رواية نهاية حبك اعدامي -75
نزل عبدالعزيز من البانشي مالته عشان يسوقها سلمان ..
سلمان: لا عادي يبه . انا بركب ورا ولد اختي ..
عبدالعزيز: على راحتك ..
ركب سلمان ورا يوسف .. وطلعوا من العزبه وهم طايرين .. تموا يستعرضون شوي .. استعرض يوسف وبعده فاضل .. وقف يوسف على جنب عشان يشوفون استعراض فاضل .. سلمان قاله الموضوع ..
سلمان: في واحد متقدم حق اختك ؟
يوسف: يلا الفضلي .. من يكون هالشخص ؟
سلمان: تعرف نواف ..
يوسف: اي اللي نشوفه فالكوفي شوب ؟ احلى الفضلي .. والله انك فنان
سلمان: اي هذي هو ..
يوسف: متى كلمك ؟ دورك بوسعود بس شوي شوي ..
سلمان: اليوم .. ها شرايك انت ؟
يوسف: عاش بوسعود حبيبي .. مستحيل اوقف نصيب اختي .. انت كلمتها ؟ .. روح يا بوسعود ..
سلمان: لا والله .. توه من شوي مكلمني الريال ..
يوسف: زين .. نسأل عنه .. خف علينا يا بوسعود بس فنان يالغالي .. وكلمها لي رجعت الليله ..
سلمان: والله متوتر ماعرف شلون بفاتحها بالموضوع ؟
يوسف: تبيني اكلمها انا ؟ اول مارجع بفاتحها بالموضوع وانت اسأل عنه لين اكلمها ..
سلمان: حلو .. انا بسأل عنه خلال هاليومين لين ترجع انت من العزبه ..
يوسف: وااااااي اموت فالحركات الخطيره يا خطير انته .. ولا يهمك يا خالي .. دورك بوحسن اتحفنا ..
علي نزل عبدالله وبدا استعراضه ..
عبدالعزيز: اموت واسوي هالحركه شلون تسويها علوه ؟
علي وهو يشل البانشي على التواير اللي جدام: هاي السر العلوني ..
الكل: هههههههههه ..
عبدالله: والله انك فله .. ههاااااااااااااااي ..
سلمان: يسلم هالضحكه ..
فاضل: يلا نرجع شباب ..
عبدالعزيز: سباق ..
الكل: يلا ..
سلمان: شوي شوي على الولد يا علي ..
علي: ما عليك منه مقلوع هالولد ..
عبدالله: يلا بسرعه نسبقهم ..
سلمان ضحك على عبدالله: هههههه ..
رجعوا العزبه .. سلمان راح عند الشياب عشان يشيش .. فاضل ويوسف وعبدالعزيز وعلي وعبدالله طبوا المسبح ..
الجده: عزوز ما تخاف انت ؟
عبدالعزيز باستغراب: ليش ؟
الجده: جرحك ما برى وانت اطامر لي فهالماي ..
عبدالعزيز ابتسم: عادي يدتي ..
الجده: يا علك العافيه ..
عبدالعزيز: آمين ..
الجده: انا بروح احط راسي وبنام احسن لي ..
فارس من وراها: روحي نامي وقعدينا قبل الديك ..
الجده انتفضت: وجع يا اسود الويه ..
الشباب: هههههههه ..
فارس: تحبين تسوين لج حركات ..
الجده: فارق ويهي يالعفريت ..
فارس: واذا ما فارقت .. شو بتسوين ؟
الجده: قم عني ويه قم ..
فارس: لا ..
الجده: و لوح على ظهرك قم اشوف ..
فارس: بل
علي: زفوووووه ..
الجده وهي رايحه: تستاهل قاموا يضحكون عليك ..
فارس: مردوه يالديايه .. اوريج ..
الجده التفت: انا ديايه يالعفريت .. بوريك شغل الديايه بكره ..
فارس: انتظر بكره انا ..
الجده طلعت من غير ماترد عليه ..
علي: الله يغربلك يا فروس .. جننتها ..
فارس: ههههههه
استانسوا الشباب في المسبح .. مرت هالليله عليهم بوناسه .. كانوا يشون كباب والجو كان حلو .. سوالف و وناسه و ضحك .. عبدالله وفيصل كانوا طايرين من الوناسه لانهم بيباتون فالعزبه .. يوسف فرحان بالخبر اللي قاله له سلمان .. محمد عايش عالم ثاني مع ساره .. ايمان ومريم والريم وفاطمه كانوا مستانسين .. علي وفاضل وعبدالعزيز عايشين حياتهم عالاخر .. مريم وخالد راحوا كوكب الحب والرومنسيه .. العيال الصغار طلعوا طاقتهم بالعلب والوناسه .. عدت هالليله حلوه للكل .. رجع سلمان العاصه وهو محمل باحلى الاخبار .. بس كان متوتر ومو عارف كيف يفاتح هنادي بالموضوع فترك هالموضوع على يوسف .. نام مع بنات اخته .. انقضت هالليله على خير .. مرت الليله اللي بعدها باحداث احلى منها بعد
اما الليله الاخيره كانت اخر ليله لهم .. لانهم اليوم اللي بعده بيرجعون العاصمه ..
ايمان: يا خساره .. ليش بنرجع ؟
بوفارس: الوناسه لها وقتها .. والجد له وقته
الريم: بس الوناسه تمر علينا بسرعه ..
بوفارس: لازم لانها وناسه ..
الريم بحزن: صح ..
بوفارس: زين ليش كل هالحزن انتي وياها .. بنجي مره ثانيه ..
ايمان: بس الجو ما يتعوض ..
بوفارس: آآآآه .. صدقتي في هاذي ..
بومحمد: يه انتوا قاعدين هني .. يلا جهزنا كل شي بنحرك .. توزعوا على السيارات ..
بوفارس: توكلنا على الله .. يلا يا بناتي ..
ايمان والريم: يلا ..
بوفارس: ما نسيتوا شي ؟
البنات: لا ..
طلعوا وتوزعوا على السياير .. ايمان ركبت مع ابوها وامها وجاسم .. الريم مع ابوها واخوانها الصغار .. هيا ركبت مع ابوها وامها .. مريم مع خالد وكانوا بروحهم .. فارس معاه فاطمه .. عبدالعزيز بسيارته ومعاه يوسف وفاضل .. علي بروحه .. محمد مع زوجته وعياله .. توجهوا للعاصمه و ودعوا العزبه بحزن .. كلن وصل بيته
ايمان: فديت غرفتي وحشتني ..
بوفارس مبتسم: هههههه .. شو بعد تتفديت غرفتج ؟
ايمان: ههههههه
ام فارس: يلا جاسم دش تسبح وباجهز لك ملابسك ..
جاسم: ان شاءالله ..
بوفارس: انا بعد جهزي لي ملابسي .. وابي تمسديني شوي .. ريولي تعورني ..
ام فارس: ان شاءالله ..
دخلت مريم وهي مستانسه ..
ام فارس: فديت بنتي .. توج واصله يمه ؟
مريم: اي ..
ام فارس: ريلج وينه ؟
مريم: مع اخواني فالحوش ..
ام فارس: زين شوفيه يبي شي ؟
مريم: لا ما يبي شي .. الحين بيروح البيت ..
ام فارس: يعطيكم العافيه ..
مريم وهي رايحه: الله يعافيج ..
دخلت غرفتها وهي مستانسه .. خذت لها شور دافي و اتصلت بزوجها .. تمت تتكلم معاه بوناسه وفرح ..
ايمان خذت لها شور ونامت على طول من التعب .. فاطمه خذت لها شور وبعدين راحت تقعد عند امها وابوها .. عبدالعزيز خذ له شور و طلع مواعد الشباب .. فارس كان في عالم مناف .. يكلمها وتكلمه باحلى كلام الحب ..
في بيت بومحمد الوضع كان مشابه لوضع بيت بوفارس .. ام فارس سبحت فهد واسماء ورقدتهم على طول .. سلطان خذ له شور ونام بعد .. الريم كانت تساعد ساره .. سبحوا اليهال وبدلوا لهم ورقدوهم .. فاضل تسبح وبدل وطلع لانه مواعد يوسف وعبدالعزيز .. وعلي طلع معاهم .. الريم خذت لها شور وبدلت ملابسها .. وتمت في غرفتها .. محمد كان مع ساره فالغرفه كان يتغزل فيها ومعيشها جو ولا احلى .. خالد رجع البيت وكان يكلم مريم ..
مريم: وصلت البيت ؟
خالد: اي توني ..
مريم: زين خلاص فديتك .. روح ارتاح وكلمني اول ماتقعد من النوم ..
خالد مبتسم: مريم ..
مريم: هلا
خالد: تحبيني ؟
مريم انحرجت: اي
خالد: شو اللي اي ؟
مريم: انت سألت وجوابي على سؤالك اي ..
خالد: نسيت السؤال ؟
مريم بدلع: خالد ..
خالد: اموت فالدلع ..
مريم: زين روح ارتاح فديتك يلا ..
خالد: ان شاءالله .. بس اول قولي لي تحبيني .؟
مريم: خالد ..
خالد: اول جاوبيني ؟
مريم: مممم .. اي احبك ..
خالد: آآآآه .. فديت شفاهج لي نطقتها .. اموت انا ..
مريم: سمالله عليك حبيبي ..
خالد: الله يرضى عليج يا اغلى مريم فالدنيا ..
مريم: ويرضى عليك فديتك .. خلاص روح ارتاح ..
خالد: ان شاءالله .. بقولج حبيبتي ..
مريم: قول ..
خالد: قعديني الساعه 9
مريم: ان شاءالله من عيوني ..
خالد: فديت عيونج والله ..
مريم: مع السلامه ..
خالد: الله يحفظج ..
سكر منها وهو يتألم .. الالم اللي بكتفه يزيد ..
خالد: آآآآآآي كتفي ..
خذ له شور سريع وطلع راح المستشفى ..
اما يوسف الولهان اول ما رجع البيت استقبلوه خواته بالاحضان ..
هنادي: يوسف وحشتني فديتك ..
يوسف: والله انتوا وحشتوني موت .. شلونكم ؟
هنادي: الحمدلله .. ها شسويت هناك ؟
يوسف: والله وناسه .. بانشيات وخيول ومسبح و شوي كباب و ناسه مع الربع ..
الجوهره: حلو والله ..
يوسف مبتسم لها: والله استانسنا .. شخبار ابراهيم ؟
الجوهره: الحمدلله طيب ..
يوسف: خلاص ما بقى شي على الخطوبه ..
الجوهره منحرجه: اي بعد يومين ان شاءالله ..
يوسف: الله يسهل ان شاءالله .. زين هنوده بقولج ..
هنادي: قول فديتك ..
يوسف: في واحد متقدم لخطبتج ..
هنادي قلبها كان يدق بسرعه .. توترت وكانت ترجف ..
الجوهره ابتسمت لاختها: فديت هنوده والله ..
يوسف: ها وش قلتي ..
الجوهره: من يكون عاد ؟
يوسف: واحد يعرف خالي سلمان .. اسمه نواف ..
هنادي "نواف !" ..
الجوهره: زين عاد سألتوا عنه ؟
يوسف: خالي يعرفه عدل .. وسأل عنه بعد ومدحوه .. وانا سويت اتصالاتي وسألت لي كم واحد .. بعد مدحوا لي الريال .. كداد و يشتغل بتجارته الخاصه .. ريال راعي حلال وماعليه قصور .. لج الحق ترفضين او توافقين .. انتي حره ..
هنادي كانت ساكته وما تكلمت ..
يوسف: القرار الاول والاخير لج .. انتي فكري واحنا ننتظر قرارج ..
ال
جوهره حضنت هنادي: فديت اختي والله ..
يوسف قام: زين انا بسبح وبروح عند الربع ..
دخل سلمان: على وين ؟
يوسف: باطلع مع الشباب .. وهمس في اذن سلمان .. توني مكلم هنوده فالموضوع ..
سلمان ابتسم: مشكور ..
طلع يوسف وهو فرحان .. خذ له شور دافي .. لبس ثوب وغتره وكشخ حده .. طلع منديل فاطمه من الشنطه وتم يشمه وهو فرحان .. حطه في جيبه ونزل .. شاف سلمان يتكلم مع هنادي والجوهره .. طلع رايح للشباب ..
سلمان: يوسف قالج الموضوع ..
هنادي مبتسمه: اي قالي ..
سلمان: ابي اعرف رايج ..
هنادي: خالي تو الناس ..
الجوهره: يقصد .. موافقه مبدأيه عشان نسأل عن الريال اكثر ..
سلمان: عدل كلام جوجو .. واقصد انتي رافضه فكرة الزواج .. او متقبلتها ..
هنادي: اهاا ..
سلمان: وش اها ..
الكل: هههههه
هنادي: مو رافضه الزواج ..
سلمان: بارك الله فيج و وفقج حبيبتي ..
الجوهره: آمين ..
هنادي قامت وراحت غرفتها .. دخلت الغرفه وهي طايره من الوناسه ..
هنادي: واي واي واي .. مو مصدقه .. انا احلم ولا لأ .. وااااااااي ..
طبت على سريرها من الوناسه .. غمضت عيونها و رسمت مستقبلها مع نواف
الجوهره وسلمان كانوا يسولفون في عدة مواضيع ..
الجوهره: وين شافها صاحبك ؟
سلمان: كنا رايحين محله مره وكانت هنوده معاي ..
الجوهره: اها .. وحليله ..
سلمان: بصراحه ريال ما ينعاف .. وماعنده الا امه فالبيت .. عنده اخت وحده متزوجه .. وهو مع امه فالبيت .. ابوه متوفي من 5 سنين تقريبا .. ترك لهم حلال ونواف هو اللي يداري هالحلال ويشتغل فيه ..
الجوهره: ماشاءالله عليه .. وهنوده تستاهل ..
سلمان: الله يكبر حظها .. زين حبيبتي انتي خلاص مستعده ؟
الجوهره: اي خالي .. بس تدري ..
سلمان: وشو ؟
الجوهره: احتمال ما سوي عرس ..
سلمان: ليش يبه ؟
الجوهره: خالي .. احنا من نعرف يعني .. ربعي اللي فالمدرسه بعزهم في حفلة الخطوبه .. من زين الاهل عشان اعزمهم .. ولو عزمتهم يعني بيجون .. ماتوقع ..
سلمان: جوجو عيب هالكلام .. هذول مهم كان اهلج ..
الجوهره: واللي يسلمك يا خالي .. لا تقولي مهم كان هذول اهلج .. وش شفنا منهم .. محد يدري عنا ولاحد سأل فينا .. وحتى يوم دروا خوالي اني بملج .. حد فيهم رفع السماعه وبارك لي ؟ عمامي حد منهم سأل عن الريال ولا سأل فينا من الاصل .. يا خالي انت وايد طيب ..
سلمان: خلج احسن منهم ..
الجوهره: تعبنا واحنا احسن منهم .. الانسان كرامه .. وابوي الله يرحمه علمنا ان ما تنزل كرامتنا الارض ..
سلمان: محشومين يا بنات خليفه الله يرحمه .. زين قلتي حق ابراهيم انج تفكرين ما تسوين عرس ؟
الجوهره: اي قلت له ..
سلمان: وش قال لج ؟
الجوهره: ما عنده مشكله ..
سلمان: سوي اللي يريحج .. بعدين بيني وبينج .. ليش هالمخاسير كلها عشان عيون الناس ..
الجوهره: انا ادري ..
الجوهره وسلمان: هههههههههه ..
سلمان: خلاص الترتيبات للحفله جاهزه ؟
الجوهره: اي الحمدلله .. انت ويوسف وابراهيم ما قصرتوا .. يعلني افداكم
سلمان: حاضرين لج يالاميره ..
الجوهره حضنت خالها: والله يا خالي من رجعت لنا وحنا نفسياتنا متغيره .. مسكت يد خالها وكملت .. يوسف بدا يطلع .. هنادي رجعت ضحكتها الحلوه .. انا تغيرت نفسيتي ..
سلمان خنقته العبره: فديتكم يا بنات اختي .. جميل بو يوسف للحين في رقبتي .. يا جوجو ابوج الله يرحمه ريال والله اخواني ما وقفوا معاي وقفة ابوج .. بعد ما توفى ابوي .. ابوج الله يرحمه ما قصر فيني .. واللي اسويه لكم والله ولا شي من اللي سواه ابوج لي .. تنهد .. آآآآه .. الله يرحمنا برحمته يا رب ..
الجوهره: آمين ..
سلمان: الله المستعان ..
تموا سلمان والجوهره يسولفون .. يوسف تلاقى مع الشباب وكملوا سهرتهم فالقهوه .. خالد المسكين راح المستشفى وهو يتألم .. بس طمنه الدكتور وكتب له علاج ..
الدكتور: حصل ايه يا ابني ؟
خالد: متهاوش ..
الدكتور: طيب ازاي جات الضربه في كتفك ؟
خالد: كان المفروض تجي على راسي بس ربك ستر يا دكتور ..
الكتور: الحمدلله .. اتضربت بخشبه ؟
خالد: لا حصاه كبيره ..
الدكتور باستغراب: اعوذ بالله .. مين اللي قلبوه اسود كده ..
خالد: حسبي الله ونعم الوكيل ..
الدكتور: الحمدلله جت على كده .. بس كتفك الحمدلله مافيهوش حاجه .. بس الدم متخثر في مكان الكتف .. صور الاشعه سليمه العظام زي ما هيه .. الحمدلله ..
خالد: الحمدلله ..
الدكتور: بس شوية رضوض حاقنه الدم في الكتف مكان الضربه .. انا حكتب لك حبوب ومرهم تاخذهم بانتظام ..
خالد: ان شاءالله ..
الدكتور تفضل حضرتك .. وابتعد عن المشاكل يا ابني ..
خالد ابتسم: ما يهمك يا دكتور ..
الدكتور: سلامتك يا فندم ..
خالد: الله يسلمك .. السلام عليكم ..
طلع من المستشفى وهو متطمن .. صرف الدوا في الصيدليه وراح البيت .. حذف نفسه على السرير ونام بعمق
.....................
"
شوقي يسبقني للقاكم .. لو اشوفك من بعيد .. عايش العمر برجاكم .. غيركم لأ ما اريد " ..
اليوم حفلة خطوبة الجوهره وابراهيم .. ابراهيم اسعد انسان فالكون طاير وده لوالوقت يركض عشان يتلاقى مع الجوهره .. اما الجوهره كانت طايره من الوناسه بس التوتر خطف فرحتها .. كانت فالبيت تسوي شعرها ومكياجها .. دخلت عليها هنادي ..
هنادي: ها جوجو تبين شي فديتج ؟
الجوهره: ابي ماي فديتج ..
هنادي مسكت يد اختها: فديتج يا جوجو لا تتوترين ..
الجوهره مبتسمه: ان شاءالله ..
هنادي باستها على جبهتها: الحين بجيب لج الماي ..
الجوهره كانت حزينه لان امها وابوها مو موجودين .. كان حلم امها انها تشوفها عروس ..
نزلت هنادي تجيب ماي لاختها .. شافت سلمان ..
سلمان: اخبار عروستنا فوق ؟
هنادي: متوتره فديتها ..
سلمان: خلج معها فديتج خففي توترها ..
هنادي: هذاني كل شوي اشيك عليها ..
سلمان: بارك الله فيج .. وعقبال ما نفرح فيج يا هنوده ..
هنادي نزلت راسها وابتسمت .. ابتسم سلمان وراح يشيك على الحوش .. شاف عبدالعزيز وفاضل وعلي مع يوسف .. كانوا يساعدونه .. سلمان وايد استانس عليهم ..
سلمان: يعطيكم العافيه شباب ..
الشباب: الله يعافيك ..
سلمان: ها كل شي جاهز ؟
يوسف: اي الحمدلله .. والشباب والله ما قصروا ..
عبدالعزيز: هاي واجب يا يوسف .. انت اخونا ..
علي: صح
يوسف: الله لا يحرمني منكم ..
علي: زين تبون شي .. انا بروح البيت بتسبح وبلبس عشان ارجع مره ثانيه ..
سلمان: كفيتوا و وفيتوا ..
يوسف: يعطيكم العافيه شباب .. انا بعد بروح البس ..
كلن توجه لبيته عشان يكشخون ويرجعون بيت يوسف مره ثانيه .. يوسف اتصل في عبدالعزيز ..
عبدالعزيز: هلا والله
يوسف: شحالك ؟
عبدالعزيز: طيب ..
يوسف: ما قصرتوا والله ..
عبدالعزيز: هاي واجب ..
يوسف: جزاكم الله خير .. زين عاد أكد على الاهل يجون ..
عبدالعزيز: لا افا عليك .. مأكد عليهم .. وانا جاي بجيبهم معاي ..
يوسف: بارك الله فيك .. زين عيل خل اروح اتكشخ ..
عبدالعزيز: يا روحي على اللي بيتكشخ ..
يوسف وعبدالعزيز: هههههههه ..
عبدالعزيز: مع السلامه حبيبي ..
يوسف: الله وياك الغالي ..
وصل عبدالعزيز البيت .. نادا على ايمان ..
عبدالعزيز: ايماني ..
ايمان: هلا والله ..
عبدالعزيز: ها جهزتوا ؟
ايمان: تقريبا ..
عبدالعزيز: زين لا تتأخرون .. انا باخذ شور وبالبس ونطلع ..
ايمان: خلاص صار ..
عبدالعزيز: بلغيهم يا ويلكم لو تأخرتوا ..
ايمان مبتسمه: ان شاءالله ..
راح غرفته وخذ له شور .. لبش ثوبه والغتره .. تدهن بدهن العود .. دخلت عليه مريم وماسكه المبخر .. حطت له قطعتين عود و دخنته ..
مريم: فديتك يا عزيز .. معرس الله يحفظك ..
عبدالعزيز مبتسم: فديت قلبج والله .. فارس وينه ؟
مريم: مادري والله ..
رفعت المبخر وحطته صوب غترته ..
عبدالعزيز: بس فديتج ..
مريم مبتسمه: يعلني ابخرك معرس قول آمين ..
عبدالعزيز: هههههه
مريم: قول آمين فديتك ..
عبدالعزيز: آآآمين ..
تعطر بعطر رجالي .. مسح ويهه وفرك ايدينه ..
عبدالعزيز: ها جهزتوا ؟
مريم: تقريبا ..
عبدالعزيز: يلا مابي تقريبا .. ولا تعالوا مع فارس .. شوفي جويسم خلص ولا للحين .. ؟
مريم: زين بشيك عليهم ..
عبدالعزيز: بسرعه الله يرضى عليج ..
مريم وهي طالعه: ان شاءالله ..
مريم " فديت عبدالعزيز .. والله انه مزيون الله يحفظه .. مالت عليها نورو ردت اخوي .. يحصلها عبدالعزيز .. والله ما تلقى مثله الله يحفظه " .. راحت تشيك على ايمان وفاطمه .. دخلت عليهم في غرفة ايمان ..
مريم: ما خلصتوا .. يا ويلكم من عزيز ..
فاطمه: ليش مستعيل خل يصبر شوي .. الحين بنخلص ..
مريم: قال لو ما خلصتوا روحوا مع فارس ..
ايمان: زين انتي وماما روحوا مع عزيز وانا وفطيم بنجي مع فارس ..
مريم: بشوفه ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك