رواية طحت طيحه في هواكم -12

رواية طحت طيحه في هواكم -12

حارب : لا لا .. ما فينا نرد .. ما صدقنا الشيبه يفجنا ..

حمد : هههههههههه عيل ..

حارب : بعطيها رفوووع وهيه بتشربها مااا..

حمد ما صدق خبر .. دايركت نفذ الاقترااااح..

حمد : شورك وهدايه الله .. (( طبعااا وقلبه طاير من الفرحه ))

سار حمد صوب يمعن البنات بس قبل لا يوصلون ظربوا هرن .. أول ما شافن البنات انهم يايين صوبهم سيده تغشن .....

ويوم وصلوا هندهم ..

نزل حارب روضه من الدريشه .. ومحد لاحظ أن في يده رجفه خفيفه.. لازم بيشوووف ميره ....

ومحد كااان متعور غير رفيعه ومهره ..

حارب : السلام عليكن بنات .. شحالكن ؟

البنات : بخير الحمد لله ..

حمد رافع ايده يسلم ..

حمد : السلام عليكن ..

رفيعه نزلت راسها

البنات وعليكم السلام ...

حارب : رفيعه ما عليج اماره بس ... شربي روضه ماي لانها عطشانه .. رفيع : ان شاء الله ..

سمعها حمد وفز قلبه .. تذكر الرمسه اللي قالتله اياها في السياره يو كانوا في الستي.. طبعا حمد ما صد صوبهن إلا يوووم سلم .. وحمد مشغل المسجل وحاط غنيه يا حمد مال حمد العامري .. ويوم تحركوا الشباب طول حمد على المسجل .. ( شفته ولا أدري شحلبي .. مشي القطا وعين الظبي.. في وين شفته يا حمد .. شفته أنا في بوظبي )

حمد : (في قلبه .. ليتك قلت .. + (في وين شفته يا حمد ... شفته أنا في الستي)+ .. بس هذا لو الشور عندي..

كملوا الشباب طريجهم ..

وعند الشباب اللي في الحظيره ..

منصور توه داش عليهم ..

منصور : السلام عليكم ..

الموجودين : وعليكم السلام ..

يلس منصور حذال الشيبه .. ويلسوا يسووووووولفون .. ورفيعه شربت روضه ماي لان كانت في الأساس يايبه وياها دبة ماي صغيره .. وعند صلاة المغرب صلن البنات فوق العرقوب وعقب ما خلصن نزلن تحت... سارن صوب الحظيره الثانيه ... اللي فيها الحريم .. يلسن ويابن المشاوي .. وحطنه في الأصياخ وجهزنه في صحن وطرشوووه صوب الشباب عسب يعابلون فيه .. والبنات يلست دور ما داير على الظو ويلسن يسولفن ..

حمد وحارب ...

موقفين السياره على طرف الشارع ..

حمد : شو راسك الحين ؟؟..

حارب : الحمد لله الحين أحسن ..

حمد : تباني أردك البيت ولا الشووو ؟؟

حارب : لا لا .. شو تردني البيت .. أخلي هالكشته كلها عسبة عوااار راس ما يسوى ..

حمد : والله برايك .. أنا شرت عليك .. بس انته الله يهديك ..

حارب : خل عنك هالرمسه وقمنا نرد العزبه ..

ردوا الشباب العزبه...

وساروا حظيره الشواب ويلسوا فيها .. كان الشيبه يعقد الحبل اللي عنده .. وغيث يعابل في الظو .. وراشد ومنصور يسولفون .. وحمد وحارب يالسين .. ويسولفون .. شوي ويا الشيبه وشوي ويا الشباب الباجين ..

منصور : أظني أنا المشاوي يبالهن الحين ينحطن ..

راشد : هههههههه.. إسأل أخوووك بو شهاااب .. خبير في طبخ المشاوي

منصور : شو حمد نحطه ولا ..؟

حمد : حطه شو تتريا بعدك ..

صفوا الشباب المشاوي ويلسوا يعابلونه

والبنات يرتبن العشا ويخلنه جاهز .. عسبة يطرشنه عقب مره وحده .. وعقب ما خلصت قامن كلهن وسارن صوب المريحانه ..يلسن رفيعه ومهره وحصه داخل المريحانه وميره وشمه يدزنها بالخفيف من الطرفيين ..

وعقب نص ساعه تقريبا ..وعند الشباب ..

كان كل ما ينظا صيخ من المشاوي كان منصور يعفد عليه ويوزع على الشباب وعلى شويبتهم..

غيث : منصور حط ايدك عليهن وشوف شو بيستويبك ..

منصور : شو بتسوي يعني ؟

غيث : جرب وشوف ..

حاول منصور يجرب يده من المشاوي وكان في نفس الوقت منتبه لحركاات غيث ..

وشوي أن غيث يطلع الصيخ اللي حاطنه عدال الظو ويجربها على يد منصور .. أول ما انتبه منصور سيده خّوز ايده..

منصور : عنلاتك تبا تحرق يديه..

غيث : هههههههه وامبونه محد مطرشنك تاكل..

منصور : يا خي ما تعرف المثل اللي يقول اليوع كافر..

وكلهم تضاحوا عليه لأنه ياب الجمله بشكل يظحك ..

والبنات يالسات على العرقوب.. ومجابلات الحظيره .. ويلسن يتظاحكن يوم شافن منصور ظاهر من الحظيره وغيث يروغه بالصيخ الحار..

محمد : عجب ياللي ما فيك ادب.. شو لكم من الحايه في الولد..

غيث : بس جيه..

منصور : عااد ترضى يا يدي ..

محمد : لا والله ما أرضى.. غيثووه بتخووز عن اخووك والا اييك بالعصا الحين...

غيث : هااااااااااه .. يبنا طاري عصا .. خلني أيلس أحسن .. سادتنيه الظربه المساعيه..

منصور يسير صوب يده ويحبه على راسه ..

منصور : فديت يدي أنا ..

حمد : ههههه لازم ..

مر الوقت ولا حد حس به وعقب ما صلوا لعشاء تعشوا.. بس منصور ماكان ويا الشباب .. كان يالس في سياره حمد وكان سادح السيت شوي .. وحاط ريله فوق فتحة المكيف... وكان عاق غترته .. يعني كان ماخذ راحته .. كان موقف السياره فوق عرقوب صغير عدال العزبه .. كان يشوف المباراة .. بين العين والوصل .. كان الشوط الثاني توه بادي .. و البنات وعقب ما تعشن يلسن فوق العرقوب اللي كانن يالسات عليه العصر .. وكان منصور موقف السياره على يسارهن ..

ميره : ظنكن شو يسوي منصور في السياره .. شافت شمة ساعتها ..

شمه : ههههههه الأخ يتاااااابع المباراة ..

حصه : الله يعين عيل..

رفيعه : ليش ؟

مهره : الاخوات حصيص وميروووه حبن يغايظنه .. وقالن ان الوصل بيفووز ..

رفيعه : اهاااا ..

شمه : عيل الله يعينكن على رمسته اذا فاااز العين ..

وعقب فتره من السوالف ... سمعن البنات صوت سيارة منصور تتقرب صوبهن .. وكان مبند الليت ...

وقف السيارة جدامهن

البنات كلهن ما تغشن إلا رفيعه ..

ميره : ليش تتغشين .. أولا الدنيا ليل .. ثانيا منصورمحد يتغشى منه غيره ..

اقتنعت رفيعه برمستها أن الدنيا ليل وما بيقدر يميز..

نزل منصور من السياره .. ووقف شوي بعيد عن البنات .. كان شكله مبهدل .. الغتره على الجتف والكندور كويتيه ومبطل عقمها اللي فوق..

منصور : مرحبا

البنات : مرحبتين ..

منصور : وين مهره ؟

استقطعت مهره ما عرفت شو السالفه ؟؟

مهره : نعم ..

ويوم انتبه لمكانها ..

سوا بإيده حركه ..(( أوكيه )) وصد صوب ميره وحصه اللي كانن يالسات عدال بعض .. وجلب ايده على أساس يعني ..(( بااااااد )) ..

منصور : هارد لك لكن .. ( يأشر عليهن ) ولا تحطكن راسكن براس الزعيم مره ثانيه ..

روّح منصور عنهم وركب سيارته ونزل عنهن ورد عند الشباب..

شمه : هههههههههههما قلتلكن ..

ميره : اووووووووووووب يا حصيص أخووووووج سكتنا ..

وعلى الساعه تسع ونص كلهم ردوا البيت .. رفيعه وأهلها ردوا االبيت والباجين ردوا بيت ثاني( قوم راشد )..

ردن البنات هلكانات .. سيده تسبحن ورقدن كلهن في حجرة وحده واما العيايز تيمعن في حجره ويلسن يسولفن والشباب منهم اللي رقد ومنهم اللي سار يحوط والشويبه رقد لأن وراه نشه الفير ..

وعلى الساعه ثنعشر فليل .. كل اللي في البيت كان راااااااقد.. ما عدا مهره ..

كانن خواصرها يعورنها .. حاولت تيود الألم بس ما قدرت .. لدرجه انها تمت تون طول الليل وعلى الساعه وحده ما قدرت تتحمل أكثر.. كانت حصه راقده عدالها..

مهره : حصه ..

وحصه من التعب ما استجابت لها ..

مهره : (الألم وصل حده ) آآآآآآآآآآه حصه

بعد ما استوعبت حصه الوضع ..

حصه : بسم الله الرحمن الرحيم .. ميره .. شو بلاج؟؟

ميره : ( تصيح وميوده خواصرها ) دخيلج يا حصه ازقري اميه ولا أي حد بسرررررررعه ..

حصه : ميره .. شو يعورج ؟؟

ميره : (تصيح بقو ) دخيلج ياااا حصه بسررررررعه ..

حصه زااااغت .. بسرعه دورت شيلتها وبسرعه طلعت برع .. استحت تدق على خالتها .. لأن ريلها بو راشد راقد بعد .. دقت على باب حجرة امها .. ويوم مالقت اي استجابه .. دخلت .. وعت امها ..

ام حمد : بسم الله الرحمن .. حصه .. شو بلاج ؟!. شيء يعورج ؟؟

حصه : لا يا اميييه أنا ما فيه شيء ..

ام حمد : عيل

حصه : تعالي بقولج برع عسبة ما نحشر اليهال وخالوه..

قامت ام حمد متثاجله ..

حصه : اميه دخيلج بسرعه ..

زخت حصه امها من ايدها وودتها الحجره اللي فيها مهره .. وشمه وميره في الحجره الثانيه..

أول ما شافت ام حمد مهره .. زااااغت ..

مهره : ( تصيح ) خااااالووه

أم حمد : بسم الله عليج فديتج .. شو بلاج ؟؟

مهره : دخيلج خالووه دورواااا حد يوديني المستشفى بسرعه .. آآآآآآآآي

أم حمد : ان شاء الله يا بنتي ..

ام حمد : حصه سيري سوي حق اخوووج حمد بسرعه خليه يشغل سيارته..وأنا بساعدها تلبس عباتها .. وانتي يايه بعد هات ي وياج عباتيه وشيلتيه...

حصه : ان شاء لله .. تركظ حصه صوب تلفون الصااله .. وتسوي تلفون لحمد ..

حمد كان رقاده سطـّاحي.. يعني هب راقد ولا هو بواعي.. يعني نص نص..

انتبه حمد للتلفون..

شله بسرعه وطلع برع ...

حصه : الوو

حمد :الوو

حصه : حمد

حمد : لا البقااااله..

حصه : صدق انك متفيج ..

حمد : خير ان شاء الله شو عندج ؟؟

حصه : بسرعه أبغيك تودينا المستشفى ..

حمد : ( منصدم ) المستشفى ؟؟؟؟ .... ليش؟؟

حصه : مهره تعباااانه وايد ..

حمد : اوكيه ياالله طلعن بسرعه ..

بندت حصه عن حمد .. وسارت عند امها بعد ما يابت عباة امها وشيلتها ..

حصه : اميه .. تبيي أسير فياكم ؟؟

ام حمد : هيه فديتج يالله بسرعه ..

سارت حصه بسرعه ولبست عباتها ..

وعقب ما خلصت سارت ويابت شنطتة مهره وطلعت من بوكها بطاقتها الصحيه .. وسارت وحطهاا في شنطتها ... وطبعااا كل هذا بسرعه بسرعه ..

يودت حصه مهره من ينب وام حمد من الينب الثاني .. ونزلن من الدري شوي شوي .. وحاولت مهره قد ما تقدر تتحمل الألم عسبة ما تخلي اللي في البيت يحسووون بهاااا .. طلعن البنات في الحوي ... دخل حمد بسيارته .. وهب مستوعب الموقف اللي فيه ابدا ... كانت مهره متغشيه وتترنح في المشيه ... ويوم وصلوا السياره ركبت ام حمد جدام طبعاعقب ما ركبت مهره وراها .. وحصه يلست ورا حمد ..

ام حمد : فديتك بو شهاب ودنا المستشفى بسرعه ..

حمد : أي مستشفى ؟!

مهره : ( تصيح ) دخيلكم بسرعه ..

حمد ما عرف شو يسوي .. أول مره يشوف مهره بهالحاله .. ما توقع في يوم يشووفها جيه.. طلع حمد االسياره برع وقرر يسير المستشفى اللي يتعامل وياااه أكثر وهو مستشفى دبي..

مهره ومن زوووود الألم ما حست باللي حواليها ... يودت خواصرها ونزّلت راسها لركبها .. طاحت غشوه مهره ..بس مهره ما عطتها سالفه .. لأن من الاساس هيه مب في حاله تستحق انها تعطي للغشوه أهميه.. وبعد توجع وآلام الطريج .. وتهدئه من ام حمد وحصه .. وصلوااااااا المستشفى ..

دخلوووووووها بسرعه قسم الطوارىء.... وبعد ساعة تقريبا .. طلع الدكتور من عندها ..

ام حمد وحصه يالسين .. ام حمد تدعو ربها .. وحصه فيها صيحه بس ميودتنها .. حمد واقف على اليدار حاط ايده ورا راسه .. بدون غتره ولا شيء .... اول ما شاف الدكتور سار صوبه بس ام حمد وحصه ما سارن .. استحن يسيرن له .. لأنه مواااااطن ..

حمد : مرحبااا دكتور ..

الدكتور : مرحبتين ..

حمد : ها دكتور طمنا

الدكتور : انته شو تي حق المريضه ؟؟

حمد : ولد خالتها .. (ويأشر على أمه ).. وهاذي خالتها

الدكتور : اهااا .. ممكن تلحقوني الغرفه شوي ...

حمد : ان شاء الله دكتور

مشوا قوم حمد وحصه وام حمدوتجدمهم الدكتور .. كانوا حاسين بشيء..

وصلوا الغرفه ..

يلس حمد جدام الدكتور وحصه وامها على الغنفه الطويله اللي ورا حمد ..

حمد : خير يا دكتور .. قول اللي عندك

الدكتور : الله يسلمك الحين المريضه راقده ... عطيناها مهدىء وهذا اللي ساعدها على الرقااد .. (فتح الملف اللي كان جدامه) .. وهذا الملف هوه ملف التحليل ..

حمد : طمنا الله يطمنك..

الدكتور : سوينا التحليل .. خواصرها ما فيهن شيء يستاهل تخافون عليه .. بس كلت شيء ما تستقبله جليتها .. وقلة الماي اللي تشربه ...وعلاجها بسيط وااايد..

الجميع : الحمد لله

الدكتور : ( بتردد ) بس.....

حصه : ( بنبرة خوف ) بس شو يا دكتووور ..؟؟؟!!!!

الدكتور : ونحن نحلل دم المريضه حصلنها فيهاااااا .... سرطان الدم..

حطت حصه ايدها بقو على ثمها .. وفجرت اللي في خاطرها ولوت على امها اللي بدورها صاحت .. حمد .. نزل راسه وبعينه دمعه..

حمد : لا حووول الله

الدكتور : أدعوا لها بالشفااا .. نحن بنسوي اللي علينا والباقي على لله..

حصه : ( بعصبيه ) لا تسوون شيء .. ما نبغي منكم شيء .. كافي انكم جتلتوا اخوها ذياب .. حرام عليكم حرااااااام وتيلس على الأرض وتقبظ ايد امها وتصيح على ريولها ...

حمد : ( معصب من رمستها ) حصــــــــــــه ...

الدكتور : المووت حق يااختي والأعمار بيد الله .. الله كاتب له يمووت .. نحن سوينا كل اللي علينا . ما خلينا علاج ما عالجناه ما خلينا دوا ما عطيناه ... ما خلينا طريقه ما استخدمناها .. بس جسم ذياب رفض العلاج .. وهذا كله بأمر ربج .. ونحن ما بيدينا شيء

حصه زادت من صياحها بعد كلام الدكتور..

حمد عصب عليها .. مب زين جيه تسوي جدام الريال .. صح ان قلبه تقطع ميه ألف مره على هالخبر بس مع ذالك ميود اللي في قلبه ..

قام حمد من على الكرسي .. يود حصه من ايدها .. زخها من جتفها وهزها بقو ..

حمد : حصه .. اللي الله مقدرنه بيصير .. وصياحج ما بيغير شيء من اللي بيستوي .. ومحد بإيده يغير المكتووووووب ..

حصه سكتت .. حمد فج ايدها .. حصه تشوف حمد بنظرات وحمد نفس الشيء .. تموا ساكتين شوي وفجأة تلوي حصه على حمد بقو .. وهيه ساااااااكته بس عينها ما وقفت الدمووووع .. وام حمد يالسه على الكرسي ومنزله راسها وعينها تدمع ..

وتصد حصه صوب الدكتور ..

حصه : أقدر أشوفها ..

الدكتور : اممممم .. تقدرين بس اذا وعدتيني أنج ما تصيحين عندها ..

حصه : أوعدك بس دخيلك ابغي أشوفها ..

الدكتور : أوكيه .. خذي لج خمس دقايق لين ما تريحين وتهدين وعقب بدخلج ...

حصه : لا الحين أبغي أشوفها ..

الدكتور : ان شاء الله ... ان شاء الله

طلع الدكتور وطلع حمد وراه ... وحصه وامها ورا حمد ..

ويوم وصلوا الغرفه .. دش الدكتور داخل .. تطمن على الوضع ورد وظهر مره ثانيه ..

حمد كان يالس عدال امه وحصه واقفه عدال الباب تتريا الدكتووور..

الدكتور : مثل ما وصيتج ..

حصه : ( تمسح دمعتها ) ان شاء الله ..

وقف حمد يرمس الدكتور.. وحصه دخلت داخل..

دخلت الغرفه .. مهره طايحه على السرير شكلها تعبان .. ويهها شاحب .. حصه ما كانت تتحمل هالموقف.. حاولت أنها ما تصيح لاكن ما قدرت تتحمل... أخرت وراها .. بعد ورا بعد ورا ..لين ما صدمت اليدار .. حطت ايدها على ثمها وتحاول تمسك صيحتها .. نزلت شوي شوي لين ما يلست على الأرض .. حطت راسها على ركبتها ويودت ريولها بإيدها .. ..

وتنتابهااااا لحظة هدوووووووء وألم ....

(( ليش يا ربي ليش ؟؟ مهره ما تستاهل .. يااااااااااا رب .. يالله انك تسهل عليها وتشفيها من اللي فيها .. يا رب انك ما تاخذها منا شرات ماخذت ذياب اخوووها .. يالله يا رب أسألك أنك تساعدها )) وبعد ما أقتنعت حصه بالواقع ... وانهارت. قامت .. مستثجلة في المشيه .. متمسكه باليدران .. كل شوي وتصد على مهره .. وأخيرا طلعت .. حمد شافها ..

حمد : هاه يا حصه شو حالها ؟؟

حصه ما عطته سالفه .. لأنها أصلا ما سمعته كانت منهاره نهائيا .. سارت صوب كرسي بعيد عنهم .. يلست.. نزلت راسها .. حمد مستغرب منها .. بس حس ان هاي ردة فعل طبيعيه .. رد حمد يكلم الدكتور ..

حمد : ولين متى بتخلونها عندكم ..

الدكتور : باجر المغرب ممكن تاخذونها ..

حمد : وليش هالوقت كله ؟؟

الدكتور : بنرد نسويلها تحليل .. بس هالمره شامل .. وبنرتب لها أدويه على حساب تحليلها..

حمد : ...........

الدكتور : لا تقطع الأمل بربك ..

حمد : ان شاء الله

الدكتور : خلاص عيل بخليكم الحين .. تامرون بشيء ؟؟

حمد : لا .. بس بغيت أسألك إذا المريضه تعرف ولا لا ؟؟

الدكتور : الصراااحه لين الحين ما قلنالها ... باجر الصبح بنقولها ولازم حد منكم يكون معانا ..

حمد : ان شاء الله

الدكتور : يالله عيل بخليك

حمد : مشكوور يا دكتور ..

الدكتور : العفو والله ..

يروح الدكتور .. حمد يشوف الساعه .. الساعه ثنتين إلا عشر..حمد يصد صوب اخته اللي على حالها .. ويرد يصد صوب امه .. اللي منزله راسها بعد بس أهون عن حال حصه.. ورد يصد صوب حصه .. تنزل دمعه من عيونها .. حمد ما تحمل هالوضع.. حمد يحب حصه وااايد وما يحب يشوفها بهالوضع.. سار صوبها .. يلس عدالها .. رفع راسها بإيده .. مسح دمعتها..

حط ايده على ايدها ..

حمد : حصه

حصه : .............

حمد : خلاص ما أبغيج ترمسين .. أبغيج بس تسمعين وتركزين في اللي أقوله ..

حصه :...........

حمد : الله ابتلا مهره بالمرض .. وهذا شيء الله كاتبنه ولا بيدننا نسوي شيء عسب نمنع قدرنا ...

حصه :........

حمد :الدكاتره بيسوووون اللي عليهم .. بيحاولون يساعدونها وطبعا مساعدة الرب هيه الأولى

حصه : ..........

حمد : ولازم انتي بعد تسويين اللي عليج ..

حصه : ( بنبره متقطعه وحزينه) شو قصدك؟؟

حمد : قصدي أنج تخففين عنها وترفعين معنوياتها وتقنعينها أن ما شيء عند الرب مستحيل ..

حصه : (تمسح دمعتها) .. بحاول ..

حمد : ما أبغيج تحاولين .. أبغيج تنفذين هالرمسه .. إذا كنتي تحبين مهره فسوي اللي قلتلج اياااه .. لأنها وفي هالوقت محتاجة لهالشيء ..

حصه : ان شاء الله

حمد حب حصه على راسها ..

حمد : انا بسير أدور عن حجرة فاضيه نبات فيها اليوم ...

حصه : وحاول تحصل حجره قريبه من مهره ..

حمد : ان شاء الله ..

سار حمد صوب الرسبشن .. ودور عن حجره فاضيه .. وبعد عناااء من البحث حصل حجره بينها وبين مهره حجره ...

سار حمد صوب هله .. ووداهم الحجره .. أم حمد رقدت على السرير وحصه رقدت على الكرسي اللي يتحول إلى سرير .. وحمد طلع عنهم برع .. ركب سيارته .. طلع عن حدود المستشفى .. ما عرف وين يرووّوح .. فما لقى غير البحر اللي بيواسيه ... سار صوب الممزر .. نزل من السياره .. سار ويلس على وحده من الحصى الكبار المجابلات للبحر..

شبك ايده ونزل راااااسه .. وتنهد .. فجأة يخطر بباله حارب..

حارب أقرب واحد لقلبه .. صح أن مانع وياه 24 ساعه بس مع ذالك يرتاح مع حارب أكثر عنه بشوي..

طلع حمد تلفونه .. دور رقم حارب.. اتصل له .. فجأة يوم شاف الساعه كانت ثنتين ونص .. سيده كنسل الاتصال ..

حمد : يا فضيحتيه شو أبى بالريال هالوقت ... ويصيح تلفونه .. المتصل.. حارب بن سالم

حارب : مرحبااا والله

حمد : مرحبتين ..

حارب : علومك ؟؟

حمد : الحمد لله

حارب : غريبه .. أول مره تدق لي مس كوول وفي هالوقت ..

حمد : السموحه عيل .. أزعجنااك

حارب : لا والله .. أصلا منو قالك أني كنت راقد ..

حمد : عيل؟؟

حارب : تبغي الصرااحه .. ما ياني الرقااد .. حاس بظيجه ما أعرف من شو ؟؟

حمد : ووين دارك الحين ؟؟

حارب : طلعت شوي عسبة أغير جو.. أنا الحين في طريجيه صوب الممزر..

حمد : أنا في الممزر ..

حارب : احلف ..شو يوديك هناك هالوقت ؟؟

حمد : انته تعاال وبعدين بخبرك..

حارب : حمد .. شو مستوي ؟؟ زيغتني

حمد : حاارب والله اني محتاجلك الحين ..

حارب : افااا يا بو شهاب الحين ياينك..

ويبند حمد عن حارب ..

وبعد ثلاث دقايق ..

يبركن حارب سيارته عدال سيارة حمد ..

سار حارب صوب حمد ويلس عداله ..

حارب : خير يا بو شهاب .. شو بلاك؟

حمد : ...........

حارب : حمد أرمسك أنا ..

حمد : شو تباني أقولك ؟؟

حارب : كل الي بخاطرك

حمد : أقوولك شو ولا شووووو.. يا حارب

حارب : حمد لا تلعب بأعصابي ..قول يالله

حمد : أقولك أني توني ياي من المستشفى

حارب : بسم الله الرحمن .. شو مستوي ؟؟

حمد : مهره ...

عااااد تخيلوا شكله ..

حارب : مهرررررررررره .. شو بلاها ؟؟ شو مستوي .. دخيلك يا حمد ارمس..

حمد : مهره فيهااااا ......

حارب : ( معصب ) حمد ارمس أحسن لك..

حمد : مهره فيها سرطان الدم

حارب : ( مب مستوعب ) شوووو تقوووول ؟؟

حمد : مثل ما سمعت..

حارب : مهره ... مهره بنت عمي ثاني ..

حمد : هيه مهره بنت عمي ثاني..

حارب انصدم .. ما رام يرمس.. عيونه خانته .. نزلت دمعه واللي قيس ما حاول يمنعها من انها تنزل ..

حارب : لا لا إلا مهره..

حمد : ...........

حارب : ( يود راسد بإيده )

حمد : ( يحط ايده على ظهر حارب كأنه يحاول يهديه ..

حارب : فديتك يا حمد أنك تقول أن الرمسه اللي قلتلي اياها كلها جذب.. وأنا مهره ما فيها شيء .. دخيلك قول ..

حمد : ( مستغرب من ردة فعل حارب اللي في عمره ما توقعها منه ) حارب .. أنا مودنها المستشفى فيا اميه وحصه .. وأنا اللي رمسني الدكتوووور.. كيف تباني أجذب عليك ..

حارب : ( بعد ما وقف ) في أي مستشفى ؟؟

حمد : مستشفى دبي

حارب سار صوب سيارته .. وغايته مستشفى دبي..

حمد : حارب .. حارب..

حارب ما سواله سالفه .. كان كل همه يشووووف رووح قلبه ويتأكد بنفسه ..

حمد ركب سيارته ولحق حارب ..

وصلوااااااا المستشفى .. حارب يمشي شرات المينوون .. ما يعرف وين يسير ..

حمد وراه يحاو يلحق عليه..

حمد : حارب.. حارب..

حارب سمع صوته .. لاكن بعد كمل طريجه

حمد : ( بعد ما وقف جدام حجره مهره ) حارب ... مهره في هالحجره ..

حارب من سمع طاري مهره وقف محله .. رد وسار صوب حمد ..

حمد : شو ناوي تسوي؟؟

حارب : هاذي حجرتها ..

يتبع ,,,

👇👇👇