رواية طحت طيحه في هواكم -9
رفيعه : اسمحيلي والله .. اصلا نحن ما درينابه الا اليوم الصبح وهوه ياي البارحه فليل .. ومره على الساعه عشر الضحى روحنا صوب خالتيه ولين ساعتج هاذي ..
فز قلب مهره من مكانه .. يالله متى رد؟؟ والله اني متولهه عليه .. يا ربي .. اباااا أشوفه .. مع هالوله والشوق كله ما ظهر منها الا هالجمله عشان ما تبين اللي في قلبها ..
مهره : الحمد لله على سلامته
رفيعه : الله يسلمج من الشر
وشوي ان شمه تدخل عليهن وسلمت على رفيعه ويلسن يسولفن .. قامت مهره من مكانها وسارت صوب البلكونة ويلست هنااااك .. وتنهدت بقووو..
آآآآآآآآآآآآآآه ما أصدق انك رديت .. يالله يا كثر ماني متوله عليك .. متى بشوووفك .. يالله وأخيرا بشوفك عقب سنة ونص بعاااااد .. يارب عجل لقانا .. وشوي تشوف منصور وغيث ظاهرين من الميلس ويوم وصلوا نص الحوي شافت حد داخل من الباب .. ويوم ركزت عدل طلع انه حارب.. اللي التقى ويا منصور وغيث ويلس يسولف وياهم شوي .. يلست مهره تراقب حركاته حركه حركه .. يا الله يا حاااارب بعدك على حركاتك ما تغيرت .. لا تغيرت طولت شوي .. زين اني شفتك والله .. بس هالشوفه ما تسد وايد بعيده .. هذا اللي في قلب مهره لا قصدي جزء منه .. لان اللي في قلبها شيء ما يوصف .. ما تروم تظهره لان طبيعتها وهدوءها يحكم عليها هالشيء .. بس ان شاء الله ايي اليوووم اللي راح تظهر مهره كل اللي في قلبها .. بس متى ؟؟ الله يعلم .. مع الأياااام بنعرف ...
ظنكم انهم بيتلاقون وجها لوجه؟
وشو هيه المقالب اللي راح يسويها منصور؟؟
هل حمد بيشوف رفيعه ؟؟
وشو بيستوي بينهم ؟؟
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الثامن
عقب ما تلاقا حارب مع منصور وغيث وراشد و كمل حارب طريجه للميلس وسار عند حمد ومانع اللي تواعد وياهم.. ويوم دخل عليهم ..وايههم ويلس عدالهم ..
حارب : ليش ما سرتوا تتحوطون وياهم ؟؟
حمد : نسير وياهم ؟؟ جيييه تخبلت انته .. روحي يوم اسير فيا راشد وغيث أتخبل .. لا وهالمره منصور وياهم .. جيييييه ما ابا عمري انا
حارب : ههههههه أسميك انك ..
حمد : اني بو شهاااااب
حارب : هيه نعم .. اقول بو شهاب هب تنسى تراكم كلكم باجر معزومين عندنا ..
حمد : ان شاء الله الشيخ .. هب ناسي ..
حارب : وحتى عربك يا مانع ..
مانع : هههه الله يخس بليسك .. الحين اميه سويتها عرب
حارب : ههههه السموحه .. أطري امك
مانع : اوكييييييييه
حارب : تماااام عيل .. يالله شلوا عماركم وقمنا نتحوط
حمد : وين؟
حارب : لازم تسال يعني .. قم يالله
حمد : هههه اوكيه .. بس اصبر شوي بقولهم يطرشولي كندورتيه وسفرتيه ..
حارب : ما يحتاي اللي عليك زينه
مانع : شو عليك انته .. ياي من بيتكم متكشخ ..
حمد : هههههههه ويا راسك بعد لازم نتكشخ شوي ..
حارب : ويا راسك انته .. يالله خلصونا
شغل حارب التلفزيون ويلس يجلب في هالقنوات لين ما يخلص حمد ومانع .. سوا حمد حق امه تلفون وقالها تطرش فيا البشكاره سفرته وسفرة مانع وكندورته وكندوره مانع .. وبدلوا حمد ومانع ثيابهم وساروا يتحووطون ..
وعند البنات وعقب ما تعّشن..
ميره ومهره وحصه ورفيعه يالسات في الصاله اللي فوق ..وشمه ترخصت عنهن وسارت ترقد لانها كانت تعبانة شوي
مهره : رفوع وين رواضي؟؟
رفيعه : شلتها ريتا وودتها البيت
ميره :اهاا.. أقول رفووووع ..
رفيعه : عيوووونها
ميره : تسلمين والله .. بس بغيت أسألج ؟؟
رفيعه : عن ؟؟!!!
ميره : شو مخططاتج لليوم ؟؟
رفيعه : الصراحه سؤال عجيييب .. ويا ويهج وهذا سؤال؟؟ شو مخططاتي بعد غير اني برد البيت وبنخمد
ميره : اهااااااااااااا .. ويهون عليج هاليمعه وهالسوالف .. والفلم اللي طرشت رشود يشتريلي اياه واللي راح نسهر عليه والكيرم و...........
رفيعه : بس .. حرااااااااااام عليج .. يعني لازم تقهريني ؟؟
ميره : ايوووووووووووه
حصه : رفوع باتي اليوم ويانا هنيه ..
مهره : هيه والله .. ( وتغمز لها ) بتفوتج السوالف
ميره : والفلم
حصه : واليمعه
رفيعه : اووووووووه يا ربي ردن على المغايظ .. خلااااااااص بشاور العيوز أول ..
سارت رفيعه صوب التلفون واتصلت حق امها وقالتلها انها بتبات عندهم .. و رفضت بسبب الشبيبه بأنهم في بيت ثاني بن محمد واللي هم غيث وحمد ومنصور .. فما يستوي هالشيء .. وردت وعطت السماعه لميره جااد تغير رايها..و عقب ما غسلت ميره راس حرمة عمها وقالتلها الشباب كلهم محد في البيت وكلهم بيرقدون برع في حجرة الضيوف اللي عدال الميلس .. فوافقت على ان رفوع تباااات .. وكله بسبة ميره اللي عندها اسلوووووب اقناع لا يعلى عليه .. ويوم بندت ميره السماعه كانت ملامحها حزينة وكانن البنات يشوفنها وكلهن أمل ..
حصه : هااا شو قالت ؟
ميره : حاولت وياها وبعدها مصره على رايها ..
رفيعه : انزيييين ليش ؟؟
ميره : اونه الشباب اللي عندنا
مهره : وشو يخصهم انزين ؟؟
رفيعه : خلاص غسلن ايدكن انتن ..
حصه : والله كان ودي انج تباتين
رفيعه : شو نسوي بعد ما باليد حيله .. ان شاء الله المره اليايه ..
وقفت ميره من مكانها وسارت عند باب حجرتها وقبل لا تدخل صدت صوبهن وابتسمت ..
ميره : رفووووع (( ويوم انتبهت رفوع لها )) واااااااحد صفر
مافهمت رفيعه المقصود بس في أقل من ست ثواني فهمتها ..
رفيعه : ياااااا الحمارة .. هاااااااااي ثاني مره تسوينها فيه..
مهره وحصه ما فهمن السالفه .. شو واحد صفر بعد ؟؟
نشت رفوع من مكانها على اساس انها بتنتقم .. بس ميره كانت عامله حسابها ..بندت الباب وقفلته .. فما كان من رفيعه غير انها تحلفتلها .. وردت ويلست عند مهره وحصه ... وطبعااااااا طايره من الوناااااااسه
مهره : شو سالفه الواااااااااحد صفر؟؟
رفيعه : عااااااااد اونج ما تعرفين حركات اختج .. بس ما عااليه بردها
رفيعه : عيل شو غير جيه ؟؟ تحيدين يوم كنتن تقنعن ابويه عسبة سيرة المزرعه ..
مهره : هيييييه
رفيعه : الله يسلمج ذااك اليوم وعقب ما وافق ابويه على سيرتي وياكن .. ردت ميروه وسوتلي تلفون ويلست تقولي ان ابويه رفض السيره وانكن حاولتن وياه لين ماعيزتن .. وعاااد انا رضيت بالأمر الواقع و صدقت اختج.. فديتني والله على نياتي .. وقبل لا أبند عنها قلتلي واحد صفر وعاد اونها قّصت علّيه .. وقالتلي ان ابويه مواافج وعاد انا رديت هالشيء عليها بأني رشيت الماي عليها ..
مهره : اهاااااا عسب جذيه ميره يوم دشت علينا ذاك اليوم كانت تضحك ويوم سألناها قالت ماشي ..
رفيعه : ما عااااليه .. براويهااا
حصه : غريبه والله ما جنها علقت في الحجرة ؟؟
سارت حصه ودقت الباب عليها
حصه : ميرووه
ميره : عيون ميرووووه
حصه : ما ابغيهن عيونج .. شو ابابهن ؟؟ ابغيج انتي بكبرج .. يالله اظهري
ميره : هههههههه ده بعدك .. أظهر والسفااحه رفوع برع .. نو ويي ..
ضحكت حصه عليها
حصه : ما بتسويبج شيء .. صدقيني
ميره : نووووووو .. أول ييبيلي ضمان من عندها
حصه : اسميج انج .. لازم الظمان بعد؟؟
ميره : ايوه
وسارت حصه ورمست رفوع .. والنتيجه انهن قامن كلهن وسارن صوبها ..
حصه : هاذيه يت هنيه عسب اتطمنج بروحها
رفووووع : أشوفج فجي الباب بس .. بتحصلينها
ميره : هاهاهاهاي وتبوتي افج الباب بعد
رفيعه : يالله فجي الباب ..
ميره : اول حلفي انج ما بتسويبي شيء الحين
رفيعه : والله اني ما بسوييبج شيء الحين.. يالله فجي الباب
تأكدت ميره منهن وسارت وفجت الباب .. وابتسمت بمكر
رفيعه : ما عااااليه .. لاااااااااااحقه
مهره : اسميكن عداااااايل .. يالله خلصن شغلكن وتسبحن وانا بسير اتسبح في هاذيج الحجرة وعقبي حصه وانتي وميره هنيه وعقب ما تخلصن تعالن الصاله بنلعب كيرم ..
رفيعه : انا تسبحت قبل لا اييكن يعني ما يحتايلي ..
مهره : اوكيه ..
سارت مهره ويا حصه الحجرة وعقب ما تسبحت مهره دشت حصه وراها .. لبست مهره بجانتها وسارت صوب حجرة ميره اللي عدالهن وحصل رفيعه طايحه على السرير وتقرا مجلة .. طلعت مهره من الكبت بجامتين عطت الاولى حق رفيعه والثانيه لحصه .. وعقب ما خلصن شغلهن ظهرن من الحجرة ويلسن في الصاله .. الصراحه كانن فنانات بمعنى الكلمة .. كانن كلهن مطقمات ببجامة ( بنطلون وقميص ) اللي اشترنهن مهره وميره لهن الاربع كان لايق عليهن وايد ... ولونه وردي وفي نص القميص دبدوب صغير شكله روعه ... و حاطاات جحال داخل العين وقلووووس خفيف..
كانت ويووههن طفوليه .. وكانن يشربن حليب نسكافيه حق السهره
وكانن ماخذات راحتهن لانهن يعرفت ان محد من الشباب بيدخل البيت اصلا .. يلسن البنات تحت ويابن التكيه وحطنها فنصهن .. ويابن الكيرم وحطنها وكل وحده وكوبها عدالها .. وتمن يلعبن.. وكانن يقظن وقتهن لين ما يوصل الفلم.. الصراحه كان جو ولا أروع..
وفي نفس الوقت وفي محل الأفلام..
غيث كان يدورله فلم دي في دي حق اللابتوب .. وكان راشد يدور فلم لاخواته في قسم الشرايط مال الفيديو ومنصور ما كانت له حايه هناك فيلس على الكراسي ويوم تململ سار صوب راشد..
منصور : انته شو اتدور من الصبح؟؟
راشد : ( يرمس منصور وهوه يطالع الافلام) ادور حبارى .. يعني ما تشوف افلام
منصور : ويا راسك .. ادري انهن افلام ..قصدي شو منهن؟
راشد : أي شيء حق خواتي
منصور : حصلت ولا بعدك
راشد : لاااااا
منصور : صبر الحين بدور لك
سار منصور الجهة الثانيه للأفلااام .. ويلس يدور وحصل الفلم ورد عند راشد وحطه في ايده
I find it.. منصور :
راشد : ( عقب ما تفحص الفلم عدل من ورا وجدام) وحط عينه في عين منصور
راشد : منصووووور .. فلم رعب .. شو اسويبه؟؟
منصور : تمنظر فيه . ويوم بتشبع رده على رفه .. يعني شو بتسويبه بعد ؟؟ وده لخواتك ..هب هن طالبات الفلم
راشد : هن طالبات فلم بس هب رعب
منصور : يا اخي رعب على الفاضي .. شايفنه مرتين في السينما .. ما يخّوف
راشد : عاد انته ريال .. هاذيلا بنات .. من ادناااات الدون يزيغن ..
منصور : انته وده لهن ما بيستويبك شيء ..
راشد : ما فيّه لهن ولحشرتهن.. بياكلني اكل
منصور : ( طالع راشد بطرف عينه ) اوكييييه برده ..
اشترى راشد لهن فلم كوميدي حلو .. وعقب ما دفعوا الحساب ركبوا السياره .. وكل واحد منهم شال كيسه في ايده ..
ويوم وصلوا البيت حصلوا الشباب يالسيين في الميلس وكانت الساعه جريب ال12
دش غيث داخل الصاله وتموا راشد ومنصور عند باب الميلس ..
راشد : لاااا حول .. الحين ابتلشنا بهالفلم .. شقايل بنوصله لهن .. البشاكير ارقووووود..
منصور : يالذكي سو لهن تلفون على الصاله اللي فوق وخلهن يتلقن لك تحت ..
راشد : ويا الذكي لو صاح اللي فوق بيصيح اللي تحت .. والمصيبة ان ابويه واميه والحريم راقدين تحت..
منصور : وخواتك هب غبيات لدرجة انهن ما يشلن التلفون لين ما ينتبهووون اللي في البيت بكبره ..
راشد : اممم.. وشو الحل الحين؟
منصور : اتصل وخل الباقي على الله
راشد : تم
منصور : اوكييه عيل انا بسير الميلس شوي وبردلك..
راشد : اوكييييييه..
سار منصور ودخل الميلس واما راشد قبظ التلفون واتصل ..
وفي نفس الوقت بالضبط كانن حصه ومهره يالسات في المطبخ التحضيري تحت يسون حليب حق السهره لان القبلي شارف على الانتهاء.. وكانن رفيعه وميره يالسات في الصاله اللي فوق يترينهن .. صاح التلفون .. قالت مهره حق حصه تشله بسرعه لان مهره كانت تراقب الحليب عن يفور وينجب .. ترددت حصه بس فالاخير ردت بسرعه عسبة ما يزعج اللي في البيت .. وفي نفس الوقت بعد شلته ميره ..
والحين ثلاااااااااث أشخاااااااص على خط واحد
ميره وحصه : الوووو
طبعا ما استغرب راشد من هالشيء.. متعّوووووووووود..ولازم يخسس بهن شوي
راشد : الوووو.. ميين معي..
ميره : معك ميره بنت ثاني بنت محمد بنت....
وقبل لا تكمل رمستها ..
راشد : ( معصب ) ميرووووووه لايكون كل من يسوي تلفون تعطينه اسمج بعد .. بذبحج
ميره :هههههه ... ويا راسك؟؟ ترا رقمك على الكاشف
راشد : حسبالي بعد ..
ابتسمت حصه على هالموقف ولين الحين ماقالت غير الووو
راشد : صبري شوي.. خلينا نتعرف اللي على الخط الثاني .. الوووو
استحت حصه من هالموقف.. يا ربي !!! شو اسوي الحين ؟؟ ابند التلفون .. لا لا عيييييييب.. ترددت حصه بس فالاخير ردت..
حصه : الوووو
راشد : مين معي؟؟
حصه : حصه
راشد : هلا والله ببنت سهيل .. شحالج؟
حصه : بخير الحمد لله
ميره : احم احم .. خير راشد شو بغيت ..
راشد : يبتلكن الفلم اللي طلبتنه .. ولاّ ما تبغنه
ردت عليه ميره وبسرعه ..
ميره : لا لا نبغيه شو ما نبغيه تخبلنا نحن
راشد : عيل يالله ترييني عند الباب جان تبينه ..
وبقواااة عين ميره وعيازتها عن النزله ..
ميره : اقول حصه دام انج تحت تلقفيله انتي..
فجت حصه عيونها .. هااااااذي شو تقول .. تيننت الظاهر.. شو اتلقفله بعد .. لاوالمصيبه اني لابسه بجامه ..براوييج يالسخيفه بس خليني اوصلج فووووق ..
حس راشد بأن حصه استحت من هالموقف..
راشد : ما في مشكله .. بطرش الفلم ويا منصور
ميره : تمام عيل
راشد : اوكيه عيل بخليكن
ميره : مع السلامه
حصه : الله يحفظك..
حس راشد بشيء غريب بس ما عبر هالشعور ورد يكلم منصور اللي كان توه ظاهر من الميلس وحط الفلم في ايده ..
راشد : ود هالفلم لاختك حصه تترياك عند الباب
منصور : (شك منصور في سالفه انه اتفق مع حصه على انها تترياه .. يعني رمسها بالتلفون!! .. بس خوّز هالشك بسرعه لانه يثق في راشد وايد )..
منصور : اوكيه ..
دخل راشد الميلس ودش وياه منصور .. يلس راشد ويا الشباب .. أما منصور سار صوب الطاولة اللي في آخر الميلس وشاف كرتون كلينكس .. شله وحطه في الكيس وعقب سار صوب المكتبة وشل فلم ثاني وحطه في الكيس .. وكان عدال الفلم دفتر شله بعد ويااه ..طلع منصور من الميلس ويلس على الدري .. طلّع منصور من الكيسه الفلم اللي شارنه راشد لهن وهوه فلم كوميدي .. وحط بداااااله فلم هندي باااائس يصّيح اللي ما يصيح ..
طبعا ما هناله انهن يضحكن .. عسبة جذييييه يبغي يخرب عليهن .. طر منصور من الدفتر ورقه وسندها على كرتون الكلينكس وكتب رساله وحطها في كرتون الكلينكس .. حط منصور الفلم في دريشة الميلس وكمل طريجه صوب باب الفله .. أول ما شافته حصه فتحت الباب له وما انتبهت للي سواااه منصور .. شلت حصه الكيسه من منصور ورد منصور ويلس عن الشباب.. وردت حصه وسارت عند البنات فوق .. أول ما دشت حصه الصاله فرت الكيسه على الطاولة وهيه معصبة من الخاطر .. سارت صوب ميره وظربتها بالمخدة على راسها ظربة صدق من الخاطر.. فهمت ميره على ردة فعلها عسبة جذيه ظحكت عليها من الخاطر .. فتحت مهره الكيسه وحصلت كرتون الكلينكس وما عبرته وفرته على الطاوله وظهرت الفلم من وعابلته ويا رفيعه .. كانت ميره تراضي حصه وتضحك وياها .. فجأة حست بعطسه فما كان منها الا انها ربعت صوب قوطي الكلينكس وطلعتلها كلينكسه وعطست .. وعقب ما شمّتنها البنات .. ردت ميره صوب الكلينكس لانها حّست بشيء غريب لمسته ايدها .. حطت ميره ايدها في كرتون الكلينكس وحصلت ورقه .. ويوم شافتها من الصوب الثاني حصلوا مكتوب فيها ..(( لا تفتح الا بعد متابعة الفلم الا النهاية .. وتحت النهاية خطين )) احترمن البنات هالشيء ويودن الورقة لعقب .. والفضوووووووووول ذابحنهن لدرجة فظيعه بس مع ذالك نسن سالفتها يوم بدا الفلم..
وفي ميلس الرياييل ..
حمد راقد على الغنفة الطويلة وحاط غترته على ويهه لان راسه كان يعوره شوي ... وأما منصور وغيث وراشد ومانع يلسوا يلعبون ورقة ..
منصور : أنا غاااسلنكم غاسلنكم .. هاهاهاااااااااااي
غيث : ههههههه دخيلك بس ..
منصور : احم احم أصلا أنا محد يروم يغلبني في الورقة ولا في الكيرم ..
مانع : اهاااا .. منصور هات الكيرم براوييك ..
راشد : من استويت يا مانع ما خسرت .. معروفة النتيجه
منصور : هههههه .. ضحكتني والله
مانع : ضحكتك هااااا .. بتشوووووف ..
راشد : منصور لا تحاول انك تلعب ويا منوووع تراه غاسلنك غاسلنك..
منصور : أوكيه بنشوووووووووووووووووووووو ف
سار منصور صوب مكان الكيرم المعتاد عسب اييبها بس ما حصلها .. ورد
منصور : ما حصلتها ..
راشد : دورها عدل ..
منصور : يا خي جلبت المكان عليها وما حصلتها ..
راشد : عيل وين نفدت ..
طبعا الكيرم عند البنات .. وهم جالببين الدنيا عليها .. حليلهم والله
غيث : خلوها توّلي الحين .. تعالوا كملوا اللعب ..
مانع : باجر بنحصلها .. الحين تعالوا كملوا اللعب..
يلسوا راشد ومنصور وكملوا اللعب ويا مانع وغيث.. وعلى الساعه وحدة ونص خلصت السهره عند الشباب .. واما البنات بعدهن يتابعن الفلم التعيييس.. ظهرن كل اللي في خاطرهن في الصياح .. اسمييييييك يا منصور ما عينت خير.. عااااااد الشيء العجيب والاغرب من الغريب ان نهاية الفلم أتعس من التعااااسه .. المفروض تكون النهاية سعيده .. بس منصور اختار هالفلم بالعماله لان رباعته مجربينه ويا خواتهن وياب نتيجة .. الله يسلمكم كرتون كلينكس ما يسد .. كل وحدة حاطة في ثبانها كرتون كلينكس وتشتغل فيييييه .. والله انهن في حااااااااله .. اللي بيشوفهن بيضحك صدق من الخاطر .. جنهن عايشات الحدث بوقته ... وعلى الساعه ثنتين خلص الفلم
أول ما خلص الفلم كلهن صدّن صوب ميره اللي كانت حاطة الرساله في مخباها .. هي ما فهمت نظراتهن .. بس عقب فتره بسيطه فهمتهن .. هيه نست سالفه الرساله .. طلعت ميره الرساله من مخباها .. وكل البنات تيمعن عدالها.. أول ما فتحتها حصلت مكتوب فيها ..
(( بسم الله الرحمن الرحيم
أما بعد ..
إلى عيايز دبي وعيوز العين
أولا ... أحسن الله عزاكم على الفلم .. والله ان البطل والبطلة ما فيهم حيلة .. عرفوا يمثلوووون.... هههه .. المهم الحين ..
ترا هالكلينكس مال الميلس .. هب تخلصنه .. يا ويلكن بدّفعكن ثمنه .. عقب ما تخلصن المناحة ردنه محله .. وعن الفلم .. أدريبه أن حلوا ما في داعي تقولن والله ..أدري أن ذوقي لا يعلى عليه .. والحين أقولكن .. وااااااااااااااحد صفر لكن كلكن ..
والسموووووووووووووووووووو ووووحه
شيخكن منصور بن سهيل ..))
ما توقعن ان منصور هوه الل مسوي هالحركه.. ومنهن اللي ضحك ومنهن اللي تحلّفت له ومنهن اللي ناويتله نيه .. الله يعينه بس .. وعقب هذا كله خلصت سهرة البنات .. وكل وحدة سارت ترقد .. رقدت رفيعه عند ميره وحصه عند مهره..
البارت التاسع
وبالباجر الصبح وكان يوم الخميس .. وعلى الساعه سبع الصبح أول ما نشت رفيعه سارت بيتهم عسب تفزع لامها واما عن اللي في بيت ثاني بن محمد كلهم نشّوا .. ما عادا الشباب صح انهم راقدين قبل البنات بس العكس استوى ..وهو أن البنات هم اللي نشوا قبل الشباب .. والوحيد اللي نش من الشباب هوه منصور .. أول ما نش منصور طبعا كان مصلي قبل .. تسبح وتلبس وتعطر قصدي تسبح بالعطر .. وشل غترته وحطها على جتفه وظهر من الميلس .. شاف في نص الحوي يد راشد (محمد) وهوه يعتبره شرات يده بالضبط وحتى يزقره يدي.. وكان الشيبه يالس على الحصير وجدامه دلال القهوة والحليب والريوق .. سار منصور صوبه وسلم عليه وحبة على راسه ..
يد راشد : صح النوم .. توّك ناش جان كملت رقادك بعد
طبعا الشيبه ما عيبه هالحال لانه من الساعه خمس واعي ..مع انه بالنسبة لمنصور انه ناش من وقت ومفتخر بعد أنه ناش قبل الباجيين ..
منصور : افاا والله يالشيبه هاذا بدل ما تتنشدني عن أخباري وتسأل عن علومي..
عاااد هنيه الشيبه ولّع .. ما يداني حد يقوله شيبه .. تلفت على يمينه وعلى يساره تداااارك منصور عمره ونش بسرعه عرف أن السالفة فيها عصاااا ..((واللي هيه عقدة العايله )) ..
منصور : ها .. ها .. خل عنك .. كله ولا عصاتك .. وضحك عليه وسار منصور صوب سيارة حمد اللي كانت واقفه في آخر الحوي ووقف جدام الدريشه ويلس يتغتر .. وفي نفس الوقت كانن البنات طالعات من الفله يضحكن على سالفه .. وما انتبهن لمنصور وكانن متحجبات و عاقات الغشوه وهن يعرفن ان هالوقت مستحيل حد من الشباب يكون واعي ..
سارن البنات ويلسن عند يدهن وصح أن مب يد حصه .. بس مع ذالك تعتبره حصه شرات يدها .. يعني كل اللي في العايله يعتبرونه يدهم .. عقب ما حبن البنات راس يدهن يلسن وياه وكل وحده منهن صبت لها كوب حليب .. وعقب عشر دقايق تقريبا طلع منصور من ورا السياره وهوه متكشخ ومتعدل الصراحه كان فناااااان .. انصدمن مهره وميره من هالموقف .. يا ربي شو نسوي الحين هذا شكله ياي صوبنا .. يعني لازم الحين نقوم .. كان منصور يمشي ومنزل راسه وكان يعابل تلفونه ما انتبه للبنات .. طبعا مهره وميره أول ما شافنه تغّشن ..
مهره : يالله حصيص ردينا داخل ..
يد راشد : وين تبن ؟؟ يلسن كملن ريوقكن وشربن حليبكن ..
ميره : لا الغالي .. هاذوه ولد ام منصور ياي ييلس عندك ..
يد راشد : خير انزين .. برايه ايي وييلس انتن شو عليكن منه ..
استغربن البنات من هالشيء أول مره يدهن يسوي جيه .. لا وبعد غير هذا قالهن يعقن الغشوه عنه.. اونه منصور مب غريب .. ترددن البنات .. عاد هنيه هددهن الشيبه بالعصا عسبة جذيه من غير كلام عقن الغشوة ..
ويلست حصه تشوفهن وهيه تبتسم وتحرك حياتّها .. ويوم وصل منصور عندهن رفع راسه وأول ما شاف ميره ومهره عاقات الغشوه ومنزلات راسهن .. عوره ويهه .. لا يكوون ما شافّني عنبو ما بيني وبينهن شيء كيف ما بيشوفوني ...
يد راشد : بتيلس ولا بهالعصا على ينبك ..
هنيه تبلّم منصور ما عرف شو يقول .. الشيبه يطلب منه ييلس ويا بنات ولده لا وبعد عاقات الغشوة .. ما تدخل العقل .. بس مع ذالك رد عليه وبأسلوبه الغلس ..
منصور : ان شاء الله على هالخشم .. وانته ما تتعامل إلا بالعصا .. صدق انك شويبه ..
رد يد راشد وولّع مره ثانيه وكانت العصا عداله أول ماقبظها الشيبه .. قبظ منصور ايد يد راشد اللي ميودة العصا..
منصور : افا والله يا بو ثاني امررررره ما تتحمل مصخره ..
وضحكن البنات عليه .. وعقب فتره تأقلمن البنات واللي هن مهره وميره على الوضع ورفعن راسهن ويلسوا يسولفون ويا بعض.. ومنصور من يلس كل دقيقة والثانية يرفع عينه لميره ومهره ويدقق فيهن ويغير اتجاه نظرته عن ياكله الشيبه من هالنظرات .. أول مره يشوفهن من عقب هالفتره الطويله .. أول مره يشوف مقدار الشبه من بينهن .. حاول يطلع فرق واحد بينهن بس ما قدر .. الصراحه ان ميره ومهره يتشابهن لدرجة كبيره ..نفس الطول والعرض والبياض ونفس العين والخشم والثم وتدويره الويه وكل شيءبس في فرق واحد وهوه أن مهره فيها حبة خال تحت ثمها.. وطبعا اللي متعود عليهن يقدر يفرق بينهن اما الغريب فلوا يلس من اليوم لين باجر ما بيقدر ..
وفي نفس الوقت .. وفي بيت سالم بن محمد..
كانت رفيعه توها طالعه من الحمام وهيه لافة شعرها بالفوده لانها غاسلتنه .. طاحت رفيعه على الشبريه وبندت عينها .. وفي لحظه خطر في بالها حمد .. ردت رفيعه وفتحت عينها وصدت على يمينها وشافت الدبدوب اللي محطوط على الطاوله .. مدت رفيعه ايدها للدبدوب وبشكل لا إرادي حضنته بقو .. فجأة تسمع دق عالباب ..
رفيعه : منو ؟!
حارب : أنا
قامت رفيعه من مكانها وفرت الدبدوب على الشبريه وسارت صوب الباب .. و أول ما فجته ما حصلت حد .. يوم توها يايه توايج طلعلها حارب من ورا الباب يزيغها..
رفيعه : غربلااااات عدوك .. طيحت قلبي
حارب : ههههه .. عادي
دشت رفيعه الحجرة ودش حارب وراها .. سارت رفيعه صوب المنظره وسار حارب وطاح فوق الشبريه وطاحت عينه على الدبدوب ..
حارب : اووووه .. يالياهل شو تبيبه هذا الدبدوب ؟؟
رفيعه : هب مالي .. هذا مال روضه نسته ذاك اليوم عندي
حارب : وجيه ما رديتيه لها ..
رفيعه : ما تفيجت
حارب : اهااا .. عيل انا الحين متفيج .. بوديلها اياه يوم بطلع من عندج
هنيه ما عرفت رفيعه شو تسوي ؟؟ ما تتخيل حياتها بدون هالدبدوب؟؟ لانه يذكرها بأشياء واااااايده.. ووايد تعلقت به في هاذي الفترة.. يا ربي شو أقوله الحين !!.. اذا قلتله لا بيقول شو سالفة هذا الدبدوب وأسئلة مالها أول ولا تالي .. واذا ما قلتله شيء بيفسر سكوتي بالرضا .. شو هالحااااااااله!!!
رفيعه : لا لا .. خله أنا بوديه الحين يوم بطلع ..
حارب : ما في داعي والله وانا ظاهر عنج بخطف على حجرتهم وبعطيها اياه
رفيعه : لا لا أنا بوديه..
حارب : عنلاته من دبدوب .. ما يستاهل نتعازم عسبته .. خليه يولي ... أحسن حل اننا نخليه محله يوم بتي رويض هنيه عطيها اياه وفكينا من الدعنة ..
ما صدّقت رفيعه أن حارب اقترح هالشيء حتى ما كملت ثانيه ردت عليه
رفيعه : هيه هيه .. أحسن شيء
حارب : انزين الحين خلينا من سالفة هالدبدوب .. متى بيوم قوم عمي ثاني وعربهم ..
سارت رفيعه صوب الطاولة اللي عدال الحمام وخذت ساعتها ولبستها
رفيعه : الساعه تسع بيوون
حارب : يعني عقب ساعه
رفيعه : هيه .. ليش تسأل يعني ؟!!
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك