رواية نهاية حبك اعدامي -130
عبدالعزيز: اهم شي اللي خايفه نتعبه ونقص عليه في نومته .. والله انك مدلع يا بوخليفه ..
فاطمه: اذا انا مادلعه وادور راحته واحرص عليها .. بكون غبيه ..
عبدالعزيز: ليش يا عسل انتي ؟
فاطمه: حبيبي لازم اسد كل فراغ بحياته عشان ما يدوره عند غيري ..
عبدالعزيز: زمنكم نستفيد ..
فاطمه مبتسمه: احم احم .. قبل ما تتزوج بامسك زوجتك وبعطيها دروس في هالامور ..
عبدالعزيز: فديت اختي والله ..
فاطمه: الله يكتب لك بنت الحلال اللي تسعدك ياخوي ..
عبدالعزيز ابستم: آمين ..
فاطمه كانت فرحانه ان عبدالعزيز اخوها غير رايه بموضوع الزواج .. تمت معاه شوي بغرفة فارس وبعد ما جهزت شنطة اخوها طلعت من غرفته وتركت الشنطه عند عبدالعزيز .. دخلت غرفتها وكانت تعبانه وايد .. لبست بجامة النوم وانسدحت على السرير .. خذت الجوال تشيك عليه ولقت مس كول من مناف .. شافت الاسم وابتسمت
فاطمه " الحين الساعه 12 ونص .. اتصل لها ولا الوقت تأخر ؟ هممممم .. خل اجرب اتصل لها " ..
اتصلت فاطمه بمناف .. مناف اول ما شافت اسم فاطمه فالتلفون استانست .. ردت عليها بفرح .. كانت منسدحه على السرير وتلعب بشعرها ..
مناف: هلا وغلا .. حيالله هالصوت ..
فاطمه مبتسمه: هلا فيج .. الله يحيج ..
مناف: شخبارج فاطمه ؟
فاطمه: الحمدلله طيبه .. انتي شو اخبارج ؟
مناف: الحمدلله .. متولهه عليكم ..
فاطمه: فديت قلبج .. وانتي لج وحشه والله ..
مناف: حياتي انتي ..
فاطمه: خلاص ما بقى شي على الدوام ..
مناف: اي والله .. يعني الدوام متعب بس شوفتكم تنسيني التعب ..
فاطمه " حليلها والله هالكثر تعزنا"
فاطمه: فديت قلبج .. والله شوفتج يالجميله اللي تولهنا عليها ..
مناف مبتسمه: عيونج الحلوه .. وانتي ما عليج زود .. الا لطيفه شخبارها ؟
فاطمه: طيبه الحمدلله ..
مناف: ومريم اختج ؟
فاطمه: مرتاحه الحمدلله .. منوفه حبيبتي ..
مناف: هلا حياتي قولي ..
فاطمه: زين انا حددت يوم عرسي ..
مناف: تستاهلين والله ..
فاطمه: تسلمين لي حبيبتي .. بس طلبتج وقولي تم ؟
مناف: تم حياتي ..
فاطمه: لازم تحضرين عرسي .. ولا بزعل منج ..
مناف انحرجت من طلب فاطمه: من عيوني بحاول قد ما اقدر ..
فاطمه: لازم تجين انتي وامج ..
مناف ابتسمت: من عيوني والله .. ولا يهمج
فاطمه بوناسه: والله بتجين ..
مناف: اي اوعدج بجي ..
فاطمه: بقول لمريم اختي .. اكيد بتفرح ..
مناف: فديتكم والله .. اعدكم خواتي واكثر ..
فاطمه: وانتي عزيزه وغاليه يا مناف ..
مناف: زين قولي لي .. جهزتي للعرس ؟
فاطمه: اي جهزت .. بس باقي الفستان وقريب باستلمه ..
مناف: الف مبروك حبيبتي ..
فاطمه: الفال لج انتي يا جميله ..
مناف: تسلمين لي ..
فاطمه: عاد تعالي على الكوشه عشان يشوفون الناس هالجمال ..
مناف بخجل: ان شاءالله ..
فاطمه: الله يرزقج يا مناف ..
مناف انحرجت: مشكوره حبيبتي .. بسألج فطومه ..
فاطمه: هلا ..
مناف: بتعتذرين هالكورس ؟
فاطمه: لأ .. بس عرسي بيكون نهاية الكورس حرام اعتذر .. بعد امتحانات نهاية الفصل بإسبوع بيكون عرسي ..
مناف: اها .. عدل تفكيرج .. خلصي هالهم وافتكي منه ..
فاطمه: اي والله هم ..
مناف وفاطمه: ههههههه
مناف: زين حبوبه ماعطلج .. واسمحسلي على الاتصال المتأخر ..
فاطمه: لا عادي حبيبتي .. اتصلي بأي وقت انتي ..
مناف: تسلمين لي والله .. بس خلينا على اتصال ..
فاطمه: ان شاءالله ..
مناف: مع السلامه حياتي ..
فاطمه: الله وياج ..
سكروا من بعض وكل وحده فيهم نامت وهي مستانسه .. فاطمه استانست ان مناف اوعدتها انها بتحضر عرسها .. ومناف استانيت انها بتحضر عرس فاطمه وكانت مخططه انها تكلم فارس عشان يرسل لها السايق ويوديها العرس غمضت مناف عيونها بفرح ..
مر هاليوم على الكل بهمومه و مشاكله .. بس شمس كل يوم جديد تنسيهم همومهم الامس .. خالد اتصل بفاضل عشان ياخذ منه معلومات عن ماليزيا عشان يجهز له ولمريم ..
فاضل: هلا هلا هلا اخوي ..
خالد مبتسم: هلا وغلا .. شحالك الغالي ؟
فاضل: طيب طاب حالك .. اخبارك انت ؟
خالد: طيبون ..
فاضل: اموت فالطيبون والله ..
خالد: هههههه .. زين بسألك الفضلي ..
فاضل: اسأل طال عمرك ..
خالد: تذكر ذيك السنه لما رحت ماليزيا مع الشباب ..؟
فاضل: آمرني الغالي ..
خالد: ما يأمر عليك العدو .. بس بغيت اسوي مفاجأه للمدام و اخذها هناك ..
فاضل بعبط: ابوك يالرومنسيه ..
خالد بجد: فضول اصطلب ..
فاضل: احم .. زين كمل ..
خالد: زين شو الاماكن اللي تنصحني اروح لها ..
فاضل: والله في اماكن وايد .. يعني تقدر تروح منتجعات على البحر رهيبه بصراحه .. وفي اكواخ في الغابات .. وفي جزر تروح لها بروحك .. محد يكون موجود فيها الا انت وحرم خالد بن محمد ..
خالد: اهااا .. حلو حلو ..
فاضل: بعد اكواخهم اللي في الغابات حلوه والله ..
خالد: لا لما رحنا سويسرا اجرنا كوخ .. زين ابيك تضبط لي رحله هناك لمدة 10 ايام .. وتكتب لي فورقه اسامي الاماكن والمنتجعات ..
فاضل: شوف انا بسوي لك خوش ترتيب .. اول ماتوصلون بسوي لك استقبال ولا احلى .. بتم فالعاصمه يوم واحد بالضبط .. وبعدين بيجيكم سواق بياخذكم لمنتجع بحجز لكم فيه 3 ايام .. وبعدين من المنتجع نفس السواق بيمركم وبياخذكم لجزيره محد فيها الا انت وحرمك بتمون فالجزيره 4 ايام .. وآخر 3 ايام برجعكم العاصمه السواق بيوديكم حدايق حلوه عندهم .. وتسوقوا وبعدين ترجعون .. شو رايك بالجدول ؟ هاي نفس جدولنا لما رحنا ..
خالد: والله خوش ترتيب .. زين انت بتضبط من هني ؟
فاضل: اي .. بحجز لكم من هني كل شي .. وبكلم الريال وبعطيك رقمه احتياط .. وبخلي رقمك عنده .. هو طيب بس بيصير طيب معاك اكثر لو بخيته بعد كل مشوار ..
خالد: هههههه .. ما يهمك .. هالاشكال اعرف لها ..
فاضل: بس ما يهمك .. متى تبي تسافر انت ؟
خالد: والله شوف لي الاسبوع الجاي لمدة 10 ايام بالضبط حسب الجدول ..
فاضل: ما يهمك ..
خالد: ماتقصر حبيبي .. بس مابي حد يدري .. وخصوصا مريم ..
فاضل بخبث: انت تامر امر .. بس تدري كل شي بحسابه ..
خالد: زين زين ..
فاضل: هههههه .. والله احبك يا خالد .. تفهمها وهي طايره ..
خالد مبتسم: عيال اليوم مافي شي ببلاش عندكم ..
فاضل: افيد واستفيد ..
خالد وفاضل: ههههههه ..
خالد: زين متى بترد علي ؟
فاضل: عطني يومين بالضبط .. بروح مكتب السفريات اليوم المغرب .. بس لازم اكلم الريال في تايلند عشان يرتب لك كل شي ويرد علي خلال يومين ..
خالد: ماتقصر يبه ..
فاضل: حاضرين للطيبين ..
خالد: زين انتظر ردك خلال يومين ..
فاضل: من عيوني ..
خالد: تسلم لي .. يلا مع السلامه ..
فاضل: الله وياك ..
سكر خالد من فاضل .. ركب سيارته وراح يخلص اشغاله فالشركه ..
...............
هنادي وسلمان وريما متجمعين في بيت الجوهره ..
سلمان: ها جوجو شخبارج مع الحمل ؟
الجوهره مبتسمه: الحمدلله ..
هنادي: ينمو الجنين ؟
ريما: باب شنو يعني ينمو ؟
سلمان التفت عليها: ينمو يعني يكبر في بطنها ..
ريما بأستغراب: يعني بيكبر ويمشي في بطن عميمه جوجو ؟
كلهم طالعوا بعض وماتوا من الضحك على كلام ريما ..
ريما ببرأه: ليش تضحكون ؟
سلمان قرب منها: ولا شي بابا .. بس لما نقول ان الياهل ينمو يعني يبتدى يكبر شوي في بطن امه .. وبعدين يطلع من بطن امه بأذن الله ..
ريم: اي .. زين شلون يطلع من بطن امه ؟
هنادي والجوهره طالعوا بعض وحسوا بأحراج .. سلمان نزل راسه وانحرج .. الجوهره مسكت ريما وراحت معاها غرفتها .. قعدت الجوهره جنب ريما وشرحت لها شلون تولد الام ..
الجوهره: حبيبتي ريما .. بكره انتي لما تكبرين بيتغير جسمج .. و بتتزوجين ان شاءالله .. وبتجيبين عيال حلوين مثلج ..
ريما ابتسمت للجوهره وكانت تسمعها بأهتمام ..
الجوهره: الياهل يكون في بطن كل ام .. وحطت يد ريما على بطنها المنتفخ .. اول شي يكون الياهل صغير وايد قد يدج الحلوه .. ولازم الام تتغذى وتاكل عشان يكبر شوي شوي في بطنها .. ولما يستوي بطن الام كبير يبدى الياهل يتحرك عشان يطلع من بطنها ..
ريما كانت مبتسمه وهي تسمع كلام الجوهره ..
ريما: زين متى بيطلع الياهل اللي في بطنج ؟
الجوهره مبتسمه: بعد شهرين ان شاءالله ..
ريما: يعني هو للحين صغير ؟
الجوهره: كبر شوي ..
ريما: زين بتخليني اشله ؟
الجوهره حضنتها: ان شاءالله حياتي ..
مسكت يد ريما ورجعوا الصاله عند سلمان وهنادي .. دخلوا وكانت هنادي مندمجه مع سلمان فالسوالف ..
الجوهره: شتقولون ؟
سلمان: نتكلم عن مدرسة ريما ..
الجوهره: تعال المدارس قربت تفتح والتسجيل خلص ؟
سلمان: اي ادري .. بشوف ادخلها مدرسه خاصه وبحاول معاهم مع اني ادري انهم مشددين ..
الجوهره: على شنو مشددين ؟
سلمان: ان ندخل الطالب بعد وقت التسجيل ..
هنادي: خالي تقدر ادخلها بأستثناء ..
سلمان: والله بشوف .. في مدرسه انجليزيه بس اصحابها من اهل البلد واللي عرفته عن هالمدرسه انها على منهاج اسلامي .. يعني يدرسون الدين كماده اساسيه واللغه العربيه ..
هنادي: زين والله ..
سلمان: واحد شاف اعلانهم فالجريده و قالي عنهم وبتصل لهم استفسر ..
الجوهره: ان شاءالله يستثنونها ..
سلمان: اتمنى والله .. بس المدرسه بعيده عن البيت ..
هنادي: زين السايق موجود يا خالي ..
سلمان: فكرت اخلي باص يمر عليها احسن ..
هنادي: حرام عليك تغثها بالباص من صباح الله خير ..
الجوهره: عدل كلام هنوده ..
سلمان باستغراب: ليش ؟
هنادي: خالي سواق الباق بيغثهم بسواقته ما بيخلي حفره الا بيعدي عليها .. بتوصل المدرسه وهي منتهيه ولايعه جبدها ..
سلمان: هههههه .. عادي زين .. على ايامنا كنا نروح ونجي بالباص ..
الجوهره: ايامكم غير ..
هنادي: زين وصلها وانت طالع الصبح شفيها يعني ..
الجوهره: اي وصلها انت .. ليش تكسل ..
سلمان: حشى منكم .. ما قلت اني مو موصلها .. ول عليكم ..
هنادي والجوهره: هههههههههه ..
ريما: متى بناكل ؟
هنادي: فديت قلبها جوعانه ..
سلمان: الحين بنروح البيت وبنسوي اكل انا وانتي ..
الجوهره: وليش ؟ انا طالبه لكم عشى ..
سلمان: وليش مكلفه على عمرك يبه .؟
هنادي: ولا مكلفه على عمرها ولا شي .. خلها تطلب لنا ..
الجوهره: ههههههه
سلمان: يمه منج انتي .. الواحد ما يتكلم جدامج ..
هنادي: محد قالك تتكلم جدامي .. اذا السالفه فيها اكل يبه انا مافكر عدل ..
الكل: هههههه ..
الجوهره: ريما يلا نروح نجهز ؟
ريما بوناسه: يلا عميمه ..
هنادي: نطروني انا جايه ..
راحوا البنات يجهزون العشى وسلمان تم بروحه فالصاله .. كان يفكر في فاطمه ..
سلمان " يالله .. ليش جي افكر في فاطمه .. استغفر الله العظيم .. وربي مالي حق افكر فيها .. اعوذ بالله من الشيطان الرجيم .. كل مره اقول مابي افكر فيها ماقدر الا افكر فيها زود واتخيلها .. لاحول ولا قوة الا بالله العلي العظيم " ..
ميل راسه على ورا وتكى على الكرسي .. غمض عيونه وتنفس بعمق ..
سلمان " شلون بعيش وياها بنفس البيت؟ لازم اطلع من البيت .. ماعتقد يوسف بيرضى .. لو درى هو اللي بيطلع من البيت .. ياربي وش الحل ؟ احترت والله احترت " ..
تم سلمان يقلب الافكار في باله .. طلع باكيت الزقايره من جيبه .. ولع له وحده وطلع عند الباب يدخن .. وهو مندمج بالزقاره شاف يوسف داخل الحوش .. خذ له نفس وطلع الدخان من صدره ومشى ناحية يوسف .. سلموا على بعض ..
.....................
يوسف: هلا خالي ..
سلمان: هلا والله .. حماتك بتحبك ..
يوسف: ههههههه .. اتصلوا لي البنات من العصر .. وماكنت اقدر امركم بس عشان ماكسر بخاطرهم قلت لهم اتصلوا لي لي جهز عشاكم ..
سلمان: اي حق بطنك بتلغي كل مواعيدك ..
يوسف: ههههه ..
سلمان: بطيني الولد ..
يوسف: من قلب ..
سلمان: عليك بالعافيه ..
يوسف: الله يعافيك ..
سلمان: اخبارك مع تحضيرات الزواج ؟ كل شي تمام ؟
يوسف: اي الحمدلله .. مثل ماتشوف البيت وكل شوي يخلصون فيه شي .. اما تجهيزات الحفل الحمدلله شبه خالصه .. انت والشباب ماقصرتوا والله ..
سلمان: حاضرين لك الغالي .. لو محتاج شي لا تتردد
يوسف: ماتقصر والله ..
تموا يسولفون فالحوش عن تحضيرات العرس وتجهيز البيت .. طلعت لهم ريما ..
ريما: يلا عشى ..
يوسف: اوه ريما العبيطه هني ..
ريما طالعت يوسف بنظره ومسكت يد ابوها ..
يوسف: روح يالنظرات .. ماقدر عليها انا ..
ريما ما علقت على كلام يوسف ..
يوسف: مع هالكشه ..
ريما: احلى منك ..
يوسف: هههههه .. انتي احلى مني .. وووووع من زينج
ريما: احلى منك ..
يوسف: شكثر احلى مني ؟
ريما: وايد ..
يوسف: شكثر وايد هاذي .. يعني قد النمله ؟
ريما تخصرت: لا والله .. وايد يعني قد البيت ..
يوسف يلعوزها: بس قد البيت .. لا يبه عيل انا احلى منج قد النجوم ..
ريما رفعت راسها اطالع فوق .. قرب منها يوسف وحط مفتاح السياره على رقبتها .. ريما تخرت وصرخت ..
ريما: آآآه ..
سلمان: هههههه ..
يوسف: ويوووووو .. يالخوافه ..
ريما حضنت ابوها وصاحت: بابا شوف عمي يوسف ..
سلمان حضنها: ليش تصيحين ؟
ريما: كله يلعوزني ..
سلمان: انتي تلعبين معاه وبعدين تصيحين ..
ريما تمسح دموعها: هو اللي يبدى يلعوزني اول ..
سلمان شلها وباسها: حياتي فديت هالدموع .. لا تصيحين على كل شي .. خلج قويه مثل ابوج ..
ريما دفنت راسها في صدر سلمان: مابي مابي ..
يوسف خذها من سلمان وحضنها بقوه ..
يوسف: شدعوه تزعلين مني ريموووو ..
ريما ابتسمت: انا ريما مب ريموو ..
يوسف وسلمان: ههههههههه ..
يوسف: زين ليش تزعلين ؟
ريما: مازعل .. خلاص انا بصير قويه مثل بابا ..
سلمان مسح على راسها: فديتها اللي بتصير قويه مثل ابوها ..
دخلوا الشباب عند البنات .. هنادي شافت ويه ريما وعيونها الحمر ..
الجوهره: اكيد يوسف ملعوزها ؟
يوسف: اي نعم اكيد ..
هنادي: ليش زين ؟
يوسف: اذا ما صيحها احس ان ناقصني شي ..
سلمان: هههههههه .. صج والله .. ان ما توليت عيالك .. اصبر علي ..
يوسف: شنو ؟ تتولى عيالي ؟ في احلامك ..
الجوهره: ليش ؟
يوسف: عيالي اقوياء .. بس يكملون شهرين بخليهم يشلون حديد .. وبعد سنه بالضبط بجيب عيال الفريج بخلي عيالي يصفقونهم ويتدربون عليهم ..
الكل: ههههههه ..
هنادي: يمه منك شرير ..
يوسف: لازم اعلمهم الشده من نعومة اظافرهم ..
سلمان: حلوه هاذي من نعومة اظافرهم .. ان ما خليت ريما تتولاهم ..
يوسف: في احلامك انت وبنتك ..
سلمان: من تطلع من البيت بطرش ريما فوق تلتهم ..
يوسف: افا عيك .. من اطلع من البيت بنزلهم معاي وفي يدهم خيازرين خل يتولون بنتك ..
سلمان: ههههههه .. عليك سوالف ..
هنادي: زين خل نتناقش في هالامور بعدين .. يلا الاكل بيبرد ..
يوسف: زين زين ..
تعشوا كلهم مع بعض وبعدين كلن توجه لبيته .. يوسف اتصل بفاطمه وهو رايح البيت ..
فاطمه: هلا حبيبي ..
يوسف: حبيبتي انتي ..
فاطمه: شو اخبارك ؟
يوسف: الحمدلله .. شتسوين ؟
فاطمه: كنت مع مريم اختي نحش في خلق الله .. والحين اكلمك ..
يوسف: فديت اللي تكلمني والله ..
فاطمه: حياتي والله .. زين قولي انت شو سويت ؟
يوسف: كنت مع بوسعود خلصنا كم شلغه .. وبعدين رحت عند جوجو اختي مسويه عشى وتجمعنا عندها .. تدرين هاليومين مايقدرون يجونا البيت عشان التعديلات والعمال ..
فاطمه: اها .. شو اخبار ريما بنت خالك ؟
يوسف: هذا هي تشقح وتنطح ..
فاطمه: هههههه ..
يوسف: زين حبيبتي ..
فاطمه: قول حبيبي ..
يوسف: تشوفين اسماء بنت عمج بكره لو فاضيه بجيب لهم ريما السنداره ..
فاطمه: ان شاءالله بتصل لهم بكره اول ماقعد من النوم ..
يوسف: تسلمين لي والله ..
فاطمه: فديت قلبك ..
يوسف: زين حياتي ماطول عليج .. بس حبيت اسمع صوتج قبل ما انام ..
فاطمه مبتسمه: فديت روحك حبيبي .. تحمل بنفسك وانت راجع البيت ..
يوسف: ان شاءالله ..
فاطمه: الله وياك حبيبي ..
يوسف: مع السلامه ..
سكر يوسف من فاطمه وهو مبسوط .. وصل البيت ونام من التعب على طول .. اما فاطمه راحت الصاله وتمت مع مريم وخالد وعبدالعزيز .. كانوا فاقدين فارس الحزين ..
.....................
مرت الايام ويبقى الحال على ما هو عليه .. بدت دوامات المدارس والجامعه .. فارس منعزل عن اهله وكل حياته مناف وبس .. عبدالعزيز التهى مع الجامعه و تجهيزات العرس مع يوسف وباقي الشباب يوسف .. فاضل قرر انه يكمل دراسته برا .. اعتذر هالكورس ووسحب اوراقه معد ما جاه القبول .. علي بدى دوامه مع دوام المدارس .. سلطان واحمد وجاسم شروا لهم دراجات وكل يوم والثاني راحوا العزبه .. سلمان دخل ريما المدرسه وارتاح لما قبلوها .. تفرغ للمحل اللي فتحه .. ام فارس تمارس حياتها طبيعيه وتكابر جدام الكل .. بس قلبها محترق على ولدها فارس .. فقدته لان لها فتره ما شافته ولا كلمته .. بوفارس ماقدر اقول عنه شي لان الغموض يحيطه من كل صوب .. شلون عرف عن علاقة فارس بمناف واهلها .. وشو السر اللي مخليه يتأكد ان فارس ما راح ياخذ مناف وشو سر سكوته .. مريم وخالد سافروا ماليزيا وقضوا احلى ايام حياتهم هناك .. خالد حب انه ينسي مريم همومها وهمومه .. في خلال فترة سفرهم وكل محمد وعلي انهم يجهزن له الشقه بعد ما اختار الاثاث هو ومريم .. رجعوا من السفر ونفسيتهم كانت غير .. والحين عايشين في شقتهم الصغيره اللي لامتهم .. محمد وساره حياتهم طبيبه ورجعت نفس قبل .. ساره تغيرت للأحسن ومحمد تغير وايد .. اما الريم المسكينه اللي تغيرت وكان باين عليها .. ما كانت تاكل الا القليل .. ما تقعد مع اهلها وايد انعزلت عن الكل من حزنها بخبر زواج فارس اللي ما صارت فيه اي تطورات .. بومحمد كان قلق عليها ويحاتيها .. بس هي كانت اطمنه وما تبين جدامه شي .. الجوهره ولدت وجابت بنتوته صغيرونه وسمتها لولوه .. ابراهيم فرح بالبنت وحبها وايد .. والحين عمرها كم اسبوع بس ..
قرب يوم فاطمه ويوسف .. ما بقى على العرس الا 15 يوم .. كان الكورس على آخره وفاطمه كانت تقدم آخر امتحان .. تلاقت هي ومناف ومريم ولطيفه فالكفتريا ..
فاطمه: واخيرا خلصت ..
مناف مبتسمه: تستاهلين .. بس زين سويتي هالكورس ماخذتي ساعات وايد ..
مريم: ما عليج منها مسويه حسابها ..
لطيفه: حاسبتها صح ..
فاطمه: يمه من عيونكم ..
الكل: ههههههه ..
مناف: والله اريح لج ..
فاطمه: اي والله .. تدرين ما بقى شي على يوم العرس وابي اتهيء نفسيا قبلها بفتره ..
لطيفه: عدل كلامج ..
مناف: الله يوفقج فديتج ..
فاطمه مبتسمه: وياج حبيبتي .. والفال لج ..
لطيفه ومريم: آآمين ..
مناف ابتسمت لهم وكانت تفكر في فارس ..
مناف " فديتك يا فارس .. ليش طالت السالفه ؟ " ..
مناف شافت ساعتها: اوه تأخرت على المحاضره ..
مريم: اي محاضره ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك