رواية اطلالي ملت وقوفي -24
سحايب: الله يسمعنا الأخبار الطيبه.. أبشرك إنا اليوم أخذت نتيجتي ونسبتي مقبوله بس راح أجتهد أكيد..
"ما أنتبهت كنوده وسرحت ثواني تفكر وألتفتت على سحايب وهي تسألها": وش صار على جار معيضه اللي يتاجر بالمخدرات ما مسكوه الشرطه..؟
"أبتسمت سحايب": فز قلبي لما قلتي الشرطه آآآآه ياحبي لهم.. تدرين أنا قلت لمعيضه إذا صاروا يراقبون جارهم أبنصب خيمتي بجنب بيتهم عشان أطالع وأشوف رجال المباحث بهيأه تنكريه يااااااااي وناســه..
كنوده: ليش تنصبين خيمتك بعيد.. قدام بيتكم أقرب لك بتشوفين شرطه ومباحث على كيفك وبأي وقت تبين؟
"صرخت سحايب بعفويه وهي مستانسه": ياليت ياكنوده بس كيـــف ومتى؟ أقصـد.....
"سكتت سحايب فجـــأه وبسرعه تلاشت الإبتسامه وهي تناظر كنوده بتعجب.. وكنوده تناظرها بضيــق..."
"سحايب بهدوء": ليش تسألين عن جار معيضه؟ ومن الشخص اللي تراقبه المباحث في حارتنا..؟..
"كنوده وهي تنسدح عالسرير": أنا أكثر شي يعجبني فيك إنك خبلـــه!!! وقلبك طيب وماشيه على النيه.. وتفكيرك بسيط ومحدود بشغلات تافهه وصغيره بس تعني لك الشي الكثير أقل شي تفرح قلبك.. يابختك على هالقلب المرتــــــاح..
سحايب: وش فيك إنتي أسألك من هنا تتفلسفين من هنا وش صاير بعقلك اليوم؟؟
كنوده: شي بخاطري وبقوله لك بس..
سحايب: لأ جد كنوده أنتي مو طبيعيه وأحس باين عليك التعب.. أخاف مو ماكله عدل أو ما أخذتي إبرة الأنسولين؟
"كنوده بهدوء": أنا تعباااااانه وبس .. ارتحتي..؟
سحايب: أبقولك شيء أحس وجهك صاير أسود.. إنتي صح سمراء بس لون بشرتك متغير ماأدري أحسه مو طبيعي آبدآ..
"كنوده بإستهزاء": يمكن بشرتي بتصير بيضاء بعد شوي وهذي مقدمات..
سحايب: طيب ماجاوبتيني على أسألتي من الشخص.....
"تقاطعها كنوده بإنفعال": يوووووه عاد إنتي خلقه خـبـلــه وما تستوعبين بسرعه خلاص أنقلعي أسألي أهلك..
سحايب: ليه معصبه طيب أنا سألت سؤال بس..
"كنوده بإستياء وهي قايمه": إلا طفشتيني بالأسئله.. وأنا تعبانه وكارهه نفسي..
سحايب: وين رايحه؟ بدري أجلسي شوي..
كنوده: أبروح أرتاح وأجهز شنطتي عندي موعد بكره..
سحايب: ليه بتهاجرين عشان تجهزين الشنطه.. المهم طمنيني وش يصير معك بكره ok..
"فتحت كنوده الباب وألتفتت على سحايب": معك سلف 20ريال؟
سحايب: سلف؟ عيب كنوده حنا مابينا هالسوالف معي 30 بس أنتظري أجيب لك الفلوس..
¿¿¿¿¿¿&i quest;¿¿¿¿¿&iqu est;¿¿¿¿¿&iques t;¿¿¿¿¿
(دخلت كنوده بيتهم وهي تحس بدوخه وهبوط في الضغط وآلام حاده بالبطن ومن شدة التعب ماتشوف اللي قدامها..
وكانت أمها جالسه في الصاله وفواز واقف يصلح سلك التلفزيون لأن كان خربان)..
فواز: كنوده تعالي صلحي التلفزيون صارلي ساعه أحاول وعجزت..
"وقفت كنوده وهي ساكته وتقاوم الألآم"..
"أم فواز بإستهزاء": كنوده مهي فاضيه تصلح تلفزيونات بس تبي تروح وتجي عند سحايب.. ترى البنت شاطره ومجتهده مو فاضيه لبنت فاشله زيك 24ساعه مقابلتها..
فواز: يمه مو وقته هالكلام الحين.. تعالي ياكنوده ترى تعبت من الوقفه..
(مشت كنوده خطوتين فجأه طاحت بالأرض مغمى عليها وبسرعه شالوها أمها وفواز وأخذوها للمستشفى)...
~~~~~~~~~~~~~~~~~~~~~~~~~~
وبغرفة درر كانت أسماء ترتب شنطتها عشان ترجع لتبوك مع زوجها حسين واللي جاء للرياض يوم الجمعه عشان يسلم على أهل أسماء ويسافرون الساعه 9ونص لتبوك..
درر: أسوم تكفين مو تنقطعين شهور تعالي بعد شهر ok وأجلسي شهر بعد..
"أسماء وهي تضحك": حلوه هذي شهر,, أجي وأخلي زوجي لحاله حـراااااام ..
درر: العمر يخلص وشغل زوجك مايخلص.. دايم مشغول ومو فاضي..
أسماء: وش أسوي زوجي ولازم أتحمل ظروف شغله.. بعدين ليه تبيني أجي الرياض وأنتي عندك دراسه ومو فاضيه لي..
درر: إيوه بـس...! خلاص تعالي ببداية الصيف على طول..
أسماء: درر وش فيك؟ أكيد أجي بالصيف ليه قاعده تحنين علي الحين..
"درر بضيق": ما أدري أحس ماشبعت منك ووووبالي مو مرتاحه لسفرتك..
أسماء: درر .. بسم الله على عقلك وش صار لك قمتي تحوسين؟ أول مره أسافر! صار لي خمس سنوات وش الجديد؟
درر: أووووه أنا تفكيري متشتت على الدراسه والبيت وأنتي..!!
أسماء: أنا وش فيني؟
"درر بتردد": يعني مسألة أن.... صار لك خمس سنين وما حملتي.. وووو الزفت حامد إلى متى يظل يفكر فيك أخاف هالشيء يأثر على حياتك بعدين.. يعني و.....
"تقاطعها أسماء": أوف أوف درر أنتي ليه حساسه لهدرجه وتفكرين بأمور مالك علاقه فيها؟
درر: ...........
أسماء: كل شيء بهالدنيا قضاء وقدر وأنا وزوجي راضين بحياتنا وباللي الله كاتبه لنا ونصبر والله يعوض صبرنا خير.. ماصار لنا خمس سنوات متزوجين!! فيه ناس يصبرون ست وتسع و12 سنه بدون عيال والله رزقهم بعيال بعد طول الصبر..
درر: وحامـــد؟!
"أسماء بإنفعال": وش جاب سيرة الزفت حامد؟ خليك منه لا تفكرين وتعطينه أكبر من حجمه..
هذا إنسان حقير وهو مقهور لأني مرتاحه مع حسين ويبي يحاول بأي طريقه ينكد علي بس مو عارف كيف.. أسمعيني يادرر هذا موضوع أنتهى وخلاص لاعاد تحكين فيه قدامي أو قدام غيري خصوصآ لطيفه.. ترى يظل اخوها وأكيد ما ترضى أحد يغلط عليه أو يسب فيه فاهمـــه..!!
"درر بخوف": لا أكيد ما أجيب طاري قدام طفطف أصلآ هي تدري إني ما أطيقه عشان كذا ما تتكلم عنه آبدآ ولا تجيب طاريه_ مجنونه أنا أخرب صداقتي أنا وطفطف بسبب حامد..
أسماء: شاطره أختي خليك صاحيه وواعيه لنفسك وللي حولك.. وإنشاءالله ماتتخرجين من الثانويه إلا عــادل خاطبك بأذن الله..
"درر وهي فاتحه عيونها عالآخر": مين عــــــادل...؟
"أسماء بعفويه": هذا اللي تحبينه ودعمتي بالدباب قدامه؟
"صرخت درر وهي تضرب أسماء": إنتي مانسيتي الموقف!! بعدين أسمه علـــي مو عادل..
"أسماء وهي تضحك": خلاص نسيت أنا آسفـــه هههههههههههههههههههههه
درر: أدعي لي أسوم أنه يخطبني..
"أسماء وهي قايمه": يارب يخطبك عن قريب.. أنا أبروح اجلس مع أمي بالصاله قبل ما أسافر تعالي معي..
يـــوم الأحـــد...
(12/19)
-: أنتـــحـــــــــــــــــرت!!!
لييييييييه...؟ ومتــــــى...؟
أم ياسر: أمس لما تعبت بالليل أخذوها أهلها للمسشفى وطلعت ماكله علبتين من حبوب مسكن الظاهر (بندول) وبسرعه سوولها غسيل معده وحولوها للطب النفسي..
"شهقت سحايب وهي تحط يـدها على فمها": معقوله كنوده تسوي بحالها كذا؟ طيب وش اللي يخليها تنتحر.....!
أم ياسر: وش خلاها غير ظروف أهلها وسمعة أبوها تاجر المخدرات..
"شهقت سحايب شهقه أقوى وهي تضرب يدها بصدرها": مخــــــدرات..!! معناها أبوها هو الشخص اللي تقصده أمس بكلامها..
أم ياسر: أي كلام..كنوده أمس جابت لك طاري أبوهــا؟
سحايب: إيه أمس كانت متضايقه وتسألني عن جار صديقتي أسمه(أبو غازي) تاجر مخدرات والظاهر إنه يعرف أبوها أو صديقه... يمــه أنا مالي خبر إن أبو كنوده تاجر مخدرات كنت أعتقد إنه دايم يسكر وبس..؟
أم ياسر: صار له سنتين من طلع من السجن وهو يتاجر مع هذا اللي أسمه ابوغازي.. أم فواز دايم تشتكي من أبو فواز وتتمنى إنه يبعد عنهم هو وتجارته ويترك لهم البيت يعيشونه براحـــه..
"سحايب بتعجب": ولا مره جبتوا لي طاري_ حتى كنوده دايم تقول; أبوي منشغل عنا_ ولا أفهم وش قصدها ولا فكرت أسألها..
أم ياسر: الحين أفطري بسرعه قبل مايجي باصك..
"سحايب وهي قايمه": لأ ماأشتهي بس ترى من أرجع من المدرسه أبي أزور كنوده..
أم ياسر: مافيه زياره الظهر بس العصر أقول لياسر يوديك..
"سحايب وهي تلبس عبايتها": يمه أبسألك أمها وأخوانها راح يزورونها اليوم؟
أم ياسر: لأ امها معصبه عليها وحلفت ماتزورها لا هي ولا أخوانها..
"سحايب بحزن": ليه حــــرام وش ذنبها البنت هذا بدل مايساعدونها يتخلون عنها؟
أم ياسر: أنا قلت لأمها نفس كلامك بس أمها معصبه وما ردت علي...
"سحايب وهي مستعجله": باصي جاء يالله فمان الله..
++++++++++++++++++++++++++++
وفـــي المدرســــــه:
~{تــرى ذاك المكان اللـي جمعني بالصدفه ويــاك'
يعيد الشــوق والذكــرى تعيد اللـي مضـى فيني..
سـنـه مرت على اللهفه سـنـه مرت على لقـيـاك'
سـنـه وشهــور مرت بس..! تراها تعشقك عـيـنـي..
أنــا مدري وش يجيبك لقـلـب مـاقـدر ينساك'
يتيه بعالمك وحدك وينـسـى ماضي سنيني..
سـنـه مرت وأنــا فيني دروب الشوق تستناك'
على جمر الألــم تبـكـي وطيفك دوم يـبـكينـي..
سـنـه مرت وأنا قلبي يعيش دوم في ذكــراك'
معك يحيى,, معك يـنـبـض,, معك يلقى عناويني..
حبيبي العمر يمضي وحـلـمـي أعيش أنــا بدنياك'
ولـكـن حــال هالدنيا تباعد "بينـك وبينـي" }~
"درر وهي تسكر دفتر الصراحه وتعطيه سميه": ياااااالبـــى قلبي ياعلـــي..
ميريام: يابنت الناس مامليتي من هالحب الفاشل..؟
درر: لأ.. لما يتزوج..
ميريام: لازم تنصدمين وتصيحين وتسوين حركات أفلام بعدين تتوبين وتنسين؟
درر: ماتدرين يمكن يتزوجني أنا...؟
ميريام: متفائله مررره اليوم بسم الله عليك.. يالله يمكن تكون هذي آخر قصيدة حب تكتبينها فيه.. بعدها تكتبين بدفتر الصراحه (بحضر زفافك/ مبروك زواجك)..
"ضحكت درر": لأ ياحبيبتي أصير أكتب بالحب الجديد.. يعني بعد عرس علي بفتره يمديني ألاقي غيره هههههههه
ميار: درر حبيبتي أبيك تكتبين المسجات اللي أرسلتها لك لما كنت مسافره بدفتر الصراحهOk..
درر: كتبتها وأنتهيت.. أمس أخذت الدفتر من سميه عشان أكتبها..
ميار: صدق؟ عطيني سميه الدفتر..
"أخذت ميار الدفتر وجلست تتصفح القصايد وهي تتنهد..كانت درر كاتبه كل قصيده بصفحه ومسجله تحتها اليوم والتاريخ"..
درر: وش رايــــــك؟
"ميار وهي مستانسه": تجنـــن روعــــــه..!!
درر: باقي تكتبين تحت كل قصيده و(بصراحه) وش مناسبة كل مسج بذيك اللحظه؟
"أبتسمت ميار وجلست تكتب وهي ساكته وكانت شوي تتنهد وشوي تضحك...
معيضه وراويه كانوا بعالم ثاني وبنقاش حاد عن الدراسه.. راويــه ودها تنقطع عن الدراسه وتكمل السنه الجايه عشان تجيب نسبه عاليه ومعيضه تحاول تثنيها عن قرارها واللي أهلها من الأساس رافضينه خصوصآ أختها لجين...
أما سحايب كان بالها مشغول بكنوده وتفكر فيها وقالت للشله إن كنوده تعبانه بالمستشفى بس ماخبرتهم بالسبب الحقيقي عشان ما ينصدمون فيها.... أخذت سحايب دفتر الصراحه بعد ماأنتهت ميار وسجلت مشاعرها بمراره",,,
*[ نقســـو علينـــا,,
علــى أنفسنـــا..
حين نبحر بها إلى جزر المستحيل..
ونملؤها بحلم زائـــف..
ونضخمها بحــزن أســود..
وننزعها فوق محطــات الأنتظار..
ونحملها فوق طاقتهـــا..
_____________
نقســـو على قلوبنـــا,,
حين نحب من لا يشعـــر..
ونحلـــم بمن لا يستحـــق..
وننزف أحساسنا في حضرة من (لا يـبـالــــي)..
ونتحول إلى عشاق من طـــرف واحـــد...
_____________
نقســـو على الظــروف,,
فنعلق تخاذلـنـا في رقبتها..
ونلقي فشلـنـا عليها..
ونبرر بها عجزنا الدائم..
ونتخذ منها حجه لا تنفد..
_____________
نقســـو على عقولنــا,,
حين ندخل أنفسنا في حاله من (الـجـنـــون)..
ونتجرد من نضجـنــا..
ونبحر فوق سفن الطـيـش..
ونرسو فوق شواطـئ التهور..
ونتصرف بمـراهقـــه مـرفوضــه..]*
__________________________
رن الجـرس وطلعوا البنات لباصاتهم (راويه+سحايب+سميه) وميريام مع السايق ومعيضه مشي لأن بيتها قريب من المدرسه.. وظلت درر جالسه تنتظر أخوها سلطان اللي تأخر كثير وكان الجو بـــارد مره.. راحت لغرفة الإداريه عشان تتصل على أهلها لقت التيلفون داخل الغرفه المقفله.. جلست وأنتظرت نص ساعه زياده وتوترت مره لما خلت الساحه من البنات ماظل إلا هي والأستاذه المناوبه..
نادى الحارس بالميكرفون أسم<سلطـــان> وبسرعه قامت درر ولبست عباتها بالمقلوب من الربكه وركبت السياره ونفسيتها عـــدم من طول الإنتظار وكان سلطان جاي ياخذها ومعه راكان..
سلطان: عسى ماتأخرت عليك..
"درر وهي تفرك يدينها ببعض من البرد": مابقى غيري بالمدرسه وذبحني البرد بعد..
سلطان: ماعليه حقك علي بس أنا كنت بالمستشفى وديت رهوفه تعبانه شوي وتعرفين طريق المستشفى بعيد..
درر: سلامات وش فيها رهوفه..
سلطان: تعبانه من...........
"درر ماسمعت سلطان وش قال_ هي مو مركزه معه من البرد وكانت تتلفت بتوتر_ لقت بجنبها (جاكيت بنــي) وبسرعه أخذته ورمت عباتها عشان تلبسه بس ماأنتبه لها سلطان ورجعت لبست عباتها وهي ترتخي بجلستها"..
"سلطان وهو يطفي السياره عند الصيدليه": أنتظروا دقايق بس أبي أشتري أدويه لرهوفه وراجع..
"نزل سلطان وألتفت راكان على درر الجالسه ورا": مادريتي اليوم مسلسل(ليالي الصالحيه) الحلقه الأخيره..
"درر بملل": لا مادريت.. بعدين إنت ماتمل من هذا المسلسل عشرين مره تابعته وعلى كل المحطات..
"راكان وهو يلتفت لقدام": ولا راح أمل منه.. أحسن شي شخصية (المعلم عمر) رهييييييـبـه..
"فزت درر من مكانها بسرعه وهي تسأل راكان بصوت عالي":شخصية ميييييييييين؟
"ألتفتت عليها راكان ببرود": المعلم عـــمـــر..
درر: إنت قلت المعلم علـــي وألحين عدلت الأسم صح..؟
"راكان بتعجب": أنا قلت عمر بس أنتي ماسمعتي عدل..
"درر بتأكيد": والله إنك قلت علي لاتنكــــــر..!! أنا سمعتك نطقت علي مـو عمر..
"راكان بإنفعال": أنا قلت المعلم عمر.. وأنقلعييييي أنا الغبي اللي أسولف عليك غصب تطلعيني غلطان ..
"ضحكت درر وهي ترتخي بجلستها وتحضن الجاكيت بقوه"...
~~~~~~~~~~~~~~~~~~~~~~~~~~~
-: يااااااااي مو مصدقه إن لجين بتصير عروســــــه..؟
"لجين وهي مبتسمه وتجلس بجنب راويه": عروسه مره وحده تو الناس ماصار شي رسمي هم بس أتصلوا أمس وخطبوا ومنتظرين الموافقه..
"راويه بحماس": تكفين وافقي عشان نقهر عذالك (خطيره وأتباعها)..
لجين: عيب وش الكلام ياراويه إحنا ما تربينا على كذا نسوي أشياء عشان نقهر غيرنا_ بعدين مو نسأل عن الرجال بالأول؟
راويه: أكيد جدي وأبوي راح يسألون عنه.. بس ماقلتي لي ولد من؟ وش يقرب لنا؟ وش وظيفته وشخصيته؟...
لجين: يقرب لنا من طرف جدي من بعيد.. أسمه عبدالعزيز وعمره 30سنه ووظيفته مدير بنك العربي بالفرع اللي بالخرج أما بالنسبه لشخصيته ماأدري بس أكيد إن شخصيته عندي أهم من كل شي..
راويه: على أسم خالي أكيد أمي فرحانه هعهعهعهع_ تصدقين حلوه وظيفته بس المشكله إن وظيفتك بالرياض وهو بالخرج وشلون تجتمعون..؟
لجين: ماأدري بس إذا واقفت عليه عاد تنحل أكيد..
راويه: أبسألك.. بتخبرين خوالي وعمامي بموضوع خطبتك..؟
لجين: أكيييييد واجب إننا نقولهم هذي الأصول.. عشان ما يزعلون لو عرفوا متأخر وعشان يسألون عن الرجال..
"راويه وهي تتنهد": الله يكتب اللي فيه الخير_أنا أبقوم أتغدى وأنـــــــــام...
£££££££££££££££££££££££££
وفـــي المستشفـــى:
"سحايب بضيق": ليه سويتي بحالك كذا يا كنوده كلنا عندنا ظروف ومشاكل بس ماتوصل لدرجة الإنتحــــــار...
"كنوده وهي تحاول تضحك": اللي يسمعك يقول إني أول مره أحاول أنتحر..
"فتحت سحايب عيونها عالآخر وهي مستغربه وتنتظر كنوده تكمل كلامها"..
"كنوده بصوت حاد": قبل شهور لما كنت ببيت عمي وسبحت بالمسبح اللي ببيتهم مع البنات......... لما خلصت سباحه مارحت نشفت جسمي.......!!!! وش سويت؟ جلست قدام المكيف وجسمي مبلل....... وتعبت وأسعفوني عمامي....(هذا مو محاوله للإنتحــار)؟؟
سحايب: ...............
كنوده: ولما تخانقت مع أمي بعد أسابيع من السالفه هذي.. رحت للكهرب اللي بجنب الدرج ولعبت فيه وضغطت بالأزره وحركتها فوق وتحت بشكل عشوائي........وإيديني مبلله بالماء..........وش صار فيني وقتها.......؟ أنفجرت الكهرباء بوجهي وصار وجهي أسود وشعري كشه زي أفلام الكرتون...(هذا مو محاوله للإنتحـــار)..؟
سحايب: ..............
"كنوده وهي شوي وتصيح": سحايب أنا ضايعــه وتايهــه.. أنا أبي أمـــــوووووت مابي أعيش بهالدنيا مابي أعيش..
طول عمري أتمنى إني أعيش حياه نظيفه زي العالم والناس.. أبي أعيش مرتاحه بدون مشاكل.. كل الهموم تحاصرنا أنا وأخواني من طلعنا على هالدنيا وهذي حياتنا نكد في نكد.. لا أبــو يحتوينا ويخاف علينا ولا أم حنونه تحبنا وتهتم فينا.. أنا وأخواني مظلـومـيــــــــن.. مظلومين بسبب الظروف اللي ما أرحمتنا ولا ريحتنا...
"سحايب وهي تمسح دموع كنوده": خلاص كنوده مافيه داعي هالكلام إنتي تعبانه ولازم ترتاحين.. بعدين أحمدي ربك إنتي أحسن من غيرك_ شوفي المعوقين والمشلولين يتمنون ربع اللي فيك_ إنتي تتحركين وتتكلمين لكن هم محرومين.. وبالنسبه لأهلك كثير بنات عايشين بمثل ظروفك وأسوأ بعد ولا سووا بعمرهم اللي إنتي تسوينه..!!
"كنوده بملل": الحمدلله والشكر لك يارب وكلامك هذا حفظته هذا عاشر مره تقولينه لي...
سحايب: وبظل اردده لما يخف جنونك شوي.. أبسألك ما حولوك للطب النفسي أحسك تعبانه ولا هدت نفسيتك إلى الآن....؟
"كنوده وهي تتنهد": حولوني للطب النفسي ورفضت وأنجنيت وعصبت عليهم مابي ولا دكتور نفسي يقرب لي_أساسآ كلهم مجانين يعدلون حياة غيرهم وهم مو متعدلين..
سحايب: ماحد مجنون غيرك وإلا تنتحرين لأن أمك ماتعطيك مصروف؟ تتخانقين معها وتوصلين نفسك للحاله هذي؟ بالله عليك هذا سبب..
كنوده: لأ عشان سبب ثاني..
"سحايب بهمس": عشان تشوفين مصعـــب.....؟؟؟؟؟؟
(رن التليفون اللي على الطاوله وبسرعه ردت كنوده وهي فرحانه.. ثواني بس وسكرت)..
كنوده: مصعب واقف برا يبي يدخل.. خلاص إنتي روحي وأشوفك لما أطلع من المستشفى ok..
"قامت سحايب وهي تتأفف": أنا أبمشي لكن لي كلام ثاني معك بس تطلعين من المستشفى.. الله يهديك بس..
(طلعت سحايب من الغرفه وبسرعه أخذت كنوده الكحل من الشنطه وتكحلت وحطت حمره على شفايفها وتعطرت عالطاير..
وقفت سحايب عند باب الغرفه وهي تتلفت تدور على ياسر ولفت نظرها رجال واقف قدام الباب وكان عمره يوحي بالأربعينـــات ولابس ثوب قصير وملتحـي وهيئة شكله تدل على إنه ملـتـزم..!!!! ظلت سحايب واقفه تناظر فيه بذهول بس هو مو منتبه لها.. كان ماسك أكياس بيده و يكلم بالجوال ويهمس بكلمة; أدخـــل......؟؟
جاء ياسر من آخر السيب معصصصصصــب ويمشي بسرعه بإتجاه سحايب)...
"ياسر بإنفعال": خييييير إنشاءالله.. أستحي على وجهك أكلتي الرجال بعيونك..
"سحايب وهي تتمتم بصوت غير مسموع": هذا هو مصعب...!
ياسر: وش قلتي؟
"سحايب بإرتباك": هاااه
ولا شي ولا شي..
ياسر: أمشي خلصينا_ يالله قدامي للسياره..
________________________
(ركبوا السياره وهم يحكون عن حال جيرانهم والظروف اللي يمرون فيها في هذي الأيام)..
"سحايب بدهشه": هـــرب؟ وين راح؟
ياسر: أختفى من يومين لما حس إن رجال المباحث يراقبونه هرب وماحد يعرف عنه شي..
سحايب: وشلون حس بتحركات رجال المباحث مو كلها بالسر..؟
ياسر: يعرف ويدري لما يشوف حركات غريبه حول بيته..
سحايب: مثل إيش..؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك