رواية نهاية حبك اعدامي -51
الدكتور: تلخصين الماده كلها ليش ؟ انا بلخص محاضرة اليوم .. هاي اللي تحتاجينها ..مناف: شكرا دكتور .. في شي ثاني بعد دكتور ؟
الدكتور مبتسم: لا مافي شي .. بس انتبهي لدروسج وشدي حيلج ..
مناف: ان شاءالله .. قامت بتطلع من القاعه وطاح الجوال من يدها ..
مناف نزلت تاخذ الجوال من الارض ونزل الدكتور معاها بنفس الوقت .. مد يده قبلها وخذ الجوال .. وقفت مناف والدكتور مد يده عشان يعطيها الجوال .. تلاقت عيونه بعيون مناف .. سرح الدكتور بعيونها .. اما مناف انحرجت وحست بالتوتر والخوف ..
مناف: الجوال دكتور ..
الدكتور: آسف .. تفضلي .. عطاها الجوال وهو مو قادر ينسى عيونها ..
استأذنت مناف وطلعت من القاعه وهي قلبها على الجوال لانه انكسر .. اما الدكتور من طلعت مناف وهو في عالم ثاني .. سرح بعيون مناف وجمالها الفتان .. راحت الكفتيريا والجوال في يدها تحول الى قطع .. قعدت وحطته على الطاوله وتمت تشوفه بحزن ..
مناف " شلون بكلم فارس .. اخاف يتصل والتلفون مبند .. شاسوي يا ربي " .. تذكرت ان عندها الفلوس اللي عطاها اياها فارس ذاك اليوم .. راحت وشرت كرت و اتصلت له من تلفون الجامعه .. فارس كان في الاجتماع ورن جواله شاف الرقم غريب فرد على طول ..
فارس: السلام عليكم ..
مناف بحزن: فارس ..
فارس طلع من غرفة الاجتماع: شو فيج حياتي ؟
مناف خانقتها العبره: فارس .. جوالي انكسر .. وصاحت ..
فارس: فديت هالدموع .. شلون انكسر حياتي ..
مناف تذكرت الدكتور: طاح من ايدي وانا ابي اطلع من القاعه ..
فارس: ولا يهمج نجيب لج تلفون يا قلبه انتي .. ليش مزعله نفسج وتصيحين ..
مناف تمسح دموعها: فديت قلبك يا فارس ..
فارس قلبه يدق بسرعه: حياتي .. شو فيج .. هالدموع من عشان الجوال انكسر ؟ حد قايل لج شي ؟ متهاوشه مع حد ؟
مناف: لا .. مافيني شي ..
فارس: حبيتي مناف تكلمي .. حد قايل لج شي .. زعلج مو عشان الجوال انا متأكد ..
مناف: ما فيني شي حبيبي ..
فارس: زين العصر بمر اخذ لج جوال وبجيبه لج ..
مناف: زين الساعه كم ؟ 5 ونص اكون فالبيت ..
فارس: الساعه 6 بكون عند البيت .. ولا تدرين بتصل في فيصل اخوج لما تشوفينه يتكلم فالتلفون طلعي عند الباب اخذي التلفون .. شو قلتي ؟
مناف: زين ..
فارس: حياتي اي نوع تبين ؟
مناف: اي شي ما يهمني ..
فارس: حياتي ليش هالحزن .. خلاص .. باكلمج الليله وبعرف منج كل شي ..
مناف: وش تعرف ما فيني شي فارس ..
فارس: لا فيج .. قلبه يقول فيج شي يا قلبه انتي ..
مناف " فديت قلبك يا فارس": فديتك يا فارس ..
فارس: زين باجيب لج مثل التلفون اللي استخدمه ..
مناف ابتسمت: فديت قلبك .. لا ابي تلفونك اللي تستخدمه ..
فارس ضحك: هههه .. ليش يعني اللي استخدمه ؟
مناف: بس .. ابي اشم ريحتك فيه ..
فارس: واااااااااااي .. باموت انا .. ذبحتيني يا مناف .. ايه عليج ..
مناف منحرجه: عااااد
فارس: فديت الدلع انا .. ولا يهمج اليوم تلفوني عندج .. كم مناف عندي انا ..
مناف منحرجه وتبتسم: الله يخليك لي يا فارس ..
فارس: زين عندي سؤال حبيبتي ..
مناف: اسأل فديت قلبك ..
فارس: ما تبين راعي التلفون بعد ؟
مناف بدلع: لأ ..
فارس يغطي ويهه: ههههههه .. فديت الدلع انا .. بس احلفي انج ما تبين راعي التلفون ..
مناف: بس ابي تلفونه .. وش لي فيه .. مو شي
فارس: هههههه .. اوريج يالدلوعه .. زين يا قلبي .. خليني ارجع الاجتماع .. وكلميني بعد ساعه الا ربع فديت روحج ..
مناف: زين حبيبي .. مع السلامه ..
فارس: حياتي .. ما تبين اجيب لج شي وانا جايكم اليوم ؟مناف: لا حياتي ..
فارس: خير ان شاءالله .. سلام ..
مناف: الله يحفظك ..
سكرت من فارس وغمضت عيونها وتنفست براحه وهدوء ..
مناف " فديت قلبك يا فارس .. بس الله يعيني عليك الليله .. الحين يبي يعرف السالفه وماعرف وش اقوله .. اقوله سالفة الدكتور ولا لأ ؟ .. محتاره .. وهالدكتور يخوفني " .. طلعت من الكفتيريا وقعدت تحت الشيره وكان الجو حلو .. فتحت كتابها وتمت تذاكر عشان تضيع الوقت .. كانت الساعه 12 ونص .. وباقي وقت على موعد المحاضره الجايه اللي بتبدى الساعه 2 الظهر .. اما فارس رجع الاجتماع وهو مبتسم .. وخالد كان يطالعه بغضب و لاوي بوزه .. فارس طالعه ورفع حاجب وضحك له ..
فهالاثناء التقى عبدالعزيز بيوسف بعد ما خلص من الجامعه ويوسف استأذن من الدوام ..
يوسف: حياك بوسعود .. بس عطني شوي بروح ابدل وبرجع ..
عبدالعزيز: خذ راحتك يبه ..
يوسف: اوكي .. طلع يوسف وراح على طول غرفته عشان يبدل .. شاف سلمان قاعد فالصاله فوق يقرى كتاب ..
يوسف: السلام عليكم خالي ..
سلمان رفع راسه: عليكم السلام .. شاف ساعته .. اليوم جاي بدري ؟
يوسف: اي .. بطلع شوي مع بوسعود ..
سلمان: اها ..
يوسف: خالي .. ممكن تنزل الميلس هو ينتظرني تحت ..
سلمان: ولا يهمك .. روح واحنا نقوم بالواجب .. افا عليك ..
يوسف: جزاك الله خير ..
نزل سلمان ومر على المطبخ وطلب من الخدامه تسوي عصير برتقال فرش بارد وتوديه الميلس .. دخل الميلس ولقى عبدالعزيز قاعد ويتعبث بجواله ..
سلمان: السلام عليكم ..
عبدالعزيز وقف: وعليكم السلام . .هلا والله ..
سلمان: شحالك ؟
عبدالعزيز: طيب الله يسلمك .. انت شو علومك ؟
سلمان: الحمدلله .. تفضل حياك ..
عبدالعزيز: دام فضلك ..
سلمان: اخبارك مع الجامعه ؟
عبدالعزيز: والله الحمدلله انطقطق ..
سلمان: ههههه .. شد حيلك .. ما بتنفعك الا شهادتك ..
دخلت الخدامه وحطت العصير على الطاوله .. وطلعت .. قرب سلمان العصير لعبدالعزيز ..
سلمان: تفضل يبه ..
عبدالعزيز مد يده: تسلم .. شرب عبدالعزيز العصير لانه كان ميت من العطش .. الحمدلله .. جزاكم الله خير ..
سلمان: اجيب لك زياده ؟
عبدالعزيز: لا يكفي .. ترتوي بالجنه ..
سلمان ابتسم: آمين .. وياك الغالي ..
تم سلمان شوي مع عبدالعزيز ودخل عليهم يوسف ..
يوسف: هلا وغلا ..
التفت عليه سلمان مبتسم: هلا يوسف يبه .. مو متغدي معانا ؟
يوسف: لا ..
عبدالعزيز: اليوم غداه علينا .. حياك سلمان معانا ؟
سلمان: تسلم لي .. غير هالمره .. ماقدر اخلي البنات بروحهم فالبيت ..
عبدالعزيز: بارك الله فيك ..
يوسف: يلا مشينا بوسعود ..
عبدالعزيز: ان شاء الله ..
سلمان: الله وياكم .. وسلم لي على بوفارس ..
عبدالعزيز: يبلغ ان شاءالله ..
طلعوا وهم يسولفون عن الغدا ..
يوسف: ها بوسعود شبتغدينا اليوم ؟
عبدالعزيز: خير الشيخ .. تكلمني ؟
يوسف: لا والله ..
عبدالعزيز: تعرفني .. اعرفك .. في اي علاقه بينا ..
يوسف: نعم نعم الشيخ .. ليش كل هاي ..
عبدالعزيز: حبيبي .. بقولك كلمه وحده تقولها توأمي (( it’s pay back time ..
يوسف " فديت توأمك انا": صج عاد .. يعني بتعذبني ؟
عبدالعزيز: للحين الموضوع جاري التفكير ..
يوسف: طلقني .. طلقني اقولك .. ماحبك .. ماطيق العيشه معاك ..
عبدالعزيز ميت من الضحك: ههههههههه .. يوسف الله يغربلك ..
يوسف: رجعني بيت هلي .. ماحبك خلاص ..
عبدالعزيز: لا يا حياتي لا تفهميني غلط .. انا احبج بس قلت هالكلام في لحظة غضب .. سامحيني ..
يوسف: لا تترجاني .. ماحبك يا ظالم ..
عبدالعزيز ماسك كتف يوسف: يا حياتي سامحيني .. ماقدر اعيش بدونج ..
يوسف: وخر عني .. انا اكرهك .. لو ما رجعتني بيت اهلى بانتحر ..
عبدالعزيز: لا ارجوج ما طيق الحياه بدونج .. لو انتحرتي بانتحر وراج على طول ..
يوسف: يا ظالم .. لو تحبني انتحر انت اول ..
عبدالعزيز: وخر مناك ..
يوسف وعبدالعزيز: ههااااااااااي .. ماتوا من الضحك على العبط ..
عبدالعزيز: بوخليفه .. شو بعد طلقني ..
يوسف: متأثر بالمسلسل اللي شفته امس .. البنت ما تبيه وتبي الطلاق ومعذبه عمرها وهي تتكلم ..
عبدالعزيز: بس ضبطت الدور ..
يوسف: ههااااااااي .. وانت شي كملت معاي ..
عبدالعزيز: احم احم ..
................
يوسف: آآه .. اما احنا .. كلش مو شي ..
عبدالعزيز: من قلب مو شي ..
وصلوا البيت ونزلوا ..
عبدالعزيز: بوخليفه شو رايك تجي معاي الغرفه .. بدل ما تقعد فالميلس ..
يوسف: لا اخاف اهلك يتضايقون ..
عبدالعزيز: لا عادي .. محد موجود الحين .. بدري على رجعتهم ..
يوسف: خلاص اللي تشوفه ..
راحوا فوق غرفة عبدالعزيز ..
يوسف: حلاه على الغرفه يا بوالزوز ..
عبدالعزيز: احم احم .. عيل شلون ..
يوسف: ماشاءالله غرفتك حلوه ومرتبه ..
عبدالعزيز: زين انا بادخل اصلي خذ راحتك الغالي ..
يوسف: اوكي حبيبي ..
راح عبدالعزيز يبدل ويصلي .. يوسف تم يدور في غرفة عبدالعزيز وهو يشوف اغراضه والصور .. شاف صوره حق عبدالعزيز و توأمه فاطمه .. كانوا صغار تقريبا 8 سنين .. كانت فاطمه حاضنه عبدالعزيز وشعرها الاسود اللي بعض خصلاته كستنائيه متطايره فالهوا .. وابتسامتها العذبه ذبحت يوسف وهو سرحان بجمالها .. كانت مبتسمه و عبدالعزيز مبتسم نفس ابتسامتها بالضبط .. تم يوسف يشوف الصوره وهو مبتسم .. سمع حس عبدالعزيز وراح قعد على السرير ..
تم يوسف يشوف الصوره وهو مبتسم .. سمع حس عبدالعزيز وراح قعد على السرير ..
عبدالعزيز: شو تشرب بوخليفه ؟
يوسف: اي شي عادي ..
عبدالعزيز: ولا يهمك .. طلع من الغرفه تم فتره وبعدين رجع .. جايب معاه دلة القهوه والشاي ..
يوسف: حلاه عليك بوسعود ..
عبدالعزيز مبتسم: احم احم .. عيل شلون ..
يوسف: لا كبرت يا ولد ..
عبدالعزيز رفع حاجب: صج عاد ..
يوسف يضحك: ههههه ..
عبدالعزيز: زين افصخ غترتك وخذ راحتك محد هني ..
يوسف يفصخ الغتره: ان شاءالله ..تموا يسولفون شوي .. بعدين راح عبدالعزيز عشان يشيك على الغدا في الميلس .. نادا على يوسف ونزلوا يتغدون فالميلس .. وهم يتغدون ..
يوسف: وين فارس اخوك ؟
عبدالعزيز: فارس فالشركه ..
يوسف: متى يرجع ؟
عبدالعزيز: احنا ما نتغدى هالحزه .. بس انا اليوم قلت لهم يخلصون من وقت عشانك ..
يوسف: اها .. نفض يده على السفره وقام يغسل يده ..
عبدالعزيز: اقعد يا ريال ما كلت شي ..
يوسف: ما قصرتوا .. الحمدلله شبعت ..
عبدالعزيز نفض يده وقام معاه عند المغاسل: بالعافيه يا بوخليفه واسمح لنا على القصور ..
يوسف: رايتكم بيضه ..
غسلوا يدهم ورجعوا الميلس يسولفون ويضحكون .. كانت الساعه 2 ونص .. دخل عليهم بوفارس وهو مبتسم
بوفارس: السلام عليكم ..
قام يوسف وسلم عليه: وعليكم السلام .. شحالك بوفارس ؟
بوفارس: هلا والله .. طيب الله يسلمك ..
عبدالعزيز يبوس راس ابوه: شحالك يبه ؟
بوفارس: هلا والله عزيز .. شحالكم يا شباب ؟
يوسف: الحمدلله ..
بوفارس: اخباركم مع اشغالكم .. كل شي تمام ؟
يوسف: الحمدلله تمام ..
يوفارس: شو اخبار خالك سلمان ؟
يوسف: طيب والله .. ويسلم عليك ..
بوفارس: الله يسلمه .. ها تغديتوا ؟
عبدالعزيز: الحمدلله ..
بوفارس: عسى ياز لك غدانا يا يوسف ؟
يوسف مبتسم: والله ما قصرتوا والله ..
بوفارس: بالعافيه يبه .. قام من مكانه .. يلا عيل اخليكم تاخذون راحتكم يبه ..
عبدالعزيز: فارس وينه يبه ؟
بوفارس وهو طالع: فوق .. تبي اناديه لك ؟
عبدالعزيز: لا مو مشكله ..
طلع بوفارس ويوسف عبدالعزيز تموا شوي فالميلس .. بعدين راحوا فوق غرفة عبدالعزيز عشان يقيلون هناك ..
تجمعوا عيال بوفارس على الغدا .. الا مريم وفاطمه لانهم فالجامعه اما عبدالعزيز كان فالغرفه مع يوسف ..
بوفارس: ايمان ..
ايمان: نعم بابا ..
بوفارس: شو اخبارج مع المدرسه ؟
ايمان نزلت راسها: احم .. الحمدلله ..
بوفارس: شو فيج تبلعمتي يوم طريت المدرسه ؟
ايمان: مافيني شي .. عادي ..
بوفارس: مسويه شي اليوم ؟
ايمان: لا ولا شي .. اليوم مر مثل كل يوم ..
بوفارس يطالعها بشك: اها .. تغدي زين .. التفت على الجسمي .. اخبار درجات المواد اللي قدمتها يا بطل ؟
جاسم مبتسم: في العلوم والرياضيات جبت العلامه الكامله .. اما فالانجليزي ناقصتني درجه ..
بوفارس: افا ..
ام فارس: معليه يبه .. عوضها في ماده ثانيه ..
جاسم: ابي اطلع الاول ..
بوفارس: ان شاء الله عوضها في باقي المواد وشد حيلك .. وباذن الله بتطلع الاول ..
فارس: يه .. الجسمي .. بعد تبي تطلع الاول .. سلامي عليك ..
جاسم: لازم .. بس غيري وطالع ايمان ..
فارس التف على ايمان: يه ايمانو .. من متى تطلعين الاولى .. اللي اعرفه عنج انج غبيه .. من وين جبتي الشطاره ؟
ايمان: بابا .. شوف فارس ..
بوفارس: ايمان بنتي فديتها اعرفها شاطره ..
فارس: لا اكيد تغش ..
ايمان: انا مو غشاشه .. هاي انت اللي تغش يالكسلان ..
فارس يضحك: ههههههه ..
ام فارس طالعت فارس بنظره .. فارس نزل راسه وقام عن الغدا ..
بوفارس: وين يبه .. ما كملت غداك ..
فارس يطالع امه: شبعت الحمدلله ..
بوفارس التفت على ام فارس اللي كانت منزله راسها اطالع السفره .. هز راسه وكمل غداه بهدوء ..
فارس راح الغرفه على طول .. سكر باب الغرفه وانسدح على السرير .. مسك جواله وتم يقرى مسجات مناف وهو مبتسم ..
فارس " فديت قلبج يا مناف " .. غمض عيونه وهو مبتسم ..
" يشهد الله الوفا فيك هو سر الهوى .. ولا يا مكثر قلوب محبتها سراب .. دايم المشتاق لوكان يشرب مارتوى .. اسأل اللي جرب الحب .. يعطيك الجواب "
ابراهيم: ها مستعده يا عروسه ؟
الجوهره بدلع: لا ابراهيم .. خلها بعد الخطوبه احلى ..
ابراهيم: لا انتي .. جوهرتي حبيبتي .. خليني امرج شوي اليوم ..
الجوهره: لا ابراهيمو .. انا مب مستعده ..
ابراهيم: يه .. شنو ابراهيمو .. اوريج انا ..
الجوهره تضحك عليه: ههههههه
ابراهيم: حياتي .. مو مطول بس ساعه ..
الجوهره: لا .. بعد حفلة الخطوبه .. ما بقى عليها شي .. وبعدين انا مشغوله .. قاعده اجهز ماعندي وقت
ابراهيم: عن العياره يا جوهرتي ..
الجوهره: حياتي .. اوعدك بعد الخطوبه بتشوفي الوقت اللي تبيه ..
ابراهيم بيأس: زين .. زين ..
الجوهره: حبيبي انته ..
ابراهيم: اوريج يالدبه ..
الجوهره تدلع: انا دبه .. الله يسامحك ..
ابراهيم: زين اوريج يالضعيفه ..
الجوهره: ماحبك ..
ابراهيم: واي .. اموت انا فالدلع ..
الجوهره: بعد ماحبك ..
ابراهيم: بس انا اموت فيج ..
الجوهره: مابي ..
ابراهيم: كله ولا زعل الغاليه ..
الجوهره: ماحبك ..
ابراهيم: خلاص عاد هالكثر ما تحبيني ..
الجوهره: الا اموت فيك وماقدر استغنى عنك يا قلبي ..
ابراهيم: وانا غرقان بحبج يا جوهرتي الثمينه الغاليه .. انتي في قلبي ..
الجوهره مبتسمه: الله يحفظك لي يا ابراهيم .. الله لا يغير علينا ..
ابراهيم: زين حبيبتي .. نبي نروح نختار اثاث .. متى تجين معاي ..؟
الجوهره: هممممم .. قلت لك بعد الخطوبه حياتي ..
ابراهيم: اي اعرف حياتي .. بس اقصد متى بعد الخطوبه بالضبط .. انتي قلتي ما راح تسوين عرس .. بتسوين حفله صغيره بس ..
الجوهره: اي ..
ابراهيم: معناته هالحفله بتاخذ وقتج كله .. وماراح يكون في وقت نروح نجهز البيت ..
الجوهره: صح كلامك .. زين حبيبي خلاص بعد الخطوبه على طول نروح نختار .. يعني نخصص يومين فالاسبوع نروح نشوف الاثاث ..
ابراهيم: حلو .. خليه يكون الصبح عن زحمة العصر .. شقلتي ؟
الجوهره: حلو .. انا بكون ماخذه اجازه .. في وقت يعني ..
ابراهيم: ترا ما راح ياخذ من وقتج وايد .. لان كل شي تقريبا جاهز .. بس باقي لمساتج فالبيت حياتي ..
الجوهره منحرجه: حياتي والله ابراهيم ..
ابراهيم: فديتج يا جوهرتي .. زين للحين مصره تشوفيني بعد الخطوبه ...
الجوهره: بروهوووم بذبحك ..
ابراهيم: هههههه .. زين خلاص .. بس العوزج ..
الجوهره: يالدب ..
ابراهيم: راضي وعسل على قلبي يا قلبي .. قولي اللي تقولينه ..
الجوهره: تعال بقولك ؟
ابراهيم: اجيكم الحين ..
الجوهره معصبه: يا ابراهيم بتتصفق .. خلني اتكلم ..
ابراهيم ميت من الضحك: ههههههه .. زين تكلمي ..
الجوهره: شسالفتك انت و خالي ويوسف اخوي ؟
ابراهيم: اي سالفه ؟
الجوهره: شوف لا تخش علي من الحين .. قولي وش اللي وراكم ؟
ابراهيم: هههههه .. ما في شي فديتج .. بس الشباب بيخيمون في البر الاسبوع الجاي ..
الجوهره: ابراهيم .. هالكلام ما يمشي علي .. قول الصج احسن لك ..
ابراهيم: ههههههه .. هاي الصج ..
الجوهره: هالضحك وراه شي .. تكلم ..
ابراهيم: امري لله .. خالج يبي يروح البر عنده اغراض يبي يتخلص منها .. يقول يبي يحرقها .. عاد انا قلت له شرايك نروح مكان محد يروح له وايد .. يقولون مسكون ويخوف .. بنحفر حفره كبيره .. وبنحط اغراض خالج وبنحط ديناميت وبنفجره .. عشان ما يتم شي ..
الجوهره بصدمه: وشو هالاغراض اللي خالي يبي يتخلص منها بهالطريقه ؟
ابراهيم: علمي علمج .. هو اقترح علي .. وانا وافقت ومعانا شباب وايد بعد ..
الجوهره: غريبه .. ما جاب طاري اغراض ولا شي .. انا بالصدفه داخله الصاله واسمعه يقول ليوسف جهز العده بنروح وابراهيم بيجي معانا .. ولما سألتهم عن ايش يتكلمون .. غيروا الموضوع على طول ولا ردوا علي ..
ابراهيم: ان بطلتي حلجج بكلمه يا جوجو .. يا ويلج .. لا تقطعين ويهي جدام خالج واخوج زين ..
الجوهره: ولا يهمك حبيبي ..
ابراهيم: بنروح مجموعه كبيره .. يعني احسبي انا واخوج وخالج وربع اخوج وخالج وايد ترا .. وبعدين خالج بيجيب كيمرا معاه عشان يصور مادري ليش ؟
الجوهره: غريب خالي .. وايد غامض هالانسان ..
ابراهيم: الله يعينه .. بصراحه لو انا مريت باللي مره فيه سلمان .. كنت بسوي مثله .. بتخلص من كل ذكرياتي ..
الجوره بحزن: ايه على خالي فديته والله ..
ابراهيم بعبط: وانا مب فديتني ..؟
الجوهره: هههههه .. انت فديتك من قبل ..
ابراهيم: هههههه .. حياتي والله ..
الجوهره: زين حياتي .. لازم اخليك الحين .. بروح اشوف هلي ..
ابراهيم: بارك الله فيج حبيبتي .. كلميني قبل ما تنامين ..
الجوهره: من عيوني ..
ابراهيم: فديت عيونها انا ..
الجوهره: مع السلامه يا قلبي ..
ابراهيم: الله وياج ..
الجوهره" شسالفة خالي ؟ .. يعني بيحرق اغراضه مو غلط .. بس يحفر حفره ويحط ديناميت عشان يتخلص منها بهالطريقه الغريبه .. والله انك غريب يا خالي !"
خالد كان قاعد مع علي وابوه في المكتب ..
بومحمد: ها خالد يبه .. مستعد ؟
خالد باحراج: حق شو ؟
علي يطالع ابوه: بعد حق شو ؟
خالد ضربه في خاصرته: شو تقصد يبه ؟
علي وبومحمد ضحكوا: ههههههه
بومحمد: عشان نروح المحكمه ..
خالد: اي .. الحمدلله مستعد ..
رن جوال بومحمد ورد .. خالد التفت على علي بعصبيه ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك