رواية نهاية حبك اعدامي -57
عبدالعزيز: وانا بشوف يدي بعد يجي معانا ..يوسف ضحك بصوت عالي: ههااااااااااااي ..
عبدالعزيز: وجع .. تضحك ها .. لكن قلت لك مردوده ..
الكل يطالعهم باستغراب ..
يوسف: ما في شي يا جماعه لا تطالعونا جي ..
عبدالعزيز ويوسف طالعوا بعض وضحكوا : هههههههههه ..
خلصوا الشباب اجتماعهم واتفقوا على كل شي .. بس نسيت اقولكم ليش سلمان تغير ويهه لما عبدالعزيز سأله عن الكيمرا .. سلمان يبي يصور الحدث .. عشان يطرش الشريط حق صاحبه الامريكي ( سميث ) ..
فاطمه كانت منسدحه على بطنها وتقرى رسالة يوسف وهي مبتسمه .. تستنشق الرساله بفرح ..
فاطمه " فديت هالريحه والله .. بس ليش مسوي لي لغز فالرساله ؟ والله حيرني " .. تمت تشوف الورقه وهي تفكر وين ممكن بيكون حاط الرساله الجايه .. لان يوسف رد على رسالتها الاخيره برد حيرها .. وكان النص كالتالي ..
(( الغاليه فاطمه ... اليوم كتبت هالرساله وطرشتها مع اخوج .. بس يوم الجمعه بعد الساعه 1 ونص الظهر طلعي فالحوش وقلبج بيدلج على مكان رسالتي .. ولما تعرفين المكان انتظر ردج .. وبرجع نفس المكان اخذ ردج على رسالتي .. للتأكيد ( حياتي ) يوم الجمعه بعد الساعه 1 ونص الظهر قلبج بيدلج عليها ..
محبج للابد .. يوسف )) ..
فاطمه " ما قدر انتظر لين بكره .. متى يجي بكره " .. طوت الرساله وشمتها وهي مبتسمه .. حطتها مع باقي الرسايل اللي من يوسف .. في علبه وعليها قفل صغير .. حطت العلبه في الكبت وسكرته .. وقفت تناظر نفسها في المرايه وهي مبتسمه ..
فاطمه " الحين ردت فيني الروح .. فديتك يا يوسف" .. طلعت من الغرفه ونزلت تحت فالصاله لقت كل اخوانها واخواتها فالصاله .. وكان محمد ولد عمها معاهم .. اول ما دخلت طاحت عينها على محمد .. محمد ابتسم لها بحنان وشوق .. اما فاطمه طالعته ونزلت راسها .. سلمت وقعدت جنب ايمان ..
فارس: فطيم ..
فاطمه: هلا ..
فارس: كلمت ابوي وعمي والشباب و البنات والكل موافق نروح العزبه .. شو رايج انتي .؟
فاطمه مبتسمه: حلو ..
فارس: يعني مافي خاطرج مكان معين ؟
فاطمه: لا عادي ..
ايمان محتجه: وليش يعني لو الشيخه فاطمه بغت تروح الشاليه نكسل روحة العزبه عشانها ..
فارس: اكيد بنكنسل عشانها ..
محمد " فديتها الدلوعه " ..
مريم ضحكت: ههههههه
ايمان: فطوم دلوعه ..
فاطمه بعفويه: انا مو دلوعه ..
محمد " والله ان الدلع يغار منج بعد "
فارس: ايمانو ليش تحترين من فطيم ؟
ايمان: انا ماحتر .. بس كل شي تبيه تسونه لها ..
فاطمه: ومن متى تأمرت وتنفذت طلباتي ؟
ايمان: ماله داعي اتكلم ..
محمد كان يشوف فاطمه ومبتسم " فديت دلعها .. وربي يحق لها تدلع " ..
فاطمه: لا قولي ..
ايمان: خليها على الله ..
محمد مبتسم: ولا يهمج يا ايمان .. وين تبين تروحين وانا اللي بكنسل كل شي عشانج و اوديج وين ما تبين ..
فاطمه رفعت حاجب وطالعت محمد بغضب ..
محمد ابتسم لها عشان يغيضها: ها ايمان قولي لي وين تبين تروحين ..؟
ايمان: خلاص انا بعيش عندكم .. باصير اختكم ..
محمد: هههههه .. حياج يا اختي ..
فارس: لو ايمان تعيش عندكم عمي ما بيستحملها دقيقه ..
ايمان: ليش يا عيوني ؟
فارس: انتي تعرفين ليش ..
مريم: ايه عليج ياختي .. قطعوج تقطع ..
محمد: ههههه .. لا ما قطعناها .. ها ايمان شو قلتي ؟
ايمان: على شو ؟
محمد: هاي كله عن الرحله .. وين تبين تروجين بوديج ..
ايمان: لا خلاص طابت نفسي .. حتى ما راح اروح معاكم ..
قامت فاطمه وباست ايمان: موووح .. فديت قلبج يالغاليه .. نروح وين ما تبين بس لاتكدرين خاطرج ..
محمد " فديت الحنان والله " ..
ايمان: فديتج فطيم .. امزح شدعوه ..
فارس " الله يخليكم لبعض يا خواتي " ..
محمد قام بيطلع: يلا يا جماعه استأذن ..
فارس: وين يبه ؟ بدري ..
محمد: بدري من عمرك حبيبي .. بس لا تنسى موعدنا ..
فارس: ولا يهمك .. كلمني لي قعدت ..
محمد: ان شاءالله ..
طلع محمد ورا فارس و وصله لين السياره ..
محمد: فروس ..
فارس: هلا ..
محمد: لو قلت لك قلبي يحب .. بتصدق ؟
فارس رفع حاجب: تحب !! من تحب؟
محمد تنهد: آآه .. انسى .. يلا سلااام ..
فارس: تعال تعال .. هو دخول الحمام زي خروجه .. من تحب ؟
محمد مبتسم: ولا حد .. بنتكلم في هالموضوع مره ثانيه .. لازم اروح ارتاح شوي .. ورانا قومه من الفجر ..
فارس: لا تحبها يا محمد ..
محمد طالع فارس باستغراب: شو ؟ من اللي ماحبها ؟
فارس منزل راسه: اللي في بالك .. لاتحبها ..
محمد حرك من غير ما يرد على فارس .. طلع من بيت عمه وهو محتار .. فارس التفت على صالتهم وتم يطالع خواته ودخل لهم داخل ..
فاطمه مبتسمه: مو المفروض اليوم نسوي عشا حق المعاريس ..
فارس: المفروض .. بس خالد عنده شوية شغل وأجلها لين نهاية الاسبوع ..
مريم كانت منزله راسها " فديت قلبه المشغول "..
فاطمه: حركات بعد خالد .. ينشغل ..
ايمان: على قولتج .. حركات ..
فارس: هههههه .. ما سمعكم خالد ..
فاطمه: ليش شبيسوي يعني ..؟
ايمان: اي شبيسوي .. اذا مرته ما سوت شي هو بيسوي يعني ..
والكل ضحك: هههااااااي ..
مريم قامت من مكانها وهي معصبه ..
فارس مبتسم: زين جي ..
ايمان: هههه هاي البدايه بس ..
فارس: الله يعينها عليكم ..
رن جوال فارس والرنه كانت ( عالي مستواه ) .. طلع من الصاله ورد على طول .. ايمان و فاطمه طالعوا بعض وابتسموا ..
مناف: هلا حبيبي ..
فارس: هلا وغلا حياتي ..
مناف: ما خلصت شغلك للحين ؟
فارس مبتسم: ليش ؟
مناف: تعبت وانا انتظرك ..
فارس بفرح: فديت اللي تعبت .. السموحه حياتي ..
مناف: عادي حبيبي .. بس ماقدرت انتظرك اكثر .. قلت باتصل حتى لو مشغول ..
فارس مبتسم: لو مشغول افضى لج حياتي ..
مناف: فديت عمرك يا فارس ..
فارس: زين عطيني 5 دقايق وبتصل فيج ..
مناف: ليش ؟
فارس: بروح غرفتي ببدل وباتصل ..
مناف: اوكي حبيبي .. بس لا تتأخر ..
فارس: ليش ؟
مناف بدلع: اخاف يذبحني الشوق ..
فارس: فديت الشوق انا ..
مناف بوناسه: زين حبيبي انتظرك ..
فارس: ان شاءالله ..
سكر منها ودخل .. راح غرفته وسكر الباب .. خلص شغله ورجع اتصل بمناف ..
فارس: هلا حياتي ..
مناف: هلا والله ..
فارس: شكثر اشتقتي لي ؟
مناف بخجل: وايد حبيبي ..
فارس: ابي اعرف شكثر وايد ؟
مناف بدلع: عاااد فارس لاتحرجني .. قلت لك وايد ..
فارس: فديت الدلع والله .. بس انا مصر اعرف شكثر اشتقتي لي ؟
مناف: والله وايد ..
فارس: زين شكثر وايد حياتي ؟
مناف: قد حبي لك ..
فارس: فديت قلبك يا مناف .. والله اني اموت فيج ياللي مافي مثلج بهالكون كله ..
مناف منحرجه: فديتك يا فارس ..
سكتوا فتره ..
فارس: قلبه ..
مناف: هلا ..
فارس: شو اخبار اخوانج ؟
مناف: الحمدلله بخير
فارس: الحمدلله .. زين حياتي .. انا لازم اريح شوي ..
مناف: بدري حبيبي ..
فارس: حياتي وراي شغل لازم اقوم له من الفجر ..
مناف باستغراب: شهالشغل الفجر ؟!
فارس: عندي شغل يا حياتي ..
مناف حست ان فارس ما يبي يتكلم عن هالشغل: زين حبيبي ..
فارس: زين اعتمد عليج يا قلبه ..
مناف: آمرني حبيبي ..
فارس: ما يامر عليج العدو .. بس قعديني قبل الاذان .. بصلي وبطلع على طول ..
مناف: ان شاءالله حبيبي ..
فارس: جزاج الله خير ..
مناف: زين حبيبي .. روح ارتاح وان شاءالله بقعدك قبل الاذان ..
فارس: اوكي حياتي .. سلام ..
مناف: الله يحفظك ..
سكرت من فارس وكانت تفكر في شغل فارس اللي بيقعد له الفجر .. اما فارس حط راسه ونام على طول ..
..............
في بيت بومحمد ..
بومحمد: خالد يبه .. ليش ما خليتنا نسوي العشا اليوم ؟ شو هالشغل اللي عندك ؟خالد: والله يبه مواعد شباب على شغل ولازم نخلصه ..
بومحمد: الله يهديك ما خليتنا نفرح ..
خالد : ولا يهمك الغالي .. بنفرح قريب ان شاءالله ..
ام محمد: حتى محمد وفاضل وعلي بيروحون معاك ؟
خالد: اي ..
بومحمد بشك: زين شو هالشغل ؟
خالد: شغل يبه ..
ام محمد: شو وراكم ؟
خالد مبتسم: ولا شي .. وقام بيطلع من غرفتهم .. يلا انا استأذن ..
بومحمد: وين ؟
خالد: بروح ارتاح شوي ..
بومحمد: بدري .. الساعه 10 .. مو عوايدك تنام هالحزه ..
خالد: تعبان ..
ام محمد: عسى ما يعورك شي يبه ..
خالد: لا الغاليه .. مافيني شي .. ابتسم وطلع ..
بومحمد: ما يندرى شو وراهم ..
ام محمد: الله يستر منهم ...
في غرفة ساره ومحمد ..
محمد: ساره ..
ساره: هلا فديتك ..
محمد: جهزي لي ملابس حق بكره ..
ساره: تبي ثوب ولا رياضه .؟
محمد: لا جهزي لي رياضه .. وحطي لي ماي فالثلاجه ابيه يثلج ..
ساره: ان شاءالله ..
محمد قرب من ساره ومسكها من كتوفها: فديت ساره انا ..
ساره ويها صار احمر: محمد ..
محمد يضحك: شو فيج .. حرام اتغزل فيج بعد ..
ساره تدلع: لأ لا تتغزل .. دزته و راحت عند الكبت اطلع ملابسه ..
محمد لحقها: تتغلين علي ..
ساره التفت عليه: انا ما تغلى عليك .. وباسته على جبهته .. فديت قلبك ..
محمد: فديت روحج يا ساره .. مسك يدها وتم يناظر عيونها .. " ليش يا ساره اشوف فيج فاطمه بنت عمي ؟ "
ساره مبتسمه: شو فيك حبي ؟
محمد ابتسم لها: اتفكر في جمالج ..
ساره: زين روح نام تأخر الوقت ..
محمد: اهم شي اللي تصرفني ..
ساره بدلع: روووح ..
محمد يضحك عليها: هههههه .. زين زين ..
راح وانبطح على السرير .. غمض عيونه وهو يفكر في زوجته ويحاول ينسى بنت عمه ..
كل الشباب ناموا الا سلمان اللي كان يفكر في فاطمه ..
سلمان تنهد " آآه يا يوسف .. والله اني احاول انساها بس ماقدر .. تعلق قلبي بفاطمه .. يا ليتك ما قلت لي شي يا يوسف .. و ياليتني ما شفتها .. بس انا وعدت نفسي اني اسوي المستحيل عشان تاخذها .. وبكون اول من يساعدك يا يوسف .. والله مالك ذنب ان قلبي حبها .. بس يا قلبي لا تحب فاطمه .. ارجوك يا قلبي لاتحب فاطمه لاتحبها لاتحبها " .. غطى ويهه بيده وهو حزين .. " فاطمه .. هالبنت خذت قلبي مثل ما خذت قلب يوسف .. يا رب اقدر انساها " .. تم سلمان في صراع بينه و بين نفسه .. أذن الفجر .. طلع من الغرفه وراح يقعد يوسف .. دخل عليه الغرفه وكان يوسف متعمق فالنوم .. تم سلمان يتأمل ملامح يوسف ..
سلمان " ماشاءالله عليك يا يوسف .. كامل والكامل الله .. مزيون وسيم طول بعرض ما عليك زود .. تستاهلك فاطمه .. الله يوفقكم مع بعض" .. قرب سلمان من يوسف ..
سلمان: يوسف .. يوسف ..
يوسف: ها ..
سلمان: يلا قوم أذن الفجر ..
يوسف بطل عيونه: ان شاءالله ..
سلمان: يلا ما نبي نتأخر على الشباب ..
يوسف قعد على السرير: زين ..
طلع سلمان .. ويوسف قام ودخل يتوضأ .. راح سلمان غرفة الجوهره .. طق الباب ..
الجوهره: لحظه خالي .. لبست روبها و فتحت الباب ..
سلمان: هلا يبه ..
الجوهره: هلا خالي ..
سلمان: زين احنا بنروح المسيد .. وبعدها بنطلع ..
الجوهره: زين خالي ..
سلمان: انا بقفل البيبان وراي .. وما وصيكج على اختج وعلى نفسج يبه ..
الجوهره: ان شاءالله خالي .. لا تحاتينا ..
سلمان: لو في شي اتصلوا لي او ليوسف ..
الجوهره: ولا يهمك خالي ..
راح سلمان يشيك على يوسف وما لقاه فالغرفه .. عرف انه نزل تحت يشغل السيارات .. ويجهز الاغراض ..
طلع سلمان الحوش وشاف يوسف .. تم يطالعه بحزن .. تنهد وقرب منه ..
سلمان: يعطيك العافيه ..
يوسف: الله يعافيك ..
سلمان: خل الاغراض الحين .. خل نلحق على الصلاه .. بعد ما نرجع من المسيد بنحمل باقي الاغراض ..
يوسف: ان شاءالله ..
طلعوا من البيت متوجهين للمسيد ..
في بيت بوفارس .. فارس كان يكلم مناف .. و فاطمه داخله عليه الغرفه .. سمعته يقول ..
فارس: زين حياتي الحين بقعد ..
مناف: حياتي لي طلعت من المسيد كلمني ..
فارس: ان شاءالله يا قلبه ..
مناف: الله وياك ..
فارس: سلام ..
سكر منها و توه بيقوم الا فاطمه دخلت عليه ..
فاطمه: قاعد ..
فارس: اي توني ..
فاطمه: زين عيل خل اقعد عزيز والباقي ..
طلعت من غرفة فارس وهي تتفكر في كلام اخوها ..فاطمه " فارس اخوي يحب !!؟ وانا اقول شو فيه متغير .. بس يا ترى من تكون سعيدة الحظ ؟ بصراحه فارس اخوي ينحب فديته " .. ابتسمت وراحت غرفة عبدالعزيز تقعده .. قام عبدالعزيز وطلع مع فارس .. خلصوا من المسيد وراحوا عند المحطه اللي اتفقوا انهم يتلاقون عندها كلهم .. اول الواصلين سلمان و يوسف .. وبعدهم محمد وخالد في سياره وحده و علي وفاضل بسياره وحده .. نزلوا يعبون بترول يشيكون على السياير ..
فارس: سلمان .. وين نسيبك ؟
سلمان: عرفت المكان قلت له ماله داعي يجي .. وهمس لفارس .. توه مالج ومابي اوهقه ..
فارس ابتسم: عدل شغلك ..
محمد: شو تقولون ؟
فارس: يا ربي على اللقافه ..
محمد: شوف ملقوف مو ملقوف باعرف شو قلتوا يعني باعرف ..
سلمان يضحك: هههههه .. كنت اقوله عن نسيبي ..
محمد: اي شو قلت عنه .. ؟
فارس: بسك لقافه ..
محمد وسلمان: هههه ..
قرب منهم خالد وهو مبتسم: ها بالريع نحرك عشان تستغل الوقت ..
محمد التفت على الشباب: من صجهم ذول جابوا البانشيات ..
سلمان: خل يستانسون .. ونتصور شوي ..
فارس: شو فيها الدنيا .. خل نعيد ايام المراهقه ..
محمد: قصدك ايام ما كنت انت بروحك مقلوع ..
فارس: خف علينا يالمطوع .. يعني انت اللي مقصر ..
خالد: بس خلاص لا تتهاوشون علي ..
الشباب: هههههههههه ..
علي: كل شي تمام يا جماعه ..
سلمان: تمام التمام .. يلا نحرك ..
محمد بصوت عالي: يلا شباب .. يا راعي البانشي خلصنا .. كان يقصد فاضل اللي كان يعابل فالبانشي مالته ..
فاضل التفت عليه وهو مبتسم: زين زين خلصنا ..
كل الشباب ركبوا السياير مستعدين للمجهول .. كلهم مشوا ورا سلمان .. وهم فالدرب كانت الشمس تشق ظلمة الليل بنور اشعتها الساطع .. سرح يوسف بهالمنظر الخلاب .. اتصل بعبدالعزيز ..
عبدالعزيز: هلا والله ..
يوسف: شرايك بهالمنظر .؟
عبدالعزيز: روعه .. طلعت رومنسي بوخليفه ..
يوسف يضحك: ههههههه .. شوف تدرج الالوان كيف صاير .. روعه بصراحه ..
عبدالعزيز: سبحان الله ..
تموا هم الثنين يسولفون طول الطريق .. فارس كان مستانس على علاقتهم .. التفت على عبدالعزيز وهو مبتسم
فارس " وحليلك يا عزيز .. طيب وعلى نياتك .. الله يكتب لك بنت الحلال اللي تستاهلك " ..
في سيارة محمد خالد حس بالضيق .. لانه نفس المكان اللي صارت له في الاحداث المخيفه من فتره .. كان يطالع المكان باهتمام .. بس اللي نساه الهم .. هو منظر شروق الشمس الخلاب .. وشلون الالوان تدرج من الاغمج للافتح .. سرح بالمنظر الرهيب وهو مبتسم .. وصلوا المكان المتفق عليه الساعه 5 ونص .. نزلوا ونزلوا اغراضهم .. يوسف خذ كرتون خاله وحطه على الارض .. نزلوا الشباب عدة الحفر .. و سلمان حدد لهم مكان الحفره ..
سلمان: خلاص خلوا العده وعابلوا البانشيات .. انا ومحمد بنحفر .. خالد يبه تشيك لي على الكيمره .. يوسف انت وعبدالعزيز وباقي الشباب فرشوا لنا البسطه ونزلوا الاغراض ..
يوسف: اوكي ..
كلن خذ موقعه .. اما فارس فكان يحاول يشغل الشباب على ما محمد وسلمان يحفرون ويجهزون كل شي ..
محمد وسلمان مشوا تقريبا مسافة كيلو بالسياره .. وصلوا مكان الحفره الكبيره .. و حفروا حفره صغيره فوقها حطوا الكرتون ودفنوا الحفره .. تموا فتره عند الحفره عشان الشباب ما يشكون في شي .. رجعوا مره ثانيه للشباب ..
علي: وين رايحين بعيد ؟
سلمان: يبه هاذي دناميت مو لعبه .. لازم نكون على الاقل مسافة 500 متر عن مكان التفجير ..
علي: اها ..
سلمان: فارس مثل ما اتفقنا ..
خالد: شو اللي اتفقتوا عليه ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك