رواية نهاية حبك اعدامي -65
دخلوا من الباب الخلفي للمطبخ الداخلي .. مروا على صالة الحريم والميلس الداخلي اللي قاعدين فيه عصافير الحب مريم وخالد .. طلعوا من باب الصاله اللي يتجمع فيها بوفارس مع عياله .. وقفوا في الممر وتموا يرتبون انفسهم ويطالعون انفسهم في المرايه ..
يوسف يعدل غترته: بيتكم حلو من داخل ماشاءالله ..
عبدالعزيز: عيونك الحلوه ..
يوسف: اي والله عيوني حلوه ..
عبدالعزيز: هههههه .. عليك سوالف ..
يوسف: انا اسعد انسان فالكون ..
عبدالعزيز التفت عليه: يا علها دوم هالوناسه .. شو اللي مونسك هالكثر ؟
يوسف: قلبي ..
عبدالعزيز: بعدين معاك انت وقلبك .. شو سالفتكم .. ليكون تحب يا بوخليفه ؟
يوسف: انت تتوقع ؟
عبدالعزيز: اقولك شي وتسمع كلامي ..
يوسف: ان شاءالله ..
عبدالعزيز: لو تحب .. لا تجرح .. لا تعذب .. ولا تعلق .. حب وقاتل عشان حبك ..
يوسف انبهر بكلام عبدالعزيز .. تم يطالعه وهو مبتسم ..
عبدالعزيز: انا حبيت بس من طرف واحد .. لكن انت لو تبادل الحب .. انا اقولك قاتل عشان هالحب .. لا تعذب ولاتتعذب ..
يوسف: آيه عليك يا بوسعود .. ما توقعت يطلع من هالكلام .. صج انها ماعرفت قيمتك ..
عبدالعزيز نزل راسه: زين يلا نروح الميلس لا يطبون علينا الحريم ..
يوسف مبتسم: سرينا ..
بعد ما طلعوا انفتح باب المطعم اللي مقابل الميلس الداخلي .. وقفت وحده وكانت تشوف نفسها بالمرايه ومبتسمه
فاطمه " عزيز مب هين والله ويعطي دروس فالحب .. ويوسف يا ويل حالي على يوسف .. هالانسان كل يوم حبه يكبر بقلبي .. صج انه غرشوب " .. شافت نفسها فالمرايه مره ثانيه ورتبت شعرها وطلعت عند الحريم في الحوش ..
سلموا المعازيم على اهل العروس والمعرس .. فضى بيت بوفارس من الناس .. تموا الاهل فالصاله يسولفون وهم فرحانين ..
الجد: فارس ..
فارس: نعم ..
الجد: الله ينعم عليك .. اخوك وين ؟
فارس: برا مع ربعه ..
الجد: مع ذاك المزيون ..
فارس مبتسم: اي ..
الجد: قم ناده لي ..
فارس وهو قايم: ان شاءالله .. طلع فارس وراح ميلس الريايل وما لقى اخوه .. طلع ولقاه عند الباب يسولف مع يوسف ..
فارس: ما تشبعون سوالف انتوا ..
يوسف وعبدالعزيز: هههههههههه ..
فارس: يدي يبيك ..
يوسف: روح له شوف شيبي ؟
عبدالعزيز: ترا ما نسيت الحركه وبردها لك ..
فارس: اي حركه ؟
يوسف: اقوله عزيز ؟؟
عبدالعزيز: لو نطقت حسابك عسير يا ولد خليفه ..
يوسف: هههههه .. فارس لو صدتني بروحي يمكن اقولك .
فارس مبتسم: ولا يهمك .. انت اطلع وباصيدك الحين ..
يوسف وفارس: ههههههه ..
عبدالعزيز: ريلي على ريلك .. وانت روح بيتكم يلا ..
يوسف: تطردني .. آه جرحتني يا خاين العشره ..
الكل: هههههه ..
يوسف: عن اذنكم يا شباب .. تصبحون على خير ومبروكين .. والفال لكم ان شاءالله ..
فارس: الله يبارك فيك .. وان شاءالله نفرح فيك انت وعبدالعزيز في ليله وحده ..
عبدالعزيز بعبط: احسن بعد عشان نوفر ..
الكل: ههههههه ..
يوسف حرك سيارته شوي: فمان الله ..
فارس وعبدالعزيز: الله يحفظك ..
حرك يوسف .. و فارس واخوه دخلوا البيت .. اول ما دخلوا الصاله فارس طاحت عينه على الريم بنت عمه .. كانت تناظره باعجاب وابتسامه على شفاها .. فارس صد وهو مستغرب ..
الجد: ها بوسعود ..
عبدالعزيز قعد جنب يده: هلا هلا هلا ..
الجد: شو صار على التلفون الجديد .. جبته لي ولا ؟
عبدالعزيز: اتصلت الوكاله وقالوا لي ما وصل للحين ..
الجد ضرب عبدالعزيز بالخيزران: ما منك فايده ..
بوفارس: شوي شوي عليه يبه ..
الجد: محد يتدخل ..
عبدالعزيز:آآه يا قلبي آآه ..
الجد: وجع يا عزوز .. شوله تتنهد .. عاشق ولا شايف لك شوفه ..
عبدالعزيز: لا حشى علي ماحب ولا ابي احب ..
كلمة عبدالعزيز احزنت يده ..
الجد: واللي رفع سابع سما يا بوسعود .. اني ازوجك وحده مافي مثلها ..
عبدالعزيز مبتسم بحزن: الله كريم .. وانا وراك وتحت امرك ..
مسح الجد على راس عبدالعزيز: والله انك غالي يا بوسعود ..
فاضل: شدعوه عزيز الغالي .. واحنا وين رحنا .. ؟
الجد: لا يبه محد يوصل غلاة بوسعود ..
علي: الغلا حق ناس وناس بس ..
عبدالعزيز: وايد يغارون مني .. شاسوي في عمري اذا انا محبوب هالكثر ..
علي: لا تصدق نفسك .. يالمحبوب ..
فارس ومحمد وفاضل ماتوا من الضحك ...
فاطمه: عاد كل شي ولا اخوي فديته ..
محمد طالعها بنظره خلاها تتحسف انها تكلمت ..
فاطمه نزلت راسها " ليش جي يطالعني محمد " ..
محمد شافها وابتسم لها .. رفع حاجب ونزل راسه .. هالحركه لخبطت فاطمه ..
عبدالعزيز: فديت اختي اللي فزعت لي والله ..
ايمان: اي عاد كل شي الا عزيز فديته ..
فارس: تكلمت ايمان ..
ايمان: اي نعم تكلمت ايمان ..
الجد: ملسونه هالبنت ..
بوفارس: فديتها بنت ابوها هاذي ..
فارس: من زينها ..
محمد: حدك عن ايمان .. ترا ما رضى عليها .. انت دلعك فطيم وانا ادلع ايماني ..
ايمان بوناسه: واخيرا ابتسم لي الحظ ..
ساره: من قدج يا ايمان .. محمد يدلعج ..
ايمان: اي والله من قدي ..
الجد: ملسونه ملسونه هالبنت ..
ساره: هههههه .. والله ايمان تجنن .. نصيحه يا ايمان .. استغلي محمد .. قبل ما يقلب عليج ..
ايمان: صج .. وووووي .. خل الحق على الدلع قبل ما تروح علي ..
محمد: لا والله .. احلفوا انتوا الثنتين ..
الكل: هههههههه ..
ام فارس دخلت و وراها جاسم وسلطان ..
هيا: وااي فديت طوله هالريال ..
جاسم ركض عند عمته وباسها ..
هيا: شو هالزين .. جسوم اخاف انت المعرس مب خالد ..
الكل: ههههههه ..
هيا: فديت سلطان والله .. تعال فديت قلبك خل اشم ريحتك ..
سلطان باس راس عمته وقعد جنبها ..
فاطمه تهمس لريم: سلطان يحب يسوي نفسه ثقيل جدامنا ..
الريم: هاي مشكله نعاني منها ..
فاطمه والريم ضحكوا بصوت واطي: هههههههه ..
التفت عليهم فارس: ضحكونا معاكم ..
فاطمه مبتسمه: ولا شي ..
ابتسم فارس وصد .. الريم كانت تحاول انها تتلاقى بعيون فارس بس فارس صد عنها ..
تموا الاهل يسولفون بوناسه .. وكانوا فرحانين بخالد ومريم .. كلن شل عمره وراح بيته يرتاح .. محمد خذ ساره وعياله .. بومحمد خذ عياله و زوجته وراحوا البيت .. الجد والجده وهيا راحوا بيتهم .. فضى بيت بوفارس الا من اهل البيت .. ام فارس و بوفارس راحوا غرفتهم فوق .. العيال تموا في الصاله ..
فارس: فطوم شلي العبايه انتي وايمان خل اشوف كشختكم عدل ..
جاسم: انا بعد ابي اشوفكم ..
فاطمه وايمان شلوا عباياتهم .. فارس وعبدالعزيز وجاسم بطلعوا عيونهم وهم يشوفون خواتهم بانبهار واعجاب
عبدالعزيز: تبارك الرحمن .. ماشاءالله عليكم يا خواتي .. شو هالجمال ..
فارس: لا مسكتين خواتي .. لو مو اخوكم تزوجتكم ثنتينكم بليله وحده ..
فاطمه وايمان انحرجوا .. عبدالعزيز التفت على فارس ..
عبدالعزيز: هي .. شو تقول انت ..؟
فارس: ما قلت شي غلط .. حرام اتغزل بخواتي .. فديتكم الله يحفظكم ..
فاطمه قعدت جنب جاسم: وانت ما علقت ؟
فارس: الولد اغمى عليه وهو فاتح عيونه ..
الكل: ههههههه ..
عبدالعزيز: زين الحين جمالكم يتغنى فيه الشاعر .. يوم العرس شو بتسون ؟
فاطمه طالعت ايمان: لا يوم العرس مفاجأه ..
فارس: والله مفاجأت خواتي ..
جاسم: والله انكم حلوين ..
عبدالعزيز: تسمعون حد يتكلم ؟
الكل: هههههههههههه
فارس: صح النوم ..
جاسم: انا بروح انام ..
ايمان: انا بعد بروح انام تعبانه ..
طلعت ايمان فوق مع جاسم ..
عبدالعزيز: شو صار على معاريسنا ؟
فارس: اي والله نسيناهم .. تعالوا نشوفهم ..
فاطمه: خلوهم ياخذون راحتهم ..
عبدالعزيز: بسهم بسهم .. خل يروحون يرتاحون ..
فاطمه: يجي لكم يوم ..
فارس وعبدالعزيز: ههههههههه
فارس: لبسي عباتج يلا ..
فاطمه: ان شاءالله ..
لبست عباتها وراحت ورا اخوانها .. راحوا عند الميلس .. فارس طق الباب ..
فارس: احم احم .. ندخل ؟
خالد التفت على مريم اللي ضحكت على اخوها ..
خالد: ادخلهم ولا لأ ؟
مريم منحرجه: ها ؟
خالد وهو قايم: اموت في اللي تستحي .. راح وفتح الباب ..
فارس: ليكون كلت اختنا ؟
خالد: اي والحين امزمز عظامها ..
الكل: ههههههه ..
خالد: تفضلوا ..
فارس: غصبن عنك بنتفضل .. بيتنا وكيفنا .. لا واختنا بعد ..
خالد: ههههههه .. تذلني يا فارس .. يجي لك يوم ..
فارس: ابشرك مب جاي ذاك اليوم وفجأه سكت .. " اعوذ بالله شو قلت انا ؟" ..
عبدالعزيز: الا جاي ذاك اليوم ..
فاطمه: مبروك يا خالد .. الله يسعدكم ..
خالد: الله يبارك فيج .. الفال لج يا فطيم .. التفت على فارس .. شوف الذوق والادب .. مو انت داش هاد فيني ..
فارس: لازم لازم .. توك معرس ..
خالد: ههههههه ..
عبدالعزيز باس راس مريم: مبروك الغاليه .. الله يهنيكم ويسعدكم ..
مريم: الله يبارك فيك .. والفال لك فديتك ..
فارس سلم على مريم: مبروك يا عروسه ..
مريم ابتسمت: الله يبارك فيك .. والفال لك ..
فارس: فديت قلبج والله ..
فاطمه ومريم حضنوا بعض بقوه .. والكل التفت عليهم ..
فاطمه: مبروك حبيبتي .. الله يهنيج ويسعدج يالغاليه ..
مريم خنقتها العبره: الله يبارك فيج فطيم .. ان شاءالله اشوفج عروس انتي وايمان والريم بنت عمي ..
فاطمه: فديتج حياتي ..
فارس: ليش هالفلم خواتي ؟
فاطمه طالعت فارس: فارس ..
فارس: ههههههه .. زين زين ..
مريم قعدت جنبها فاطمه .. و فارس جنب مريم الصوب الثاني ..
فارس: يلا الشيخ متى بتروح بيتكم ؟
خالد طالع مريم: مريم شوفي اخوج يطردني ..
مريم نزلت راسها وابتسمت ..
فارس: حتى هي تمللت منك ..
مريم: لأ ما تمللت منه ..
خالد: يا قلبي ..
الكل: هههههههه ..
خالد قام من مكانه وراح عند فارس: قم قم خل اقعد عند مرتي ..
فارس: يه يه يه .. لاتدز .. كيفي اقعد عند اختي ..
فاطمه بنذاله: خالد تعال عند مرتك .. وقامت من مكانها وهي تضحك ..
فارس: افا يا فطيم ..
فاطمه انا قمت عشان اقعد عندك حبيبي ..
فارس: زعلتيني ..
فاطمه: واللي يسلمك الغالي ..
فارس: لا لا لا ..
عبدالعزيز: تعالي قعدي عندي الغاليه ..
فارس: لا قعدي ما زعلت ..
خالد يهمس لمريم: فديت اللي تبي قربي ..
مريم طالعت عيون خالد: فديتك ..
خالد مسك ايدها وضغط عليها وهو مبتسم ويناظرها ..
عبدالعزيز ضرب فارس: الربع منسجمين قوموا نطلع ..
فارس بصوت عالي: تامرونا على شي ..
خالد: باذبحك يا فارس ..
فارس: هههههه .. زين باقي من الوقت 10 دقايق .. اخلص علينا ..
الكل: هههههه ..
خالد: اطلع برا ..
فارس: ههههه ..
طلعوا وخلوا خالد ومريم على راحتهم ..
فارس: الله يهنيهم .. والفال لكم كلكم ..
فاطمه: وانت بعد ..
فارس طوق فاطمه بيدينه: وانا بعد فديتج ..
فاطمه: هههههه .. زين خل اروح ابدل وبجيك الغرفه ..
فارس: انتظرج ..
دخلت غرفتها وتمت تناظر نفسها بالمرايه وهي مبتسمه ..
فاطمه " يا ترى يوسف خذ الرساله ولا لأ ؟ .. هل قاعد يقراها الحين ؟ فديته قاعد ولا نايم ؟ اموت فيه " ..
بدلت ملابسها وخذت شور دافي رخى جسمها من بعد التعب .. لبست بجامه بيضه و راحت غرفة فارس .. طقت الباب ..
فاطمه: فارس نمت ؟
فارس: لحظه شوي اختي .. زين حياتي بكلمج بعدين ..
مناف: انتظرك فديتك ..
فارس: مع السلامه حبيبتي .. سكر من مناف وراح فتح الباب لاخته ..
فاطمه: ليش قافل الباب ؟
فارس مبتسم: كنت البس ..
فاطمه: اي ي ي .. قعدت على السرير وشافت جواله مولع .. " علينا كنت تبدل يا فارس .. كنت تكلم الحب "
فارس: فطيم بقولج شي .. بس ابيه بيني وبينج ..
فاطمه التفت على اخوها وباهتمام: خير فديتك ..
فارس: اول شي ابي يكون هالشي بيني وبينج ..
فاطمه: ولا يهمك ..
فارس: ثاني شي .. لا تبينين للشخص المعني شي ..
فاطمه باستغراب" الشخص المعني؟": ان شاءالله ..
فارس: الريم بنت عمي ..
فاطمه بطلت عيونها " ليكون الريم اللي يكلمها فارس ؟!!؟ " ..
فارس: لاحظت الاعجاب عليها ..
فاطمه مو مستوعبه كلام فارس ..
فاطمه: شلون الاعجاب ؟ انت تحب الريم ؟
فارس: لأ .. خليني اتكلم وبعدين علقي ..
فاطمه: زين ..
فارس: انا اقصد انها معجبه فيني .. يعني لاحظت عليها لما تشوفني تبتسم وهي منزله راسها .. لما اسلم عليها تستحي لما ترد علي .. لما اروح بيتهم ما تصدق تشوفني فالحوش واشوفها تراقبني من الدريشه .. صادف انها ردت على التفون كم مره .. ولما اكلمها واسلم تتكلم بحيى واحيانا تسكر التلفون بدون ما تسلم .. مادري شو فيها الريم .. انا مابيها توهم نفسها بشي .. اخاف تلومني لو تزوجت انا او لما هي يجيها نصيبها .. البنت شكلها متعلقه بأوهامها ..
فاطمه بصدمه: الريم ؟!!؟
فارس: اي الريم .. انتي ما لاحظتي عليها شي .. هي ما قالت لج شي ؟ او حق ايمان او مريم ؟
فاطمه: يعني انا مو وايد مع الريم كثر مريم اختي .. بس لو الريم قالت شي لمريم اختي اكيد مرايم بتلمح لك او بتقول لي ..
فارس: اتمنى ان هالبنت ما توهم نفسها بالحب .. اخاف بعدين تكرهني ..
فاطمه: صدمتني يا فارس .. الريم !! .. زين من متى انت ملاحظ عليها هالشي ؟
فارس: والله من فتره قريبه ..
فاطمه: ما لاحظت عليها شي كلش ..
فارس: امس لما رجعتوا من المجمع ..
فاطمه: اي ..
فارس: ما نتبهتي عليها وهي تكلمني ؟
فاطمه: لا والله ..
فارس: انا محتار .. ابيج تكلمينها او توصلين لها بطريقه غير مباشره ان ما توهم نفسها باحلام المراهقات اللي هي تعيشها الحين ..
فاطمه: ممممم .. بصراحه الموقف صعب .. بس ان شاءالله بوصل لها هالمعلومه .. تصدق ما لاحظت عليها شي كلش ..
فارس: انتي تعرفين بنت عمي الريم اعدها مثل اختي .. كنت اشيلها وهي صغيره .. يعني مافكر ارتبط فيها او اتخيل يوم وحده عديتها اختي طول عمري تتغير مشاعري لها ..
فاطمه: صح .. والله بحاول .. زين اخبار الرحله ؟
فارس: خلاص رتبنا كل شي .. العزبه في انتظارنا ..
فاطمه: اهم شي المسبح ..
فارس: ههههههه .. على طاري المسبح .. بسوي فيكم حركه يالبنات ..
فاطمه: شو ؟
فارس: ههههههه .. بنتنقع فيه طول اليوم .. ما راح نخليكم تقربون بعد ..
فاطمه: واللي يسلمك فارس .. عاد نموت في الماي خلونا نستانس ..
فارس: مممممم .. بشوف الشباب لو رضوا بنخليكم بس 5 دقايق ..
فاطمه: يالظالم .. مو على كيفك انت والشباب .. يبه نبي نستانس احنا بعد ..
فارس: هههههههه .. امزح فديتح .. على فكره احتمال خوات رفيجع عبدالعزيز يجون ..
فاطمه " يوسف": من ؟
فارس: شفتي رفيج عبدالعزيز اللي دوم معاه .. واللي ابوي يحب خاله وايد ..
فاطمه" فديته شلون ماعرفه " : اي ..
فارس: هاذي هو .. احتمال خواته يجون .. عاد هالله هالله فيهم ..
فاطمه: ولا يهمك .. نحطهم بعيونا ..
فارس: ما تقصرون يا بنات محمد ..
فاطمه: انت قلتها احنا بنات محمد ..
فارس: الله يستر عليكم و يوفقكم ..
فاطمه: آمين .. زين فديتك بخليك ترتاح .. وانا بعد بروح ارتاح ..
فارس: يعطيج العافيه ..
فاطمه: الله يعافيك ..
قام فارس وطلع مع فاطمه من الغرفه ..
فاطمه: وين بتروح فارس ؟
فارس: بروح اشيك على البيت ..
فاطمه: بجي معاك ..
فارس مبتسم: تعالي ..
نزلت فاطمه مع اخوها .. شيكوا على البيت .. وبعدين كل منهم اتجه غرفته .. فاطمه نامت بهدوء ..
في نفس الوقت يوسف كان يقرى رسالة فاطمه وهو طاير من الوناسه ..
يوسف" والله انها شيخة البنات .. فديت قلبها والله " .. تم يقرى الرساله وهو مبتسم .. غطت عينه من التعب والرساله على صدره ..
شخصين ما ناموا هالليله .. مريم من وناستها بزواجها من خالد .. وفارس اللي يفكر في مناف .. اللي حبها طغى على فارس .. حب مناف بقلب فارس فضحه .. كان يفكر ويفكر في مناف .. اما مريم كانت عكس فارس .. تفكر في حياتها المستقبليه مع خالد .. حبته وحبت سوالفه .. شخصيته و عفويته .. رومنسيته وخفة دمه ..
شمس و عبير يوم جديد نسوا الكل تعب الامس .. في بيت بوفارس ام فارس قاعده مع زوجها ..
ام فارس: جهزتوا كل شي حق العزبه ..
بوفارس: اي الصبيان جهزوا لكم كل شي هناك .. والاغراض الشباب تكفلوا فيها ما قصروا ..
ام فارس يعطيكم العافيه ..
بوفارس: الله يعافيج .. وين العيال ؟
ام فارس: اللي نايم .. واللي طلع .. واللي فالحوش ..
بوفارس: نادي لي فارس يبه ..
ام فارس: ان شاءالله ..
راحت ام فارس ونادت ولدها .. دخل فارس ورا امه الصاله وسلم على ابوه ..
فارس: هلا الغالي بغيت مني شي ؟
بوفارس: اي يبه ..
فارس: آمرني ..
بوفارس: ما يآمر عليك العدو .. بس يبه شوف الصبيان في العزبه ..
فارس: شو فيهم ؟
بوفارس: ما فيهم شي .. بس ابيك تروح تشيك .. تشوف كل شي تمام .. عشان نحرك المغرب ..
فارس: من عيوني ولا يهمك ..
بوفارس: بارك الله فيك يبه .. متى بتروح ؟
فارس: بخلص لي كم شغله وبروح ..
بوفارس: والمرجوج ولد عمك بيروح معاك ؟
فارس ضحك: ههههههه .. اكيد ..
بوفارس: الله يرجكم انتوا الثنين .. على كبر استخفيتوا ..
فارس: هههههههه .. زين بقولك يبه ..
بوفارس: هلا ..
فارس: انا بركب يدتي معاي فالسياره ..
ام فارس: لأ .. اقعد عنها لا تجننها يا فارس .. المره كبيره وانت تلعب في اعصابها ..
بوفارس: ههههههه
فارس: لا عاد تكفون خلوها معاي ..
بوفارس: والله شوفها لو رضت تركب معاك خذها ..
ام فارس: صدقني باقولها يا فارس ..
فارس: لا تكفين يمه خليها تجي معاي ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك