رواية اطلالي ملت وقوفي -10
"ضرب الباب ضربـــه قويـــه لدرجه إن ميريام فزعت من السرير بسرعه وفتحت الباب وهي خايفــه"....
ميريام: بسم الله الرحمن الرحيم..شوي شوي عالباب خرعتني..
"يوسف وهو رافع حاجب": خير عسى ماشر_ توك صاحيه من النوم وتتريقين..؟ وبعدين ماصارت كل هذا نوم الساعه صارت 8 بالليل..
"ميريام وهي تسند راسها على الباب بتعب": مانمت إلا ساعتين.. من الـ5 لــ7 بس..
"يوسف بإهتمام": لـيــه؟ غريبه مهي عوايدك تنامين ساعات قليله.. فيك شي؟!
"ميريام بيأس": متضايقــــه..
"سكتت وهي تعطي يوسف ظهرها وتجلس عالسرير..
دخل يوسف و سحب الكرسي وجلس قبالها.."
"يوسف بحنان": وش فيك ياعمي_مين اللي زعلك وكدر خاطرك..
"ميريام وهي تتحلطم": قهرنــي!!! والله قـهـر اللي يصير لنا.. ليــه مستكثرين علينا الراحه النفسيه اللي أحنا بعز حاجتنا لها وبالفتره هذي بالذات فترة الأختبارات.. الظاهر مايرتاحون إلا لما نرسب ونفشل في الدراسه..
"يوسف وهو يضحك": الحين عرفت وش اللي مضايقك.. المعلمات وأسئلتهم الصعبه.. ياحبيبتي هذي مثل مايقولون (سنة الحياه) إحنا المعلمين نسميها(سنة الدراسه) الصعوبه ثم الصعوبه ثم......
"تقاطعه ميريام": عمي إنت وش تتكلم عنه..؟
"يوسف بإستغراب": إنت وش تقصدين؟ مين اللي تقولين قـهــرك؟
"ميريام بنعومه": يـــاســـر..
"وقف يوسف وهو فاتح عيونه للآخر": مـيـن يـــاســـر؟؟؟!
ميريام: أخو صديقتي..
"يوسف بإنفعال": تحكين بالقطاره.. قولي لي مين هذا ياسر وش علاقتك فيه؟
"ميريام وهي تضحك وتحاول تهدي أعصابه": ههههههههههههه عمي أنا بنت أخوك تشك بأخلاقي والله ماهقيتها منك.. طيب أجلس وأنا أفهمك السالفه من...إلى...
"جلس يوسف وهي مكتف أيدينه": Please tell the truth ,,Dont lie to me ,, o.K
,,,"حكت ميريام المشكله ليوسف.. وهو بسرعه هدأ وأندمج مع ميريام وهي تحكي وخنقتها العبره بنهاية كلامها وهي تقول ليوسف": أحس إني السبب في اللي صار لها.. إنت وش رايك.....؟
"أبتسم يوسف وهو يرتخي بجلسته": بالبدايه أحب أهنيك على شعورك الطيب والنبيل تجاه صديقتك وهذا دليل على إن لك (مشاعر وأحاسيس) زي الناس اللي يتضايقون وتحترق أعصابهم ويصيحون.. يعني إنتي مو (ثلجـه) بكل ماتحمله الكلمه من معنى..
"صرخت ميريام وهي تضربه بالدبدوب": الشرهه علي أنا اللي أشكي لك.. ماهقيتك تتريق علي وأنا في عز ضيقي.. يالله قوم عني مابي أسمع رايك..
"يوسف وهو يقاوم الضحكه": لحظه لحظه مريوم والله باتكلم معك بجد خلاص..
ميريام: تفضل..
يوسف: أنا أشوف إن هذي المشكله بين صديقتك وأخوها أنتي مالك علاقه آبدآ ولا تتضايقي ولا تعطي الموضوع أكبر من حجمه لأنه خلاف بسيط ويزول أكيد..
ميريام: بس ياعمي.......
يوسف: بس ياعمي أنتم يالبنات حساساااااات وعلى أي سبب تافه تزعلون وتتضايقون وما تقدرون للشخص ظروفه وتتلمسوا له الأعــذار.. صح وإلا لأ..؟
"ميريام بضيق وهي تناظر بالأرض": صح.. بس ليه هم بعد مايقدرون حساسيتنا عشان نعذرهم....!
يوسف: والله يقدرون بس مايحبون يبينون هالشيء وعمومآ الرجال بطبيعته عقله يغلب على عاطفته ومشاعره..
"ميريام بعصبيه": عقل إيوه بس عاطفه لأ.. أجل أخو يخانق أخته ويضربها ويـن العاطفه بذمتك ويــــن؟!
"يوسف وهو يتنهد ويحط يـده على خده": مريومه ترى الحيـــاة قصيره مهما طالت.. والإنسان العاقل هو اللي مايفرط فيها ولا يرضــى يضيعها ويضيع وقتــه في المشاكل والعداوه مع أهلــه ومع الناس.. يلوم هذا ويزعل على هذاك ..
صحيح أن الظروف هي تجبر الواحد يتصرف تصرفات ماتعجب غيره بس المفروض إن إحنا بعد نتحامل على أنفسنا ونتقبلــه لأن مثل ماهو إنسان له عيوبه إحنا بعد لنا عيوبنا.. وما يصلح نكون أنانـيـيـن لهالدرجـه نبغى غيرنا يتحملنا وبالنهايه إحنا مانتحمل أحد...؟؟
ميريام: هذا رأيك أنت لأنك بطبيعة شخصيتك تنسى بسرعه وما تشيل بقلبك على أحد ولو زعلت وعصبت وهاوشت يظل قلبك أبيض وما تنام إلا والكل راضي عليك.. بس وش الحل مع غيرك؟
يوسف: مثل مين؟
ميريام: مثل الأخ المتسلط على أخته وقلبه قاااااسي مثل الحجر..
يوسف: أنا أخالفك الرأي بعبارتك هذي بس أبسألك..؟ فيه أخــت قلبها حجر مثل الأخ؟
"ميريام بثقه": لأ طبعـــآ.. لأن الأخت قلبها طيب ويسع الكل ومطيعه لأمها وأبوها وووو......
"يقاطعها يوسف": وعلى أي أساس حكمتي على إن كل أخت في هالحياة قلبها طيب..؟
ميريام: لإن الأخت ما تتصرف بطيش مثل الأخ ولا تأذي أحد ودايم حقها مهضوم ولا تتصرف على هواها..
"يوسف وهو يعدل جلسته": ما أقتنعت بكلامك أشرحي لي أكثر..
"توهقت ميريام ونزلت رأسها للأرض وهي تفكر"..
يوسف: أبي أفهمك على حاجه تجهلينها وأستوعبي كلامي..
إن أهم شي بالرجـــل (قلبـــه)..!! إذا كان قلبــه طـيـب خلاص نآخذ الطيبه ونغض الطرف عن كل عيوبــه..!!!!
"ميريام بتردد": وشلون نعرف إذا كان قلبه طيب وإلا لأ...؟
يوسف: إذا غلط بحقك وزعلك وخانقك وسبب لك أذى نفسي وجسدي......
"قاطعته ميريام بإنفعال": لاتقول إن هذا قلبه طيب.. لأ لأ لأ أسمح لي عمي والله ماأسامحـــه..!!
يوسف: لحظـــه ياعمـــي خليني أكمل ولا تقاطعينــي..
"ميريام وهي تتنوفخ بزعل": آسفه عمي كمل كلامك..
"سكت يوسف ثواني وهو يناظرها وينتظرها تهدأ"...
ميريام: كمـــل....
يوسف: لا تقاطعيني..
"ميريام وهي تحط إيدها على فمها": لأ خلاص..
"يوسف بصوت هادئ": إذا زعلك ورجع أعـتـذر وتسامح منك وأهتم برضاك عليه... وإذا حس بالذنب وأعترف بغلطته وأنا أقولك; (أعــتـرف) لإن الرجل عزة نفسه ماتسمح له إنه يعترف بغلطته_ لكن هذا أعترف وبين لك أسباب تصرفه الخطأ معك.. قولي لي ويـــن القلب الحجر الجامد بهذا الإنسان؟؟؟
يوسف: لو كانت العيوب كثيره بشخصيته ولو كانت تصرفاته شينه ولو كانت الناس تذكره بســـوء!! أهم شي قلبــه ،، جوهرهـ ،، معدنـه..
كثير من الشباب قلوبهم كذا_ ألاحظ إنه بنظر الناس طايش ومستهتر لـكــن لما أجلس معه ويتكلم عن نفسه وعن حياته أكتشف إنه ونعم الرجـــال.. تعرفين ليـــه...؟
ميريام: ليـــه؟!
يوسف: لإني أشوف فيه أشياء تعجبني وتعجب غيري مثل الرجوله والشهامه والنخوه والغيره على دينـــه وديرتـــه.. لكن الناس مالها إلا الظاهر وتحكم على الرجل من شكله وهيأته مع إن من جواته هو إنسان طيب بس ما يلقى اللي يقدره ويفهمه..
"ميريام بملل": طيب وش علاقة هذا كله بموضوعنا..
"تفاجأ يوسف": الحين صار لي ساعه أحكي ولا أقتنعتي؟
"ميريام بنفاذ صبر": أقتنع بأيش..؟؟؟
يوسف: ماغلطنا لما سميناك ثلجـــه!!!
ميريام: لحظه عمي فهمني وش علاقة الرجوله والنخوه بمشكلة صديقتي؟
"يوسف وهو يفهمها بصوت عالـــي": يعني أخ غلط بحق أخته خـــلاااااااص يصير بنظر أهله والناس,, فاشل/ عاطل/ مستهتر/ حقير/ مايستاهل الإحترام..؟؟؟ مافيه إنسان معصوم من الخطأ.. هو أخوها ويخاف عليها حتى لو ضرها بشي هذا نابع من حرصه على مصلحتها..
ميريام: وهي أخته وتحترمه لكن ماله حق يتصرف معها على أساس إنه أبوهـــا..
"سكت يوسف وهو يناظر ميريام بحيره لإنه عجز يقنعها"..
ميريام: ok عمي كلامك صح ومقنع بس أنا لي وجهة نظر ثانيه تختلف..
"يوسف وهو يتنهد": تمــام دام كذا أتفقنا.. وش عندك أمتحان بكره؟
"ميريام وهي تحضن المخده": آسفه عمـو إذا ضايقتك وشكــرآ لإنك عطيتني من وقتك؟..
"أبتسم يوسف وهو قايم": العفو.. ماقلتي لي وش أمتحانك بكره..؟
ميريام: English..
يوسف: تبغين مساعده..؟
ميريام: Thanks for your care..
يوسف: عـفـوآ.. أنا أبطلع مع أصدقائي للمقهى إذا تبغين أي مساعده أتصلي علي.. خلاص
ميريام: o.K
|¡|¡|¡|¡|¡|¡|& iexcl;|¡|¡|¡|¡|¡|&ie xcl;|¡|¡|¡|¡|¡|&iexc l;|¡|¡|¡|¡|¡|¡ |¡|¡|
قامت سحايب من نومها وصلت العشاء وطلعت من غرفتها لقت أمها جالسه في الصاله..
حبت على رأس أمها وجلست بجنبها..
"سحايب بضيق": يمه وين هاجــر..؟
أم ياسر: راحت للسوق مع ياسر تبي تشتري ملابس وأغراض لها ولعيالها..
سحايب: وأبوي... وينــه؟
أم ياسر: طلع من بعد صلاة المغرب معزوم على العشاء عند أصدقاه..
سحايب: طيب يمه أنا أبدخل غرفتي أذاكر.. تبين شي؟
أم ياسر: سلامتك يابنتي ذاكري وأجتهدي والله ينجحك ويوفقك أنشاءالله.. "وهي تقوم" أنا بجيب لك الأكل بغرفتك وكلي يابنتي عشان خاطري ترى أمس ماأكلتي شي أبدآ..
سحايب: أستريحي يمه.. أنا بآخذ الأكل بنفسي..
,,,قامت سحايب ودخلت المطبخ وشالت الصينيه اللي على الطاوله وأخذتها لغرفتها وهي متضايقه ومالها نفس تآكل بس عشان ماتزعل أمها..
حطت الصينيه عالأرض وطلعت كتاب الأنجليزي وجلست تذاكر قرابة الــســاعــه... بعدها دخلت هاجر وهي شايله أكياس كثيره وعيالها حولها..
ناظرت فيهم سحايب بمــلل لكنها فجأه صدت ورجعت ناظرت بالأرض لما لمحت ياســر مقبل على غرفتها وبيدخل ومعاه أكياس...
(أخذت هاجر عيالها وطلعت برا بعد ماأشــر لها ياسر وهي فهمت عليه لأن بالسياره حكالها كل شيء)...
نزل ياسر اللي بيـده بجنب سحايب وإنحنى وحب على راسها وباس خدها وهو يعتــــــذر لها..
إنفجرت سحايب بالصياح وهي تشاهق ومغطيه وجهها بيـدينها,,,
"جلس ياسر بجنبها": سحايب أنا آسف وحقك علي.. سامحينـــي غلطت بحقك..
أنا كنت متضايق من مشكله صارت لي بالدوام ورجعت للبيت وأنا تعبان وكاره نفسي وكل شيء حولي..
سكتت عن الإهانات اللي مسؤولين شغلي ماقصروا فيني وعلى سبب عادي ماأستاهل كل هالتجريح منهم.. ومع ذلك أحترمت سمعتي الطيبه قدام زملائي وسكتت سكتت عن حقي!!!! وما حسيت بنفسي إلا وأنا أنفجر فيك واطلع كل القهر اللي فيني عليك...
سحايب: ...........
ياسر: أدري إنك بتلوميني لأن مالك ذنب بس تراي عجزت أتصرف وقتها.. رجـــال وسكيرتي ودوامي على فترتين وراتبي على قدي ومايسد حاجتي بعد ومع ذلك راضي بحالي ومقتنع.. وبالنهايه أنفصل من الشغل بسبـة (نادي النصر)..
"سحايب وهي تناظره من بين الدموع": وش دخل النصر..؟
ياسر: لأني طنشت الدوام في الليل عشان أتابع المباراه خصموا من راتبي ولما أحتجيت وعارضت ودافعت عن نفسي.. فـصـلـونـــي.....!!!
"شهقت سحايب": حرام عليهم ليه يسوون فيك كذا؟
ياسر: أنا أساسآ مرتاح بوظيفتي في المستشفى ومافكرت أتركها مع أن الراتب قليل.. بـــس دامها جات منهم أعتبرها خـيــره يمكن الله يفرجها وأتوظف بوظيفه مناسبه لي أكثر..
"سكتت سحايب وهي تناظر فيه وتمسح دموعها"
"أبتسم ياسر": الحين الوظيفه طــارت و(لعـيـون النـصــر ترخــص مديـنــه).. أهم شي إنتي تسامحيني وتنسين اللي صار أمس..
سحايب: مسامحتك ياخوي ..
"ياسر وهو يفتح الأكياس": شوفي وش أشتريت لك.. عــطـر على ذوقي وشنطـه للمدرسه بس تراها ذوق هاجر عشان إذا ما أعجبتك أنا مالي دخل.. و(دونـــات) من اللي يحبها قلبك..
"سحايب ورجعت تصيح": ياسر ليش تكلف على عمرك أنا مسامحتك بدون ما تشتري لي هالاشياء..
ياسر: ماعليه إنتي تستاهلين أكثر وهذي حلوان آخــر راتب لي في وظيفتي..
"سحايب وهي معصبه": كله من النصــر.. عاد ليتهم فازوا بالمباراه وفرحوا قلبك شوي.. أنت خسرت وظيفتك والنصر خسر في المباراه..
ياسر: بس يظل عالمـــي وفارس نـجــد للأبــد....
********************
يـــوم الأربــعـــاء...
(11/24)
دخلت درر الساحه وهي مبسوطه ومتجهه لزاوية الشله وتترقب ردة فعلهم من الشيء المميز اللي لابسته...
"درر وهي واقفه": وش رأيكم بنـات...؟
ميريام: وااااااو حركات طاقيه ولفه على الرقبه حرف (A)..
ميار: خربتيها يادرر_ من وين لك؟
"درر وهي تجلس": شفتها على أخوي راكان سحبتها وأخذتها منه غصب ..
"سحايب وهي تمزح": لو يدري علاوي إن فيه بنت تحبـه وتمووووت فيه وحياتها كلها (A+D) والله لايبيع الدنيا عشان خاطرها..
"صرخت درر وهي تضرب سحايب": خلاااااص أسكتي لاتحطميني ترا بجد يضيق صدري لما أتذكر إني أحبه وهو مادرى عني..
سحايب: أنا أقولك (لـو) درى والحين بقولك (إذا) مـاتزوج غيرك.. نفس هذا اللي أسمه صقر تتذكرين ؟!
"ميريام تبي تستفز درر": اللي ما أمداها قالت (حبيتـه) إلا وهو خاطب وحده من قرايبه؟ يابنات هو نفسه وإلا أنا غلطانه؟
سحايب: لا ماأنتي غلطانه_ أذكر ظلت أربع شهور تحكي عنه وتتحلم بعدها ماعاد جابت طاريه..
ميريام: بس لما تزوج مر زواجه مرور الكرام ما تأثرت حيل ولا حزنت..
سحايب: أتوقع إذا تزوج علي بيكون حزنها أعمق لأنه طـول ماتزوج من صارت تحبه..
"صرخت درر وهي تكتم ضحكتها": ياخايســــــات تتريقون....؟
"ضحكت ميريام وهي تضرب يدها بيد سحايب"..
ميار: ماعليك منهم حبيبتي طنشيهم وراجعي الحين وبعد الإمتحان تفاهمي معهم...
بعد الأمتحان وطلعوا من القاعات تسابقوا البنات للزوايه ماعدا معيضه تمشي ببطء وماسكه كتابها وتراجع إجاباتها..
"سحايب بصوت عالي": ماحلتـــش تعالي بسرعه والله راح تنجحين..
سميه: سحايب اليوم رايقه مره وش صاير لك؟ بعدين تعالي قولي لي وش صار معك إنتي وياسر أمس؟ سألتك قبل الأمتحان وماجاوبتيني..
"ميريام بتحذير": لاتقولين ماصار شي_ ترى أمس ماذاكرت كل وقتي أفكر فيك..
"إبتسمت سحايب": جاني أمس بالليل وأعتذر مني_ وشرا لي شنطه وعطر ودونات(قالتها وهي تضحك) لأنه كان راجع من السوق مع هاجر وسامحته بـــس..
"تذكرت ميريام كلام عمها يوسف وتفاجأت بتصرف ياسر وبرهن لها إن فعلآ أهم شي بالرجال قلبـــه وأقتنعت برأي يوسف بس تمت ساكته وتفكر"..
سميه: ماعرفتي ليه كان معصب..؟
"سحايب بحزن": قالي إنه تخانق مع مسؤولينه بالدوام وووو........ ترك الوظيفه..!!
سميه: وش السبب؟
سحايب: على سبب تافه مايدخل العقل_يقول ياسر لأنه طنش دوامه الفتره المسائيه يبي يتابع المباراه صاروا يخانقونه ويستفزونه وهو كله -سكيرتي- ماتسوى عليه الأهانات..
سميه: طيب هو متضايق لأنه ترك وظيفته..؟
سحايب: لا بالعكس مرتاااااح فوق ماتتصورون وعنده قناعه إنها خيره..
سميه: فعلآ.. دامها جت منهم خيره.. لكـــن شلون راح يتم جالس بدون وظيفه أكيد هالشي بيأثر بنفسيته..
سحايب: لأ عادي لأن ياسر أكثر شي يميز شخصيته بإنه قـنــوع ويتحمل مسؤولية نفسه وتصرفاته وهو عارف إنه غلطان بس مع ذلك مسلم أمره للـــه ويبي يصبر ويدور له على وظيفه ثانيه..
"سميه بخاطرها": سبحان الله عكس شخصية سعود بالضبط مع إن أعمارهم متقاربه بس فيه فرق كبير بشخصياتهم... الله يهديك ياسعـــود....
"ميار بمياعــه": بنااااات خلونا نغني..
"معيضه بأستياء وهي ماسكه كتابها وتجلس": الظاهر إنكم على برودكـــم وراحـة بالكــم بتحصلون نسب عاليه بالتسعينات وأنا اللي راح أكلها بالسبعينات بعد مو أعلى من كذا...
روايه: والله إنك صادقه_ تدرين مع إني جالسه وأتسمع لسوالفهم إلا أن بالي مشغول بالأمتحانات وشايله هـم.. مدري ليه عكس باردات الأعصاب هذولا..
"ميار وهي تلعب بخصلات شعرها بدلع": إحنا نذاكر ونتعب بالبيت لكن لما نجي للمدرسه نرمي الدراسه ورانا_بس نبي نسولف ونضحك ونرقص..
"درر وهي تغني وتطبل على باب المعمل والبنات يصفقون بحماس كأنهم طقاقات": (كل الإيزي كلهم.. لافرق اللــه شملهـم.. يازين ميـــور بينهــم.. عاشت حرم لزيز عاااااشت)..
"سحايب وهي تلتفت على راويه اللي ساكته وماده البوز": خلاص راويه خليك إيزي وأستانسي معنا.. إنتي بكذا بتخربين شعار الشله.. خلي الدراسه تولي وإنسي..
راويه: شلون أستانس وأنا ماحليت عدل..
سحايب: أوووووه يابيخك ترى أزعل منك اللي يسمعك يقول كلنا حلينا عدل_ ترى إحنا يالشله (ضـايعـات) بالإنجليزي ماعدا ثلجـــه مكتسبه اللغه من عمها..
"درر وميار خربوهـــا وجلسوا يغنون بصوت عالــي (معجبـــه) ويطبلون على باب المعمل وأغلب البنات بالساحه ألتفتوا يناظرونهم"..
درر: ( حد يأولو_ إني بحبوا الحب دا كلو.. حد يحنن ألبو عليا أنا مكسوفـــه أروح لوا وألوا.. معجبــه مغرمــه )..
ميار: ( أيوه خطفني بسحر جمالوا.. شوإي باين لو وعيني أيلالو.. خايفـــه ماكونشي أنا اللي فبالو.. بعد دا كلو....)
"سميه وهي تكتم ضحكتها": فضحتونا أسكتوا خلاص ترى كل البنات بالساحه يناظرون فيكم..
درر: خليهم يشوفونا ويسمعونا أبي كل الناس تدري إني أحب عليـــاء..
"ميريام وهي تضحك": علي صار علياء هههههههههههههههه
درر: خبرك يعني عشان السمعه بالمدرسه..
ميار: آآآآآه متى تخلص الإمتحانات عشان أطير لــ (لزيز)..؟
درر: آآآآآه متى تخلص الأمتحانات عشان أشوف علــي بأي مكان وزمان المهم أشوفـــه..!!
"أخذت سحايب دفتر الصراحه وفتحت على صفحه وكتبت"..
( أكبر جريمـــه ترتكبها في حـــق نفسك,,
حين تحلم بشيء أنت أدرى الناس أنه لـــن يكون لك يومـــآ..
وتستمر في طريقك بإصرار مـمـيـت,,
وأنت أعلـــم الناس أن الطريق لن يوصلك إلا إلى جـــدار تستند عليه وتبـــكــي حلمـك عجـــزآ..)...
"قرأت سميه اللي كتبته سحايب وهي مبتسمه... وكتبت"..
(إحســـاس مـــر..
أن تحمل في داخلك إحساس غير مكتمل النمو <واقعيــآ>..
وتصر على الإحتفاظ به وبرغم قناعتك أنه ولـــو ولـــد يومـــآ...
<<فسوف يــولــد ميتـــآ>>..
"أخذت ميريام الدفتر من سميه وقرأت الكلام مع درر وميار"...
درر: الله يستر من جرائمكم وأحاسيسكم.. ليه كل هالتشاؤم ؟
سميه: بالعكس هذا الواقع؟
ميار: الواقع إننا ندفن مشاعرنا ونحرمها من الأحاسيس الحلوه يـابتاع علم النفس؟..
سميه: أنتم تحبون بخــوف!!
ميريام: ياعيني ياخوف_ أبتدت الفلسفــه..
سميه: إنتي ياميار تحبين يزيـد من سنوات وهو ولا درى عنك,., مع ذلك إنتي مصره تحافظين على هالحب وبنفس الوقت خايفه تقدمين على أي خطوه ممكن تضر بسمعتك وبكرامتك..
ميار: ............
سميه: وإنتي يادرر حبيتي علـي مجرد إنك سمعتي عنه,., وعلى قولتك (الأذن تعشق قبل العين أحيانآ) وتحطمتي فيه زياده لما شفتي صوره له بزواج أخوك.. وصرتي تهذرين فيه صار علـي أهم من كل شيء بالنسبه لك.... وبعدين؟ لا إنتي اللي حكمتي عقلك وتخلصتي من إهتمامك الزايد فيه وهو مادرى عنك!! ولا إنتي اللي حاولتي تحولين حلمك لواقع بأي طريقه..
درر: يعني وش أسوي تبيني أروح لأهلي وأقولهم "زوجوني علي وإلا أنتحر".. إيزي إيزي تطنيش..
سميه: حيرتيني معك حددي بالضبط وش يعني لك علي؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك