رواية نهاية حبك اعدامي -72
يوسف كان يطالع محمد بغضب " وش يسوي فيها هاذي ؟ "
عبدالعزيز تكى على السياره: آآآه .. يا محمد خلها الله يخليك ..
فاطمه راحت عند اخوها .. عبدالعزيز تكى عليها ومشى معاها لين الاستراحه .. دخلته وجابت ماي وصبته على ويهه ..
فاطمه: سمالله عليك فديتك ..
عبدالعزيز: فطيم شوفي الجرح كبير ولا لأ ؟
فاطمه تفحصت راس اخوها: لا الحمدلله بيلتأم بروحه ان شاءالله .. بس قولي من مسوي بك جي ؟
عبدالعزيز بعدين بقولج .. الحين جيبي لي ملابس .. ابي اغير
فاطمه: ان شاءالله فديتك ..
وهي طالعه من الاستراحه محمد كان جاي صوبها ومسكها من يدها وسحبها بقوه ..
محمد بغضب: انا لما اقول ترجعين يعني ترجعين ..
فاطمه كانت تشوفه ودموعها ملت عيونها ..
محمد ضعف جدامها .. خفف الضغط على يدها ..
محمد: فطيم .. اسمحي لي بس غصبن عني تنرفزت .. الريال واقف وانتي جايه تصيحين ..
فاطمه: اكرهك .. وركضت عنه ..
محمد وقف مكانه ومنزل راسه .. مر من جنبه يوسف وطالعه بغضب .. ودخل لعبدالعزيز فالاستراحه ..
باقي الشباب شلوا خالد ودخلوه الاستراحه ..
خالد: آآآآي .. شوي شوي .. كتفي ..
فاضل: خلود ارفع ايدك اشوف ..
خالد حاول يرفع يده بس كان يتألم ..
خالد: آآآي ماقدر .. آآآه
فارس: مالك الا ناخذكم المستشفى .. تدري فيني حره عليه مادري اروح الحين اثور في مخه قاهرني ..
محمد: اذكر ربك يا فروس ولا تتهور ..
فارس: حسبي الله عليه .. ها عزيز راسك احسن ..
عبدالعزيز: اي الحمدلله احسن .. بس ابي ابدل وباغسل راسي عن الدم ..
فارس قرب من اخوه وتم يتفحصه .. التفت على خالد اللي كان يتالم وايد ..
فارس: لا انت يبيلك مستشفى ..
خالد: لا لا لا .. بس عطوني مسكن الم بس وبنام .. ممممم فارس تعال شوي ..
فارس: هلا يبه
خالد: ابي اشوف مرتي ممكن توديني داخل ..
فارس مبتسم: ولا يهمك يا معرسنا ..
علي: الله يعينكم على الحريم داخل ..
فارس: يالله .. الحريم بيسون معاك تحقيق ..
خالد: الله يعينا .. الا الشياب وين ؟
فاضل: يشيشون ..
يوسف: سمالله عليك بوسعود ..
عبدالعزيز مبتسم: الله يسلمك الغالي .. بس راسي بينفجر علي ..
يوسف: خذ مسكن وارتاح ..
عبدالعزيز قام بيمشي .. حس الدنيا تدور حوله .. طاح على الارض واغمي عليه ..
يوسف: بوسعود ..
الكل التفت عليه وراحوا صوبهم .. عبدالعزيز فقد الوعي من الام اللي براسه ..
خالد: رشو على ويهه ماي بارد .. محمد خذ الماي ورشه على ويهه ..
فارس: حط يده تحت اذنه وقلبه على جنب وارفع راسه ..
محمد سوا اللي قاله عليه فارس .. ورش ماي بارد على ويهه مره ثانيه .. وتحرك عبدالعزيز وهو يون من الالم
عبدالعزيز: هممممم ..
محمد: عزيز يبه افتح عيونك ..
عبدالعزيز: تعبان ..
محمد: افتح عيونك يبه طالعني ..
دخل عليهم بوفارس وكان متخرع من اشكالهم ..
بوفارس: شو فيكم ؟ شو صاير ؟
علي: متهاوشين ..
بوفارس: فهالليل !! مع من ؟
فارس: خليلوه المتكبر ..
بوفارس قرب من عبدالعزيز: عزيز يبه شو فيك ..
عبدالعزيز نص مغمض: تعبان ..
بوفارس: سمالله عليك يبه .. وحضنه بحنان ..
يوسف كان يشوف بوفارس وهو يحضن عبدالعزيز .. خنقته العبره وطلع من الاستراحه .. تم يمشي برا ومنظر بوفارس وعبدالعزيز جدامه ..
يوسف " الله يرحمك يبه .. لو انك عايش كنت بتحضني جي وبحس بدفى حضنك .. آآآه يا يبه " .. قعد على الارض وغطى ويهه بيدينه وغمض عيونه وهو يحاول يتذكر شكل ابوه .. شافته فاطمه وقلبها معورها عليه .. كانت خايفه انه متعور .. قربت منه وبعدين وقفت مكانها وترددت .. رجعت خطوه ورا .. نزلت راسها بحزن وراحت الاستراحه ..
بوفارس: عزيز يبه كلمني ..
فاطمه بخوف: شفيه اخوي ؟
بوفارس: ما عليه شر .. عزيز يبه طالعني ..
عبدالعزيز: آآآي راسي يعورني ..
بوفارس: ما عليك شر يبه فتح عيونك ..
فتح عيونه وهو يتألم .. وفاطمه قلبها يتقطع على اخوها .. محمد كان يراقبها وهو يسمع كلمتها ترن في اذنه (اكرهك) ..
محمد " آآه يا فاطمه .. "
بوفارس: محمد يبه ناد ابوك ..
محمد: ان شاءالله ..
فاطمه: بابا خل ناخذهم داخل احسن ..
علي: اي عمي .. فارس بيودي خالد واحنا بنساعدكم يلا ..
بوفارس: زين .. يلا ..
فارس مسك خالد وفاضل ساعده .. بوفارس مسك عبدالعزيز وعلي ساعده .. طلعوا من الاستراحه وفاطمه كانت طالعه وراهم .. التفت على يوسف اللي كان حزين ..
فاطمه : شفيه الغالي حزنان .. فديت عيونه والله " .. يوسف كان قاعد عالارض وسرحان .. فاطمه تمت واقفه تطالعه .. مشت ناحيته .. رفع راسه وتم يطالعها .. وقف مواجهها .. فاطمه قلبها كان يدق بسرعه ..
فاطمه بصوت واطي: ليش زعلان ؟
يوسف " فديت هالصوت": مو زعلان
فاطمه مدت يدها ليوسف .. وعطته منديلها ..و كانت ترجف ..
فاطمه: تفضل .. امسح الغبار عن ويهك ..
يوسف مد يده وعيونه على فاطمه ..
يوسف: ان شاءالله ..
نزلت راسها ومشت عنه .. يوسف وقف يطالعها لين اختفت فالظلام .. دخل الاستراحه ابتسم وقعد على الكرسي وطالع منديلها .. قربه من خشمه واستنشقه بفرح ..
يوسف " فديت ريحة الغاليه والله .. وفديت قربها " .. مسح ويهه بالمنديل وحطه في جيبه .. دخل عليه محمد ..
محمد: اسمح لنا الغالي ..
يوسف: ولا يهمك .. شخبار خالد وعبدالعزيز ؟
محمد: تعال يبه بنروح داخل ..
يوسف: والاهل ؟
محمد: لا الاهل فالغرفه تعال بنروح الصاله ..
يوسف قام من مكانه: ان شاءالله ..
طلعوا من الاستراحه .. ودخلوا الفيلا .. الريايل كلهم متجمعين فالصاله والحريم فالغرفه مع خالد وعبدالعزيز ..
الجد وهو طالع من الغرفه: فديت بوسعود انا .. ماعليه شر الغالي ..
بومحمد: ما عليهم شر ان شاءالله ..
بوفارس: وش لكم في خليلوه وغيره يا يبه ..
محمد: خالد فيه حره عليهم ..
بوفارس: الله يهديهم ..
بومحمد: وعسى خالد سنعه ؟
علي: ما عليك منه .. لتهه .. زين ما ذبحه بس ..
بومحمد: ابعدي على خالد والله ..
الجد يكلم يوسف: وهالغرشوب ليش مشكلتوه معاكم .. لو صار عليه شي ؟ ابوه بيجيكم ..
يوسف ابتسم: لازم افازع لهم .. كلهم اخواني ..
الجد مبتسم: يالله على هالضحكه اللي تشرح الصدر ..
يوسف نزل راسه منحرج ..
بومحمد: يبه احرجت الولد ..
الجد: واااايدي .. اللي ما يتغزل فيه ماعنده نظر ..
فارس: يدي ..
الكل: ههههههههه
في الغرفه الحريم يعابلون الشباب ..
ام فارس: فدييتك يا عزيز .. وش لكم بهالصبيان ..
عبدالعزيز: اهم شي خذنا حقنا منهم ..
ام فارس: زين جي بطوا راسك و ولد عمك كتفه يعوره ..
خالد: آآآه .. دام خذنا حقنا منهم ما يهم هالالم ..
عبدالعزيز: صح ..
فاطمه: الله يهديكم بس ..
عبدالعزيز: فديتج ابي ماي ..
ام محمد: انا بجيب لكم يبه ..
خالد: مريم ..
مريم: نعم ..
خالد: ليش هالدموع يبه .. تعالي عندي ..
مريم قربت عند خالد: هلا ..
خالد مسك يدها: ليش هالدموع .. مافينا شي .. عزيز انجرح جرح بسيط .. وانا كتفي بيخف بكره ان شاءالله ..
هيا: قوموا يا بنات الغرفه الثانيه .. طلعوا كلهم الا عزيز وخالد ومريم .. عبدالعزيز عطاهم ظهره ولحف ويهه ..
دخلت ام محمد وشافت مريم وخالد وابتسمت .. قربت من عبدالعزيز وسقته ماي .. بندت الليت وخلت الباب مفتوح ..
خالد يهمس لمريم: حياتي مسحي دموعج ..
مريم: خالد ليش سويتوا جي ؟ لو صار عليكم شي ومحد درى عنكم ؟
خالد: حياتي ما علينا شر ..
مريم تمسح دموعها: كتفك يعورك ؟
خالد: اي شوي .. خلاص خذت حبة مسكن وما علي شر ان شاءالله ..
مريم: سمالله عليك فديتك ..
خالد مبتسم: مرايم ..
مريم: نعم ..
خالد: تحبيني ..
مريم نزلت راسها: ............
خالد: فديت الخجوله والله .. ردي علي .. ابي اسمعها منج ..
مريم همست في اذن خالد: احبك يا خالد ..
خالد ابتسم: فديت همسج والله .. حياتي قربي ابي احط راسي بحضنج ..
مريم قربت منه: ان شاءالله ..
خالد حط راسه بحضن زوجته مريم .. ومريم تمت تلعب بشعره وتكلمه ..
مريم: اوعدني ما يتكرر هالشي يا خالد ..
خالد مغمض عيونه: ان شاءالله ..
مريم: واللي يسلمك يا خالد .. هالمره كتفك .. المره الجا ....
يقاطعها خالد: اوعدج ما يتكرر حياتي ..
مريم ابتسمت: فديتك والله .. وباسته على جبهته ..
خالد: آآآه .. الحين ماشي يعورني ..
مريم بدلع: خلووود ..
خالد يضحك: امووووت في خلووود انا ..
عبدالعزيز: انا بعد ابي حد يقولي كلام حلو ..
خالد ومريم: ههههههههه ..
خالد: انت ما نمت ..
عبدالعزيز التفت عليهم: ابي انام بس جوكم حلو ..
مريم: فديتك والله .. ان شاءالله تعيشه ..
عبدالعزيز يستعبط: زين خلود ابي اجي معاك عالسرير ما يصير ..
خالد: ههههههه .. لا انت راسك يعورك .. عطنا ظهرك وارتاح احسن لك ..
الكل: ههههههه ..
في الغرفه الثانيه الحريم كانوا يتكلمون عن اللي صار ..
ام محمد: الله يهديهم ان شاءالله
ام فارس: وش لهم بالهواش فهالليل ..
هيا: الله يهديهم .. هالمره جات على ضربة راس وكتف .. الله يستر من المره الجايه ..
ام محمد: اي والله الله يستر ..
فاطمه: ما سوا جي من فراغ ..
هيا: شلون ؟
فاطمه: ماعتقد ان شبابنا بيتحرشون .. اكيد يعرفون الشباب اللي تهاوشوا معاهم ..
هيا: عدل كلامج .. فديت قلبج
ايمان: اهم شي ان عيالنا كفخوهم ..
ام فارس: والله انتي متفرغه ..
ايمان: شو متفرغه .. اهم شي ان شبابنا لتهوهم .. فديت شبابنا كلهم والله ..
هيا: فديت اللي تحب اهلها ..
ام محمد تضحك على ايمان: ههههههه .. وحليلج يا ايمان ..
ايمان انحرجت: ههههه ..
هيا: زين يلا يا بنات روحوا ارتاحوا ..
دخل عليهم فارس ..
فارس: وين يدتي ؟
ام فارس: نايمه ..
فارس: نامت هالديايه ..
الكل: هههههه
فارس: فطيم تعالي شوي .. ولبسي شيلتج ..
فاطمه: ان شاءالله ..
طلعت فاطمه ورا فارس .. مروا على الصاله وهم طالعين ..
فاطمه: شو فيك فارس ؟
فارس: متسندر من اللي صار .. سوي لي عصير ليمون دافي يهدي الاعصاب ..
فاطمه مبتسمه: من عيوني فديتك ..
دخلوا المطبخ قعد فارس على الكرسي .. وفاطمه طلعت الليمون وسخنت الماي .. رن جوال فارس والرنه كانت (عالي مستواه) .. طالع فاطمه اللي كانت اطالعه بتحدي .. ابتسم ورد ..
فارس: مرحبا ..
مناف: هلا حياتي .. طمني فديتك ..
فارس: ولا شي .. بس الشباب متعافسين ورحت لهم ..
مناف: فهالليل ؟
فارس: اي مع شباب العزبه الثانيه ..
مناف: عسى محد تعور فيكم ؟
فارس: لا بس واخوي و ولد عمي تعوروا شوي ..
مناف: اهم شي انت حياتي .. ان شاءالله ما تعورت ..
فارس ابتسم: لا الحمدلله ما علي شر ..
مناف: فارس شفيك حياتي ؟
فارس: اخبارك انت ؟
مناف ابتسمت: حد عندك يا قلبي ..
فارس: لا عادي .. الا قولي شو صار على الموضوع اللي قلت لك عنه ؟ شو قالوا هلك ؟
مناف: قصدك اخواني ؟
فارس: اي ..
مناف: فصول حن عليها لين عصبت عليه .. وقالت له لين بكره يصير خير ..
فارس: وانت ما كلمتهم ؟
مناف: حاولت معاها شوي .. وقالت لي لين بكره يصير خير ..
فارس: خير ان شاءالله ..
مناف: حبيبي لو ما تقدر تتكلم كلمني لي فضيت ..
فارس: خلاص الغالي بينا اتصال .. بس انت حاول معاهم ..
مناف: ان شاءالله حبيبي ..
فارس مبتسم: سلام ..
مناف: الله يحفظك ..
سكر فارس و كان يمسح ويهه لانه عرق من كثر ما كان متوتر .. فاطمه خلصت العصير وحطته له على الطاوله
فاطمه: تفضل فديتك ..
فارس: لاهنتي الغاليه ..
شرب العصير وهو يسولف مع فاطمه ..
فاطمه: شو سالفة الهوشه ؟
فارس: سالفتهم سالفه .. سافه قديمه .. وكلن ينتقم من الثاني ..
فاطمه: يالله على هالشباب ..
فارس: انا ماكنت معاهم .. يوسف جزاه الله خير جاني .. ورحت لهم وحالتهم حاله ..
فاطمه " فديت يوسف": شلون ؟
فارس: خالد كان من قلب معصب .. مسك واحد فيهم و رضخه فالارض زين ما مات بين ايدينه ..
فاطمه بحزن: حرام ..
فارس: لا مو حرام .. يستاهلون ..
فاطمه: والله حرام .. خالد وايد قاسي ..
فارس: ما قسى فارس من فراغ ..
فاطمه باهتمام: ليش ؟
فارس: لانهم قسوا عليه .. وخالد يعامل الناس بالمثل .. يعني يوم لتههو في الليل وبهدلوه ذيك السنين وخالد ما تحبل لهم مثلهم .. صبر وانتظر الفرصه المناسبه ..
فاطمه: بس هم شلون لتهوا خالد ..
فارس قالها سالفتة خالد مع خليل والشرطه ..
فارس: تخيلي خلود انخش في سيارة الناطور و الشباب قلوبهم عليه ولا يدرون انه منخش هناك ..
فاطمه: ايه على ولد عمي والله .. زين سوا فيهم .. زين ومتى خالد طلع من سيارة الناطور ؟
فارس: الصبح .. والشباب كانوا يدورونه وخافوا عليه .. طول الليل وهم يدورون ..
فاطمه: مسكين خالد ..
فارس: طلع لهم وهو منهار .. وثيابه غرقانه بالدم ..
فاطمه: زين الله ستر والله ..
فارس يشرب اخر رشفه من عصير الليمون ..
فارس: اي الحمدلله الله ستر .. مشكوره الغاليه على هالعصير الحلو .. اللي هدى اعصابي .. ومشكوره على القعده والسوالف ..
فاطمه مبتسمه: فديتك يا فارس ..
فارس قام: يلا فديتج قومي ارتاحي ..
فاطمه: ان شاءالله فديتك ..
طلعوا من المطبخ .. وكلن توجه لغرفته للنوم .. فارس دخل على الشباب .. وفاطمه دخلت على البنات .. حطت راسها ونامت على طول من التعب .. اما فارس بدل ملابسه وطلع برا عشان يكلم مناف .. محمد كان مع ساره .. مريم كانت تواسي زوجها .. الشياب كل منهم حذف نفسه على كرسي بالصاله وناموا .. يوسف كان مع علي وفاضل يتمشون صوب الاسطبلات ..
يوسف: ماشالله على فارس ..
علي: اي ماشاءالله عليه .. لو صار علينا شي ما نستعين الا بفارس وخالد اخوي ..
يوسف: لما وجه السلاح بويه خليل انا قلت ذابحه ذابحه ..
فاضل: انا بعد قلت جي ..
علي: مستحيل يسويها فارس .. يفكر قبل ما يسوي اي شي .. مستحيل يهدم مستقبله عشان واحد مثل خليلوه ..
يوسف: بس ماشاءالله عليه يعجبني ..
فاضل: الله يحفظه ..
علي: فضول ما يعورك شي ؟
فاضل: لا بس رضوض في يدي .. وماتعورني وايد .. وانت ؟
فاضل: ظهري يعورني شوي ..
يوسف: الحمدلله على كل حال .. ايه على بوسعود وبو وليد ..
علي: اي والله ايه عليهم مساكين كلوها ..
يوسف: بس من اللي ضرب بوسعود ؟
علي: ما نتبهت والله .. بس اللي ضرب خالد اخوي قاهرني ..
يوسف: ليش ؟
علي: تخيل ماخذ حصاه كبيره وحذفها عليه .. زين ما جات على راسه كان خالد اخوي راح ..
فاضل: عور قلبي خلود .. تألم والله .. بس قام له ورضخه كم رضخه فالارض زين ما مات بين ايدينه ..
يوسف: عساه ..
علي: وانت ما حاشك شي وبخليفه ؟
يوسف: لا والله كنت بطب معاكم بس محمد طلب مني انادي فارس ..
فاضل: تدري ليش محمد طلب منك انت بالذات ؟
يوسف باستغراب: ليش ؟
فاضل: لانه خاف عليك .. انت امانه عندنا ..
يوسف ابتسم: لا والله كان ودي اصفق هالشباب الميانين ..
علي: لا يبه يستوي عليك شي وانت في ذمتنا ..
يوسف: ولو .. انتوا اخواني و اللي يضركم يضرني .. مافي فرق بينا ..
علي: فديتك والله ما عليك زود .. وانت واحد منا وفينا ما نعدك غريب ..
يوسف: ما عليكم زود ..
هالليله مرت على خير .. خالد وعبدالعزيز كانوا يتألمون شوي بس في سبيل انهم خذوا حقهم من خليل وربعه ما كان الالم شي كبير بالنسبه لهم ..
يوم جديد بشمسه ونورها .. تفتح الجده عيونها مع اول خيوط الشمس .. تستغفر وتذكر رب العالمين .. قامت وصلت ركعتين وتمت تسبح وهي طالعه من الغرفه .. راحت توعي الخدم والصبيان عشان يجهزون الريوق للنايمين .. قعدت الجد عشان تتريق معاه .. قام الجد وتريق مع الجده ..
الجد: مادريتي شو صار البارحه ؟
الجده وهي تصب القهوه: خير ان شاءالله ..
الجد: متعافسين الشباب وصار الضرب ..
الجده: وووويه .. منو متهاوش ؟
الجد: الشباب متهاوشين مع شباب العزبه الثانيه .. تذابحوا ..
الجده: وعسى محد تعور فيهم ..
الجد: لا الحمدلله ما عليهم شر .. مقاليع ما خلوا حد في حاله .. هذول عيال ..
الجده: الله يحفظم فديتهم .. وشوله محد قعدني ؟
الجد: سأل عنج فروس ؟
الجده: والله فيه الخير فديته
الجد: بس قلنا له نايمه وقال عنج الديايه ..
الجده: اوريه فروس هالعفريت ..
الجد: ههههه ..
قامت الجده ..
الجد: وين رايحه ؟
الجده: بقعدهم بسهم رقاد ..
الجد: ههههههه .. ما تخلين حد بحاله تونا اول الصبح خل ينامون ..
الجده: لا وين اول الصبح .. شوف الشمس شكبرها ..
راحت الجده الفيلا عشان تقعدهم .. سندرتهم لين قعدوا ..
الجده: حمد قم انت واخوك ..
بومحمد: يمه تو الناس ..
الجده: بسكم رقاد ..
بوفارس: يمه انتي تنامين من وقت .. واحنا نمنا متأخرين .. خلينا انام شوي ..
الجده: وجع .. قوموا ولا بجيب لكم الماي ..
بومحمد قعد على الكرسي: خلاص قمنا ..
بوفارس: حشى ما يخلون الواحد ينام على راحته .. الناس اجازه ..
الجده: جني اشوف فروس جدامي يتحندي .. مو ولدي محمد ..
بوفارس يحك شعره: لا اله الا الله ..
الجده: محمد رسول الله .. بسكم رقاد ..
بومحمد: ان شاءالله ..
طلعت عنهم وراحت غرفة البنات .. كانت هيا توها طالعه و وراها ام محمد وام فارس ..
هيا: صبحج الله بالخير يمه .. وباست راس امها ..
الجده: الله يسعد صباحج يا بنتي .. قاموا البنيات ؟
هيا: لا بعدهم ..
ام فارس: عندج اياهم عمتي ..
الجده: يصبرون علي ..
دخلت الغرفه وفتحت الباب بقوه ..
الجده: قوموا بسكم رقاد قوموا ..
كل وحده غطت ويها باللحاف .. والجده قامت تسحب اللحافت ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك