رواية طحت طيحه في هواكم -26
ام حارب : شو بتقولي بعد غير انك موافق .. أدريبك تبغي البنت ..ولدي وأعرفك
حارب : ( منصدم ) هاه وانتي منو قالج هالرمسه ؟؟
ام حارب : منو بيقولي بعد ... إلا روحي .. انت خل عنك الحين .. تبغي البنت ولا الشو
حارب : ( يتجرب من امه ويحب راسها ) هيه نعم ابغيها يا اميه .. أبغيها ..
ام حارب : بالبركه فديتك .. ان الله راد باجر بنسير صوبهم ..
حارب : باااااااااااجر .. لا لا يا اميه .. اليوم المغرب أحسن
ام حارب : عنبوووو يا ولدي ..هب عيله فيك .. ما أدري منو توه يقول مب جنج استعيلتي
حارب : اميه كنت خبيل .. دخيلج المغرب ..دخيلج
ام حارب : ههههههه ما عليه يا ولدي .. الله يكتب اللي فيه الخير ..
وتدش رفيعه ..
رفيعه : أنااااااا ييت .. ويبت ذيباني ويايه فديت روحه
حارب : فديت هالظيه انا .. هاتيه هاتيه من يومين ما شفته .. ( ويشله وتم يحببه ويلعب وياه )
ام حارب : رفيعه ..جربيلي التلفوون عسب أرمس قوم عمج
رفيعه : قوم عمي ؟؟
ام حارب : هيه قوم عمج .. هاتي التلفون يالله
رفيعه : ان شاء الله
وتقوم رفيعه وتييب التلفون .. وتتصل ام حارب بأم راشد ووتتفق وياها ..
وفي نفس الوقت رفيعه تغمز لحارب تبغي تعرف شو السالفه .. بس حارب مسولها أكبر طاف .. ما قالها .. وعاد هنيه حست بالقهر إلا تعرف شو السالفه ..
ام حارب : تسلمين والله ..
ام راشد : حياكم الله يا ام حارب .. البنت بنتكم والشور شوركم ..
ام حارب : يسلمج ربي غناتي.. يالله عليل أترخص منج الحين بسير اشوف الدهن مخلتنه علىالظو ..
ام راشد : الله يحفظج
ام حارب : مع السلامه
رفيعه : اميه اميه اميه .. شو السالفه ..
حارب : اميه لا تقوليلها ..
ام حارب : ويدي .. كيف ما أقولها وهيه اختك..
رفيعه :هيه صح .. يالله يا اميه قولي..
ام حارب : اخوج بياخذ بنتعمج مهره
هنيه عااااااد ما أقدر أوصف لكم شعوووور رفيعه .. استانست من الخاطر ..
رفيعه : والله .. الله والله ما أصدق
حارب : برايج .. هب لازم .. يالله .. شلي هالمفعوص من عندي ..
ام حارب : وين بتسير بعدك ..
حارب : بسير الله يسلمج الحلاق .. وعقب بسير الكوفي عند الشباب ..
ام حارب : الله يحفظك .. بس هب تتأخر على الغدا..
حارب : لا فديتج .. ما بتغدا عندكم اليوم .. ربيعي علووه عازمنا علىالغدا ..
ام حارب : ما عليه .. الله يحفظك
حارب : يالله مع السلامه ..
رفيعه وامها : مع السلامه ..
ويطلع حارب من البيت .. وحس أنه أسعد إنسان في الكووووووووووون كله .. وكان يعد الساعات عن المغرب ..
وعقب الغدا .. راشد خبر ابوه وامه عن سالفه فاطمه .. والكل استانس .. لان من أولها البنت هب داشه مزاجهم .. وكملوا اليوم عادي ولا جنه استوى شيء .. وصل المغرب .. حارب وامه وابوه ورفيعه وصلوا .. استقبلهم راشد وابوه .. وتم هاليوم على خير .. حارب خطب مهره ... وعقب ما أتموا هالمهمه ردوا البيت .. بس رفيعه ما ردت .. مهره ما بغتها تروح عسب ما تبات روحها لان على قولها ما تعودت ترقد في هدووء بدون حشره ميره .. حارب وده يطير سابع سما ويرد مره ثانيه الأرض .. الفرحه اللي حاس بها صدق عوضته عن أيام الحزن اللي خطفن .. وصدقه اللي قال .. الصبر مفتاح الفرج ..
وفي العين .. ميره يالسه في الصاله اللي فوق ووياها حصه تهديها .. ميره تصيح .. وتصيح
حصه : بس يا ميره بس.. هالصياح ما بينفع الحين
ميره : اكيد الحين هوه في بيتهم ... اكيد ..
حصه : يا ميره .. خلاص هاي قسمه ربج
ميره : يا ما نصحته .. الحين شو بيفكنا من العذاب اللي بتدخله في حياتنا ..
حصه : الحمد لله على كل حال .. ذكري ربج يا بنت الحلال ..
ميره : لا إلاه إلا الله ...
وشوي أن منصور يدش عليهم ..
منصور : السلام ..
حصه : بسم الله .. العرب قبل لا تدش تتحنحن تسوي شيء .. هب تدش منيه والدرب ..
منصور : احم احم .. بس الله .. شو بلاج ميره .. حد عاطنج بكس على ويهج ..
حصه : ويا راسك .. صدق انك متفيج .. نحن وين وانته وين ...
منصور : لا والله جد شو بلاج ؟؟
ميره : ما شيء ..
منصور : عمي جدامج .. عبالج ما اشوف..يالله ارمسي .. شو بلاج؟؟
مهره : صدقني ما شيء ..
منصور :انتي قصي عليه .. شو وراج .. خلصتن ثنويه وتكبرتن علينا ..
حصه : هيه صح انزين .. شو دراك ..
منصور : أقووول .. أنا اللي ما عندي سالفه ياي عندكن .. ( ويشوف ساعته ) اوووووووووووووووووووووووو وووووووف .. ويسير صوب التلفزيون ويشغله ..
منصور : اوووووووووب من 12 دقيقه باديه .. زين لحقنا عليها ..
حصه : والله انك متفيج ..
منصور : خلج خلج انتي مع الحزينه .. وخلني أتابع المباراه .. ( وانسدح على الغنفه )
حصه : ( بصوت واطي شوي ) ظنج ليش ما سووا حفله للملجه
مهره : وهاي يبالها حفله بعد .. لو تستاهل جان سوولها ..
حصه : لا والله .. أرمسج صدق أنا
مهر : اونه امها مريضه وما بغوا يسوون حفله ..بس توقيع وخلاص ...
( حصه بعد هب أقل من ميره ..نارها نارين .. حست بظيج .. بس ما في اليد حيله .. لازم تستسلم للأمر الواقع .. هيه متزوجه الحين .. وهوه بيتزوج اليووووم )
وباليوم الثاني يو قوم ثاني بن محمد .. وهم ما خبروا اهل العين عن ييتهم عسب ما يتعبلون ويذبحون ويعبلون عمارهم ..
وفي الصاله تحت راشد والشيبه محمد وام حمد وام راشد ومهره وعلاوي .. اما بو راشد استأذن منهم .. بيسير بيسلم على ريال وبيرد .. وشوي ان ميره تنزل .. تسير صوب امها وتسلم عليها وتسلم على ميره ويدها بعد .. اما راشد أبدااااا ما عطته سالفه تمت واقفه محلها ما تتحرك ..
راشد : استغفرالله .. سلمي انزين ..
وتضطر ميره تسلم عليه بس حشمه ليدها وامها وخالتها ..
راشد : عنبووو هالراس .. بلاج ...
ميره : ...........
راشد : أقول اميه .. يالله نرد دبي ..
ام حمد : وليش؟؟
راشد : برد أخطب النحسه فاطمه مره ثانيه ..
ميره تعجبت .. بس بعدها ساكته ..
راشد : يالله علينا ... بسج عاااااااد .. البنت وما بناخذها .. ولا زعلانه لاي ما باخذها ...
ميره : ( منصدمه ) شوووووووو ؟؟ ما بتاخذها ..
راشد : ( يبتسم ) لا .. كنسلنا
ميره : احلف ..
راشد : برايج لا تصدقين ..
ولا إراديا ومن الفرحه اللي في ميره تقربت من راشد ولوت عليه بقوووووووووووووو ..
راشد : آآآآآي كسرتي ضلوعي ..
ميره : عاااااادي ... فديتك والله
ركز راشد في ويه ميره .. ولاحظ بقعه حمرا بس هب وايد باينه
راشد : شو بلاه غزج ( خدج ) من تحت ..
يودت ميره خدها .. هنيه ظحكن مهره بس بدون محد يشوفها ..
ميره : بصوت واطي .. تستهبل أونك ..
راشد : لا والله توني أشوفها ..
ميره : تحيد ذاك الطراق ..
هنيه حس راشد بظيج يوم تذكر السالفه .. ويسحب ميره عداله .. وييلسووون ..
راشد : ( يقرب راسه منها ) اسكتي اسكتي .. لا تذكريني ..
ميره : ما شاء الله مسرع ما نسيت ..
راشد : اص لاحد يسمعج .. خلينا من هالسالفه الحين ...
وهنيه تموا كلهم يسولفون ويظحكوووون .. وعقب مهره سحبت ميره وياها فوق عسب ييلسن ويا حصه .. اللي كانت تتسبح يوم وصلوا .. وتفاجئت بوجودهم واستانست ..
ميره أول ما شافت خصه لوت هليها ..
حصه : شو هالحب الزايد ..
ميره : رشود ما بياخذها ..
حصه : شو ؟؟ما بياخذ شوو؟
ميره : ما بياخذ فطوووووووم
حصه حست هنيه بفرحه محد يتصورها
حصه : حلفي
ميره : وحياااااااتج عيل
حصه : الحمد لله .. ربج فككم منها ..
مهره : الحمد لله ..
حصه : انزين مهروه .. شحالج بعد وشو علومج .. ما شيء أخبار منيه ولا منيه ..
مهره : ( مستحيه ) هاه ... هيه أنا بخير الحمد لله
ميره : ههههههههه بسم الله بلاه ويهج غدا طماطه ..
مهره :انا .. لا ما شيء
حصه : أقص ايدي اذا ما كان في شيء
مهره : .........
ميره : هاهاهاي .. السالفه صدق فيها شيء ..
قالت مهره السالفه لهم .. والبنات استانسن من الخاطر عليها ...
وعلى المغرب زقر راشد ميره .. ظهرت ميره وكان راشد يترياها برع جدام الباب ...
راشد : يالله تعالي ..
ميره : وين ؟؟
راشد : ما تبغين تحوطين
ميره : أبغي .. أكيد أبغي ...
راشد : عيل يالله
ميره : صبر بييب عباتي
راشد : ما يحتاي .. السياره مخفي .. يالله بسرعه ..
ميره : انزين صبر بخبر اميه
راشد : اوووووووووف منج .. ما يحتاي .. ما بنطول ..
ميره : على قولتك .. يالله ورااك .. بلبس نعالي ..
ويسيرون راشد وميره يتحوطون .. وفي السياره ...
ميره : وين بتوديني ؟
راشد : وين بوديج بعد .. وحد قالج بتنزلين أصلا
ميره : عيل ليش تحوطني دام انك ما بتنزلني
راشد : بس جيه .. شوف وحراق يوف
ميره : انزين ..على الأقل عرقوب
راشد : لا عرقوب ولا شياته .. ما تنزلين من السياره
ميره : عيل جيه ظاهره برع البيت أنا ..جان يلست أحسن
راشد : بنخطف على الدكان ولا على الشيشه ..
ميره : بس
راشد : هيه بس .. عيل شو تبين ؟؟ أوديج الموووووول مثلا
ميره : لو أني بعباتي جان قلت هيه .. بس شيله البيت .. نووو وييي
راشد : بعباتج ولا بدون عباتج .. منو بيخليج أصلا
ميره : طبعا انته ..
راشد : هاهاهااااااي ظحكتيني ..
ميره : انزين بس عرقوب .. دخيلك
راشد : يصير خير
ميره : اشوااااااا..
وتموا ساكتين شوي ..
راشد : ميره
ميره : نعم
راشد : بعدج زعلانه
ميره : ..... لا
راشد : صدق
ميره : هيه صدق
راشد : انزين .. سوري على الطراق
ميره : ................
راشد : ميره بقولج شيء ما قلته لحد غيرج ..
ميره : شو؟؟
راشد : ( يصد برع الدريشه)مب فاطمه اللي ما بغتني .. أنا اللي ما بغيتها
ميره : كيف يعني؟؟
راشد : يعني انا اللي قلتلها ما أبغيها .. وقلت لها تقول انها هيه اللي ما تبغيني .. ظهرت الرمسه اللي عليها صدق
ميره : .............
راشد : بلاج سكتتي ؟؟
ميره : ما شيء .. أقول خلنا من سالفه فاطمه الحين .. الحمد لله أنك افتكيت منها قبل لاتملج عليها .. وخلنا الحين في وعدك
راشد : أي وعد
ميره : ما شاء الله ... لحقت تنسى..وين اللي بيخطف على الشيشه ..
راشد : انزين خلينا نخطف على شيشه .. بعدها جدام هب هنيه ..
وفي البيت .. بيت قوم حمد بن سهيل .. البيت انجلب من لفرحه للحزن في لمح البصر .. وهذا بعد ما سمعوا بخبر الحادث اللي مسونه خالد ووياه سالم .. كانوا يايين عندهم بيسلمون وعلى اللفه ظهرت لهم سياره كانت مسرعه وما انتبهت لهم لان اللفه مانت عدال بيت .. ويوم لفت كانوا قوم خالد ويسالم على الخط .. ومن العيله اللي في الريال اللي في السياره الثانيه لف في المكان الغلط ودش رونق سيد ..وصفقت السياره فيهم .. سياره الريال انجلبت عدال الشارع .. طعا بعد عده جلبات لانه كان وايد مسرع .. أما خالد وسالم فدعمت سيارتهم في عمووووود الليت اللي عالشارع..
يت الاسعاف وشلتهم .. الريال الله واعلم بحاله .. شكله ما بيعيش .. بس الله القادر على أي شيء .. وسالم الحمد لله ما تظرر وايد .. كسر في ايده وجرخ في يبهه وعده كدمات .. وخالد .. آه يا خالد .. العمود كان صوبه .. فهوه اللي تظرر أكثر عن سالم .. فعسب جيه اضطروا يحطونه في العنايه المركزه هوه والريال .. حصه أول ما درت تمت تباغم وتصيح .. وتقول ودوني صوبه... شلها حمد وشل امه بعد وساروا المستشفى بسرعه .. وهناك حصلوا ام خالد واخوه العود بعد .. حصه أول ما شافت ام خالد تمت لاويه عليها وتصيح .. وحتىام خالد .. راشد أول ما درا بسرعه خطف ميره البيت ودايركت على المستشفى .. وصل .. حصل الكل جدام الغرفه ..
راشد : هااااه .. طمنوني .. عسى ما عليه شر ..
وشوي أن النيرس تطلع من الغرفه ..
النيرس : الاخ راشد
راشد : نعم
النيرس : المريض عاوز يشوفك ..
راشد : ان شاء الله ..
دش راشد .. شاف خالد .. وتمنى انه ما شافه .. آآآخ يا خالد الموت أهون لك من هالعذاب .. كان صدق حال خالد لا يسر لا صديج ولا ونيس .. ويهه متسحت والدم متيمع في ويهه وشكله من الخاطر يعور القلب
راشد : خطااااااااك الشر يا خالد ..
هز خالد راسه ..
حاول خالد يتكلم بس ما قدر .. كان يتأتأ بكلمات هب مفهومه ..
راشد : خير يا راشد .. شيء فخاطرك تبا تقوله ..
خالد : ح .....حـ .......صه
راشد : بلاها ..
خالد : ...........
راشد : ارتاح الشيخ .. هب زينه الرمسه الوايده عليك
خالد : حـ ـــ ......ـصـ ــ ـه .. خلــ ...ـها في عيونك
راشد : شو هالرمسه يا خالد .. بتقوم بالسلامه ان شاء الله وانته اللي بتخليها في عيونك ..
خالد : را .. شـ....د..
راشد : نعم
خالد : حصــ..ـه تحبك يا راشد
هنيه انصعق راشد .....
راشد : ..............
خالد : ابغيك تاخذها عقب ما أموووت
راشد : ( الدمعه في عيونه ) بعيد هالطاري عنك .. ما عليك شر الغالي.. ان الله رايد بتطلع بالسلامه وانته اللي بتاخذها ..
خالد : ( رمسه متقطعه ) لا .. اليوم يومي .. أبغيك تداري عليها .. حصه تستاهل يا راشد
راشد : .............
خالد : ازقرها ...
راشد : ان شاء الله ..
خالد : وأبـ ـ ـغيـ ـ ك ويـ ـاهـ ـــاا ..
راشد : من عيوني ...
ويطلع راشد ويقول لحصه أن خالد يبغيها .. دشت حصه .. حست شعر ينبها وقف.. عيونها امتزرت دمووووووع ..
خالديحرك ايده شرات الواحد اللي يزقر حد .. تتجرب حصه منه .. وبعيد راشد واقف ..
ويأشر خالد لراشد .. تجرب راشد .. يود خالد ايد حصه .. وبالايد الثانيه ايد راشد ...
خالد : وعـ ــ.....ـ ـدوني
راشد : بشووو ؟؟
خالد : ( رمسه متقطعه وتطلع بصعوبه ) أنك تاخذ حصه من بعد عيني.. وانتي يا حصه .. تاخذين راشد ..
حصه ما رامت تتحمل الرمسه .. حست انها بتموووت ويا خالد .. ما رامت تتحمل فكره أن خالد يرحل عن هالدنيا ..
خالد هنيه تم يتنافض .. وشوي أن النيرس تدخل بسرعه ..
النيرس : من فضلكم اطلعوابرع .. بسرعه .. ويدخلن نيرسات ثنتين بعد .. وحده تحطله اكسجين ووحده ما أعرف شو تخربط .. ويطلعون حصه و راشد برع .. ثلاث دقايق .. تطلع النيرس ..
النيرس : البقيه في حياتكم ..
مات خالد وترك العالم يصيحه .. حصه ماتحملت الوضع واغمى عليها .. وام غايه انهارت ... راشد ما تحمل الوضع .. صاح على خالد .. صح انه شايل في قلبه عليه .. بس خالد انسان ما يتعوض.. طيبه قلبه مغطيه على الجميع .. ..
مرن خمس شهور .. رفيعه وحمد بعدهم متزاعلين .. مهره وافقت على حارب .. حارب سافر .. مهره وميره دشن الكليه وحصه دشت الجامعه.. فاطمه اعتدلت عقب الطراق 180 درجه ... دشت الشريعه وكملت دراستها ..راشد خطب حصه وملج عليها بعد ..والعرس عقب شهرين .. كانت نفسية حصه عقب ما توفىخالد كلمه زفت شويه عليهااااااا .. فقدت ابوها ... اخوهاااا ... ريلهاااا ...كان الأمر وايد صعب عليهاا .. وعلى الكل بعد ... بس الحمد لله الحين أحسن .. صح أن طيوف الغالين كانن دايمن يزورنها .. فما كانت تمنع نفسها من الصياح ...
اليوم الاربعاء ... باجر ملجه مانع وميره .. هل العين ساروا دبي عسب يباتون عندهم .. وبالغلط كانت رفيعه يايه البيت عندهم.. وحمد كان وفي نفس الوقت نازل من سيارته وبيدخل البيت ..
حمد : السلام عليج
رفيعه : وعليكم السلام والرحمه ...
حمد : شحالج الشيخه ؟؟
رفيعه : بخير الحمد لله ..
حس حمد من لهجه رفيعه أنها متغيره عليه .. استوت تكلمه شرات قبل .. يعني هب زعلانه .. استانس حمد .
حمد : (( وينزل لمستوى رويض ))هلا رويض وينج انتي ؟؟..
روضه : داخل بيت
حمد : ههههههههه أدريبج داخل البيت ..
رفيعه : ( ودها تظحك ) أترخص عنك .. بسير داخل ..
حمد : الله يحفظج
سارت رفيعه داخل وتاريا حمد شوي عقب سار الميلس .. وتم يسولف ويا الشباب ... وشوي أن منصور يدش وشاق الحلج ووياه راشد ..
حمد : ههههههه بلاك ؟؟
راشد : الاخ نجح في الترااااااااي .. صفقوله ..
وتموا يتظاحكوون ..
منصور : حمد الحين ماا عندك حجه .. الليسن وخذته
حمد : ان شاء الله ولك مني السياره بعد .. وشو تبغي أكثر من جيه ..
منصور : واللللله .. أشكر فنك انا .. هالاخو ولا بلاااااش
مانع : الحايه بنت حرااااااااام ..
والكل تم يظحك ويسولف..
مرن شهرين ونص .. حصه وراشد عرسوا .. سافروا اسبوعين وردوا .. حمد تشجع وسار وخطب رفيعه .. وتفاجأ بعد كم يوم بالموافقه ... استااااااااااااااااااانس .. وتأكد انها هب حاطه في خاطرها منه.. وعقب اسبوعين ملج عليها .. والعرس عقب شهرين .. وعقب الملجه بثلاث أسابيع .. سوا حمد تلفون لرفيعه وتم يسولف وياها ...
حمد : ايه .. ما قلتيلي شو استوا .. كيف اقتنعتي أن رمستي صدق
رفيعه : في حد يكلم حرمته ويقولها ايه ..
حمد : اووه سوري .. يالله كملي
رفيعه : اونك راضيتني الحين
حمد : يالله عاد ارمسي
رفيعه : مها سوتلي تلفون وقالتلي السالفه
حمد : ( منصدم ) .......
رفيعه : بلاك
حمد : لا لا ماشيء .. بس ما توقعت انها بتقولج
رفيعه : ليش؟؟
حمد : خلاص خلاص .. ما شيء
رفيعه :زين
حمد : وشحالها هيه بعد .. ؟؟
رفيعه : نعم .. خير ان شاء الله .. شو تبابه حالها..
حمد : لا لا ما أبغيه خلاص هونت ...هههههههه
رفيعه : عبالي بعد ..
حمد : ........
رفيعه : حمد
حمد : عيونه ..
رفيعه : تسلم .. بس ياليت ما تتصل مره ثانيه
حمد : أفاااا ليش.؟؟ شو سويت بعد
رفيعه : ههههههه ما شيء ..
حمد : عيل..
رفيعه : ما أبغيك ترمسني ليش العرس؟؟
حمد : ليش انزين ؟؟
رفيعه : بس جيه ..
حمد : عكيفج هوه .. برمسج يعني برمسج .. واذا ما رديتي عليه كل يوم بطب بيتكم ..
رفيعه : اووه صح .. ولا تفكر تشوفني بعد ..
حمد : ههههه حلوه النكته ..
رفيعه : لا والله صدق .. لا ترمسني ولا تشوفني لين العرس
حمد : انزين ليش؟؟
رفيعه : انته سو هالشيء وبعدين بقولك ليش ...
حمد : اممم ما أقدر
رفيعه : عشان خاطري..
حمد : نووو ويي
رفيعه : دخيلك ...
حمد : اممممم .. اوجيه بس بشرط ..
رفيعه : شو ؟؟
حمد :أبغيج تقوليلي فديتك
رفيعه : مصختها عاااااااااد .. يالله مع السلامه ..
حمد : ايه ايه صبري..
رفيعه : رد يقولي ايه ..
حمد : المهم .. اوكيه.. ما برمسج ولا بسوفج .. بس بشرط
رفيعه :شوووووو ؟؟
حمد : مسجااااات ..
رفيعه : اممممممم هذا مسمووح..
حمد : خلاص عيل اتفقنا ..
رفيعه : اوكيه .. يالله عيل بخليك
حمد : مع السلامه ..
مرن شهر و اسبوع .. واليوم العرس.. عرس ولا اروع .. البنات كل وحده أحلىمن الثانيه ما شاء الله عليهن .. ورفيعه ماشاء الله لا الاه الله عليها كلمه قمر شويه عليها .. ماشاءالله عليها جميله بمعنى الكلمه .. .. والشباب حالتهم حاله.. يواله وربشه .. وحتى الحريم .. البناات ينعشن .. والحين بيدش حمد .. دش حمد مع حارب وخليفه وبو خليفه .. ما سلم حمد على العروس لين ما يبس وتم ايووول لها .. عااااد رفيعه تخبلت .. وتم هاليوم على خير ...
وفي الفندق .. رفيعه يالسه .. وحمد عدالها ..
حمد : عرفت ليش ما تبغيني اشوفج .. كنت تخافين عليه أتروّ ع ( أخاف ) ولا أتعقد نفسيا من شكلج ... بسم الله .. كيف روضه متحملتنج طول هالفتره ..
وهنيه تشوفه رفيعه بنص عين ..
حمد : أتمصخر وياااااج انزين .. .... اتصدقين اني متوله عليج وااااااايد ..
رفيعه : هههههههه وهذا المقصوووووود
حمد : رفيعه ..
رفيعه :نعم ..
حمد : طحت طيحه فــ.... ( وقبل لايكمل حطت رفيعه ايدها على ثمه (
رفيعه : في هواك......
النهــــاية
اتمنى ان تنال اعجابكم والسموحـــــــــ ـ ـ ـ ــــــــــــــــــــــــة
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تجميع / ♫ معزوفة حنين ♫ ..
اللهم لك الحمد حتى ترضى وإذا رضيت وبعد الرضى ,,, اضف تعليقك