رواية اطلالي ملت وقوفي -28
سحايب(وش رأيك نغني لها ونطبل عالطاوله عشان ترقص نغير من روتين الحصه شوي)..
"ضحكت ميار بصوت مسموع و بسرعه كحت عشان ترقع لنفسها بس الأستاذه أنتبهت لها"..
"أ/ملحـه وهي تأشر": وقفي إنتي اللي هني يالله قومي..
"وقفت ميار وهي مكتفه إيدينها ومنزله رأسها تناظر بالأرض وكتوفها تهتز لأنها كاتمه ضحكتها"..
أ/ملحه: وش اللي يضحكك..؟
"رفعت رأسها ميار وهي تناظر الأستاذه بذهول مسويه روحها بريئه.. وبسرعه ردت سحايب بأنفعال": قاعده تكح مو قاعده تضحك ياأستااااااذه..
أ/ملحه: إنتي أسكتي محد كلمتس أنا أحتسي مع هاللي واقفه..
"سحايب مافهمت على لهجة الأستاذه وضيعت وصارت تتكلم سوري": حاكيني أنا رفيأتها..!
"أنفجروا الطالبات بالضحك وميار جلست وحطت رأسها عالطاوله وهي تضحك وسميه حطت الكتاب على وجهها وضحكت وسحايب توترت وتحاول تمنع الضحكه لما وقفت الأستاذه فوق راسها وضربت الطاوله بأيدها بقوه"..
أ/ملحه: خيييييييير وش قلة الأدب هاذي أنتم طالبات ثانويه وإلا أبتدائي..؟
"سحايب بجرأه": وش تشوفين..؟
"أ/ملحه وهي تناظر سحايب بنص عين وتهدد": بحري علي.. ترا إذا ماعقلتي إنتي واللي بجنبتس وسكتتن أطلعكن برا الفصل فهمتن..!!
"سحايب بتعجب": ok نطلع بسسسسسس وش معناة (بحري)..؟
"سميه بهمس": يعني شوفي..
"أ/ملحه تسوي نفسها ماسمعت وهي ترجع للسبوره": أنتبهن للشرح ترا ماني عايده اللي شرحته..
"ميار وهي تتمتم بصوت غير مسموع": من حلاته اللي يسمعك يقول فهمنا شي.
"ألتفتت على سحايب" أجلس وإلا أظل واقفه..؟
"شدت سحايب مريول ميار وجلستها": خليها تولي بس أجلسي نكمل سوالف عالكتاب..
"ميار وهي تهمس لسميه": معك دفتر الصراحه ودي أكتب؟
سميه: لأ مع ميريام ودرر.. ليه فيه تطورات مع لزيز؟
ميار: من وين ياحسره لاتطورات ولاهم يحزنون..
"كتبت سحايب عالكتاب": (عذاري وينها ليه ماتكمل مساعداتها لك؟ وإلا بس بالشرقيه وبالرياض لأ..)
ميار(عذاري ماقصرت بس هو ماينتبه يرفع الضغط)..
سحايب(أسمحيلي ترى مساعداتها غبيه وماأعتقد إنها سوت شي يلفت نظره.. طيب ليه مالمحت لخواته هي دايم تسافر للشرقيه وضاربتها صداقه معهم؟)
ميار(أنا منعتها ودايم أحذرها ماتجيب طاري قدامهم)
سحايب(أنا أقولك تلميح مو تصريح.. أصلآ عذاري لو تبي هالشي يصير كان أستخدمت ذكائها وجرأتها بطريقه غير مباشره.. منها يفهمون خواته ومنها ماتعرفين إنتي بتلميحها إذا هالشي يضايقك)
ميار(ممممم ماأدري بس أنا فعلآ محتاره كيف صارلها سنتين تعرف بإني أحب يزيد ولاحتى زل لسانها قدام بنات خالتي.. حتى لما أزورهم ألاحظ إنهم يعاملوني عااااادي وماأحس لابنظراتهم ولابتصرفاتهم معي إنهم يعرفون ولو مجرد شك)
سحايب(معناته ظنوني بعذاري صح عشان كذا بقولك شي; إذا تبغين علاقتك تنجح مع يزيد بعدي عن عذاري!!!)
ميار(ليش تحذريني منها؟ إنتي شايفه عليها شي)
"صرخت أستاذه ملحه وهي معصبه وتناظر سحايب وميار اللي جالسات بآخر الفصل ومشغولات بالكتاب": قومي إنتي أعربي الجمله هاذي..
"قامت سحايب وهي تتنوفخ وميار على أعصابها تنتظر أجابة سحايب على سؤالها..... رن الجرس وأخذت الأستاذه كتابها وطلعت وقاموا الطالبات وأخذوا شناطهم عشان يطلعوا وماظل بالفصل إلا سحايب وميار وسميه"..
"سميه وهي شايله الشنطه": بتطلعون معي؟
"ميار وهي تمسك يد سحايب": لأ سومه بنجلس دقايق ونجي ok..
سميه: عندكم سوالف من وراي..
"سكتوا الثنتين واحترمت سميه سكوتهم وطلعت"..
"ألتفتت ميار على سحايب": ليه تحذريني من عذاري..؟
سحايب: مو لشي بس أنا أشوف أنها مو قاعده تتصرف مع الموضوع بالشكل اللي إنتي ودك فيه..
(سحايب كانت تتكلم وببالها سالفة وفــاء وخيانة صديقتها لها.. بس إنها ماجاء ببالها آبــدآ تربط بين تشابه الأسماء أو المواقف.. وكانت تحاول تنبه ميار وتفتح عيونها على أحتمال "تخونها عذاري" بس بطريقه غير مباشره لأنها تعرف عمق العلاقه بين<ميـار وعــذاري>)..
"ميار بخوف": سحايب أبقولك شي بس أمانه مايطلع هالسر لأحد ولا لأفراد الشله..بس أوعديني لأنه مايخصني..
سحايب: تم ولايهمك سرك محد راح يعرفه..
"ميار بتردد": عذاري على علاقه مع شاب يقرب لأهلها وهو طاير فيها وأكيد راح يخطبها قريب.. عشان كذا أحس عذاري دايم مشغوله عني ولاهي مهتمه فيني.. ساعات أحس أني ضعيفه ومسكينه لما أصارحها بحبي ليزيد مرات تتفاعل معي ومرات تنقد علي..
سحايب: وشلون تحسين إنها ناقده عليك؟
"ميار وهي تنطق بثقل": من نظراتها واسلوبها تحسسني إن حبي حب أطفال.. بس أنا أحترم عذاري ومستحيل أزعل أو أشيل بقلبي عليها لأني أحبها وأثق فيها...
سحايب: أنا قلبي كان حاسسني إن عذاري مو جديه معك وتسايرك وباين إنها من النوع اللي يطنش ومايهتم.. عشان كذا أقولك أي خطوه تقدمين عليها تصرفي بحريتك بدون ماترجعين لها ولا تعلمينها..
ميار: ماأقدر تعودت عليها..
"سحايب وهي تنصحها": خليك صاحيه وواعيه لنفسك لمتى بتظلين سلبيه كذا كل شي بحياتك عذاري.. إحنا كلنا قلوبنا معك وماراح نقصر وكل وحده تعرف بظروف الثانيه ونصارح بعض بكل شي بدون مانزعل ونتضايق ونتحسس من بعضنا.. صح..؟
ميار: معك حق.. أنا من زمان ودي أقولكم هذا الكلام بس متردده خفت إنكم تفهمون عذاري غلط..
سحايب: أنا عارفه وش قصدك إن عذاري طيبه وتحبك وصداقه عمر.. بس إنها مشغوله ومو مهتمه بقصتك مع يزيد خلاص لاتجيبين سيرته قدامها ok..
"ميار بأرتياح": ok صار..
وفي المســـاء كانت درر جالسه بالصاله تتفرج عالـTV دخلت أمها وهي لابسه عباتها..
أم سلطان: أنا أبي أروح لجيرانا ماأوصيك قبل ماأطلع تغسلين الحوش مع كانتــي..
"درر بتعجب وهي تأشر على نفسها": أنـــا أغسل الحوش..؟
أم سلطان: إيه إنتي..
درر: يمه من متى_هذي أول مره تطلبيني هذا الطلب ماعاد إلا ذي..
"أم سلطان وهي مستعجله": ماعليه يابنتي بس هالمره عشان خاطري..
"درر بملل": لأاااا يمه مالي خلق خليها تغسل بدون مساعده..
أم سلطان: الحوش كبير ماتقدر بروحها.. يابنتي قومي ساعديها أنا ماصدقت خبر متى تصير الدوانيه فاضيه عشان نغسل الحوش المغبر صارلنا أسبوع ماغسلناه..
"درر بشك": لايكون فيه بالدوانيه رجال؟
أم سلطان: لأ راحوا ماظل غير أخوك سلطان..
درر: يمه أكيد..؟
أم سلطان: إييييه يالله قومي ساعدي كانتي قبل صلاة العشاء..
"طلعت أم سلطان وقامت درر بكسل وهي معصبه ونادت كانتي لقتها تنتظر بالحوش"..
"درر وهي تناظر كانتي بقهر": تتكسر يدينك إذا غسلتي لحالك؟
كانتي: أنا كل يوم غسلي مع ماما مافيه غسل أنا بس..
"مسكت درر (اللي) وصارت تصب ماي وكانتي تمسح الأرض وبدأوا من أول الحوش وأنتهوا عند الدوانيه واللي بابها مسكر ولمباتها شغاله وصوت الــTV عالي ومافيه نعال قدام الباب"..
"درر بخاطرها وهي تصب ماي": كالعاده يطلع سلطان ويخلي كل شي شغال وراه.. بس أشم ريحة عطر حلللللوه ياااااه تجنن.. ياويلي من الشباب بس يطلعون من الدوانيه يتركون ريحة عطرهم اللي تذوب وتجنن البنات.......
"قطع تفكيرها كانتي وهي تأشر لها تصب ماي قدام باب الدوانيه.. سحبت درر اللي بقوه لكن بلل ثوب كانتي وقعدوا يضحكون الثنتين بصوت عالي"...
درر: سوري كانتي أنا مافيه يقصد وسخي ثوب خلاص..
"هزت كانتي راسها وكملت شغلها"..
"درر بخاطرها": يماااااه قلبي مايتحمل ريحة العطر..
"رمت (اللي) بالأرض وفتحت باب الدوانيه بهدوء تبي تدخل وترتبها كالعاده بس هالمره عشان تشبع من ريحة العطر..
رفعت راسها وطاحت عينها بعين الرجــــــال اللي كان لابس ثوب أبيض وكاب ومرتخي بجلسته عالأرض وقباله سلطان معطي ظهره للباب.. أرتبكت درر وبسرعه هربت داخل وطيرااااااااااااااااان لغرفتها وخلت باب الدوانيه مفتوح.. وكانتي أنخرعت وراحت سكرت الباب وراء درر وأنتبه لها سلطان ورجع كمل سواليفه..
جلست درر عالسرير وهي متوتره ووجهها يوزع الوان وتحس بحراره شديده.. وصارت تفرك وجهها بأيدينها من شدة الأحراج من الرجال والخوف من سلطان إنه بيجي الحين ويهزأها"...
"درر وهي تتحلطم": وااااااقردي والله مابيرحمني سلطان! الحين يحسبني متعمده وقاصده إني أدخل الدوانيه.. طيب أنا وش ذنبي أمي قالت لي إنها فاضيه ومافيها رجال.. عساه يصدقني سلطان لو قلت له كذا..
"سكتت درر ثواني وهي تتلفت بتوتر وتنتظر سلطان يجي ويعاقبها..
طلعت برا الغرفه وهي ميته خوف تبي تشوف سلطان داخل البيت وإلا لأ.. لقته واقف عند باب المدخل وعاقد حواجبه وحاط الجوال على أذنه وســـاكت... شهقت وأنحاشت لغرفتها وجلست تنتظره يجي ويخانقها..
"درر بضيق": الحين يخلص مكالمته ويجي يهزأني باين عليه معصب مرررره.. أكيد مايهان عليه إن صديقه يشوف أخته..بس والله ماكنت أقصد ومالي ذنب.. كله من أمي يعني ضروري أساعد الزفت كانتي..
"أنتظرت ربـــع ساعه وهي تدور وتتمشى بالغرفه وماجاء سلطان..!!!
نفذ صبرها وفتحت باب غرفتها وطلعت وهي تتلفت وتمشي على أطراف أصابعها وتروح للمطبخ لقت كانتي قاعده تغسل المواعين.. أشرت لها درر تجي وتلحقها للغرفه"..
"درر وهي تسكر الباب": سلطان ويـــن؟
كانتي: سلطان روه بيت هازا..
درر: عند جيرانــا؟
كانتي: أيوا..
درر: هذا رجال راااااح؟
كانتي: أيوا.. من زمان إنتي روهي داخل هازا رجال راه سياره بسرررررعه..
درر: سلطان مافيه قولي وين درر؟
كانتي: لأ مافيه..
درر: خلاص روحي مطبخ..
"طلعت كانتي وجلست درر عالسرير وهي تفكر": معناته ماأنتبه لي سلطان لو إنه إنتبه كان جاء وخانقني مستحيل يسكت.. وكانتي سكرت الباب وراي بسرعه أكيد يحسبها هي اللي فتحت الباب أكيد أكيد أكييييييييييد..
"أنسدحت درر عالسرير وهي تتنهد بأرتياح وتفكر بالعطر وبالرجال؟"..
^&^&^&^&^&^&^&^&^&^&^&^&^&^&^&^&
بعد ماصلت صلاة العشاء جلست مع ولدها الكبير واللي من يوم ملكته وحاله مايسر..
أم راشد: ياولدي خلاص منى صارت زوجتك ولازم تتقبلها.. لمتى بتظل كذا مقاطعها لاتسأل عنها ولاتكلمها حتى المهر للحين ماعطيتها ولاإنت راضي تخلينا نتدخل بأي شي يخص زواجك..
"ألتفت راشد على أمه وتكلم ببرود": ماتستاهل إني أكلف على عمري وأسأل عنها ومن زين أسلوبها عشان آخذ وأعطي معها بالتليفون.. ولسه بدري عالعرس عشان آعطيها المهر.. الله يخليك ويطول بعمرك أتركوا العرس كله علي إنتم بديتوا فيه وأنا اللي أبنتهي..
"أم راشد بترجي": ياولدي الله يرضى عليك لاتفشلني قدام خالك وتسوي مشاكل مع منى_أصبر عليها لبعد العرس وتفاهم معها براحتك..
راشد: ومن اللي يدور عالمشاكل أنا وإلا هي؟ بعدين المفروض خالي مايلومني على تصرفاتي لأنه أكيد عارف بتخلف بنته وأخلاقها الـــ ..... أستغفر الله العظيم...
"فتحت فمها أم راشد بتتكلم لكنها سكتت لما سمعت صوت سعود وهو يصرخ وسميه تصييييح ورنــا تنادي أمها وأبوها وراشد..
فــز راشد من مكانه وبسرعه راح يركض لغرفة سميه وأمه وراهـ..وكانت الصـــــــــــــــــــدمـــه!!!!!!!
كان سعود بقمة عصبيته ماسك سميه وملزقها عالجدار بقوه وطايح فيها ضرب على وجهها وشد بشعرها بطريقه عنيفه وكان ويصرخ ويسب ويشتم يقول كلام كبير وخطير,, ورنا بجنبه تمسكه تحاول تبعده عن سميه لأنه بيذبحها بالضرب وهو يرفس رنا برجوله ويشتمها بدون أدنى أحترام ....
راح له راشد وسحبه من بلوزته بالقوه ورماه عالأرض وهو يناظره بعصبيه": إنت وش فيك أنجنيت..؟ ليش تضرب سميه مستقوي على خواتك ياواطي..!!
"قام سعود بسرعه والشرر يتطاير من عيونه وهو يصرخ بوجه راشد": خلني أربي الحقييييره هذي اللي ماتربت عدل السافلـــه الــ.....
"سكته كف من راشد وهو يشده من بلوزته ويطلعه برا الغرفه": أنقلع برا ماحد سافل غيرك ياقليل الخاتمــه.. طلع رجولتك على الشباب مو على خواتك..
"قربت لهم أم راشد وهي تبكي وتحاول تهديهم": خلاص ياراشد أترك أخوك.. وأنت يا سعود روح يايمه روح وبعدين نتفاهم لما تهدى نفسيتك شوي..
"رجع سعود وحاول يتهجم على سميه لكن أمه وراشد أبعدوه عنها بسرعه وطلعوه برا الغرفه وسكروا الباب.. طاحت سميه عالأرض وضمت رجولها بإيديها الثنتين وهي تصيييييح وتدعي على سعود ورنا تمسح على رأسها وتسكت فيها"..
"سعود وصوته مبحوح من شدة الصراخ": أتركو.....نــي أبي أربيها أبي أفهمها إني رجال البيــ...........ــت أنا كلمتي اللي تمشـــي.........
"ضربه راشد كف ثاني وثالث ومسك جسمه وهزه بعنف وكأنها يحاول يرجعه للواقع ويخليه يستوعب اللي قاعد يسويه.. وأمه مازالت تبكي وتطلب منهم يهدون ويتعوذون من الشيطان"..
"سعود وهو يمسح إيده على جبهته ويناظر راشد بعيون دامعه": ماشي ياللي ينقال عنكم أهل تخاف على ولدكم مــــــاشي.. أنا تارك لكم البيت وروحوا دوروا علي بمراكز الشرطه مع المجرمين وإلا بمستشفيات الرياض مع المتوفين وإلا بالشارع مع الشحاذين.. تحملوا مسؤولية أهمالكم لي وأي شي يصير لي بسببكم..
"مشى لحد الباب وألتفت على التيلفون اللي عالطاوله مسكه بأيده الثنتين ورماه عالسيراميك بقوه رجع رفعه ورماه عالطوفه ولما طاح عالأرض شاته برجوله لحد ماوصله لآخر الصاله وراشد واقف وساكت يناظر فيه.... وطلع سعود وترك أمه مقهوره عليه.. حست أم راشد إن كلام سعود زي الخناجر اللي تطعن صدرها وقلب الأم مايتحمل أي سوء يمس عيالها ولو كان كلام .. توقعت إن سعود ممكن يضر نفسه لأنه تعبان ومعصب واللي عصبه زياده ضرب راشد له"...
"أم راشد وهي تتنفس ببطء": روح ياراشد ألحق أخوك لايصير له مكروه..
"راشد وهو يجلس بتعب": لاتخافين عليه يمه هو قال كذا عشان يزعلك تلاقينه راح للمقهى ويرجع الفجر..
"دخلت رنا وهي متوتره وتصيح": راشد قوم أخذ سميه للمستشفى لأنها عاجزه تتحرك وقاعده تشتكي من آلام بجسمها..
"قام راشد ودخل غرفة سميه مع أمه ورنا لقاها منسدحه على الأرض ورجولها عند راسها وشعرها حايس ووجهها مبلل بالدموع وتصيح صياح يقطع القلب.. قرب منها راشد ومسكها عشان يقومها وحس بعضامها ترجف ومهي قادره توقف على رجولها ورنا وأمها واقفين يساعدون راشد"..
"راشد بضيق": رنا جيبي عباية سميه وتعالي معي نوديها للمستشفى..
<§<§<§<§<§<§<§<§<§<§<§<§<§<§<§
يـــوم الأحـــد...
(1/4)
فـــي المدرســـه...
-: غريـبــــه ماجت سميه اليوم..؟
"ميار وهي تنقل المكتوب عالسبوره": ماأدري بس أكيد تعبانه وبكره راح تداوم لأن سميه ماتحب الغياب..
سحايب: وش علينا بعد الحصه هذي؟
"ميار وهي تضحك": ملحـــه ههههههههههههههههههههه
"سحايب بأستياء": يخرب بيت هالملحه ملحها زايد وترفع الضغط بجد مالي خلق لها..
"ميار وهي تسكر الدفتر وتلتفت على سحايب": وش ورانا نشبع ضحك على شكلها وشرحها لأنه بجد نكته..
سحايب: شكلك رايقه اليوم؟
ميار: وكل يوم أنشاءالله إلا إنتي وش فيك متضايقه..؟
"دخلت طالبه وهي فرحانه وتقول بصوت عااااالي"; بنــــــات ملحـــه غايبـــــــــه..
ميار: واااااو عندنا فراغ الحصه هذي يالله خلينا نسولف أفتكينا من ملحه..
"تنهدت سحايب وأرتخت بجلستها": آآآه ياميور أمس أنصدمت صار لي موقف ماتوقعته آبدآ ولافكرت مجرد تفكير إنه ممكن يصير..
"ميار بخوف": خير وش صارلك أحكي بسرعه..
"فتحت فمها سحايب تبي تتكلم وقاطعتها البنت اللي جالسه بجنبهم": بنات بالله معكم عــلك..؟
"ألتفت ميار عليها بملل وهي تطلع العلك من جيبها وعطتها رجعت البنت تسألهم بحماس": شفتوا البرايم حق ستار أكاديمي يوم الجمعه..؟
"سكتوا سحايب وميار وهزوا روسهم بــ لأ..."
-: شفتوا المشترك السعودي المزيون والا المشتركه المصريه نعوووومه وصوتها حلــو.. أتوقع إن هذولا الأثنين راح يتأهلوا للنهائي.. أنتم وش رأيكم؟
"ميار بنفاذ صبر": إحنا مانتابع البرنامج آبدآ..
-: معقوله_ بصراحه طافكم نص عمرك البرنامج في الموسم هذا روعـــه..
"سكتوا سحايب وميار وهم يتلفتون بتوتر.. قامت البنت وراحت لشله بنات جالسات قدام يحكون عن البرنامج بصوت عالي"..
ميار: أحكي ياسحايب وش اللي انصدمتي فيه أمس؟
سحايب: بنـــــــــــــــدر..!!!!
_________________________
"شهقت درر": يـحـبـــــــــك؟ شلون ومتى وكيف..؟
سحايب: ماأدري بس هذا اللي فهمته من كلام أخته وفاء أمس بالتليفون..
درر: طيب إنتي ليه متضايقه المفروض تفرحين لأن شاعر مشهور ومعروف معجب فيك..
سحايب: أنا متضايقه من أسلوبه لما أتصلت وهو اللي رد علي.. يآخذ ويعطي معي كأنه يعرفني من زمان وأنا بصراحه أستحي وماتعودت أتكلم مع رجال غريب..
ميريام: يمكن مو بندر اللي رد عليك أكيد أخوه أحمد..
سحايب: لأ هو بندر قالي;معك بندر..
راويه: وش المناسبه يعرفك بنفسه..؟
"سحايب بتردد": أنا سألته إنت أحمد..؟
"راويه بأنفعال": ياملقوفه ليه تسألينه الحين إنتي المتصله وإلا هو؟
"سحايب وهي تحاول تبرر لنفسها": قهرني أقول آلو يسكـت بعدين يقول هــلا.. ويرجع يسكت ويكلم اللي بجنبه ويضحك بعدين يقول"وهي تقلده"; نعم مين؟ قلت مافيه غيره أحمدوه الغثيث..
ميريام: وش قالك بعدين؟
سحايب: لما يسولف كأنه يقول شعـــر..
"أنفجروا البنات بالضحك وقالت ميار": ياعيني عالوصف بس حلوه ذي شعر ههههههههههههههههههههه
سحايب: قلت ممكن وفاء..
"وهي تقلده": عفوآ مين يبيها..؟ قلت له: صديقتها.. قال: مين.... سحــــايب....؟
لما نطق أسمي صرت أرجف كأن أحد صب علي مويه باااااارده وأنقهرت منه يعني مابي أقول أسمي ليه يحرجني كذا..
معيضه: أكيد شاف الرقم بالكاشف..
سحايب: قال لي"ورجعت تقلد صوته" شفت الرقم بالكاشف إلا شخبار عمتي وياسر وهاجر..؟ مارديت على سؤاله لأنه كــذاب كل يوم يشوف ياسر ويسأله عن أمي وهاجر بس واضح إنه بيطولها معي...
"قلت له بهدوووووء": ممكن وفـــاء..؟ قعد يضحك ونادى وفاء وعطاها السماعه وسمعته يقولها بهمس: لاتنسيـــن..؟
"درر بحماس": وش كلمتك وفاء عن بندر؟
"سحايب وهي سرحانه": قرأت لي قصيده بأسلوب يجنننننن كذبت أذاني بأن اللي تكلمني هي وفاء وتفاجأت من جرأتها لما قالت لي: هذي من بندر وأفهميهـــــــا..!!
"شهقت درر": قصيده؟ تكفين قوليها أبي أكتبها بدفتر الصراحه..
سحايب: دفتر الصراحه مع سميه بعدين أنا ماأمداني أحفظ بيت واحد لأني ماأحب الشعر ولاأهتم فيه..
"درر بقهر": طاح حظك ياغبيه تثقفي بالشعر لأنك راح تتزوجين شاعر..
سحايب: ياسلام زوجتني درر ياحبيبتي أنا ماحبيته لأني حسيته ثقيل طينه وماينبلع..
ميريام: ليه تقولين عنه كذا يمكن الرجال توب ويجنن بس إنتي فاهمته غلط..
"ميار وهي تتكلم بحماس": قلت لها بالفصل حاصلك واحد يحبك ويتعلق فيك أحسن من غيرك اللي قاطات أعمارهم على ناااااس مادروا عنهم ولاعطوهم وجه ولاأهتموا..
"معيضه وهي تكتم ضحكتها": قصدك إنتي ودرر؟
"راويه بأستهزاء": لأ وأزيدك من الشعر بيت الأخت(نانسي عجرم) طيحت على حب جديد من غسلت الحوش أمس؟
"درر وهي تضحك وتأشر بيدها": لأ لسه مانبض القلب بس فيه مشروع قريب بأذن الله ههههههههههههههههههههه..
"ألتفتت ميريام على درر": يادبه إنتي مو قلتي إنه شـيــن أسمر حيل ومايبان منه إلا عيونه واسنانه؟ لايكون طيحتي عليه بعد ماأستبعد منك شئ لو هندي يمشي بالشارع ويأشر لك قلتي; حبيتــــه!!!
درر: لأاااا لسه ماحبيته أنتم وش فيكم علي اليوم؟ مو بالأول ينبض هذا(وهي تأشر على قلبها)..
ميريام: تكفين درر ياإنك تحبين زي العالم والناس وإلا بلا هالتفكير بواحد ماتعرفينه ولا يعرفك..
معيضه: ميريام قصدها وقفي نبضات قلبك مؤقتآ.....
"تقاطعها درر وهي تصرخ": عشان آمــــوت؟ وش الحياة بدون حــــب..
"ميار بملل": خلونا من درر أبي أشوف وآخرتها مع الغبيه سحايب..؟
"ضربتها سحايب على راسها": وجععععع لاتغلطين إنتم تعرفون قناعاتي بمسألة الحب ولايمكن أتنازل عنها..
ميار: يامجنونه وش هالأحساس الجامد اللي عندك.. شخص يكتب فيك قصايد ويقولك; أحبــــك تقولين لي قناعات_ هذا بدل ماتبادلينه الحب وتعيشين أحلى عالم ومع مين؟ مع شــاعــر كل أحساسيه ومشاعره تصير ملك لك إنتي وبــــس!!
"ميريام ودرر بصوت واحد": عدل كلامك ياميار..
راويه: أنا ماأأيد كلام ميار لأننا بمجتمع يرفض مسألة الحب والخرابيط هذي..
معيضه: حرام العلاقات المتبادله بين الشاب والفتاه حرام..
"صرخت ميريام": طيروا إنتم الثنتين دايم معارضات ومايعجبكم شي.. خلاص أحتفظوا بآرائكم لنفسكم وماراح نآخذ فيها..
معيضه: بإطار المزح والضحك والأستهزاء إيــه بس الجديه لأ وأنا نصحتكم وبكيفكم..
راويه: وأنا بعد أقول كذا...
"سحايب وهي تتأفف بملل": أووووف بنات ترى إنتم ماخذين مقلب من بندر صدقوني تراه بالــTV غير الواقع بكثير.. هو صح حلو ومزيون وشعره يآخذ العقل وطريقته بألقاء القصايد روعه بس شخصيته عكس كذا تمامآ...
ميار: خليك متمسكه بقناعاتك ياسحايب لما يطير منك بندر ذيك الساعه راح تندمين وترمين قناعاتك وراء ظهرك..
ميريام: إذا هو صدق يحبك فكري فيه وبادليه الشعور ماراح تخسرين شئ..
درر: بس لاتعطينه على كيفه لحد ماتضمنين إنه راح يتقدم لك..
"سكتت سحايب وهي سرحانه وتفكر بكلامهم.. وكأنهم حركوا شوي من قناعاتها"..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك