رواية نهاية حبك اعدامي -28
الجد: زين متى بتروحون تخطبون حق عزوز ..
بوفارس: بكره بأذن الله بيروحون الحريم .. واحنا اخر الاسبوع بعد ماترد البنت ..
الجد تنهد " عزوز الدب يخطب من وراي . .ولا يعلمني .. اوريه اسود الويه "
بومحمد: وين رحت يبه .. ؟
الجد: معاكم .. ورفع حاجب ..
بوفارس: ها عندكم مواعيد ولا شي مني مناك ؟؟
الجد: لا والله ماعندي شي ..
بومحمد: انا جاهز .. وماعندي مواعيد ولا شي ..
بوفارس: خير ان شاء الله .. وقام ينادي ام فارس عشان تجيب لهم الريوق ..
الجد: حمد يبه .. شو اخبار خالد من بعد ذيك السالفه ؟
بومحمد: الحمدلله يبه .. وايد احسن من قبل ..
الجد: الحمدلله .. الله يبعدها عنه .. ما يقوم فالليل مفزوع ؟
بومحمد: اول الايام .. بس الحين ينام وهو مرتاح .. يكلم خوانه وخواته مثل قبل السالفه ..
الجد: اللهم لك الحمد ..
بومحمد: الحمدلله .. يبه بيني وبينك ..
الجد: قول يبه ..
بومحمد: خالد كلمني عن مريم بنت محمد اخوي ..
الجد مبتسم: وا فديته خالد .. وليش ماتكلم اخوك .. ولا عايف بنت اخوك انت ؟؟
بومحمد: لا يبه ما عاف بنت اخوي .. وين بلقى احسن منها لخالد .. بس ام محمد قالت بتكلم
ام فارس ..
الجد: عجلوا عجلوا ..
بومحمد: تقول اليوم او بكره بتكلمها ..
الجد: الله يوفق خويلد .. كفايه انه غرشوب الولد طالع على جده ..
بومحمد مات من الضحك: ههههههههههههههههه .. يبه
الجد: اسود الويه .. شو موعاجبك بكلامي .. انا غرشوب غصبن عنكم ..
بومحمد: هههههههه .. محد قال شي ..
الجد: عيل شوله تضحك اسود الويه ؟
بومحمد: لا ولاشي ..
الجد: لو مو وسامتي ولا ماطلعتوا بهالحلاه .. الله يرجكم ..
بومحمد: صح .. صح
الجد ورافع العصا: شفت هالعصا .. بتكسر على ظهرك اسود الويه ..
بومحمد: ههههههههههه .. الله يهداك شو صاير وايد حساس اليوم .. كل شوي رفعت لنا العصا
الجد: انتوا تتمسخرون علي اليوم .. وانا منقهر من عزوز .. اوريه .. بكسر هالعصا على ظهره ..
بومحمد: ههههههههه .. بعد عزوز .. اوووب محد بيسلم منك اليوم ..
في هاللحظه دخل بوفارس عليهم والصبي وراه شايل صينية الريوق .. وقعدوا يتريقون ..
اما في غرفة فارس .. محمد كان في سابع نومه وفارس معاه .. فجأه قعد فارس على صوت تلفون محمد ..
فارس: حمود .. حمود .. قوم تلفونك سندرنا
محمد: هاا .. اي تلفون
فارس: حمود .. جوالك اذانا رد ياخي ..
محمد: هات التلفون ..
فارس: اففففف .. خذ .. وغطى راسه بالمخده ..
محمد: ها ..
ساره: محمد ابي عيالي ..
محمد بطل عيونه: ساره !!
ساره وهي تصيح: ارجوك يا محمد ابي اشوف عيالي ..
محمد قام من السرير: تبين تشوفين عيالج .. ؟
ساره: ارجوك ..
محمد: يعني تبين تشوفينهم .. ولا راضيه تتغيرين
ساره بعصبيه: خلاص عفتك يا محمد . .روح لها . .بس ابي عيالي ..
محمد منصدم من كلامها: اروح حق من يا ساره ؟ انتي شلون تفكرين .. ومن حط هالافكار في بالج ..
ساره: روح لها .. روح لها بس ابي عيالي ..
محمد عصب: اروح حق من ؟؟ قلت لج عمري ما فكرت في فطيم بنت عمي . .انتي ماتفهمين .. طول عمري عادها اختي ..
فارس" فاطمه !"
ساره وهي تصيح: لا وادلعها بعد .. انا اكرهك اكرهك ..
محمد: تكرهيني يا ساره .. معليه .. خلي افكارج واللي لعب بافكارج ينفعونج .. وعيالج مابتشوفينهم .. باحرمج منهم يا ساره .. باحرمج منهم ..
صرخت ساره: لاااااااااااااا ..
بكل هدوء سكر التلفون في ويها .. وخذ التلفون وحذفه بقوه على الارض .. وتكسر الى قطع ..
قام فارس مفزوع: شو صاير ؟؟ محمد شو فيك ..
محمد غطى ويهه بيده: آآه يا فارس .. عافتني ساره .. عافتني .. تقولي روح لها ..
فارس: منو هاذي اللي تروح لها .. ( محمد ما يدري ان فارس عرف من تكون )
محمد: اللي تقول اني احبها من وراها ..
فارس: زين روح لها البيت شوف شو سالفتها .. وفهمها كل شي ..
محمد: تعبت يا فارس .. رفع محمد راسه ورفع حاجب .. قوم ندور شقه ..
فارس استغرب من ردة فعل محمد: انشاء الله ولا يهمك ..
قاموا هم الثنين ولبسوا عشان يطلعون ..
فارس: اقعد هني .. بروح اشوف البيت .. عشان نطلع بسرعه ..
محمد: لا روح شغل الموتر وتعال عشان نطلع بسرعه ..
فارس: زين . .انتظرني .. طلع فارس من الغرفه ونزل يشيك على البيت .. وهو نازل شاف امه
ام فارس: فديت ويك ابوي .. روح تريق مع عمك ويدك فالمطعم ..
فارس" ياليلي الليل .. كلهم هني ": لا الغاليه مستعيل عندي شغل ضروري ..
ام فارس: زين اسوي لك نسكافيه يبه
فارس: الله لا يهينج .. بس بشغل السياره وبرجع اخذه ..
ام فارس مبتسمه: ان شاء الله
ركض فارس عند السياره .. شغلها وطلع صفها عند باب البيت .. عشان يطلع محمد بسرعه
رجع الغرفه بسرعه لمحمد ..
فارس: حمود .. بسرعه انزل الوالده فالمطبخ .. وابوك ويدي يتريقون عندنا .. السياره عند الباب
انت اطلع وانا بروح اخذ الكوفي من الوالد ..
محمد: شو عندهم اليوم ابوي ويدي ؟
فارس: مادري .. زين يلا بسرعه انزل قبل ليشوفك حد ..
طلعوا من الغرفه مع بعض .. وشافتهم فاطمه وهي واقفه عند باب غرفتها .. وتتفكر في محمد ..
فاطمه " يا ترى شو سر رقدت محمد عندنا .. وشو سر نظراته الغريبه لي .. "
نزلوا بسرعه وراح فارس المطبخ يشغل امه .. ومحمد ركض برا عند السياره ..
فارس يبوس راس امه: هلا الغاليه .. جاهز النسكافيه ؟
ام فارس: اي جاهز فديت عمرك ..
فارس خذ الكوب من يد امه: مشكوره الغاليه .. يلا انا بروح اقضي اشغالي ..
ام فارس تدعي لولدها: الله يوفقك وين ماتروح يا ولدي ..
فارس مبتسم: الله يسمع منج الغاليه .. طلع فارس وركب السياره وحرك على طول ..
محمد: هات الكوفي زين ..
فارس: احلف بس ..
محمد: باعدل مزاجي شوي ..
فارس: اصبر خل اشرب شوي ريقي ناشف ..
محمد: هات اشوف .. تبيني اشرب من وراك .. وووع
فارس: اسود الويه .. تتمنى تشرب من وراي ..
محمد: مادريت اشرب من وراك .. الله يلوع جبدك ..
فارس: خخخخخخخخ .. الله يرجك حمودي .. هاك مع ويهك
محمد: يلا كسرت خاطري اشرب معاي شوي
فارس: لا مادريت .. استأذن منك بعد .. باشرب غصبن عنك ..
محمد وفارس: ههههههههههههههههههههههههههههه
محمد: فروس ترا يوم نزلت جوالك ولع .. مادري من اتصل فيك ؟
فارس: تصدق من امس مادري عن التلفون ..
محمد: حتى لما رحت المسيد اليوم الفجر .. بعد ولع الجوال ..
فارس" اكيد مناف فديتها متصله": ما شيكت تصدق ..
فارس: شقصدك ؟
محمد: اتصل لها بس ..
فارس: بتصفق يا حمود
محمد: زين مر بيتنا وانت تتصل لها
فارس: حمووووووود .. ويحفص في الشارع ..
محمد ميت من الضحك: هههههههههه .. سلاااااااااااااامي عليك ولد العم ..
فارس: عيل شلوووون .. زين تبي امر بيتكم ؟
محمد: اي ..
راحوا بيت محمد .. و قبل ما يوصلون طلب محمد من فارس يتصل بيتهم ويطلب الريم اخته
اتصل فارس وردت ام محمد ..
فارس: السلام عليكم مرت عمي ..
ام محمد: هلا والله فارس .. شحالك ؟
فارس: طيب الله يسلمج ..
ام محمد: شلون محمد يسافر ولا يقول لأحد .. امس عرفت من ابوه ..
فارس يطالع محمد: الله يسلمج هو ما كان مخطط يسافر .. السفره جات جي ..
ام محمد: والله ما ينعرف له .. راح ولا سلم علينا مادري شاف عياله ولا ما شافهم .. الله يهديه
فارس: ههههه .. الله يهديه .. مرت عمي الريم عندج ؟
ام محمد: لا فديتك .. الريم راحت المدرسه ..
فارس بصوت عالي يسمع محمد: راحت المدرسه ..
محمد لوى بوزه وأشر لفارس انه بيتصل لها بعدين ..
فارس: خلاص مو مشكله مرت عمي .. انا باتصل بعدين ..
ام محمد: يبه بغيت من الريم شي ؟
فارس: ها .. بس كنت ابي اوصيها على غرض لي عند محمد .. بغيتها تجيبه لي .. خلاص باتصل فيها العصر انشاء الله ..
ام محمد: ان شاء الله يبه .. تامرني على شي يبه
فارس: ما قصرتي طال عمرج ..
سكر منها وقال لمحمد ان اخته فالمدرسه ..
محمد: ولين .. خلاص بانتظر لين العصر ..
فارس: وين نروح الحين ؟
محمد: نشوف شقه ..
فارس: ولا يهمك ..
وراحوا يدورون شقه من مكان لي مكان .. وبالعافيه لقوا شقه وكان اجارها غالي .. بس مضطرين
محمد: الحمدلله لقيناها ..
فارس: حمودي بس وايد اجارها غالي ..
محمد: شو تبيني اسوي ؟؟ هاي الموجود ..
فارس: مادري أأجر لك غرفتي بنص سعر هالشقه ..
محمد: ههههههههه .. وع من زين غرفتك ..
فارس: تعال تعال .. قاضب علي اليوم وع و وع .. من حلاتك انت يعني .. احمد ربك اني قبلت انام جنبك امس .. لوع الله جبدك ..
محمد: ههااااااااااااااي ..
رن تلفون فارس .. ابتسم فارس ..
محمد: يا قلبك .. شلون نسيتها اليوم ؟
فارس: اي والله .. انت السبب ..
محمد: رد حرقت التلفون ..
فارس: موت قهر .. هلا وغلا ..
مناف بخوف: وينك اليوم ..
فارس باستغراب: شو فيج ؟
مناف: اتصلت اقعدك للصلاه ومارديت .. والصبح ومارديت .. ؟ فيك شي فارس ..
فارس ابتسم " فديت اللي اداريني": ايه عليج .. انشغلت والله
مناف: والفجر ؟
فارس: نسيته فالسياره ..
محمد بصوت واطي: كذااااااااااب ..
فارس: السموحه ..
مناف زعلانه: ..................
فارس: دلوعه ..
مناف: ......................
فارس: يلا عاد ردي .. والله انشغلت اليوم ..
مناف: زين خلك في شغلك .. مع السلامه ..
فارس: يه يه يه .. لحظه يا بنت ..
مناف: شتبي ؟
فارس: ليش زعلانه ؟
مناف: مب زعلانه
فارس: عيني في عينج
مناف: لاتستخف دمك
فارس: انتي اللي دمج عسل ..
مناف: اففففففففف
فارس طول على صوت الراديو: مناف يا قلبي .. شو فيج
مناف: مافيني شي ..
فارس: ليش معصبه زين .. قلت لج انشغلت
مناف: يعني كلش ما شفت تلفونك؟
فارس: والله ما شفته .. الله يعلم باللي مريت فيه
مناف: ..............
فارس: يا قلبي .. ردي عاد ..
مناف" يا قلبي .. ايه عليك يا فارس .. والله حبيتك وصرت اداري عليك وماقدر اصبر عنك"
مناف: شتبي اقول ؟
فارس: ليش زعلانه ؟
مناف: خفت عليك يوم ما رديت علي ..
فارس: مناف ..
مناف: نعم ..
فارس: خفتي علي والله ..
مناف: والله من قعدت للصلاه واتصلت لك ومارديت .. ما نمت ..
فارس: فديت اللي ما نامت عشاني .. ايه عليج مناف .. اسف والله اسف
مناف: مره ثانيه طمني عليك لو برنه بس اعرف انك بخير ..
فارس: عيوني لج يا مناف .. عيوني لج .. لا تزعلين
مناف: ................
فارس: يلا عاد بسج زعل ..
مناف: مب زعلانه ..
فارس: فديت اللي ما يزعلون انا ..
مناف منحرجه: فارس انتبه لكلامك لو سمحت ..
فارس" وايد خذت عليها": اسف ..
مناف تنهي المكالمه: زين بخليك الحين .. الدكتور دخل القاعه ..
فارس: مع السلامه ..
سكر منها وهو مبتسم .. وطى صوت الراديو .. والتفت عليه محمد ..
محمد: فروس .. تحبها؟
فارس: تعلقت فيها يا حمودي ..
محمد: تعلقت فيها يعني تعودت عليها ولا حبيتها ..
فارس: والله حبيتها ..
محمد: هلا هلا .. روووح يالحب ..
فارس: دخلت يا قلبي من غير ما صدها ..
محمد: والله وطحت فشباك الحب .. الله عليك .. زين قولي شو قلت لها لما طولت على صوت الراديو ..
فارس: احلف انت بس ..
محمد: خلك طبيعي ..
فارس طول على اغنية راشد الماجد .. المحبه وكان يسمع هالمقطع
" المحبه نارها نار ودواها دوا .. انت في قربك سعاده وفي بعدك عذاب "
محمد: يا ويل حالك يا فروووس ..
ابتسم فارس .. وتم يسوق يهدوء وهو سرحان .. محمد كان مستانس لفارس .. حس انه سعيد بالحب .. راحوا يتغدون في مطعم .. وفارس كان مستانس ويسولف .. حس انه لما قال لمحمد انه حب مناف ارتاح .. قالها بثقه لانه حاس ان مناف بعد بدت تحبه .. وهو حس بالهاشي وتأكد منه من بعد اتصالها وهي خايفه عليه تتطمن .. خلصوا غداهم وراحوا الجمعيه يشترون اغراض للشقه
بعدين راحوا الشقه يقيلون ..
رن عبدالعزيز والمتصل كان يوسف ..
عبدالعزيز: هلا والله بوخليفه ..
يوسف: حيالله بوسعود .. شخبارك ؟
عبدالعزيز: طيب الله يسلمك .. شخبارك انت ؟
يوسف: تمام والله .. وين انت فالجامعه ..
عبدالعزيز: اي .. باقي لي محاظره وحده واخلص ..
يوسف: يعطيك العافيه .. زين بوسعود لي فضيت بغيتك بموضوع ..
عبدالعزيز: آمرني بوخليفه ..
يوسف: ما يآمر عليك العدو فديتك .. بس لي فضيت كلمني ..
عبدالعزيز: ان شاء الله ..
يوسف: يلا ما طول عليك .. وانتظر اتصالك
عبدالعزيز: بإذن الله .. سكر من يوسف والفضول ذابحه يعرف الموضوع ..
اما يوسف سكر وهو على اعصابه .. " يارب تنجح الخطه "
رجعت الريم من المدرسه .. وقالت لها امها ان فارس اتصل كان يبيها .. بس ما قالت لها انه يبي غرض له من غرفة اخوها محمد ..
الريم باستغراب: يمه فارس اتصل يبيني ..
ام محمد: اي يمه .. عاد قلت له انج فالمدرسه .. وقال بيتصل العصر ..
الريم " فارس يبيني .. شو يبي فيني ؟"
ام محمد: يلا يمه بدلي ملابسج وتعالي تغدي ..
الريم: مابي اتغدى ..
ام محمد: ليش يمه؟
الريم وهي رايحه: كلت فالمدرسه ..
ام محمد: زين يمه .. اللي تشوفينه ..
راحت الريم الغرفه وكل تفكيرها بمكالمة فارس ..
الريم" ياربي شو يبي فارس .. ؟؟" بدلت ملابس المدرسه وطلعت كتبها عشان تحل واجباتها ..
مر الوقت ولا حست بنفسها من كثر ما كانت مندمجه مع الكتب .. الا الخدامه اطق عليها الباب ..
الخدامه: مدام ريم ..
الريم: نعم ..
الخدامه: ماما يقول تعالي في تلفون ..
الريم تركت الكتب وبسرعه نزلت " اكيد فارس "
اول ما وصلت الصاله خذت السماعه من يد امها من غير من غير حتى ما تسألها من المتصل ..
الريم: الووو
فارس: السلام عليكم ..
الريم ويها صار احمر: عليكم السلام ..
فارس: شحالج الريم .. شو مسويه ؟
الريم: الحمدلله طيبه ..
فارس: اليوم طالعه مكان؟
الريم مستغربه وزاد ارتباكها: لا .. لالا مو طالعه مكان ..
فارس" شو فيها متوتره": زسن بامر عليج عشان اعطيج التلفون اللي قالج عنه محمد ..
الريم بخيبه: اي التلفون .. زين الساعه كم بتمر؟
فارس: الساعه 6 ان شاء الله .. ويقولج محمد جهزي له ثياب .. والتلفون هو مخزن فيه رقم واحد بس .. وحاطه على الصامت .. تحملي تتعبثين فيه .. ويقولج خشي الجوال لاحد يشوفه عندج ..
الريم: ان شاء الله .. في شي ثاني بعد ..
فارس: لا لو في شي .. بيتصل لج محمد على الجوال ..
الريم تنافخ: زين ..
فارس " شو فيها ذي؟": يلا مع السلامه ..
سكرت قبل ما يخلص فارس كلامه ..
فارس" يه .. شو هالحركه بعد "
اما الريم سكرت وهي مقهوره .. على بالها ان فارس متصل يبي يقولها شي .. او يبين اعجابه فيها لانها اكبر بنات عمه ومن زمان ما شافوا بعض ..
الريم " مالت عليه .. متصل يوصل لي رساله من محمد .. على بالي متصل يبي يسمع صوتي "
راحت واحلام المراهقه في بالها عن فارس .. عشمت نفسها بحبه لها ..
الريم " لا اكيد هو قال لمحمد انا بتصل .. عشان يسمع صوتي .. فديته "
طلع عبدالعزيز من المحاظره .. سلم على ربعه وركب السياره محرك بيروح البيت .. مر خذ له كرك على دربه واتصل بيوسف ..
عبدالعزيز: حيالله الغالي ..
يوسف: هلا والله بوسعود ..
عبدالعزبز: شحالك ؟
يوسف: طيب الله يسلمك ..
عبدالعزيز: آمرني بوخليفه ..
يوسف: السموحه وترتك ..
عبدالعزيز: يعني مو وايد ..
يوسف: ههههههههه .. زين بوسعود بغيت في شغيله صغيره عشان الاهل ..
عبدالعزيز: عيوني لك والله ..
يوسف: اختك الكبيره تدرس لغه انجليزيه فالجامعه صح ..
عبدالعزيز: توأمي .. اي تدرس انجليزي ..
يوسف"ايه عليها": الله يسلمك اختي ماخذه مواد اختياريه .. و عندها بحث .. بس ماعندها فكره عن الماده جديده عليها .. وتبي مساعده في البحث ..
عبدالعزيز: ولا يهمك .. اكلم اختي اليوم .. بس عطني اسم الماده واخليها تجهز لها كل شي ..
يوسف: ما تقصر فديتك .. بس انا بجيب لك الكتاب واختي مخططه على اللي تبيه ..
عبدالعزيز: صار الغالي ..
يوسف: بامرعليك المغرب .. بنطلع وبعطيك الكتاب ..
عبدالعزيز: ولا يهمك .. نتلاقى المغرب بأذن الله
سكر يوسف وهو على اعصابه " الله يسر "
وصل عبدالعزيز البيت العصر .. وهو يتغدا فتح الموضوع مع فاطمه ..
عبدالعزيز: فطامي .. اليوم باجيب لج كتاب اخت رفيجي تبي منج مساعده في الماده اللي ماخذتها
فاطمه: اي ماده؟
عبدالعزيز: مادري .. بس هاي ماخذه ماده اختياريه وعندها بحث ومو عارفه تسويه .. تقدرين تساعدينها ..
فاطمه: من عيوني .. افا عليك
عبدالعزيز: جزاج الله الف خير اختي ..
فاطمه " يا ترى من يكون صاحبه ذي "
كمل عبدالعزيز غداه وفاطمه كانت معاه تسولف .. ودخلت عليهم مريم ..
مريم: بالعافيه عزيز ..
عبدالعزيز: الله يعافيج ..
مريم: فطيم .. حاسه بخوف ..
فاطمه التفت عليها: خوف .. من شو خايفه ؟
مريم: مادري .. بس متورتره ..
عبدالعزيز: مسويه شي ؟
مريم: لا والله .. بس متوتره و خايفه ..
فاطمه: وووي .. بسم الله ..
عبدالعزيز: زين قومي صلي ركعتين وان شاء الله تهدين ..
مريم وهي رايحه: ان شاء الله ..
التفت فاطمه على اخوها: شو فيها مرايم ..
عبدالعزيز: مادري .. روحي شوفي اختج ..
فاطمه: ان شاء الله .. طلعت ورا اختها .. وهي رايحه رن تلفون البيت .. وراحت ترد
فاطمه: السلام عليكم ..
ام محمد: عليكم السلام .
فاطمه: هلا مرت عمي ..
ام محمد: شحالج يمه ايمان ؟
فاطمه: الحمدلله .. بس انا فاطمه مو ايمان ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك