رواية نهاية حبك اعدامي -98
ايمان: شو ها .. فضول خبل مال سياير و بطابط و مسابق .. علي اثقل منه ..
فاطمه: انتي يبيلج علي .. تعرفينه عصبي و ماعنده مشكله فالتصفق ..
ايمان: ما دريت اخليه يصفقني .. باسوي له حفله لو بس فكر انه يصفقني ..
مريم: داشه بقوه البنت ..
ايمان: عيل شلون عيل ..
فاطمه: زين انا بروح اتعشى ..
ايمان: زين عزمينا يالبخيله ..
فاطمه: ولا اانا مب شاريه العشى .. العشى موجود تحت .. تبون تعالوا ..
مريم: يمه منج .. دبه
فاطمه: عادي ..
طلعت عنهم و نزلت تحت .. بوفارس كان قاعد بروحه وام فارس كانت تجهز العشى .. قعدت مع ابوها تسولف معاه ..
بوفارس: شو اخبار معرسنا ؟
فاطمه مبتسمه: طيب الحمدلله ..
بوفارس: ما كلمتيه ؟
فاطمه: بلا كلمته اليوم ..
بوفارس: ها شلون حسيتيه ؟
فاطمه: ليش كلكم تسألوني هالسؤال ؟
بوفارس: ههههه .. لازم نعرف انطباعج عن الولد ..
فاطمه: اي ي ي .. والله حليو وحبوب ..
بوفارس " اكيد حليو و حبوب بعد " ..
بوفارس: الله يوفقكم يا بنتي .. ولا تسمعين كلام الحريم .. ولا تخلينهم يلعبون بمخج .. بقولج قصة وحده لعبوا في مخها الحريم ..
فاطمه مبتسمه: زين ..
بوفارس مسك يدها وباسها ..
بوفارس: سمعي هالقصه .. في زمان قبل البترول .. العرب كانوا عايشين بالخيام وحياتهم كانت صعبه .. في ريال تقدم به العمر .. وماعنده الا ولد واحد .. طلب من ولده انه يتزوج بنت ريال شهم .. لان بنت الريال الشهم متربيه تربيه طيبه و ابوها بيكون حكيم .. الولد وافق ابوه على هالكلام وطمنه .. مر زمن ومات هالشيبه بعدها الولد نفذ بوصية ابوه .. لقى ريال شهم وتقد لخطبة بنته .. ابو البنت وايد حكيم .. قال للولد انا بزوجك بنتي بس عندي شرط .. لو وافقت عليه لك بنتي .. الولد سمع شرط الريال .. وكان شرطه ان بعد ما يتزوج و زوجته زعلت وراحت بيت اهلها ما يجي يراضيها الا بعد سنه كامله ..
فاطمه بدهشه: سنه كامله ؟ ليش بابا ؟
بوفارس: الحين بتعرفين يا قلبي .. زين الولد وافق على الشرط والله تمم لهم وتزوج البنت وكانوا عايشين حياه سعيده .. وكانت الزوجه تعجن وتخبز وتجهز الاكل لزوجها .. وتغسل ملابسه وتنظف له مكانه .. وكانت ما تختلط بجيرانها ولا تطلع من بيت زوجها بالمره الا للضروره .. مرت الايام وصار عند اهل زوجها عرس .. فاقترحت على زوجها انها تحضر العرس .. الزوج رفض فالبدايه وقالها اخاف عليج من جمعة النسوان .. جمعت النسوان ما من وراها خير .. قالت له ما عليك ما يقدرون يأثرون علي عندي عقل اميز به كل شي .. وافق الزوج و راح مع زوجته العرس .. اول ما دخلت عليهم استلموها الحريم .. قالوا لها ليش دومج فالبيت ولا تطلعين ولا تزورين حد ؟ وش الي تشغلين وقتج فيه ؟ ردت عليهم اقوم بشغل البيت واسنع الاكل لزوجي وارتب له مكانه واحنا بخير والحمدلله .. قالوا لها انج قليلة عقل .. احنا ريايلنا يسون كل هالامور عنا .. واصلا هاي شغل الريايل مو شغلنا انتي مو خدامه عنده .. رجعت الحرمه بيتها وهي تفكر في كلام النسوان .. فظنت انها غبيه وانقص عليها ..
فاطمه: ول عليهم هالنسوان ..
بوفارس: شفتي شلون .. المهم .. قررت الحرمه انها تسوي مثل باقي الحريم .. فاليوم الثاني رجع زوجها ولقاها نايمه .. ماحب انه يزعجها فتركها نايمه وقام سنع له ولها اكل وكلوا مع بعض .. رجع اليوم اللي بعده ولقاها على نفس الحال .. فسألها عن حالها .. ردت عليه انا مو من واجباتي اسوي هالشغل كله .. انت تسوي شغل البيت كله انت فاكرني مغفله كل الحريم ازواجهم يسون شغل البيت .. استغرب الزوج وسألها من اللي حط هالافكار السوده في مخج .. قالت له الحريم اللي قالوا لها وانها قررت تسوي مثلهم وما راح تشتغل له فالبيت .. كبر عقله من سمع هالكلام .. وقالها ما عليج من كلام الحريم يقصون عليج .. قالت له بعناد لا ما يقصون علي قالها دام هاي رايج .. شلي اغراضج و روحي بيت اهلج ..
فاطمه: صج انها غبيه .. لعبوا في مخها الحريم ..
بوفارس ابتسم لها ومسح على راسها ..
فاطمه: آسفه بابا .. كمل ..
بوفارس: زين يا طويلة العمر .. راحت بيت اهلها وشافها ابوها جايه من بعيد فعرف انها زعلانه مع زوجها .. راح للام وقالها بنتج جايه من بيت زوجها .. لا تضحكين معاها وكشري في ويها .. اول ما دخلت البنت بيت ابوها ارتاحت شوي وبعدين طلب منها ابوها تسقي الغنم وتنظف حضاير الغنم .. وطلب منها تسوي اشياء وايد لين تعبت وصار كل يوم يشغلها باعمال شاقه ومتعبه .. لين ندمت وعرفت انها غلطانه وان النسوان خدعوها لانها كانت تعيش سعيده مع زوجها ..
فاطمه: مسكينه والله ..
بوفارس: المسكينه على قولتج تمت تنتظر زوجها يجي يراضيها .. بس كان شرط ابوها فالبدايه انهم لو تزاعلوا ما يجي الزوج ياخذها من بيت ابوها الا بعد سنه .. والمده طويله بالنسبه لها .. وبعد سنه بالضبط راح الزوج يراضي زوجته .. طلب الاب من زوجته انها تستقبل زوج بنتها بفتور و تكشر في ويهه .. وتفرش له كيس يقعد عليه وتطبخ له عدس .. اهل الصحراء يكرهون العدس .. وهاللي يسويه الاب كان احتقار للضيف والبنت كانت تلوم نفسها .. وبعد ما قلطوا النسيب طلب الاب من زوجته انها تفرش له كيس عشان ينام عليه وتعطيه لحاف قديم .. لما حل عليهم الليل راح الاب حق نسيبه وقاله روح نام في مكان ثاني .. وكان الاب مرتب فراش نظيف له نام في المكان اللي قال لزوجته تجهزه .. تغطى وسوا نفسه نايم .. بعد فتره راحت البنت عند ابوها وهي تعتقد انه زوجها .. كانت شايله له اكل طيب وقالت له انه ابوها ماعرف قيمته .. وان قيمته عندها هي كبيره .. وقالت له ان ابوها رواها انواع العذاب وانها كانت معززه مكرمه عنده .. مارد عليها ابوها وهي كانت مفتكره انه زوجها ومن التعب ما رد .. تركت الاكل عند راسه وراحت عنه ..
بوفارس: واليوم الثاني قال الاب لبنته الحين رجعي مع زوجج ولا تغضبينه وكوني مطيعه .. رجعت مع زوجها بفرح وكانت تشكي لزوجها عن حالها عند ابوها .. واليوم اللي بعده مروا عليها النسوان يباركون لها على رجعتها .. ما استقبلتهم فالبيت .. وقفت لهم عند الباب وقالت لهم ولا وحده فيكم تجي بيتي .. خربتوا علي حياتي مابي اشوف اي وحده فيكم مره ثانيه .. ومن بعدها عاشت البنت مع زوجها حياة سعيده ..
فاطمه: بس بابا احنا زمنا غير زمنهم ..
بوفارس: ادري .. وانا ما قولج قطعي الناس .. الا تواصلي معهم .. بس لاتسمعين من النسوان .. لانهم بيخربون عليج حياتج .. كل وحده بتقول انا زوجي يسوي لي و يوديني .. وانتي بتقولين ليش ما يوديني ويسوي لي .. لا تاخذين وتعطين معاهم في مجال حياتج .. ولاتعطينهم مجال يتدخلون في حياتج .. ولا تسمعين كلام فلانه وغيرها مو تقولج امج والله اجبريه يطلعج بيت بروحج .. ولا تقولج اختج زوجي سوا وغيره .. خلج حكيمه فكري عدل محد بينفعج الا زوجج .. لا تهدمين بيتج بيدج .. وكلام الحريم ابتعدي عنه ..
فاطمه مبتسمه: ان شاءالله بابا ..
بوفارس: فديت فطيم الغاليه ..
بعد هالقعده الحلوه مع ابوها نزلوا خواتها وتعشوا كلهم الا جاسم .. الكل استغرب من عدم وجود جاسم .. وان بوفارس ما ناداه .. وطبعا فارس ما نزل يتعشى معاهم تحجج بوجود محمد ولد عمه معاه .. بعد هالعشى العائلي كلن توجهه لغرفته عشان يرتاح .. كانت الساعه 10 ونص .. ومحمد كان مع فارس فالغرفه ..
محمد: زين انت شو اللي خلاك تسألها هالسؤال يا فروس ؟
فارس: والله مادري .. يمكن اشتطيت يوم شفت الشباب بيعرسون .. فكرت في هالشي..
محمد: بس يا فروس انت اتخذت قرارك .. وللحين ما كلمت هلك
فارس: والله متردد يا حمود ..
محمد: لا تعلق البنت يا ريال .. انت اتخذت قرار خلاص go for it
فارس: ان شاءالله .. بس يا حمودي اللي محيرني حزنها .. ودموعها اللي ما توقف ..
محمد: ليش ؟
فارس: مادري .. يعني مستحيل عشان سألتها عن نهايتنا بتحزن هالحزن ..
محمد: زين انت تذكر يمكن قطيت عليها كلمه قويه ..
فارس: متأكد من كلامي .. قلت لها يا فلانه انا وانتي لين متى ؟ بس هي انصدمت وتمت ساكته .. سكرت مني بحزن .. حاولت اخليها عالخط بس اصرت تسكر .. خليتها على راحتها .. رجعت كلمتها قبل ما نام ما ردت اول مره .. بعدها بفتره اتصلت لي .. بس كانت حزينه وايد وتصيح .. كانت تصيح بصوت مسموح يا حمود .. عورت قلبي ..
محمد: زين ما سألتها شو فيها ؟ يمكن تع
بانه يمكن اهلها فيهم شي؟
فارس: اكلمها وماترد .. تخيل طول المكالمه وانا اهدي فيها وهي تصيح .. ما خذت منها لا حق ولا باطل ..
محمد: لا حول الله .. شو الحل ؟
فارس: اي والله شو الحل .. مادري اخلي وحده من خواتي تكلمها ؟
محمد: لا تحمل .. بطيح من عين خواتك جي ..
فارس: عيل شاسوي قولي يا محمد قولي .. تعبت والله تعبت ..
رن جوال فارس ومناف كانت المتصله .. شاف التلفون بحزن ..
محمد: رد عليها ..
فارس: خل تسكر باتصل لها ..
اتصل فارس بنماف وردت هي ميته من الصياح .. فارس خاف عليها ..
فارس: مناف شفيج .؟
مناف: فارس الحقني يا فارس ..
فارس: الله يخليج يا مناف اهدي شوي ..
مناف وسط دموعها: فارس .. امي
فارس بخوف: شو فيها امج ؟
مناف تمت تصيح و مو قادره تتكلم .. فارس كان مطول باله معاها .. انتظرها تهدى شوي وتتكلم ..
مناف: فارس انا ماعرف شلون ابتدي الموضوع معاك .. فارس انت تدري اني احبك واموت فيك ..
فارس تسارعت دقات قلبه مع كلام مناف ..
مناف: والله العظيم اني اموت فيك يا فارس ..
فارس: مناف طيرتي عقلي .. قولي لي شو صاير ؟
مناف: في واحد متقدم لي ..
فارس بطل عيونه .. تم يطالع محمد و هو مو مستوعب الكلام اللي سمعه .. محمد خاف على ولد عمه ..
فارس: مـ مـ مناف انتي تمزحين ؟
مناف بحزن: لا والله مامزح يا فارس .. ارجوك انقذني ..
فارس بصدمه: من يكون هالشخص؟ من اهلج ؟
مناف: لا .. دكتوري فالجامعه ..
فارس: آآآه يا قلبي .. ليش يا مناف ليش ؟
مناف: والله مابيدي شي .. امس زارتنا امه .. وامي تحن علي يا فارس .. طلعني من اللي انا فيه ..
فارس: انتي تبينه ؟
مناف بصراخ: انا ابيك يا فارس .. بس انت ..
فارس: زين مناف يا قلبي استهدي .. قومي صلي ركعتين واذكري ربج .. انا جايج فالطريق ..
مناف وتشهق من الصياح: ان شاءالله حبيبي ..
سكرت مناف من فارس و سوت اللي قالها عليه .. فارس سكر التلفون وطالع محمد اللي عيونه كانت حايره تدور اجوبه على ردة فعل فارس من مكالمة مناف ..
محمد: شسالفه ؟
فارس: في واحد متقدم لها ..
محمد انصدم .. خاف على فارس .. خاف من اللي ممكن يصير لفارس لو تم هالزواج ..
محمد: وليش بتروح لها الحين ؟
فارس: والله مادري .. ترا الشيطان يلعب في عقلي .. شوري يقولي اخطفها واخذها بعيد عن كل الناس ..
محمد: فروس كبر عقلك وعن الينون ..
فارس: خلها على الله ..
غلغل اصابعه في شعره وغمض عيونه بقوه .. قام من السرير ولبس ثوبه ..
فارس: زين انا طالع يلا قوم ..
محمد: انت بتروح شو بتسوي ؟
فارس: والله مادري يا محمد .. بس ابي اكون حولها .. فيني غل وغضب ..
محمد: اذكر ربك يا فارس ولا تتهور ..
رن جوال فارس وكانت مناف المتصله .. رد عليها وطلعوا هو ومحمد من الغرفه ..
فارس: انا جاي الحين .. لما اوصل باتصل ..
مناف: زين حبيبي ..
سكر منها و ركب السياره .. سلم على محمد وحرك .. طبعا محمد خاف على فارس .. مشى وراه بس من بعيد .. فارس انطلق بسرعة البرق لبيت مناف .. اول ما وصل اتصل لها تلفون وطلعت له .. اول ما شافها كان وده يطوقها بذراعينه .. وقف جنبها وتم يطالع عيونها الحزينه .. مناف قربت منه ونزلت راسها ..
فارس: رفعي راسج حبيبتي ..
مناف كانت منزله راسها ونزلت دموعها .. فارس رفع راسها ونزلت دمعه على يده .. حس بحزنها ..
فارس: مناف عشاني لا تصيحين .. دموعج غاليه يالغاليه ..
مناف بصوت مبحوح: فارس ..
فارس غمض عيونه: يا عيون فارس انتي ..
مناف: فارس انا ابيك انت ..
فارس: وانا ماتصور حياتي بدونج يا قلبه ..
مناف: مابي الدكتور .. وامي من امس وهي تحاول تقنعني ..
فارس: من وين يعرفونكم ؟
مناف: هالدكتور عندنا فالجامعه .. انا ماخذه عنده مقرر ..
فارس: يا قلبي يا مناف .. لا تزعلين نفسج يا قلبه .. كل شي بيكون بخير ..
مناف: ماقدر انام اليل من كثر التفكير .. وكل شي جى مره وحده .. يوم انك سألتني ذاك اليوم انصدمت واليوم اللي بعده تدخل امه علينا .. آآآه يا فارس تعبت ..
فارس: سمالله عليج يا قلب فارس انتي ..
فتح باب السياره وطلع علبة الكلينكس .. خذ الكلينكس ومسح دموعها ..
فارس: تعالي قعدي هني حياتي ..
ركبت السياره وفارس كان واقف مواجهها .. تم يهديها و يطمنها .. تم معاها تقريبا ساعه و شوي .. مناف حست بالراحه شوي .. هدت و ما قامت تصيح ..
فارس: حياتي ..
مناف ابتسمت: قول حبيبي ..
فارس: انتي لا تكدرين خاطرج حبيبتي ..
مناف بحزن: بس يا فارس انا ماحبه .. انا احبك انت ..
فارس كان يسمع كلام مناف وقلبه يتقطع عليها ..
فارس: وانا اموت فيج يا مناف و ربي اني اموت فيج .. بس انتي لا تكدرين خاطرج .. ان شاءالله بتنحل هالمشكله ..
مناف تنفست بعمق: فديت قلبك .. زين انا لازم اروح داخل ..
فارس: زين حبيبتي .. انا باتصل فيج الحين ..
مناف: زين ..
مدت يدها لفارس عشان تنزل من السياره .. فارس مسك يدها بحنان وتم يطالع عيونها بشوق .. مناف انحرجت ونزلت راسها .. بعد ما نزلت حاولت انها تبطل يدها من يد فارس بس ما قدرت ..
مناف: فارس ..
فارس هيمان: يا قلب فارس انتي ..
مناف: يدي ..
فارس ابتسم: فديت يدج والله .. زين حبيبتي باتصل وردي ..
مناف: ان شاءالله ..
فارس كان يراقب مناف وهي داخله البيت لين سكرت الباب .. خذ نفس وركب السياره .. اتصل لها وردت عليه على طول ..
فارس: هلا حياتي ..
مناف: طلعت من فريجنا ؟
فارس: لا توني .. الحين انا نهاية فريجكم المظلم ..
مناف: شنسوي مافي كهربه ..
فارس: الله يعينكم ..
تم فارس طول الدرب يسوق بهدوء ويكلم مناف .. كان يسولف معاها سوالف عاديه عشان ينسيها حزنها .. لما قرب من البيت استأذن منها ونزل البيت .. كان متضايق من الموضوع كله .. محمد رجع البيت بعد ما فارس طلع من بيت مناف .. تطمن عليه وراح البيت .. اما فارس المسكين دخل غرفته وهو مو على بعضه .. حذف نفسه على السرير .. غمض عيونه وتخيل مناف بالفستان الابيض والدكتور واقف جنبها .. فتح عيونه بخوف وقام من السرير .. تم يدور فالغرفه مو عارف شو يسوي .. كانت الساعه 12 ونص .. بدل ملابسه وراح البحر .. ملجأه الوحيد البحر .. صف على السيف ونزل .. تم يتمشى على السيف والموج يداعب ريوله .. كان يفكر في مناف و حزين على الوضع اللي هم فيه ..
فارس " انا تاخرت ولا شلون ؟ هل مناف ضاعت من يدي ؟ مناف حبيبة قلبي تتزوج غيري .. لا مايصير مناف لي انا وانا لها .. مناف الرقيقه الخلوقه الحنونه .. فديت عيونها فديت جمالها .. والله احبها هالبنت .. مناف بعيوني اجمل من خلق ربي .. مناف اللي خذت قلبي فديتها .. يا رب لاتحرمني منها " .. قعد على صخره على السيف وتم يتأمل موج البحر .. نور القمر منعكس على امواج البحر الهاديه .. نسمات الهوا الدافيه تمر على فارس وتطفي النار اللي بقلبه .. فارس كان محتار ونفسيته تعبت .. كان يفكر في مناف ومستقبله معها .. خاف انه تضيع من يده .. مابيده شي يمنع زواج مناف من الدكتور حامد .. القرار بيد مناف .. وهي اللي بتحدد مصرها ومصير فارس معاها .. وفارس خايف ان امها تضغط عليها او تجبرها .. مرر اصابعه في شعره وغمض عيونه .. خذ نفس عميق وطلعه من صدره بقوه .. حضن ركبته لصدره وتم يتأمل موج البحر الهادي .. تم فارس على حاله .. اما مناف المسكينه بعد ما سكر عنها فارس .. رجعت تصيح بحزن .. خذت اللحاف اللي عطاها اياه فارس من قبل وحضنته .. تمت تشم ريحته و دموعها بللته ..
مناف" آه يا فارس .. ما تخيل حياتي من دونك .. والدكتور حامد شيبي ذي بعد .. طلع هيمان .. آآه يا قلبي عليك يا فارس .. انا ادري انك تكابر .. الحزن والخوف شفتهم بعيونك .. يا قلبك يا فارس .. ماعرفت الدنيا الا يوم عرفتك .. ما حبيت الحياه الا يوم عرفتك .. فديت قلبك يا فارس .. مستحيل اعيش بدونك .. ان شاءالله امي ماتضغط علي زود .. حياتي فارس وبس .. ومستحيل حد ياخذ مكانه "
مناف وفارس تموا على هالحال تقريبا اسبوع .. كل واحد يفكر فالثاني وخايفين من النهايه المره ..
.................
بعد هالاسبوع المليء بالاحداث حانت لحظة الصفر لهنادي .. بكره العرس .. وهنادي كانت متوتره .. اما نواف فكان طاير من الفرحه وده الوقت يطير بسرعه ..
نواف " الله متى يجي بكره ونجتمع انا وهنادي تحت سقف واحد .. الله يقدرني واسعدها " ..
طبعا اهل نواف واهل هنادي كانوا مشغولين بتجهيزات العرس .. فاطمه واهلها ساعدوا بيت يوسف .. بوفارس قام فيهم .. والبنات كانوا طول اليوم عندهم .. ومحد مستانس كثر يوسف وفاطمه .. عاد يوسف كل شوي يسوي نفسه ما يدري ان في حد فالصاله ويدخل على فاطمه وهي ماتدري ..
يوسف وقف عند الباب: اموت في هالجمال والله ..
فاطمه انحرجت ولبست شيلتها ..
يوسف قرب منها: افا انا ريلج .. ليش لابسه الشيله ؟
فاطمه منحرجه: خوفتني ..
يوسف قرب منها زياده: شكثر خوفتج ؟
فاطمه ابتعدت: يوسف ..
يوسف حط يده على كتفها وقرب ويهه من ويها ..
يوسف: ليش ابتعد ؟
فاطمه بتوتر: يوسف الله يخليك ابتعد ..
يوسف: فديت انفاسج ..
فاطمه حطت يدها على صدره ودزته .. بس يوسف تم واقف مكانه ..
يوسف: فديت يدج .. مسك يدها وباسها ..
فاطمه ماتت من الخجل .. نزلت راسها مستسلمه ليوسف .. دخلت عليهم الجوهره وهم على هالوضعيه .. يوسف ماسك يد فاطمه ومقرب منها .. وفاطمه منزله راسها بخجل .. فاطمه انتبهت لوجود الجوهره .. الجوهره على طول طلعت .. فاطمه كانت شوي وتصيح ..
يوسف: شفيج حبيبتي ؟
فاطمه: اختك دخلت ..
يوسف التفت صوب الباب .. ما لقى حد ..
يوسف: وينها ؟
فاطمه: راحت .. يوسف الله يخليك ابتعد ..
يوسف ابتسم لها: ان شاءالله حبيبتي ..
ابتعد عنها خطوتين .. ابتسم لها وطلع من الصاله .. فاطمه حذفت نفسها على الكرسي وغطت ويها بيدينها .. كانت منحرجه و متوتره بنفس الوقت ..
فاطمه " يا ويلي شافتنا الجوهره .. الله يغربلك يا يوسف .. وين اودي ويهي من الجوهره؟ " تمت تفكر وهي منحرجه .. لبست شيلتها وطلعت من الصاله .. راحت فوق عند االبنات وهي راكبه الدري طلع يوسف في ويها مره ثانيه ..
يوسف وقف لها متخصر: هااا ..
فاطمه بطلت عيونها: يا ربي ..
يوسف: هههههه .. قرب منها بسرعه وباسها على خدها ونزل ..
فاطمه انصدمت و تمت واقفه مكانها .. اما يوسف نزل وهو فرحان .. بسرعه راحت غرفة هنادي قبل ما يصيدها يوسف مره ثانيه ..
فاطمه " والله ان يوسف مينون " .. دخلت عليهم وتلاقت عيونها بعيون الجوهره .. انحرجت ونزلت راسها .. الجوهره ابتسمت ونزلت راسها .. تذكرت شكل يوسف وفاطمه فالصاله ..
الجوهره " الله يسعدك بفاطمه يا يوسف .. والله انكم عصافير وتجنون "
فاطمه قعدت جنب ايمان .. والبنات كانوا يرتبون مع هنادي شنطتها ..
مريم: خلاص يا هنادي .. الليله اخر ليله لج في هالغرفه ..
هنادي مبتسمه: اي والله ..
الجوهره: عيل بيتمون الشباب بروحهم .. الله يستر شبيسون بدونا ؟
هنادي: شكلهم بيخبصون الدنيا ..
الكل: هههههههه
الجوهره: يوسف ريال .. و يعرف يطبخ بعد ..
هنادي: من قدج يا فاطمه ..
ايمان: عيل راحات .. والله شي
الجوهره: يوسف نفسه فالاكل عجيب ..
مريم: حالتكم صعبه .. المفروض نقول عكس هالكلام ..
الكل: ههههههه
ايمان: مب زين عليكم هالكلام ..
الكل التفت على ايمان ..
ايمان: شو فيكم .. اقصد مب زين عليكم تطرون الاكل .. جوعتونا .. يلا عاد غدونا يا جماعه ..
الكل: ههههههه
فاطمه: انتي ويهج لوح ..
ايمان: شوفي .. قولي اللي تقولينه ما يهمني .. انا وحده ابي اكل ..
الجوهره: فديت عمرج حاضرين لج .. الحين بنزل اجهز الغدا ..
مريم: بنزل معاج ..
الجوهره بخبث: مب نازله معانا فطومه ..
فاطمه طالعت الجوهره وابتسمت ..
الجوهره: انا اقول لو تبين تنزلين معانا ..
الجوهره وفاطمه: هههههه
البنات تموا يطالعونهم بحيره ..
ايمان: ليش تضحكون ؟
فاطمه: ما فينا شي ..
الجوهره: انتي جوعانه صح؟
ايمان: اي ..
الجوهره: الحين بنروح نجهز الغدا ..
الكل: هههههه ..
نزلت الجوهره و وراها مريم .. راحوا المطبخ يجهزون الغدا .. البنات كملوا ترتيب الشنط مع هنادي .. وايمان كانت تسولف معاهم وذبحتهم من الضحك ..
هنادي: دمج عسل يا ايمان ..
ايمان: احم احم .. هاي الناس اللي تقدر ..
فاطمه: خفي علينا ..
هنادي: هههههه ..
ايمان: سمعي هالسالفه .. صارت لي الكورس اللي طاف ..
هنادي باهتمام: زين ..
ايمان: تعرفين بداية الصيف والشمس كانت تصلخ الواحد .. كنت اغطي ويهي وانا رايحه عند السياره ..
هنادي: انتي تتغطين لما تطلعين ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك