رواية هجرك ابد ما هز قلبي دام الشموخ مني وفيني -4
كانت معصبه وايبين في شكلها..تخيلوها..تمشي بسرعه ومرتبشه..غمضت اعيونها يوم شافت مبارك..كانت ما تبا اتشوفه وهو كااشخ..صدت عنه..لانه كشخته كانت غير..وهي تكابر..ما تبا تتعترف ولو بين نفسها انه حلوو..وانه يستحوذ على كل فكرها..
شافها مبارك من بعيد..ابتسم ابتشامته المعتاده..وظهر من سيارته اللي كان مبركنها جدام الباب..وكان بيظهر..بس من شاف غناته..وين يظهر؟؟
نزل من سيارته بهيبته ..وببسمته..وبنظراته..ببروده..يأ صوبها ..ناظرته وصدت عنه..وكانت بتمشي بس صوته وقفها..
مبارك:مرحبااا..
اليازيه:مرحبتين........
مبارك:أووه أشوفج ما مشيتي..
اليازيه:هيه ما مشيت..سويتها يا برووك..
مبارك:لا تقولين برووك..هب أصغر عيالج..
اليازيه:اتهبي انت اتكون وااحد من عيالي..
مبارك(بابتسامه باارد حرقت اليازيه وزادتها قهر..):هههه..مشكوورة..
اليازيه:عفواً..
طالعته ...وشافته يبتسم لها ببروود..بس ابسرعه صدت عيونها عنه..مافيها عليه..مشت وتجدمت صوب باب الصاله بتسير صوب ظبيوه..
مستحيل في يوم اتعامل هلإنسان مثل أي حد غيره..طالعها مبارك لين ما وصلت للباب وحدرت البيت..أبتسم..ووطى راسه..سحب سفرته وحطها على كتفها(تراه بتسفر مرة ثانيه في سيارته..)هالإنسانه..غير ..في ذمتيه انها غييير..ليش يا مبارك اتييك هالأفكار اللحينه..اللي يقول أنك ما تعرفها من زمان..وعايش معها نص عمرك..
أروييج يا اليازيه..انتي بعدج ما شفتي شي..ان ما حرقت أعصابج..ماكون مبارك بن خليفه..
سار سيارته وحط السماعه وتم يرمس ربيعاته..بس فكره هب عند أي وحده..كان عند اليازيه..
. . .
ايه احبك هذا حظي الي انكتـــــب .. دربي الي امشيه و ادريبه تعـــــــب..
ايه احبك و انت في عيوني سهر .. و انت وســــــط القلب حرات و خبر ..
الهير..
بيت بو عبيد..
الساعه 12ونص..
الصاله اللي فوق..
كانت ميثا اتطالع التلفزيون وطايحه جدامه..حاطه على نجوم واتطالع...فزت من مكانها وهي اتشوف عبيد ايها ويبند التفزيون..
عبيد:يلا يسدج أغاني وذنوب..نشي رقدي....
ميثا:هههههههه..تو الناس..بعدها 12..ونص..
عبيد:ولو..ايقولج..نام بكير أصحى بكير شوف الصحه اشلون بتصير..
ميثا(تنش وتعدل شيلتها..):انزين عن الفلسفه وين كنت..؟؟
عبيد:كنت في سويحان..عند برووك..لا تخافين ما شفت سعيد توه اللحين مرمسني ويأ من بوظبي..وما اعرف شو عنده في بوظبي..
ميثا(قاااافطه..وويها أحمر..):....بسسم الله الرحمن لرحيم..انزين أنا ما اتخبرت..
عبيد(يحرك يداته لها ويعطيها ظهره..):انزين أدري..بس قلت أقصر المسافات..
ويحدر حجرته ويبند الباب..
ميثا:استغفر الله العلي العظيم..ماكو شغل على قولت يزووي..اووبس اليوم ما رمستها يلا بااجر برمسها..برووح أشوف ميرة أكيد مجابله الكمبيوتر..
وتويه صوب حجرة ختها بتشوفها..دقت الباب وسمعت صوت ختها اتقولها دخلي..حدرت الحجره ..ختها مطفيه الليت ومجابله النت..هااي حالتها جي دوووم..!!!!!!!!!!!!!
ميثا:ميرة بسج عيوناتج بيروحن بسبة النت هاللي أربع وعشرين مجابلتنه..
ميرة:شو أسوي طفرانه..
ميثا:اممم..شو تسوين..
ميرة:مااشي توني متعرفه على هنتين من المنتدى واللحينه أرمسهن ع المسن..
ميثا:أهااا..المهم قوم خالي محمد باجر بيونا..
ميرة:وخير يا طير..
ميثا:ما يهمج..؟؟
ميرة:لأ خلاص ما استوا ايهموني..
ميثا:ليش يعــنــ...........
ميرة(اتأشر لميثا أشاره على أنها تسكت.):ميثوه دخيلج لا تيبين سيرة هالسالفه..اللي صار صار..وهاه شي صح اني للحين ما نسيته..بس خلاص..هاه مصير كل إنسان في النهايه..
وردت اتجابل الشاشه ودمعتها ع خدها..شافتها ميثا..اتألمت على حالة ختها..وظهرت من الحجره..سارت لغرفتها وهي اتفكر في ميرة..لين متا يعني يا ميرة بتميين جي..مالومج انتي فقدتي غناتج..
غمضت ميثا عيونها وهي تتذكر..تتذكر وقلبها يعتصر على أختها..فجت ميثا عيونها وهي اتطالع بوها جدامها..
بو عبيد:ميثوووه ليش للحين ما رقدتي؟؟
ميثا:اللحينه سايرة لحجرتيه عسب أرقد..
بو عبيد:انزين وأخوج وينه؟؟
ميثا:توه حدر حجرتيه..قبل شوي يأ من سويحان ..
بوعبيد:هيه تراهم هاييلا الشباب ما عندهم شغله غير صك الخطوط..وميرة ختج وينها..؟؟
ميثا:في حجرتها..
بو عبيد:اها..زين يلا سيري رقدي..
ميثا:اووكيك..
بو عبيد:شوو؟؟
ميثا:انزين ابويه اللحين سايره..
بو عبيد:هيه..وأانا مستغرب شو بلاها االبنيه..سيري سيري علني فدااج..
وتقرب ميثا من أبوها وتبوسه ع راسه..وتسير حجرتها تبند الباب..عسب ترقد..
ما أحبك..ولا بحبـــــــك..وحبي لك من سابع المستحيلات..
بس أحب ألعب بقلبــــك..وأسطر ذكـــــــــــــائي في أبيات..
عند الباب..في بيت بو منصور..
الساعه 1ونص..
ظبيه:انزين وشو بعد؟؟
اليازيه:ويا ويهج..اتشوفيني أتمصخر..
ظبيه:لا صدق وشو بعد؟
اليازيه:تتدرين من يوم ما كنت اصغيره وأنا اضاربه..للحين ما تغير شي..يحرقني برووده..وابتسامته..مادري شو أسوي في حياتي..
ظبيه:بل بل..اللحينه برووك امسوي كل هااذا فييج..عنبووه..
اليازيه:وياااااا ويهج يا العنز..
ظبيه:هاهاها..لا اتضحكيني معرووف من العنز..يا عنز الحاااااااره..
اليازيه:اهئ اهئ شو هاه اللقب اللي مخاويني من صغري..غيروووووووووه..
ظبيه:مااشي..طرتي حليتي ما بنغيره..
اليازيه:أأأأأأخ منج..يبالج تكفييخ..المهم أنا بسير بيتنا النا ساعه هنيه متفيرزات عند الباب انسولف..ضاقتبنا البقعه..
ظبيه:هههههههههههههه..اتخافين ولا أوصلج..
اليازيه:لأ ماخاف..جي سويحان فديتها فيها كل الأمان..
ظبيه:أأأأأأأأأأه..ابا ارقد.؟.مشتاقه لشبريتي..مع السلامه..
اليازيه:بااي..
وحدرت ظبيه بيتهم..وتحركت اليازيه خطوتين صوب بيتهم..الا اتشوف سيارة عافده عليها..
سعيد(اموطي الدريشه..):هههههههههههههههه...مرحبا ختيه العزيزة..
اليازيه:سعوووووود وحطبه..زيغتني يعلك العووق..
سعيد:ههههههه..عادي..هاه ما تولهتي علي..؟؟
اليازيه:لأ..تعال باجر..يمكن اتوله علييييييك..
سعيد(ايرد سيارته لورا..):عيل مع السلامه باجر بيي..
اليازيه:ههههههههههه..تعال ويا ويهك أمك حاشرتنا اتصلوا بسعيد اتصلوا بسعيد..
سعيد:فدييييييتها أمايه يعلني ما خلا منها...
وينزل من السياره..
سعيد:حد عندنا؟؟
اليازيه:ما دري..
سعيد:وليش للحينه خاري البيت..ولا ما عندج بيت؟؟
اليازيه:لأ عندي بيت..بس كنت عند قوم عموه عايشه..
سعيد:هيه..هههههههههه..ليش جي قزومه..؟؟؟؟
اليازيه(اتشوف سعيد اللي كان أطول منها..):ماالت عليك من أخو تووم..أنا بنوته وانت ريال شكبرك..ماااااااااالت علييييييك..
سعيد:..........آه....(يطالع السما..)عزاه من مثلي تعذب..ومن الوصل نفسه حريمه..(للمعلومه....صوت سعيد ماااشي شراته..واااييد حلوو..وتحسون فيه حزن..)
اليازيه:شو ضاربنك الهوى.؟؟
سعيد:أأأأأأأأأه ياليازيه والله مشتاااااااااااااااااااااااااااااااااااااااااا ق حييييييل لميثوه..
اليازيه:مشكله الحبايب..جي ما شفتها أمس؟؟
سعيد:شفتها..ورمستها..بس هاه ما يكفيني..حراام والله حراام تخيلي أشوفها بس دقايق..
اليازيه: تزوجها وبتشوفها بالأيام..ههههههههههههههه..
سعيد:أأأأأأأأأه صخي صخي يالهرمه صخي..
ويحدرون البيت..
اليازيه:صووت حد في الخيمه..
سعيد:هاييلا أكيد سلطون وبرووك..كل واحد ايمثل عمرة ساحر الليل..أأأأأأأه يالليل..أبدونك ما دري شو كنت بسوي..؟؟
اليازيه(معقده حياتها):بدوونه كنت ما بتقدر اتسوي شي؟؟ليش سعوود شو اللي مستوي..شو بلاه الليل..
سعيد:أحب والله بلاني بلوه كبيرة به..
اليازيه:انزينه وشو دخل الليل..؟؟
سعيد(يضربها عر اسها ضربه خفيفه..):انتي شو درااج يالياهل بالهوى وأشكاله..
ويعدون الخيمه..
اليازيه:بل بل ..شو سعيد ما تروح عندهم؟؟
سعيد:لأ هب فاايج أضحك..بسير وبنبطح ع الشبريه وبدق أبوها نومه..من الصبح في بوظبي..
اليازيه:ما تبا تاكل شي..؟؟
سعيد:لأ توني متعشي مع ذياب وحمد..يلا مع السلامه عنز الحاره..
اليازيه:ههههههههه..باي..
ويهت اليازيه صوب المطبخ .. تبا تااكل شي..ظبيوه ما أكلتها..كانت اتغني بس مقهورة ما ظهرت اليوم..وتقول في خاطرها..(شكلج يا يزووي ما بتظهرين دام حيوان زمانه هنيه ميلس في الإمارات..مااااالت عليك من مبارك..ماشفت البركه من ييت..)فجت الثلاجه تبا اتظهر لها شي تااكله..بعد عشر دقايق زهبت لها أكل خفيف..وظهرت من المطبخ وراحت الحوي وقعدت تااكل..وشوي سمعت صوت حد من وراها ولفت وشافت مبارك.
انتهىىىىىىىىىىىىىى الجزء..
ظنكم شو بيقول مبارك لليازيه؟؟وكيف بيحرق أعصابها؟؟
ظنكم نورة بتوافق على بطي؟؟ولا بتم تحلم في مبارك؟؟
وميرة شو سالفتها؟؟وليش عاايشه في حزن؟؟
والهنوف؟؟هي بعد شو بلاها؟؟
ظنكم شو بيستوي بين ميثا وسعيد؟؟
وظبيه؟؟شو بيستويلها؟؟؟هل بتمي عايشه في أوهاام؟؟ولا بتساعدها اليازيه؟؟
ترقبواااااااااا...
الجزء الثــــــــــــالث..
لايق عليك الحسن والزين ..متميزن بالوصـــــــف فتان..
تذبحني نظرة من العــــين ..واموت انا في بحر الأعيان..
مبارك:مرحبا يزووي..
اليازيه(اتنش..):هلا..
مبارك:افا ليش جي مبوزة..
اليازيه:ما كنت جي الا يوم شفتك..
مبارك:ههههههههه..شي طيب..
اليازيه:والله..مرة مستانس..
مبارك:اوف ما تتخيلين..
اليازيه:.............................الا اسميك يا مبارك امضيع مذهب حاط دوبك ابدووبي..........
مبارك:أنا مضيع مذهب؟؟؟هي انتي سمعي..أنا لا وحده راحت ولا يت وفكرت بس اتسبني..اليازيه حشمي وعن الغلط..وجاني غثيتج السموحه..الا انتي حرام حد ايعبرها ولا يستهم بها ويدزلها ويه..ولا ني بغريب اتعلميني ..وثمني رمستج قبل لا تنطقينها؟؟هب مبارك بن خليفه ال.........ي اللي اتعلمه بنيه ما درت وين الله عاقنها المذهب وغيره..
اليازيه*عنبووه كلني رادار مشغلينه..*:لولا حشيمة هل البيت يا مبارك جان حطيت الفرد بعيونك..ومرفوقات البدويات عن تضييع المذهب..ومحشومه بنت سهيل ما غلطت على ظيفن لفانا ..
مبارك:تسامحت منج ياليازيه جاني غثيتج..الا انتي حراام عليه الواحد يتسامح منج أو يفكر بهالشي..سمحيلي..ما كون ولد جباايل يوم إنيه اسبج والعن خيرج وفي داارج..الا رمستج مووول ما تنطاق..وما سنت عند الجبايل ولدهم ايسب البنات..الا انتي مطوووله لسانج ع الرايح والراد..وأنا مبارك ال.......ي..ولد عمتج بس غلطتي علي..وحشمتيه عراااس الكل..اللي منهم انتي....
ودرها وسااااااار..
انقهرت اليازيه..وتحلفت له..ومشت وهي معصبه وهاه الشي كان امبين من شكلها..حدرت البيت..وسارت لحجرتها..لييييييييييش ايعاملني جي؟؟شو اللي سويته له؟؟أنا مادانييه..يطلعلي الضغط..يقهرني ...السبال الحقير النذل..الخاااام..لعله الموت..يستفزني..أأأأأأأخ..وأنا ليش أحرق أعصااااابي..عسب واحد حقير..اه..بمووت من القهر..اممرة مسك الرمسه هب هين هالمبارك..سكتني..ولا انا ع بالي بسكته..يوم إنه في داااري..
وقفت ع الدريشه..وشافته ويا سلطان..واقفين عند الباب الكبير..وكان امبين عليهم انهم يضحكون..سحبت الستاره وسكرته..(وأنا ليش استهم به..بن عروه بيستهم به..ماااااااااااالت...)فجت شعرها ..وحطت في بالها ترقد وتخلي هالأفكار..بس شافت الكمبيوتر..وقالت بتحدر النت..حدرت النت..وقعدت لين الساعه 3ونص..وخلاف رقدت..
. . . .
احبك للوفا والله يــــــــــــــعلم.. وعمري من دفا قربك يطيبي ..
تعيش اسنين ياعمري وتسلـم.. تمنيتــــــك من العالم نصيبي ..
سويحــان..
الساعه 3ونص..الظهر..
بيت بو سلطان..
سعيد واقف عند باب حجرة اليازيه..ويزاعج ومكسر الباب..بس اليازيه نومها ثقيل..وتم عند الباب..عنبوه يا ولد الحلال كسرته..اذا محد يوايبلك سر(يرد علي ويقول..:ماااااااالج خص انتي كيفي كيفي..)خخخخ..مالت عليك..وبعد مووت..
اليازيه:هاااااااااااه؟؟منو ع الباب..
سعيد:بن عروة..فجي فجي برمسج..
اليازيه:عفون أرمس العرب كلهم بس انت يا بن عروه مع احترامي الشديد مابا ارمسك..بعدين بعد شوي بظهر..توني ظاهره من الحمام(الله يعزكم..)
سعيد:فجيييييييي الباب يا ملعونة الصير فجي..بسج رقااد..
وتفج اليازيه الباب..
سعيد:عنبووووووووووه جم شمس ع الكرة الأرضيه؟؟ويا هالشعر..شمس شمس مافي شك..
اليازيه:لا تستخف دمك..شو المطلوب..؟؟
سعيد:بيت شعبي وعماره طاال عمرج..
اليازيه:اوووه شو المطلوب؟؟
سعيد:ما عندي المعطيات والبرهان طاال عمرج؟؟
اليازيه:اوووووووووف سعيد شو تبا؟؟
سعيد:ريتي الساعه جم ولا لا؟؟
اليازيه:لا ماريتها ما أتعامل مع ساعات الحائط..جم الساعه..
سعيد:اتناظر الساعه..وش فيك مستعيل؟؟
اليازيه:يااااااااربي الله بلاني بك يا سعوود..
سعيد:منو هاه سعوود؟؟
اليازيه:أأأأأأأخ منك..ولد حارتنا..جم الساااعة؟؟
سعيد:عنبوه ميلستني جي جدام الباب..ماشي تفضل ولا نسيتي عمرج يالبدويه؟؟
اليازيه:سمحلنا الشيخ ..هب من عاداتنا يالبدو ما نرحب بعربنا..تفضل..
سعيد:محشومين البدو..زااااااد فضلج..
اليازيه:عيل اترياني الين ما ييب القهوه..والفواله..
سعيد:لا لا تسلمون ما يحتاي..
اليازيه:أفا ما هقيناها منك يا فلان اترد عربك..
سعيد:خخخخ.عايشه الدور..
اليازيه(بخيبة أمل..):سعيد بتخبرني الساعه جم ولا لآ؟؟
سعيد:هييييييههيههيههيههيههيههييييههيههييي..الساعه 3ونص..علني فدا رووحي..((معروووفة ضحكة سعيد..لأنها مميزة..))
اليازيه:شووووووووو؟؟يعني تغديتوا؟؟ليش محد يأ وتكرم ايوعيني..؟؟
سعيد:امممممممم..ما عندي الجواب..صح ميثووووه قبل اشوي دقت..وكانت تباج..سيري يلا دقيلها..
اليازيه:شو؟؟لا بعدني بتسبح وبغير..وبااااكل..وبتفيج وخلاف جي العصير بدقلها ..يعني يوم أتفيج..
سعيد:هههههههه..بليز يعني لا تضحكيني..أقولج سيري يلا دقيلها..لا أسفرج الهند..
اليازيه:يلا لا تخليني أشتكي..
سعيد:خوفتيني..عند منو حظرتج بتشتكين؟؟
اليازيه:عند منو يعني؟؟رااعي الدكان؟؟أكيد عند الشرطه..
سعيد:ليش انتي اتدلينه درب الشرطه..
اليازيه:هيه أدله بنت سهيل..تباني أسيرله..
سعيد:قصوورج لا خطيتي خطوه وحده برع البيت....يزووي نشي رمسي ميثا ابا اسمع صووووتها..
اليازيه:يالله..انت شو بلاك اليوم..اذا تبا اترمس ميثا سير انت ورمسها..ولا خل بن عروه ولا واحد من عياله ايرمسها ويااااك..
سعيد:صخي قطعيها الرمسه يا مسودت الويه..لو تدرين ؟؟انتي بكبرج ما تسوين شعره من شعر ميثا..
اليازيه:وااااااااااااااايه التراب..لا اتخليني أقوم البيت ابكبره عليك..فديت رووحي الكل يشهدلي بجمالي..والمعرووف اني أحلى وحده في العايله الكريمه الله يحفظهم..قوول الا ميثا اللي ما تسواني..ظهر ظهر من حجرتيه..
سعيد:ههههههههههه..انتي ما تسوينها..ميثا تااج رااسج..
اليازيه:سعيد لا تغلط وتتعدى حدودك..محد غير ربي وأبوي أمي هم اللي تاج رااسي..ولا البااقيين ما يسوون شي بالنسبه لي..حتا ميثتك ما تسوى شي..امبونها بنت سهيل حاشمه العرب الا انت ما تحشم ومضيع المذهب..
سعيد:هههههههههههه..هيدي هيدي ..كنت ابا اعرف شو بتسويين؟؟؟عنبوووه كلتيني يا بنت سهيل ..
اليازيه:عيل أشوفك تغلط علي..وأسكت..
سعيد(يقرب صوبها..):وهذا اللي يعيبني فيج يا اليازيه..غيييييير عن البنات كلهن..محشوومه عن الغلط..
اليازيه(تبتسم.):أعيبك ماعليك..ويله ويا سوااد ليله اللي يغلط علي في داااااري..(وتذكرت الموقف اللي أمس..)
سعيد:هب بس وييله وسواد ليله..الا حرمت عيشته....سيري سيري تسبحي..وداعة الله..
ويظهر من حجرته..أما اليازيه حدرت الحمام..*الله يعزكم*..
. . . .
هام قلبي في هواكم و انجــبر .. صدقونـــي جيف اسلا ما يصير..
يا حبيبي من نصابي في خطر .. و ارحم الي صار في حبك اسير ..
يوم الجمعه..
أبوظبي..بيت بوناصر..
العصر..الحوي..
كانت العايله كلها متيمعين..وخصوصن وياهم يدتهم..اللي هي ام امهم
**يدتهم شيخه..السموحه منكم نسيت ما أحطها في الشخصياات..**
حمدان وذياب وسيف ماكلين جو اليلسه بضحكهم..عكس ناصر اللي مشغل الاب توب والهنوف حذاله..
أما العياييز مجابلات الشيبه ويسولفون..وفجأه..
أم عبدالله(عبدالله هو اللي بو حميد وسلامي وهدووف..):سيف..
سيف:عووونج..
أم عبدالله:نش غربلات ابليسك نش يالهرم..ودني سويحان..
ذياب:جي عاده العيوز متولهه عليهم..وع السييح..؟؟
أم عبدالله:عيييييز حيلك يا مسود الويه..هيه تولهت عليهم..
ذياب:مسسسسسسسرع ما مداج يدووه تتولهين عليهم توج............
أم عبدالله:صخ صخ قطعها الرمسه..يا مسود الويه..
ذياب:هب جنهم قفطووني ولعنوا بو خاامسي..
سيف:امممممممممرة لا تتخبر..يدووه اشعنه ذياب ما يوديج..
ذياب فج عيونه منصدم...ومتحلف لسيف اللي كان ايحرك حياته قصده ايغيض بذياب..
أم عبدالله:لالالالا..أباك انت يا ملعون الصير..هاه بو هناد تباني أخبرهم شو مسوي أمس..
ذياب(يحرك حياته..قصده ايرد الحركه..):هاه العيوز خبري شعندج؟؟
أم عبدالله:صخ صخ انت ولا بهالعيرة عراااسك ..يا ولد امكيرا..(امريكا..)..
الكل سكت ما فهومها الا سيف تم نااقع ضحك..
أم ناصر(ناعمه بنت أم عبدالله..):ويدي أمايه علني فدااج شهالرمسه..؟؟
سيف:هههههههههههههههههااااااااااي..أمريييكا أمريكا..
هنيه الكل نقع ضحك..وما راموا يسكتون..ألا يوم سكتهم نااصر..
ناصر:ههههههههههه....بس بس يدووه شو مسوي بو هناد..؟؟؟
أم عبدالله:هيييييييييهاااااااء خله بو هناد ع صووب ظهر رااعي بنات...أمسات ميلس في الحوي يرمس تلفووون..
حمدان:انزين يدووه يمكن ربيعه..
أم عبدالله:صخ انته ربيعه بيقوله علني فدااج وغناتي ..
أبو ناصر:وخييييييييير ياااااااا طير..خلوه ايرمس ع كيييفه..
ذياب:عااااااااااااااااش شيبتنا..تحيا الحريه..تحيا تحيا..
حمدان:عيل سيفووه خذت الموافقه الرسميه..
الهنوف:جي عاده أميه ما سكتي شيبتج..
أبو ناصر:شاب شعر رااسج صخي عن تزعل العيووز وما نبات في الحيره..
أم نااصر:عيل شعنه ترمس جيي؟؟
أبو نااصر:علني فداج يا نعومتيه...بس جي قااعد أسولف..لا يكون زعلتي ماااهون عليييييج يالغاليه يالحلوه انتي يالغاويه..
ذياب:هلا والله هلا مافيه حييله شيبتيه ثرني طالع عليييه..عيل لا حد ايي ويلومني..من صغري أشوف أفلام هنديه مسجله..
أم عبدالله:شو هالمنكر..؟؟
ناصر:ههههههههههه..عنلاتتك..صخ لا ايسفروونك..
ذياب:اممممرة بنصخ ما صدقنا اني اماراتنا..
أم عبدالله:سيفووووه وويعه نش شغل مووترك..
سيف:يدووه مارووم أوديج..
أم عبدالله:اشعنه ما ترووم؟؟
سيف:عندي شغل بعد شوي بسيرله..
ذياب:يدووه يدووه لا اتصدقينه هاه جذاب..بيسير ايجابل ربيعته اللي أمس رمسها تلفوون..
أم عبدالله:عنلاااااااااااااتك يا سيف يا مسود الويه يا مضيع المذهب..يتسير اتجابل ربيعتك ربعبك بعير انت وياها وتطيحون من فوقه..منو هااي اللي مضيعه مذهبها منو هااي بنت الجباييل..وودني وودني صوب أبوها ان ما أدبته هو وبنته..
الهنوف:وشلج فيهم يدووه..؟؟؟؟(كانت ترمس وعيونها ع الاب توب)..
أم عبدالله:صخي انتي محد رمسج..ولا بهالعيرة عرااسج..موول بتوقعين مسدووحه ..طالعي تلفزيونج؟؟
ذياب: هههههههههههه في هييج الساعه بنطقج الشهااده..
حمدان:هاهاهاهاهاههاااا..شكر فنج يدوووووه..
الهنوف(اترمس ناصر..):اممممممممممرة عيبته السالفه..ما يصدق حد ايسبني ..
ناصر:ولا يدووه رمسيها بتقولج بهالعيره ع رااسج..خخ..
الهنوف:هههههه..لا تعلق لا بتنش وتكسرك..مافيها حييله البدويه..
بالأخير نش سيف وودا يدووته سويحان..
. . . .
أحبك يا نظر عيني غنــــــاتي .. و احب الارض لي تمشي عليها ..
و احبك حتى اكثر من حيـاتي .. و اسوم الروح لجلك و اشتريها ..
سويحــان..
بيت بو سلطان..
بعد صلاة المغرب..
ظبيه:اممممممم..قولي يا رب انه ما ايي اليوم مافيني أصيح..يلا أنا اترياج يزووي..
اليازيه:اوووكيك وداعة الله..والله يعيييينج عهالدموع اللي مبرمجه من اتشوف حميد ع طوول تنزل..
ظبيه:هههههه..الله يحفظج..يا يا يا عنز الحااااااااره..
اليازيه:مااااالت عليج بااي...انتي حرااام حد يرمسج..باااااي..
ظبيه:بايات..
بندت اليازيه التلفون وسارت حجرتها اتغيير..ظهرت لها كندوره برتقاليه ويا الشيله..وجحلت اعيونها وحطت قصتها ع طرف..ظهرت من حجرتها وسارت صووب مهرة..
دقت الباب وحدرت..
اليازيه:هااي مهرووه شو تسوين؟؟
مهره:مااشي اذااكر..
اليازيه:انزين بتسيرين وياي صوب بيت عموه عاايشه يدوه شيخه يت..
مهره:وااايه علني فدااها..اللحينه بخلص وبييكن..برايج اذا بتسيريين....
اليازيه:اوووووكيك..
نزلت اليازيه تحت ولقت رااشد في الحووي يلعب بالدراجه..
اليازيه:رشوووود يا مسود الويه..
راشد:هاااااااه يا بيضا الويه..(يتمصخر..)
اليازيه:شفت أمايه..
راشد:توها ظاهره العيوز من الباب سايرة أتشوف يدووه شيخه..
اليازيه:هيه عيل سبقتني..
رااشد:جب جب جب بس جب جب؟؟
اليازيه(معقده حياتها..):ياااااااالله بالستر..ووين سعيد..
راشد:ساروا العين صوب حميد..ووياهم سيف..وسلطان..بس أنا لا..
اليازيه:اااااااااهاااااااااااا..مع السلامه..(يعني يا ظبيه ما بيتصيحين..)
راشد:بااي..في ستن دااهيه(اوونه يتكلم بالمصري..)
اليازيه:بتخبرك انت شو من يواز عندك..
رااشد:علني فدااا الإمارات يواز بو صقر..
اليازيه:هيه ع بالي بعد..
تحركت اليازيه وويهت صوب الباب الكبير وظهرت وحدرت بيت عموتها عايشه..شافت أمها ومنصور وموزة وسهيل وعموتها عايشه ويدوتها شيخه..(وظبيوه محد..)سارت وسلمت عليهم وقعدت حذال يدوتها..تمت اتسولف وياها وتاخذ علومها لأن طوول الأسبوع اللي مضا كانت عند بنتها ناعمه..يأ سهيل وتم يلعب بعصا أم عبدالله..عاااااااااد الله يعينك يا سهيل بتاكلك العيووز..كله ولا عصاتها..
موزة(اتطالع في منصور تباه ياخذ ولده تراها قاعده ع الطرف..ما فيهم على حشرة العيوز.."وبصووت واطي..*:منصور منصووور شل شل سهيل بتاكله يدوتي اللحينه..
منصور*يطاالع فيها ويبتسم..*:............................ .
موزة(حطت في بالها ان هالأنسان ما منه فاايده..):سهيل تعال فديتك بخلي البشكاره اتبدل لك..
أم عبدالله:سهييييييييييل فدييتك فج العصا..
وتمط العصا منه وتحطه فوق اليازيه..
أم عبدالله:قبضيها قبضيها..(وعطتها اليازيه..)..
وشلت سهيل عندها وتمت تلعبه..المهم..مر الوقت ..والعيوز واليازيه اتسولف فياها..ويت ظبيوه وتمن ايسولفن فياها..كاااااانن ايموتن عليهن..ويحبن سوالفها..ونفس الشي مع أم عبدالله..كانن اليازيه وظبيه لهن معزززة غيير عن الكل..تمت اليازيه اتسولف والعصا عندها..نش منصور ونشت موزة وراه..أما سهيل تم يلعب عند يداتها..وكان يحااول ياخذ برقع أم سلطان..
أم سلطان:وييل حالي علييك يا سهوول جي عاده بغيت البرقع..
اليازيه:لا تحااااتين أمايه بعطيه برقع يدتيه..
أم عبدالله:قصووورج ان مديتي يدج ع برقعيه..يا مسودة الويه..
اليازيه:ههههههه..غريبه ما قلتي ولا بهالعيرة ع راا.............
مبارك(يقاطع سوالفهم..):السلااااااااااااااام عليكم..مرحبا مرحبااااا ملاااييين ولا يسدن في ذمتيه..تو تو مانورت سويحااااااان..مرحبا بشيخة الزين..
أم عبدالله:واااااايه يعلني ما خلا من هالشووف فدييتك يا مبارك..
ووخى تحت وبااس رااسها..كان قريييييييب من اليازيه..طالعته بنظره يوم رفع رااسه..وكان ايطالع خته ظبيه..يباها اتقوم من مكانها عسب هو يقعد..خقاااق بنظرة فهمته ظبيه..ووسعت له وقعد حذاال يدتها..كان ايسولف فيها وياخذ ويعطي..العيوز تمووت على شي اسمه مباارك..وكان دووم تفتقده..ما صدقت من اتشوفه خوفاتي اتفج شعرها وتنعش..
نشت ظبيه وساارت المطبخ..مادري شو كانت بتييب..بقت اليازيه قااعده ما ترمس..عكس العياييز ومبارك..
مبارك:عيل يا حظك يا سيووف يوم انه ماشي ضربه يت عرااسه..
أم عبدالله:هيييييييهااااء كنت بضربه الا قلت بسامحه هالمره..الا اللي يباله ضرب هاايييلا مسترغداته يبالهن تكسير راااااااااس..علني بلاهن..
مبارك:هههههههههه..علني فدااج يا يدووه..
وظهر تلفونه من مخباه..وطرش مسج لذياب..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك