رواية اطلالي ملت وقوفي -36
هاجر: وإذا كان جالس معهم أكيد إنه بيلعب على عيالي ويستهبل عليهم عادي وين المشكله بأتصاله..
"سحايب بشك": والمسجات؟؟ مالها إلا تفسير واحد إنها (لي أنا) صح؟
"هاجر وتحاول ترقع لبندر": ماعليك منه هذولا الشعراء كذا طبيعة شخصياتهم يحبون يكتبون قصايد ويآخذون رأي غيرهم هو متعود يرسل لي دايم..
"سحايب بقهر": هاجر لاتبررين له سوء تصرفه أنا سبق وقلت لك مستحيل أفكر فيه ليش ماوصلتي له رأيي فيه..؟
"هاجر بهدوء": ياسحايب ترى بندر إنسان طيب ونظيف وشريف وغير كذا شاريك ويبيك وقاعد يمهد لنفسه عشان يتقدم لك بس إنتي صديتي عنه ورفضتيه وهو قاعد يحاول يقنعك بطريقته..
"صرخت سحايب": إنتي اللي تقولين هذا الكلام ياهاجر ياقدوتي..؟ عاجبك أساليبه الغبيه بالتمهيد..؟
"هاجر وبنفس الهدوء": عمومآ بندر بطبيعة مجتمعه تربوا وتعودوا على إن الشخص يرتبط بشريكة حياته عن حب وقناعه وتكون من أختياره.. وبندر أخوي وواثقه إنه ماراح يضر سمعتك وراح يصونك ويحافظ عليك.. شوفي عيسى أخوي حب وحده من بنات خاله وظل سنتين يكلمها ويراسلها لماتقدم لها رسمي وتزوجها... وين المشكله في الموضوع وش اللي يضايقك؟؟؟؟
"سحايب خنقتها العبره وبخاطرها": المشكله إني أحب عيســـى ومو متقبله بندر بسـبـبـه ولأسباب ثانيه....؟
هاجر: ياسحايب أنا قبل ماأتزوج كنت مثلك بنظري أن الحب قبل الزواج خرابيط وكلام مسلسلات لكن بعد ماتزوجت وشفت علاقتي البارده والجافه مع زوجي ندمت لأني تزوجت بالطريقه هذي وإني ماعشت (الــحـب) لاقبل الزواج ولابعده.. وأنا ماأبيك تكررين غلطتي وتندمين مثل ماندمت..
"سحايب والدموع تلمع بعيونها": يعني وش أسوي؟
هاجر: فكري ببنــدر وتذكري إنه يحبك ومتعلق فيك لدرجه مايتصورها عقلك..
"سحايب بحيره": ماأقدر ياهاجر ماأقدر الله يخليك أفهميني..
هاجر: وش أفهم إذا إنتي رافضته بدون سبب مقنع وأنا ماأدري وش اللي يدور برأسك من أفكار..
"يقاطعها صوت جوالها وكان المتصل زوجها.. بعد ماسكرت سألتها سحايب": بتروحين..؟
هاجر: إيه بعد شوي يجي زوجي تكفين سحايب جهزي شنطتي والأكياس أحس جسمي متكسر من التعب..
"سحايب بتردد": أبشري بس أبي أقولك شي.. ترى فيه رسايل خاصه لي بجوالك لاتمسحينها..
هاجر: ماشي أساسآ جوالي ماأدري عنه دايم أقفله وأحطه بالدرج نادرآ ماأستخدمه..
"أم ياسر وهي داخله الغرفه": ياهاجر لاتنسين يوم الخميس عرس أخو أم عيسى .. ترا أتصلت من شوي تعزمنا وبتزعل إذا ماحضرنا..
سحايب: نحضر كلنا..؟
أم ياسر: إيه راح توصلنا كروت الدعوه بكره مع بندر..
سحايب: أنا ماأروح إلا ومعي كنوده..
هاجر: ياحبكم لبعض إنتي وكنوده خلاص تروح معك..
=====================================
يـــوم الخميـــس...
(2/13)
صباح حـــب وتفــاؤل.. صباح شـــوق وأمـــل.. صباح حلــم وذكريـــات.. صباح لزيــــــز على قلب ميار..!!!
كانت جالسه تقلب المسجات اللي بالجوال وجاها صوت أليســـا (كرمالـــــــــك).. أبتسمت ميار وهي تغني معها ورفعت صوت المسجل بقوه عند المقطع..
..[كرمــــــاااااااالك صرت بخبي الحب الساكن قلبـــي..
أعمل حاااااالـــي ولا على بااااالـــي مهتمه ومش مهتمه.. قدامك كون رفيقـــه.. أسأل عنك كل دقيقــــــه.. طمن بالـــي.. أنت قبالـــي........]..
"دخلت أم ميار الغرفه وبسرعه طفت ميار المسجل وهي تسمع أمها تقول": أخوك صلاح يبيك بالصاله..
"سلمت ميار على صلاح وجلست جنبه"..
صلاح: خلااااص يعني ثانويه عامه ماتقولين أسلم على أخوي أشوف وش أخباره..
ميار: آفـــا ياخوي إنت زعلان مني؟
صلاح: إنتي وش رأيك لما تكونين مقصره بحق أهلك هذا شي يزعل وإلا لأ..؟
ميار: ماعليه ياصلاح أنا جد مشغوله بدراستي وأحاول أجتهد عشان أتخرج اجيب نسبه وأرفع روسكم..
صلاح: ولو.. الدراسه ماتمنعك تنزلين تحت تجلسين مع أبوك وأخوانك إنتي بالعاده ماتقطعين فينا بس صارلك شهر ماتنزلين إلا كل 3و4أيام وتجلسين دقايق وترجعين للشقه.. حتى أبوي فاقدك كثير ويسأل عنك..
"أرتبكت ميار وجاء ببالها يزيد لإنه هو اللي أشغلها عن أهلها.. ردت ميار على أخوها صلاح وكانت تنطق بثقل": صدقني....... الدراسه...... أنا فعلآ مقصره بحقكم وبالذات.......أبوي!!!
صلاح: طيب ممكن تجهزي نفسك لأننا راح نطلع للبر بعد شوي ولازم تجين معنا.. اليوم الجو حلو وماينطوف..
"ميار بضيق": ماعليه صلاح خلها بيوم ثاني أنا مو جاي على بالي أطلع_حاسه نفسي تعبانه شوي..
صلاح: إذا شفتي الجو الحلو بالبر ولعبتي بالدباب راح يروح التعب وتستانسين..
"أم ميار": قومي ياميار أطلعي مع أخوانك..ترى صارلك شهر حابسه نفسك بالشقه وذابحه عمرك بالدراسه.. روحي غيري جو شوي..
صلاح: هاه وش قررتي تروحين وإلا لأ؟
ميار: ..........
"صلاح وهو قايم": على راحتك ماراح أضغط عليك.. يالله أنا ماشي..
"ميار بتردد": لحظه يزيد..!!
"ألتفت صلاح بتعجب": نعم..؟
"ميار بتوتر": أقصد الجو لزيز مايتفوت على قولتك.. ماعليه لساني خربط بالنطق لأني محتاره أروح أو لأ..
"صلاح وهو يضحك": طيب قومي جهزي نفسك أنا أنتظرك تحت..
ميار: ok أنا جايه معكم بس أبدل ملابسي وأنزل..
صلاح: بس لاتتأخرين..
وفـــي البــــــر...
كانت درر تتمشى مع بنت عمها لطيفه حول المخيم وأخذتهم السوالف والذكريات عن كشتتهم الأخيره اللي قبل عيد الأضحى..
"درر وهي تتنهد": آآآآآه يازينك ويازين أيامك ياعلي..
لطيفه: إنتي للحين تذكرين أيامه وين حبك الجديد نواف..؟
درر: لسه باقي بقلبي بس البر يذكرني بعلي..
"سكتت ثواني وكملت" لو تشوفي نـــواف ياطفطف يآخذ العقل ماتصورته بهالجمال..
لطيفه: ماسمعتي أهلك وش قالوا عنه.. ترى إنتي ماتعرفين شي عن نواف إلا سيارته الــBMW وملايين أهله..
درر: أقولك أنسدت أذاني من سمعت أسمه ولا أنتبهت لتعليقاتهم آبدآ..
لطيفه: ولا سألتي راكان؟
درر: لأ خفت يفتن علي وإلا يزل لسانه قدام أحد إذا سألت عنه..
لطيفه: طاح حظك على رأسك بطحه؟ هذا راكان يلعب بدبابه أشري له يجي وأنا راح أسأله..
درر: صدق طفطف؟
لطيفه: إيه راح أسأل عنه بطريقه غير مباشره..
درر: فكره.. إنتي بس أسأليه عن دباب أخو نواف اللي بعشرين ألف وهو يجيب لك الأولي والتالي عنهم..
"أشرت درر لراكان من بعيد وقرب لهم ووقف معهم"..
لطيفه: ياحركاااااااات وش الدباب الحلو ياراكان..
"راكان وهو يتلفت حوله بتعجب": نعـــم؟ تقصدين دبابي؟
لطيفه: شفيك أنا أقصد دبابك والله إن اللي يشوفه يعطيه سعر 20ألف 30ألف..
راكان: قصدك عشرين ريال.. تستهبلين علي..؟
لطيفه: اقول ياراكان أنزل أبيك بكلمة رأس على جنب تعال نجلس هنا..
"طفا راكان الدباب وجلس بجنب لطيفه ودرر بسرعه راحت للدباب وركبته وتحاول تشغله"..
لطيفه: أبسألك جيرانا هذولا جايين اليوم وإلا لأ؟
"راكان بملل": موجودين بمخيمهم من الصباح..
لطيفه: ليش متملل وطفشان؟ أكيد قهرك أخو نواف بدبابه..
"راكان بقهر": صار له ساعه يدور حول مخيمنا ويستعرض فيه..
لطيفه: كم عمره الولد هذا؟
راكان: بعمري..
لطيفه: ماشاءالله يعني رجال حسبته صغير بالعمر..
راكان: يهبى تراه بزر مو رجال..
لطيفه: عنده أخوان وإلا هو وحيد أهله..؟
راكان: إلا أخوانه كثار (نــ ........)
"قاطع نفسه وألتفت على درر لقاها تتشهد وتستغفر بتوتر لأنها راكبه الدباب وتستعد تلعب فيه"..
"قام راكان وصرخ بإنفعال": إيييييـه تشهـدي تشهـدي الشبــك قدامك؟؟؟؟؟
"قامت درر وهي تضحك وهربت لــ لطيفه.. ولطيفه معصبه عليها": ماتبتي من الدباب عقب موقفك هذاك.. خربتي علينا كان يبي يعدد أسماء أخوان نواف وعصب عليك وماكمل سالفته..
درر: وجهه بارد مايعطي الواحد فرصه يتكلم معه..
لطيفه: وش الحل؟
درر: مافيه غير أمي أمشي نسألها..
لطيفه: يمكن ماتعرف عنهم شي..
درر: عاد أنا ودي أخذ معلومات عن نواف بس..
لطيفه: وأنا بعد بس الظاهر مافيه غير الحل هذا..
درر: خلاص أجل مشينا لأمي نلقط كم معلومه تنفعنا..
______________
"درر ولطيفه بصوت واحد": مانعرف عنهم إلا غنمهم..
"ضحكت أم سلطان": أي غنم هذاك أول.. أبوهم كان يرعى الغنم وهذا الكلام قبل خمسه وعشرين سنه وكان فاتحة خير عليه الحين صار عنده بيوت وعقارات ومحلات أثاث ومحلات تموينات.. بس الحين ماعنده غنم..
"شهقت لطيفه": أووووف كل هذا طيب متى وكيف؟
أم سلطان: جاه الرزق من الله والحين هم يعيشون أحلى عيشه..
درر: نفسي أدخل الــفيلا حقتهم وإلا مخيمهم وأشوف كيف صاير من داخل..
أم سلطان: ولا مره زرتهم في بيتهم.. بس مخيمهم اللي صدق حلو كأنه بيت في البر..
لطيفه: وشلون صارت هذي بيت في بر؟
أم سلطان: يعني كل شي حلو بالمخيم_ الغرف الخشبيه والأثاث الجديد والمطبخ الواسع والكهرباء..
درر: لأ وععععع حلاوة البر بالتراب والأثاث القديم والمطبخ المحوس بمواعينه والكهرب أبو لمبه ولمبتين مو هم ياربي لك الحمد والشكر اللمبات تارسه المخيم حوله وداخله..
"لطيفه وهي كاتمه ضحكتها": تذكرين يادرر لما خرب الماطور حقهم وتوهقوا بعزيمتهم..
درر: يازينه ذاك اليوم كان فلـــه..
لطيفه: ليه إحنا مانعرفهم ولا نختلط فيهم مع إن مخيمهم بجنب مخيمنا وغير كذا يقربون لنا من بعييييييد..
أم سلطان: هم بطبيعتهم أنطوائيين ومايختلطون بأحد أن كان قريب أو بعيد..
"لطيفه وهي تهمس لدرر": أسألي أمك عن الشباب؟
"ألتفتت درر على أمها": يمه أبسألك كم عندهم بنات وشباب ترى أنا ماأعرف عن هالعائله أي شي..
أم سلطان: سبع بنات وخمس شباب..
درر: خمس شباب بس؟
لطيفه: أجل كم تبين عددهم؟
درر: على كثر فلوسهم المفروض يصير عندهم 10أو13 شاب!!
لطيفه: أقول بس أسكتي,,
"ألتفتت على أم سلطان"..طيب ياعمه الشباب متزوجين وإلا لسه صغار؟
أم سلطان: اللي أعرفه إن فيه 2 أو 3 متزوجين بس والله إني ناسيه كم بالضبط..
"توترت درر": وش أسمائهم؟
أم سلطان: نـــايف ونـــواف والثالث ماأعرف أسمه بس إنه قبل كم شهر تزوج..
"ألتفتت درر على لطيفه وهي مصدومه": متزوج!!!!!!!!
"أنفجرت لطيفه بالضحك وكملت أم سلطان بدون ماتركز بردة فعل الثنتين": نايف عنده بنتين وولد ونواف عنده ولد مسميه على أسم أبوه..
"قامت لطيفه وهي كاتمه ضحكتها وسحبت يد درر تقومها معها":
طاااااااح حظك يخرب بيتك على هالقلب مايشبع ويمل من الصدمات!!!
أم سلطان: وين بتروحون؟
لطيفه: نبي نتمشى..
أم سلطان: لاتروحون بعيد عن المخيم..
لطيفه: أبشري..
"درر بهمس وهي قايمه وزعلانه": هالمره متزوج ومنتهي مو يبـــي يتزوج..
"لطيفه وهي تضحك": غني موال عراقي على هالصدمه الحلوه ههههههههههههههههههههههه..
"درر وهي زعلانه": طفطف لاتعورين قلبي أنا بجد مصدومه شلون يطلع متزوج وأنا مالي خبر..؟ عاد لو تشوفين شكله ياطفطف باين مره صغير بالعمر يعني وجهه مو وجه واحد متزوج..
لطيفه: يعني المتزوج له وجه خاص يعرف فيه؟
"درر وهي متأبطه لطيفه": لأ أفهمي علي قصدي جماله ووسامته تصلح إنه يظل عزابي لأربع سنوات قدام..
لطيفه: الحين طلع متزوج وعنده ولد.. خلااااااص أنتهينا وش فايدة كلامك هذا وبعدين ترا هذولا بدو وشبابهم قراوه حيل وش لك فيهم؟ بس حسافه سياراتهم الكشخه..
"درر بضيق": طفطف أخاف أمي مضيعه بأسمائهم يمكن مو نواف اللي متزوج؟
"لطيفه بشك": والله يادرر مدري عن أمك ومعلوماتها.. لأنها تقول إنطوائيين وما يختلطون بأحد معناته أكيد ماتعرف أسماء الشباب بالضبط من هو المتزوج من العزابي..
"درر بتفاؤل": يعني فيه أحتمال يطلع نواف عزابي مو متزوج وأمي ملخبطه بينهم؟
لطيفه: ما أدري أتركيها للأيام.. أمشي نصعد الجبل...
~...~...~...~...~...~...~...~...~...~...~...~...~
-: أنا أنتهيت.. شرايك؟
كنوده: وااااااااااااو طالعه قمر بالمكياج والتسريحه والفستان شي خيالي.. بس مو كأن الكعب مطولك شوي..
"سحايب وهي توقف قدام المرايه": بالعكس كذا طولي حلو وشكلي توب!!!
"كنوده بصوت عالي": ياسلام عليك طالعه أطول مني؟
سحايب: وش ذنبي إذا إنتي قصيره خلاص ألبسي كعب عالي يعني دبل اللي راح تلبسينه وتصيرين مثل طولي..
كنوده: أجل هونت مابي أروح..
"سحايب وهي تحط إيدينها على خصرها": لا والله؟ تروحين غصب عنك_ الحين هونتي بعد مادفعتلك حق الميك آب والتسريحه وبعدما تمشكلتي مع العاملات بالمشغل سويتي لنا سالفه طويله عريضه.. يخرب بيتك تظلين فاضحتنا على طول..
"كنوده بقهر": عناد فيك هوووونت ومابي أروح معك للعرس.. وبعدين ياحبيبتي من اللي بدأ بالغلط في المشغل أنا وإلا الكوافيره..أقولها أبي تسريحة العروس اللي بفيديوا كليب (من قال) لنبيل شعيل راحت سوت لي تسريحه بايخه مثل وجهها..
"سحايب بإنفعال": طيب الكوافيره ماشافت تسريحة العروس بالفيديوكليب جعلك ماتعرسين قولي آمين..
الكوافيره أعطتك مجله كلها تسريحات عالموضه وأنتي تروحين وترجعين عالفيديوكليب طفشتيها..
"كنوده وهي توقف بجنب سحايب قدام المرايه": بس بالأخير طلع شكلي حلو صح؟ إلا بسألك الشاعر بندر يدخل مع خاله بزفة الرجال؟
سحايب: طبعآ أكيد هذا خاله..
"سكتت ثواني وكملت" أهم شي عيسى يدخل وأشوفه ومره وحده أشوف زوجته وبنته,, راح أقول لوفاء تعرفني عليها..
"كنوده وهي تدز سحايب": خبله وبتظلين طول عمرك خبله وما تفهمين.. ألحين مطنشه بندر اللي يحبك ومتحطم فيك وسافهته وتفكرين بأخوه؟؟؟ بعقلك وإلا تستهبلين؟!
"سحايب وهي تآخذ جوال هاجر وتطلع من الغرفه": تكفين كنوده لاتغثيني بطاري بندر خلاص قفلي عالموضوع..
كنوده: لأ رأح أفتحه من أشوفه عقابآ لك
أولآ; لأني آخر من يعلم ياخاينة الجيره والصداقه والمحبه
وثانيآ; أبي أعرف ليه ترفضين بندر لييييييه..
"رجعت سحايب وهي تصر على أسنانها": ترى ذبحتيني قلت لك خلاص إنسي..
"كنوده وهي تضرب التسريحه بيدها بقوه": والله ماأتركك ياسحايب لما أعرف ليييييه..؟؟؟؟؟
"دخلت هاجر وكانت لابسه ومتجهزه": وش فيكم أصواتكم عاليه لايكون تهاوشتوا؟
كنوده: لأ بس كنا نتناقش بموضوع خاص..
هاجر: الله كنوده وش هالأناقه طالعه غير شكل اليوم..
كنوده: تسلمين عيونك الحلوه..
هاجر: يالله جهزي عباتك لأن ياسر بيودينا بعد ربع ساعه بس راح يجيب ثوبه وشماغه من المغسله ويرجع..
"أبتسمت كنوده": ياويلـــــي ياسر راح يودينا يافرحة قلبي.. تصدقين أحب أشوف شكله لما يكون كاشخ ماودي أنزل عيني منه..
"ضحكت هاجر": ياسر كله حلا سواء كاشخ وإلا لأ..
كنوده: يوم الأثنين كان عندي موعد بالمستشفى ولما دخلت من عند البوابه شفت سكيرتي يشبه ياسر بغيت أروح وأسلم عليه ههههههههههههههههههه..
هاجر: إيه صدق أبسألك.. وش قصة الدكتوره اللي تخانقتي معها في المستشفى سمعتك بالمشغل تحكين السالفه لسحايب..؟
كنوده: هذي الدكتوره تخانقت معها قبل شهرين في المستشفى وصدفت إني ألتقيت فيها مره ثانيه في الكافتيريا وتعرفنا على بعض وما كنت أدري إن هي نفسها اللي تخانقت معها إلا بالأخير..
هاجر: وش سوت لما عرفت الدكتوره؟
كنوده: قعدت تبرر لي موقفها إن ليه كانت مستعجله بذاك اليوم وتلومني على تصرفي السيء وأسلوبي الغير حضاري(قالتها وهي تضحك) وأنا أعتذرت لها ووعدتها إن اللي صار مايتكرر.. وأتفقنا على إننا نلتقي بيوم ثاني..
هاجر: حشى صار مشهد من مسلسل موقفك هذا_طبعآ إنتي ما مسكتي بريك والضحك عندك متواصل..
"كنوده وهي تضحك": ياوييييييلي ياهاجر لو إنك شايفه ردة فعلها لما عرفت إني أنا اللي تخانقت معها نكتـــه!!!
"وهي تقلد الدكتوره" هادي إنتي يافااااالحه_لو ماكونت مستعجله مسحت فيكي البلااااااط! في حد يعصب ويضحك فنفس الوقت..؟
هاجر: هي حجازيه..؟
كنوده: إيه بس ياهاجر إنسانه محترمه وأخلاقها عاليه وخدومه وقلبها طيب بجد أحس إني معجبه فيها وكنت مستمتعه بالجلسه معها..
"أبتسمت هاجر": ياعيني عليك حبيتيها من أول هوشه صح؟
"ضحكت كنوده": وإنتي الصادقه بس هذا كله بجهه وسوالفها بجهه ثانيه يااااااااي تجنن لهجتها وأنا صرت أحكي مثلها أقلدها وأضحك على نفسي هههههههههههههه..
"وفي غرفة أم سحايب كانت جالسه سحايب تقرأ القصايد اللي كتبتها بجوال هاجر وتدور وحده مناسبه ترسلها لبندر.. وأرسلت له هذا المسج"..
?[العفــو أنـــا مقدر بحبك أبادلك..
بنفس الشعور اللي تبي دايم فوق..
وماودي إن قلت الصراحـــه أزعلك..
أو تتهــم قلبي بأنــه بلا ذوق..
تبي الحقيقه جـــد من دون أجاملك..
معاد لي قدرة على الحـــب والشـــوق..
أنت بديت وتوه الحب أشـــعلك..
وإلا أنــا,, ماعاد لي فيه مشفوق..
أرجوك لاتزعل وتجرح أنامــلك..
وتجفف اللي باقي لي من عـــروق..
منك العــذر ماأقدر ولا أقدر أعامــلك..
وأنــا نفس جرحي من الهم مخـنـووووق..
واللـــه لو أقدر (لأحـبـك وأبــادلك)..
نفس الشعور اللي تبي دايم فوق......]?
.....أفهمها (s)
__________________________
"ياسر وهو واقف بالصاله وينادي بصوت عالي": هاجر سحايب.. خلاص إنتم جاهزين؟
"دخلت سحايب غرفتها وأخذت عباتها": يالله كنوده أنتهيتي؟
"كنوده وهي تلبس عباتها": إيه أنا جاهزه أحس قلبي دقاته طبول!!!
"سحايب وهي تغمز بعينها": عشان ياســـر؟
"أبتسمت كنوده وهزت رأسها بنعم وهي تلبس البرقع"..
"سحايب بعفويه": حيرتينا معك أختاري مصعب وإلا ياسر؟ لاتلعبين على الحبلين..
"كنوده وهي تضرب سحايب بكوعها وتأشر على هاجر اللي واقفه وراها": قصدك الفنان مصعب صح..
"أشرت لسحايب بحركه بيدها يعني(أبذبحك)!!!"
"عضت سحايب شفايفها": يؤ يؤ يؤ والله ماأنتبهت لها..
"طلعوا البنات من الغرفه ووقفوا بالصاله مع ياسر وأمه.. وياسر لما شاف كنوده ما طلع برا ولا أهتم لوجودها وكنوده بقمة وناستها وهي تشوفه كاشخ ومتعطر"..
"ياسر بملل وهو يكلم هاجر": كم قرد من قرودك بيروح معك للعرس..؟
"ضحكوا سحايب وكنوده وتكلمت هاجر بقهر": لا تقول عن عيالي قرود ترى أزعل..
"أبتسم ياسر": طيب أبعدلها.. كم واحد من الحلوين بيروح معك..
هاجر: بس ديمه.. وليد ومهند راح يجلسون مع الخدامه بالبيت..
ياسر: يجلسون لحالهم لأ مايصلح خذيهم معك أحسن..
أم ياسر: ممنوع دخول الأطفال ماتقدر تآخذهم..
ياسر: وش معنى ديمه تروح على رأسها ريشه؟
هاجر: إلا ديومه عاد مستحيل أخليها عند الخدامه..
ياسر: خلاص أجل أنا راح أوصلكم للعرس وأرجع للبيت وآخذ وليد ومهند للمطعم والملاهي عشان خاطرك بس ياهاجر..
هاجر: يابعد عمري يا ياسر والله إنك حبيب..
سحايب: وأنا ياسر تكفى خذني معكم..
ياسر: آخذك عشان تخرعين الناس بالمطعم و بالملاهي.. على هالمكياج اللي إنتي حاطته كأنك (كاسـبــر)!!! اللي يشوفك يقول ماسكه علبة طحين وحايسه نفسك فيها..
"أنفجرت كنوده بالضحك بصوت عالي وصدت عن سحايب اللي تناظرها وهي معصبه": تضحكين هاه ماكأنك حاطه زي مكياجي..؟
كنوده: ههههههههههههههههههه
"هاجر وهي تضحك": عادي سحايب ترى ياسر يمزح معك؟ هههههههههههههههههه..
"ياسر وهو يقاوم الضحكه ويطلع من الصاله": أنا راح أسبقكم للسياره...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك