رواية نهاية حبك اعدامي -59
هنادي: ههههه .. شدعوه خالي .. تبيني اخذ واحد دب ..
سلمان: هههههه .. دخلت الجوهره .. ومعاها الشاي والقهوه ..تقهواو بعدين كل من راح يقيل ويرتاح .. سلمان دخل غرفته وعلى طول شغل الكمبيوتر وطرش الفلم مع الصور على ايميل سميث .. تمغط وراح انسدح على السرير ونام على طول من التعب .. لانه راح مواصل ..
يوم الجمعه كان حافل بالنسبه للكل .. الشباب وخلصوا من التفجيرات بسلامه .. وتونسوا على البانشيات .. بس هاليوم كان مميز بالنسبه لفاطمه .. اللي قلبها دلها على رسالة يوسف .. استنشقت عبير الورقه بابتسامه ناعمه من شفاها الحلوه ..
فاطمه " فديت هالريحه والله .. اميزها عن بعد كيلو .. فديتك يا يوسف وفديت كلامك والله " .. طوت الرساله وخشتها في جيبها وركضت على غرفتها وهي طايره من الوناسه .. شافتها مريم ونادتها ..
مريم: فطوم ..
فاطمه وهي تركض: بعدين بعدين ..
مريم باستغراب: بعدين !! شو سالفتها فطوم الهبله .. هزت راسها وكملت طريقها رايحه الصاله .. لقت ابوها مستلقي ومعاه عبدالعزيز .. قعدت عند ابوها ..
مريم: بابا ..
بوفارس مغمض عيونه: هلا بابا ..
مريم مبتسمه: ليش ما تقيلون فوق ؟
بوفارس: اخوج نام ؟
مريم طلت في ويه عبدالعزيز: اي .. وغرقان فالنوم ..
بوفارس: كنا نسولف وسكتنا والظاهر انه نام من التعب ..
مريم: زين قوم روح فوق بابا ..
بوفارس: لا يبه بغط لي شوي لين يأذن العصر ..
مريم باست راس ابوها: تبي اقعدك قبل الاذان ؟
بوفارس ابتسم: اي يبه .. جزاج الله الف خير يا قلبي .. والله يوفقج وين ما تروحين وسدد خطاج يا رب العالمين
مريم ابتسمت لابوها باحراج: آمين .. راحت وجابت لحاف صغير ولحفت ابوها وابتسمت له وراحت غرفتها وهي فرحانه بدعوات ابوها ..
...................
(( فديت اللي قلبها وصلها لمكان الرساله .. ادري انج فرحانه .. بس مو كثري .. تدرين ليش ؟ لان رسالتي بين ايدينج .. واحسد العطر لانج تنشقتيه بانفاسج .. حبيبتي انتظر ردج بنفس المكان .. محبج )) .. حضنت الرساله ورفعت راسها وهي مبتسمه ..
فاطمه " فديتك يا يوسف .. شو سويت فيني؟ طيرت عقلي بحبك يا يوسف .. احبك واحبك واحبك " ..
فرحة فاطمه ما تنوصف برسالة يوسف وبكلامه اللي بالرساله .. وين تتوقعون فاطمه لقت الرساله ؟
الرساله حطها يوسف تحت صيص النبته اللي جنب ميلس الريايل .. كان طرف منها يا دوب باين .. طبعا فاطمه اول مكان دورت فيه الميلس وما لقت شي .. لما حست باليأس كانت بتطلع من الميلس بس قلبها ما خلاها تطلع فتحت باب الميلس اللي يطلع على برا وشافت صيص النبته وكانت نبتة الغردينيا .. ريحتها فواحه وجذبت فاطمه طاحت عينها على شي ابيض تحت .. مدت يدها ورفعت الصيص شوي ولقت الرساله .. فتحتها وقرت الكلام على السريع والفرحه ملت قلبها المليان بالحب والشوق .. بس يوسف ما كتب اسمه في الرساله لانه خايف حد يوصل للرساله قبل فاطمه .. بس قلبها وصلها للرساله ..
طبعا بعد الاحداث اللي عشناها يوم الجمعه .. مر هاليوم طبيعي وحلو بالنسبه للكل .. عدى السبت بنفس الروتين اما الاحد فكان يوم حافل للكل .. لان الاثنين بيكون عشاء الملجه .. البنات راحوا مع امهم المجمع عشان يشترون لهم ملابس .. طبعا الريم راحت معاهم .. طلعوا من الصبح وهم يتلفلفون من محل لي محل ..
ام فارس: يا بنات صدعتوني .. على كثر المحلات ماخذتوا منها شي ؟
فاطمه: عاد ماما .. في اشياء حلوه بس ما تناسب المناسه ..
ام فارس: والله مناكركم مناكر يا بنات هالسنين .. على ايامنا شحلاتنا بالبخانق وثياب النشل .. وانتوا الحين مع هالثياب الضيقه والقصيره والمشققه ..
ايمان: حلاته هالضيق والمشقق .. هاي المطلوب ..
البنات: ههههههههه
ام فارس: والله انكم قويات عين .. على ايامنا نستحي لي طير الهوى ثيابنا وطلعت سيقانا .. وانتوا ادورون الضيق والمشقق ..
فاطمه ماسكه كتف امها: ماما .. ايامكم غير وايامنا غير ..
ام فارس مبتسه: والله لو تلبسون ثياب نشل وبخانق والله بتطلعون جميلات ..
فاطمه: لا ماما .. مو شي ..
مريم: زين خل نشوف هالمحل .. شكله عنده بدلات حلوه ..
ام فارس: يلا بناتي ..
دخلوا المحل .. وكل وحده من البنات راحت في زاويه تشوف الملابس .. مريم لقت لها بدله وايد ناعمه ..
مريم: فطيم تعالي شوي ..
فاطمه: هلا ..
مريم: شو رايج بهالبدله ؟
فاطمه شافتها: مممممم .. لا انتي العروس لازم تاخذين شي ملفت اكثر ..
مريم: ها .. لا فطيم ..
فاطمه خذت البدله ورجعتها: ما في لأ .. تعالي بنختار لج شي ربشه ..
الريم: شو الربشه ؟
فاطمه: بدله ربشه للعروس ..
ايمان: يا قلبي على الربشه انا ..
البنات: ههههه
ام فارس: صوتكم يا بنات ..
فاطمه: ان شاءالله ماما ..
ايمان نادت اللي تبيع بالمحل: لو سمحتي ..
البايعه: نعم مدام تفضلي ..
ايمان: نبي بدله حق عروس ..
البايعه مبتسمه: مين فيكم العروس ؟
كلهم أشروا على مريم: هاذي ..
البايعه ابتسمت لمريم: ان شاءالله .. راحت وجات كم بدله ورجعت لهم ..
ايمان: يلا جابت البدلات ..
راحوا البنات عند الطاوله وتموا يشوفون البدلات ..
الريم: بصراحه هالبدله تجنن ..
فاطمه: اي وحده ؟
رفعتها الريم: هاذي ..
ايمان: اي والله تجنن .. وتناسبج مريوم ..
فاطمه: اي بصراحه روعه ..
مريم: اشوف .. ومسكت البدله .. زين خل ادخل اجربها ..
الريم: بدون ما تجربينها ترا تجنن ..
فاطمه: عدل كلام ريم ..
ايمان: زين دخلي جربيها مو خسرانين شي ..
البايعه: وانتوا يا حلون شو بدكم تختاروا ؟
ايمان: انا ابي تنوره ساده وبادي ربشه ..
البايعه: احم .. شو يعني ربشه مدام ..
الريم: ايمانوا لا تجننينها .. هي قصدها بادي فيه سوالف وايد ..
البايعه: اها .. ولا يهمك مدام ..
الريم: ايمانوا عليج حركات ..
ايمان: بصراحه ماعرفت كيف اقولها فيه سوالف قلت ربشه ..
الريم: ههههههه
فاطمه كانت ماسكه تنوره قصيره لونها فيروزي واخضر فستقي شيفون مع بادي تور لونه فيروزي ..
ام فارس: فطيم يمه هاذي البدله قصيره والقميص ما بيخش شي ..
فاطمه: حلاته ..
ام فارس رفعت حاجب: شو بعد حلاته والله انكم قويات يا بنات هالسنين ..
فاطمه: انا بجربها وبعدين بقرر ..
راحت عند البنات: ها ما لقيتوا شي ؟
ايمان: راحت تشوف لنا ..
فاطمه: شو رايكم ببدلتي ؟
الريم: تجنن فطيم .. روحي لبسي خل نشوف ..
فاطمه: اوكي .. بس تعالوا نشوف مرايم ..
البنات: يلا ..
راحوا عند غرفة التبديل .. ومريم كانت للحين تلبس .. دخلت فاطمه تجرب البدله اللي اختارتها .. طلعت مريم والبنات استخفوا عليها ..
الريم: تجننين يا مرايم .. ياحظ خالد اخوي فيج ..
مريم نزلت راسها منحرجه: نادوا ماما خل تشوف ..
الريم: ان شاءالله ..
راحت الريم تنادي ام فارس ..
ايمان: فطوم طلعي لتفوتج مرايم ..
فاطمه: زين بس صبري شوي الحين بخلص ..
ام فارس: فديت بنتي انا .. والله انج عروس ..
مريم: حلوه بدلتي ماما ..
ام فارس: انتي محليتها ياماما ..
مريم: خلاص يعني اتوكل واخذها ..
ام فارس: ما يبله كلام ..
طلعت فاطمه وكانت تجنن بالبدله ..
ام فارس: يعلني اشوفج عروس يا فطيم ..
فاطمه مبتسمه: مريم .. شو هالحلاه .. لا لا لا اخذي البدله ما يبيله كلام ..
مريم: خلاص على رايكم .. بس انتي مسكته مع هالالوان الخطيره ..
فاطمه دارت حول نفسها: ها شو رايكم في بدلتي ؟
ام فارس: عليكم بالعافيه فديتكم ..
ايمان: والله تجنن ..
ام فارس: فاطمه يمه اخذ شال غطي كتوفج .. وايد عاري يا ماما ..
فاطمه: مممممم .. احلى بدون الشال ماما ..
ام فارس: والله اخاف عليج من العين ..
فاطمه: محد غيرنا ماما ..
ام فارس: انا عازمه كم وحده من صديقاتي يا ماما ..
فاطمه: لا عادي ماما ..
ام فارس تنهدت: اللي تشوفونه .. زين يلا بدلوا خل نشوف حق ايماني والريم ..
دخلوا مريم وفاطمه وبدلوا .. اما الريم وايمان طلعوا مع ام فارس وخذوا لهم بدلات حلوه.. ايمان خذت فستان ناعم .. لونه وردي باهت وطوله متدرج من ورا لي جدام .. والريم خذت تنوره سوده كلها فتحات وبادي لونه بنفسجي .. خلصوا البنات وطلعوا من المحل ..
ام فارس: ها تبون شي بعد ؟
ايمان: اي ماما نبي اكسسوارات ..
ام فارس: وين المحل ؟
ايمان: اعتقد انه فوق ..
ام فارس: لاتعتقدين .. انا صدعت والحين الساعه 11 وما طبخت للحين ..
فاطمه: عادي خل الخدامه تطبخ ..
ام فارس: تبين ابوج يسوي لنا حفله ..
مريم: زين نرجع البيت ونجي مع فارس ولا عزيز العصر ..
فاطمه: خلاص بكلم فارس ..
ايمان: اي لازم بتكلمينه .. بعد انتي دلوعته ما يرفض لج طلب ..
ام فارس: ههههه ..
فاطمه: زين يا ايمانو .. بقوله يودينا الا انتي ..
ايمان دزت فاطمه: ترا مو احسن لج لو سويتي هالحركه ..
فاطمه: ههههههه .. كم تدفعين ؟
مريم: ههههه ..
الريم " الله فارس بيودينا .. يا رب يوافق " ..
ام فارس: بسكم سوالف .. خلاص اتصل بالدريول يجيب السياره ..
مريم: اي خلاص ضمنا فارس ..
ايمان: المشكله مو بس فارس .. حتى عزيز ما يرفض لها طلب ..
فاطمه: يا ربي هالبنت وايد تغار مني ..
ايمان: هع .. اغار منج .. في احلامج ..
مريم: ايمانو ما تخلي في قلبها الكلمه ..
الريم: اللي في قلبها على لسانها ..
ام فارس: بسكم سوالف .. يلا الدريول عند الباب ..
ركبوا السياره متجهين لبيت بوفارس ..
ام فارس: الريم يمه ..
الريم: هلا مرت عمي ..
ام فارس: بتنزلين عندنا ؟
الريم: اي ..
ام فارس: زين يمه ..
وصلوا البيت .. وكانت ايمان نازله وهي محتجه .. فارس كان فالحوش ويتكلم فالتلفون .. الريم استانست يوم شافته ..
فاطمه " اكيد يكلم حبيبة القلب " ..
ام فارس: فارس يبه تعال ..
فارس: حياتي خلج معاي عالخط ..
مناف: اوكي ..
فارس قرب منهم: هلا يمه وباس راسها .. آمريني ..
ام فارس: ما يآمر عليك العدو فديتك .. هاي الفاتوره عطاني اياها ابوك اليوم الصبح ..
خذها فارس من امه وقراها : اي عرفتها .. خلاص مو مشكله انا بكلم ابوي .. وكان ماسك التلفون وحاطه على كتفه عشان ما يطلع الصوت .. التفت على الريم بنت عمه ..
فارس: شحالج الريم ؟
الريم باحراج: الحمدلله .. انت شو اخبارك ؟
فارس: الحمدلله .. والله كبرتي بنت عمي ..
طالعته الريم وابتسمت .. ابتسم لها فارس وصد ..
فارس: تبين شي الغاليه ؟
ام فارس: لا فديتك ..
فارس: زين عيل .. مشى صوب الحديقه وكمل مكالمته ..
الريم كانت اطالعه باستغراب " من يكلم فارس ؟ وليش ما سكر التلفون يوم شافنا ؟" ..
فارس: حياتي ..
مناف: هلا وغلا ..
فارس: تعرفين شو في خاطري ؟
مناف: شنو حبيبي ؟
فارس: ودي اكل من ايدينج ..
مناف منحرجه: ها ..
فارس: سمعتيني يا حياتي .. اليوم ما راح اتعشى الا من ايدينج سمعتي ..
مناف: فارس ..
فارس: عيون وقلب فارس انتي ..
مناف: بس ..
يقاطعها فارس: بس شو يا قلبي .. ناقصج شي .. بجيبه لج العصر
مناف: لا مو ناقصني شي حبيبي خيرك مغطينا .. بس ماعرف شاسوي لك ؟ وبعدين وش بقول لامي لو شافتني اطبخ ..
فارس: قولي لها باطبخ لاخواني ..
مناف: زين ولو جيت بتقولي حق من هالاكل ؟
فارس: اي صح .. تدرين انتي سوي العشا وانا بمر على فيصل اخوج .. ولما امر عليه انتي قولي لامج نحط لرفيج فيصل شوي من عشانا ..
مناف: ممممم .. والله انك داهيه يا فارس ..
فارس: فديت قلبج والله .. كل شي لعيونج يهون يا قلب فارس انتي ..
مناف مبتسمه: فديت قلبك حبيبي .. زين شتبيني اسوي لك ؟ وش في خاطرك ؟ ولا شو تحب انت ؟
فارس: والله اي شي من ايديج حلو ..
مناف: في اكله تحبها تبي اسويها لك ؟
فارس يفكر: ممممم .. خلاص سوي لي معكرونه ..
مناف مبتسمه: زين تبيها باللحم او الدجاج؟
فارس: على ذوقج حياتي ..
مناف: بس هاي اللي في خاطرك؟ ما ودك بشي ثاني ؟
فارس: لأ حبيبتي ..
مناف: خلاص الساعه 7 بيكون عشاك جاهز ..
فارس مبتسم: فديت حياتي مناف ..
مناف منحرجه: والله انك تستاهل يا قلبي ..
فارس: تعرفين شو اللي استاهله انا ؟
مناف: ايش ؟
فارس: ماستاهل غير قلبج يا مناف ..
مناف بثقه: وقلبي بين ايدينك يا فارس .. بس لا تجرحه ..
فارس: قلبج بحطه بين ضلوعي ..
مناف: فديتك يا فارس .. الله لا يحرمني منك ..
فارس: ولا يحرمني منج يا قلبه انتي ..
مناف: زين حبيبي .. خل اروح محاضرتي .. وبكلمك اول ماخلص ..
فارس: زين حياتي ..
مناف: الله يحفظك حبيبي ..
فارس: مع السلامه ..
سكرت من فارس وحضنت التلفون وهي مبتسمه .. رفعت راسها الا تشوف الدكتور يطالعها ومبتسم .. يوم تلاقت عيونهم نزل راسه ودخل قاعة المحاضره ..
مناف " من متى كان واقف ؟ " .. دخلت وراه القاعه وقعدت على زاويه ..
كانت الساعه 12 ونص الظهر .. بدى الدكتور المحاضره .. كان يراقب مناف بين فتره وثانيه .. وهي مب قادره تحط عينها بعينه .. كانت مرتبكه من نظرات الدكتور لها .. الدكتور كان من نفس الجنسيه ( خليجي ) اسمه الدكتور حامد .. مناف ماخذه هالمقرر معاه الفصل الاول بس ما كان منتبه لوجودها مثل هالفصل .. نظرات الاعجاب واضحه عليه .. بس مناف مافي قلبها غير فارس .. الدكتور خلص المحاضره ومناف كانت سرحانه وتكتب في كتابها .. طلعوا البنات ولا انتبهت لهم .. فجأه حست بشخص قريب منها ..
حامد: مناف ..
مناف رفعت راسها بارتباك: نـ نـ نعم دكتور .. التفت حولها وما لقت البنات .. حست بخوف ..
حامد: شفيج خايفه ؟
مناف قامت من مكانها: ما فيني شي .. لازم اروح تأخر الوقت ..
حامد: مناف لحظه شوي ..
مناف منزله راسها: نعم دكتور ..
حامد: ليش هالشرود في المحاضرات يا مناف ؟
مناف: اي شرود دكتور .. انا معاك طول المحاضره
حامد: لا مو معاي .. يا مع الجوال .. او تكتبين في كتابج .. جسمج معانا وبالج في شي ثاني .. انتي عندج مشاكل من اي نوع فالبيت ؟
مناف: لا ماعندي مشاكل دكتور ..
حامد: لا تقولين لي كل شوي دكتور ..
مناف: ان شاءالله ..
حامد: قولي لي وش سر شرودج فالمحاضرات ؟
مناف: ماعندي اي مشاكل ..
حامد: على راحتج يا مناف .. ولو بغيتي شي حاضر لج اي وقت يا مناف ..
مناف: مشكور دكتور ..
حامد " آه لو اعرف اللي شاغل بالج" : زين ديري بالج على نفسج وشدي حيلج يا مناف .. ولو احتجتي شي قبل الامتحان لا تترددين تجيني المكتب ..
مناف منزله راسها: ان شاءالله .. قامت بتطلع من القاعه ..
حامد: مع السلامه يا مناف ..
مناف وهي طالعه: مع السلامه .. طلعت وهي حزينه .. كانت تمشى ببطىء وهي حاسه ان الدنيا ادور فيها .. وصلت الكفتيريا خذت لها عصير برتقال وطلعت تقعد في مكانها تحت الشجره اللي مقابله الكفتيريا .. شربت العصير وهي تشوف البنات ..
مناف " آه من هالدكتور خوفني والله خوفني .. ليش هالاهتمام منه؟ اخاف اقول لفارس شي وتستوي سالفه لا بسكت احسن .. وهالدكتور بتجاهله " شربت العصير وهي حزينه .. شافت التلفون ولقت مكالمه من فيصل اخوها اتصلت له ..
مناف: متى رجعت من المدرسه ؟
فيصل معصب: شردت من المدرسه ..
مناف بخوف: ليش شمسوي؟
فيصل: متهاوش ..
مناف: مع من؟ وليش؟
فيصل: المدرس زفني اليوم فالصف .. وبعدين وداني عند الاخصائي وكمل عليه الاخصائي ما خلوني اتكلم .. وضربني المدرس بالعصا على ضهري وجدام الاخصائي .. وهالاخصائي يطالعني بكل برود وساكت عن المدرس عصبت مسكت ولده وضربته ضرب ..
مناف: ليش يا فيصل ؟ احنا مو ناقصين .. وليش تضرب ولده ؟
فيصل: عشان يذوق اللي ذقته .. دام ما يرضى الضرب على ولده احنا بعد عيال ناس ..
مناف: آه يا فيصل .. امي تدري ؟
فيصل: لأ .. انا مو فالبيت .. اتمشى فالفريج .. بعد شوي بروح البيت على وقت رجعتي بدخل البيت .. بس مناف ارجوج لاتقولين لأمي شي ..
مناف: زين شبتسوي انت .. بكره لازم اروح معاك اشوف السالفه ..
فيصل: لا ما تدخلين المدرسه .. كلها ريايل ..
مناف بعصبيه: عيل من اللي بيروح ؟
فيصل: انا بكلم فارس ..
مناف: لا يا فيصل .. مانبي نثقل على الريال .. هو ما قصر فينا بس ما ندخله في مشاكل معانا ..
فيصل يصرخ: ولا على بالج بخليج تدخلين المدرسه وسط الريايل ولا بخلي امي .. لا يبه عيب ..
مناف: زين لا تصرخ ..
فيصل: انا آسف .. ما كنت اقصد .. والله ظلم .. حرام عليهم ..
مناف: حسبي الله ونعم الوكيل .. زين شبتقول لفارس ؟
فيصل: بقوله الصج بعد تبيني اكذب .. انا بصراحه ما غلطت في شي .. وانا مب حيوان عندهم عشان انضرب ..
مناف بحزم: محشوم ياخوي .. محشوم .. آآه .. زين متى بتكلم فارس؟
فيصل: يمكن اتصل فيه الحين ..
مناف: زين طمني .. وعن الهياته فالفريج وارجع البيت ..
فيصل: خلاص بكلم فارس وانا رايح صوب البيت ..
مناف: زين ..
فيصل: يلا مع السلامه ..
مناف: الله يحفظك .. " آآه مو ناقصين .. هم نايف اللي راح .. مابي فيصل يضيع .. راس مالي هالثنين الله يسخرهم لي ويستر عليهم ويحفظهم يا رب " ..
سكر فيصل وعلى طول اتصل بفارس اللي كان قاعد مع امه وخواته فالصاله .. رن جواله وشاف الرقم واستغرب
فارس: هلا فيصل ..
فيصل: شحالك فارس ؟
فارس: طيب الله يسلمك .. انت علومك؟
فيصل: الحمدلله ..
فارس: ما داومت اليوم ؟
فيصل: بلا بس ..
فارس: ليش سكت ؟ شو صاير .. وقام عن هله راح يتكلم بالغرفه الثانيه ..
فارس: شو صاير يا فيصل ؟
فيصل: شارد من المدرسه ..
فارس باستغراب: ليش ؟
فيصل تنهد: آآه .. بقولك السالفه وانت احكم يا فارس ..
فارس: قول يبه ..
فيصل: المدرس هزئني .. وطردني من الصف و وداني عند الاخصائي وهزئني الاخصائي .. والمدرس ضربني بالعصا جدام الاخصائي والاخصائي ما قال شي .. ولا عطوني فرصه ادافع عن نفسي او اتكلم .. انقهرت .. وشفت ولد المدرس .. مسكته وضربته ضرب من القهر اللي فيني .. فارس انا مب حيوان انطق والاخصائي ساكت .. عشان ماعندي ابو يسندني ولا يوقف معاي يضربوني .. ليش؟ ليش؟ كل الصبيان اللي ابوه يجي ويفازع له ويقيم المدرسه لو حد حرك ولده .. وانا عشاني يتيم يلعبون فيني والله اني مثلهم مب حيوان والله مثلهم .. صاح فيصل بقهر
فارس خنقته العبره .. وهو يسمع كلام فيصل .. ذبحته كلمه فيصل ( وانا عشاني يتيم ) .. وايد تأثر فيها فارس ..
فارس: زين امك تدري؟
فيصل: لأ .. توني مكلم اختي وقلت لها هي بس .. وعطتها خبر اني بتصل وبقولك .. لا الشيخه كانت تبي تروح المدرسه وسط الريايل .. بس انا قلت لها ما تروح ..
فارس: عدل كلامك .. شوف بكره بمرك الساعه 9 وبروح معاك المدرسه ..
فيصل: اخاف امي تسألني ليش بروح متأخر ؟
فارس: خلاص روح المدرسه .. وانا بمرك الساعه 9 وبتفاهم معاهم .. بس انت لاتكدر خاطرك ولا تزعل .. روح البيت وتغدا وراجع دروسك .. وبمرك اليوم على الساعه 7 ..
فيصل: ان شاءالله ..
فارس: بس لاتقول لامك عن اي شي صار ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك