رواية نهاية حبك اعدامي -39
اليده: ماشاء الله عليهم .. طيبين ويعرفون السنعام فارس: اي في هاذي صاجه عمتي ..
اليده: بس قلبي قابضني مادري ليش ؟
بوفارس: ليش يمه ؟
اليده: والله مادري يبه
بوفارس توتر وتم يفكر في ولده " الله يستر بس .. الكل كاش من الموضوع .. الله يستر "
اليده: وين مودينا محمد ؟
بوفارس: البيت يمه ؟
اليده التفت عليه" لا يسمح امرك .. نروح بيتكم
الكل مستغرب ..
بوفارس: بيتنا ..
اليده اي خل اروح اصفق ولدك فروس هالمتوت .. عيل يقول عني هامور سود الله ويهه ..
الكل: ههههههههههههههههه
ام فارس: عمتي للحين في قلبج
اليده: باكسره .. يصبر علي هالمتوت ..
بوفارس: اذكري ربج يمه .. وانا باتولاه ولا يهمج
اليده: هههه .. صدقتك يالشيخ .. اعرفك ضناك ماتضربه ..
بوفارس: اي والله .. عيل تبيني اخليح تكسرينه ..
اليده: اقول روح بيتك احسن لك ولا بنزل من السياره ..
بوفارس يضحك: هههههه .. ان شاء الله ..
وصلوا بيت بوفارس .. نزلت اليده على طول ادور فارس .. في الصاله والميلس وماللقته ..
اليده: مريوم ..
مريم: هلا يدتي ..
اليده: روحي طلعي لي فارس من تحت الارض ..
مريم باستغراب: ليش ؟
اليده وتحذف عبايتها على الكرسي وتشمر اليد: ناديه اشوف لا تتسألين لي ..
مريم: ان شاء الله .. راحت فوق ولقت فارس يتكلم بالتلفون ..
مريم: فارس: يدتس محتشره تحت تبيك ..
فارس: ههههههه .. الهامور تحت .. قولي لها الحين نازل ..
مريم باستغراب: الهامور .. زين .. طلعت وهي مستغربه ..
فارس كان يكلم مناف وقالها شلون جنن يدته ..
مناف: حرام تسوي فيها جي المسكينه ..
فارس: عضتني في خشمي ..
مناف تضحك: هههههههههه .. تستاهل .. محد قالك تلعوزها ..
فارس: افاا .. وانا قلت بدافعين عني .. تضحكين علي ..
مناف: لا يبه احنا البنات ندافع عن بعض ضد كل الريايل ..
فارس: تدرين مناف ..
مناف: هلا ..
فارس: فديت البنات اللي انتي منهم ..
مناف انحرجت: زين روح لهم تحت .. وبعدين قولي شبيسون فيك ..
فارس: فديت قلبج يا مناف ..
مناف: فارس يلا روح ..
فارس: آآه .. بعد فديت قلبج ..
مناف: خلاااص
فارس: من عيوني يا عيوني انتي ..
مناف: مع السلامه .. وانتظر اتصالك
فارس: عيوني لج يا كل الغلاا نتي ..
سكر منها ونزل الا يدته محتشره عليه تحت ..
اليده: وينه هالمتوت .. اوريكم فيه .. يقولي انا هامور ..
فارس: احم .. انا جيت .. وين الهامور وينه ؟
اليده وتروح صوب فارس: تعال يا اسود الويه .. ومسكتها هيا .. يا يمه قعدي
فارس واقف متخصر: لا تعالي يالهامور .. اشوف يودوج ..
اليده: بعد قال هامور .. يعل الهامور ياكلك ان شاء الله ..
فارس يضحك عشان ينرفزها: هم هم هم .. بالعافيه على الهامر اللي بياكلني ..
بوفارس ميت من الضحك: قعدوا انتوا الثنين يالمينن .. خلاص ..
دخل عليهم محمد ولد حمد ..
محمد: السلام عليكم ..
بوفارس: وعليكم السلام .. تعال شوف خويك شو مسوي بيدتك ؟
محمد مبتسم: شو مسوي بعد ؟
ام فارس: مجننها .. كل شوي قالها الهامور .. وهي محتره عليه الا تصفقه ..
محمد: حيالله ام فارس ..
اليده: هلا والله بمحمد .. حيالله هالشوف ..
فارس: حمود .. وخر عنها لا تعضك .. من شوي كانت بتاكل خشمي هالهامور ..
اليده قامت بسرعه ومسكت فارس: يا اسود الويه صدتك يالمتوت .. تعيب علي الا انت يا ولد اليوم ..
فارس: آآآي .. حمودي . الحقني بياكلني الهامور ..
اليده وضربته على راسه: بعد قال الهامور هالمتوت ..
تم فارس يجنن يدته واليده تضربه كل ما صادته .. اعتدل فارس في قعدته وسأل عن فاطمه ..
فارس: يمه وين فطيم ؟
ام فارس: والله ماشفتها فديتها .. من الظهر وهي في غرفتها ..
فارس: ايمان .. روحي شوفيها يمكن تعبانه محد يدري عنها ..
ايمان: ان شاء الله .. راحت ايمان تطمن على اختها .. اما محمد من سمع طاري فاطمه حس ان قلبه تزايدت دقاته .. كانت ينتظر ييشوفها بسرعه ..
فارس تم يسولف مع محمد على ما نزلت ايمان و فاطمه كانت وراها .. اول ما دخلت الصاله اول من رحب فيها فارس ..
فارس: هلا والله بفطيم .. فديت هالنور اللي جانا من صوبج يالغلا ..
فاطمه كانت تبتسم مغصوبه: هلا فارس فديتك .. وباسته ..
محمد اول ما شافها داخله ارتاح وابتسم ونزل راسه عشان محد يلاحظ .. سلمت فاطمه على ابوها وامها وعمتها ويدتها .. واخر واحد كان محمد ..
فاطمه: شحالك بونايف ؟
محمد مبتسم ابتسامته اللي تذبح: الحمدلله طيب .. انتي شحالج بنت عمي ؟
فاطمه ذبحتها ابتسامة محمد: الحمدلله بخير ..
فارس: تعالي عندي اختي .. راحت فاطمه قعدت يمين فارس ومحمد كان قاعد على يساره .. محمد استانس لان فارس كان يفصل بينه وبين فاطمه .. تموا يسولفون واليده استأذنت وطلعت مع هيا .. بوفارس طلع يوصل امه واخته وام فارس راحت معاه لان بعدها بيطلعون مشوار .. ايمان راحت غرفتها وتم محمد وفارس وفاطمه فالصاله .. تموا يسولفون .. ورن جوال فارس والرنه كانت ( عالي مستواه ) والمتصله مناف .. قام فارس يتكلم برا وترك فاطمه ومحمد .. فاطمه كانت في عالم يوسف .. اما محمد فكان منزل راسه وطالع فاطمه بطرف عينه وفاطمه مو منتبهه .. قرر انه يفتح معاها اي موضوع بس عشان تتكلم معاه ..
محمد: شو اخبارج مع الجامعه ؟
فاطمه: الحمدلله مشين فيها ..
محمد: حلو .. شدي حيلج عاد ..
فاطمه: ان شاء الله ..
تموا ساكتين فتره .. توه محمد بيتكلم فاطمه استأذنت وقامت من مكانها ..
فاطمه: عن اذنك ولد عمي ..
محمد تم يناظرها: اذنج معاج بنت عمي .. " ليش قامت .. كنت مستانس وهي حولي " .. دخل فارس ولقى محمد قاعد بروحه ..
فارس: وين الكل راح ؟
محمد: مادري ..
فارس زين قوم خل نروح الشيشه شوي ..
محمد: قدام ..
ركبوا السياره .. ومحمد كان يفكر في فاطمه ..
محمد" فاطمه كان بالها مشغول بشي .. ما كانت على بعضها .. العاده تسولف وتكون مفرفشه .. اليوم مادري شو فيها .. "
فارس: كلم الشباب شوفهم وين ؟
محمد: من ؟
فارس: خلود وعلوه اخوانك .. شوف سلمان ويوسف وعزوز اخوي ..
محمد: ان شاء الله .. اتصل محمد و انفق مع الشباب انهم يتلاقون في الشيشه ..
" والله وتحقق منايا .. شوفوا حبيبي معايا .. ياهل الحسد والوشايا .. سعادة القلب وياه "
الساعه 10 ونص بالليل .. جوال الجوهره يرن .. والمتصل كان ( اخذت القلب ) زوجها ابراهيم .. شافت الشاشه وابتسمت ..
ابراهيم: الوووو .. زوجتي موجوده ..
الجوهره: هههههههههه .. برهوم
ابراهيم: واي فديت برهوم زوج زوجتي خخخخخ
الجوهره ميته من الضحك: شلون بعد زوج زوجتي .. شتخربط انت ؟
ابراهيم: من وناستي يا غلاي .. ماقدر اوصف فرحتي ..
الجوهره: الحمدلله يا رب ..
ابراهيم: شحالج يا عروسه ..
الجوهره تنفست براحه: الحمدلله .. انت شمسوي؟
ابراهيم: الحمدلله مرتاح ومستانس ..
الجوهره: فديت المستانس انا ..
ابراهيم: جوجو حبيبتي ..
الجوهره: عيونها ..
ابراهيم: فديت عيونها انا .. ابي اقعد معاج عاااد
الجوهره: برهوم انت صاحي ..
ابراهيم: لا مجنون .. ما قلت شي غلط .. ابي اشوفج واقعد معاج
الجوهره: لا تستعيل .. بعد حفلة الخطوبه ان شاء الله
ابراهيم: لا ما يصير ..
الجوهره تقلده: بلا يصير ..
ابراهيم: هههههههه .. والله وقمتي تقطعيني بعد ..
الجوهره: عيل شلون .. خالي سلمان و يوسف اخوي .. شلون ماتبيني اقطعك
ابراهيم: ههههههههه .. شكلي ما راح اسلم منج ..
الجوهره: هههههههه ..
ابراهيم: زين لاتغيرين الموضوع ..
الجوهره: اي موضوع ؟
ابراهيم: ولوتيه بعد ..
الجوهره: ههههههههه .. برهوم شفيك .. بعد الخطوبه بنقعد مع بعض ..
ابراهيم: اووووهووو .. زين متى الخطوبه ؟
الجوهره: مادري .. ماحددت .. وبعدين لازم اشوف هلك يمكن عندهم التزامات
ابراهيم: لا لا لا ما عندهم التزمات .. حددي اليوم وياليت يكون قريب ..
الجوهره: يمكن اخر الشهر الجاي ؟
ابراهيم بصدمه: شنوووو .. لا لا يبه شنو اخر الشهر الجاي .. يعني بعد 5 اسابيع يالضاره
الجوهره: اي 5 اسابيع فتره زينه .. لين اتجهز ولين ولين ..
ابراهيم: لا يبه مب ناطر 5 اسابيع .. بعد اسبوعين انا اشوف وايد زين
الجوهره: لا شنو اسبوعين .. متى بخيط الفستان ومتى باحجز تصوير و غيره .. لا لا لا
ابراهيم: يعني لازم تخيطين فستان .. اخذي جاهز
الجوهره بدلع: لا لا لا
ابراهيم: امووت فالدلع انا .. زين 3 اسابيع ولا ابي اسمع اي كلمه ..
الجوهره: بس ..
يقاطعها ابراهيم: لا لا لا .. انا باكلم امي عشان يجهزون
الجوهره: برهوووم ..
ابراهيم: لا تذبحيني بدلعج .. ايه عليج انتي ..
الجوهره انحرجت: زين خلاص 3 اسابيع ..ابراهيم: فديت اللي تدلع على زوجها ..
الجوهره: زين روح ما منك فايده ..
ابراهيم: ههههههههه ..
الجوهره: زين ابي انام ..
ابراهيم: شوراج ؟ بكره الجمعه ..
الجوهره: تعبانه والله .. بقعدك اول ماقعد من النوم
ابراهيم: قعديني الساعه 9 ابي اروح اشتري خروف
الجوهره: خروف ليش ؟
ابراهيم: امي تبي تسوي غدا .. فرحانه فيني
الجوهره: وحليلها امك .. الله يديم فرحتها ..
ابراهيم: عاد لازم تاكلون من غدانا ..
الجوهره: ما تقصر حبيب قلبي .. بالعافيه ..
ابراهيم: انا بكلم سلمان بعد شوي .. عشان يعطيكم خبر ماتسون غدا ..
الجوهره: ماله داعي حبيبي ..
ابراهيم: حياتي انتي جوهرتي .. لاترديني يالغلا ..
الجوهره: ان شاء الله ..
ابراهيم: زين يا قلبي انتي .. روحي ارتاحي الحين .. ولاتنسين الساعه 9 اتصلي قعديني ..
الجوهره: مو جنه 9 وايد من وقت ..
ابراهيم: يا دوب اروح اشتري الخروف واوديه المطابخ .. والحق على الصلاه .. تدرين الجمعه بسرعه يسكرون عشان الصلاه ..
الجوهره: اها .. زين مو مشكله حبيبي .. يلا مع السلامه ..
ابراهيم: الله يحفظج حياتي ..
سكر ابراهيم من الجوهره وكان مستانس ..
ابراهيم" الحمدلله .. اخيرا تحقق حلمي .. وصارتي جوهرتي حلالي .. الحمدلله .. احمدك واشكرك يا رب "
........................
تنهد بحزن وغمض عيونه .. تذكر فاطمه ..
سلمان" ليش يا فاطمه .. شاللي ميزج عن باقي البنات .. وليش يا قلبي خنت يوسف .. اترجاك يا قلبي انسى فاطمه .. يوسف غالي علي .. اغلى منك يا قلبي .. ارجوك يا قلبي انسى فاطمه انساها .. " قام من سريره نزل الصاله وشغل التلفزيون .. قعد يتابع فلم .. بعد فتره رن جواله وكان المتصل نواف ..
نواف: مساء الخير ..
سلمان: هلا والله نواف ..
نواف: عسى ما ازعجتك ..
سلمان: لا عادي .. انا اصلا قاعد وزهقان حدي ..
نواف: شرايك نتلاقى فالقهوه ..
سلمان: حلو .. تدري بعرفك على ربعي هناك
نواف: نتشرف والله ..
سلمان: الشرف لنا يا نواف .. المهم عطني 10 دقايق واطلع من البيت ..
نواف: خلاص انا قريب القهوه .. بانتظرك هناك ..
سلمان: خلاص الشيخ .. مع السلامه ..
سكر سلمان من نواف .. وراح عند هنادي .. طق عليها الباب ..
سلمان: هنوده .. قاعده ؟
هنادي: لحظه خالي .. لبست روبها وفتحت له الباب ..
سلمان: ما نمتي للحين ؟
هنادي: لا ..
سلمان: شتسوين ؟
هنادي: اسوللف مع ربعي على النت ..
سلمان: اهاا .. زين اختج نامت ؟
هنادي: ماعتقد .. ليش ؟
سلمان: لاني باطلع .. بس بغيت اشوفكم تبون شي ؟
هنادي: لا خالي .. بس تعال نشوف جوجو ..
سلمان: زين ..
راحوا غرفة الجوهره .. دخلت هنادي ولقتها قاعده تقرى كتاب ..
هنادي: جوجو .. ما نمتي يالساحره ؟
الجوهره: لا والله ما نمت مثلج انتي يالساحره
سلمان: هههههههه .. زين انا طالع تبون شي ..
الجوهره: خالي .. على وين ؟
سلمان: بروح القهره ..
الجوهره: الله وياك خالي ..
هنادي: لاحظ انها تصرفنا ..
الجوهره: هنوود يالمينونه ..
سلمان: هنود هاذي تعقد العاقل والمينون .. انا بروح عنكم ..
الجوهره وهنادي: ههههههههههه .. الله وياك خالي ..
تموا البنات مع بعض .. و سلمان طلع من البيت .. وهو رايح القهوه شاف بنت تمشي بالشارع بروحها .. وكانت تتلفت وعيونها تتسارق من الخوف .. خفف شوي وقرب .. فتح دريشة السياره .. وشاف منظر يخوف .. البنت كانت تصيح و ويها مضروب و كانت تنزف ..
سلمان بخوف: عسى ماشر اختي ؟
البنت التفت عليه وتمت تتلفت حواليها .. نزلت راسها وماردت ..
سلمان: اختي منو مسوي فيج جي ؟
البنت رفعت راسها و قربت من دريشة السياره وصاحت بصوت عالي .. تمت تشهق وتتكلم وسلمان مو فاهم عليها .. نزل من السياره وقرب منها وكلمها ..
سلمان: سمالله عليج اختي .. قولي لي شصاير ؟ منو سوا فيج جي ؟
البنت: ارجوك ساعدني ..
سلمان: وين اهلج عنج ؟
البنت منهاره: آآآآه .. ارجوك ساعدني ..
سلمان بخوف: زين صبري خل اتصل بالشرطه ..
البنت: لا الا الفضايح ..
سلمان: بس لو وديتج بيت اهلج بتكون مسؤليه كبيره علي .. لازم اتصل ..
البنت قعدت على الارض ومستسلمه لكلام سلمان .. وسلمان اتصل بالشرطه وهو مستغرب من اللي يصير حوله
وصلت الدوريه للمكان اللي فيه سلمان والبنت .. نزل الشرطي من السياره وشاف البنت اللي كانت منهاره وآثار الضرب باينه في ويها ..
الشرطي: شصاير ؟
سلمان: مار بالسياره .. وشفت البنت تتخبط بمشيتها ولما قربت منها شفتها بالمنظر اللي هي فيه .. كانت تترجاني اوديها لبيت اهلها .. بس خفت .. لان ماعرف هي شمسويه او من مسوي فيها جي ..
الشرطي: عدل كلامك اخوي .. التفت الشرطي على الشرطي اللي معاه وطلب منه ان يتصل بالاسعاف ..
اما البنت كانت قاعده على الارض وتصيح وحالتها حاله .. طلب الشرطي من سلمان انه يروح معاهم المركز عشان التحقيق في القضيه .. وافق سلمان وراح وراهم بسيارته .. وعلى الطريق اتصل بيوسف وخبره باللي صار ..
يوسف بصدمه: هااا .. خالي .. انت متأكد
سلمان: اسكت يا يوسف .. مب قادر اتصرف .. ماعرف شفيها المسكينه .. اسمع انت روح البيت وخلك عند خواتك وانا بكلم فارس او محمد يجوني المركز .. يوسف ما وصيك على خواتك .. بس لاتجيب لهم طاري ..
يوسف: ان شاء الله خالي .. ارجوك طمني ..
سلمان: ان شاء الله يبه ..
يوسف: تبي اتصل في محمد وفارس ..
سلمان: لا انا باتصل .. بس انت لاتتحرك من البيت لين ارجع انا ..
يوسف: ان شاء الله .. استأذن يوسف من الشباب وبسرعه رجع البيت وسكر باب الحوش وقعد مع خواته اللي كانوا مستغربات من دخوله المفاجئ لهم ..
اما سلمان: فكلم فارس ..
فارس: لا حول ولا قوة الا بالله العلي العظيم .. متى صار هالكلام ؟
سلمان: من شوي .. تعال لي المركز انتظرك
فارس: ولا يهمك .. جاين
فارس قال لمحمد السالفه وعلى طول طلعوا من القهوه متجهين المركز ..
اتصل سلمان اعتذر لنواف والغى الموعد من غير ما يحدد له السبب الحقيقي .. سكر من نواف وقرب من مركز الشرطه .. تذكر لما اعتقلوه في امريكا .. شلون اهانوهم وهم يسحبونهم فسيارة الشرطه .. تذكر شلون انضربوا من غير سبب او ذنب .. وصل المركز .. تنهد ونزل من السياره .. مشى ورا الضابط ودخل المكتب .. وهو قاعد مع الضابط في المكتب يسرد لهم احداث الموقف .. دخل فارس و وراه محمد .. وقف الضابط وشافهم وابتسم .. استغرب سلمان .. لما اتلفت وراه شاف محمد وفارس تطمن .. عرف انهم يعرفون الضابط .. قعدوا هم الاربعه مع بعض .. وسلمان قالهم كل اللي صار .. وكانوا الثلاثه منصدمين من الموقف ..
سلمان: انا شفتها من بعيد قلت في نفسي شتسوي هالبنت في هالليل بروحها ؟ لكن لما قربت منها شوي شفتها تتخبط بمشيتها وكانت تتلفت حولها بخوف .. قربت اكثر الا اشوف اثر الضرب في ويها .. قربت منها وكانت البنت منهاره على الاخر .. بصراحه خفت اوديها اي مكان يعني مستشفى او بيتهم مع انها طلبت مني اخذها بيتها بس خفت .. فاتصلت بالشرطه ..
الضابط: ونعم الراي يا سلمان .. احسن شي سويته ..
سلمان: لان في امريكا لو نشوف واحد ميت فالشارع ما نلمسه .. لان لو حاولنا نساعده او نشيك عليه بكون جزء من الحادث اللي صار لو مالي ذنب فيه ..
الضابط: عدل كلامك .. رن تلفون مكتب الضابط .. تم الضابط يسمع والذهول بان على ويهه والكل كان يطالعه بخوف .. سكر الضابط ونزل راسه .. خذ نفس عميق ورفع راسه وقالهم ..
الضابط: سلمان ..
سلمان بخوف: هلا ..
الضابط: تعرف وش سالفة البنت ؟
سلمان بقلق: شسالفتها؟
الضابط: لا حول ولا قوة الا بالله العلي العظيم ..
فارس: بوعلي .. خوفتنا شو سالفتها ؟
الضابط: هالبنت اخوها مسوي فيها جي .. وتدرون ليش ؟
الكل بصدمه وذهول: ليش ؟
الضابط: اخوها مدمن مخدرات .. و مفلس .. تاجر باخته عشان ابره ..
سلمان شهق شهقه وحط يده على قلبه .. محمد سكر على ايده بقوه من الغيض اللي فيه .. اما فارس حس الدنيا دارت فيه وقلبه تم يدق يسرعه وحس بخوف ..
سلمان: اخوها .. يالله ليش ليش ..
الضابط: كان موديها مكان مشبوه عشان يبيعها على التاجر وياخذ ابرته .. بس هي رفضت وضربها ضرب .. كسر ويها من الضرب وكسر حوضها الحيوان لانه رفسها وهي كانت تقاوم .. وبعدين هي شردت منه وتمت تركض فالشوارع مب عارفه وين تروح .. لين لقاها ولد الحلال سلمان ..سلمان: حسبي الله ونعم الوكيل .. الحين شنو الاجراءات اللي بتاخذونها ضد اخوها ؟
الضابط: بنروح المستشفى للبنت وبنعرف منها كل شي .. مكان اخوها والمكان اللي خذها له .. وان شاءالله بيتعاقبون .. بتكلم اهلها وبنستدعيهم للتحقيق ..
فارس: يا قلبه هالاخو ..
محمد: عشان ابره .. حسبي الله عليه ..
الضابط: الله يستر على بناتنا
الشباب: آآمين ..
خلصت اجراءات المركز على الساعه 1 ونص بالليل .. طلعوا الثلاثه من المركز وكل واحد منهم شاغل باله شي واحد .. ( البنت المسكينه ) ركب سلمان سيارته ..
محمد: سلمان اوصلك البيت ؟
سلمان تنهد: آآآه .. لا مو مشكله
محمد: انا بسوق وفارس بيجي ورانا ..
سلمان: لا عادي ..
فارس: وين عادي .. انت منهار على الآخر .. محمد .. انت سوق وانا وراكم ..
سلمان: يا جماعه عادي ..
محمد ركب سيارة سلمان .. وسلمان ركب جنب محمد .. حركوا الشباب وسلمان كان مغمض عيونه والافكار تدور في راسه وصورة البنت مطبوعه في مخيلته .. وصلوا بيت سلمان ..
محمد: سلمان يبه .. وصلنا ..
سلمان فتح عيونه بخوف: هاا .. تنفس بهدوء ونزل ..
فارس: تامرنا على شي سلمان؟
سلمان: حياكم شباب ..
محمد: يسلم راسك .. روح ارتاح وبكره بنمرك باذن الله ..
سلمان: بس يا جماعه هالكلام يتم بينا ..
محمد وفارس: ولا يهمك ..
فارس: اعتبرنا ماندري بشي ..
سلمان: عيال حلال .. الله يوفقكم ..
فارس: احنا اخوان يا سلمان نعين ونعاون ..
سلمان: ما عليكم زود والله ..
محمد: ارتاح الليله .. وبكره ان شاء الله بنتلاقى و بنتابع الموضوع ..
سلمان: باذن الواحد الاحد ..
طلعوا من بيت سلمان .. وسلمان سكر باب الحوش وراح داخل بسرعه يتطمن على بنات اخته و يوسف ..
اول ما دخل كان الخوف باين فعيونه .. شاف عيال اخته ولاشعوريا حضنهم الثلاثه وتم فتره على هالحال .. طبعا البنات استغربوا من حركة خالهم .. اما يوسف فكان حاس باللي سلمان حاس فيه .. وحس بحنان وحب خاله لهم
الجوهره مسكت ويه سلمان وبحنان: خالي شفيك ؟
سلمان غمض عيونه وحط راسه في حضن الجوهره وتم ساكت ..
هنادي مسكت يد خالها: خالي فديتك تعبان ؟
سلمان فتح عيونه وتم يطالعهم .. و التقت عيونه بعيون يوسف ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك