رواية نهاية حبك اعدامي -96
فاطمه كانت منحرجه بس طايره من الوناسه في نفس الوقت لان يوسف زوجها و حبيبها موجود .. فارس سوا هرن والشباب طلعوا من الميلس .. يوسف شاف فاطمه وابتسم لها .. فاطمه بادلته ابتسامة خجل ونزلت راسها
فارس: والله انه مزيون هالولد ..
فاطمه " فديت قلبه والله " ..
مريم: صدقت يا فارس ..
نزلوا البنات من السياره وراحوا داخل .. فارس راح الميلس وسلم على الشباب ..
فارس: حيالله النسيب ..
يوسف: الله يحيك .. شحالك ؟
فارس: الحمدلله .. اعلومك انت ؟
يوسف: الحمدلله ..
فارس بخبث: اكيد الحمدلله .. من شافك امس مختبص .. ما يشوفك اليوم شاق الحلج تتبسم لها ..
يوسف وعبدالعزيز: هههههههه ..
تموا الشباب فالميلس وتجمعوا كل الشباب عندهم .. مريم وفاطمه كانوا فوق يناقشون موضوع فارس ..
مريم: تتوقعين فارس حب وانصدم ولا للحين يحب ولا شو ؟
فاطمه: مريوم بيني وبينج ..
مريم: قولي ..
فاطمه: فارس اخوي يحب ..
مريم بطلت عيونها: شو .. يحب .. يعني انتي كنتي تدرين .. من تكون اللي يحبها ؟
فاطمه: شوي شوي علي كلتيني .. ماعرف من تكون .. بس كم مره سمعته وهو يتكلم فالتلفون ..
مريم: والله .. وطلعت مب هين يا فارس ..
فاطمه: انا يوم فكرت في مناف قلت بطير عقل فارس هاذي .. بس فارس عنيد ..
مريم: بس هو للحين ما شافها .. خل نحاول نعزمها بيتنا ومن غير ما يدري نخليه يشوفها ..
فاطمه: ممممم .. والله فكره .. بس تدرين فارس اخوي هيمان .. احسه انه يحب من قلب ..
مريم: من صجج ..
فاطمه: ياختي شوفيه مخطوف لونه .. ودوم سرحان ..
مريم: مسكين فارس .. اول مره ادري انه حساس جي ..
فاطمه: بس تدرين ..
مريم: شو ؟
فاطمه: احس بابا يعرف شي ..
مريم: ها ؟!!
فاطمه: لاحظي دوم فارس وبابا يتكلمون بالالغاز ويضحكون ..
مريم: اي صح .. بس لو بابا يدري عالاقل بينصحه .. انتي تعرفين علاقة ابوي فينا .. وخاصه الشباب .. يعني يقعد معاهم ويكلمهم وما يخشون شي على بعض .. وبابا عقله كبير ويتصرف بطريقه ماتجرح ولا تهين حد ..
فاطمه عقدت حواجها: اي صح ..
رن جوال مريم وكان خالد متصل لها .. استأذنت من اختها وردت على خالد .. اما فاطمه فتمت تفكر في كلام مريم
فاطمه " معقوله يكون بابا هو اللي كاتب لي الرساله ؟ كلام مرايم عدل .. بابا يتصرف بطريقه بحيث انه ما يجرح ولا يهين حد .. يعني بابا اللي درى عن الرساله " ..
قرب يوم عرس هنادي .. وهنادي كانت متوتره وقلقه ..
الجوهره: هنود شفيج ؟
هنادي مبتسمه: متوتره يا جوجو ..
الجوهره: مرحله وبتعدي ..
هنادي: يعني .. وغمزت للجوهره ..
الجوهره: هههههه .. يالدبه ..
هنادي: زين جوجو .. مافي اخبار مني مناك ..
الجوهره ببرأه: اي اخبار ؟
هنادي بخبث: هااا .. علينا جوجو تسوين نفسج مب فاهمه ..
الجوهره: والله مو فاهمه شي ..
هنادي: مافي بيبي فالطريق .. يعني ما يبيلها استعباط ..
الجوهره: ههههه .. يالبايخه .. لا تو الناس ..
هنادي: زين شبتسمين عيالج ؟
الجوهره: لو بنت بسميها على امي .. و لو ولد بسميه على ابوي ..
هنادي: ما خليتي لنا شي ..
الجوهره: هههههه .. كشخه انا وانتي ام خليفه ..
هنادي: هههههه .. لو حد قال ام خليفه انا وانتي نلتفت .. تعتقدين فاطمه بتسمي على ابوي الله يرحمه ؟
الجوهره: الله يرحمه .. لا ماعتقد .. هي تموت في اخوها الكبير .. واعتقد انها بتسمي اول ولد على اخوها ..
هنادي: اي ي ي .. بس شدراج ؟
الجوهره: ذاك اليوم اسولف مع يوسف .. وقالي ..
هنادي: اي شقالج ؟
الجوهره: يالله على اللقافه .. قالي ان اخوها الكبير يحبها وايد .. وهي تموت فيه .. ومن حبها له بتسمي عليه ..
هنادي: ويوسف شدراه .. توه ما كمل اسبوع من ملج بها .؟
الجوهره: بعد زوجته ما يكلمها ..
هنادي: اهااا .. قولي جي ..
الجوهره: والله عليج مخ ..
هنادي: هههههه
دخل عليهم سلمان وهو مبتسم ..
سلمان: مرحبا يا عرايس ..
هنادي: لا خالي حدد موقفك ..
سلمان مبتسم: ليش ؟
الجوهره: لان الشيخه تشوف نفسها هي العروس وانا راحت علي خلاص ..
سلمان: هههههههه ..
الجوهره: صج عاد خالي ..
هنادي: ليش مب راضيه تتقبلين الواقع ..
الجوهره: مالت عليج ..
سلمان: هههههه .. حليلكم والله .. زين هنوده خلاص ما بقى شي ..
هنادي: اي والله ..
الجوهره: تعالي ما قلتي لنا وين بتقضون شهر العسل ؟
هنادي: ان شاءالله بنروح ميونخ بألمانيا ..
الجوهره: واااو ..
سلمان: الله يسعدكم ان شاءالله ..
الجوهره: فديتج يا هنوده ..
سلمان: انا بسافر مع الشباب فالصيف ..
الجوهره وهنادي: وين ؟
سلمان: هههههه .. بنروح المكسيك ..
هنادي رفعت حاجب: المكسيك ؟!!
سلمان: يس ..
الجوهره: شاللي يوديكم المكسيك خالي ؟
هنادي: عليكم طلعات .. خالي المكسيك مالت عصابات ومخدرات .. ما تخافون انتوا ؟
سلمان ضحك: هههههه .. شوي شوي علي .. انا اعرف لي واحد فالمكسيك .. ومرتب اموري معاه .. وفي حلبة سباق واغلب الشباب بياخذون سيايرهم السبورت عشان الحلبه ..
الجوهره: زين من هاذي اللي تعرفه يا خالي ؟
سلمان: an old friend .. ليش هالسؤال ؟
الجوهره: خالي انت ذقت الويل في امريكا .. و تحــ
يقاطعها سلمان: بس انا بروح المكسيك .. وبعدين الوفي عمره ما يخون .. واللي اقصده هو صاحبي الامريكي اللي جى البلاد من فتره ..
هنادي: اي ي ي .. عرفته عرفته ..
الجوهره: ليش واحد من الربع ..
الكل: ههههه ..
الجوهره: بس يا خالي تحملوا بانفسكم .. والله مالنا غيركم انت ويوسف ..
سلمان حط يده على كتف الجوهره وضغط عليه ..
سلمان: باذن الله ما علينا شر ..
هنادي: زين خالي نجي معاكم انا ونواف ..
سلمان: بس نواف .. انتي لأ ..
الجوهره: هههههه
هنادي: خااااااالي ..
الجوهره: وش ينقزج وسط الريايل ..
هنادي: يعني انتوا صدقتوا اني بروح مع شلة مقاليع رايحين حق سباق وسياير وصدعه .. لا يا حبيبتي .. انا بروح استمتع بجو ميونخ ..
سلمان: وخلي عنج اللقافه يا بنت ..
الكل: ههههه
رن جوال الجوهره .. وزوجها كان متصل ..
الجوهره: هلا ..
ايراهيم: حياتي والله ..
الجوهره انحرجت: انت وين ؟
ابراهيم: فديت اللي منحرجه .. انا في بيتكم سوي لي درب ..
الجوهره: ان شاءالله ..
سكرت من ابراهيم والتفت على اختها ..
الجوهره: هنوده .. ابراهيم بيدخل
هنادي: زين .. انا بروح فوق ..
سلمان: حياه الله .. خليه يدخل ..
الجوهره: ان شاءالله خالي .. هنوده شوي وبجيج فوق ..
هنادي وهي رايحه: زين بس لا تتأخرين ..
الجوهره: زين زين ..
طلعت عند باب الصاله ونادت على ابراهيم .. نزل من السياره وسلم عليها .. دخلوا مع بعض الصاله .. قام سلمان وسلم على ابراهيم .. فاولتهم الجوهره وبعدين راحت عند اختها فوق ..
سلمان: وين ناوي تسافر هالصيف ؟
ابراهيم: والله فكرنا نروح مصر .. بس المدام ما بغت ..
سلمان: مسكين والله ..
ابراهيم: امرها ولا امر الحكومه ..
سلمان: ههههه
ابراهيم: لا تفضحنا ..
سلمان: ليش لو درت بترقدك فالحوش ..
ابراهيم: هههههه .. ياليت الحوش ..
سلمان: هههههه .. وين عيل ؟
ابراهيم: بترقدني برا البيت كله ..
سلمان وابراهيم: هههههههه ..
ابراهيم: ان شاءالله بنروح تركيا ..
سلمان: تركيا حلوه وهاديه ..
ابراهيم: اي صح .. بس تدري اقترحت علي نروح الاردن .. بس تدري الحين صيف .. وعدتها نروح بالشتاء ..
سلمان: الله عليك .. جوهم فالشتاء رهيب ..
ابراهيم: بنجرب شتاهم ان شاءالله ..
سلمان: على خير ..
ابراهيم: عيل نسيبك وين بروح شهر العسل ؟
سلمان: بيروحون ميونخ ..
ابراهيم: حلوه ميونخ .. الله يهنيهم ..
سلمان: وياك ان شاءالله ..
تموا يسولفون لين الساعه 9 ونص فالليل .. استأذن ابراهيم ونزلت له الجوهره .. طلعوا من عندهم رايحين لبيتهم ..
.................
سلطان و احمد و جاسم كانوا يلعبون كوره مع عيال الفريج ..
سلطان: شوت الكوره يالعوي ..
علي: شفيك انت .. هم طبوا علي .. ماقدرت
سلطان: اصلا انت ماتعرف تلعب ..
علي: لا خليت الفن لك ..
سلطان: غصبن عنك ..
علي قرب من سلطان وصرخ عليه ..
علي: احفظ لسانك احسن لك ..
سلطان: لا كلش خوفتني ..
جاسم: شو فيكم ؟
علي: خل ولد عمك يحترم نفسه ..
سلطان: انا محترم نفسي غصبن عنك ..
علي: اقسم بالله لو عدتها بتنضرب ..
جاسم نط على علي وضربه على راسه .. علي دز جاسم ورفسه في بطنه .. سلطان عصب ومسكه وبكس له فعيونه .. احمد مسك علي وجاسم قام من عالارض وضربه على راسه .. تجمعوا عيال الفريج على الهوشه ..
جاسم وهو يضرب علي: انت ترفسني .. اوريك
علي: تركوني ..
سلطان وهو يشوت علي على ريوله ..
سلطان: بتنضرب يعني بتنضرب ..
احمد ضغط على يد علي بقوه وسلطان يرفسه وجاسم يضربه على راسه .. ومحد قدر عليهم .. تدخل واحد من عيال الفريج اسمه راشد ..
راشد: خلاص يا شباب ..
راح عند جاسم ودز بعيد .. و مسك سلطان ..
راشد: خلاص يا سلطان .. ما يسوى عليكم ..
سلطان: خلني اعلمه الادب ..
راشد: خلاص تعال معاي .. يا احمد اتركه ..
راحمد وجاسم وسلطان راحوا بعيد عن علي .. كلمهم راشد وهداهم .. بعد هالهوشه .. طبعا علي انتفخت عيونه وتعور من الضرب اللي جاه .. لانه ما كان قادر يدافع عن نفسه .. احمد مثبته وجاسم وسلطان تولوه .. الشباب راحوا بيوتهم ونسوا السالفه .. اليوم الثاني ابو علي راح عند بوفارس ..
بوعلي: السلام عليكم ..
بوفارس: عليكم السلام .. تفضل حياك ..
بوعلي: دام فضلك ..
دخلوا الميلس و بوفارس قلط بوعلي .. بوعلي دخل فالموضوع على طول ..
بوعلي: والله يا بوفارس اليوم جايك وانا زعلان ..
بوفارس: افا .. ليش الزعل ؟
بوعلي: امس عيالكم مسكوا علي ولدي وضربوه ..
بوفارس عقد حواجه ..
بوفارس: شلون ؟ من من عيالي ؟
بوعلي: الصغير مع ولد عمه ورفيجهم .. والله انا ما كنت باجيك .. بس ولدي عيونه راحت .. وجسمه محتقن من الضرب ..
بوفارس منحرج: والله اسمحلي .. وما يصير خاطرك الا طيب .. امسحها فيني ..
بوعلي: انا مابيك تضرب ولدك لاني اعرف تربيتك يا بوفارس .. بس تصرفه مو حلو بصراحه ..
بوفارس: لا افا عليك .. بيجونكم البيت يستسمحون منكم ولا يهمكم ..
بوعلي: و نعم التربيه يا بوفارس ..
بوفارس: ما عليك زود .. والله منحرج منك .. ومستغرب من تصرف العيال .. هم يتهاوشون بس اول مره توصل للضرب ..
بوعلي: انا ادري انهم دوم في حالهم .. ومردهم بيتراضون .. بس ولدي ما هان علي اشوفه جي ..
بوفارس: من حقك والله ..
بوعلي: زين يا بوفارس .. اسمحلي لازم امشي .. واتمنى ما تزعل من جيتي لك بهالموضوع ..
بوفارس: والله انت اللي اسمحلي على تصرف العيال ..
بوعلي: مسموح .. يلا عيل وداعة الله ..
بوفارس: الله يحفظك ..
بوفارس وصل بوعلي لين الباب و ودعه .. دخل البيت وهو يفكر في تصرف جاسم و سلطان واحمد .. قعد فالصاله وهو يفكر .. دخلوا عليه بناته .. باسوه وقعدوا معاه ..
مريم: شو فيك يبه ؟
بوفارس مبتسم: ولا شي ..
ايمان: والله وكبرتي يا مرايم وصرتي تقولين يبه .. هههاااااي
مريم التفت على ايمان وطالعتها بغضب ..
مريم: صج والله ..
ايمان: اي ..
فاطمه: بس خلاص يا جماعه .. لا تتهاوشون علي ..
الكل: ههههههه ..
بوفارس: ها يبه مستعده للعرس ؟
مريم مبتسمه: اي .. كل شي جاهز تقريبا ..
ايمان بغلاسه: اموت فالجاهز انا ..
مريم: وجع يا ايمانووو
الكل: ههههههه ..
بوفارس قعد مع بناته شوي وبعدين طلع يتكلم فالتلفون .. اتصل بسلطان وجاسم الهايتين ..
سلطان: جسوم هاي ابوك متصل ..
جاسم: زين رد شوفه شو يبي ..
سلطان: اوكي .. رد سلطان ..
بوفارس بدون ما يسلم: وين انتوا ؟
سلطان باستغراب: احنا فالمطعم ..
بوفارس: من انتوا ؟
سلطان: انا والجسمي وحمادوه ..
بوفارس بهدوء: زين بعد ما تخلصون من المطعم وين بتروحون ؟
سلطان"شو سالفته عمي": بنروح السينما وبعدين بنرجع بيتكم ..
بوفارس: زين عيل يبه .. الله يحفظكم ..
سلطان: في شي عمي ؟
بوفارس: لا يبه .. بس كنت اسأل عنكم ..
سلطان: زين ..
بوفارس: مع السلامه ..
سكر بوفارس وهو يفكر في موضوع الولد ..
بوفارس " غريبه انهم يضربون حد .. مو عوايدهم ؟ .. بس يرجعون وبعرف السالفه منهم " ..
محمد وساره كانوا رايحين البحر مع التوأم .. محمد كان مسوي بيت كبير من الطين ..
محمد: نصور تعال شوف بابا يسوي بيت ..
ناصر: مابي ..
محمد: عليك مزاج .. تعال نيوف ..
نايف راح عند ابوه وهو فرحان .. ركض صوب ابوه وطب على البيت وخربه ..
محمد: لالالالالا ..
ساره: ههههههه .. حرام راح تعبك ..
محمد: اخ منك انت ..
نايف قام يضحك وركض بعيد عن ابوه .. محمد تم يلحقه ويخوفه ..
محمد: بامسكك يالدب .. تعال خل اعضك ..
نايف كان يركض وينادي على امه ..
نايف: ماما .. ماما ..
ساره مبتسمه: تعال ابوي انته ..
محمد مسك نايف وتم يدغده ويطيره فالهوا .. راح عند ساره وهو شايل نايف اللي ميت من الضحك ..
ساره: فديتك يا محمد ..
محمد: حياة محمد انتي ..
ساره: الله يخليك ذخر لعيالك ..
محمد: وانتي ؟
ساره بخجل: شو انا ؟
محمد يستعبط: يعني ما تبيني .. بس يخليني ذخر لعيالج ..
ساره: محمد ..
محمد: فديت اللي نطقت محمد والله ..
انحرجت ساره .. قرب منها محمد يبي يبوسها على راسها ودزته ..
محمد: افااا ..
ساره: مب جدام اليهال ..
محمد: شو بسوي انا .. الا ببوسج على راسج .. وبعدين اليهال لاهين مع الرمل ..
ساره: لا يا محمد ..
محمد: حركات يالدلوعه ..
ساره ومحمد: هههههههه ..
محمد: تصدقين يا سويره ان الطلعه بدون الخدامه راحه نفسيه ..
ساره: والله محد قالك .. انت اللي تشقلها معانا وين ما نروح .. كم مره قلت لك اليهال انا بعابلهم ..
محمد: فديتج انتي .. الحين كبروا احس نقدر نعابلهم ..
ساره: حتى لما كانوا اصغر يا محمد ..
محمد: اهم شي افتكينا منها ..
ساره مبتسمه: اي والله اهم شي ..
محمد: زين انا بدخل البحر شوي .. انتبهي على اليهال .. وعلى نفسج ..
ساره مبتسمه: ان شاءالله يا قلبي ..
دخل محمد يسبح فالبحر .. وراح بعيد وايد .. ساره خافت عليه .. كانت تحاتيه .. راحت صوب عيالها وتمت تلعب معاهم على السيف .. وقلبها على محمد .. اندمجت مع عيالها شوي .. ولما التفت صوب البحر ما شافت محمد .. حست بالخوف والوحده .. تمت عيونها تدور محمد بين امواج البحر الهاديه ..
ساره " البحر هادي اليوم .. وين ابتعد محمد .. يا ويل قلبي على ريل فديته .. وينك يا محمد وينك؟ " وفقت وحطت يدها على جبهتها وتمت تركز فالافق .. فجأه صرخت صرخه .. وحست بنفضه في جسمها .. عيالها خافوا من صرختها وتموا يصيحون .. محمد كان حاضن ساره بقوه من وراها .. ساره كانت بتصيح من الخوف ..
ساره: محمد يالسخيف خوفتني ..
محمد: ههههههه .. فديت قلبج والله .. اشوفج ادوريني وحالتج حاله ..
ساره: عليك حركات .. زين جي صيحت اليهال ..
محمد يطالع عياله: اسمع انت وياه .. ابيكم ريايل .. مو على اقل شي تصيحون ..
ساره: كلش عاد فهموا عليك ..
محمد: لا بيفهمون .. بس مابي اسمع صوت ..
ساره: لا تصرخ عليهم ..
محمد قرب منها: ايه عليج والله ..
ساره دزته: محمد كم مره اقولك مو جدام اليهال ..
محمد: كلش عاد مو جدامهم .. هم مب في فنج .. كل واحد فاج حلجه ودموعه على خده ..
ساره: هههههه .. خلاص يا قلبي انتوا .. تعال حبيبي نايف ..
محمد: حالتكم صعبه يا شباب .. لا انا من بكره بسجلكم فالعسكريه ..
ساره: هههههه .. ليش عاد ..
محمد: ما تشوفينهم مخدين .. كل واحد يصيح ..
ساره: توهم صغار يا محمد ..
محمد: اي توهم صغار .. انا يوم كنت في بطن امي .. كنت اتهاوش مع عيال الفريج ..
ساره ماتت من الضحك على مزح محمد ..
ساره: ههههههه .. فديت خفة دمك والله ..
محمد وبسرعه طبع بوسه على خدها ..
محمد: فديت قلبج والله ..
ساره: ههههه .. انت ما تسمع الكلام ..
محمد: زين ابي اكل شي ..
ساره: ان شاءالله فديتك .. بس خل اسكتهم ..
محمد: والله انكم مدلعين .. خلاص بكره انا رايح اسجلكم فالعسكريه .. يالصياحين ..
ساره: ههههه .. زين حبيبي اسوي لك سندويش جبن ..
محمد: جبتي معاج ؟
ساره: اي لازم ..
محمد: يه يه يه .. كل هاي عشاني .. والله اني رجل محظوظ ..
ساره: من قال عشانك .. عشان عيالك ..
محمد: افا ..
محمد وساره: هههههه ..
ساره: اعرفك انت وعيالك غرامكم خبز وجبن .. فلازم اخذه معاي ..
محمد: فديت قلبج والله .. نيوف تبي جبن ؟
نايف مبتسم: اي اي اي ..
راح يركض عند ابوه .. وركض وراه ناصر .. طبوا على ابوهم وتموا يلعبون لين ساره سوت لها السندويشات .. تموا قاعدين على البحر قعده عائليه حلوه .. قام محمد يتمشى بروحه على السيف ويفكر ..
محمد " الحمدلله انا مرتاح ومستانس مع ساره .. شلون فكرت في فاطمه بنت عمي وهمت فيها؟ صج ساره هي اللي خلتني افكر .. بس المفروض ما كنت اتمادى .. بس للحين فاطمه في قلبي .. واتمنى انساها نهائيا .. وترجع فاطمه اختي وبنت عمي اللي معزتها بمعزة وغلاة الريم اختي .. الله يهديج يا ساره " ..
يتبع ...
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك