رواية اطلالي ملت وقوفي -5
يكفي علاقتها المتأزمه مع زوجها وأهله على مسألة راتب الـ9000 ريال اللي مايتركون لها مصروف إلا 1000ريال بس والباقي ياخذونه منها ودايم تشتكي لخالي وتطلبه يدور لها حل ..
وهذا كله بجهه وشك وغيرة زوجها بجهه ثانيه معيشها بجحيم وإنتي تعرفين إذا الشك دخل حياة أي زوجين تخرج منها الراحه والسعاده..
أستغفر الله.. أنا ما أتكلم عنهم من باب الشماته.. لأ حرام.. لكن كل أنسان ياخذ جزاه بالدنيا اللي يأذي الناس اللي يسلط عليه من يأذيه..
ياراويه خليها على الله يامالك بتشوفين بهالدنيا من مصايب ومشاكل ..لأن الحزازات والحساسية بين الناس باقيه طول العمر.. والناس فيهم الحقود واللئيم والمتكبر والقاسي مثل هذولا شلون بيتسامحون ويغفرون لغيرهم زلاتهم..؟
الله سبحانه وتعالى يسامح ويغفر ويقبل التوبه,, والناس يتجاهلون الشي هذا مايجهلونه..
راويه: آآآه يالجين كلامك يجنن كله حكم والله إني فخوره فيك,, مو متصوره حياتي لو تزوجتي وتركتيني..!
"ضحكت لجين": عن الدلع ويالله قومي بدلي ملابسك لا نتأخر على أمي ترى بتمشي وتتركنا...
¥¥¥¥¥¥¥¥¥¥¥¥¥¥¥¥¥¥¥¥¥¥¥
وفي بيت درر .,. دخل سلطان الصاله وكانت جالسه زوجته سناء تبرد أظافرها.. ناظر فيها وأتجه للتليفون الثابت اللي أزعج البيت برنينه..
سلطان: هـــلا؟
: السلام عليكم..
سلطان: أهلين وعليكم السلام..
: ممكن أكلم درر؟
سلطان: درر.. طيب أبشري بس أنتظري دقيقه أناديها لك..
"سناء وهي تناظر سلطان بنظرات حاده": مين اللي تبغى درر؟
"سلطان بصوت هادي ومسموع": صديقتها.. روحي ناديها لا تطول البنت وهي تنتظر..
"سناء بصراخ": خــــــيــــــر إنت وياهــا؟؟ تهلي فيها وترحب وأبشري؟ والله على بالي إنك تكلم عمتك مو وحده من صديقات أختك..
"سلطان ببرود": قصري حسك ولا تصرخين.. كان رديتي على التليفون وهو يرن قدامك بدل ماتزعلين؟
وبعدين وش تبغيني أقولها.. أنثـبـري أنتظري أختي لما أناديها؟
"سناء وبصرخه أقوى": طيب ليش قلت هـلا وماقلت ألـو؟ بتطيـح البنت بأسلوبك الحلو..
سلطان: سناء عـيــب هالكلام أحترمي زوجك ok .. ولا تخلين هالعقال يرقص على جسمك لأن صار لك كم يوم ماأنطقيتي..!!
"حطت سناء أيدينها على خصرها وهي تنافخ بعصبيه": إذا فيك خير ورني شطارتك أشوف وهنا بالصاله..
سلطان: أستغفر الله العظيم..
سناء: سبحان الله مو توك هلا وأبشري والحين تستغفر ليه شايفني (مجنونه) قدامك..
"فتح سلطان فمه بيرد على سناء ودخلت درر الصاله وهي ماسكه كتاب الكيمياء":
وش فيكم أصواتكم واصله لآخر البيت..؟
"سناء وهي تأشر لدرر": تعالـي درر كلمي صديقتك تنتظرك عالتليفون.. وأسأليها وش رايها بصوت وبأسلوب سلطان عجبها وإلا.....
"ماكملت كلامها إلا وسكتها كـــف سلطان...!!!! "
صرخت درر وحاولت تهدي أخوها بس هو بعدها عنهم وسحب زوجته من شعرها للدور الثاني لشقتهم.. زعلت درر وتضايقت مع إن هالمشاكل روتين يومي بين سلطان وزوجته بس حمدت ربها إن بنتهم رهـــف اللي عمرها سـنــتيــن نايمه بغرفتها وماكدر نومها مشكلة أمها وأبوها"..
أنتبهت درر لسماعة التليفون المرفوعه..رفعتها بتكلم لكن المتصله قفلت..
ناظرت بكاشف الرقم (رقم مـيـار)..
رجعت أتصلت عليها وأنتظرت ماأحد رد_ أتصلت مره ثانيه وردت ميار . .
درر: ياخايسه ليه ماتردين؟
ميار: خفت تكون زوجة أخوك هي اللي متصله علي بتخانقني؟
درر: لا عاد مو لهالدرجه هذي والله ماتلوم إلا نفسها لو سوت كذا وبدون سبب بعد..
ميار: أجل اللي تغلط على زوجها وتحاكيه بالطريقه هذي تستبعدين منها شي؟
درر: يؤيؤ.. أكيد سمعتي كل شي؟
ميار: لحد صوت الطراق هنا قفلت لا يرجعون لي ويحطون حرتهم فيني وأنا مو ناقصه مشاكل ..
ميار: المهم خلينا منهم بقولك عن موقفي المصيبه والسخيف
مع لـزيـز آآآآه يادرر بموت من القهر..
درر: أوف ليه مصيبه إنتي شفتيه_ صار بينكم شي؟
ميار: أنا وقفت قدامه بس ماشفته ولا ناظرت فيه؟
درر: مافهمت أحكي لي وش صار بالتفصيل ..
" حكت ميار الموقف لدرر وخنقتها العبره وشوي وتصيح"..
درر: هدي أعصباك وتعوذي من الشيطان.. ترى لو فكرتي بالموقف زياده بتحطم نفسيتك وبتعذبين قلبك..
أعتبري ولا شي صار وأستغلي فرص ثانيه تبيني له مشاعرك..
ميار: لأ خلاص طابت نفسي أتمنى إنه يرجع للشرقيه اليوم قبل بكره..
درر: أفــا ليه التشاؤوم ليه؟ أنتظري فرص..... .....
"يقاطعها صوت أمها وهي تتناقش مع سلطان بصوت عالي"...
"درر بهمس": باي باي ميار أكلمك بوقت ثاني..
"بسرعه راحت لأمها وسلطان اللي واقفين قدام باب الدرج ..
صرخ سلطان بوجه درر":
روحي جيبي رهف عشان تآخذها أمها معها..
درر: وين بتروح سناء؟
سلطان: بتنقلع لأهلها..
"نفذت درر أوامر أخوها ودموعها تحجرت بعيونها لأنها تحب رهـف ومتعلقه فيها وزعلت لأنها مابتشوفها بعد اليوم"...
* * * * * * * * * * * * * * * *
مــر الأسبوع بسرعه
وكان فتره بريك لطالبات الثانويه عشان يذاكرون بتركيز وهذا الترم يعتبر صعب عليهم لأن يحتاج معدل مرتفع..
كانت الأتصالات بين الشله شبه مقطوعه بسبب المذاكره..
وكان صباح يوم السبت صباح حـلـو.. السماء تزينها الغيوم والهواء بــااااااارد مع رذاذ المطر . .
صباح تفاؤل وفرح من نوع آخر يشوبه الخوف والترقب من أسئلة الأختبارات..
وبرغم الخوف كانوا الشله مايستغنون عن زاويتهم المعروفه وما يتركون ضحكهم واستهبالهم وأغانيهم والأهـم
*دفتر الصراحــه*..!
يـــوم الــســبـت...
(11/20)
معيضه: اللـــه لايـوفـقـها على هالأسئله وش ذا آخر من طلع من القاعه أنا وحتى ماعطتني المراقبه فرصه عشان أراجع مدري وش كتبت أجابات حتى الآله الحاسبه نسيتها بالقاعه من الأرتباك..؟
راويه: لا تدعين على الأبله قولي الله يسامحها.. وبعدين إنتي يامعيضه دايم معارضه على أسألة الأمتحانات حتى لو يجيبونها سهله مره..
سحايب: والمشكله أن شعارها في الدراسه(مـاحـلـتـــش)..!
وتطلع الأولى على الشله..
صايره زي الدوافير يتحلطمون
دايم "مدري وش حليت ولخبطت بالأجابات" وبالأخير تطلع (الأولى) على فصول العلمي.. مو علينا هالحركات يامعيضه!
"صرخت معيضه": قــولــوا مـاشـاء اللــه ..!!
"الشله بصوت واحد":
مـاشــاءالله تبارك الرحمن..
ميريام: خلاااااص بنات أنسوا الإمتحان خلونا نسولف أحس مشتاقه أسمع أخباركم..
ميار وش أخبار لزيز.. درر قبل الأمتحان قلتي إنك محضره مفاجأة تخص علاوي.. راويه وش آخر سخافات بنات خالك؟
سميه إذا عندك سالفه مافيها فلسفه سمعينا .. بسم الله نبدأ ميار تفضلي معك المايك>>> تستهبل..!!
"ميار بميااااااعـه": ماصار شي جديد مع يزيد_ بس تغدى عندنا ثاني يوم وصل فيه وعزم أمي على العشاء بمطعم وأخذها للسوق عشان تتسوق وتشتري وسافر بعد يومين!
"ماحكت ميار للشله موقفها لما تعثرت وطاحت قدام يزيد لأنها حساسه وتزعل بسرعه وهم مابيرحمونها بالضحك والتعليقات.. بس حكت لدرر بهذاك اليوم لأن درر أكثر وحده بالشله تتواصل معها بالأتصالات"..
ميريام: من بكره تقدمين إستقالتك من هالحب الفاشل والله لو أنه حجر جامد تكسر من طول سنين اللي ضاعت بتفكيرك فيه..
"معيضه وهي تأشر على درر": الحجر الجامد عند هذي اللي حتى مايعرف أسمها ميار اهون منها بكثير على الأقل فيه أمل 20% مو درر مـافيـه أمـل مره وحده!!
سميه: ههههههههه حرام عليك معيضه زيدي النسبه لاتحطمين البنت...
ميريام: درر وش المفاجأه اللي محضرتها لنا..
(فتحت درر شنطتها وهي بتطير من الفرحه وطلعت منديل بوسطه كبكات لونها ذهبي..)
:هذي حق عـــلـــي!!!!!!
الشله: وااااااااااااو روعــــــه..
ميريام: أحكي لنا بالتفصيل وش جابها لك..؟
"درر بحماس": بهذاك اليوم كان أخوي سلطان عازم أصدقاءه على العشاء وبعد مافضوا رحت لمجلس الرجال أنظف الحوسه اللي فيه.. المهم.. دخل راكان المجلس ولما خلصت تنظيف ومد لي أيده وعطاني الكبك الثانيه..
راويه: مقاطعه راكان كم عمره_ عفوآ بنات أنا أهتم بالتفاصيل..
درر: تسع سنوات..
ميريام: أوووه راويه لاتقاطعين درر..
"كملت درر": سألت راكان الكبك لمن!
قال: (حق عـلــي)
أنا لما قال علي مسكت بالباب لاأطيح ع الأرض من الفرحه..
سألته: هو ناسيه وإلا مضيعه؟
ومن طفاقتي بغيت أسأله هو متعمد هالحركه..؟ هههههههههههه قال راكان; هو ضيع وحده وقبل يطلع عطاني الثانيه وقال إذا لقيت اللي ضايعه أحتفظ فيه عندك...!!!!!
ميريام: وش تفسير كلمته هذي أحتفظ فيه؟ أكيد متعمد وإلا وش قصده بهالحركه..
من قدك درر خلاص علاوي طلع يحبك ومو ناقص إلا يجي ويخطبك ونحضر عرسك ونرقص..!!
"ضحكت سحايب": من قدك درر ميريام خطبت لك وسوت لك عرس هههههههههههههههه
ميار: والله يحمد ربه علي لو وافقت درر الـمــنـه عـلـيـه'''
"سحايب وهي تكتم ضحكتها": هذا إذا مـاتزوج غيرها هههههههههه..
"سميه بهمس": مـيــار مـيــار ناظري وراك!!
ميار: مابي ألتفت على وراء أكيد البنت المعجبه فيني واقفه تناظرني صـح؟
سميه: صــح شكلها بتجي تكلمك بس خجلانه منك...
ميار: واااا قردي_ مدري وش تبى فيني من بداية الترم وهي تلاحقني بنظراتها..
سحايب: طنشي بنات أولى بمدرستنا يتركون الدراسه على جنب و يتفرغون للإعجاب..
"سميه تصرخ": قربت عندنا سكووووت بنات..
-: السلام عليكم_ ميار بغيتك شوي..
"معيضه تناظرها بنص عين":
وش تبغين فيها؟
"البنت بنظرات حاده وقويه خوفت الشله": دقايق بس!!
قامت ميار مع البنت والشله أنفجروا ضحك بصوت عالي ومسموع بس البنت ماأهتمت..
سميه: يـمــاااااه شفتوا كيف نظراتها وطريقة مشيتها كأنها
رجـــاااااال..؟
راويه: على قولة جدتي' ادخل على الله' أستغفر الله هذي مافيها ذرة أنوثه..
معيضه: ههههههههههههه والله أنا خفت شفتوا شلون تطالعني لما سألتها شكيت بحالي كأن اللي قدامي رجال مو بنت..!
ميريام: خلاص بنات من بكره لازم نـتـغـطـى عـنـهـا..!!!!
الشله: ههههههههههههههههههه
درر: تخيلوا أشكالنا وإحنا نتغطى عنها..
"ميريام بحماس": سميه.. عطيني دفتر الصراحه..
"سحايب بتعجب": غريبه !! ميريام تطلب دفتر الصراحه؟؟
"أبتسمت ميريام": اليوم راح أخربها وأكتب وأرسم فيه..
"معيضه وهي تفكر بالبنت بصوت مسموع": أنا دايم أشوفها بس أول مره أنتبه لتصرفاتها..
راويه: وأنا بعد بس بصراحه خايفه على ميار وودي ماتحتك بالبنت هذي آبدآ..
"أخذت ميريام الدفتر وفتحت على صفحه جديده ورسمت بالقلم الرصاص البنت المعجبه بميار"..
درر: مارسمتي وجهها؟
ميريام: هذا مقفاها..
سحايب: أهم شي أرسمي كبكات بأكمام مريولها..
"شهقت راويه": لابسه كبكات..!!!
سحايب: لأ أمزح إحنا قعد نتخيل هيأتها..
درر: ولاتنسين الشماغ..
"كتبت ميريام فوق بأول الصفحه (معجبه ميار) وكتبت التاريخ واليوم... أعطت سميه الدفتر": ماعرفت أرسمها عدل..
"ضحكت سميه وهي تناظر بالرسمه": ليش كتف نازل وكتف مرتفع..
ميريام: يعني تمشي مشية شاب طايش..
راويه: ليش راسمه زقاره بيدها أحس إنك مره مبالغه..
ميريام: هذا رسم كاريكاتيري يعبر عن حالة الإنحاط اللي وصلوا لها البنات في هذا الزمان واللي ربي أنعم عليهم بنعمه وهم يدوسون عليها ويتخذون بدائل كثير وأولها (التشبه بالرجــــــال)..
سميه: بالواقع فيه بنات كثير يدخنون وزادت نسبتهم بشكل مخيف..
"معيضه بصوت شبه ضاحك": سميه.. وش جاب سيرة التدخين ترا البنت ماتدخن...
سميه: أنا أتكلم عن سلوكيات البنات بشكل عام..
"معيضه بأحباط": سلوكيـات؟؟ يالييييل ماأطولك بدأت فلسفة سميه...
سحايب: يمكن البنت هذي متربيه في بيت أهلها مع أخوانها الشباب وهي البنت الوحيده بينهم وشي طبيعي تتأثر فيهم..
ميريام: بس هي بـنــت/ إنثـــى.. لازم ماتنسى هذا الشي .. أنا أعرف بنات كثير تربوا مع أخوانهم الشباب ولاتأثرت شخصياتهم بالعكس ألاقيهم قمة بالأنوثه والرقه والدلع ..
راويه: والله حرام اللي يعملونه بعض البنات يعني ماتخجل من نفسها لما تكون هي وأخوها بهيئه متشابهه..!!
ميريام: ياحليلك ألحين أغلب الشباب صاروا يقلدون البنات بالشكل..
"معيضه بأستياء": لأ مستحيل كيف صارت شاب يقلد بنت أنا اللي أعرفه وأسمع فيه العكس..
ميريام: اللي تسمعين فيه؟ ماقد شفتي شباب كذا بالتلفزيون أو بالشارع أو بالنت..؟
"معيضه بأهتمام وهي تقرب لـميريام": لأ.. بس كيف؟
"ميريام بصوت واطي": قبل فتره دخلت موقع بالنت وقرأت موضوع يتكلم عن الشباب بأن البعض منهم صار يآخذ هرمونات أنثويه عشان تتغير هيأته وشكله من شاب لبنت..
"راويه بضيق": طيب ليييييه وش اللي يخليهم يتصرفون كذا_ الله سبحانه فرق الذكر عن الأنثى ولكل منهم كيانه وحقوقه.. والله مو عدل اللي يعملونه ولا يرضي رب العالمين..
سميه: هذولا الشباب ينقصهم وعي وأهتمام ومتابعه من أسرهم.. أكيد إن الأهمال واللامبالاه والتجاهل من الأسره هو اللي شجع هذا الشاب بالأستمرار في طريق الخطأ..
ميريام: عدل كلامك وغير كذا التقليد الأعمى له دور كبير في المشكله..
"درر بقهر": عمت عينهم الظاهر إن الرجال في القرن هذا انخفضت نسبتهم.. الحين صار مافيه رجـــال لا بأخلاقهم ولا بأشكالهم..
سحايب: هيييييه لو سمحتي إتكلمي عن شباب مجتمعكم..
"درر وهي حاطه إيدينها على خصرها": وش فيهم شباب مجتمعنا والله كلهم رجال والنعم فيه وأولهم أبوي وأخواني...
سحايب: أجل على أي أساس تسبين في رجال هذا القرن..
درر: أنا أقصد الشباب اللي يقلدون البنات.....
"صرخت سحايب": طيب خصصي كلامك ولاتعممين عالكل...
درر: ليش معصبـــه؟
سحايب: كلامك يخـــوف..
"معيضه وهي تضحك": أعذريها ياسحايب تبي تتفلسف مثل سميه وميريام وجابت لنا العيد..
"أبتسمت درر وهي تآخذ دفتر الصراحه من سميه": خـــلاااااص قفلوا عالموضوع كليتوني ..
?[ماعـــاد تفرق لـو خـــذاك الوقــت أو جابك
فــي الحالتين (الـمــوت) أقرب لي من ظلالـــي
إما بــ أمـــوت من الولـــه لا طول غيابــك
وإلا بــ أمـــوت من الـفــرح لاشفتك قبالــــــي]?...
في الـمـســاء...
كان ياسر وفواز رايحين لدوامهم بمستشفى وفي الطريق:
فواز: أقول ياسر متى على الله بتعرس خابر أمك قاعده تدور لك عروس!
"ياسر يحك راسه وهو يسوق السياره": بدري على الـعـرس أنا بكمل دراسـتـي..
"ضحك فواز": هههههههههههه تسـتـهـبـل..!
ياسر: مدري عنك هذا سؤال تسأله؟ أنت تدري أني لما أخطب من ناس يرفضوني بسبة وظيفتي مايقبلون سيكرتي راتبه 1600 بس ..
فواز: ياأبن الحلال كلنا في الهواء سوا.. أنت عالأقل وسييييـم شكلك حلو يكفي بس 'سكسوكتك تخقـق أثقـل بـنـت'.. حتى الحريم اللي يجون للمستشفى إذا ضيعوا طريقهم ما يسألون إلا أنت وأنا واقف بجنبك مايطالعون فيني بعذرهم والله كني "بـهـلـول" شعري قراعيط ووجهي أسود مايبان إلا عيوني وأسناني إذاااااا ضحكت..
"ياسر أنفجر بالضحك":هههههههههههههههههههههههههه
فواز: حتى الممرضات الفلبينيات لامروا من جنبك أبتسموا لك هذيك الأبتسامه الوحده فيهن شوي وينشق فمها..إيه وش عليك وسيــم!!!
ياسر: هههههههههههههههه انت ماتترك سوالفك يافواز..
أي وسامه الله يهداك على فـقــر..! لكن وش أقول الحمدلله على كل حال_الإنسان مايبي من الدنيا غير الصحه والعافيه
والله يرزقنا على قد نياتنا أهم شي النيه الصافيه..
"فواز وهو يـأشــر على سياره بأرتباك": ياسر وقف على جنب..
ياسر: خير وش فيك؟
"أنتبه للسياره" أوووووووف أنــزل أنــزل بسرعـه,,
(كان رجال بالعقد الثالث من العمر يحاول يدافع عن نفسه من شباب أثنين بيذبحونه بالضرب.. وزوجته وأطفاله الصغار واقفين بجنب السياره ويصيحون صياح يقطع القلب)
نزلوا ياسر و فواز بسرعه وأتجهوا للشباب وأشبعوهم ضرب ورفس لحد ماهربوا الشباب لسيارتهم..
,,نفضوا يديهم وملابسهم أتجهوا للسياره عشان مايتأخرون على دوامهم ,,
ألتفت ياسر على الرجال قبل يمشي وحاول يقاوم دمعه لمعت بعيونه وهو يشوفه يحظن عياله ويهدي من خوف زوجته عليه..
وأبتسم فواز وهو يسمعهم يدعون لهم أن الله يفرج عنهم كربهم ويوفقهم ويسعدهم....
ياسر: لاحول ولاقوة إلا بالله والله عيب عليهم هالشباب يضربون رجال أكبر منهم وقدام أهله وبمكان عام_الله يسامحهم ويهديهم..
فواز: تصدق بغيت أسأل الرجال وش سبب المشكله_ بس شفت حالته يرثى لها
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك