رواية نهاية حبك اعدامي -67
بوفارس: البانشي مره وحده .. يبه ثقيله عليك .. ما تقدر عليها ..
جاسم: عاااااد ..
بوفارس: زين قوله ابوي يقولك خلني ..
جاسم مستانس: ياااااي .. وراح يركض عند عبدالعزيز ..
بومحمد: ليش تخليه خطره عليه ..
بوفارس: ادري ان عزيز ما راح يخليه .. والحين بيرجع ..
بومحمد مبتسم: هذا هو جاي ومحتج بعد ..
بوفارس: هههههه ..
جاسم: يبه ما يخليني ..
بوفارس: قلنا لك خطره عليك .. و ريولك للحين تعورك ..
جاسم ينط: ما تعورني .. عاد يبه قوله ..
بوفارس: لا يا يبه كبيره وثقيله عليك .. اركب الصغيره ..
جاسم: مابي .. ابي البانشي ..
بوفارس: زين تعال باركب معاك ..
جاسم: ممممم .. بس انا اللي بسوق ..
بوفارس: ان شاءالله ..
راح بوفارس ومعاه جاسم ..
الجد: وايد مدلعين عيالج يا مزنه ..
ام فارس: عيزت معاه يا عمي ..
هيا: ولا مدلعين ولا شي ..
الجد: الا مدلعين .. شوفي هالنتفه كل شي بغاه خذه ..
هيا: بس بوفارس ما خلاه على كيفه الحين .. هو راح معاه ..
الجد: محمد وايد مدلعهم ..
بومحمد: يبه عيالنا صج مدلعين بس بعقل ..
الجد: وين عيالكم و وين العقل ..
بومحمد: بل ..
الكل: ههههههه ..
ركب بوفارس البانشي و جاسم قاعد جدام .. شغلوا البانشي وحركوها .. جاسم كان ماسك السكان وبوفارس حاط يده فوق يد جاسم ..
جاسم: يبه شل يدك وشوفني شلون اتحكم فيها ..
بوفارس: زين ..
شل يده وجاسم كان يحاول يلف بس ماقدر .. ضحك عليه بوفارس ..
بوفارس: هههههه .. قلت لك ثقيله ..
جاسم مسك يد ابوه: زين لف انت ..
لف بوفارس وجاسم كان مستانس ..
جاسم: يبه روح صوبهم خل نحفص شوي ..
بوفارس: هههههه ..
راح صوبهم وغبر عليهم .. جاسم تم يضحك عليهم ..
جاسم: ههاااي .. غبرنا عليكم ..
بوفارس: مب هين يا جسوم ..
جاسم: يبه قولهم اني انا اللي غبرت عليهم ..
بوفارس: هههههه يالعيار ..
جاسم: عاد يبه قولهم ..
بوفارس مبتسم: زين ..
راحوا عند الشباب ونزل بوفارس ونزل معاه جاسم ..
جاسم: شفت يا عزوز ..
عبدالعزيز: شو ؟
جاسم: حفصت عليكم .
عبدالعزيز: صدقتك ..
جاسم: اسأل ابوي ..
بوفارس ابتسم لعبدالعزيز وغمز له: اي جويسم هو اللي حفص عليكم ..
عبدالعزيز: خطير الولد العيار ..
الكل: هههههههه ..
راح جاسم مع سلطان وفهد يلعبون في البطابط الصغار ..
اما الشباب طلعوا من العزبه بالبانشيات .. واللي هم عبدالعزيز ويوسف وفاضل وعلي .. البنات على طول طبوا المسبح قبل ما يقهرهم فارس ويخرب عليهم ..
الريم: وااي الماي يجنن ..
فاطمه: اي والله .. امس قهروني وهم يسبحون ..
مريم: لا عادي ..
ايمان: اكيد عادي .. بعد الحب معاهم شلون مو عادي ..
الكل: ههههههه ..
مريم نطشت الماي عليهم: مالت عليكم ..
الريم: لا تزعلون مرت اخوي ..
فاطمه: اموت انا في مرت اخوي .. ههههه
مريم: فديت الريم والله .. اخت ريلي ..
ايمان: بدت المصلحه من الحين ..
فاطمه: اي لازم تضبطها ..
الريم: هييييييي ..
الكل: ههههههه
هيا: فديت البنات انا ..
فاطمه: عميمه يلا طبي معانا ..
هيا: انا جايه مخصوص عشانكم ..
البنات: ياااااي ..
هيا مبتسمه: والله انكم مهابيل ..
الريم: يلا عميمه شو تنتظرين ..
هيا: ووووي .. صبروا خل اشيل اللي علي ..
فارس كان ينادي من بعيد: فطيم .. فطيم ..
هيا: فارس لا تجي البنات في المسبح ..
فارس من ورا الحاجز: ابي فطيم شوي ..
فاطمه: اسمعك شو تبي ؟
فارس: تعالي مابي اصرخ ..
فاطمه: زين ..
طلعت من المسبح .. لفت الفوطه وراحت حق اخوها ..
فاطمه: هلا فارس ..
فارس: وين حطيتي ملابسي ؟
فاطمه: في غرفتنا ..
فارس: وين في غرفتكم ؟
فاطمه: في الكبت .. تعال معاي بطلعها لك ..
فارس: زين ..
طلعت من المسبح ومشت مع اخوها .. راحوا الغرفه وعطته الشنطه .. وهم طالعين رن جوال فارس وكانت الرنه عالي مستواه .. ابتسم وكتم الرنه .. فاطمه انتبهت له ..
فارس: مشكوره اختي ..
فاطمه: حاضرين لك الشيخ ..
راحت فاطمه المسبح وشافت عمها ( بومحمد ) طاب المسبح معاهم ..
فاطمه: عمي معانا .. وناسه ..
بومحمد مبتسم: يحليلكم ..
هيا: وين رحتي فديتج ؟
فاطمه: رحت اعطي فارس اغراضه ..
هيا: زين يلا امشي ..
فاطمه: زين صبروا شوي .. فتحت المخزن وطلعت الكوره ..
ايمان: يلا فريق ..
بومحمد: من معاي ؟
الريم: انا ..
ايمان: وانا ..
هيا: ومن معاي ؟
فاطمه: انا ومريم ..
هيا: يلا فطيم شوتي الكوره ..
شاتت فاطمه الكوره وطبت الماي .. دخلت عليهم ساره مرت محمد ومعاها عيالها .. تمت ام فارس تشوفها وتشوف عيالها ..
ام فارس " متى بشوف مرت فارس وعياله يلعبون حولي ؟ الله يهديك يا فارس "
تموا البنات يلعبون مع عمهم وعمتهم .. والجده وام فارس وام محمد وساره .. كانوا يتفرجون عليهم ..
اما شباب البانشيات كانوا يستعرضون برا العزبه .. ومستانسين على الآخر ..
فارس كان يكلم مناف ..
مناف: متى بتكلم فيصل ؟
فارس: امج موجوده ؟
مناف: اي ..
فارس: اول ما يرجع من المدرسه باتصل له .. وبكلم امج ..
مناف: زين ..
فارس: شو رايج اخذج معاهم ..
مناف: خير ..
فارس يضحك: هههههه .. تعالي بركبج الخيل ..
مناف: لأ مابي ..
فارس: ليش ليكون تخافين ؟
مناف: مممممم .. لا ماخاف ..
فارس: عيل ؟
مناف: مابي ..
فارس: زين بركبج البانشي وراي ..
مناف: بعد لأ ..
فارس: اكيد تخافين من البانشي ..
مناف بدلع: عاد فارس ..
فارس " اموت فالدلع والله": زين زين يالدلوعه ..
مناف: انا مو دلوعه ..
فارس: الا دلوعه واموت في دلعج ..
مناف انحرجت وما ردت ..
فارس: دلوعه ..
مناف: انا مناف ..
فارس يستعبط: لا كنت انادي اختي الصغيره ..
مناف: مالت عليك ..
فارس: ههههههه .. انتي دلوعتي انا يا مناف ..
فارس: واااي فديت اللي ما تبي والله .. خلاص يا عمري عاد ..
مناف: زين انا بسكر الدكتور دخل القاعه ..
فارس: حبي زعلانه ؟
مناف مبتسمه: لا حبيبي ..
فارس: فديت قلبج الكبير ..
مناف: زين ماقدر اتكلم .. بعد المحاضره باكلمك ..
فارس: ان شاءالله ..
سكر منها طير التلفون فالهوا ومسكه ..
محمد: حلاه عليك يالعاشق ..
فارس: هههههه ..
محمد: شو تسوي هني قوم نروح برا شوي ..
فارس: الشباب وينهم ؟
محمد: انهبلوا مع البانشيات طلعوا برا العزبه ..
فارس: زين قوم نشوف الخيول شوي ..
محمد: يلا من زمان ما ركبت الخيل ..
فارس: زين الشيخ .. عطني ظهرك خل البس ..
محمد: احم احم .. زين ..
لبس فارس بنطلون رمادي لين تحت الركبه .. وتي شيرت ابيض مكتوب عليه بالعربي ( يا قلبي عليك يالفارس ) مشط شعره .. والتفت على محمد ..
فارس: يلا بوالشباب ..
محمد: هالزين كله حق من ؟
فارس: خل عنك السوالف .. القلب مو هني ..
محمد: هههههه .. مسكين يالقلب ..
فارس: لا تضيع الوقت يلا ..
محمد: زين زين ..
طلعوا من الفيلا .. وراحوا صوب الاسطبلات .. كل واحد طلع له خيل وركبه ..
محمد: يا محلا الفروسيه ..
فارس: احب الخيول ..
محمد: تسابق ؟
فارس: يلا ..
كل منهم ضرب الخيل وتسابقوا .. شافهم بوفارس واستانس على اشكالهم وهم يتسابقون ..
بوفارس: ماشاءالله عليهم ..
الجد: من ؟
بوفارس: فارس ومحمد .. خياله الله يحفظهم ..
الجد يطالعهم: الله يحفظهم .. هاي الرجوله والهوايه الزينه .. مو هالبطابط اللي بطت روسنا ..
بوفارس: ههههههه ..
الجد: الساعه كم الحين يبه ؟
بوفارس يطالع ساعته" الساعه 12 يبه ..
الجد: متى بيسنعون لنا الغدا ؟
بوفارس: بدري يالشيبه ..
الجد رفع الخيزران: سود الله ويهك .. شيبه يكسر عظامك ..
بوفارس مات من الضحك على ابوه: ههههههههه ..
الجد: انا توني شباب لاتقول شيبه يا اسود الويه ..
بوفارس: السموحه يالغالي ..
الجد: قم شوفهم يسنعون لنا الغدا ..
بوفارس قايم وهو يضحك: هههههه .. ان شاءالله ..
راح عند المسبح وشاف اخوه وهو يلاعب البنات بالكوره ..
بوفارس: حلاه عليكم .. شكلكم حلو ..
بومحمد: تعال اخوي شاركنا ..
بوفارس: ابوك حشرني .. زين ما لشطني بخيزرانه ..
بومحمد: ههههههه .. ليش ؟
بوفارس: قلت له يالشيبه .. وعصب علي ..
هيا: تعرف ابوي حساس من هالنقطه ..
الكل: هههههههه ..
بوفارس: وين غداكم ..؟ وكان موجه كلامه لام فارس ..
ام فارس: هذا هم الصبيان يعابلونه ..
بوفارس: كل قلبنا الشيبه ..
الجده: ما عليك منه .. يحن عالفاضي ..
بوفارس: اخاف اروح اقوله ما خلص الغدا يلشطني ..
بومحمد: ناده خله يجي يقعد معانا ..
بوفارس: ان شاءالله ..
راح بوفارس ينادي ابوه .. اما بومحمد كمل لعبه مع البنات واخته .. فارس ومحمد وصلوا لين روضه برا العزبه وتموا يتمشون فيها على ظهور الخيول ..
فارس: خل اتصل بفيصل عشان الحق امر عليه ..
محمد: تعال شو سويت مع مدرسته ؟
فارس: اصبر خل اكلمهم بعدين بقولك ..
فيصل: هلا فارس ..
فارس: شحالك فيصل ؟
فيصل: الحمدلله ..
فارس: انت وين ؟
فيصل: راجع البيت ..
فارس: ها كل شي تمام مع المدرس ؟
فيصل بوناسه: اي افا عليك ..
فارس: زين متى بتوصل البيت خل اكلم امك عن العزبه ..
فيصل بوناسه: انا كلمتها وحنيت عليها لين وافقت ..
فارس مبتسم: زين والله .. بس لازم اكلمها احسن ..
فيصل: ان شاءالله .. بس اوصل البيت وباتصل فيك ..
فارس: انتظرك ..
فيصل: مع السلامه ..
سكر من فارس وراح البيت بسرعه .. عشان يتصل حق فارس ويكلم امه ..
محمد: زين قولي شو سويت ؟
فارس: دخلت عليهم وغسلتهم هناك ..
محمد: زين سويت فيهم ..
فارس: الاخصائي مو عاجبه يقولي من تكون عشان تتدخل بحياة الولد .. قلت له مو شغلك من اكون .. قلت له يجيب المدرس .. واعطيه من الزين بعد .. عصب الاخصائي الا يقولي انت داخل مدرسه مو قسم شرطه .. قلت له والولد داخل مدرسه يعني مكان يتعلم فيه مو ينضرب فيه .. الاخصائي يقولي .. الولد غلط واستحق الضرب .. رديت عليه وقلت له .. عمر الضرب ما كان اسلوب في التعليم والتأديب .. والولد ما غلط .. بس انتوا اجبرتواه يغلط .. ولكل فعل ردة فعل .. الا المدرس يقولي هالولد ينفصل .. قلت له ليش يالشيخ ؟ ما عجبتهم طريقة كلامي وانا كنت قاصد استفزهم .. فيصل طول الوقت واقف عند الباب .. قلت لهم .. شوفوا يا جماعه والله العظيم اللي بيمس شعره من فيصل مب احسن له .. وربي لاوصلها لاكبر راس .. الا يقولي الاخصائي .. ماله داعي اسلوب التهديد يا اخ فارس .. رديت عليه باستهزاء .. انا ما اهددكم انا احذركم .. مابي يجيني في يوم يشتكي .. طلعت عنهم من غير ما اسمع شو بيقول الاخصائي ولا المدرس .. خذت فيصل و وديته الصف .. لو تشوف فرحته فيني وانا امشي معاه فالممرات ..
محمد: وحليله .. بس زين سويت فيهم ..
فارس: المشكله انهم يشوفون انهم مو غلطانين ..
محمد: مشكله اللي ما وراه ظهر يسنده ..
فارس: شوف لو فيصل لسانه طويل ولا قليل ادب ترا من حقهم يتخذون اجراء الضرب معاه .. بس الولد في حاله
محمد: عدل كلامك .. عيل عيالكم ظهرهم قوي ..
فارس: عيال من ؟
محمد: علينا .. انت والمدام ..
فارس: هههههههه ..
رن جوال فارس والمتصل فيصل ..
فارس: هلا فيصل ..
فيصل: كلم امي ..
فارس: زين ..
ام مناف: السلام عليكم ..
فارس: وعليكم السلام .. شحالج يمه ؟
ام مناف: طيبه طاب حالك يبه ..
فارس: يمه معليه اودي العيال معاي العزبه ؟
ام مناف: معليه يا ولدي .. فيصل جنني امس وهو يحن علي ..
فارس: هههههه .. خلهم يجون يستانسون مع العيال عندنا .. برجعهم فالليل ان شاءالله ..
ام مناف: خير ان شاءالله .. بس هالله هالله فيهم يا ولدي .. اطالع الله وهالثنين ..
فارس: فيصل وعبدالله اخواني واحطهم بعيوني ولا يهمج ..
ام مناف: جزاك الله خير يالنشمي ..
فارس: تسلمين لي .. زين يمه خل يتغدون وبمر عليهم بعد ساعه ..
ام مناف: ان شاءالله ..
فارس: فيصل عندج ؟
ام مناف: هذا هو كلمه ..
فارس: هلا فيصل .. تغدوا وجهزوا ..
فيصل: ان شاءالله ..
فارس: جيبوا لكم ملابس للسباحه .. ولا تدري بس جهزوا شنطة ملابسكم .. و تغدوا وبامركم ..
فيصل ما فهم شي من كلام فارس: زين زين ..
فارس: قبل ما وصل باتصل لك ..
فيصل: اوكي ..
سكر فارس من فيصل و طرش رساله لمناف ..
(( حياتي جهزتي شنطة اخوانج ؟ بمر عليهم بعد ساعه تقريبا .. كلمي فيصل )) ..
مناف كانت بالمحاضره .. قرت المسج .. استأذنت من الدكتور وطلعت من المحاضره .. اتصلت باخوها ..
فيصل: ها مناف ..
مناف: فصول طلع الملابس الجديده اللي انا مرتبتها امس .. وحطهم في شنطه لك ولعبود ..
فيصل: اي ملابس ؟
مناف: اللي فالكبت فوق .. انا مرتبتهم امس .. وحاطه معاهم فوطكم ..
فيصل: صبري خل اروح الغرفه .. راح الغرفه واخته معاه عالخط ..
مناف: شفتهم فوق ؟
فيصل: اي ي ي .. زين بس هاي ؟
مناف: اي ملابسك انت وعبود ..
فيصل: زين باحطهم فالشنطه .. زين بروح اتغدا امي تناديني ..
مناف: فصول بقولك ؟
فيصل: هااا ..
مناف: وجع شنو ها بعد ..
فيصل: نعم ..
مناف: لا تسوي شيطانه انت وعبود .. خلكم هادين ..
فيصل: زين زين ..
مناف: زين فديتك .. يلا مع السلامه ..
فيصل: مع السلامه ..
سكرت مناف ورجعت لقاعة المحاضره .. محمد و فارس رجعوا للعزبه .. وشافوا الشباب متجمعين في الاستراحه دخلوا الخيول الاسطبلات وراحوا عند الشباب ..
عبدالعزيز: فاتكم الاستعراض ..
فارس: يالنذول ما انتظرتونا ..
علي: راحت عليكم ..
محمد: اشوفكم مغبرين ..
علي: شنسوي بعد .. الحين يبيله نطب المسبح ..
فارس: لا تروحون البنات هناك ..
علي: ولين ..
محمد: يه من امس وانتوا متنقعين .. عطوهم فرصه ..
فارس موجه كلامه ليوسف: متى بيجي سلمان ؟
يوسف: بيمر العصر ان شاءالله ..
فارس: كلمته ؟
يوسف: اي ..
محمد: يلا نحرك ..
فارس: يلا ..
علي: وين ؟
فارس: بنروح العاصمه وبنرجع .. تبون نجيب لكم شي واحنا راجعين ؟
علي: لا سلامتكم ..
محمد: تعالوا معرسنا وينه ؟ ماله حس اليوم ؟
فارس: اي والله ..
فاضل: معرسنا راح يقنص ..
فارس: شعنده ؟
فاضل: مادري والله .. خذ الطير وراح ..
فارس: اي ي ي .. زين يلا حمودي ..
محمد: قدام ..
طلعوا من الاستراحه .. وركبوا السياره .. شافهم بوفارس ..
بوفارس: على وين ؟
فارس: الله يستر من الوالد ..
محمد: ليش ؟
فارس: اخاف يعرفهم ؟
محمد: ووووي فروس ..
بوفارس قرب من السياره: وين رايحين ؟
فارس: بروح اخذ عيال واحد معاي فالشركه بجيبهم يلعبون مع اليهال ..
بوفارس: بترجعون العاصمه ؟
محمد: لا هو ينتظرنا عند المحطه ..
بوفارس: اي ي ي .. زين لا تتأخرون على الغدا ..
فارس: ان شاءالله يبه ..
حركوا وطلعوا من العزبه ..
محمد: تتوقع عمي بيتذكر اشكالهم ؟
فارس: والله مادري .. بس هو ما شاف الا فيصل .. الثاني ما كان معانا ..
محمد: ان شاءالله ما راح يتذكره عدل .. انت خلهم يلوثون مع العيال بعيد ..
فارس ضحك على كلام محمد: هههههههه .. اي والله يلوثون بعيد ..
محمد: ههههه .. زين مني افكر عنك .. يالتنك ..
فارس ومحمد: هههههههههه ..
كملوا دربهم للعاصمه .. اتصل فارس بفيصل لما قرب من بيتهم ..
فيصل: هلا ..
فارس: ها جاهزين ..؟
فيصل: اي ..
فارس: انا توني داش فريجكم ..
فيصل: زين الحين بنطلع ..
سكر من فارس وراح ينادي عبدالله ..
فيصل: عبود فارس وصل .. يلااااااا
عبدالله نقز من حضن امه وبسرعه راح يركض .. ام مناف قامت وراهم عشان تكلم فارس .. وصل فارس عند بيتهم و سوا هرن .. طلعوا له وهم مبتسمين ..
فارس: حيالله الشباب ..
عبدالله: هلااااا ..
فارس: ههههه .. شحاله الريال ؟
عبدالله: طيب ..
فيصل: فارس امي تبيك عند الباب ..
فارس فتح الباب حق عبدالله: ان شاءالله يبه .. التفت على محمد .. محمد خذ الشنطه وحطها ورا ..
محمد نزل من السياره: ان شاءالله ..
راح فارس عند الباب ..
فارس: آمريني يمه ..
ام مناف: ما يآمر عليك العدو .. بس ما وصيك عليهم يبه .. هالله هالله فيهم وحط بالك عليهم .. وان غلطوا عندك اياهم ..
فارس: ولا يهمج الغاليه .. بحطهم فعيوني ..
ام مناف: بارك الله فيك يبه ..
فارس: الغاليه قاصركم شي ؟ محتاجين شي للبيت ؟
ام مناف: ما تقصر يبه .. بس قول لفيصل يتصل لاخته ويطمن قلبي ..
فارس: ان شاءالله ..
ام مناف: الله يحفظكم ..
فارس: مع السلامه ..
رجع عند السياره وشاف فيصل وعبدالله وابتسم لهم .. ركب السياره ..
فارس: شحالكم شباب ..
فيصل: طيبين ..
فارس: فيصل تذكر محمد ولد عمي ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك