رواية اطلالي ملت وقوفي -41
سميه: دايم أقولك هذا الكلام بس إنتي ماتقتنعين ولاتغيرين تفكيرك..
"تنهدت سحايب وتكلمت بهدوء": ياسميه تفكيري (طبيعي ومعقول) لأي بنت بعمري.. إحنا مالنا خبره ودرايه بالحياة،، مالنا إلا الظاهر مع إن الخفايا أعظم.. حتى لو أي شخص يفهمنا ويميزلنا بين الصح والغلط مانقتنع لأن إحنا لنا نظره خاصه يحكمها تفكيرنا ولايغيرها أرآء الأشخاص من حولنا إلا بصعوووووبه..
درر: سحايب اليوم مو طبيعيه تكتب قصايد وتتفلسف..
راويه: بصراحه معها حق,, أنا عن نفسي كنت ماأقتنع بكلام أختي لجين صح تعجبني آرآءها لما تنصحني بس أعجز أغير تفكيري..
ولما رحت لأستاذه فاطمه أحس كلامها أثر فيني وفتحت عقلي على أشياء كثيره ومع القراءه المستمره في الكتب اللي تعطيني صرت واعيه أكثر وأكثر وتغير تفكيري بنسبة 50%..
معيضه: أنا أستغرب منكم لما تمدحون بإستاذه فاطمه لهالدرجه أثرت فيكم؟ أتوقع لو أروح لها وأجلس معها سنه كامله مستحيل تغير فيني شئ أنا مثل ماأنا وماأتصور نفسي بغير كذا..
راويه: أنا كنت أقول مثلك يامعيضه بس لما فكرت بنفسي أكتشفت إني لو أظل راويه نفسها بدون ماأتغير كان تدمرت شخصيتي والسبب سلبيتي في كل شئ..
درر: طيب علميني ياسحايب كيف تغيرت نظرتك لعيسى صار لك موقف معين على أساسه تغير تفكيرك؟
سحايب: لأ.. بس لأني واجهت نفسي وعرفت ليه أنا حبيت عيسى..
"نزلت رأسها وهي تلعب بأظافرها" كنت أشوف فيه الرجوله بكل ماتحملها الكلمه من معنى وكنت واثقه مليون بالميه إني مستحيل أقرب لحياته ولو بأي شكل من الأشكال,,
أما بندر أشوف إنه مراهق وماعنده وعي لتصرفاته.. يتصرف على إنه شاعر وسيم ومشهور وفوق الكل واللي يبيه يآخذه,, وأنا بصدودي عنه أعانده وأقهره وأثبت له إني مو سهله ومو بسرعه أتعلق وأركض ورى وهـــم...
وكنت أكـــابر عشان ماأضعف وأحبه وأتعلق فيه وبعدها يتركني أو أتركه ولايجمعنا النصيب.. وبنفس الوقت عندي قناعه إن الرجال مايحب البنت الخفيفه اللي بسرعه تستلسم وتسلم قلبها,, بإختــــــصـــار هذا هو تفكيري..
درر: معقوله سحايب إنتي تفكيرين بشكل غريب؟
سحايب: أنا عكسك إنتي وميار بطريقة التفكير لكن أشترك معكم بشغله وحده وهي (الخـــوف)!!! أنا فعلآ أخاف..
درر: بس إنتي سبق وقلتي بإن بندر كلم أهله بموضوع زواجه وأختارك إنتي .. أجل ليه الخوف إذا كان جاد بمشاعره ولايفكر مثل تفكيرك..
سحايب: فيه شئ إنتم ماتعرفونه عن بندر ولاسبق وجبت سيره قدامكم..
"سميه بفضول": وش هذا الشئ اللي مانعرفه..؟
درر: أكيد شئ كبير وعظيم بس لايكون فضيحه تخص حياته..؟
"سحايب وهي تحكي بهــــدوء": لما زرت أهل بندر لأول مره كنت واقفه مع أحمد بجهه وهاجر و وفاء بجهه ثانيه بالبيت.. قال أحمد قصيده لأخوه بندر واللي فهمته من القصيده إنها تتكلم عن (الفـــراق)..
أعجبني طريقة أحمد بالإلقاء ولما ختم القصيده قلت له هذا البيت:
{ياشين بعد اللي تحبه وتغليـــه..
خص إذا صار المفارق حبيبـــه..!}
وهذا مقطع من أغنيه........
"قاطعتها معيضه بشك": لايكون غنيتي له!!
سحايب: لأ من جدك إنتي أغني قدامه... المهم لما قلت له كذا قال أحمد: (بندر تعذب عقب فراق محبوبته)...
"شهقت درر وهي تضرب إيدها بصدرها": طلع يحب من قبل...؟! مين هي محبوبته..؟
سحايب: إذا بتقاطعوني ماراح أكمل...
سميه: لأ خلاص بنات أسكتوا وخلوها تكمل..
سحايب: أنا لما قال كذا أنصدمت وسألته: بندر مفـــارق؟
قال أحمد: كان يحب وحده (أجنـبـيــه) يعني مو من القبيله.. وكان يحبها بجنون ومن كثر حبه لها كتب فيها (دواوين) لكـــن.. راحت البنت وأخذت نصيبها وتركته من سنتين وبندر حاول يتناساها قد مايقدر ورجع كتب دواوين بــ(فراقها) .. وأنا أحب أردد القصيده هذي لأنها تعجبني...
سألته: هو لسه يحبها؟
قال أحمد: الحب الأول مستحيل ينمحي أثره ومو سهل ننـســــاه مهما تجاهلـنــاه.. بسسسسس باين على بندر إنه فتح صفحه جديده بحياته من فتره قصيره لأنه غير من أسلوب كتابته للشعر..
سميه: وش قالك بعد؟
سحايب: لما شافني متفاجأه وسرحانه أفكر قال: أتمنى يكون هذا الكلام بيني وبينك لأن ماأبغى وفاء تعرف إني خبرتك ولاأبي أي شخص يعرف بالقصه لإنها ممكن تضر سمعته عند جمهوره..
قلت له:ok هالموضوع يظل سر بداخلي وماراح أتكلم فيه...
درر: معقوله ياسحايب كاتمه هالقصه بنفسك من شهور ولا لمحتي مجرد تلميح!!
راويه: الظاهر إنك رفضتي بندر لهذا السبب بغض النظر عن كل الأسباب اللي دايم ترددينها..
سميه: لاتلومونهـــا.. سحايب من حقها ترفض شخص له سوابق عاطفيه ومترسخه بقلبه ومسيطره على مشاعره..
درر: بس هو فتح صفحه جديده بحياته ونسى كل اللي فــات..
سميه: وإذا طلعت الأجنبيه بحياته مره ثانيه وش ذنبها سحايب لو تركها ورجع لحبيبته.. ماسمعتي كلام أحمد عن (الحب الأول) بجد حاجه تقهر وسحايب معها حق بالرفض..
"ضحكت معيضه": سميه مره متأثره بالمسلسلات والأفلام ههههههههههههههههههههههههه..
راويه: سحايب ليه ساكته لاتعليـــق..
سحايب: رجع تفكيري لخمس شهور ورا وقصتي مع بندر مابين مد وجزر..
درر: وألحين وش قررتي؟ على وين رسى تفكيرك بموضوع بندر؟
سحايب: الموضوع منتهي من بدايته يعني لأنكم عرفتوا بالقصه توقعتوا إني أغير رأيي..؟ لأ بالعكس أنا ماحكيت إلا بعد ماتعبت من سيرته إنتم وكنوده وهاجر كلكم تضغطون علي..
"تنهدت ورجعت كملت": كان ممكن أبادله الشعور لو ماعرفت بقصته مع الأجنبيه بس القصه تركت فيني أثر كبير وثبتت قناعاتي بزياده.. الظاهر إن قلب بندر مع كل هبة ريح يحــــــب بس يظل حبه الأول هو الأجمل والأبقى بحياته والحمدلله إني صاحيه وفاهمه له..
"ألتفتوا البنات على ميار اللي كانت شايله شنطتها وتمشي جايه صوبهم وهي تعبانه"..
معيضه: ليه ماطلعتي للبيت؟
"ميار وهي ترمي شنطتها وتجلس": رفضت تطلعني فـــؤاد قهرتني صار لي ساعه أترجاها ورفضت تقول باقي نص ساعه وتفتح البوابه_أنا تعبانــــــه وماعاد أقدر أتحمل الآلام..
معيضه: تقهرني فؤاد لو تموت البنت قدامها مستحيل تخليها تطلع لبيتهم ترتاح..
سحايب: طيب حطي رأسك على رجولي عشان ماتتعبين زياده..
"حطت ميار رأسها على رجل سحايب وهي تتنفس بصعوبه من التعب"..
راويه: أخذتي حبه بندول من غرفة الأشراف؟
"ميار بهمس": لأ مالي نفس آكل شئ..
راويه: آروح أجيب لك حبه؟
ميار: لأ مابي..
معيضه: ماعليه ميور تحملي الآلام لما يفتح الباب وتروحين لبيتكم..
"سحايب وهي تمسح على رأس ميار": اليوم أربعاء خربيها ونامي لليوم الثاني وأرتاحي وريحي بالك..
"أبتسمت ميار بإنكسار": وأنا وش لي غير النوم بين أربع جدران،، لا تليفون ولا تلفزيون ولا أزور أحد ولا أحد يزورني..
"شهقت معيضه": حتى التلفزيون أخذوه منك؟
ميار: من أسبوع شغلت الــTV ولقيت كل المحطات ملغيه والأشاره ضعيفه الظاهر إنه خربان من الصحن فوق السطح.. وماعندي غير القناة السعوديه الأولى والثانيه بس..
سميه: حسبي الله ونعم الوكيل فيهم ليه يسووا فيك كذا..؟
ميار: ..........
درر: ياحبيبتي ياميور أصبري وتحملي يمكن كل اللي صارلك خيره من رب العالمين.. الله يختار لك أحسن من اللي إنتي تختارينه وغياب يزيد طول الفتره هذي يخليك تراجعين حساباتك،،
وصدقيني لو لك نصيب راح تتزوجينه وإذا مالك نصيب تأكدي إنك تستاهلين أحسن منه وهو الخسران وإنتي ماخسرتي شئ لأنه لو فعلآ يحبك ماغاب عنك بدون سبب وطنشك،،
وأحمدي ربك إن نيتـــه وضحت لك وطلع إنسان مستهر ومايستاهلك..
سحايب: خلاص درر مو وقته هذا الكلام ميور تعبانه ومو مركزه معك..
"درر وهي تآخذ دفتر الصراحه وتفتح على صفحه جديده": آسفه ميور بس هذا الكلام بخاطري وحبيت أقوله لك.. راح أكمل كلامي بهذي القصيده....
?[أدري أنخذلـتـــي وأظلمت فيك دنيتك ،،
يوم عرفتي من يحـبــك (يخونــك)..
خســــــارتـه!! لاتزعلـي مــو خسارتـك ،،
من ســوء حـظـه ماعرف كيف يصونـك..
أحـد عطاه اللــه حبيبــه في روعتـك ،،
وعيون تشبــه في حلاهــا عيونــك..؟
ويخونهـــا ويقســــــى عليها بذمـتــك!!!
ويفرط في (قـلــب) يحبــه بجنونــك..
لاتضعفـــي لحظــه وتحنين هامـتـك ،،
لجله حـــــرااااااام في يــوم تنزف طعونـك..
مثل النحل بكره بيرجـع لوردتـــك ،،
مهما نســـى وأبـعــد "مــرده لــ غصونــك"..
و(يكـــذب) إذا لقى في لطفـــك وطيبتـــك ،،
ويكـــذب إلى من قال؛ (يصـبــر بدونــك)
ولـو تعشقــه كل النساء اللي بدنيتـــك
مـاراح يجو (مـثــــلك) ولا يوصلونـــك...!!! ]?..
¥=¥=¥=¥=¥=¥=¥=¥=¥=¥=¥=¥=¥=¥
-: فكيتي الخطبـــه..؟ معقولــــــه..؟ وبالسرعه هذي يالجين..؟ طيب لـــيــــــــــــــــــــــــه..؟!!
"لجين وهي تدافع عبراتها": ماتفاهمنـــا ،، عبدالعزيز تغير مو نفسه اللي سمعت عنه قبل الخطبه ولا نفس اللي شفته بعد الخطبه.. صار إنسان ثاني صار شكاك ويسيء الظن فيني ولا يثق بأخلاقي وتربيتي..
راويه: بسبب وظيفتك؟
لجين: نعم وللأسف..
راويه: من أولها.. هذا وإنتي ما صار لك شهور مخطوبه ولسه ما صار الزواج عشان يراقب تصرفاتك وتحركاتك..
أصلآ هو من البداية عارف ظروف عملك بإنك مساعدة طبيب أسنان أجل ليه يتقدم لك إذا كان بيفكر بطريقه غلط بس أهداك لقب مطلقه وراح بحال سبيله...
لجين: أمه أتصلت على أمي وأعتذرت لها عن فسخ الخطوبه وقالت إن عبدالعزيز يبي بنت قريبه منه وما يبي يتعذب مع مشاكل وظيفتي وخصوصآ إني أشترطت بعقد الزواج الوظيفه!!
"سكتت ثواني وكملت كلامها والدموع تلمع بعيونها": على قد ماكان يحترم وظيفتي ويتفهم لطبيعته تراجع ورفضني بسببها..
راويه: وظيفتك مافيها عيب والعيب فيه هو.. إنتي تقدمين عمل إنساني وعباده مأجوره فيها قبل ماتكون وظيفه تآخذين فيها راتب وبس.. بالعكس تذكري بإن لك أجر بكل مريض تخففين عنه ألآمه..
لجين: الحمدلله إننا أفترقنا من أول الطريق ولا أرتبط بإنسان شكاك يحول حياتي لجحيم عقب الزواج..
راويه: خيره يابنت الحلال الله يرزقك بشخص يحبك ويقدرك ويحترمك أحسن من هذا اللي أسمه عبدالعزيز...
"لجين بضيق": بس الناس ماراح تفهم بإنه خيره.. راح يحطون العيب فيني أنا وخصوصآ وإني الحين صرت (مطلقـــه)!!!!
أنا أنظلمت ياراويه بس مو عارفه إذا كان بسبب شخصية عبدالعزيز وإلا بسبب وظيفتي...؟
راويه: أكيد بسبب شخصيته.. أنا عارفه إنك خايفه من كلام الناس لكن,, الشكوى لله هذي طبيعة كل بني آدم بمسألة الطلاق يحطون العيب كله في البنت حتى لو كانت مظلومه..!!!!
"صرخت لجين وعيونها تدمع": أقول لهم ما صار نصيب وأنتهينــــــا!! أذبــح عمري عشان رجـــال وإلا عشان زواج..؟ أغلب الناس عايشين عالــ (كره والحقد والشماته والغرور وقلوب سوداء ماتصفى) هذا اللي عندهم..
راويه: هدي أعصابك يالجين ولا تتضايقين.. مشكله وراح تعدي إنشاءالله والناس بيحكون بالموضوع أسبوع وأسبوعين بس بعدها ينسون صدقيني...
"لجين وهي تمسح دموعها وتنسدح عالسرير": الله كريم أنا تعبانه وأبي أنام..
"جلست راويه بجنبها": ماراح أخليك تنامين وإنتي زعلانه.. إنتي دايم تريحيني لما أكون متضايقه وماتخليني أنام إلا وأنا مبتسمه.. وراح أسوي معك نفس الشي..
لجين: ..........
"راويه بهدوء": الحيــاة مو موقفه عالزواج وبس يالجين بالعكس،، في أشياء كثيره تستحق إنك تعيشي عشانها وتنبسطي فيها،، أولها صحتـــك وأهـــلك وصديقاتـــك ووظيفتـــك..
ترا السعـــاده مو مرتبطه بالزواج أو بغيره,, (السعاده مرتبطه بالرضا الداخلي اللي نعيشه) وإنتي الحمدلله راضيه عن نفسك..
لجين: ...........
"راويه وهي تمسك يد لجين": تكفين إذا فيه شي بخاطرك قولي لاتكبتين مشاعرك أنا أدري زعلانه من اللي صار بس لو فكرتي بالسلبيات والأيجابيات وراء موضوع طلاقك راح تكتشفين بإن ربي يحبك ويبيلك الخير وأبعدك عن هذا الزواج لأنك تستاهلين اللي أحسن منه..
ولو صارت خطبه وزوبعه ومشاكل وطلاق هذا شئ طبيعي ويصير بأغلب الزواجات لكن حراااااام إنتي تعذبين نفسيتك تستسلمين للي صار..
لجين: ............
راويه: يالجين إنتي إنسانه عظيمه وقلبك صافي ومايعرف الحقد ولا بحياتك ضريتي شخص سواء قريب وإلا بعيد وفوق هذا كله مطيعه لربك وباره بأمك وأبوك...
لاتعتقدين إن طلاقك دليل على إنك فاشله ومالك حظ بهالحياة ولو تطلقتي مره ومرتين بالنهاية ماراح تكملين باقي حياتك إلا مع إنسان يحبك ويحترمك ويخاف عليك ويبين هذا الحب قدام عيالك حتى لو صاروا كبار وتزوجوا ..
بعد عشرين سنه من هذا اليوم إذا ربنا عطانا عمر راح تتذكرين جلستك هذي ودموعك وتفكيرك وقهرك من الطلاق و راح تناظرين بزوجك و تبتسمين وتضحكين وتقولين; آآآآه وش قد كنت غبيه لما فكرت بيومي وبس ومافكرت بمستقبلي بعقل وقلب متفائل..
وتقولين; صدق إن الله كريم ويرزق الإنسان خير على قد نيته وقلبه وأخلاصه..
إنتي بس أرفعي يدينك بعد كل صلاة وأدعي أن الله يعطيك على قد نيتك..
وأصبري ولو طال أنتظارك لتحقق أمنياتك وتذكري إن الله أنعم عليك بأشياء غيرك يتمناها وأولها راحة البال وحبك لنفسك والسمعه الطيبه بين الناس...
"قامت لجين وناظر راويه بتعجب": عفوآ مين يتكلم راويه وإلا خيالها..؟ إنتي تقولين هذا الكلام؟ مستحيل ماأصدق سمعي..؟
"راويه بحماس": يعني خلااااااص نسيتي موضوعك عبدالعزيز.. راح تنامين وإنتي مرتاحه؟
"أبتسمت لجين": راويه إنتي متغيـــره!! وين التشاؤم وين الدعاوي وين عصبيتك..!! توقعتك تزيدين علي الهم وتجلسين تبكين معي وتنقهرين و....... لأ لأ مو معقوله راويه وش صاير لك..؟
راويه: الأول تحول وتعلمت من الإستاذه فاطمه إن (الإنسان الضعيــــف هو اللي مايقدر يرفع من قيمة نفســه) وأنا مليت من نفسي مليت من الركود والهدوء مليت من البرود واللامبالاه مليت من العصبيه والتفكير السلبي.. صارت عندي رغبه كبيره بإن أفهم الحياة وأتعرف عليها أكثر وأكثر ولو ماتغيرت شخصيتي يكفيني شرف المغامره والمخاطره بإكتشاف أسرار الحياة بوجهها الحلو والشين..
%°°%°°%°°%°°%°°%°°%°°%°°%°°%°°%°°
كانت سحايب جالسه ترتب غرفة ياسر وتنظفها وفاجأتها كنوده وهي تدخل الغرفه..
كنوده: سحايب إنتي هنا؟
سحايب: لأ هناك.. وش هالمفاجأه الحلوه ليه ماعطيتيني خبر قبل ماتجين..
"كنوده بشك": ليه أعطيك خبر؟ أنا تعودت أزورك بأي وقت وش المشكله..؟
"سحايب وهي تجمع ملابس ياسر المرميه عالأرض": ولاشي بس عالأقل أكون منتهيه من ترتيب الغرفه قبل ماتجين بوقت عشان نجلس وننبسط مع بعض..
"كنوده بإستياء وهي ترمي عباتها وتجلس عالسرير": يالطيييييف مره مسويه رسميات إنتي ووجهك هذا بدل ماتقولين جيتي بوقتك وتعالي ساعديني بترتيب غرفة ياسر.. اللي يسمعك يقول صارلنا 20يوم جيران مو 20سنه..
"أبتسمت سحايب": الله لايغير علينا ولا يفرقنا بيننا إلا الزواج!!!
"كنوده وهي تغمز بعينها": أشوفك تطرين الزواج وش جاب سيرة الحين,, أكيد تقدم لك آدمي وأنا مالي خبر..
سحايب: وش آدمي إنتي هذبي ألفاظك شوي.. وبعدين لو متقدم لي أحد إنتي أول من يعرف..
كنوده: بس إذا تقدم لك بنـــدر لاتخبريني لأني راح أصيييييح من القهر وأحسدك لأن حظك راح يضرب وأنا حظي طايح..
"سحايب بإستياء وهي تفتح الكبت": ترا أزعجتوني ببنــدر إنت وشلتي بالمدرسه.. الله يخليك قفلي عالموضوع وإلا أرجعي لبيتكم أحسن..
"كنوده بإنفعال": خيييييييير وتقولينها بوجهي بعد (أرجعي) ماجيت عشان أرجع بمزاجك تفهمين.. المشكله إني ماأعرف أزعل وإلا كان لبست عباتي وأخذت شنطتي ورجعت للبيت..
"ألتفتت عليها سحايب وهي مبتسمه": أحلى شي فيك إنك ماتعرفين الزعل..
كنوده: لأن طيبتـــي أكبر همومي آآآهـ ياهمي متى تنساني..
"جلست جنبها سحايب وهي تفتح الشنطه": وش حاطه فيها..
كنوده: مافيه شي جديد..
سحايب: حتى شنطتك غريبه زي شخصيتك.. بذمتـــــــــك هذا الكاكاو كم صارله بجيب الشنطه وإلا البسكوت صار مطحون من الزحمه وقرطاس علك غندور .. من غير الأبر والمسحات حقت (الأنسولين) وقلم الرصاص وقلم أزرق وأوراق صغيره <الظاهر إنك ترقمين بالمستشفى> من وراي هاه..
"أنفجرت كنوده بالضحك": أحط رقم تليفونا الثابت وأكتب تحت نيرميـــــن..!!!. ههههههههههههههههههههههههه
"سحايب بذهول": مين نيرمين..؟
كنوده: أنـــا أجل وش أكتب كنوده!!!
"سحايب ورجعت تفتش بالشنطه": دفتر أبو 20ورقه وساعه واقفه بطاريتها وعلبة عدسات وعطر وولاعه الزقاير أبفهم هذي وش لزومها عندك!! الظاهر إنك تدخنين من ورانا_ترا ماأستبعد منك المهموم كل شي شين يطري عليه..
"كنوده وهي تضحك": أدخن عادي بس ماعندي حق الزقاير بوكي فاااااااضي ههههههههههههههههههههههههه..
"سحايب وهي تتصفح الدفتر": أول مره أشوفه معك_من وين طلع وإيش كاتبه فيه..
كنوده: اليوم كنت أرتب الكبت حقي ولقيته بالدرج مع الحوسه وحطيته بالشنطه_كاتبه أبيات من قصايد وأحداث ويوميات مهمه..
"وقفت سحايب عند صفحه وكانت كنوده راسمه بالقلم الرصاص عــيـن وبوسطها دموع متحجره فيها وكاتبه تحتها":
[صحيح أكـــابر لو الأحــزان فالي
وأتظاهر الشبعـــه!! وأنا ميت جــووووووع]..
"وبالصفحه المقابله كاتبه":
[ياما تمنيت السـعــاده في دنيــاي
وشفت السعاده تبتعد مـآآآآآتبينـــي]..
سحايب: تدرين وش تفسير رسم العين بعلم النفس؟
"كنوده بفضول": وش تفسيره..؟
سحايب: معناته إن فيه موضوع شاغل بالك ومحتاره فيه..
كنوده: متأكده من المعنى؟
سحايب: حسب ماقرأت بمجلة من المجلات إن رسم الشخص للعين هو حيرته وتفكيره بموضـــوع يخص حياته...
"سكتت ثواني وسألت كنوده": إنتي محتاره بموضوعك مع مصعب صح..؟
"تنهدت كنوده بضيق وهي تناظر بالأرض": آآآهـ تصدقيني لو قلت لك مليـــت منه!!!!
سحايب: أنا حاسه فيك وعارفه إنك مو مقتنعه باللي تسوينه بس أكيد ظروفك هي اللي حدتك وشجعتك تستمرين بالعلاقه..
"كنوده وهي تنطق بثقل": أمس كلمتـــه..
سحايب: وأكيد غرقك بكلام الحب والشوق..
كنوده: ماعطيته فرصه..
"تفاجأت سحايب": ليـــه؟!!!
كنوده: لأنه مصر على إن مستحيل نجتمع أنا وهو ببيت واحد يعني الزبده <يتزوجـنــي>.. من بعد السلام سألته وحلفته بالله إذا هو يفكر ينهي العلاقه بشي حلو ويرضيني..
صار يبرر ويلف ويدور لكـــن أنا رجعت وسألته; نعم وإلا لأ.. وبعدما أصريت وعاندت إلا أسمع رأيه قال بكل برود(لأ).. تصوري ياسحايب كأنه يقول إنتي وحده تافهه وماأتشرف فيك..
سحايب أنا مو بس أنقهرت جلست أصيح وأطلبه وأترجاه يغير رأيه يقول غيرها لأني أنصدمــــــت.. بعدها صار يبرر ويدعي لي بالخير ويمدح بشخصيتي وطيبة قلبي..
"سكتت كنوده وهي تدافع عبراتها وتحاول تمنع دموعها"..
سحايب: هذي قناعته فيك من البداية إنك ماتصلحين له.. ليه تنصدمين..؟
كنوده: يعني صارله أربع سنين يستخف بعقلي؟
سحايب: مايستخف بعقلك إنتي مو غبيه لهالدرجه بس هو عجز يفهمك_ وإنتي تفكرين بقلبك مو بعقلك وهو عارف نهاية العلاقه بس إنتي تتجاهلينها ماتجهلينها..
"أنسدحــت كنوده على سرير ياسر وصارت تصيح وسحايب جالسه بجنبها وساكته تنتظرها لما تهدأ وترتاح"..
"سحايب وبعد لحظة صمت": خلاص كنوده ترا مايستاهل دموعك..
"كنوده وهي تحضن المخده":أربع سنين مو قليله لاتلومينـــي..
سحايب: تلاقينه حاسبها أربع أيام مو أربع سنين ولاأهتم فيك أصلآ..
"أخذت كنوده نفس عميق وتكلمت بهدوء وهي سرحانه": بأربع سنين عطيته أشياء كثيره ورد لي نفس العطا.. لما كنت أكلمه كان عمري 15سنه يعني صغيره وكنت آخذ وأعطي معاه بالتليفون على أساس إنه الرجـــال الشهم والطيب والحنون اللي يساعدنا ويسأل عنا بغياب أبوي بحكم وظيفته بالجمعيـــه..
ولاتوقعت في يوم من الأيام إني راح أتعلق فيه وأحبه بس ماأنــــــلام!! أنا لولاه ماكانت عندي ثقه بنفسي وماكنت بالقوه هذي ولاكنت أضحك وأفرح وأنبسط وأرمي كل شي وراي..
كان يشجعني يرفع من معنوياتي (إنتي ذكيه,, إنتي لماحه,, إنتي قويه......) كان دايم يردد هذي الكلمات ويقنعني فيها,,
وكان يسمعني!! لما أشكي له يسمعني بدون ملل_صار كأنه دكتوري النفسي اللي أرتاح وينشرح صدري لما أفضفض له وأنفض مشاكلي وهمومي..
وبالمقابل كنت أنا أسمعه لما يتضايق يتصل ويقول كل اللي بخاطره وأنا أساعده وأهون عليه ومايقفل إلا وهو مرتاح ومبسوط..
أنا ومصعب نختلف في كل شئ ولا نتشابه إلا بشئ واحد..
سحايب: لاتقولين بالهمـــوم أعتقد إن ماعنده هم يشيله على أكتافه..
كنوده: لأ.. إحنا نشترك بـــ(إختلاف الحاجه)..
أنا محتاجه له كشخص حنون يهتم فيني ويراعيني ويخاف علي ومايقصر معي بشئ.. مصعب حتى المصروف يعطيني وإنتي تعرفين إن هو اللي يصرف علي وأمي ماتعطيني ولا فلس وفواز يعتقد إني جالسه بطاله بالبيت وماأحتاج مصروف آبدآ..!! ليـــه أنا مو بنت مالي أحتياجات وطلبات؟
"سحايب وهي مكتفه إيدينها": وهو وش محتاجك فيه؟
كنوده: هو محتاجني كأمرأه تتفهم مشاعره وتصبحه وتمسيه على كلام حلو وعسل لإن زوجته بخيلـــه في كل شي وأكبر دليل علاقتنا...
سحايب: وحاجته توفرت له بدونك وإلا لسه؟
"أبتسمت كنوده بإستهزاء": إذا ماتوفرت له راح يدور عليها عند غيري.. هو بالنهاية ماله غير زوجته وعياله وأخوانه وخواته ومجتمعه كل هذولا مايقدر يستغني عنهم يحبهم ويداري خاطرهم أما أنا مالي مكان بينهم ..لـــي اللـــه،،
سحايب: خلاص كنوده إنسي مصعب وأفتحي صفحه جديده بحياتك..
"قامت كنوده وتربعت عالسرير وهي تمسح دموعها": عايش على كـــف الـقــدر ولاأدري عن المكتوب ,, راح أفتح صفحه جديده وأشوف حظي فيها وأنا واثقه إنها مو أحسن من الصفحه اللي قبلها..
سحايب: أنصحك ياكنوده تشوفين طريقك ومصلحتك- ترا مصعب إنسان وقح وقليل إنسانيه وهو مستانس بــ(اللحيه والثوب القصير) اللي مخلي له هيبه قدام الناس وأولهم أهلك اللي مخدوعين برجولته و شهامته ومايدرون إنه مستغل
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك