رواية نهاية حبك اعدامي -105
فارس: واااي .. حلجي اللي تعيبين عليه في ناس بيموتون ويذوقونه ..
الجده: ويه .. من يبي يذوق حلجك ..
ام فارس و ام محمد كانوا يطالعون فارس باستغراب ..
الجده دزت فارس: روح تغدا يا علك العافيه ..
فارس وهو طالع: زين زين ..
فارس راح الميلس .. دخل سلم عليهم وهو مفرفش ..
بوفارس: تعال تغدا يبه ..
فارس: لحظه شوي الغالي .. كان يقرى مسج من مناف ..
محمد: فارس يتغلى يا عمي ..
بوفارس: ما يركب عليه كلش ..
محمد: كلش كلش ..
الكل: ههههههه
فارس: اونكم قطعتوني .؟
محمد: لا طال عمرك .. تعال تغدا بس ..
فارس: ان شاءالله .. التفت على يوسف .. شحاله النسيب ؟
يوسف ابتسم: طيب الله يسلمك ..
فارس التفت على خالد: وشحاله النسيب الثاني ..
خالد رفع حاجب: طيب طاب حالك ..
فارس: والله بالعب بكم يا انسباي الثنين .. صبروا علي بس ..
خالد و يوسف طالعوا بعض وابتسموا .. تغدوا الشباب و اول من خلص فيهم الجد
عبدالعزيز: شبعت يالكشخه ؟
الجد: الحمدلله ..
عبدالعزيز: ما كلت شي .
الجد: على بالكم انا مثلكم هامور اكل كل شي ..
يوسف و بوفارس غصوا .. تموا يكحون ..
عبدالعزيز: حشى مب عين عليك ..
بومحمد: اذكر ربك يبه ..
الجد مبتسم: لا اله الا الله .. سمالله عليكم ..
بوفارس يضرب صدره: كح كح .. الله يهديك يبه ..
بومحمد: هاتوا الماي ..
قام سلطان وعطى عمه و يوسف الماي .. اما الجد مافتكر فيهم وراح يغسل يده ..
فارس: سمالله عليك يالنسيب .. وبهمس .. مادروا عنك اللي هناك ..
يوسف: احم .. الله يسلمك ..
خلصوا الشباب غداهم و بوفارس طلب من الحريم انهم يجيبون الفواكه والحلويات والقهوه والشاي .. بعد ما تفاولوا الريايل خالد استأذن منهم عشان يروح البيت يريح شوي .. اتصل بمريم وطلعوا مع بعض .. طبعا خالد كان مجهز غرفته هو و مريم قبل العرس بشهر .. راحوا البيت ومريم عجبتها الغرفه و ذوق ولمسات خالد فيها الحبايب قيلوا الظهر من بعد التعب .. في بيت بوفارس الشباب قيلوا في الميلس والحريم قعدوا فالصاله .. اما البنات تجمعوا في غرفة ايمان تموا يسولفون ويحشون في خلق الله .. الريم و ايمان ناموا بعد السوالف .. اما فاطمه فكانت تمسج يوسف ..
......................
خالد ومريم طاروا على فرنسا يقضون شهر العسل .. محمد وساره سافروا المانيا .. عيلة بوفارس وبومحمد جهزوا عشان يسافرون لندن .. البنات كانوا مجهزين شنطهم وعدتهم كامله .. فاطمه اتصلت بمناف عشان تسلم عليها قبل ما يسافرون ..
فاطمه: السلام عليكم ..
مناف: عليكم السلام والرحمه .. هلا وغلا ..
فاطمه مبتسمه: شحالج مناف ؟
مناف: الحمدلله بخير .. اعلومكم انتوا ؟
فاطمه: الحمدلله طيبين .. بس زعلانين منج ..
مناف: ليش ؟
فاطمه: ما حضرتي عرس مريم ..
مناف: والله ظروفي صعبه يا فاطمه .. ماعندي حد يجيبني ..
فاطمه بحنان: فديتج يا مناف .. زين كنا بنطرش لج السايق مافيها شي ..
مناف: ما تقصرون فديتكم .. انا كلمت مريم وباركت لها ..
فاطمه: قالت لي .. فيج الخير يا مناف .. بس كانت بتكتمل فرحتنا بوجودج ..
مناف: انتوا ما قصرتوا اكيد .. يعطيكم العافيه ..
فاطمه: الله يعافيج .. والفال لج يا مناف ..
مناف منحرجه" آمين": الله يسلمج حبيبتي ..
فاطمه: زين مناف شو رايج امرج ونجي بيتنا ؟
مناف: صعبه حبيبتي .. وبيتنا بعيد .. منطقتنا شبة مهجوره ..
فاطمه: انتي تصعبينها .. بجيج مع ابوي ..
مناف: انا مابي اصعبها .. بس امي ما بتوافق اني اركب مع ابوج .. وبيتنا بعيد وماعندي حد يجيبني ..
فاطمه: زين بجيج مع الدريول .. وبخلي ابوي ولا اخوي يمشون وراي بالسياره ..
مناف: زين شوفي مو الحين .. بعد ما ترجعون من السفر احسن ..
فاطمه: وعد ..
مناف: وعد ..
فاطمه: فديتج يا مناف .. زين حبيبتي تامريني على شي من لندن ؟
مناف: تروحين وترجعين بالسلامه ..
فاطمه: الله يسلمج حياتي .. زين ما طول عليج .. بكلمج وقت ثاني ..
مناف: زين حبيبتي ..
فاطمه: مع السلامه ..
مناف: مع السلامه ..
سكرت فاطمه من مناف وهي تفكر في فارس .. اما مناف سكرت من فاطمه واتصلت بفارس على طول .. فارس كان مع محمد فالقهوه ..
فارس: هلا وغلا ..
مناف: هلا حبيبي .. شخبارك ؟
فارس: تمام .. انتي شو اخبارج ؟
مناف: الحمدلله ..
فارس بهمس: وحشتيني ..
مناف مبتسمه: وانت اكثر حبيبي ..
فارس: خاطري اشوفج حياتي ..
مناف تغير الموضوع: ما كلمك فيصل اخوي ؟
فارس: فديت اللي تغير الموضوع .. لا ما كلمني ..
مناف انحرجت ..
فارس: باكلمه انا .. ابي امر عليهم .. فيصل يبي يغير تلفونه ..
مناف: وليش يغير تلفونه .. اللي عنده توك جايبه لك ما صار له كم شهر ..
فارس: في خاطره التلفون الجديد اللي فيه كيمرتين ..
مناف: ماله داعي يا فارس ..
فارس: قولي فارس مره ثانيه ..
فارس: اموت فالدلع والله .. يا بنت طيرتي عقلي ..
مناف بهمس: فديت روحك والله ..
فارس: خاطري اشوفج حياتي ..
مناف" صادني بزاويه الحين": مممممم ..
فارس: اول مره ضيعتي السالفه والحين تقولين مممممم .. وبعدين شو بتقولين ؟
مناف: هههههه ..
فارس: فديت هالضحكه والله .. زين حبيبتي بس ابي اشوفج شوي ..
مناف: زين حبيبي ولا يهمك ..
فارس مبتسم: فديت قلبج والله ..
مناف: زين متى بتمر ؟
فارس: امرج بعد شوي ؟
مناف: لا حبيبي تو الناس .. تعال الساعه 11 ..
فارس طالع ساعته: الساعه 11 .. زين باقي ساعتين
مناف: خلاص بخليك الحين و كلمني قبل ما توصل ..
فارس: حلو .. زين تبين اجيب لج شي معاي ؟
مناف: لا حبيبي ..
فارس: زين عيل مع السلامه حياتي ..
مناف: الله يحفظك ..
سكر من مناف والتفت على محمد اللي كان يطالع فارس من اول ما تكلم لين ما سكر ..
فارس رفع حاجب: شفيك ؟
محمد: ماله داعي كل يوم والثاني تروح تكحل عيونك بشوفتها ..
فارس باستغراب: ليش ؟
محمد: بس ماله داعي ..
فارس: شايفني كل يوم صاف عند بيتهم
محمد: فروس .. انت تعلق البنت فيك زود ..
فارس: ما علقها .. انا وهي متعلقين ببعض
محمد: انت تضمن انك بتتزوجها ..
فارس: حمود شو هالكلام .. لاتحطمني .. شصاير ؟
محمد: ما صاير شي ..
فارس: عيل ليش تقول هالكلام ..
محمد: والله خايف عليك يا فروس .. وخايف عليها اكثر من خوفي عليك ..
فارس تنهد: آآآه .. ارجوك حمود مابي اتكلم فالموضوع ..
محمد: على راحتك .. بس خف عليها ..
فارس: يصير خير ..
...............
تجمعوا الشباب كلهم فالقهوه .. سوالف و شيشه ولعب ورق .. تموا فالقهوه لين الساعه 10 ونص .. استأذن فارس وراح حق مناف .. اتصل لها تلفون ..
فارس: شو تسوين حياتي ؟
مناف: انتظرك .. انت وين الحين ؟
فارس: توني طالع من القهوه ..
مناف: شكثر يبيلك لين توصل ؟
فارس: تقريبا 10 دقايق ..
مناف: زين لما توصل اتصل بروح شوي وبرجع ..
فارس: زين حبيبتي ..
سكر فارس من مناف وهو يفكر في كلام محمد ..
فارس " مناف حبيبتي انا وبس .. ما صدقت هالموضوع عدى على خير .. الله يستر من الجاي " .. قرب من بيت مناف واتصل لها تلفون .. ماردت اول مره .. اتصل لها مره ثانيه وبعد ما ردت .. فارس خاف عليها .. لما حاول يتصل لها المره الثالثه هي سبقته واتصلت له ..
فارس بخوف: حبيبتي ووينج ؟
مناف باستغراب: موجوده فديتك .. شفيك خايف ؟
فارس: خفت عليج يا قلبي .. اتصل وماتردين ..
مناف بوناسه: فديت قلبك حبيبي .. " فديت عمره هالكثر يخاف علي .. والله اعشقه واموت فيه "..
فارس: زين انا عند باب بيتكم يلا طلعي ..
مناف: ان شاءالله ..
سكرت من فارس وهي مستانسه .. خذت الورده معاها وراحت عند الباب .. اول ما فتحت الباب شافت فارس قاعد فالسياره وعيونه على الباب .. و فارس اول ما شافها ابتسم ونزل من السياره على طول .. تقدم بخطوات سريعه ناحيتها .. و عيونهم بعيون بعض .. قرب فارس من الباب ومناف كانت ماسكه الورده وحاطه يدها ورا ظهرها ..
فارس: فديت هالشوف ..
مناف نزلت راسها بخجل ..
فارس: شحالج حياتي ؟
مناف: الحمدلله .. انت شخبارك ؟
فارس: مثل كل مره ..
مناف: ههههه .. شلون ؟
فارس: من اسمع صوتج ولا اشوفج اصير اسعد انسان بهالكون كله ..
مناف" فديت قلبه والله "
فارس: شو فيج حياتي .؟
مناف: ولا شي ..
فارس: اخبارج مع الاجازه ؟
مناف: ملل ..
فارس: فديت المتملله .. تبين اجيب لج كتب تقرينها و تتسلين فيها؟
مناف: مممممم .. عاد وش الكتب اللي تقراها ؟
فارس: انا ماحب اقرى وايد .. انتي قولي شو الكتب اللي تحبين تقرينها وانا بجيبها لج حبيبتي ..
مناف: مافي فبالي شي معيت الحين ؟ بعدين بقولك ..
فارس: على راحتج يا قمر ..
مناف: زين لازم اروح حبيبي..
فارس مبتسم: فديت قلبج والله .. بتوحشيني ..
مناف مبتسمه: وانت اكثر حياتي .. زين عطني يدك ..
فارس مستغرب: يدي ؟
مناف: اي ..
ابتسم فارس ومد يده لمناف .. مناف مسكت يد فارس بيدها اليسار وحطت الورده بيدها اليمين .. فارس شاف الورده وخنقته العبره .. الورده كانت عباره عن ورقه مقطوعه على شكل ورده ومعطره .. ريحتها كانت حلوه .. بس فارس كان يشوف التواضع بعيون مناف .. قرب الورده من خشمه واستنشقها ..
فارس مبتسم: احلى ورده من احلى مناف فالدنيا .. تم ماسك يدها وضاغط عليها .. مناف كانت تشوفه باحراج
مناف: كان ودي لو فبيتنا حديقه عشان اقطف لك منها كل يوم ورده ..
فارس: فديت هالورده وراعية الورده .. بس الورد اللي من الحديقه بيموت .. وهالورده بتم طول العمر وما راح تموت .. وريحتها بشمها كل يوم .. هالورده بحتفظ فيها جنب صدري .. وفي يوم بقول لعيالنا قصة هالورده ..
مناف انحرجت من كلام فارس .. اللي كان يتكلم وهو ضاغط على يدها بحنان ..
مناف: حبيبي تأخر الوقت .. ولازم اروح داخل ..
فارس: زين حبيبتي .. باتصل لج اول ما ركب السياره ..
مناف: زين حياتي .. انتظرك ..
فارس: زين دخلي وسكري الباب يا عمري ..
مناف: ان شاءالله حبيبي ..
دخلت مناف وسكرت الباب وراها .. فارس كان واقف ويراقبها .. ركب السياره و العبره خانقته .. شاف الورده وحضنها قريب من صدره .. خذ نفس عميق وحرك طالع من فريجهم .. اتصل بمناف وتم يسولف معها بكل حنان وحب وشوق و وله .. رجع البيت و الورده في يده .. شافته فاطمه وهو داخل .. كان مبين عليه الحزن ..
فاطمه: شفيك فارس ؟
فارس يصطنع الابتسامه: مافيني شي فديتج ..
فاطمه: زين تعال غرفتي خل نسولف شوي ..
فارس: زين بس ببدل ملابسي وبجيج الغرفه ..
فاطمه: ممممم .. شو هالريحه الحلوه ؟
فارس: اي ريحه ؟
فاطمه: ريحة فانيلا ..
فارس: انا ماشم شي ..
مشى عنها بسرعه .. فاطمه شكت في تصرف اخوها .. راحت غرفتها تنتظره .. فارس بدل ملابسه وراح لها الغرفه .. طق الباب ودخل ..
تموا ساكتين فتره .. وفاطمه تشجعت وكلمت فارس ..
فاطمه: فارس ممكن اسألك سؤال ؟
فارس"يا ويلي من فطيم": اي تفضلي ..
فاطمه: انت تحب ؟
فارس بطل عيونه وتم يطالع فاطمه ..
فارس: احم .. شو اللي خلاج تسألين هالسؤال ؟!!
فاطمه: فارس .. كل شي واضح .. وبعدين انا مو صغيره عشان تسكتني بكم كلمه يا فارس ..
فارس: آآه .. لا ما سكتج ولا غيره صج ما فيني شي ..
فاطمه: فارس .. مبين عليك الهيام ..
فارس ابتسم: فديتج يالمحلله النفسيه ..
فاطمه: فارس عاد عن العبط .. انا اتكلم جد
فارس: هههههه .. وانا اتكلم جد ..
فاطمه: زين قولي لو صج تحب وحده .. بساعدك وبقرب بينكم ..
فارس: ما تقصرين اختي الغاليه .. بس ماحب ولا غيره ..
فاطمه: عيل شو اللي قالب كيانك يا فارس .. انت مسوي شي ..
فارس: هههههه .. لا مو مسوي شي ..
فاطمه: عندك مشاكل مع ناس برا البيت ؟
فارس مبتسم: ولا عندي مشاكل مع حد ..
فاطمه " ما ينأخذ منه لا حق ولا باطل" ..
فاطمه: الله يهديك يا فارس ..
فارس: جزاج الله خير الغاليه ..
فاطمه ابتسمت لفارس و مسحت على راسه ..
فارس مبتسم: موعد النوم يالشيخه ..
فاطمه: الساعه كم الحين ؟
فارس: الساعه 12 الا ربع ..
فاطمه: مو عوايدك تنام هالوقت ؟
فارس: انا اقصد موعد نومج ..
فاطمه: بدري انا ما نام هالوقت ..
فارس: ههههههه ..
فاطمه: ليش تضحك ؟
فارس: انا اقصد يعني بخليج عشان تتفرغين حق الحبيب .. من قعدت معاج و التلفون يولع ..
فاطمه انحرجت ونزلت راسها ..
فارس: هههههه .. احلى يالخجل .. زين اخليج مع ريلج يا عسل ..
فاطمه: زين ..
فارس: بل ما صدقت ..
فاطمه: بايخ ..
فاطمه وفارس: هههههه
طلع فارس وهو مبتسم .. راح غرفته و لقى مكالمتين من مناف .. شاف التلفون وتنهد .. اتصل لها وتم يسولف معاها لين وقت متأخر .. طبعا عيلة بوفارس وبومحمد تجهزوا للسفر .. البنات كانوا مستانسين بس مفتقدين مريم .. جاسم وسلطان كانوا طايرين من الوناسه لان احمد بيروح معاهم ..
..............
بوفارس: متى بتسافرون ؟
فارس: بعد ما يرجع حمودي ..
بوفارس: زين حمودي على قولتك .. بيرجع واحنا بنكون في لندن .. وين بيخلي زوجته وعياله ؟
فارس: بيوديها بيت اهلها ..
بوفارس: اي ي ي .. زين عيل عيال عمك بيباتون عندكم ؟ ولا انتوا بتباتون عندهم ؟
فارس: والله مادري عن علوه و فضول ..
بوفارس: تجمعوا في بيت واحد احسن لكم يبه ..
فارس: بشوفهم ..
بوفارس: ما وصيكم على البيت يبه .. مو تهيتون لين اخر الليل وتخلون البيت جي ..
فارس: ان شاءالله الغالي ..
بوفارس: زين قوم خل نروح المطار ندخل الشنط عشان نروح بعدين على راحتنا ..
فارس: ان شاءالله ..
طلع بوفارس و فارس وبومحمد .. راحوا المطار و ختموا الجوازات ودخلوا الشنط .. فارس وصلهم البيت وطلع وهو فالدرب اتصل بمحمد ..
فارس: حياتي حمودي ..
محمد مبتسم: يا قلبي فروسي ..
فارس: شحالك ياعيوني ؟
محمد: من سمعت صوتك ردت فيني الروح يا روح الروح ..
فارس: ماقدر ماقدر على هالكلام .. كل هالكلام من شوقك لي ..
محمد: مشتاق لك شوق الصحاري للامطار ..
فارس: الله واكبر عليك يا حمودي .. و قمت تشعر والله ..
محمد: احم احم .. من شوقي ولهفتي عليك ..
فارس و محمد: هههههههه ..
فارس: ها بشرني عنك ؟
محمد: والله مستانسين هني ..
فارس: شلون الجو عندكم ؟
محمد: لا الجو ما عليه كلام .. بروده خفيفه ..
فارس: حلاتين حلاتين ..
محمد: عيل شلون عيل ..
فارس: زين متى بترجع ؟
محمد: بعد اسبوعين تقريبا ..
فارس: وايد .. حمودي طقت جبدي .. ألوي بروحي ماعرف شو اسوي ..
محمد:ههههه .. فديته اللي مفتقدني ...
فارس: زين بسألك ..
محمد: اسألني يبه ..
فارس: تذكر الشقه اللي اجرتها ؟
محمد: اي اذكرها ..
فارس: هي بس للايجار ولا في منها للبيع ؟
محمد: اعتقد في منها للبيع بس مو نفس البنايه ..
فارس: ما تعرف كم اسعارهم .؟
محمد: لا والله ما عندي فكره .. بس تعال ليش تسأل ؟
فارس: احم .. ابي اشتري وحده ..
محمد مبتسم: ها خلاص قررت تتكلم ..
فارس: مافي اذني ماي بعد .. بس نرجع من المكسيك وبافتح الموضوع ..
محمد: حلاتين على فروسي .. والله صرت ريال وبتعرس ..
فارس: انا ريال غصبن عنك ..
محمد: حليلك كنت أكلك بيدي .. واسبحك والعبك .. والله كبرت ..
فارس: لا والله ..
محمد: هههههههه ..
فارس: زين عطني رقم الريال خل اروح اسأل ..
محمد: ان شاءالله طال عمرك .. بس بقولك ..
فارس: تفضل طال عمرك ..
محمد: ما تأثث الا بوجودي ..
فارس: في احلامك يا رجل ..
محمد: افااا .. لماذا يا رجل ؟
فارس: هي اللي بتأثث الشقه ..
محمد: خف علينا هي بتأثث الشقه .. هي تختار غرفة النوم .. وانا علي الباقي ..
فارس: والله فكره .. زين ما يهمك طال عمرك ..
محمد: زين انا بطرش لك الرقم بالمسج .. كلم واحد اسمه سعيد .. قوله انا من طرف محمد لو حسيته ما نزل لك بالسعر كلمني زين ..
فارس: مشكور وماتقصر يا رجل .. صج انك طلعت مفيد ..
محمد: لااااا .. ترا للحين ما طرشت لك الرقم .. يعني عادي اسفهك ترا ..
فارس: ههههه .. لا تكفى باذل نفسي عشان الرقم .. يعني ماعرف اروح المكتب عندهم .. والله انك مسكين ..
محمد: معليه يا فروس .. بس ارجع وبذلك صح ..
فارس: همممممم .. زين انتظر المذله يالمذله ..
محمد وفارس: هههههههه ..
محمد: سافروا الاهل ؟
فارس: توني راجع من المطار ختمنا الجوازات ودخلنا الشنط .. بعدين هم بيروحون على راحتهم ..
محمد: اها ..
فارس: زين عيل ما عطلك .. لا تنسى الرقم ..
محمد: ان شاءالله الحين بطرشه لك .. سلم على الاهل قبل ما يروحون .. و قول حق الريم تبوس امي على راسها خل تقولها هاذي من محمد الغالي ..
فارس"افين عاد ما قلت الا الريم" ..
فارس: زين بوصي خواتي يقولون لها ..
محمد: تسلم حبيب قلبي ..
فارس: الله يسلمك وحاضرين لك الغالي ..
محمد: مع السلامه فديتك ..
فارس: سلام حبيبي ..
سكر محمد من فارس والتفت وراه وشاف ساره واقفه وشايله نايف .. محمد طالعها بنظره ودخل الغرفه يبدل ملابسه عشان يطلعون .. ساره انقهرت من حركته .. راحت الصاله وتمت اطالع التلفزيون .. طبعا ساره ومحمد متهاوشين .. ومحمد ما يكلم ساره .. تمت ساره تقلب قنوات التلفزيون بقهر .. ماقدرت تقعد مكانها .. راحت الغرفه عند محمد .. دخلت بهدوء و محمد حس بوجودها .. وقفت عند الباب متخصره ..
ساره: يعني لي متى بتم جي؟
محمد التفت عليها .. طالعها بكل برود وصد عنها ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك