رواية انا حر ما انهان والحر ما يرجع لشخص يهينه -30
قال : جفتها واقفه عند باب الحوي من برع
رفعت حياتي : ما فيها شي
قال بعصبيه : كانت اتسولف ويا واحد بالاشارات و يوم جافتني ربعت داخل
انصدمت قلت ع طول : يمكن انت غلطان
سعود : انتي وايد طيبه ميثه .. علشان جي انا ارتاح لج ..
ابتسمت له وزخيته من ايده : تعال بحطلك كريم مال الحروق ..
يير ايده : لا افا عليج انا ريال هالاشياء ما تعور قلبي
قلته : خل عنك بعدين بتعلم ايدك
سعود : لا ما عليج ...
سمعنا صوت عموه تزقرنا : سعود يلا تعال تعشى
التفت صوب عموه فقالت : ميثه انتي هناك تعالي ...بعد ..
قلتها : ان شاء الله
غريبه مطر من ظهر ما رد للحينه !! دشينا الصاله حسيت ينقصها شي اخرتها تذكرت ان يدوه في بيت منيرة ..دشينا الصاله تفاجأت بـ طارق و عايشه و عزه يالسين في الصاله ..
عموه: تعالوا اتعشوا البيت راحه يوم العيوز محد ...
طارق : يحليلها هادي البيت من دونها .."سلم علي" اشحالج ميثه
قلته : ابخير ..
لمحت عايشه و عزه يالسات حذال بعض و عيونهم شويه بتاكلني فلبستهم و يلست ع الصفره ..
عزه: مرابعه سعود
سكت بس فاجني سعود : و الله اذا ما سكتوها بضرها شرات الظهر
طارق:: بس عاد ردينا
ااممايه : بس عزه
"طالعتها نظرات عتب "
عزه: جنك تبا تنحرق مره ثانيه
عفد سعود و يير عزوه من كشتها عفد طارق و عموه يزخون سعود اما انا و عايشه نقزنا و ابتعدنا
عزه اتصرخ عليه : حيوان و الله اخبر عليك مطر
عموه محرجه : بس انتي الا اتسوين مشاكل لنا ..
طارق يدز سعود بعصبيه : بس انته ما اتروم اتيود اعصابك ..
بلعت ريجي و قلت بهدوء : سعود خلااص ..
سعود مطنش الكل : تبيني اخبرهم و افضحج جدامهم كلهم ليش ضربتج الظهر
عزه بقوة عين و اتحط ايدها ع خصرها: قول يلا سمعنا ليش انا ما اعرف فضايحك
حسيت ان سعود جن جنونه و حتى انه تنفس بصعوبه يالله هالانسان بست كوبي من اخوه ...
ام مطر : بس صخي .. يا ام لسان طويل ..
عزه :ليش ما اتسكتينه ليش اتضاربيني انا بس
طارق ياه صوب عزه و لوى عليها : خلااص اسكتي عزه ..سعود يحبج
سعود : حبها عقرب
قلت : سعود خلااص اسكت علشاني
رفس سعود صينيه العشى بغيض و تناثرت الصحون علارض
ام مطر: و حسبي الله على ابليسك يا المتخبل ..
عزه : ترا ميثه دواه
شهقت يوم سعود رد فجاه و شل تلفون البيت و نقزت عزه تحتمي بعايشه فياها التلفون ع بطن عايشه ..شهقت من الزيغه و سعود يبس ابمكانه بس عايشه ع طول حطت ايدها ع بطنها و يلست اتصارخ بألم .. عفد صوبها طارق الي اصفر وييه من الروعه ..
ام مطر : ابسرعه طارق يلا ودها الطبيب خاف صار فيها شي
عايشه كانت تصارخ من الويع : ما ارررررررررروم اتحرك ما ارررررررررررررروم ...آآآآآآآآآآآآآآآآآآآآآآآآآآي بطني طارق بطني ..
ربع سعود حجرته و ربعت عزه حجرتها يوم جافوا عايشه طايحه تتألم .. كنت بروح حجرتي اييب عبايتي لان عايشه غمضتني ..واااااااايد ..
كنت محتار كيف اجابل ميثه عقب الي سويته فيها الظهر .. ما ادري كيف قلبي قسى عليها ..حطيت ايدي ع يبهتي يوم تذكرت كيف حرجت ع سعود و حرقته بالزقاير ما كان قصدي بس ما اادانييه يوم اجوفه ماخذ راحته ويا ميثه ..ابتسمت باحراج و انا اتذكر امايه يوم اتفاتن عليه صج انا بالغت .. بروح اراضيه مهما كان سعود اخوي الصغير و مراهق لازم اتحمل حركاته و ميثه بحاول اعاملها احسن علشان اكسب قلبها و ابعدها عن سعود و لا طارق ولا أي انسان بس بتكون لي .
.نزلت من السياره و دشيت البيت ..اتيبست ابمكاني يوم سعت صراخ عايشه .. حسيت ان روحي بتفارجني ... ربعت داخل الصاله .. وقفت مصدوم شو السالفه ؟؟
ا م مطر : طارق روح ييب عبايتها روح ابسرعه ..و انا بروح اييب عبايتي
ربع طارق صوب حجرته و ام طارق صوب حجرتها ... كنت بروح حجرتي بس ما قدرت اتحرك يوم جفت مطر واقف عند باب الصاله و مصدوم حطيت ايدي ع حلجي .. الحينه بموت سعود بس كل المصايب الي اتصير في البيت ابسبب عزه و الله حرام سعود دوم مظلوم ...
عايشه مستويعه : مطر الحقني بطني "بطلت اعيوني يوم جفتها اتمد ايدها صوبه "
تجربت منها ازخ ايدها اخفف عنها الامها بس دزت ايدي بكرهه
و قالت اترمس مطر بألم : ضربتني في بطني ضربتني آآآآآآآآآآآآآآآآآآي
طالعت مطر بس مطر ما تم واقف بمكانه ربع شل عايشه و طار فيها برع ..
وقفت شرات المشلوله ..؟؟ ليش لها الدرجه قلبه طيب و ما يتحمل ؟؟؟ عيل وين طبيه قلبه مع سعود ؟؟و معاي !!!
اختفى مطرمن جدامي.. يت ام مطر
وسبقها طارق "علامات الخوف بويهه " : وين عايشه
ام مطر مستغربه : وينها البنت توها بتموت
بلعت ريجي وقلت بأٍسف : مطر ودها المستشفى
نقزت يوم سمعت صرخت طارق محرج : خييييييير منو سمح له
ام مطر اتعاتبني: و انتي مخلتنه " و ترفع ايدها بويهي " مالت عليج ..
"وردت ضربت جتوف طارق " يلاا طوف نلحقهم
يلست ع الكنبه ودفنت ويهي بكف يدي وصحت بصوت عالي ... مدري ليش حسيت بألم بداخلي ...شو هاه عايشه اتقول انا الي ضربتها فـ بطنها .. ليش قالت مطرجي؟؟ شو تبا اتفرق من بينا ..ليش شو علاقتها بـ مطر ..عمري ما جفت ملامح ويه مطر جي خاايف اول مـره اجـوفه جي و الله ..
الي اجوفه واايد بها البيت .. من مطر واهله ليش ام مطر قالت مالت عليج انا شو سويت ؟؟؟ نقزت يوم حسيت بيد ع جتوفي ..رفعت راسي جفت سعود وقفت ابسرعه ابمكاني ..
كنت بروح حجرتي
سعود بندم : ما كان قصدي اسوي جي ؟
ابتعدت لاني صدق مب ناقصه مشاكله سعود يترجاني : انا اسف
التفت له و قلته بألم : تعتذر حق عايشه مش انا
سعود بقهر: خلها اتولي
طالعته و قلته : ما منك فايده
لحقني : ميثه ميثه
قلته : يوم بتودر حركات اليهال تضرب فلان و علان هذيج الساعه برمسك ...
سعود بصوت يقطع القلب : يعني انتي ما جفتيها كيف كانت تستفزني ...قهرتني ما كان قصدي اضرب عايشه
سالته : سعود شو بين مطر و عايشه ؟؟
تغيرت ملامح ويهه فتأكدت ان سعود يعرف شي بس تم ساكت
تجربت منه و قلته بعناد : شو من بينهم
سعود يهمس : ماشي
عزه واقف عند باب حجرتها : مطر كان يبا عايشه ...
"وقالت و جنه قلبها تارس حقد وكرهه" يحبون بعض الا يموتون فبعض
حسيت بروده بكل جسمي ... عيل سلمى وين موقعها ؟؟ شو السالفه ..ربعت عزه ودشت حجرتها يوم حاول سعود يعفد عليها علشان يسكتـها و قفلت باب حجرتها يلس يرافس عليها لباب بس انا خطيت صوب حجرتي و جني ميته ..مدري كيف وصلت حجرتي .. شليت تلفون الحجره و اتصلت بـ منيره ..
تم يرن محد رد علي اتصلت اكثر عن مره ماشي فايده .
.انسدحت الشبريه و انا احس بقهر و غيض أي نوع من البشر ها الي اسمه مطر... كيف يحب حرمة اخوه ..لالامستحيل هالكلام ما يدش العقل ..مستحيييييييييل
نقزت يوم رن تلفون الحجره ..
رديت ابسرعه : الوو
ياني صوت منيره : هلا ميثه اسمحيلي كنت برع ويا يدوه .. شو مستوي ؟؟
بلعت ريجي وقلتها :محتاجه اتكلم معاج .."و عضيت ع شفايفي امنع دموعي تحدر "
منيره : شو مستوي بسم الله ..شو بلاج
ما تحملت و صحت منهاره ...
منيره : ميثووووووووووووه شو فيج
قلتها و انا اصيح : تعالي محد لي بها الدنيا محد لي ...
وصكرت بويها حضنت المخده و رجعت اصيح .. حسيت بتعب فضيع ولا اعرف شو قاعد يصير برع .. و قلبي جنه يحذرني الي ياي بيكون اردى و اخس ...
وقفت يوم سمعت دقت باب حجرتي ..رحت صوب الباب و فتحته ..
جفت منيره بويهي حضنتها و يلست اصيح منهاره جفت ملامح الخوف بويهها بس انا ما قدرت ايود روحي... سحبتها من ايدها و يلستها ع الكنبه
همست بخوف: شو سوا بج مطر ..
عضيت ع شفايفي امنع نفسي اني اصيح مره ثانيه ..رفعت راسي اواجهها
و قلتها : محد بيقولي الصج غيرج ..
طالعتني مستغربه و قالت : اسأليني ..
خذت نفس و قلت : شو علاقة مطر بـ عايشه
منيره جنه حد صفعها ع ويهاا ..زخيت ايدها اترجاها : قولي الصج؟؟
منيره بهدوء : عايشه منوه
قلتها و انا امسك اعصابي : عايشه حرمة طارق من غيرها ...
منيره: حرمة طارق يعني شو علاقه مطر بلسالفه ..
خذت نفس و سندت راسي ع الكنبه يأسه : ماشي فايده انتي ما بترمسين
منيره تجرب مني : حبيبتي ميثه و الله ترا انتي تتوهين
غمضت اعيوني بعذاب و قلتها : انتي ما تعرفين شو الي صار
منيره : شو مستوي ارمسي زين ..
ما كان لي خاطر اكلمها بس قلتها : عزه قالت لي ان عايشه و مطر "و صخيت "
منيره : انتي شو تاخذين ع رمسة عزه محد يسوي مشاكل بها البيت غير عزه
عدلت بيلستي و قلتها : منيره ..مطر يوم جاف عايشه تتويع تخبل شلها ع طول ودها المستشفى ما سوا اعتبار لوجودي ... حتى طارق كان موجود
منيره : كل ها ما يعطيج الحق تحكمين ع مطر ..
قلتها بعصبيه : عيل ليش عايشه اتهمتني اني انا ضربتها انا اصلا مالي علاقه بلموضوع
منيره جنها مب فاهمه شي: شو السالفه عايشه شو فيها ليش بالمستشفى
قلتها ابرود: سعود كان بضرب عزه و يت الضربه حق عايشه في بطنها
شهقت منيره .. التفتنا صوب الباب يوم انفج و دش مطر ..تفاجأ يوم جاف منيره يالسه معاي ..
بس كانت ملامح ويهه جامده ... صديت عنه كرهت اجوفه و احط عيني بعيونه
مطر : السلام عليكم
منيره : عليكم السلام ..شخبارها عايشه ..؟؟
مطر يرمس بنبره هاديه : بالعمليات
التفت لمطر ابسرعه صدمني ..
وقفت منيره : ليش شو صار
مطر : طاح الحمل
منيره : يحليلها ... شو استوى اخبارها الحينه
مطر جنه ما يبا يرمس بالسالفه حتى انه ما طالعني نش من مكانه
و راح صوب الحمام : ما اعرف شي اسالي ريلها ..
وقفت منيره و لحقتها ظهرنا من الحجره قلتها : انا خايفه ع سعود ؟؟
منيره : محد مخبل فينا و مسوي مشاكل بها البيت غير عزه و سعود ..
عند باب الصاله قلت : منيره
طالعتني قلتها : انا ما ابى اعيش بها البيت
منيره : ميثه اهدي خلينا بعايشه "زختني من ايدي " ما بين عايشه و مطر شي انا اضمن لج ..مطر اشكثر كان يلح علي اخطبج علشان محد يتحسب انه بينه شي و بين عايشه ... "رصت ع ايدي" عايشه حرمة اخوه لا تنسين هالشيء
خذت نفسس قالت لي: دشي
هزيت راسي و قلتها : برجع حجرتي ..
ابتسمت : ما عليه ..
قلتها : طمنيني على عايشه ...
هزت راسها بمعنى اوكى و دشت الصاله و رديت حجرتي جفت مطر قاعد يلبس كندورته لبسته و يلست ع الكنبه اجلب قنوات التلفزيون كان قلبي يرتجف بين ضلوعي و الي يقهر انه يعاملني ولا كأني موجوده
انقهرت منه
فقلته قبل ما يظهر : طلقني
وقف بلعت ريجي بصعوبه التفت لي و طالعني بنظرات ما فهمتها و طلع ..رديت راسي ع الكنبه اريح نفسي غطيت اعيوني بيدي تعبانه ... و مهمومه ...
غفلت نشيت بفتره و انا احس اني ميته يوع ..لبست شيلتي و طلعت من الحجره .. رايحه صوب المطبخ كان جو البيت هادي ...رحت صوب المطبخ بس وقفت ابمكاني يوم جفت شاب واقف صوب باب الصاله التفت لي فجاه .. و جنه تفاجأ بوجودي
ارتبكت : هلا ..
فهد : السلام عليكم ..شحالج حرمة اخوي
بلعت ريجي : عليك السلام بخير ..
فهد تجدم صوبي : تميت ادق باب الصاله محد رد علي
قلته : خير ..
طالعني عقب قال : ماشي ادور ع طارق مب محصلنه ..
قلته : حرمته تعبانه شويه
فاجاني يوم قال بسرعه : ليش شو بلاها ..
قلته : تعبانه شويه و اظني طيحت ولدها
بطلت اعيونه : عائشه حامل !!
سكت ما بغيت ارد عليه شو اقوله اصلا ..
انفج باب الصاله اتيبست ابمكاني يوم جفت مطر طالع من لصاله ..
حسيته انصدم تم واقف يطالعني و يطالع فهد ..
قلت بارتباك : ها مطر
ع طول من خوفي افتريت و عطيتهم ظهري رايحه صوب المطبخ ..الحينه بسوي لي حفله ها حياته كله مشاكل ..بس بطنشه شرات ما يطنشني ..
دشيت المطبخ .. زقرت الشغاله ما ردت علي .. فتحت الثلاجه ادور شي اكله ..طلعت لي جبن و خضره اسوي لي سلطه ...سمعت باب المطبخ يتصكر التفت ع بالي الشغاله بس فريت كل شي من ايدي يوم جفت مطر و اعيونه ممحمره من الغيض .. لصقت بالكبت تجدم مني
فقلته بسرعه : مالك حق علي
سالني : انتي متفجه وياه تجاوفون هني ؟؟
قلته اتطنز : هي ترا عندي موبايل ادقدق للناس و اواعدهم ماشي شغله ..
شهقت يوم زخني من رقبتي زخيت ايده قال : لا تتمصخرين عليه ترا و الله اطلع روحج من اعيونج
صحت و قلته ع طول : شو تبا مني انته .
تجرب مني و قال بكل بساطه : اباج اتكونين لي انا بس
بطلت اعيوني خفت منه هالانسان مينون ..مره يطنشني و مره يباني و مره الله اعلم شو في باله استغليت ها الكلمه و لصقت فيه ما همتني ايده الي كانت ترص علي
و قلته بهدوء : زين انا ابا اعيش حياتي معاك
ما توقعت ايبطل اعيونه جي و كلامي بصدمه او بيأُثر فيه لانه ع طول بعد ايده عن رقبتي و تم يطالعني مستغرب
حضنت ويهه بيدي و انا احس اني مليانه عذاب قلته و دموعي اتهمل : مطر انا وايد متعذبه ..
تم ساكت يطاالعني تجربت منه
و همست بأذونه : تقدر اتحسسني اني انا و انته عايشين بها الكون الوسيع ابروحنا
فاجاني يوم هز راسه بمعنى هي حسيت اني اقدر اسيطر عليه ابتسمت رغم عذابي
صرت بحياتي الروح واللهفه والاشواق الصمت لك والبوح ولشوفتك اشتاق عمري فدا عيونك يا ساحر في لونك وياك مهما يصير من بين كل الناس
مدري كيف خلتني انسى عصبيتي كنت ياينها و انا ناوي امسح وجودها من الدنيا ..عيونها تسحرني كلامها ذوبني تميت اطالعها ميت بابتسامتها وبهمساتها .. حسيتها مليانه عذاب علشان جي من ساعه طنشتها يوم قالت طلقني ما بغيت ازيد عذابها ... بس الحينه اجوفها انسانه ثانيه تجربت منها اكثر و هي لصقت فيني ..مشاعر حلوه حسيت بطعمها ..ما قدرت اوصف شو هي بس كل الي في بالي اني اتم جريب منها و ما انحرم من مشاعري الحلوه لي قاعده احس فيها
فتحت اعيوني يوم سمعتها اتقول : خلنا نظهر افبيت ابروحنا
طالعتها و قلتها : ما اقدر ..كيف اخلي اهلي و ابوي موصيني عليهم
تعلقت فيني اكثر و قالت : مب مرتاحه هني ...
وعدتها : بريحج اوعدج بس انتي ..................."ما عرفت شو اقولها "
ترجتني : مطر ما اقدر
حضنت ويها بيدي و رصيت عليها بحنان و قلتها : اوعدج.... ما تثقين فيني ؟؟
قالت لي : امبلى ..
"سكتت شويه جنها اتفكر عقب
قالت " زين بعيش هني معاك بس خلي طارق و عايشه يعيشون بعيد
ابتعد عني فجاه و جنه جي كهربه فيني .. وقف ابعيد و عطاني ظهره ..حسيته ضايع ..لحقته لصقت فيه
همست : مطر
قول قول خل تطير الدنيا فيني ..قول قول خل ليالي الشوق تجيني
يالّلي كلمة واحدة منك ...ترسم الدنيا بعيوني
التفت لي ابسرعه و قال لي بجديه : ما اقدر اروغ طارق من بيت ابوي
قلته : عيل نظهر نحن
مدري ليش عصب علي و قال : ما بنظهر ..ما بتغير شي .. "ودزني بجتوفي " ثاني مره لا ترمسين فهد ترا بفقع اعيونج
عطني ظهره قهرني فقلته : انته اتحب عايشه ولا سلمى
التفت لي و قال : كل البنات
عفدت عليه و ضربته بجتوفه بغيض لمحته يبتسم كرهته زياده
صرخت عليه : انت ليش جي
تجرب مني تفاجات يوم تجرب مني و باسني ع يبهتي طالعني بنظرات ارتبكت و ابتعدت عنه
بس قال : باجر بنروح انزور عايشه في المستشفى
عطني ظهره و طلع تركني بالالامي و احزاني ..بس الظاهر منيره ما قالت له شي ...
رحت الصاله عقب ما كلت لي لقمه ..جفت منيره يالسه ترمس بالتلفون و من دشيت صككرت
يلست جريب منها سالتها : شخبار عايشه
بلعت ريجها : يحليلها طلعوها من غرفه العمليات الله يعينها و يعين طارق "سالتني " جفتي مطر
هزيت راسي بمعنى هي سالتني : شو قالج
قلتها بسرعه : قلتي له شي
هزت راسها و قالت : لا ما قلته شي ..بس ع بالي وضح موقفه لج ..
قلتها باسف : مطر اصلا ما يهتم فيني
ضربتني بجتوفي ع الخفيف : ودري عنج هاي الرمسه الماصخه
سالتها اغير السالفه لان منيره عمرها ما بتفهمني
قلتها : فهد كان موجود هني
منيره : يدور ع طارق جافه مطر ..تدرين كانوا متضاربين و شكلهم تراضوا "ابتسمت" فديت ريلي الي يصلح بين كل اثنين
قلتها : عبدالرحمن طيب
منيره: هي حاول يراضي بين سعود و محمد بس بعدهم من يتجاوفون جنهم عدايل
نقزت و تذكرت سعود : مطر جاف سعود ؟؟ شو سوا به ؟
منيره : دش له الحجره رمس بس ما اعرف شو قاله
قلتها : ضربه ؟
منيره: لا ما اعتقد لان مطر طالع و شكله عادي مب محرج
قلتها: الظهر ضاربنه ........وايد يضرب سعود غلط جي يعامله سعود مراهق
منيره: و الله ما اعرف الي يبالها ضرب عزه ..
سكت ما بغيت اقولها ارد عليها عن تسمعني
منيره : مطر احتشر علي يبا يدوه ترجع البيت
قلتها : و ليش ما يت ؟؟
منيره وقفت يوم سمعن صوت هرن: شسوي لها هي ما تبا بس باجر بيببها ...
علشان مطر
قلتها : بتروحين ؟؟
منيره: ولدي ابروحه .. "باستني و قالت " لا تضايجني من مطر تراه يحبج بس انتي حاولي تفهميه ..
قلتها بصوت هادي : ان شاء الله ..
وقفت علشان اظهر من الصاله ...بس انفتح باب الصاله ..ودش طارق وقفت حسيته زعلان و متضايج ..
طارق: السلام عليكم
قلته : عليكم السلام .. الله يعوضكم ان شاء الله
طارق تنهد : آآمين .
قلته: شخبارها عايشه الحينه
طارق: الحمدلله بخير امايه تمت معاها و باجر بتظهر ان شا الله
قلته : ان شاء الله "حسيت طارق متضايجج غمضني وايد "
كنت بروح بس قال : زين ان مطر شل عايشه وودها المستشفى ولا كانت بتموت
طالعته حاولت اقرا ملامح ويهه بس ما جفت أي شي عقب
قال : كانت تنزف
تنهدت : امك ليش عصبت عيل و انته بعد
طارق : كنت خايف عليها .. بس مطر بهاي السوالف اقوى عني بوايد ..انا مب وايد اسرع مثله ولا تنسين شغله متعود على هذي العلوم
سكت ما عرفت شو ارد ...ظهر سعود من حجرته من جاف طارق ربع صوبه و لوى عليه رديت لورا مصدومه يالله شو الفرق بين مطر و طارق
سعود : انا اسف ما كان قصدي سامحني .."حسيت من صوت سعود انه بيصيح"
ابتسم طارق بس كانت ملامح ويهه كلها ألم : لا تزعل ..ها قضاء و قدر ..
سعود : عزه وايد تستفزني
طارق يضربه ع جتوف ع الخفيف: لازم تتعلم كيف تمسك اعصابك ,
كنت بروح بس الموقف وايد أثر فيني سعود كبر بعيوني و طارق شخصيه وطيبه قلبه مخلتنه ملك بها هالبيت
طارق: تبا الصدق و علشان ترتاح عايشه من قبل تعبانه من بطنها و من اسابيع و كنت حاس انه ما بيتم ..
سعود"يمسح دموعه " تبا اتريحني بس
طارق بصوت هادي : و الله العظيم قالوا لها انه ما بتم في بطنها ...
سعود : انا اسف مره ثانيه
باسه طارق فوق راسه .. رحت حجرتي ما تحملت الموقف مسحت دموعي ... يوم زقرني طارق عند باب الصاله ..
التفت صوبه قال : السموحه حرمة اخوي بس بغيت اسالج سؤال
ابتسمت له : اسال
طارق : مطر ما ياه ؟؟ اتصل به ما يرد علي
قلته: امبلى كان موجود من شويه "تذكرت" ع فكره فهد ياه يسال عنك
طارق: و الله
قلته: مطر جافه ...
طارق : خلااص مشكوره
دشيت حجرتي موقف سعود و طارق وايد اثر فيني غمضني سعود وايد مسكين هالانسان .. و طارق ربي يعوضه خير... رقدت و هالمره مرتاحه و ما حسيت بخوف ولا سمعت اصوات اتخوفني او اجوف ظل او أي شي من هالنوع
بطلت اعيوني ع صوت يلست ابكسل جفت مطر قاعد يلبس لبس الدواام التفت لي طالعني و رد عطني ظهره
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك