رواية نهاية حبك اعدامي -79
محمد: لا يسمح امرك .. ولدي مو ددلوع .. ناصر رجل .. صح ناصر ..
ناصر: انا رجل ..
الكل: هههههه
مسكه علي وتم يلاعبه وناصر ميت من الضحك ..
علي: واااي فديت ريحته والله .. موووووح .. باكلك باكلك ..
ناصر: ههههههه
محمد: علوه وايد حنون ..
علي: اموت فاليهال ..
محمد: زين عرس ..
علي: لا يبه بدري علينا الهوا ..
خالد: الله عليك .. بدري عليك الهوا عيل ..
علي: اي خل اوقف على ريولي بعدين اتزوج ..
محمد: احنا مو مقصرين ان شاءالله ..
علي: رايتكم بيضه .. بس العرس ارتباط .. وانا مابي اصف ديون على ظهري .. خل اجمع لي كم بيزه واعتمد على نفسي .. بعدين انا توني مشتغل .. خل اعيش حياتي وادلع نفسي شوي .. صح نصور .. قول صح ..
ناصر: صح ..
علي: واااااااي .. باكله .. شلوه عني ولا باكل ولدكم ..
خالد: هههههه
فاضل: علوه ما تخيلك متزوج ..
علي: ليش ؟
فاضل: مادري ..
علي: بتشوف اخوك .. بياخذ وحده مافي مثلها ..
فاضل بخبث: حاط حد في بالك ؟
علي: العب غيرها .. تبي تطيحني بالكلام .. ههاااااااااي
فاضل: مو هين يا علوه ..
خالد التفت على ريم السرحانه ..
خالد: اريام ..
الريم: هلا خالد ..
خالد: وين سرحانه ؟
الريم ابتسمت: ولا مكان ..
خالد تم يطالع الريم اخته ويتفكر فيها ..
خالد " شو اللي شاغل اريام فديتها " .. كل منهم راح يرتاح من بعد السوالف .. الريم دخلت غرفتها وكانت تراجع دروسها بدون نفس .. حذفت الكتاب على السرير وانسدحت على ظهرها .. غمضت عيونها ..
الريم " فارس .. فارس .. فارس .. احبك يا فارس " .. دمعت عيونها .. غطت ويها بيدينها وتمت تصيح بحزن
الريم " ليش تتجاهلني يا فارس .. احبك حب ما ينوصف .. آه لو تحس فيني " .. تمت الريم تصيح بحزن موهمه نفسها بحبها لفارس .. خالد الهيمان كان مشغول بعالم مريم .. فاضل وعلي وفهد وسلطان يلعبون ورقه فالصاله محمد وساره كانوا مندمجين مع فلم رومنسي بالتلفزيون ..
في بيت بوفارس .. جاسم مقيل مع امه وابوه .. ايمان كانت نايمه .. عبدالعزيز كان يكلم يوسف بالتلفون .. فارس نايم فالعسل مع مناف .. مريم كانت تكلم خالد .. اما فاطمه كانت فالجامعه رايحه لقاعة المحاضره ..
في بيت يوسف .. سلمان كان يشتغل على النت .. يوسف كان يكلم عبدالعزيز بالتلفون .. الجوهره وهنادي كانوا يتناقشون موضوع نواف وهنادي ..
الجوهره: هنود .. وناسه بتاخذين الراهي ..
هنادي: الحمدلله على كل حال .. وابراهيم ما عليه زود ..
الجوهره: لا يبه ابراهيم محد يوصل مواصيله ..
هنادي: حلاتين على الحب والهيام ..
الجوهره: ههههه .. زين قولي لي .. شلون شكله ؟
هنادي: مممممم .. ماتذكره عدل " صج اني عياره" .. كنت مركزه على المجوهرات .. واستحيت ارفع راسي ..
الجوهره: ما يركب عليج الخجل ..
هنادي: جوجو يالدبه ..
الجوهره: هههههه ..
هنادي: زين لا تضحكين مع هالويه ..
الجوهره مبتسمه: زين ما راح اضحك ..
هنادي: الحين وش قررتي .. بتسوين عرس او لأ .؟
الجوهره: شوفي انا للحين محتاره .. %60 ما راح اسوي عرس ..
هنادي: والباقي ..
الجوهره: احتمال وارد ..
هنادي: على راحتج ..
الجوهره: ان شاءالله في عرسج يا هنوده ..
هنادي مبتسمه: ان شاءالله ..
دخل عليهم سلمان ..
سلمان: هلا والله بعرايسنا ..
الجوهره: هلا خالي ..
هنادي: هلا ..
سلمان: ها وش تسولفون عنه ؟
هنادي: بعض امور الحياه ..
سلمان: زين وش هي امور الحياه اللي تطرقتوا لها ؟
هنادي: خالي ركز .. انا قلت بعض امور الحياه .. مش امور الحياه ..
سلمان: زين .. وش هي بعض امور الحياه اللي تطرقتوا لها .. يا فيلسوفة زمانج ..
هنادي: ههههه .. مثلا تكلمنا عن الدينصورات وشلون تحولت بترول بفعل الضغط وحرارة الارض ..
الجوهره وهنادي: ههههههههه ..
سلمان مبتسم: صج والله .. تستخفون دمكم يا بنات ..
هنادي: خفة دم الانثى لا يقاوم ..
الجوهره: تنكر هالشي يا خالي .
سلمان: لا ما انكره .. بس من متى هنادي انثى ؟! اللي اعرفه انها بوالشباب ..
الجوهره وسلمان: هههههههه
هنادي: محاولاتك بأت بالفشل يا سيد سلمان ..
سلمان: وليش يا ليدي هنادي؟
هنادي: الدليل على انوثتي .. هو تقدام احد الشبان لخطبتي ..
سلمان: هههههه .. افحمني ردج .. بس بتظلين بوالشباب حتى لو تزوجتي وجبتي عيال .. وابشرج بعلم عيالج ينادونج بوالشباب بدل ماما ..
الكل: ههههههه ..
هنادي حطت يدها على كتف خالها ..
هنادي: عليك سوالف يا خالي .. بس مابي اسمع عيالي يقولون لي .. اوكي ..
سلمان: لين تجيبين عيال باذن الله .. الموضوع جاري التفكير ..
الجوهره: هنوووود عليج سوالف ..
هنادي: اعجبج .. والدليل .. يقاطعها سلمان ..
سلمان: ان احد الشبان تقدم لخطبتج ..
الكل: هههههههههه ..
تموا يضحكون ويسولفون مع بعض .. لين اذن العصر ..
سلمان: تامروني على شي بناتي .؟
الجوهره: لا خالي سلامتك ..
هنادي: على وين خالي ؟
سلمان: بروح اصلي وبعدين بروح اشوف المحل اللي قالي عنه الريال ..
هنادي: ان شاءالله تتوفق في هالمشروع يا خالي ..
سلمان مبتسم: فديت قلبج يا هنوده ..
طلع عنهم راح يبدل ملابسه .. وبعدين راح المسيد يصلي وطلع راح عند الشباب ..
...............
فارس كان ينتظره فالحوش مع محمد وخالد .. دخل حوش بيت بوفارس ..
فارس: حيالله من جانا ..
سلمان: الله يحيك الغالي .. شحالكم شباب ؟
الكل: الحمدلله ..
سلمان: ها متى بنحرك ؟
فارس: ادخل اول نشرب شي بعدين بنطلع ..
سلمان بند السياره ونزل ..
سلمان: ولا يهمك يا بونايف ..
دخلوا الميلس .. قلطهم فارس وتموا يسولفون شوي .. بعدين طلعوا جماعه .. بعد ما طلعوا فاطمه كانت توها واصله من الجامعه .. نزلت ودخلت الصاله .. راحت صوب الميلس تشيك لو في حد هناك او لأ .. ما لقت حد وبسرعه فتحت الباب اللي يطلع على برا .. مشت خطوتين صوب صيص النتبته اللي اتفقوا عليه .. رفعت الصيص شوي وحطت الرساله تحتها .. رجعته مكانه وبنفس الترتيب .. دخلت الميلس مره ثانيه وراحت غرفتها وهي مستانسه .. صلت العصر ونزلت تتغدا .. كانت تتغدا بروحها وبملل .. دخلت عليها مريم ..
مريم: هلا فطوم ..
فاطمه: لا سلام على طعام ..
مريم: ههههه ..
قعدت مجابله اختها وتسولف معاها ..
مريم: لطوف خلصت معاج ؟
فاطمه: اي و وصلتها على دربي ..
مريم: شو سويتوا ؟
فاطمه: not much .. بعد ما رحتي بشوي .. طلعت مناف من محاضرتها وقعدنا نسولف ونحش شوي .. وبعدين رحنا احنا الثلاثه نتمشى فالحديقه شوي .. رحنا ماحضراتنا ..وتلاقينا قبل ما طلعنا .. تدرين ان مناف المسكينه تروح بالباص ..
مريم بحزن: مسكينه ..
فاطمه: تخيلي لو عندها محاضرتين يضيع يومها لان ما عندها سياره ..
مريم: يا حرام ..
فاطمه: وايد تعور قلبي .. احسها بحر من الهموم ..
مريم: باين عليها .. الله يعينها .. اللهم لك الحمد ..
فاطمه: الحمدلله على كل حال ..
دخل عليهم جاسم وهو يدندن ..
جاسم: "من بين الناس حبيتك .. وبكل احساس اغليتك .. حبك جرى بدمي .. نساني كل همي .. خلى حياتي غير مـــــن بيـــن كـــل الـــناس " ..
فاطمه ومريم طالعوا بعض وابتسموا ..
فاطمه: يه يه يه .. فديت هالصوت الحلو ..
جاسم مبتسم " من بين الناس حبيتك يا فطامي " .. شلونكم ..
فاطمه: فدته والله .. حضنته وباسته على خده ..
مريم: وانا بنت البطه السوده ..
جاسم: فديتج انتي والله .. راح صوبها وباسها بقوه ..
مريم: فديت قلبك يا بطل ..
قعد جاسم مع خواته ..
فاطمه: وين بتروح ؟
جاسم: بروح اشتري ملابس ..
فاطمه: من بيوديك ؟
جاسم: بروح مع عزيز ورفيجه ..
فاطمه ابتسمت: اي ي ي ..
مريم: سلطان بيروح معاك ؟
جاسم: اكيد .. نبي نشري ملابس حق المباراه ..
مريم: اي مباراه ؟
جاسم: بنروح الملعب نشجع .. ولازم نلبس ملابس تناسب الفريق ..
فاطمه: يعني شو بتشتري ؟
جاسم: بنطلون وفانيله .. بس لازم نكتب عليهم .. ونبي ناخذ كبابيس وصفارات حق المباره .. تدرين احنا مشجعين الفريق لازم نشجع عشان يلعبون الشباب ونفوز ..
مريم: حالتكم صعبه يا شباب ..
فاطمه: زين شدخل عزيز يوديكم ؟
جاسم: قالي عشان ما يقصون علينا .. وبوخليفه يعرف مكان بيسوي لنا الفنايل .. بيكتب لنا عليهم ..
فاطمه " فديته بوخليفه ": زين متى بتروحون ؟
جاسم: ننتظر سلطان و بوخليفه ..
فاطمه: اهااا ..
فارس وخالد ومحمد وسلمان .. راحوا المجمع وشافوا المحل وعجبهم الموقع ..
سلمان: توكلوا شباب ..
فارس: مقتنع ؟
سلمان: اي .. موقعه ممتاز ..
خالد: ما يتعوض بصراحه ..
محمد: توكلوا يا جماعه ..
فارس: خلاص بكره بحدد لك موعد مع مدير العلاقات العامه في المجمع .. واتفق معاه على كل شي ..
سلمان: بارك الله فيكم يا شباب ما قصرتوا ..
محمد: عزيز وغالي ..
طلعوا من المجمع راحوا صوب السياير ..
فارس: حمودي بروح مشوار بتجي معاي ؟
محمد: لا بطلع اليهال اليوم ..
فارس: زين عيل استأذن يا شباب ..
الكل: الله وياك ..
ركبوا خالد و محمد مع سلمان و وصلهم البيت .. اما فارس كان رايح صوب بيت مناف عشان يودي اخونها يفصل لهم ثياب .. اتصل لها وهو عالدرب ..
فارس: يا قلبه انتي ..
مناف مبتسمه: فديت قلبه والله ..
فارس: شخبار القمر ؟
مناف: الحمدلله .. وحبيب القمر شخباره ؟
فارس مبتسم: مشتاق لنظره من عيون القمر والله ..
مناف: حياتي انت يا فارس ..
فارس: ايه عليج ..
مناف: انت وين ؟
فارس: جايكم ..
مناف: اي ي ي .. كلمت فيصل ؟
فارس: اي كلمته الظهر وقلت له اني بمر عليهم ..
مناف: ما قالي ..
فارس: حياتي ضميان ..
مناف اسقيك فديت قلبك ..
فارس: ابي عصير فرش من هاليدين الحلوات ..
مناف: ولا يهمك فديت روحك .. لي وصلت قول لفيصل انك تبي ماي .. وانا بطرش معاه العصير ..
فارس: يا قلبي عليج يا مناف .. ما تقصيرن فديت روحج ..
مناف: عيوني لك يا فارس ..
فارس: فديت عيونج اللي ذابحتني ..
مناف: زين حبيبي خل اروح اجهز لك العصير على ما توصل ..
فارس: زين يا قلبه ..
سكرت من فارس وطلعت من الغرفه وهي مستانسه .. راحت المطبخ وسوت عصير برتقال فرش للكل .. اتصل فارس بفيصل لما قرب من البيت ..
فارس: هلا فيصل ..
فيصل: اهلين ..
فارس: جاهزين ؟
فيصل مبتسم: اي ..
فارس: يلا طلعوا انا عند الباب ..
فيصل: ان شاءالله ..
سكر من فارس ونادا على عبدالله ..
فيصل: عبود
عبدالله: انا عند الباب يلا ..
فيصل: مطيور هالعبود .. يمه احنا بنروح الحين ..
ام مناف: زين يبه .. هالله هالله باعماركم ..
فيصل: ان شاءالله ..
طلع عند الباب وكان عبدالله مرتز جدام مع فارس ويسولف معاه .. قرب من 00السياره وتوه بيركب ..
فارس: فيصل فديتك ابي ماي ..
فيصل مبتسم: ان شاءالله ..
راح داخل يجيب ماي لفارس .. شافته مناف ..
مناف: شعندك ؟
فيصل: فارس يبي ماي ..
مناف: زين هاك ود له عصير بعد ..
فيصل: لا بس هو قال يبي ماي ..
مناف: ود العصير توني مسويته ..
فيصل: ماله داعي ..
مناف: اقولك وده ..
صبت العصير في الكوب وعطته اياه ..
مناف: اسمع الكلام ..
فيصل: يعني هو طلب ماي .. اودي له عصير ليش ؟
مناف: انت مزعج .. زين هاك ود له الماي ..
فيصل: زين ..
طلع فيصل من البيت وراح عند الباب .. شافه فارس وهو ماسك الماي والعصير .. ابتسم وفتح الدريشه ..
فارس: ماله داعي يبه .. قلنا بس ماي ..
فيصل: سندروني عشان اجيب لك العصير .. بس تستاهل هالعصير الفرش .. توهم مسوينه ..
فارس مبتسم: ما قصرتوا .. شرب العصير مره وحده من العطش .. آآه الحمدلله ..
فيصل: بالعافيه ..
فارس: الله يعافيك .. زين يلا نحرك ..
فيصل: زين بس بحط الاغراض عند الباب ..
راح صوب الباب وحط الكوبين .. نادا مناف عشان تاخذهم ..
فيصل: مناف .. الاكواب عند الباب ..
مناف طلعت صوب الباب .. ومدت يدها تاخذهم .. الا تشوف فارس فالسياره وهو يضحك مع عبدالله .. وفقت تتأمله وهي فرحانه .. فجأه سمعت امها من وراها ..
ام مناف: ليش واقفه عند الباب ؟
مناف تخرعت: ها .. جيت اخذ الاكواب ..
ام مناف: شتسوين واقفه دام جايه تاخذين الاكواب ..
مناف انحرجت: ولا شي .. مشت عن امها بسرعه وراحت المطبخ .. ام مناف طلت صوب الباب وكانت السياره مشت من عند الباب .. راحت ام مناف عند مناف ..
ام مناف: الولد ما يقصر فينا .. لا تخلين الشيطان يلعب بعقلج ..
مناف منزله راسها: ان شاءالله يمه ..
مشت تبي تطلع من المطبخ مسكتها امها ..
ام مناف: حطي هالكلام في بالج .. ترا الولد شايف خير .. لا تتوقعين بيفكر في وحده فقيره ..
مناف نزلت دموعها .. راحت غرفتها تركض .. سكرت على نفسها الباب وقعدت تصيح .. اما ام مناف فكانت مضطره انها تقول هالكلام لبنتها ..
في سيارة فارس الشباب مروحين مع فارس .. يسولفون ومهيصين عالاخر ..
فارس: شو رايكم بعد ما نخلص من السوق اوديكم اصوركم ..
عبدالله: يااااااي ..
فيصل: مممممم .. زين .. بس بشرط ..
فارس مبتسم: شو شرطك ؟
فيصل: تتصور معانا انت بعد ..
فارس: ممممم .. زين بس صوره وحده ..
فيصل: صوره جماعيه لنا احنا الثلاثه ..
فارس: ما يهمك يبه .. نتصور صوره جماعيه ..
وصلوا الخياط .. ونزلوا ياخذون مقاسات .. فارس فصل لكل واحد منهم 6 ثياب .. بعد ما خلصوا من الخياط راحوا يشترون نعل و أزره ..
فارس: شو رايك بهالعطر فيصل ؟
فيصل يشم ريحته: حلو ..
فارس مبتسم: لو سمحت جيب لي من هالعطر ..
فيصل: عبود شتسوي ؟
عبدالله: اتطيب ..
فيصل: تعال لا تفشلنا ..
فارس التفت على عبدالله: هههههه .. والله انك كشخه يا عبود ..
مشى عبدالله مبتسم لفارس: ههااااااااااي ..
فارس وفيصل: ههههههه
اختار لهم فارس كم عطر وكم زرار .. وخذ لكل واحد فيهم نعالتين .. بعد ما خلصوا من السوق .. راحوا الاستيديو عشان يتصورون ..
فارس: السلام عليكم ..
المصوره: وعليكم السلام تفضل ..
فارس: ابي اصور الصغار ..
المصوره: صور عاديه ولا للجواز ؟
فارس: لا لا صور عاديه ..
المصوره مبتسمه: تفضلوا ..
دخلوا وراها الاستيديو الصغير .. نزلت لهم الخلفيات عشان يختارون .. بعد ما اختار فارس الخلفيات .. وقف عبدالله وتصور كم صوره حلوه .. وبعدين وقف فيصل ..
فارس: الحين ابي كم صوره للشباب مع بعض ..
المصوره: ان شاءالله .. يلا شباب .. شو اسمك انته ؟
فيصل: فيصل ..
المصوره: فيصل حبيبي حط ايدك على كتف اخوك واطلع بعيونه ..
فيصل: جي ..
المصوره: ايوه ..
خذت كم لقطه لفيصل وعبدالله ..
فيصل: يلا فارس تعال تصور معانا ..
فارس مبتسم: زين بس خل اعدل الغتره .. بعدين مو شي اتصور معاكم وانتوا بالجينز وانا بالغتره ..
فيصل: المره الجايه بنلبس ثياب وغتر وبنتصور ..
فارس التفت عليه مبتسم: حاضرين لك الغالي ..
وقف فارس معاهم وخذت لهم كم لقطه ..
فارس: بس لقطه وحده الشيخه ..
المصوره: انا خذت 3 لقطات وانت اختار وحده منهم ..
فارس: اي .. جي السالفه ..
عبدالله شاف مروحه كبيره .. استغرب من وجودها ..
عبدالله: ليش هالمروحه هني ؟
المصوره مبتسمه: عشان نحطها عليك وانت تتصور ..
فارس: شوفي باخذ الريش ونثره عليهم والمروحه تشتغل .. وانتي اخذي لهم لقطات ..
المصوره: ماشاءالله عليك .. فكره كتير حلوه .. بس انادي صاحبتي تشغل المروحه ..
.........
فارس: اخذي راحتج الشيخه ..
المصوره وهي طالعه طالعت فارس .. غمزت له وهي مبتسمه .. فارس عقد حواجبه مستغرب .. تجاهل الحركه
فارس: تعالوا نختار لون يناسب ملابسكم ..
فيصل: الابيض مناسب .. الازرق والاسود ..
فارس يستعبط: شو رايك بالوردي ..
فيصل: لالالالالا .. لون بنات ..
فارس: ههههههه ..
دخلت المصوره ودخلت مساعدتها .. عطاهم فارس التعليمات .. شغلوا المروحه .. وطير فارس الريش على الشباب وطلب منهم انهم يحاولون يمسكونه ويطالعون فوق .. وطلب من المصوره تاخذ لهم لقطات عشوائيه .. كان شكلهم يجنن وهم بنقزون فالهوا يحاولون يمسكون الريش مبتسمين وحركاتهم عفويه .. كانت لقطات رهيبه المصوره عجبتها الفكره ..
المصوره: استاذ روح وقف معاهم لناخذ لك للقطه عالسريع ..
فارس مبتسم: اوكي ..
راح صوبهم .. وعبدالله ركض صوب فارس فاتح ذراعينه .. خذ المصوره هالقطه .. قعد فارس والشباب وقفوا جنبه وماسكين كتفه ومبتسمين .. خذت لهم هاللقطه بعد .. بعد ما خلصوا تصوير فارس رتب نفسه .. وفيصل وعبدالله كانوا ينفضون الريش عن ملابسهم .. المصوره نزلت الصور في الكمبيوتر عشان يختارون .. طبعا اغلب الصور كانت تجنن .. فارس اختار صور وايد .. وكانت له كم صوره معاهم وكان شكله فنان .. بعد ما اختار الصور راح يدفع للمصوره العربون .. وهي تحاسبه وتكتب له فاتوره كانت تتميع معاه شوي ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك