رواية اطلالي ملت وقوفي -43
[(الــــــجــــــ الـسـابـع عـشــر ــــــــــــــــزء)]...
يــــوم الأربعـــــــاء...
(6/8)
<آخــــر يــــوم من أختبارات الثانويــه العامــه>...
?[يـابعد هالـنــاس أنا من قلـبـي أغليتكـــم
حبكــم جرى بالعروق وعاش بأعماقــي..
أي والله أغليتكم صـــدق وكم تمنيتكـــم
تجلسون قبالــي إذا خاطري ضــاقــي..
بجيكم كلي غــلا وإن كان ماجيتكـــم
أبنتظـر جيتكم لي وأكشف لكم أوراقــي..
أنا على موعدكــم وياما تحريتكـــم
ياللي بلقياكــم يـفــرح قلـبـي الشافـــي..
لو تطلبون الروح قلت تفدااااااكــم وأعطيتكـــم
مادام قلـبـي معاكم لاتطــرون الـفــرااااااااقي]?....
درر: ختامها مسك مع معيضه..
"ضحكت معيضه وهي ماسكه دفتر الصراحه": أمس بعدما خلصت مذاكره جلست أدور قصيده عشان أكتبها بدفتر الصراحه ولقيت هذي القصيده من أوراق ذكرياتنا أيام المتوسط..
سحايب: آآآه يازينها ذيك الأيام _ تتذكرون كيف بداية تعرفنا على بعض..؟
"ضحكوا الشله مع بعض لأن كل وحده تذكرت موقف يضحك"..
درر: أحلى سنه درسناها هي أولى متوسط لأن أغلبنا في فصل واحد.. فصلنا كان كبييير وأنا ومعيضه بجهه وسحايب وميريام وسميه بجهه ثانيه ..
سحايب: بس ماتقبلنا بعض إلا بالمووووت..
"درر وهي كاتمه ضحكتها": أول ماتعرفت على معيضه كنت أكرههـــا.. كنت آخاف منها لأن كلما دخلت فصلنا أبله كانت معيضه تدعي عليها من قلب وتتحلطم وتعقد حواجبها ولما تطلع الكتاب من الشنطه تحطه عالطاوله بقوووووه شوي وتكسر الطاوله من عصبيتها..
معيضه: وأنا بعد كنت ماأحـبـك وأنقهرت لما جلستي بجنبي حقدت عليك بدون سبب.. بس مع الأيام تقبلتك وصرنا نسولف ونضحك عادي..
سحايب: أنتم حبيتوا بعض بسرعه لكن أنا ظلت ميريام واقفه بحلقي سنه كامله عجزت أبلعها ههههههههههههه..
"ميريام وتسوي نفسها زعلانه": حرام عليك والله إني عسل..
سحايب: كنتي شعله من البرود والتطنيش.. طفشتيني بــ(حـــايل) من جلست جنبك وإنتي ماعندك سالفه غير عمك يوسف وزهره!!!!
"ألتفت على البنات وكملت" والمشكله إنها ماتحس بعمرها إن سوالفها غثيثه وبايخه كانت تتكلم وأنا أتلفت وأسولف مع اللي جنبي وأرجع أسولف معها ألاقيها مستمره بالحكي بدون توقف..
"أبتسمت ميريام": معقوله أنا كنت كذا ومو حاسه بعمري..؟
سحايب: كنتي كذا بس بعدين تغيرتي كثير وصرتي شعله من الأهتمام والتركيز والجلسه معك ماتملل زي أول..
ميريام: غصب عنك تحبيني.. قهر.. ماأتذكر كيف كانت شخصيتك وإلا كان طلعت فضايحك..
سحايب: ههههههههههههههههه الحمدلله إنك تنسين بسرعه..
درر: مريومه أيام أولى متوسط عكس أولى ثانوي تمامآ.. كانت ماخذه السنه عرض وطول بلعب وهستره ورقص وغناوي مو فالحه إلا بحصص مواد العلمي ومو أهتمام منها إلا من شدة ذكائها وكانت ماتطيق مواد الأدبي خصوصآ (الجغرافيا والتاريخ)..
سميه: أتذكركم مزعجااااااات وكنت أتمنى أغير فصلي بسببكم.. درر 24ساعه تسولف مع اللي بجنبها.. وميريام تسوي مقالب بالأستاذات والطالبات ودايم مشغوله تكتب كلمات الأغاني اللي تحبها بالدفتر وبوقت الحصه وأثناء شرح الدرس بعد.. وأنا كنت أتضايق لأن ماودي تضيع السنه عليهم و أبيهم يجتهدون بدراستهم..
"درر وهي تضحك": كنتي جديه بزياده ياسميه وكل همك دراستك وبس مع إنك بوقت الفسحه والطلعه تسولفين معنا إيزي بس داخل الفصل ماكأنك تعرفينا حتى البنات في الفصل كانوا يطلعون علينا أشاعات بإن بيننا خلافات وزعل...
"سميه وهي تناظر سحايب": كان بخاطري أصير بفصل سحايب بذيك السنه عشان أهرب منكم ولسبب ثاني بعد تعرفه سحايب..
"ضحكت سحايب": أدري فيك تقصدين ميار صح؟
كنتي تغـــارين من أهتمامي بمـيــار..!! لدرجه إني ماكانت أجلس معكم كثير ودايم أترككم وأروح أجلس مع ميار..
سميه: ههههههههههههههههههه لاتلوموني ماكنت أتحمل نعومتها ومياعتها وأحسها تتصنع وسحايب مخدوعه فيها.. ومو بس أنا كنت أتضايق منها حتى درر ومعيضه أما راويه وميريام كانوا يعاملونها عادي..
"ألتفتت سحايب على ميار وهي مبتسمه": بس المايعـــه مـيــار كانت شي ثاااااااني مايعـــه بدون عقل.. تحب القصايد والأغاني الرومانسيه ونبرة صوتها كله رقه ونعومه وماتعرف تعصب ولاتحب تختلط بالطالبات زياده..
راويه: تذكرون أول مره جلست معنا ميار قبل تدخل عضو جديد في الشله "سكتت ثواني وهي تقاوم الضحكه" كانت ميار تسولف معنا بهدوء وتعرفنا بنفسها ومعيضه عاقده حواجبها وتخزها وكأنها تحتقرها.. ميار تضايقت من نظراتها وقامت بسرعه وشوي وتصيييييح هههههههههههههههههههههههه..
"ضحكوا البنات وتفاجأت معيضه وهي تأشر على نفسها وتضحك": أنا كنت أناظرها كذا؟ لأ مستحيييييل..
"ميار وهي تأشر على معيضه ودرر": أنا للحين أتذكركم إنتم الثنتين كنتم ماتحبوني.. وكلما أجلس مع شلتكم وطبعآ عشان خاطر سحايب كنتم تحرقوووووني بالأسئله وكلها عن أهلي وعن طبيعة حياتي بالبيت..
درر: كنت أبي أعرف إذا كنتي إنسانه ماشيه تمام وإلا منحرفه!! عشان نطردك من البداية قبل مانتوهق فيك ههههههههههههههههههههههه..
"صرخت ميار بنعومه": حراااااام عليك ليه نيتك شينه؟
"درر وهي تمزح": كان أختبار قياس للأخلاق ونجحتي فيه بس بالأخير صرنا نحبك.. خلاااااص قولي الحمدلله ههههههههههههههههه..
"ميار وهي تقلدها": قولي الحمدلله.. ياخايسه والله المنه عليك لأني أجلس معك..
راويه: أحسن شي أنا.. معرفتي بدرر من أيام الأبتدائي كانت صداقة أطفال يوم صدااااقه وعشره عدااااوه.. وأفترقنا بالمتوسط وأنقطعنا عن بعض ورجعنا ألتقينا بالثانوي وعرفتني فيك وصرت عضو بشلتكم..
"درر بحماس": بأيام الأبتدائي كنا بفصل واحد وأكثر مشاكلنا على اللي تصف بالأول في الطوابير.. وكانت راويه تعاند الكل وتتمشكل مع أي بنت تصف بالأول وتصير تآخذ مكانها بالقوه..
"أنفجرت راويه بالضحك": ههههههههههههههههههههههههه يخرب بيتك للحين ذاكرتها لي..
درر: كنت آخـــاف منك ياشريره لسانك أطول منك بس بالآخير صرت أطنشك وأعطيك على قد عقلك..
"راويه وهي مازالت تضحك": ياجبانـــه تظلين خايفه بكل بداية علاقة هههههههههههههههههههههههه..
ميريام: بناااااات خلونا نفلها نرقص ونغني نحتفل مقدمآ بتخرجنا..
معيضه: عاد مريوم تموت في الغناوي_ يابنت الحلال خلينا نفارق المدرسه بريحه طيبه...
ميريام: طـيــري هالمدرسه فراقها عييييييد.. أصلآ أنا فرحانه لأن اليوم آخر يوم بحياتي أدخل مدرسه..
سميه: ماتدرين يمكن مستقبلآ تصيرين أستاذه ومعلمة أجيال..
معيضه: عشان تنقلب المدرسه فوق تحت وتصير كلها حصص موسيقـــى ماأستبعد شي من ثلجه..
"أبتسمت ميريام": أوووووه ياليت تصير الموسيقى منهج دراسي.. بس إنشاءالله يظهر على إيدي بالمستقبل..
معيضه: مجنوووونـــه الله يخلف على أم جابتك..
سميه: حلو إن حياتنا تتغير ويتحرك روتينها اليومي وتتطور أهتمامتنا بعيدآ عن الفن والرياضه والشعر ونتعلم أشياء تنفعنا بحياتنا بس ماأعتقد إن ممكن يظهرلنا ثقافه جديده أسمها (موسيقى)..
ميريام: مو قلت لك بتظهر على إيدي وراح أكون أنا مكتشفتها...
"درر وهي تغمز بعينها وتكتم ضحكتها": إيوه صح صح صح مريوم صادقه على إيدها..
معيضه: وفي السعوديه وتحديدآ في الرياض..
"سحايب وهي تمزح": ميريام المفروض تأسس منهج جديد وهو(أصول الآمبالاه بأمور الحياه) للأستاذة/ثلجـــه..
"ميريام وهي فرحانه": وااااو فكره مش بطاله.. راح أدرسها وأبحث فيها بعد التخرج هههههههههههههههههه..
"سحايب وهي تناظر الساعه": باقي ربع ساعه وتفتح البوابه بدأ العد التنازلي لنهاية آخر يوم دراسي بحياتنا وختام لــ12 سنه قضيناها بالجد والأجتهاد والمثابره والعمل (قالتها وهي تضحك)..
ميار: قصدك بالضحك والأستهبال ودفتر الصراحه وقصصنا وبطولاتنا مع الحب الفاشـــل و.......
"سكتت ميار عند (الحب الفاشل) ونزلت رأسها بالأرض بحزن..
ميار حاولت طوال فترة الأمتحانات بإنها تتناسى يزيد_ وقـــدرت تنســى صورتــه المحفوره في ذاكرتها وتعود نفسها تذكر يزيد ولد خالتها مو (يزيد الحبيب).. ومنعت مشاعرها من إنها تظهر وتتخذ مكان خاطئ في ثنايا كتبها الدراسيه وكانت تكتب أول شطر من بيت شعر عنه وترجع تشطبه وتغير القلم اللي بيدها وتآخذ غيره وكأنها تغير تفكيرها وتوجهه من القلب إلــــــى العقل!!! كل هذا عشان ماتخسر باقي أحلامها والأشياء الغاليه بحياتها زي ماخسرت [عطف وحنان صلاح_ وحب يزيد_ وأهتمام عذاري] ولقت إن دراستها آخـــر حلم ممكن تحققه عشان خاطر أمهـــا وصديقاتها اللي يحبونها..
وبالنهايــــــه أنتصرت وحسمت النتيجة من صالحها.. أنتصرت على
<أسمــ يزيد ـــه
وصورتــ الحبيب ــــه
وحبــ القديم ــــه
بس أنهزمت قدام الذكـــــــــــــــريات..!! >"
سميه: أطربينا ياسحايب_ هذي آخر أغنيه تغنيها في وسط ساحة المدرسه وتعتبر الوداعيـــه...
"أبتسمت سحايب وهي تغني (بودعـكـــــم) للماجد"..
*[ بـودعـكــــم ياأحبابـــي.. غـصــب وإلا أنا مابــي..
عساكـــم تذكـــروا حبـــي.. ولاتنســونــي في غيابـــي..
ترا في البـــال عشرتنــــــا,, وروحتنـــا,, وجيتنـــا,, وجمعتنـــا,, وفرحتنـــا,,
ترا في البال ياأصحابـــي..
تمر شهـــور وألاقاكــــــم.. وأطفــي نـــار فرقاكـــم.. وأكمل عـمــري وياكـــم.. وأفتح لــ الهـنـــا بابـــي..
بودعكـــم ياأحبـــابــــــي..]*
"سكتت سحايب فجأه وخنقتها العبره وهي تناظر بوجوه صديقاتها واللي أرتسم الحزن على ملامحهم.. ميار أنفجرت بالصياح ورمت حالها بحضن درر ومعيضه صدت وهي تمسح دموعها.. وميريام تأثرت بس ماحبت تبين لهم وصارت تهدي درر ومعيضه وميار اللي عجزوا يوقفون دموعهم.. أما راويه وسميه قاوموا مشاعر الحزن ومنعوا الدموع وظلوا مبتسمات وبداخلهم ضايقه فيهم الحياة لأن لحظات الفراق مو سهله أكيد بس حبوا يفارقون بأبتسامه بدل دمعـــه"...
"ميريام بنبرة صوت هادئه": خلاص بنات راح نلتقي قريب بإذن الله لاتصيحون..
"معيضه وهي حاطه إيديها على وجهها وتصيح": إنتم راح تشوفون بعض بس أنا مستحييييييل..
"سميه وهي تمسح على رأس معيضه": مافيه شي مستحيل خليك متفائله وتوقعي إن كل شي صعب راح يتسهل..
معيضه: راح أفقد فلسفتك ياسميه مع إني كنت أتضايق منها بس وربي راح أشتاق لها وأحس بقيمتها بعد اليوم..
"ضحكت سميه وهي تحضن معيضه": وأنا بعد راح أفقد هدوءك يالدافورهـ(ماحلتـش) و(الطـشـه) ووجهك النحس لما تجين قبل الطابور الصباحي..
"أبتسمت معيضه غصب وهي تبعد عن سميه وتروح تحضن ميار وتصيح معها"..
معيضه: قلبي بيتقطع على فراقك ياميور.. أحس إنك أكثر وحده راح يأثر فيني غيابها يمكن لأن ظروفنا تشابهت_ إنتي من أهلك وأنا من مجتمعي اللي منعونا من شوفة بعض برا المدرسه..
"ميار وهي تشاهق بالصياح": لاتذكريني بأهلي_ أنا أبيكم أنتم بس.. أبيكم تذكروني على طول وماتنسوني ولاتتخلون عني ترا قلبي ماعاد يتحمل صدمـــات..!!!
معيضه: وغلاتك ماراح ننساك ونظل وافـيــن ولو كل الناس يخذلون إحنا ماراح نخذلك ولا راح نتخلى عنك..
"سحايب وهي تمسح دمعه نزلت من عينها": بنات أحسبوا حساب إننا راح نجتمع بمكان دراسي واحد بإذن الله.. أنا مو متصوره أفراد(شلة الأيـــزي) متفرقين وكل وحده فينا تكمل باقي حياتها بطريق ومانجتمع إلا في المناسبات.. ترى أحتاجكم و ماأقدر أستغني عنكم لأني أحترم وجودكم بحياتي..
سميه: كلنا مشاعرنا تشبه مشاعرك ياسحايب بس هذي سنة الحياة لكل شي بداية ونهاية.. واليوم نهايـــة مرحله قديمه ومهمه في حياتنا أنطوت صفاحاتها بحلوها ومرها,, وبدايـــة رحله جيده ومشوار طويل وأيام ماندري إذا تفرحنا وإلا تبكينا..
راويه: ماندري يمكن كل وحده فينا تأسس شله كبير وعريقه وتلقبها بــ(بيبي إيزي) ونظل إحنا الأصل والمؤسس الحقيقي بأكتشاف براعم جديده..
"ضحكوا البنات من كلام راويه وتخيلوا فكرة (بيبي الأيزي).. بعدها سلموا على بعض بالأحضان والدمــوع بوسط زاويتهم المعروفه ومشوا بخطوات ثقيله بأتجاه بوابة المدرسه بعدما ودعوا هذي الزاويـــه اللي عايشت أحزانهم وأفراحهم طوال الثلاث سنوات في مدرسة الثانويـــه للبنات"...
%/%/%/%/%/%/%/%/%/%/%/%/%/%/%/%/%/%/
طلعت كنوده من المطبخ وهي مستعجله بعدما غلست المواعين وبسرعه راحت لغرفتها عشان تجهز وتروح لسحايب.. دخلت تهاني الغرفه وهي ماسكه فستان بيدها..
تهاني: كنوده خذي فستاني خيطي السحاب من ورا عشان أبي أبلبسه وأروح مع أمي للزواج..
"كنوده وهي تكحل عيونها": ألبسي غيره..
تهاني: ماعندي..
كنوده: أجل خلي أمي تخيطه لك أنا مستعجله أبروووووح..
"تهاني بترجي": الله يخليك خيطيه خرابيط بس أهم شي أني ألبسه وأروح للزواج..
"أخذت كنوده الفستان وجلست عالأرض تخيطه بضيق وهي تفكر بحالهم وحياتهم وهذا الحال متعب تفكيرها.. تضايقت لما شافت أختها محرومه من شي غيرها وبعمرها ينعمون فيه.. طفله بالعمر تحب تشوف نفسها دائمآ أنيقه ونظيفه_ تعيش طفولتها بالطريقه اللي يعيشوها الأطفال (ملابس وترفيه وأهتمام من الصغير والكبير وعطاء ماله حدود سواء بالماديات أو المعنويات)..
تهاني محرومه وكنوده محرومه من أبسط الأشيـــاء بس الفرق إن تهاني تلاقي حنان من أمها وتوفير لمتطلباتها بشكل معقول وعلى حسب ميزانية أمها المحدوده.. لكـــن كنوده "المكابره والتطنيش والتمثيل بالفرح والراحه النفسيه" قدام أهلها والناس هو أسلوبهـــا.. وتجهل شي واحد/ أن الناس ماعاد تفهم الشخص من تصرفاته وشخصيه وبس لكن صارت عندهم فراسه بفهم (نظرات العيون) وكنوده تفضحها عيونها وتخونها بكل الأوقات لأن الـحـــزن اللي فيها يشرح حالها بدون ماتتكلم..!!!
"قاطعت تهاني تفكير كنوده وهي مبتسمه": راح أرقص مع صديقاتي بالعرس على أغنية (ألعب ألعب)..
"نزلت راسها كنوده بهدوء وسرحت وهي تسأل نفسها": وش النهــــــايه؟؟ وش الشي الحلو اللي بيصير لي ويقلب حياتي من تعاسه لـسعـــاده!!
وش بآخذ من الدنيا غير الهم والنكد!! وش راح أعطيها غير المشاكل!!!
آآآآآآهــ أنا مو عارفه ليش دايم أوصف حياتي بكلمة (تعاســـه) مع إن بالواقع مافيه أحد مرتـــاح.. محد راضي عن نفسه ولاراضي بظروفه.. الكل يشتكي الكل يبكي الكل يعانـــي.. وين اللي إذا سألناه مرتـــاح بحياتك وقال: إيــه؟ حتى اللي عايشين بوسط عائله مثاليه <بنظري طبعآ> أب طيب وأم حنونه و أخ متفهم وأخت رقيقه وكلهم بصحه وعافيه مايشتكون من أي مرض وفي بيت واحد يجمعهم_ هذولا مو عاجبهم حالهم ويبغون حياة ثانيه,,دنيا غير تحقق لهم أحلامهم وطموحاتهم.. ياليتهم يعطوني ربع الحياة اللي عايشينها.!!
"قامت كنوده وهي تعطي تهاني الفستان_ لبست عباتها وراحت لسحايب"..
__________________________________________
"سحايب وهي لابسه عباتها وواقفه بالصاله وتسوي نفسها معصبه": بــــــدري كان تأخرتي زياده!!!
كنوده: وش أسوي تعرفين شغل البيت مايخلص..
سحايب: لاتذكريني بشغل البيت ماصدقت خبر متى أخلص وبسرعه تجهزت عشان نطلع بعد شوي..
كنوده: متى بتمشون؟؟
سحايب: ألحين بس جالسين ننتظر ياسر راح يجيب سيارة صديقه عشان يآخذنا فيها.. لاتنسين إننا بنروح نتمشى داخل الرياض ولازم تكون سيارتنا كشخــه..
كنوده: سيارة ياسر وش فيها لاهي مقربعه ولا .........
"تقاطعها سحايب بإستياء": لأ سيارته تفشششششل من شوي أحن فوق راسه يغيرها أقل شي بالمشوار المهم هذا...
كنوده: غــــريبه!! سمع كلامك بدون مايعصب..
"سحايب وهي فرحانه": بالعكس كان رااااااايـــــــــق مره ومارفض طلبي..
"كنوده وهي تتلفت": هاجر وينها ماتبي تروح؟
سحايب: تكلم بالجوال بالغرفه وقالت إذا جاء ياسر نادونـي...
"دخل ياسر وهو ينادي بصوت عالي": يابنـــاااااااااااااااات ،، وينكم..؟
"تغطت كنوده وهي تسأل سحايب": ياسر يدري إني أبروح معاكم؟ آخاف مايبيني آروح وأنا قاطه عمري ..
سحايب: يدري أنا وهاجر أصرينا إنك تروحين معنا وهو وافـــق..
"طلع ياسر وركب السياره وطلعوا وراه هاجر وعيالها وبقوا سحايب وكنوده واقفات ويتلفتون يدورون عالسياره بوسط الظلام..
ضرب ياسر هيرن عشان يجون لكنهم ماتحركوا من مكانهم.. نزل بسرعه ووقف قدامهم"..
ياسر: واقفه تتأملـــين الشــارع..؟؟ تحركي وروحي أركبي السياره..
سحايب: وينهــــــا..؟؟؟
ياسر: الله يرحم عيونك ماتشوفينها قدامك..
سحايب: هذي السوداء؟
ياسر: إيه_ يالله بسرعه تأخر الوقت..
سحايب: بذمتـــك هذي نروح فيها للسوووووق؟ والله إن سيارتك أرحم منها...
ياسر: مطوله تناقشين عند باب الشارع ،، أركبي وبعدين كملي أسأله..
"ركبت سحايب وهي مقهوره من ياسر وأنقهرت زياده لماشافته يطالع لهاجر ويضحك"...
ياسر: هاه سحايب كيف شفتيها حلوه وإلا ماشي حالها؟
سحايب: حرام عليك شلون ترضى إننا نروح بــ(السكراب) هذي ماتتفشل؟؟؟
ياسر: ماعرفـنـالك.. بكل الحالتين وجهك منقص ومتفشله حيرتيني معك..
"كنوده وهي تهمس لسحايب": أنا قلت ألحين بنركب بي إم وإلا لكزس آخرتها سياره منتهيه صلاحيتهـــا..
سحايب: والمشكله إن تطلع منها أصوات غريبـه_ تسمعين؟
"كنوده وهي كاتمه ضحكتها": أسمع_ بس تستاهلين إنتي طلبتيه يغير سيارته وهو ماقصر فيك_ يبي يعصبك ويقهرك..
"وقف ياسر عند المحطه عشان يعبي بانزين ونزل يشتري من البقاله.. كانت الأضاءه في المحطه مره قويه وكشفت المستور من خفايــــا السياره"..
"سحايب بذهول وهي تأشر قدام": شوفي وش مكتوب على الدرج (صندوق الشكـــاوي)!!! السياره بكبرها شكـــوى وش له الصندوق..؟
"أنفجرت كنوده بالضحك وهي تأشر": لأ شوفي الأسلاك اللي طالعه من تحت المسجل (أصفر وأزرق وأحمر) هههههههههههههههههههههههه..
سحايب: والمرايه مااااااااايلــه الظاهر ياسر يشوف الناس اللي قدامه مو اللي وراه..
كنوده: ويمشي عكس السير هههههههههههههههههههههههه..
هاجر: ظهري تكسر من المرتبــه أبدآ مو مريحه..
سحايب: باقي مشوار طويل أكثر من ساعه يمديه ظهرك يتكسر بزياده وإنتي تعرفين زحمة شوارع الرياض..
كنوده: آخاف ياسر يشوف الزحمه ويعصب ويرجعنا للبيت..
سحايب: إنتي وش قصتك بس خايفه إن ياسر يعصب.. قلت لك اليوم راااااايق لكن هو يثقل دمه علي عشان يستفزني وأنا أعرف طبعه..
كنوده: لاتلوميني مو مصدقه إني طلعت من جدران البيت ومن الفرحه ماودي يصير شي ينكد علي ..
سحايب: ياخوفي إنتي تنكدين على عمرك وتسوين لك كم مشكله وهوشه بالسوق وتفضحينــــــا..
كنوده: والله إذا الوضع يستدعي مشكله ماأتردد.. بس أنا شايله هم ياسر إنه يشتهر من بعدها ويصير وجهه مألوف عند الناس ههههههههههههههههههههههههه..
"سحايب وحبت تستفزها": وش رأيك باللي تبشرك وتقولك إن فواز راح يسبقنا للمجمع اللي بنروح له وينتظرنا عند البوابه..؟؟؟؟
"صرخت كنوده بخوف": لاااااااااااا ياويييييييييييييـلــي إلا فواز!!!
"فتحت باب السياره وطلعت رجولها وهي مرتبكه" أنا أبرجع للبيت هونت مابي أروح معكم..
"سحايب بصوت عالي وهي تسحبها من عباتها وتسكر الباب": يامجنووووووونــه ماصدقتي خبر فتحتي الباب تبين تهربين_ خيييير (فيديو كلـيــب)..؟
"كنوده بأستهبال": خليني آمووووت مابي أعيش لأااااا..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك