فتحت شعري و رفعته بكلبس .. حاسبتها و سارت خلاف يت شيخه يابت العشى بس صدق ما كان لي نفس ما كلت بس شربت عصير برتقال معنها لحت عليه اكل بس ما كلت ..
طلعت نفس لما شفت يدووه يايه تسلم عليه وياها امايه مهره و منيره و خالتيه سلمت عليهم و انا اصيح لدرجه انه الكحل ساح طريت اني امسحه كله و ظهرت لما يت وقت الظهره و سلمت ع اخواني و خوالي و عمامي و هم يوصون عبدالله عليه ثم رحنا المطار و صقر ويانا .. قبل ما نركب الطياره وصلنا خبر ولاده وديمه اللي يابت عبدالله الصغيرون .. سلمت ع صقر بشوق كبير ما رمت اودره هذا الامان كيف اوده بها السهوله .. و ستسلمت و ركبت الطياره ويا عبدالله ..
كان الوضع جدا هادي انا اكتفت بدموع صامته و انا اتذكر كل شخص ودرته ع ارض البلاد .. ليش وافقت !! ليش وافقت اسافر دامي اني مااروم ليش وافقت .. اااه استغفر الله .. هدى الوضع فالطياره التفت بشويش اطالع عبدالله كان يالس بهدوء و يطالع جدامه بشرود .. تمينا فالطياره سبع ساعات لاعت جبدي حتى ما كلت شي فالطياره مافيني تنقلب معدتي و بعد ها السبع ساعات و ها التعب كله وصلنا لندن بالسلامه ع ساعه 6 الصبح بتوقيت لندن .. نزلنا و هو طول الوقت ماسك ايدي استلمنا الشنط و طلبنا تكسين عشان أغراضنا ..
من اربع او خمس سنين هب يايه لندن يتها مره سياحه فالصيف ويا اخواني حبيتها فالصيف كان الجو وقتها غرام مع لفحه بروده الله يعين فالشتا و نحن احينه ع ابواب الشتا تقريبا .. تميت اطالع الشوارع اللي فيها شويه ناس و بدوا يزيدون لما قربت الساعه ع السبع .. وقف التاكسي جدام فله طابعين تشابه الفلل اللي حذالها لونه ابيض .. نزلنا الشنط و دخلنها داخل و اول ما دخلنا كنا فالصاله كان الاثاث ابيض و سماوي اثاث اوربي .. و جدامنا باب المطبخ و ادراج المطبخ باللون الاسود و الابيض .. و ع يساري دري و ع يميني باب حمام .. صعدت فوق كان في ممر متوسط الحجم و عريض شويه ع يميني كانت حجره مأثثه بسرير لشخصين و الحجره كانت كبيره وفيها حمام و الحجرين الثانين فوسطهم حمام واحد منهم مكتب مأثث و الثانيه شرا الصاله الصغيره ..
دخلت الحجره الكبيره لما شفت عبدالله يحط الشنط عند باب .. سحبت شنطه صغيره لداخل و يلست ع الغنفه اللي فالحجره كانت الحجره باللون بني كاكاو و الابيض ..
بطل عبدالله شنطته و طلع ملابسه و قال بصغيه امر : رتبي كل ملابسي فالكبت
ودخل الحمام .. حسيت بحد كفخني ع ويهي !! ليش رمسني بها الطريقه و بعدين ما يحس انه تونا رادين من السفر و قبلها العرس !! عضيت ع شفايفي حسيت اني بصيح خفت من نبره صوته ليش جذا رمس !! فصخت عبايتي و نزلن دموعي , خوف و وحده خفت من ها الشي .. قمت سحبت شنطه كانو شنطتين كبار و بديت اصف ملابسه فالكبت و انا اكتم شهقاتي و مسحت دموعي لما فتح باب الحمام .. حسيت بحركته وراي ماادري شو يسوي !! كملت شغلي و انا ساكته و لما خصلت التفت حصلته راقد ع السرير بعمق .. قمت خذت لي لبس قطني مريح و رحت تسبحت كان الماي باااارد ياربي خلص كل الماي الحار ><" .. طريت اتسبح بالماي البارد ياربي احس ضلوعي تجمدت من بروده الماي وفوق الهذا الجو في بروده شوي .. لبست ملابسي بسرعه و انا ارتجف خلاف ظهرت و رحت تسدحت ع السرير بطرف اليمين ع حافه السرير و نمت من تعبي ..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الحادي عشر
( صدمتني )
وعيت من نومي مفزوعه و خفت اكثر لما شفته راقد و معقد حواجبه .. طلعت نفس احاول اهدي عمري قمت رحت اغسل ويهي و افرشي اسناني و لما طلعت انتبهت انه الساعه 4 العصر رحت بدلت ملابسي لبست بنطلون سكيني رصاصي و قميص كم طويل لونه اصفر عليه شويه رسمات من جدام .. طالعته و هو راقد و حواجبه ارتخت يمكن لانه كان تعبان عشان جذا رمسني !! يعني انا مثلا لما امرض دوم يكون مزاجي معكر و معاملتي زفت اكيد هو جذا لما يتعب !! لازم ما احكم بسرعه ..
نزلت تحت و دخلت المطبخ كان فاظي تماما .. لا اكل و لا حتى صحن واحد اووف يعني لازم اتريا يقووم روحي يوعانه .. طلعت من المطبخ استكشف البيت اكثر لاحظت انه شي باب ثاني فالمطبخ فرجعت دخلت المطبخ بس الباب كان مقفول فطلعت و رحت صوب الصاله يلست ع الغنفه طالعت الجدران اللي مغطايه بورق جدران باللون الابيض ويا نقوش بالسماوي حبيت اللون حسيته يبعث الراحه .. تميت يالسه نص ساعه و انا ملانه لين ما حسيت بحركه و صوت خطواط نازله من الدري طلعت نفس لما شفته و قف عند عتبه الدري يطالعني و يطالع البيت حولينه .. تجدم و يلس جدامي ع الطاوله توترت لقربه و ملامحه الجديه ..
عبدالله ربع ايده : احب اوضح كل شي ما احب يكون شي بدون توضيح لاني صريح و عن طريق ها الصراحه بنبي حياتنا
بلعت ريجي اي صراحه يتكلم عنها !! و ليش يتكلم بها الطريقه حسيت اني مجرمه جدام قاضي ينتظر حكم الاعدام ..
عبدالله : تعرفين اني ياي عشان اكمل دراستي ..
هزيت راسي بهيه
عبدالله : خليني اكون صريح ما تزوجتج عشان سواد عينج و لا لانه لي نيه زواج
بطلت عيوني بوسعن و بدت ايدي ترتجف
عبدالله : تزوجت لاني قررت اكمل دراستي فالخارج و ما حبيت اكون بروحي و خصوصا اني ما اروم ادبر عمري بروحي فامور البيت و غيره من ها الخرابيط .. فبتكونين انتي العامل المهم فها الموضوع يعني شغلتج تتطبخين و تنظفين و الامور الثانيه اللي متعلقه فالبيت و بدون عناد و لا حتى مجادله مالها معنى و بالتالي بتحصلين مني كل الاحترام و بعطيج مجال تكملين دراستج ما عندي مانع فها الموضوع ..
تجمعت الدموع فعيني ما تصورته بها المستوى من التفكير .. الانسان اللي رسمت له صوره ثانيه فمخيلتي انسان هادي رائع متفاهم محترم خجول .. و اسوء شي انه يكون جدي و عصبي بس هب وقح لهدرجه هو يالس يعبر لي بصريح العباره اني بكون خدامه عنده ..
وقفت و اشر باصبعي عليه : هي انت تراني بنت ناس هب ماخذني خدامه
وقف وصار قريب مني نزل اصبعي باصبعه بشويش : احترمي نفسج اذا تبين كل شي يستمر بشكل طبيعي امسكي لسانج و تسوين اللي ابيه منج ترى طلباتي هب تعجيزيه
اعرف بس يمكن لو قالها بطريقه اللطف او حتى نبههني بطريقه غير مباشره : اسمع جانك تباني خدامه احسلك رجعني بيت اهلي
عبدالله طنشني و مشى .. و لما فظى المكان نزلت دموعي لا ياربي شو ها اللي عايشته معقوله يالسه احلم !! لا اصحي يا ميره هذا هب حلم انتي ويا عبدالله اللي تزوجته البارحه و كان عرسكم و سافرتوا لندن و احينه يهنيج بصريح العباره .. كيف بكمل حياتي مع انسان محطيلي قدر خدامه عنده .. هذا اللي خوالي ارتاحوا له هذا اللي رحت تزهبت له و عشت الخوف عشانه هذا اللي صار ها العرس و الحشد الكبير عشان يحضرون زواجنا هذا اللي منيره تحسدني عليه !!
مسحت دموعي بسرعه لما سمعت صوت خطواطه حطيت ريل ع ريل و سند ايدي ع مسند الغنفه و لفيت ويهي عنه ..
عبدالله بهدوء : قومي بدلي بنروح نشتري اغراض حق المطبخ
بدون ما اطالعه : اجله باجر انا تعبانه من السفر
عبدالله بهدوء : ما يصير من وين بناكل يلا قومي
: قلتلك خليها باجر انا تعبانه و اذا ع الاكل المطاعم تارسه المكان
سمعته يتنفس بغضب : انزين قومي نروح لاي داهيه ناكل فيها
قمت رحت صوب الحجره فتحت شنطتي طلعت لي بنطلون جينز اسود و قميص ابيض رسمي فوق جاكيت قطني خفيف لنص الفخذ فيه حركه لونه اسود .. بدلت و لبست لي سكارف اسود و تعطرت و لبست كعب متوسط بربري و خذت شنطته بربري و طلعت نزلت تحت .. حصلت سيارتي و سيارته فالقاراج و ظهرنا بسيارته [ porsche panamera 2011 ] لونها ابيض سواقته كانت متوازنه تمينا ساكتين فالسياره اصلن احس فيني صيحه بعدني ما فرغت يعني فوق اني فغربه يطلع ها الانسان شي ثاني !! استغفر الله .. بدا الخوف يدخل قلبي و انا اتخيل شو بيسوي فيني !! بيخليني خدامه !! بيضربني !! بيسبني !! و مافي حد يحميني منه ..
تغدينا خلاف وقفنا جدام سوبر ماركت كبير , قال : يلا انزلي
: شو نسوي هني !!
عبدالله : بنتشرى حق البيت المطبخ فاظي
: اظت قلتلك اني تعبانه ردني البيت
عبدالله : هب رادج شو بتسوين بترجعين مشي !! يلا نزلي بنتشرى و بنظهر
: انا تعبانه ردني البيت
عبدالله : انا كل ما قلتلج شي قلتي تعبانه !! انزلي يلا
نزل بس ما تحركت من مكاني لما نفذ صبره يا فتح الباب و نزلي غصب وبقوه فاستسلمت و دخلت السوبر ماركت كان كبير وفي كل شي نحتاجه خذنا عرباتين اول شي شرينا الصحون و الاطقم و الجدور و غيره و بعده الاغذيه خذ منا الفره تقريبا ثلاث ساعات لانه في اكل طريت اني اقرى مكوناته .. رجعنا البيت و امرني ارتب الاغراض احينه و رتبتهم فالمطبخ بدون اي جدال لانه ادري بيغصبني و بعد الترتيب رحت الحجره و رتبت ملابسي فالكتب و انا احس عمري هلكانه خلاف سرت تسبحت و رقدت ..
،
حست بأيد توعيني بقوه و صوت انين فزيت لما استوعبت اني ع السرير فالغرفه ويا عبدالله كشرت .. رجع صوت الانين لفيت راسي شفت عبدالله فاتح نص عينه و معقد حواجبه و معرق و ايده ع ايدي ماسكه بقوه و يأن بصوت خفيف
: شفيك !!
عبدالله : شش لا ترفعين صوتج راسي راسي بنفجر
همست : تبي بندول !!
عبدالله : هيه
قمت سويت لها ريوق و طلعت فوق خليته ياكل غصب بس اللي فجعني انه طلع كل اللي كله فالحمام و لما طلع كان يتمايل و يتضرب الاشياء رحت مسكت ايده و رقدت ع السرير و طلب مني بندول قلتله انه لازم ياكل لانه طلع كل الي فمعدته رفض ياكل و تم ع صداعه و هو يأن .. امبيه ليكون هذا مريض او في شي
سألته بهمس : اول مره ها الصداع !!
عبدالله : لا
همست : شو تبا اسويلك !! اهمزلك راسك !!
عبدالله : يمكن يخف
قمت يلست عنده و حط راسه فحضني بديت اهمز له راسه و اقرى قراءن يمكن يخف ألمه مبين انه يتالم رحمته .. تميت اهمز له نص ساعه احس ايديه تخدرن وقفت و طالعته فتح عينه لما وقفت كان مبين انه بعد الالم ما راح
: راح !!
عبدالله : لا هاتي بندول يرحملي والديج
: لازم تاكل شي بيب لك فواكه احسن !!
عبدالله : اي شي
قمت نزلت تحت يبت تفاح و صحن و سجين و طلعت فوق بس قبل ما ادخل الحجره سالت عمري ليش يالسه اساعده و اسوي كل هذا !! ترى هو نفسه اللي اهاني البارحه و اعتبرني خدامه .. اذا هو ما عنده ضمير فانا ضميري يأنبني اذا ما ساعدته دخلت الحجره و بديت اقص له التفاح و ما قدر ياكل الا نصه و عطيه حبتين بندول .. رحت تسدحت ع السرير وانا دايخه ابي ارقد و شوي شوي رقدت و هو بين فتره و فتره يأن من الالم ..
،
فتحت عيني حسيت اني شبعت رقاد تمغط .. شدي صوت الانين التفت حصلته ع حاله ياربي هذا شو بلاه شو سالفه ها الصداع !! سالته قالي انه بعد يعور و ما خف و يحس بغثيان و ما يشوف عدل و الاصوات تزعجه حتى الضوو .. خفت شو ها الاعراض ما يشوف !! اخاف ايه شي .. رديت سالته اذا هاذي اول مره قال لا بين فتره و فتره اتيله ها الاعراض بس ها الايام زادت عليه ..
: لازم اوديك الطبيب
عبدالله : متعود
: هب زين عبدالله خليهم يسون لك تخطيط للمخ
عبدالله : مافيني شي ..
سكت عنه سالته اذا يوعان قال يبا تفاح عشان ياخذ بندول عطيته و خذ البندول .. وانا رحت سويت لي شي بسيط كانت الساعه 6 المغرب رحت صليت الصلوات اللي فاتتني و تميت يالسه تحت احس قلبي يعورني لما اسمعه يأن و هب راضي نروح المستشفى هو اللي يتويع هب انا برايه خلي يتحمل .. طالعت التلفزيون بس مافي شي شدني تذكرت غرفه المكتب اللي فوق قمت ابي اشوف شو فيها اذكر اني شفت رفوف يمكن حط فيها كتب او اي شي ع اقل اروح ها الملل .. دخلت حصلت واحد من الرفوف مليان كتب رحت اشوفهم .. كانوا كتب عن القانون و اشياء تخص القانون و حصلت كتب لشعراء قدم بصراحه شدني رحت يلست ع الكرسي اللي ورى المكتب و فتحت ع اول صفحه و بديت اقرى سيره الشاعر و اشعاره و اكثر الاشعار غزل !! غزل !! عيل ليش جي يعاملني يمكن يحب وحده ثانيه !! انزين شحقى ما خذها ليكون وضعه مثل وضع ياسر معاي !!
يتبع ,,,
👇👇👇
،
اللهم لك الحمد حتى ترضى وإذا رضيت وبعد الرضى ,,, اضف تعليقك