رواية انا حر ما انهان والحر ما يرجع لشخص يهينه -3
شفايها رفعت ايدي اطالعها ..ابتسمت ..حسيت ابروحي خبل ..يوم نزلت من سيارتي .. ورحت صوب باب بيتهم ...
دقيت الباب حسيت لو دقيت مره ثانيه بنكسر الباب من كثر ما هو جديم ...محد فتح ولا حس جنه البيت فاضي عقت حياتي حتى شكيت يمكن ها الي دشيته البارحه فليل ..؟؟
محد فتح لي تنهدت و رديت سيارتي ....زين لو دقيت الباب شو اقول ..؟؟ وين ابا ..
ههههههههههههههههههه حسيت ابروحي خبل ...رحت صوب المستشفى ...نزلت من سيارتي لمحت موبايلي رن رقم غريب ظنيت ان حد من الدوام متصل بي علشان جي ما رديت ...نزلت و قفلت باب السياره ..رحت الدور الثاني ...وقفت بس انا ما اعرف اسمه شقايل اعرف غرفته ...حسيت بروحي غبي يوم ما نزلت موبايلي معاي كنت بتصل ع الاقل الدوام و بسال عن اسمه ....
رحت صوب الرسبشن ...
جفته ممرضه : لو سحتي
رفعت راسها و طالعتني ابتسمت : هلا اخوي
رديت الابتسامه : هلا و الله ..
سالتني : آمر
قلتها : البارحه ياكم مريض ع الفير بسبب حادث ضرب
يلست اطالع اسامي المموجودين سالتني تتاكد : البارحه الفير
قلتها : ايوه ..
قالت : ايوه اظن تقصد وليد محمد ال..................
ابتسمت : يمكن
عقدت حياتها : ع العموم هوه بغرفه رقم : 2001
ابتسمت لها باتسامه عذبه حسيت انها تلومت فقلتها و انا اضحك : ههههه مشكوره سلاام ...
رحت ادور رقم الغرفه ...
سمعت اصوات و جنها مناقشه حاده .. وقفت اسمع صوت انثوي اتعاتب و اتعاتب و جنه الصبي مطنش ...و يجادلها ترددت اادخل الغرفه او لا ..بس عقب يوم حسيت صار هدوءء تجدمت و دقيت الباب ...
و خطيت داخل الغرفه : السلام عليكم ..
رفعت راسي بطلت اعيوني يوم طاحت اعيوني ع البنت الي كانت جريب من الشاب الي كان متمدد ع السرير...هي نفسها هاي الي ساكنه بخرابه !!!!!!!! شتسوي هني ..شو علاقته فيها .؟؟اتقول ساكنه مع يدها ؟؟؟ عيل منو ها !!
ردوا عل: عليكم السلام
انتبهت انا وين بشو كنت افكر الظاهر انها ما عرفتني ع طول صدت الصوب الثاني و تغشت ...
تجدمت منه و سلمت عليه : الحملله ع السلامه
رد علي : الله يسلمك .."و نظظراته مستغربه مب عارفني "
ابتسمت و طالعت صوب ها البنوته الي كانت معطتني ظهرها و انا اقوله : انا الي يبتك البارحه هني ويا الشباب
مد ايده ع طول و زخني : مشكور و الله مشكور انقذت حياتي ..
كنت اراقب ردت فعل البنت بس الظاهر ما عرفتني لانها ما تحركت تمت جامده ابمكانها ...
ابتسمت له : ها واجبنا طويل العمر ..
طالعت الجبس الي بريوله : شو الاخبار الحينه
قال بتعب : و الله الحمدلله بس شويه كسر بريولي ...كله جم اسبوع و اكون باحس حال
مدري ليش حسيت ان ام اعيون تضايجت يوم سمعت رد هالشباب لان شلت بعمرها و طلعت برع الغرفه و كان امبين عليها محرجه من كلامه ..
ييرت الكرسي و قعدت جريب منه سالته: شو سالفتهم
استهبل علي : منو ؟؟
قلته : هذيلا البارحه الي كانوا بجتلونك
حسيت انه متردد سرح شويه عقب قال : مدري كنت ماشي ابروحي فليل و جفت ثنين هجموا عليه ..
عرفت انه ما يبا يخبرني سالفته بس ما يدري اني اروم امسك قضيته طنشته و قلته : المهم ما تجوف شر
ووقفت : يلا انا بروح بغيت اتطمن عليك
مد ايده و قال لي : مشكور ...
سلمت عليه و قلت : العفو ...
و طلعت قبل ما افتح الباب و اظهر التفت له و قلته : ع فكره ترا انا الرائد مطر اروم اعرف قضيتك و بالتفصيل جان ابا هاه .."رفعت ايدي و قلته " سلاام
ظهرت من الغرفه و انا اضحك ع ملامح ويهه المستتغربه ...وقفت ابمكاني يوم جفت ام اعيون يالسه ع الكرسي جريب الغرفه ...ترددت اروح ارمسها او لا ... من شويه كنت عند بيتهم الخرابه ادقه قاعده ادورها و الحينه الاقيها هني ..؟؟؟
جفتها وقفت يوم جافتني ظاهر جنها ما صدقت تبا ترجع الغرفه و ترد تحتشر ع الصبي الفقير ..بس انا تميت واقف ابمكاني اتريا تتجدم اكثر صوبي ..
-----
انتي بكف وباقي الخلــق في كف ... متعليه في وســـط قلبي ولك شان ..في غير وصلك مالقلبي ترى شف ... محتاج لك يا نور عيني وشفقان ..لا جابوا اسمك صرت انا تقل مختف ... مالي على نفسي الى اطروك سلطان ..
،,."؛،(الفصــــــــــل الثــــــــــــالـــــــــــــــث ) ":..,،
وقفت ابمكانها يوم جافتني واقف ما تحركت ابمكاني حسيت انها ارتبكت ...فتجدمت منها ..اكثر فردت لورا و عطتني ظهرها ...يلست اراقب طولها هني شكلها اطول من يوم كانت فـ البيت اونه معطتني ظهرها مب جنها البارحه لازقه فيني ..خخخخخخخخخ
قلتها بصوت واطي : شحالج ..؟؟
ماشي رد ..........................!!
سكت اتريا ردها يوم جفتها طولت قلتها : ارمسج انا ؟؟؟
التفت صوبي ابسرعه و كانت متغشيه ...قالت : انا اعرفك اخوي ؟؟
قلتها ابسرعه : هي اعرفج و تعرفيني ..بس شو يقربلج الي داخل الحجره
مدري اذا كانت تمثل انها ما عرفتني معقوله !!
تفاجأت يوم خطفتني بسرعه و قالت : ما يخصك ..
وقفت اراقبها الين ما ردت الغرفه ..الي موجود فيها وليد ..و الله انا شو يخصني زين ما كلتني بس سالتها هالسؤال عيل لو درت اني ساير بيتها ها الخربه من شويه شو كانت سوت ...
طلعت من المستشفى ..ركبت السياره ..مدري شو الي خلني اتم ابسيارتي ..اترياها الين ما تظهر من عند وليد شليت موبايلي لمحت 3 مكالمات طنشت وو..اتصلت بالدوام ...رد عليه واحد قلته ايسرعه : منو مناوب اليوم ؟؟
رد علي : خليفه سيدي
قلته : حولني اياه ..سريع
شويه اسمع حس خليفه : هااا اشعليييييييك اجازه
ضحكت : هههههههههه الله يا الحسد ..
خليفه : يلا شو نسوي بعد
قلته : شو اتسوي اكرف ولا بعدك ما شبعت اجازات
خليفه : لا تعليق
ضحكني رده : هههههههههههههههه تعال ابا اعرف شو سالفه قضيه البارحه الفير ..
خليفه : فديت خشمك كل توصلنا عشرات القضايا اي وحده بغيت
قلته : الي انا كنت فيها
خليفه : هي سمعت يبهتك مطروره
حطيت ايدي ع يبهتي وحرجت عليه : خلوف لا تستخف دمك قسم بالله مش فاضي
خليفه : هههههههههههههههههههههههه
قلته بغيض : يا ثجل دمك
خليفه : ههههههههههه شكرا ..المهم باكستانيين اعتدوا ع وليد الـ...... بالضرب
قاطعته بسرعه يوم لمحت ام عيون ظاهره من باب الطواري ..و رايحه صوب سياره مكسيما عنابيه ..
قلته ابسرعه : بسبب شووووووووووووووو؟؟
خليفه : لانه سارق عنهم بيزات
عقدت حياته : و الله !!
خليفه : للحينه ما حققنا مع المضروب بس ها كلام الباكستانيين ..
حركت لا ارادي الحق السياره المكسيما ..قلته : اوكى فارج عقب برمسك
خليفه: و الله انك ما تستحي
قلته ابسرعه : ادري يلا باي
صكرت الموبايل بويهه ..زين انا حق شو مشتط و الحقها شو ابا بها يمكن لانها تغمضني بحالتها و حاله بيتهم الخرابه ..!! زين انا ع بالي ما عندها اهل غير هالشيبه بس طلع ها وليد و غير الي بالسياره منو هاه بعد ؟؟؟
نقزت يوم رن موبايلي لمحت نفس الرقم الي جفته من ساعه قبل ما انزل المستشفى ..كنت بضغط ع السايلنت بس رديت بالغلط ..عضيت ع شفايفي كنت بصكر بس يوم سمعت حس انثوي رديت ع طول
قلته : الو ..."و عيني ع سياره العنابيه "
مدري اي احساس صابني و انا اسمع حس عايشه : مرحبـاا مطر ..
نسيت الدنيا و نسيت نفسي و نسيت السياره العنابيه و نسيت انا اصلا وين رايح ...
سكت ما عرفت شو ارد ........................................!!
قالت بدلع : شو ما تبا ترمسني ..؟
سالتها ع طول : ريلج وينه ؟؟
قالت و هي تتنهد : في البيت
قلتها : و انتي وين ؟
قالت لي : في بيت اهلي ..
قلتها : اامايه قالت انكم ظاهرين رباعه
ردت علي : انا متصله اسولف عنك و عني مش عن اخوك و عني
سكت يوم قالت اخوك و جنها تبا اتذكرني انها حرمة اخوي ...بلعت ريجي ..كنت اسوق سيارتي و ما اعرف باي شارع انا اصلا ...
ردني صوتها لارض الواقع : وين سرحت ..؟؟
كنت ابا اصكر بس ما اقدر ما اقدر احبها و اتخبل يوم اسمع حسها كيف تبوني اصكر عنها و هي جي مخبله فيني
قلتها : تعرفين اشكثر اتأثرين فيني ..
ردت و جنها طايره من الوناسه : و الله اشكثر
قلتها وانا اركز عالشارع : لا تسالين لانج ادرى حتى اكثر عني ..قلتلج ما ابا اسوي مشاكل بينج وبين اخوي ..
ردت بجديه : بس نحن نحب بعض
قلتها بسرعه : و انتي حرمة اخوي
حسيت ان كلامي استفزها يوم ردت علي : كيف صرت حرمة اخوك خبرني كيف
خذت نفس طويل و صخيت
همست : مطر
قلتها بعذاب : عايشه ارحميني دخيلج
حسيت بها بتصييح : مب ايدي ..؟؟؟؟؟؟ و الله مب اييدي ما اقدر اتعرف شو يعني ما اقدر
صخيت ما عرفت شو ارد عليها ...و بدورها سكتت سمعت شهقاتهااا ..
قلتها بصوت حنون : عواش
سمعتها اتصيح ابصوت عالي يوم رمستها بهاي النبره ..
حاولت اهديها : فديتج لا اتصيحين ...و الله قطعتي قلبي ..
عايشه : انت تحب تعذبني
قلتها بسرعه و جني ادافع عن نفسي : انا !!!!!!!!!!!!!!
عايشه : من ييت البارحه من السفر و انت مطنشني ...
قلتها بصوت هادي : كيف تبيني ارمسج و طارق وياج بكل وقت .
قالت بغيض : انا اخوك خلااص ما اقدر اتحمله اكثر ..مااااااااا اطيقه .كل شي يخبر امك بكل صغيره و كبيره ..
مدري سكت حسيت ابرود و جن كلامها عايبني و مب جنها ترمس عن اخوي .. من لحمي و دمي ...
سالتها : تحبيني ..
قالت بعذاب : بعدك تسأل ..؟؟ هالسؤال !
حسيت اني مجنون هاي الانسانه قلتها بكل شوق : عايشه ..
بس فاجأتني : يلا امايه تزقرني جنه اخوك برع ...بتصل بك عقب ..
قلتها ابسرعه : يلا باي ..
صكرت عنها ... تنهدت .. معقوله الي يصير يا عالم ..أعشق حرمة اخوي ...بس هي كانت لي ... المفروض انا ريلها ..بس ......................! صدق من قال كلن بياخذك بحياته نصيبه ...
وقفت عند الاشاره استغربت انا وين ..جفت ابروحي واصل بداية راس الخيمه ..هزيت راسي عايشه بتوصلني للجنون ..
قررت ارجع البيت ..و عقب فليل بسهر عند الشباب تذكرت ..اني باجر معزوم في بيت منيره اختي.. تذكرت ام عيون ..يلا هاي هاي ابروحها سالفه ...ابتسمت و انا اتذكر الموقف الي صاار لنا في المستشفى .. ..مريت المطعم ..و شليت ..لهم عشى ..ورحت البيت ...سمعت حشره واصله لين باب الحوي ..سرعت بخطواتي ..مدري شو مستوي ...
من دشيت : السلام عليكم ...
الكل : عليكم السلام ..
جفت امايه واقفه بوسط الصاله و محطيه ايدها ع خصرها و ابوي شكلها قاعده تهزب حد ..صديت الصوب الثاني جفت سعود يطالع التلفزيون محد غيره هالمراهق .. و عزوه مجابله اللابتوب ...
دخلت و حطيت جيس العشى ع اقرب طاوله
قلت : خير شو بلاكم صوتكم واصل لين برع
امايه : جوف اخوك سوي له صرفه انا خلااص ما اقدر اتحمله ...
يدوه : عقب ما دلعتيه الحينه قمتي ما تتحملين حركاته ..
حرجت امايه ع يدوه: عموه لو سمحتي انتي لا تدخلين
يدوه : كيف ما تدخل هذيلا عيالي ..
حاولت اهدي امايه تجدمت منها و قلتها : امايه يلسي شبلاج فديتج ..
يدوه : هي هي راضي امك واناااااااااااااااا الفقيره محد يسال فيني ..
هزيت راسي : لا اله الا الله ..
التفت لـ سعود والي يقهر ولا جنه مسوي شي .صرخت عليه : سعود
نقز متروع يطالعني
امايه : اسأله شو مسوي ..مفضحني ..اوول البارحه الدكان يشكي له سارق و اليوم ..
يدوه : انتي مطرشتنه ولا منوه علمه يسرق ..
وقفت امايه محرجه : اوووووووووووووووه خلااص انا هالعيشه ما اتحملها ..يعني انا اعلم ولدي السرقه انتي شو كبرتي و خرفتي
وراحت صوب حجرتها ...
عزوه : يدووه امايه كافي الي فيها ليش تزيدينها
يدوه: اصصصصصصصصصص انتي ..بعد انتي قمتي ترمسني ..
عزوه : عيل بس تبين ابروحج ترمسين
طالعت عزوه بنظره فصخت ..نشيت من مكاني .. و رحت صوب يدوه و بستها ع راسها
يدوه : جفتهم شو يسون فيني ..ما تدري يوم انت برع البيت شو يصير فيني ..ماااااا تدري خلني ساكته
يلست جريب منها و زخيت ايدها : حياتي ..يرضيج ولد ولدج البجر يتضايج
هزت راسها جنها ياهل : ابد ما يرضي بس قولي من يزعلك و انا اراويه
يتني الضحكه بس يودت روحي و قلتها : خلااص فديتج عيل اهدي و لا تعصبين اسكتي عنهم علشان صحتج زين فديتج
يدوه : ان شاء الله بس انت شاهد ع حركاتهم و خاصه هاي " و تأشر بعصايتها " ام لسان الي ما عندها غير تجابل ها التلفزيون
طالعت عزوه بنظرات عتاب و قلتها : ما يهمج انا بأدبهم ..
يدوه : هي جي اباك ..اطلع ع ابوك رياااااااااااااااال
خذت نفس طويل ..الواحد ما يرتاح اتروح الدوام تتعب تاخذ اجازه مشاكل البيت ما تخلص...
رحت صوب سعود زخيته من رقبته من ورا و سحبته صوب حجره امايه و هو يقول : ما سويت شي ..
دقيت باب حجرة امايه و دخلت و سحبتي سعود معايه ..
وقفت امايه شهقت يوم جافتني زاخ سعود من رقبتي
امايه : اخوك يمه لا اتسوي فيه جي .
ربع سعود ورا امايه وقفت و قلت : شو مسوي هالتعبان ؟؟بعد ..
سعود متروع : هو الي بدأ
طالعت امايه مطننش سعود : شو مسوي ولدج ..؟؟
امايه تبا تهدي الموضوع : مب مسوي شي يلاا يرووح
قلتها : يعني سويتي مشاكل مع يدوه و بالاخير تسترين عليه ؟؟
امايه حرجت من رمستي : الحينه انا سويت المشكله مع يدوتك ..ليش ما سمعتها شو اتقول ولا بس تبا تسمع الي تسمعه ..
عطيتها ظهري و خذت نفسس طويل ..مسكت اعصابي انا شو الي ردني البلاد ..رفعت شعري عن يبهتي احاول امسك اعصابي ...و التفت لها
قلتها بهدوء : امايه فديتج ..
بس صخيت يوم جفت اماايه بطلت اعيونهااا متروعه و يت صوبي ابسرعه وقفت اطالعهااا حطيت ايدها ع يبهتي و لمست الكدمه الموجوده
زخيت ايدها ابسرعه و انا اتألم : أأأأأأأأأأأأأأأأأأي
امايه متروعه : شوووووووووووووووووهااا
حتى سعود وقف يطالع مستغرب ..
نزلت شعري ع يبهتي و قلتها مرتبك : ماشي ماشي ..المهم
امايه : شو ماشي ...منو مسوي فيك جذا ..اجوف
زخيت ايدها و يلست تتحسس ع يبهتي غمضت اعيوني قالت : بسم الله عليك ..
قلتها : البارحه يوم كنت سهران ويا الشباب طحت ع يبهتي
امايه : هي مبينه ضربه داري ع روحك يمه
بغيت اغير السالفه : ان شاء الله ..."طالعت سعود و ريت طالعتها و قلتها " انا اشتغل بمكان حساس و فهمي ولدج لا يقعد يسولي سوالفه هالخربطه علشان اسمي في المكان الي اداوم فيه ..."طالعت سعود " بسنا فضايح ..
امايه تزخ ذراعي : ما عليك يمه هاي سوالف شباب انت ادرى بها ..
قلتها : زينن ما بتعشونا تراني يوعان و يابلكم عشى
ابتسمت لي : من اعيوني ...
سعود : حتى انا ميت يوع
قلته : انت كل تبن ...
انفتح باب الحجره التفت يوم سمعت حس طارق واقف وراي : هاااااااااااااا اجتماع الامم المتحده ..
امايه ضحكت : هههههههههه فديتك يمه وينك ما بينت اليوم
طارق : هاااااااااااااا اتقصين علي بها الكلمتين ..
امايه راحت تلوي عليه :لا صج انا بعد اليوم ما جفتك
باسها ع راسها : ما اصبر عنج فديتك ييت ركيض اجوفج ..
طالعته امايه ما تستغنى عن طارق تحبه اكثر شي من بينا لانها تخاف عليه من عقب مرضه كنا نغار بس تعودنا ..يلا تسدني العيوز مالي يدوتي
قلته : ما جفتك اليوم ؟
طالعني : وين بتجوفني و انت لاهي ويا ربعك اللوث
امايه : بسم الله الرحمن الرحيم
طالعت طارق بنظرات : احم احم
طارق: هههههههههههههههههه سوالف فديتج لا تحاتينن ولدج سبع
مدري ليش تذكرت مكالمتي مع عايشه فدرت ظهري بسرعه اظهر من الحجره ...
امايه : تعال تعشى يمه وين رايح
كنت بقولها : خلااص ما اشتهي بس سمعت ضحكت عايشه من الصاله ..
فقلت بصوت عالي اسمع عايشه : يلاا زين حطوا العشى ..
صخت عايشه من سمعت حسي
عزوه دزها : كملي و عقب شو صار ؟؟؟
صخت عايشه طاحت اعيوني بعيونها ..خذت نفس طويل ,,آآه يا عايشه شو اتسوين فيني من اجوفج ..
عزوه : اونج تستحين من مطور ..
طالعتني عايشه و ابتسمت مستحية ..رحت و يلست مجابلهن : خير شو عندكن .؟
عزوه : عايشه قاعده تحكي لي سالفه "صخت " انت شو يخصك سوالف بنات ..
طالعت عايشه بنظرات ..فوقفت و طالعتني بنظرات : بسير حجرتي ...
امايه داشه الصاله وراها طارق و سعود
امايه : يلسي ما تبين تتعشين ولا عشتج امج ...
حسيت عايشه انحرجت من تعليق اامايه ...طارق يدراك الموقف : لا فديتج عايشه ما تبا تاكل الا من طباخج صح عواشي ..
ردت عايشه و يلست بمكانها : هي انا ما اكل الا من طباخ عموه ..
امايه : هي وين بتحصلين عمه شراتي تطبخ لج و تسوي لج ...كل شي ..
امايه مرات اتكون جاسيه بس قلبها طيب...و زين من عايشه انها ما تاخذ سوالف امايه بحساسيه ..راقبت طارق ياه ويلس جريب من عايشه و زخ ايدها و جنه ما يباها تضايج حسيت بنار شبت في يوفي و الي قهرني اكثر يوم جفتها ترص ايدها ع ايده و اطالعني مدري حسيت انها تغايضني ...
حسيت بضيجه و اني مخنوق ..وقفت ابسرعه و سالت عزوه : وين يدوه ؟؟
عزوه:- بحجرتها اتصلي ..
وقفت رايح صوب دار يدتي و جني اهرب انا الود ودي اطلع من ها البيت ما اسكنه موليه بس كيف اودر اهلي و ناسي آآآه يا القهر ..
امايه : تعال ما تبا تتعشى ..
ما رديت عليها كنت بعالم جراحي و اهاتي ..عالم تمنيت اني اطلع منه و ما اعيشه موليهه ... بس من وين المخرج كيف اطلع من ها العالم ...
دشيت حجره يدوه جفتها يالسه ع سيادتها و اتسبح ..
احطت ايدها ع عيونها تبا اتججوف زين : عزوه ؟؟؟
دشيت : انا يدوه
يدوه : مطر ووفديت بوغيث ..
يييت ابسرعه ويلست جدامها و حطيت راسي بحجرها جني ياهل حسيت برااااااااااااااااااحه فضيعه حطيت ايدها ع يبهتي : بسم الله عليك شبلاك يمه
حسيت بألم ع يبهتي : لا يدوه يعورني هني ..
يدوه : شو مضايجنك فديتك
زخيت ايدها و بستها و قلتها بضعف: الدنيا
يدوه : ما ترزا تراها
تنهدت بعذاب : ودي اهرب من كل شي بس وين اروح
يدوه : ويه بسم الله عليك الرحمن الرحيم ..قوم يمه صل ركعتين و ادعي ربك ..يوسع ضيجك ...
غمضت اعيوني ..و انا اتذكر طارق و عواشي كيف ميودين ايد بعض ..
.قلت : آآآآآآآآآه يا يدوه احس بنار تحرق قلبي .
حطيت يدوه ايدها ع صدري و يلست تفرك : احط لك فكس يمه
قلتها بتعب : يدوووووووووه الله يهداج اي فكس ..
يدوه : اتقول قلبك يعورك ..
تنهدت بحسره و سكت محد فاهمني ...
سالتني : صليت العشى ..
جذبت وقلتها : هيه ..
يلست ابسرعه يوم انفتح باب الحجره و كانت عزوه : تعالوا تعشوا .. و موبايلك رن اكثر عن مره ..
عرفت ان المتصل طلال ...
يدوه : جي ما ادقين الباب هاه ..
صكرت عزوه الباب بقوه ولا جنه يدوه ترمسها يبالها ضرب هاي البنيه ..
يدوه : جفت اختك ..
وقفت و ساعدتها ع لوقفه :: ما عليج انا بأدبها ..بس انتي لا تضايجين ..
يدوه تزخ عصايتها : هي اكسر راسها و اضربها جدامي علشان اتطمن انها تأدبت ..
يتني الضحكه : ههههههههه ان شاء الله ..يلا تعالي تعشي ...
ظهرت انا و يدوه من الصاله ...طاحت اعيوني ع طارق قاعد يساسر زوجته ..زوجته اقصد حبيبتي ..تنهدت ..شليت موبايلي ....و كنت بظهر من الصاله ..
زقرتني امايه : مطر
قلتها من غير ما اطالع صوبه : عندي شغل ..تعشوا انتوا عليكم بالعافية ...
طلعت بسرعه ما فيني ع حشرتهم ...رن موبايلي ..عقدت حياتي ها رقم ريل خالوه احمد...شو يبا بعد ها الحشره ناقصنه انا ...هالدب ...
حولته ع السايلنت .. ركبت سيارتي ورد اتصل مره ثانيه فاضطريت ارد لاني اعرف بتم يتصل الين ما ارد عليه ..
قلت : مرحبا ...
ردي علي : هلا ابوي
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك