رواية انا حر ما انهان والحر ما يرجع لشخص يهينه -21

رواية انا حر ما انهان والحر ما يرجع لشخص يهينه - غرام

رواية انا حر ما انهان والحر ما يرجع لشخص يهينه -21

كنت متروعه بس مستانسه ضحكت جني ياهل و من زمان ما ضحكت جي

: قلته : ما قلت تم ..

مطر: ما بقول حرررررره

ابتسمت له الظاهر منه فايده يتغير معاي ..نزلني و قال : يلا بدلي و انا بروح اسبح ..

قلته : ان شاء الله ...

دخلنا مركز فخم ..ورحنا صوب المقاهي ..طلبنا لنا ريوق ... يلسنا نتريق كنت مستانسه مدري يمكن احس من اليوم بتبدا حياتي ويا مطر .. رفعت راسي اطالعه جفته يطالعني بنظرات خلتني اتفاجأت ..تلومت فضحك علي بصوت عالي

قلته و انا مستحيه : شووو

مطر: اجوفج مستاانسه ..ويهج غييييييير

قلته: يمكن لانك عاملتني اليوم غير ..

ابتسم من غير ما يقول شي ..تم ياكل .. و كلت معاه ..عقبها خلصنا ..

قال: تعالى نتمشى في المحلات يمكن يعيبج شي ..

تجدمت منه و قلته : مب ناقصني شي

مطر: ما عليه ..ما بتخسرين شي لو شريتي شي ..

يلسنا نحاوط كذا محل ما جفت شي عيبني قبل ما ندش محل

قال مطر بصوت واطي : الظاهر غلطت اجوف ذوقج صعب معقوله ما عيبج شي ..

ابتسمت له : بعدني ما شريت شي ..

مطر: تعالى انروح مركزغيره ولا تعبتي ..

هزيت راسي بمعنى لا ... طلعنا .كنت احس وايد جريبه من مطر .. و شكله كان راييق .. ركبت السياره ..و مشينا مركز غيره ...دشينا دخلني محل مجوهرات ..

مطر: تعالي اباج تشترين شي البسه لج .

ابتسمت و انا متلومه منه دشينا المحل عقب ربع ساعه اخترت طقم يخبل الا يهبل ..

سالت مطر: شو رايك ابها

مطر :حلو حتى لو مب عايبني بقولج حلو خلااص مليت من ها المحل

رفعت حياتي : يعني ما عيبنك

دزني مطر صوب المحاسبه : و الله عيبني ..تعالي انحاسب ..قبل ما اتغيرين رايج

ضحكت عليه: هههههههههههههه

ظهرنا من ها المحل و دشينا محل مجوهرات غيره ..قلته: بسني ..

هز راسه : لا هالمره ع ذوقي ..

و يلس يجوف عيبني كذا خاتم بس ما قلته ..خليته يختار ع ذوقه ..عيبني الي اختاره لي .. شريناه و ظهرنا ..جفت كراسي ..

قلته: دخيلك خلنا نرتاح شويه ..

مطر: يلسي هني ..

يلست جفته يبتعد عني يلست اراقبه ..جفته يظهر زقاير من جيبه و قعد يدوخ هزيت راسي بمعنى لا حول ولا قوة الا بالله جافني ابتسم و صد عني ...حطيت ايدي ع خدي اراقبه .. ابتسمت له حسيته انسان شخصيه ..

.طوله و عرض جتوفه معطتنه هيبه .. صحيح ملامح ويهه جميله و اظن هالشي مخلنه مغرور شويه وواثق من نفسه زياده عن اللزوم بس انا اجوف بنيه جسمه هي الي تجذبني فيه ..جفته يتجرب مني ..

مد ايده وقفت معاه ..

مطر: تعالي بشتري لج بدلات و لي بعد علشان بنظهر البحر

بطلت حلجي احتج بس يوم قال بنروح البحر غيرت رايي .و سكت ..

شرينا كذا بدله قضينا وقت الصبح كله بالحواطه في المراكز ..و نحن ظاهرين جفنا مكان خاص بالعاب اليهال

زخيت ايد مطر: تعال انجوفهم

عقدت حياته: تبين تلعبين

ضحكت: لا ههههههههههه بس احب اجوف وناسه اليهال ..

تفاجات من حركته يوم لوى ع اجتوفي كنت بحتج بس مدري شو الي خلني اسكت .

.عايبني الوضع ابصراحه تذكرت هذيج الليله يوم دش علي واحد و حضني من ورا تخبلت عليه ..

بس عاتبت روحي ع هالافكار و مشيت معاه ..يلسنا نراقب اليهال يوم يلعبون مرات نضحك يوم يصارخون ..طالعت مطر جفته مندمج و يضحك ..و ياشر ع ياهل

و يقول: ميثه جوفي ها كيف يزاعج من الخوف

ضحكت عليه : هههههههههههههههههه

قلته : مطر عقب بالمستقبل بنييب عيالنا هني يلعبون

سالني بنره لفتتني : اتحبين اليهال

قلته ابسرعه : طبعا ليش انت ما اتحبهم

تساند ع الحاجز و قال : احبهم بس بدر ولد منيره ما احبه مزعج

ضحكت: ههههههههه فديته ولدها عسول و الله ..عيل انت باجر لو طلع ولدنا جي حشري

طالعني : تبين يهال

عضيت ع شفايفي بس توني انتبه شو قاعده اقول كنت بهز راسي بمعنى هي تجمدت ابمكاني يوم قال : ع العموم انا ما افكر باليهال الحينه ..

رفعت راسي اططالعه مستغربه كنت بقوله عيل انت ليش معرس بس سكت لانه يير ني من ايدي و قال : يلا انروح ماشي وقت

حسيت بحزن لان مطر مرات يحسسني انه تزوجني بس لان اهله يبون ولا هو اصلا مش مستعد للزواج ..خذت نفس طويل ..رحنا الفندق ..نرتاح حطينا الاغراض الي شريناها ..

اتغسلت لاني حسيت بتعب ..

طالعت مطر جفته شكل وييهه تعبان سالته: لازم نظهر الحينه

سالني: مليتي ..

قلته ع طول: لا بس انت شكل ويهك تعبان و اعيونك محمره

مطر وقف : ما عليه خلينا نستانس اليوم علشان يمكن باجر نرجع رااك

قلته : ع راحتك ..

مطر : يالله نظهر ..صبري خليني نحط لنا ثياب احتياط الي شريناها اليوم ..

قبل ما نطلع رن موبايله وقفت اطالعه رد ع طول : الو "عقب تم يضحك"

استغربت منه قاعد يضحك ..

اشر لي بيده تجدمت منه لوى ع جتوفي جربني منه كان يحاول يسمعنى الصوت كنت اسمع صوت حرمه محتشره بس كثر ما انا مرتبكه من قربه

استحيت منه كان عيبني قربه صدق اليوم مرت مشاعر حلوه وياه بس ما حبيت افضحها رديت لعالمي يوم سمعته يقولي بصوت هادي : ميثه بلاج امسكي ..

شليت عنه الموبايل و قلت : الو

بطلت اعيوني يوم سمعت صوت حرمه عوده عرفت انها يدته سلمت علي و رديت عليها السلام

يدوه: ها اميييييييييييييه مستانسه ولا مطر منكد عليج

نزل مطر علشان يستوي بطولي و يسمع يدته شو اتقول بلعت ريجي قلتها : الحمدلله مستانسه .

يدوه: هي و حليلج قولي لي جان قالج شي ..وااعليه انتي يتيمه و محد لج بها الدنيا ..

ساسرني مطر: اندوك العيوز ما اتعرف ترمس

صرخت يدوه : اسمعك انا معليه باجر بجوفك

ضحكنا انا و مطر : هههههههههههههههههههه

يدوه: مسود الويه مره ما صدقت عرست لا تتصل ولا شياته يلي ما تستحي ..

شل عني الموبايل و هو يضحك وقالها: فديتج فديتج و الله لج وحشه عيوزي ..

عقب ضحك ..و قال : زين سلمي عليهم باي باي ..

بطلت حلجي كنت بقوله يدتك وايد حبوبه بس سبقني و لوى ع جتوفي

و قال : يلا يلا تاخرنا ..

ظهرنا من الفندق ..سالته: وين بنروح ؟؟

طالعني : مسرع نسيتي ..خلااص ما بقولج يوم بنوصل المكان..

ابتسمت و زخيت ايده بشكل عفوي: خلنا انتم هني اكثر...

انتبهت يوم رص ع ايدي : ودي بس لازم باجر انرد ....

قلته بحسافه : يعني ما نقدر انطول لو يوم ؟؟

هز راسه بمعنى لا بس عقب قال : فديتج ما يهمج و الله كل يوم بحسسج بهاي الوناسه مب بس اليوم ..

ابتسمت لها مستانسه .فاجاني يوم تجرب مني و لمس خدودي ..بطرف صبعه

و قال : ارتاح يوم اجوفج مستانسه احس براحه

قلته : حتى انا ارتاح يوم اجوفك راضي عني ..

فاجاني يوم قال : انا من توفى ابوي و الكل حسسني بالمسؤليه .. و امايه أي شي يصير دايما اتذكرني باني العود و ابوي وصاني

عليهم .."خذ نفس و ابتسم" ما تجوفين يدوووه اتحبني وايد لاني بجر ولدها ...

قلته: امبين انها اتحبك وايد ..

هز راسه بمعنى هي ..وقفنا صوب البحر ..تذكر يوم قال بسير البحر ..

قلته: مطر بالاول جان تغدينا ..

بند السياره قال : ما عليج ..اتريي شويه ..

نزل من السياره راقبته شكله رهيب بالبدله .. عضلات جسمه روعه و ملفته وايد ..كنت اراقب كل خطوه من خطواته ريال بمعنى الكلمه يمشي بثجل

.حسيته واحد عارف الدنيا زين ما زين ..و انا قاعده اجوفه حمدت ربي اني ارتبطت بانسان بغض النظر علاقتنا الحاليه الا انه ممكن يحسسني بالامان ...

بس اليوم جافني اصيح شو كيف سوا فيني ..و طالعت الخاتم الي بصبعي .بس كل ها بعد بكندورته الاماراتيه شكله اروع و خباااااااال ...

عقدت حياتي يوم جفته يظهر زقاير و يدوخها ... اختفى من انظاري تميت اطالع البحر ...مستانسه ..الي يجوف البحر احس اترد الروح فيه..وابتسمت يالله احس انااا و مطر بدينا نندمج ويا بعض .. ..

نقزت يوم اتبطل باب السياره فجاه : بند السياره "امرني" نزلي ..

نزلت ورحت صوبه ..زخ ايدي ابتمست له : بنركب البحر ..

اشر جوفي هناك : بنركب هاي حتى باجر ..

شهقت : الله باخره ..

ضحك علي : هههههههههه عيبتج

قلته : هيي بس شكلها يروع مطر بنركب هاي الباخره

هز راسه هي : هي حبيبي

طالعته مسانسه يو قال لي حبيبي بس ملامح ويهه كانت عاديه جدا يمكن قالها بشكل عفوي ..

ركبنا الباخره ابصراحه بحياتي ما تصورت ولا توقعت اني اركب باخره ... جنان .كنت مستانسه اطالع كل شي بحولي جنه حلم و ممكن يتلاشى باي وقت حتى ما انتبهت لـ مطر كان يراقبني ..و يضحك علي ..

سالته: قد ييت هني ؟؟

هز راسه: من زمان ويا الشباب .. "ابتسم" تولهت ع الربع ..

قلته : حتى انا تولهت ع باباتيه و خالوه و سلمى هذيلا بس اهلي .. ابوي راح و خلني ابروحي ..

زخ ايدي : انتي مب ابروحج انا معاج ..

طالعته و انا احس براحه : طول العمر

كانت ملامح ويهه جامده بس هز راسه بمعنى هي .. نزلنا تحت تفاجات يوم جفت غرفه كبيره وايد كنت بشهق بس يودت عمري علشان ما يتطنز علي بعد ...

تميت اطالع الغرفه خباااااااااال مب جنا في سفينه ..راقبته راح صوب الكبت و فر الشنطه بشكل عشوائي ..وراح صوب الشبريه و انسدح ..

تجدمت منه جفته مغمض اعيونه تذكرت انه للحينه ما رقد و اخاف اذا رقد بنش فليل ...

سالته بهدوء : بترقد ؟؟

قال بصوت تعبان : لا .."فجاه مد ايده "تعالي ليش واقفه بعيد

بلعت ريجي و تميت واقفه ابمكاني ..

بطلع اعيونه و طالعني من غير ما ينش من مكانه و قال : بعدج خايفه مني ؟؟ انتي انسانه غريبه . يعني لو ما كنتي تعرفين قبل كنتي سويتي هالحركات ..

قلته : انا ما اعرفك قبل ..

يلس و قال و جنه طفر مني : اقصد لو ما كنت اظهر لج و ارمسج .. شو نسيتي ؟؟

حسيت ان ممكن كلامنا يخليني بمواقف حساسه .. علشان جي عطيته ظهري

و قلته : انا يوعانه و تعبانه

حسيت به نش من مكانه و يه صوبي تم قلبي يرقع زخني من ذراعي بس برقه عكس صوت خطواته و واجهته رفعت اعيوني اطالعه قال : ما رديتي ع سؤالي

سكت شو اقوله انا اصلا ما اعرف ليش للحينه اتهرب منه مع ان اتفجنا اليوم نقضيه بوناسه و ما انكد ع بعض بس مشاعر الخوف من قربه بعدها مسيطره علي

طالعني و قال : شوه

قلته بتردد: أي سؤال ؟؟

خذت نفس طويل امبين عليه انه ما بتحملني اكثر بس حسيته يود اعصابه ويرني صوبه وصرت جريبه منه واايد ارتبكت اكثر و اكثثر طالعني بنظرات كلها جديه روعتي و هزت جسمي كله ..

و قال مره ثانيه : لو ما كنتي جايفتني قبل و ما كنت اتعرض لج و انتي كنت تضايجين من قربي كنتي سويتي هالحركات ؟

قلته بارتباك و ما قدرت اطالعه صديت الصوب الثاني و قلت : ممممدري

رص ع ذراعي و جربني له حتى لصقت فيه شهقت خايفه منه .. شكله حرج مني و اتاكدت فعلا يوم هددني : لا تلعبين معاي لعبة الاعصااب ترا و الله اخليج تندمين

كنت ابا ابعد بس انا و الله ما اعرف شو يقصد بلعبه الاعصاب ..طالعته مستغربه من كلامه و خايفه من نظراته ..

حرج علي : لا اتطالعيني بها النظرات اتسوين روحج بريئه مب خابره بالدنيا .

لو كان بعيد عني كنت قلته صج انا مب فاهمه انت شو تبا مني وشو تقصد من رمستك .. بس تميت صاخه يعصب و يعق عليه رمسه و انا ما اعرف شو السبب اصلا ..

تجرب مني حسيت بنصخه جريب مني تميت جامده ابمكاني ما تحركت كنت خايفه منه لحظات احس بالامان معاه و اتمنى قربه بس يوم يكون جريب مني هالكثر اخاف منه وايد واايد ..للحين مب راضي يفهمني ..بلعت ريجي بخوف ...

بطلت اعيوني يوم سمعته يهمس باسف: انتي ما منج فايده

و ابتعد عني ...بس انا ما تحركت و يوم صار بعيد عني خطواات عرفت رايح يدور زقايره علشان يريح اعصابه ..

.يذكرني بابوي دايما كان يدوخ و علشان جي تعب و مرض ..و ما كان يسمع الرمسه و الحينه مطر نفس الشي ء...المهم يوم جفته بعيد عني بخطوات ذكرته بكلامه الي قاله لي فقلته : قلت لي خلينا نستانس ولو يوم واحد

صخيت يوم التفت لي ابسرعه يطالعني بنظرات حسيت انه كارهني ...فبغيت اهدي الجو و قلته بكل صراحه : زين شو يرضيك ؟؟

صرخ علي : مييييييييييييييثه

نقزت ابمكاني وسكت اطالعه الحينه ليش محرج ؟؟شو قلت ابا ارضيه تراني ؟؟!!

كمل كلامه : تستهبلين انتي؟؟؟؟؟؟؟ تسالين شو بخاطري .

بلعت ريجي و قال : افرج بالبحر و افتك من البلوه الي بليت روحي فيها .الله يغربلك يا طارق يوم خليتني افكر بهاي الخطوه اتزوج

و ظهر من الحجره .

.مرات هالانسان يقول كلام غريب و مب عارفه شو يقصد ..زين انا ما ابا يكون شي بينا حتى ارتاح له و اعرفه زين و يعرفني ...و صدقه لو ما كنت جايفتنه قبل يمكن كانت بتكون علاقتنا غيييييييير يعني مثل أي زوجين ..في الدنيا ..

حطيت ايدي ع بطني ميته يوع هالانسان كل يجتلني من الييوع ..رحت و يلست ع الشبريه و حطيت ايدي مكان ما كان راقد ..هي ااباه بس اخاف منه وايد اخاف ...

ما اعرف كم مر من الوقت و انا تايهه بافكاري .. حتى يوم روعني صوت الباب الي انفتح ..نسيت للحظه انا فوق البحر... و نحن بالباخره ..وقفت وواجهت ..حسيت هدت اعصابه

يوم سالني : يلا تعالي نتغدا

رحت صوبه قالي : شو تتحرين ابروحج عالسفينه روحي تغطي

هي فعلا نسيت و اصلا انا ناسيه وين نحن .. كان يراقبني و عقب ما

خلصت زخني من ايدي و ظهرنا برع الحجره شي ناس بس مش وايد ... رحنا فوق خذت نفس طويل يوم حسيت الهوى يضرب بويهي ابتسمت مستانسه ...

يلسنا ع طاوله يلست اطالع البحر حسيت نحن بعالم معزول عن الدنيا

قلته مستانسه : ما توقعت يكون الجو جي روعه حسبت روحي بخاف من البحر ..

تم يلتف : كل من حولنا بحر ..

هزيت راسي: هي حـلو .."قلته بصراحه" يعيبني فيك يوم تتغير نفسيتك ابسرعه

فاجاني يوم قال: زين طلع فيج احساس و قمتي تلاحظين شي ..

نش من مكانه و تمييت اتأمل بحزن الظاهر انا و هالانسان بحياتنا ما راح نتفاهم لاني صدق ما اعرف شو يرضيه ... يلسنا ناكل ...كنت اكل بشراهه حتى هو الظاهر كان يوعان تم ياكل و هو ساكت ..ابد ما رمسني ..

قلته: وايد اتحب ادوخ

تم ياكل من غير ما يطالعني بس قال : و بعدين

هزيت جتوفي : كنت دايما احلم اني ارتبط بانسان ما يدوخ ..حتى ما اخسره

رفع راسه يطالعني عقب ما قال مستغرب : افهم من كلامج اتخافين تخسرين ؟؟!! "هز راسه" و الله اانا موليه مب قادر افهمج

قلته بسرعه : حتى انا ما اقدر افهمك ..احتاي وقت ..علشان افهمك و عقب ..

كمل عني : عقب بنكون باجي شرات المعرسين هاه

صخيت و عاتبت نفسي لاني دايما اقول كلام يوصلني بالاخير لموقف محرج ..

غيرت الموضوع : زين ما تفكر تودرها

رد يكمل اكله و قال : اودر شو ؟؟

قلته : الزقاير

قال : مممممدري احاول

قلته: حاول ..ما ابا اجوفك تتعب شرات ما تعب ابوي ..

رفع راسه يطالعني مستغرب : ابوج !

هزيت راسي باسف : شراتك كان وايد يدوخ واااااااااااايد اخرتها تعب قلبه

سالني باستغراب: ابوج يدوخ ؟؟؟!!

هزيت راسي : شفيك مستغرب

طالعني بنظرات شك وقال : عيل اول امس ما طحتي عسبة ريحة الزقاير حضرتج متعوده تتنصخين دخانها

عضيت ع شفايفي ابسرعه تجرب مني و قال : اتقصين علي هاه اصلا ما كان مغمي عليج جذاابه

قلته ابسرعه اداافع ع روحي : و الله ما حسيت بالدنيا ولا انا بالفندق

شكله ما صدقني لانه طالعني بنظرات شك و كمل قاله عقب ما قال : ما عليه ميثه و الله محد بأدبج غيري ..

شو قصده انا قليله ادب ما عليه الله يسامحه كملنا اكلنا و نحن ساكتين عقب ما خلصنا ..قام مطنشني و راح الحجره ... احترت الحقه ولالا اتم ابمكاني ..

بس حسيت بالامان ..نشيت من مكان و رحت اطالع برع حسيت بالبروده بس الجو كان رهيب كل شي من حولنا بحر .. صدق مطر دخلني عالم بعمري ما حلمت فيه ..

غمضت اعيوني .. و احس بالهوى يضرب بويهي .. شعور جميل بس بيكون احلى لو كانت علاقتي بـ مطر احلى ..

تنهدت الله يستر من الايام اليايه . .التفت صوب اصوات من الجهه الثانيه جفت عايله اماراتيه بعد .. راقبتهم كان عندهم توأم فديتهم تخبلت عليهم اول مره اجوف توم ولد و بنت و الام ما شاء الله حامل بعد ... يلست اراقبهم ..

جفت ابوهم يشيل الولد تمنيت اشيل البنوته الاعبها ..

سمعت الام اتقول: وين سارت مهره ؟؟

شويه و يت بنوته و جنها بنتهم بعد بس هاي اكبر عطيت عمرها 5 او 6 سنوات ..

الام: مهره تعالي وين سرتي ..

مهره: يبتلي ايس كريم ..

الاب: قلتلج لا اتروحين مكان ابروحج .. "و التفت صوب الام " شوق حياتي ولدج خبل فيني

ردت عليه الام : ذياب يعني انت ما تجوف هاي بفرهم بالبحر و بفتك منهم اووف حلاتها مهره فديتها كانت مريحتني .

مهره: حتى حمودي صح ماما .

تجرب منها الريال و لصق فيها حتى انا استحيت و قالها : تذكرين يوم قلتلج هذاك اليوم لاحقه ع الشقى ..شو تبينهم العيال و انتي "وقلد صوتها" لا ذياب ابا نونو

ضربته بجتوفه تضحك: بس عاد ذياااااااااااااب ..

و ضحكوا ..صديت عنهم و حطيت ايدي ع خدي تنفست بعمق يا ربي في يوم بكون انا و مطر جي .. !!

صديت الصوب الثاني ع صوت اغاني جفت شاب واقف بالزاويه يتأمل البحر .

.ها شكله متعذب بعد يمكن مفتقد شي غالي بحياته ..نقزت يوم التفت صوبي .. ابتسم لي فصد يت عنه متلومه ..اكيد انتبه اني كنت اطالعه .. بلعت ريجي يووم جفته ياي صوبي رديت لورا خايفه كنت بروح حجرتي عند مطر ..

.نقزت يوم سمعت صوته وراي ..و كانه كان يقرا افكاري ..

كان جريب مني يوم قال : تعالي داخل ..

قلته مرتبكه : حلو الجو برع .."ورديت طالعت الشباب الي كان ياي صوبي "

جفت مطر يطالعه بنظرات .. فاضظر الشاب يغير طريجه و شكله تلوم ..

ما عطاني فرصه زخ ايدي و خذني الحجره طاوعته ..و ما قلته شي .. دشينا الحجره

يلس ع الكنبه و طالعني بنظرات حاده قلته مبتسمه : مشكور ..

طلع الزقاير من جيبه ترجيته: دخيلك لا ادووخ ..

طنشني وولعها و قال : منو هاا

طالعته و انا اراقب الزقاره الي كانت في ايده و قلته : منو ..

عفد عليه فشهقت وزخني من ذراعي : لا تستهبلين علي ..

بطلت حلجي كنت برد عليه ادافع ع روحي بس تروعت يوم حط اصابعه ع اعيوني و جنهم يبا يفقعها و قال : لا تطالعيني بها النظرات شو مسويه عمرج بقمه البراءه ..

تميت اطالعه مستغربه من حركته حسيت انه انسان مش صاحي ..دزني بعيد بغيض و ظهر برع ..الحجره ..

أعاني الساعة و أعاني مسافـات و أعاني رياح الزمان العتية

و أصور معاناتي حـروف وأبيـات يلقى بها راعي الولع جاذبية

الفصل التاسع عشـر ..

يلست ع الشبريه مستغربه شو سالفته و ليش محرج و اصلا ليش يطالعني بهاي النظرات ...انسدحت ع الشبريه يلست اطالع السقف و اتامل ..جفته وايد تأخر ..فكرت اطلع برع بس اكيد بحشرني .

بس وايد طول شو يسوي بعده زعلان مني هو قال ما نبى نضيع وقت و نعيش ع الاقل يومين حلوين و متفاهمين مع بعض بس الظاهر هو غير كلامه و اتفاقنا ..

خلااص انا بطلع له برع و اذكره بكلامه..لبست شيلتي و ظهرت من الحجره ..صعدت فوق ..

يلست ادوره حسيت راسي يدور بسبب البحر .يودت روحي ..لمحت الشمس تغرب لفتني غروبها .. روعه خبال .

تجدمت اكثر اتامل ها المنظر تمنيت اتكون عندي كاميرا اصور هالمنظر .. صديت ابسرعه الصوب الثاني يوم سمعت ضحكت مطر بصوت عالي ..

وقفت ابمكاني اطالعه و مستغربه بنفس اللحظه منو هاي الي معاه!!!!!!! معقوله وحده من اهله ..شكله يعرفها من زمان ولا كيف جي يضحك وياها ولاصق فيها ...حطيت ايدي ع خصري اراقبه هاي الظاهر ما عندها اهل ولا كيف هادينها جي ..

مدري شسوي لها مطر فدزته ع شكل غشمر فضحك مره ثانيه بصوت عالي عيل انا ما يضحك معاي جي ..حسيت قلبي يعورني ..كيف يسوي جي يهدني و يقعد مع غيري ...الله يسامحك ..

رحت الصوب الثاني اراقب الشمس يوم تغرب و تختفى اخر خيوطها ضحكات مطر ترن باذوني ..انا مدري ليش يعاملني جي

.. بس موقفه الحينه ذكرني يوم كان يتعرض علي قبل ما يخطبني شهقت لا يكون طبعه جي يغازل البنات .. يا حظي ..ويا قردي جان جي طبعه الله يعيني و يصبرني ..

سمعت صوت رجولي يقول : السلام عليكم

ما صديت صوب الصوت بس يوم تكرر مره ثانيه السلام حسيت انه يسلم علي فعدلت بوقفتي و طالعته ..بطلت اعيني متروعه يوم جفت نفس الشاب الي كان برمسني من ساعه ..التفت يمين و شمال عرفت انه يقصدني ..

ابتسم : شحالج اختيه ..

بلعت ريجي متروعه .. و ابتعدت عنه

بس قال : لحظه

طنشته و تفاجات بـ مطر واقف عند باب الحجره .. طالعني خطفته و دشيت ابا احسن بالامان ..لحقني و صكر الباب يلست ع الشبريه ابا احس بالامان ..

سالني بحده : وين كنتي ..

طالعته بغيض يرمسني بهاي النبره عيل يضحك مع هذيج البنيه ..تجرب مني و يلس جريب مني كرهت قربه مدري ليش حسيت بالشعو رالي نفسه كنت احس فيه يوم يتعرض علي قبل زواجي ..

وقفت ابا ابتعد عنه بس زخ ايدي و يلسني بدفاشه فطالعته بنظرات عتب و لوم

سالني : شو فيج ..وين طلعتي ؟؟

قلته : ما يخصك ..

مطر: شو وووووووووو

قلته انغزه : عيل اتعرف ترمس بهدوء و رزانه مع غيري و معاي ..ما اتعرف الا انك تجرحني و تعاملني بجفاف

تغيرت ملامح ويهه بس تم يطالعني ..عقب قال : شو قصدج

قلته : انا اروم ارمس أي حد يتعرض علي مثل ما كنت تتعرض علي قبل بس اخلااقي

شهقت يوم عفد علي و زخني من لحيتي : رمسته صح كنتي معاه من ساعه

طالعته بخوف تميت صاخه

هز ويهي : كنتي معاه صححححح قولي قولي

قلته بخوف: انته اتقول خلينا نستانس ها اليوم و رحت ادورك ابا اذكرك بها الكلاام ..

خفت لمساته و تم يطالعني توقعت انه يعتذر لي و انه غلط بحقي بس قال : زين شو تبين مني

طالعته مب فاهمه قصده فكمل : انتي ما تبين تعيش معاي مثل باجي الازواج .

قلته : مب قبل نعرف بعض زين ما زين

طالعني بنظرات و قال : شو تخافين تتوهقين و اتيبين عيال

صديت عني ما كان ها قصدي ... تجرب مني

و قال : زين انا موافق ..

يتبع ,,,

👇👇👇