رواية نهاية حبك اعدامي -33
عبدالعزيز: من قلب .. ترا ماعنده وقت .. لو تتصل فيه 3 الفجر وتقوله نروح المكان الفلاني .. قالك قداااام .. ولاعنده فيها ..
يوسف: وحليله .. ربشه ربشه الولد ..
عبدالعزيز: زين شو نطلب بنكمل نص ساعه واحنا للحين ما طلبنا شي ..
يوسف: ننتظر ولد عمك ولا يسوي لنا حفله بعد ..
عبدالعزيز: صدقني لو نطلب قبل ما يجي ليقيم المحل على راسه .. فاضل اعرفه
يوسف: ههههههههه .. التفت يوسف الا يشوف البنت تأشر له على الجوال مره ثانيه .. صد عنها وتم يفكر فيها
يوسف" ليش تسوي جي هالبنت ؟ الله يهديها " .. قطع عليه حبل افكاره صوت فاضل وكانوا معاه خالد وعلي ..
فاضل: السلااااااااام شباب ..
سلموا الشباب على بعض ..
فاضل: يلا على حساب من ؟
خالد: اثقل يا مرجوج ..
عبدالعزيز: ولايهمك بوحمد .. طلبوا اللي فخاطركم يا شباب وعلى حساب فاضل ..
الشباب ماتوا من الضحك: ههااااااااااي ..
علي: اما يا فضول عليك سوالف .. شاد حيلك فالسياره وتقولي بتسنعهم ..
يوسف: ههههههههههه ..
خالد انتبه للبنت اللي استخفت على يوسف: بوخليفه .. عندكم معجبات ..
يوسف: الله وكيلك من اول ماقعدنا وهي تخز ..
خالد: رووح يا ولد شغل عدل ..
علي: حرام عليك بوخليفه .. نظره ولو جبر خاطر ..
عبدالعزيز: احاول فيه من شوي مو راضي ..
فاضل: خلاص خلوا الموضوع علي ..
خالد: شو بتسوي ؟ وبصدمه .. اووووب شوفها تأشر على الجوال ..
علي: تكفى ضبطها ..
فاضل: ايوه عندك ايها ..
عبدالعزيز: يا جماعه لاتحاولون الولد راسه يابس ..
فاضل: عطها الرقم وبعدين حولها علي ..
يوسف: الله واكبر عليك يا فضول .. خلوها عنكم .. هالبنت جريئه .. واللي تسوي حركاتها شتتوقع تكون ..
خالد: على قولتك .. زين كل واحد يطلب لان الريال له ساعه واقف ..
علي بعبط: دام فاضل اللي بيدفع انا باثقل العشا ..
فاضل: شووو .. منو يقول اني بادفع .. لا يسلم راسكم .. الخونه هم اللي بيدفعون ..
عبدالعزيز ويوسف: احناااا
خالد: زين ولاتزعلون اطلبوا وعلي اللي بيدفع ..
علي: صج عااد .. على بالكم بتحطوني فالشيمه وبدفع .. يبه انا باكل وبحرك ..
عبدالعزيز: فشلتونا عيال عمي .. طلعتوا زطاطوه .. امري لله يلا طلبوا وعلى يوسف الفاتوره ..
الكل:هههههههههههههههه ..
يوسف: كل واحد قال الفاتوره على الثاني انا بعطيكم راي ..
خالد: واحنا نسمع ..
يوسف: ولاحد فينا يدفع الفاتوره بس نطلب طلب جامد اوكي .. ولما يجي الجرسون نقوله محد جاب فلوس .. ونسكت ومحد يطلع اللي بجيبه .. وهو بكل بساطه بينادي المدير وسالفه وغيره ..
علي: زين وبعدين ..
يوسف: بنقول للمدير اسمح لنا وبنحاول معاه .. وهو اكيد بيرفض ..
فاضل: صح ..
يوسف: بنقوله نغسل الصحون .. وش قلتوا ..
عبدالعزيز: قداااام ماعندي مشكله ..
فاضل: والله خوش فكره ..
علي: ماعندي مانع ..
خالد: من صجكم .. !!
يوسف: انا عن نفسي ماعندي مشكله ..
فاضل: انا اوكي ..
عبدالعزيز: معاكم ..
علي: حلاااااته ..
خالد: زين انا بدفع ..
يوسف: مو مسالة من يدفع .. ذكرى حلوه .. نستعبط عليهم شوي ..
علي: الكيمره في السياره اروح اجيبها ؟
فاضل: فديت اخوي اللي يقرى افكاري ..
خالد: هيييييييي .. انتوا والله تفشلون ..
عبدالعزيز: شو نفشل .. عيش حياتك .. كم مره بنعيش ؟
خالد: والله انتوا ماعندكم عقول .. اكيد انجنيتوا ..
علي: يلا رايح اجيب الكيمره وراجع طلبوا .. وفاضل يعرف طلبي ..
يوسف: هههههههه .. حلو حلو ..
خالد منصدم: والله حاله .. تدبست فيكم يالمقاليع ..
عبدالعزيز: لو فارس ومحمد معانا كان على طول وافقوا ..
خالد: الا على طاري فارس .. وينه هاليومين ما يبين ؟
عبدالعزيز: موجود .. بس مانشوفه وايد فالبيت .. ما يجيك الشركه ؟
خالد: ماشفته .. ومحمد بعد مسافر ..
فاضل: بسكم سوالف .. انا طلبت لي وحق علوه .. ويوسف خلص .. يلا دوركم ..
يوسف: هالله هالله بالطلبيه الجامده ..
خالد: والله انا مادري شلون وافقت على كلامكم ..
طلب خالد و عبدالعزيز بعد طلب .. رجع لهم علي والكيمره في جيبه ..
علي: ها بشروا ..
يوسف: كل شي تمام التمام ..
علي: حلو .. متى بيجهز الطلب ؟
فاضل: يعني نص ساعه ..
خالد: يلا عاد جوعان ..
علي: ولا يهمك واصل واصل الطلب .. وصور خالد ..
خالد: ايييي انت .. شلون ما قلت لي عالاقل اضبط القعده ..
يوسف: ههههههههه .. تحب الكيمره ..
خالد: وايد .. احب اتصور مادري ليش ..
فاضل: انا عكس خالد ماحب اتصور ..
علي: زين باخلي الجرسون يصورنا اوكي ..
عطوا الجرسون الكيمره وطلبوا منه يصورهم .. وبعديت تموا يسولفون لين وصل الطلب .. فهالاثناء كان محمد يتصل حق الريم اخته على الجوال اللي جابه لها ..
محمد: هلا اريامي ..
الريم: هلا والله محمد ..
محمد: شخباركم .. واخبار اليهال ؟
الريم: الحمدلله كلنا بخير .. وعيالك فديتهم فاقدينكم والله .. بس ابوي مو مقصر وقته كله لهم ..
محمد: معليه .. فتره وتعدي ان شاء الله ..
الريم بإحراج: محمد ممكن سؤال ؟
محمد ومتوقع سؤال اخته: هلا اريامي
الريم: شو صاير يا محمد؟
محمد وتنهد: آآآآآه .. ماصاير شي .. بس احنا مسافرين موفالبلاد .. كلها كم يوم بإذن الله وبنرجع ..
الريم" علينا مسافرين": زين وين مسافرين ؟
محمد "اسألتج ماتخلص يالريم": قريب قريب .. المهم لو في شي اتصلي لي على هالرقم زين ..
الريم: ان شاء الله ..
سكر منها وهو يفكر في وضعه .. عياله وحشوه .. زوجته وحشته بالرغم من اللي سوته فيه .. بس لانها في قلبه .. ومحد ملك قلبه الا هي ..
محمد" ليش يا ساره .. انتي حب حياتي ليش سويتي جي .. شو الغرض من هاي كله .. وفاطمه بنت عمي اللي ما عمري فكرت فيها ولا طرت على بالي .. خليتيني غصبن عني افكر فيها .. صرت اشتاق لشوفتها .. الله يسامحج يا ساره " .. اتصل بفارس عشان يمر عليه ..
محمد: فرووووس .. ماتشبع رقاد انت ..
فارس: آآآآآآآآآآه يا حمود تعبان والله ..
محمد: تعبان مادري شو تسوي ..
فارس: الله يغربلك شو بعد شو اسوي .. كفايه الهياته وياك ..
محمد: افففف .. صج الهياته تهلك الواحد ..
فارس: زين بقولك .. اتصل سلمان اليوم ..
محمد: سلمان خال يوسف .؟
فارس: اي .. كلمني العصر وقالي نتلاقى فالشيشه ..
محمد: وحليله هالسلمان وايد احبه .. زين الساعه كم عاد ؟
فارس: مممممممم الساعه كم الحين ؟
محمد: الساعه 9 ونص ..
فارس: شوووووو .. 9 ونص ..
محمد: ليكون تأخرنا ؟
فارس: لا هو قالي الساعه 10 ونص او 11 .. بس انا نمت كل هالوقت ..
محمد: ليش من متى نايم ؟
فارس: الساعه 6 تقريبا ..
محمد: يا مال العافيه .. قم يلا قم ..
فارس: يا ليلي الليل .. الجوال كله مس كولات ..
محمد بخبث : من بيتصل هالكثر يعني ..
فارس: سكر حلجك احسن لك ..
محمد: يا قلبي ..
فارس: زين انا بقوم اتكشخ الحين .. وبمرك ..
محمد: صار .. وانا انتظرك ..
فارس: سلااااام
سكر فارس من محمد .. وشيك على مكالماته .. ومناف كانت متصله 4 مرات .. اما باقي المكالمات كانت من ربعه وموظفين الشركه .. اتصل بمناف ..
فارس: هلا والله ..
مناف: هلا فارس .. شخبارك؟
فارس: الحمدلله .. ترا شنطتج نسيتيها في سيارتي ..
مناف: ادري .. عشان جي متصله ابيها ..
فارس: لا باخذها لي ..
مناف: شتبي فيها ؟
فارس: كيفي شعليج ابيها ..
مناف: عااااد ..
فارس" آآه يالدلع اللي بيذبحني": شو تبين فيها .. محد قالج نزلي وانسيها ..
مناف: ماتعمدت انساها ..
فارس: كيفج عاد .. مايخصني متعمده ولا قاصده ..
مناف: شفيك ابي اراجع المحاضرات ..
فارس: زين كسرتي خاطري .. بس بعد بفكر اجيبها او لأ ..
مناف ويأست: خلاص مابيها زين ..
فارس: فديت اللي زعلت انا ..
مناف: .........
فارس: زين متى بتنامين انتي ؟
مناف وماده بوزها: مالك خص ..
فارس: هههههههه .. يعني الحين او بعد ساعه او متأخر ..
مناف: مادري ..
فارس: يلا اشوف روحي نامي الحين ..
مناف: مابي .. وقت مابنام بنام ..
فارس: لا حلفت عليج تنامين الحين ..
مناف: هييييييييي .. لا تلعوزني ..
فارس: فديت هيييي انا ..
مناف انحرجت: .............
فارس: زين ياقلبه .. انا بمر على ولد عمي وبروح مشوار وبمر اجيب لج الشنطه اوكي ..
مناف: يعني الساعه كم ؟
فارس: يمكن الساعه 12
مناف: لاااا .. وايد متأخر
فارس: ولا يهمج .. الحين امر على ولد عمي واجيب لج الشنطه ..
مناف مبتسمه: اوكي ..
فارس: زين خليني البس واول ماقرب عند بيتكم باتصل فيج ..
مناف: ان شاء الله ..
سكر منها وهو مستانس .. لبس وطلع من البيت .. اما مناف كانت طايره من الفرحه .. لانها خلاص حبت فارس.
وصل فارس عند شقة محمد .. ونزل عنده ..
فارس: زين قبل مانروح القهوه بمر اودي شنطتها ..
محمد: اوكي .. زين ما كلمت سلمان ؟
فارس: بلا كلمته .. قالي انه عنده مشوار بيروح المطار يبيج رفيجه توه واصل .. وبيمر علينا ..
محمد: حلو ..
فارس: زين يلا نحرك ..
محمد: ماشربت شايك ..
فارس: الحين بنروح الشيشه وبيمتلي بطني ..
محمد: على هواك ..
طلعوا من شقة محمد .. وفارس كان يشيك على شنطة مناف اللي كانت بالسيت اللي ورا .. اول ماسحبها طاح منها شي على الارض .. نزل فارس يجيبه وكان عصير .. فتح الشنطه يبي يرجعه وشاف كرواسون مأكول نصه وملفوف بكلينكس .. انصدم ..
فارس" معقوله .. تاكل نص وتودي لاخوانها نص .. يالله الله يعينها هالبنت " ..
محمد: فروس .. فروس .. نادا مره ثانيه ورد فارس ..
فارس: هلا ..
محمد: وين سرحت ..
فرس: ما سرحت .. يلا يلا شغل السياره ..
محمد: اوكي .. شغل السياره وكان مستغرب من فارس ..
ركب فارس السياره وحركوا .. كان محمد اللي يسوق ..
فارس: حمودي وقف عند الصراف ابي اسحب فلوس ..
محمد: ولا يهمك ..
نزل فارس وسحب له مبلغ .. ركب السياره وطلب من محمد يمر محل الورد ..
محمد باستغراب: ليش ؟
فارس: ابي اخذ غرض من هناك ..
محمد بعبط: شو بتاخذ عصير ولا شوكلاته ؟
فارس ضحك بصوت عالي: ههااااااااااااااااااااااااي .. لا باخذ وجبة اطفال لك ..
محمد: هههههههههههههه .. زين انزل خلصني الله يرجك ..
نزل فارس .. وخذ ورده وحده بس وكان لونها احمر طلع من المحل وركب السياره .. التفت عليه محمد باستغراب ..
محمد: ليش ورده وحده بس ؟
فارس: ماحب ورود وايد وباقه وعباله ..
محمد: او انك رومنسي ..
فارس: غصبن عنك يالدب ..
محمد: هالانسان يقتهر من رشاقتي ولياقتي ..
فارس: قصدك العكس ..
محمد: ايه عليك يا فروس .. زين اوصف لي المكان ماذكره ..
فارس: ن شاءالله ..
قربوا من بيت مناف واتصل لها فارس ..
فارس: هلا والله ..
مناف: هلا فارس ..
فارس: انا قريب يلا طلعي ..
مناف: ان شاءالله ..
فارس: حمودي صف عكس الباب ..
محمد: اوكي ..
نزل فارس وطلعت له مناف ..
فارس: فديت القمر اللي منور هالظلمه ..
مناف: منزله راسها: هلا فارس ..
فارس: تفضلي شنطتج ..
مدت يدها وشاف الاسواره اللي لبسها اياها ..
مناف: اسمح لي عطلتك ..
فارس: ولا يهمج .. ولو هالقمر اتعنى له ..
مناف" وايد يتغزل فيني ": زين لازم ادخل الحين ..
فارس: زين انتبهي لنفسج يا قلبه ..
مناف: مع السلامه ..
دخلت وسكرت الباب وفارس كان يراقبها .. رجع السياره وهو مبتسم ..
محمد: الله عليك يا بومحمد ..
فارس التفت على محمد: انا بونايف ..
محمد: حلاتين يا بونايف .. وحليلك يا فروس والله وصرت تحب ..
فارس: غصبن عني حمودي .. الا الحب اللي ماتخيلت اني بعيشه ..
محمد: بس الحب حلو يا فروس وايد حلو
فارس: ايه على الحب ..
قطع على لحظتهم الرومنسيه تلفون فارس .. وكان الاتصال من مناف ..
فارس: هلا والله ..
مناف: فارس
فارس: عيونه .. التفت عليه محمد وابتسم ..
مناف: والله ماعرف شقولك .. اهاوشك ولا اشكرك .. ماعرف والله
فارس: انا تحت تصرفج .. وعلى طول على صوت الراديو ..
مناف: ليش حاط لي فلوس .. انا ماطلبت منك ؟
فارس: زين انا ابيج تشكريني على الورده اول .. بعدين زفيني على الفلوس ..
مناف استحت: مشكور على الورده يا فارس .. بس الفــ .....
يقاطعها فارس: اعتبريهم دين ورجعيهم لي ..
مناف: بس انت من قبل ..
يقاطعها مره ثانيه: ارجوج اللي قبل غير واحنا الحين غير ..
مناف: اففففف ..
فارس: فديت هالاف طالعه منج .. ليش مزعله نفسج .. من اليوم ورايح اخذي راحتج معاي اي شي تبينه بس أشري عليه وانا تحت امرج ..
مناف: ليش كل هاي يا فارس ؟
فارس: فديت قلبج يا مناف .. لاتسأليني ليش .. بس اللي اقولج اياه اتمنى تتقبلينه ..
مناف: بس انا ماطـ ...
قاطعها: انتي قلبي وحياتي والله ..
مناف بدلع: فاااارس ..
فارس: فديت فارس على شفاهج ..
مناف: مشكور على الورده .. بس الورد يموت ..
فارس: وحبي لج ما يموت ..
مناف "فديته ": زين مشكور على كل شي يا فارس .. بخليك مع ولد عمك ..
فارس: زين فديتج .. قبل ماتنامين دزي لي مسج
مناف: ان شاء الله ..
سكر منها وقصر على صوت الراديو .. التفت على محمد وهو مبتسم ..
فارس: صج الحب احساس رائع .. واحلى شي لما يجي بوقته ..
محمد: ايه عليك يا فروس الله يهنيك بهالحب ولا يغير عليك ..
كملوا دربهم للشييه عشان موعدهم مع سلمان ..
الحين خل نرجع للشباب في المطعم .. طبعا خذوا راحتهم فالطلبات ولما وصل العشا .. بدوا ياكلون وهم يضحكون ويسولفون .. وكل شوي تصوروا .. خلصوا العشا وطلبوا لهم الحلو .. وخلصوا وطلبوا شاي عشان يهضمون على قولة يوسف ..
فاضل: الشاي يهضم ؟
عبدالعزيز: دام يوسف قال يهضهم ..
يكمل علي: يعني يهضم .. بعدين انت مو دافع من جيبك شي ..
خالد: بس بيغسل بيده شي ..
الشباب: هههااااااااااااااااي ..
يوسف: حلوووووه .. وربي حلوووه
عبدالعزيز: الله يغربلكم .. خليتوا الناس تتفرج علينا ..
خالد: نخيط عيونهم يعني ..
علي: خل يتفرجون .. وكفايه ذيك المزيونه اللي بتموت على بوخليفه .. دفعت الفاتوره وتنتظر ..
فاضل: قسم بالله يوسف .. انت ترفس النعمه بريولك ..
يوسف: هههههههه .. شبي فيها ..
فاضل: انت ما عليك ضبطها وعطها رقمي ..
خالد: فضول .. خل عنك الحركات ..
فاضل ويهمس لعبدالعزيز: عاد الواحد مايقدر ياخذ راحته جدام خالد ..
علي غمز لعبدالعزيز وابتسم ..
خالد: شو قلت فضول ؟
فاضل: ولا شي ..
يوسف: زين نبدى بتنفيذ الخطه الثانيه ..
الشباب: يلاااا .. وضحكوا كلهم .. هههههههههههه ..
انتظروا فتره مع السوالف لين موعد اغلاق المطعم ..
علي: شباب شدوا حيلكم .. من بيتكلم ؟
كل الانظار اتجهت ليوسف .. يوسف طالهم بخوف ..
يوسف: هاااا ..
علي: انت بتتكلم ؟
يوسف: يعني انا عطتكم الفكره وانتوا نفذوها ..
خالد: احنا مانحب ناكل حق حد .. بصراحه يوسف انت انسان ذكي وكلك مواهب ومانقدر نسرق هالموهبه العظيمه اللي عندك .. هاللشي يعتبر ظلم .. وهدم لعقل انسان موهب مثلك ..
الشباب: ههههههههههه ..
يوسف: يعني مالي مفر منها .. مو مشكله مردوده يا حلوين
علي نادى الجرسون .. وصل الجرسون كل واحد تم يطالع الثاني والجرسون واقف ينتظر واحد فيهم يتكلم
تشجع يوسف وتكلم والجرسون كان مصري ..
يوسف: لو سمحت اخوي .. واخذ الجرسون على جنب او انه منحرج من ربعه و التفت على الشاب وقرب من الجرسون ..
يوسف: شاب صوره .. التقط له علي صوره مع الجرسون .. والشباب ماتوا من الضحك والجرسون كان متعجب من الحركه بس ضحك مجامله لهم .. التف يوسف على الجرسون ومسوي نفسه منحرج ..
يوسف: والله ماعرف وش اقولك ؟
الجرسون: تفضل ..
يوسف: الله يسلمك انا عازم الجماعه على العشا .. وبعد ماطلبنا والحمدلله كلنا اقصد يعني تعشوا الجماعه .. لما طلبت الفاتوره وجيت اطلع محفظتي اكتشفت اني ماجبتها .. وبصراحه منحرج منهم وهم يعني مش من المستوى يعني بيحطون في جيوبهم فلوس او يسون حساب انهم ممكن بيدفعون .. يعني ماعرف كيف اوصف لك مدى احراجي ..
الجرسون مو مستوعب كلام يوسف ..
الجرسون: انه بتقول ايه ؟
يوسف: الكلام اللي سمعته ..
الجرسون: والله ان مش عارف اقولك ايه او اتصرف ازاي .. بس خليك ثواني اشوف مدير المطعم ..
يوسف: خذ راحتك .. دربك خضر .. التفت على الشباب وابتاسمة عبط على ويهه ..
والجرسون راح لمدير المطعهم وقاله السالفه .. رجع الجرسون ومعاه المدير .. يوسف واقف ينتظرهم ..
المدير: خير حضرتك ؟ في اي مشاكل ؟
يوسف: لا ان شاء الله مافي مشاكل .. بس اعتقد ان الاخ قالك اللي صار ..
المدير: ايوه هو قالي .. بس انا مستغرب يعني ازاي ماجبتش محفظتك يافندم ..
يوسف: بعد جل من لا يسهو ..
المدير: طيب شوف الجماعه اللي معاك .. حد منهم يدفع عنك ..
يوسف: لا عيب .. انا عازمهم واقولهم دفعوا .. عيب عيب .. شهالكلام .. حط نفسك مكاني ..
المدير: انا حاس بموقفك يافندم بس انت لازم تتصرف ..
يوسف: انا مستعد اسوي اي شي .. بس اني اطلبهم فلوس مستحيل ..
المدير: ازاي يعني مستعد تعمل اي حاجه ؟
يوسف: ارتب لك المطعم بعد ما يطلعون الزباين .. اغسل صحون .. ماعندي مشكله ..
المدير منحرج: لأ عيب .. ازاي الكلام ده .. انت زبون عندنا ..
يوسف: بيني وبينك .. انا اصلا ماعندي فلوس .. والجماعه اختاروا المطعم واستحيت اقولهم لأ ..
المدير: ممممممممم .. طيب شوف حضرتك .. انت هات بطاقتك الشخصيه . وبكره تعال ادفع مافيش مشاكل
يوسف" هاذي كل شوي طلع لي بفكره": اقولك ماجبت محفظتي .. ولاعندي فلوس اصلا .. بس مستعد اغسل وانظف واكنس .. بس ادفع لاتقولي .. لان بصراحه ماعندي ..
المدير: مممممممم .. خلاص انا هدفع وانت اعتبره دين وسددهو لي اي وقت .. مفيش مشكله ..
يوسف" بانتحر .. آآآآه": لا لا دين ولاغيره .. حاول تفهم معاي ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك