رواية أحلى صدفه في حياتي -24

 رواية أحلى صدفه في حياتي -24

هلي لاتحرموني منه,,,,
وليد يرقص ويأشر لرغد وعلى نفسه ويغني مع صوت الطقاقه وهو هايم ومبسوط..رغد ما بعد استوعبت اللي صار..كيف يتجرأ..كيف هو جرئ بزياده..وتركي ومشاعره...لفت على تركي ورحمته كيف انكسر خاطره وكأنه وده يستسلم ويفتح الطريق قدام وليد..رغد جوات نفسها ودها تروح تسكت الطقاقه وتوقف ليد عند حده..هو بالحركه هذي قاعد يحدد مصيرها وكأنها مالها غنى عنه..او واثق من انها تحبه..

وليد عارف ان رغد ما تحبه بس يبي يبين لها انه يعتقد انه تحبه عسى ترحمه وتشفق عليه وصدق تحبه..كان حاس بصدمه رغد وكيف قاعده تطالع تركي بعدين ترجع تطالعه وكأنها تقول "ليش سويت كذا"

رغد ما تحملت اكثر..نظرات البنات..نظرة الهنوف..نظرة تركي..نظرة اخوها مشاري..ونظرة الناس..رفعت فستانها بأطراف اصابعها و مشت ونزلت المنصه وقطعت الممر الطويل ووقفت عند البوابه تستنى وليد..

العيال بعد الاغنيه قرروا يطلعون..وريم لحقتهم عشان اختها رغد..

وصلوا العيال عند البوابه اللي وافقه عندها رغد..

وصل ماجد وهومفتشل من حركة اخوه اللي ما ادري وش تبي..ومشاري نفس الشي وطلعوا..تركي قبل لا يطلع..

رغد: تركي انا اسفه..

تركي انبسط لكلمتها معانتها انها ما رضت على حركة وليد ولا عجبها الوضع: لا تعتذرين يا رغد اللي مثلك ما يعتذر..

رغد: تسلم..

وطلع تركي..

جاء وليد بيطلع يتحاشى نظرات رغد..

رغد سكرت الباب بقوه وبحزم: لحظه...

وليد وقف هو ما يطالعها ماله عين: امـــــري..

رغد بأمر: طالعني..

وليد التفت على رغد..

رغد وهي ضابطه اعصابها لاتنفجر فيه: انت بأي حق تهديني اغنيه..وتحدد مصيري..

وليد بأبتسامه واثقه: بحق اني احبــــك..

رغد عصبت: بس انا....اما ما احـــــــــــــــــــــــ

وليد حط ايده على فم رغد وبترجي: لا تقولينها تكفين يا رغد لا تقولينها..عشان خاطري لا تقولينها..اذا قلتيها ضاع الامل اللي انا حاطه...اذا قلتيها اضيع انا...انا بدونك ما اقدر اعيش.تعرفين يا رغد ما اقدر اعيش..انا عايش بحبك..وراح اعيش لحبك..لا تخذليني يا رغد..

رغد تجمعت الدموع بعيونها..ترحم وليد وما تقدر تقسى عليه..سحبت ايده من على فمها: وليد انا ما اكرهك..ولك مكانه بقلبي بس مو المكانه اللي انت تبيها..افهمني يا وليد..

وليد: انا اللي افهمه انك لي..وما اقدر اتخلى عنك..وانتي ما راح تتخلين عن ولد عمك..

رغد رجعت عصبت هذا بأي حق يحدد اللي يبي: وليد قلت لك لا تتدخل فيني..

وليد: قبل لا تحددين مصيري فكري فيني زين..وتذكري ان عندي مشاعر وقلب مثل ما هو له قلب...

رغد فتحت الباب تبي تطلعه من القاعه ومن حياتها..وطلع وليد...بس ياترى طلع من حياتها..

سليمان واقف وجنبه ريم اللي كانت جايه عشان اختها بعدين دقتها سوالف مع سليمان..

سليمان: يله ريوم باي وتراك اليوم طالعه تهبلين..

ريم: تسلم وانت بعد تهبل..

سليمان: باي..

ريم: باي..

وبعدها ذكرت ريم رغد وراحت لها...

ريم: وش قلتي له..

رغد: ما قلت له شي هو اللي قال وزاد الطين بله..

ريم: يعني ما استدفتي من وقفتك معاه..

رغد وهي تدق بالحكي:لا بس انت اللي استفدتي..

ريم حست بنغزت اختها بالكلام وصرفت الموضوع: انا رايحه للعنود..

رغد: روحي...ويا اليت روحي تروح...استغفر الله وش قاعده اقول انا...

فيصل وفجر بعد ما خلصوا تصوير..ركبوا سيارتهم..فيصل وجنبه فجر ..وطلال يسوق فيهم وجنبه فواز..ووصلوهم الفندق وراحوا..

دخلت فجر السويت حقهم وفيصل كان تحت يسوي بعض الاجراءات..طالعت نفسها بالمرايه واخترعت من شكلها..لان البكي لعب فيها..تذكرت كيف تعلقت في امها اللي تبكي وهي تبكي..بعدين جات نوف وضمتها وجلسوا يبكون..وكملوا عليها البنات..اخذت منديل لازالة المكياج ومسحت الكحل السايح على خدودها وضبطت مكياجها..وفسخت عبايتها وجلست على الكنب الموجود على الصاله تنتظر فيصل...

ثواني ودخل فيصل: ها قلبي تأخرت عليك؟

فجر لفت عليه: لا عادي..

فيصل جلس جنبها وهو فرحان ويقول في نفسه" واخيرا صرتي لي"...:تصدقين يا فجر لو لقعد ابارك لعمري بزواجي منك سنين ما تكفي..

فجر ابتسمت ونزلت راسها: تسلم والله...

فيصل مسك ايدها وباسها: ماني مصدق اننا اجتمعنا تحت سقف واحد..

فجر: الحمدلله اللي جمعنا..

فيصل رفع راس فجر ولفه لجهته يبي يكحل عيونه بشوفتها: اليوم طالعه قمر يا قلبي..وخفت من الناس لا تحسدني عليك..

فجر وهي تطالع عيونه: الله يسلمك..

فيصل يستهبل: يعني مطولين كذاا كلمه ورد غطاها..

فجر تفشلت: يعني وش تبيني اقول..

فيصل: اول شي قومي بدلي هالكبير(يقصد الفستان) اللي عليك احس انك ضايعه فيه..

فجر ضاق صدرها: يعني مو حلو..

فيصل يضحك: الا يا قلبي حلو..بس ابيك تاخذين راحتك وذا مشا الله وش كبره..صاير حاجز بيني وبينك..

فجر قامت من الحيا بسرعه: اوكيه راح اغيره..

ودخلت الغرفه وسكرت الباب وقفلته وتسندت عليه..تبي تاخذ نفس..

فجر: يمه قلبي بيوقف...آآآه يا فيصل ذبحتني جننتني يهبل يا ناس يجنن..

تنهدت وراحت لعند الدولاب اللي حاطه فيه كم قطعه لما حجزوا الفندق..اختارت فستان حلو ولبسته..

كان لونه لؤلؤي..لاف على الرقبه وفتحت الصدر كبيره..ومزوم من عند تحت الصدر بكرستاله ذهبيه كبيره..بعدين وسيع وطويل..

فكت الطرحه.. وهي اساسا مسويه تسريحه بسيطه عشان كذا..الميك اب حقها منسب للفستانها..تعطرت..وقررت تطلع بس خافت وجلست على السرير...وفكرت تتصل على رغد ونوف يطمنونها..اول شي اتصلت على نوف...

فجر: الووو هلا نوافه..

نوف مصدومه: وش تبين..

فجر كاتمه ضحكتها: وش فيك؟؟

نوف: اقصد وين فيصل..

فجر: انا دخلت ابدل الحين بطلع له..بس قلت اتصل عليك اخذ طاقه بعدين اطلع..

نوف تضحك على هبال اختها: يله جاااااااري الشحن...

فجر كاتمه صوت ضحكتها: لا تخليني اضحك بعدين يقول عني مجنونه تضحك لحالها..

نوف: طيب يله روحي لزوجك..وخلك ثقل..

فجر: ليش شايفتني خفيفه...

نوف: انتي فاضيه للهواش يله روحي لزوجك..

فجر ابتسمت: سلمي لي على امي والبنات..

نوف: يوصل..

فجر بسرعه: وعلى اخواني..

نوف: انتي بتهاجرين..

فجر: لا اخاف يذبحني هالفيصل من الحب..

نوف: ههههه والله انك مفوته..يله باي..

فجر: باي..

بعدين اتصلت على رغد..

رغد تطالع الاسم مصدومه: اووووو فجيييير..

فجر تضحك: ههه هلا والله.

رغد: وين فيصل عنك؟؟

فجر: حطيت له منوم وافتكيت منه..

رغد: لالا بجد وينه..

فجر: دخلت ابدل بس خايفه اطلع عليه مستحيه..

رغد: هههه عادي يا قلبي اول الايام بس بعدين تتعودين..

فجر: بس هو جرئ..

رغد بعفويه: بس ما هو اجرئ من وليـــــ..."وعضت على شفايفها وسكتت"

فجر ما سمعت: من مين..؟

رغد: الا اقولك لبستي الفستان اللي قلت لك...

فجر: ايوه لبسته وطلع يجنن مشكوره يا قلبي...

ريم مرت من عند رغد: مين تكلمي..

رغد: لحظه...فجوره..

ريم منصدمه: فجر ما غيرها...

رغد: ايه...

ريم: سلم لي عليها وقولي الله الله بمقطع الفديو اول يوم زواجها..

رغد على نياتها: طيب...الوو فجر..

فجر: هلا..

رغد: تقول لك ريم الله الله بمقطع الفديو وما ادري ايش..

فجر: قولي لها في الحلم..

دق فيصل الباب...

فجر اخترعت: يمه هذا فيصل..

رغد: سمي بالله وخلي الوضع عادي واذا خفتي اذكري الله وان شا الله تهدين..

فجر: اوكي باي..

فيصل: فجوره انتي حيه ولا ميته..

فجر راحت وفتحت الباب..:لا عايشه...

فيصل يستهبل يبي يشيل الحيا: على بالي خديجه..

فجر توها بتقول هـ هـ هـ بايخه بس تذكرت انها عروس وسكتت....

فيصل يطل في الغرفه: وش قاعده تسوين..تخيطين الفستان اللي عليك..

فجر:لا ...بس قعدت اعدل مكياجي..

فيصل: تهبلين بلا شي..يله تعالي..

فجرراحت وراه..

فــــــــي القاعـــــه..

شجون: فهوود انت حاضر الزاوج..

فهد: ايوه انا برى مع مشعل..

شجون: ادخل ابي اشوفك..

فهد: اوكي..

دخل فهد ومعاه مشعل ..محمد ما جاء معاهم ما يحب الحريم..

لين شافت مشعل وبدون محمد على طول طارت لعنده وسلمت عليه وباسته..

لين: شعولتي اشتقت لك..

مشعل مسوي نفسه شي: حتى انا..يا الله مغبره وينك من زمان عنك..

لين: على قولت امي كبرت..

مشعل يتطنز:لاااااا من متى..

لين: ما ادري عنها...

شجون راحت لعند فهد: فهووود قلبي..

وسلمت عليه..

فهد: هلا والله بشجونه.."وطالعها من فوق لتحت" طالعه اليوم باربي كأنك عروسه..

شجون: تسلم يا قلبي عيونك الحلوه..

فهد يستهبل: فيه بنات...؟

شجون: وش قلنا..

فهد يضحك: امزح معاك..

شجون: يا حلوك وانت كاشخ بالثوب والشماغ..

فهد: قعد ساعه مشعل يضبطني..

شجون لفت على مشعل لقت لين شوي وتذوب عليه:مشيـــعل..

مشعل لف على شجون: هلااااااااا والله..

شجون: بسم الله عليك طالع مزيون..

مشعل: من حيني انا مزيون بس دوري لي مره..

ماحس الا وضربه أليمه في ظهره..

لين: وانا وين رحت...

شجون: ما يمديك..مسوين لك عقد احتكار للأبد..

مشعل يفرك مكان الضربه: أي..شويه عقد احتكار..

فهد: اقول لين اسحبي عليه وتعالي عندي...

لين: انا حطيتك بقلبي وعد...وماني للوعد خوااان...

فهد:على ابيات الشعر انا ما اقدر..مشعل خل لين بعيونك..

مشعل:لا توصي حريص..هي بقلبي وعيوني بعد..

اسحت لين من كلام مشعل..وهي مرتاحه ان محمد مو موجود عشان تاخذ راحتها..بس مافي شي يدوم على حاله...جاء محمد مسرع وجر مشعل معاه وطلعوا اخذوا معاهم فهد..وشجون ميته ضحك عليهم..

&& &&

مشاري بحزم: ممكن اعرف يا وليد سبب اهدائك لخواتي الاغنيه..؟؟

وليد مرتبك: لانهم بحسبة خواتي..

مشاري: طيب كان ماحددت...

وليد: والله ما طرى على بالي..وبعدين انا حبيت اشكر خواتك..ياما وقفوا مع خواتي في كل المواقف..وانا تخيلت انو عادي..

مشاري بتفهم: انا ادري انك تعدهم خواتك بس الناس وكلامهم..

وليد ارتاح من كلام مشاري: وش علينا من الناس.

مشاري: بس الكلام راح يطلع على خواتي...

وليد بجديه: اللي بيتكلم على بنات عمي اقطع لسانه..

****

فواز: طلال وش فيك..مانت على بعضك..

طلال تنهد من قلب: ما فيني شي يا اخوي..

فواز: كل هالتنهيده وتقول مافيني شي..

طلال بتعب: بليز فواز خلني على راحتي..

العنود جالسه مع وحده من العجايز: اقول خالتي وش رايك اوديك للبنان واسوي لك شد للوجه واسوي لخدودك وشفايفك بوتكس..

العجوز:كلوركس..تبني احط بخدودي كلوركس..

ريم :خالتي بوتـــكس..بــــوتكس..

العجوز: وش ذا اللي مدري وش اسمه..

العنود: هذا يا خاله الحريم يحطونه..ويرجعون شباب عشان رجالهم ما يتزوجون عليهم..

العجوز: تقولين هالكلام صادقه..

ريم: ايه خالتي الحقي على زوجك قبل لا يطير منك..

العجوز: وين يجوبون هذا اللي تحكون عنه..

العنود: في البقاله..لا اقصد في لبنان..

العجوز: اروح لبنان ا نشا الله..

ريم: فيه في الرياض تبين اوديك له..

العجوز: بقول لولدي مساعد يوديني له..

العنود تهمس لريم: عندها ولد ولا اسمه مساعد..

ريم: اجل اضمني العرس..

العنود: خالتي وش كبره ولدك مساعد..

العجوز: رجال ينشد الظهر فيه..

ريم: متزوج؟؟

العجوز تطالعهم: ادور له وحده سنعه..

قامت العنود ومسكت الدله وصبت للخاله فنجان قهوه: سمي خالتي..

العجوز: انتي بنت مين...؟

العنود: انا بنت ابوي هههه

ريم: ههههههههههههههههههههه

العجوز: بنت مين..؟

العنود: احم..بنت ناصر بن عبدالله ال(......)

العجوز: ما شالله والنعم فيه..الا منهو ناصر ذا..

العنود: شكلها مخرفه الحرمه..

ريم: العبي عليها..

العنود: ابوي يصير اخو ام العروسه..

العجوز: اخو ام فواز..يعني ابو ماجد...

العنود: ايوه عليك نور...

العجوز: ايه ابو ماجد الله يذكره بالخير يوم كنا بالحاره كنا نلعب سوا..ونمرح مع بعض..وكان ما شاله عليه الزين منه وفيه..

↔

العنود: شكل هذي بتقول قصة حياتها...

ريم: شكل جولييت تحب ابوك..

العنود: لا وين هذي كبر امه..

العجوز: وينه ابوك اسلم عليه...

العنود: في العيد ان شالله تسلمين عليه..اقول مساعد ولدك وينه خلينا احنا نسلم عليه..

العجوز: هاااااو..وش تقولين انتي؟؟

العنود:شكلي خربتها..

ريم: قومي ندور وحده ثانيه .شكل هذي ما منها رجا..

العنود: مع السلامه خالتي ولا تنسين بنت ناصر بن عبدالله..واسمي العنود اذا احتجتي شي..

العجوز: مع السلامه..

وبعدها دخلوا الحريم والرجال للعشا..وبدت القاعه تخف من الناس...جلسوا البنات على طرف المنصه..

عبير: كم جمعتي....

العنود: والله حوالي عشرين وحده.

عبير: مشالله متى امداك..

رغد: وش السالفه وش تحكون عنه...؟

عبير: عن العجايز والحريم..يعني كم حرمه تميلحت عندها..

رغد: ما شالله...وانتي كم وحده؟؟

عبير: انا خمس..

رغد: وان شالله يا ريم معاهم..

ريم: لا انا بس قاطه معاهم..مشاركه وجدانيه..

نوف: صدق انكم مهبل..نسيت اقول لكم فجر تسلم عليكم..

عبير: متى شفتيها؟؟؟

نوف : هي كلمتني...

العنود وعبير بصوت واحد: كـــــلمتــــــــــك؟؟

نوف تضحك: ايوه وش فيكم.؟

العنود: وشلون.؟؟

نوف: دخلت تبدل وكلمتني..

عبير: والله ماهي سهله هالفجير ابد.

العنود: ريم وصيتيها اللي قلت لك..

ريم: ايه قلت لرغد تقول لها..

العنود: وش قالت لك يا رغد؟؟

رغد: تقول في الحلم يا ماما..

العنود: والله من النذاله.حتى ألبوم زواجها مخبيتها بس هين بطلعها من عيونها وغير كذا صور الملكه..

شجون: وش تحشون في مرت اخوي..

العنود تتمصلح: شجون تكفين اسرقي البوم الصور حقها..

شجون: ليه شايفتني حراميه..وبعدين ماله داعي اللقافه..هذي اشياء خاصه..اذا تزوجتي شوفي صور زواجك..

العنود: اجل ما راح اشوف صور طول حياتي..

شجون: ليش ما انتي متزوجه..

العنود: والله مسويه اضراب حبيبتي..

شجون: وليش ان شالله...

العنود: كذا مزاج ماودي اتزوج..

ريم: واللي تو جمعتيهم.

العنود: مصدقه كذا بس اهبل فيهم..

بعد ما راح الكل رجعوا البنات كلهم لبيت ابو مشاري بينامون عندهم..كلهم بدون استثناء..الكل في غرفة رغد بعد ما بدلوا من ملابسها وملابس ريم..

رغد: بنات وش رايكم نشوف شريط الفديو كاميرتي..

ريم: لالا خليه لما تجي فجر من شهر العسل..

رغد:مطووووله...خلونا نشفه الحين واذا جات مره ثانيه نشوفه..

نوف وهي خانقتها العبره: والله مو طالع حلو بدون ما تكون فجر قلبي موجوده...

سكتوا البنات شوي....

العنود: احنا جايين ننبسط مو نبكي ونصيح..

عبير: خلونا نسوي شي يسلينا..

رغد: عندي لكم فلم خطييييييير..

ريم: أي واحد؟؟

رغد:توه نازل ..رعـــــــــب..

العنود: يله طيران روحي جيبيه..

رغد: بروح اجيبه..ريم روحي سوي البوب كورن وخذي وحده من البنات وجيبي البارد اوكي..

ريم: مين تجي معاي...

عبير: والله انا عن نفسي........

ريم قاطعتها: مالك خلق..غيرك..

العنود: اقول عبير همزي رجولي..

ريم طالعت نوف تبكي وما لها خلق..وطالعت مها تستحي تشغل اخت سليمان..وما لقت الا الهنوف: هنيف تعالي معاي..

الهنوف: ريوم والله....

ريم: اقول امشي قبل لا تجي رغد..

الهنوف: يله..

دخلوا المطبخ..وقعدت ريم تجهز البوب كورن والهنوف داخله في الثلاجه تطالع المشروبات اللي فيها..

جاء مشاري وسمع صوت في المطبخ..اخذ بلونه كانت على الطاوله من ايام حفله فجر وفيصل.وتفخها وربطها.. ومشى لحد المطبخ على اطراف رجوله....وفقعها بووووووووووووووووووووووم..

ريم من الخرعه بغى يطيح الصحن الي معاها..

الهنوف كانت داخل الثلاجه فا صقع راسها فيها.. ولفوا عليه...

مشاري مبسوط: هههههه هاه وش رايـــــ

وقف يطالع الهنوف اللي طالعه تشق الراس شق لسه ما غسلت مكياجها وتسريحتها على ماهي عليه ولابسه بيجامه ورديه تهبل عليها..

مشاري غمض عيونه وفتحها مره ثانيه يبي يتأكد هو في علم ولا حلم..

الهنوف تطالعه كان لابس بيجامة نوم حرير مفتوح ازارير قميصه نصها..وطالع شكله برئ وجذاااااب في نفس الوقت...

ريم والنذاله اشتغلت عندها..راحت دفت مشاري برى وسكرت الباب..

ريم لفت على الهنوف وتطالعها بنص عين..

الهنوف ارتبكت: وش فيك تطالعيني كذا..."وصارت تحط العلب في كيس بتوتر..

ريم: تحبين مشاري؟؟؟

الهنوف: كم مره اقولك عن المساخه الزايده..

ريم: انواااع الصواريخ..قولي الصدق عادي قولي احبه..سهله..

الهنوف حمرت خدودها: اقول جيبي شي اتغطى فيه ولا شوفي اخوك راح ولا لسه فيه..وبعدين ترى تأخرنا على البنات..

ريم: طيب زين لا تقعدين تبربرين على راسي كانك خدامه سيرلانكيه..

الهنوف خبطت الطاوله بأيدها وعورتها: اأأأي...انا خدامه سيرلانكيه..يا الاندونسيه..

ريم:شكلك ما جربتي علبة بيبسي تجي بسرعة مليون على ر اسك..

الهنوف: يله بس خلينا نطلع عند البنات..

ري: يله ولا تنافخين..

الهنوف: يارب صبرك...

*****

مشاري طلع لغرفته وهو مفهي بالهنوف..

"اللي شفتها اكيد ملاك مستحيل تكون بشر...ياناس على الدلع والرقه..ولا العيون..العيون تذبح..تشق الراس شق...متى تنجح واروح اخطبها وارتااااح من اللي انا فيه"

&& &&

قعدوا البنات يطالعون الفلم وكان رعب شويه عليه..

رغد تلفت يمين ويسار في الظلمه ومافي نور الا نور التلفزيون: اقول ما ودكم نطفيه..

العنود تاكل بوب كورن: اقول طالعي وانتي ساكته...

نوف وشجون والهنوف ياكلون اظافيرهم من الخوف..ومطيرين عيونهم وكل ماجات لقطه مرعبه غطوا عيونهم..

عبيرتطالعهم: ريم لفي شوفي الهبل اللي وراك..

ريم: انا قايله لكم البزارين لا يطالعون بس ما تسمعون الكلام..

العنود: خليهم..شوفي شوفي كيف..

كانت لقطة وحش يقطع عروق رقبتة واحد وهي طايحه لما طاح الراس..

البنات يصارخون ودخلوا داخل البطانيه..

رغد طفت التلفزيون: حشى مو فلم تعذيب..

العنود: شغليه لا اتوطى في بطنك..

رغد: تبين تشغلينه شغليه في غرفة ريم..انا مستحيل اكمله..

عبير: مشكلة اللي معانا دلوعات ودلعهم ماسخ...

ريم: امشوا بس غرفتي...

راحوا غرفة ريم...والبنات اللي في غرفة رغد ناموا وهم جنب بعض الا شجون جاها ارق وما نامت..

واللي عند ريم لما خلص الفلم ناموا وكأن شي لم يكن...

&& &&

فتحت فجر عيونها وطالعت المكان..مكان غريب عليها..

فجر: يمه ويني فيه.."وبعدين لفت يسار وحصلت فيصل نايم" ..يوه نسيت اني تزوجت..

راحت لدورة المياه وتروشت..وطلعت وصلت وقعدت تمشط شعرها,,وحست بحركه وراها...

فيصل يحاول يفتح عيونه: صباح الخير حبيبتي..

فجر: صبحا النور يا قلبي..

فيصل: مشا الله قايمه نشيطه..

فجر احمرت خدودها: ايه...

فيصل راح لدورة المياه..وفجر اخذت نفس عشان ماتموت..

فجر: هذا ناوي يذبحني انا داريه...

طلع فيصل وشعره ملبول ولابس روب ازرق ..فجر على طول وخرت عينها عنه تستحي تشوفه كذا..قرب من عندها وهو ينشف شعره.. ويطالع نفسه في المرايه ويطالع فجر اللي قاعده قدامه وهو وراها..

فيصل: بعد شوي بنروح لعند ابوي..وبالليل مسوين عزيمه,..في بيت ابوي بعد..

فجر: يعني بنروح ونرجع وبعدين نروح مره ثانيه..

فيصل: انا اقول ماله دعاي المشاوير..الا اذا حبيتي كذا انا ما عندي مانع..

فجر: لالا عادي ادبر نفسي...

ووقفت فجر بتروح أي مكان بس ما تكون عنده لان قلبها بيوقف في لحظه وخصوصا ان شعره جاي على وجهه الازرق عاكس عليه..وعلى هالصباح ما تقدر تتحمل اكثر..وتوها بتروح جاء فيصل من وراها ومسكها من خصرها..

فيصل هو يهمس في اذنها:وين بتروحين يا قلبي..؟

فجر تحسفت انها فكرت تقوم: ولا مكان بس قلت اشوف موبايلي ما ادري وين حطيته..

فيصل يضمها وكأنه مبسوط بأحراجها: اهاااا..

فجر ما تدري وش تسوي ودها تقول يا اخي فكني ابي اتنفس..وانقذها موبايلها..

فجر: اممم..فصول.....موبايلي"وتأشر عليه"

فيصل تركها: ومن هذا اللي ما عنده ذوق ومتصل..

فجر وهي تشوف الاسم: هذي قلبي العنود...الووو..

العنود بالمصري: صباحيه مباركه يا عروس...

فجر تضحك: الهب يبارك فيك...

العنود: الشين عندك...

فجر: ايوه..

العنود: وش تسوون الحين..

فجر ماسكه ضحكتها تتخيل انها تقول للعنود وش كانت فيه قبل شوي: وش رايك يعني..

العنود:طيب لمحي للموضوع..

فجر: ان شالله اذا شفتك قلت لك..

العنود: صدق بتقولين لي كل شي...

فجر تلعب عليها: كل شي يا قلبي..

العنود: اجل مع السلامه..

فجر: مع السلامه..

فيصل: وش عندها العنود..

فجر: تسلم بس..

فيصل: والله من اللقافه..

فجر: حرام عليك...

وشوي الموبايل يرن مره ثانيه...

فيصل: هذولي حالفين علينا ما ننبسط..

فجر تبتسم لفيصل: هذي ريم...هلا والله وغلا..

ريم: اهلين بالعروسه بعد قلبي والله اشتقت لك..

فجر: تسلمين يا قلبي حتى انا..

ريم: اهم شي اللي وصيتك عليه سويتيه..

فجر: ابشري بعزك<<والله لاقيتهم مخفات..

ريم: والله اني قايله لهم فجر ما راح تردني بس كذبوني..

فجر: ما عليك منهم..انا اهم شي عندي انتي يا بعد عمري والله..

ريم: سلمي لي على رمز الشقا وتامريني على شي...

فجر: سلامتك...وسلمي لي على رغوده..

ريم: يوصل..باي..

فجر: باي..

فيصل: نطلب لنا يا روحي فطور..

فجر: على راحتك..

فيصل طلع للصاله..وبعد دقايق لحقته فجر وجلست على كنبه بعيده شوي..

فيصل عارف انها منحرجه منه وحب يزيد عليها: احد قايل لك ان فيني جدري..

فجر تضحك: ليش؟؟

فيصل: ما ادري عنك جالسه هناك..تعالي اجلسي جنبي والله ما فيني شي..

فجر قامت وجلست جنبه بس تركت بينهم مسافه: وهذ انا جلست..

فيصل انسدح على رجولها ويطالعها...:فديتك والله

الجـــــــــــــــزء التــــــاســع والثـــــــــــلاثـــون...

""الفصــــــــــــــــل الاولــــــــــــــــــــــ""

فيصل انسدح على رجولها ويطالعها: فديتك والله...

فجر ما تدري وش تسوي فيه تذبحه وتفتك ولا وش تسوي فيه..

فيصل: العبي في شعري لا تجلسين كذا..

فجر في نفسها" ياربيه هذا يتعمد يحرجني ولا وش سالفته":من عيوني..

فيصل: تسلم عيونك..."بعدين فز من رجلها ولزق جنبها"......تصدقين جات على بالي قصيده كذا على الطاير..

فجر ابتسمت وهي تحب تسمع له يقصد فيها: قول صوصو وش عندك..

فيصل: امممم..احم احم..

ما عرفت الحب الا لجل احبك واهتويك

ولا كتبت الشعر الا لجل ابين لك غلاك..

عزتي بك وانكساري وجرحي وفرحي بيديك

جرح ولا فرح ما هي فارقه دامي معاك..

يخشع لوصفك قصيدي ويفتخر لانه عليك

وتخضع لحبري القوافي وينتشي حرفي معاك..

ويعجب من الوصف وصفي وتنوزن ابياتي معاك

وينكسر غصب علي البيت لو كان في سوااك..

وتختلف لجلك حروفي منهو الاول اللي يجيك

سبعه وعشرين تبكي والألف فاز بلقاك..

اعشقك..اهواك..احبك ..ارتجيك..

افتديك..انتخيبك..اغتليك وارخص الغالي لغلاك..

وسلامت روحك..

فجر تصفق له: واااااااااو تسلم يا بعد دنيتي وصح لسانك..

فيصل: صح بدنك..يله عطيني بوسه..

فجر من الحماس: تستاهل ثنتين..

فيصل ما تستوعب: ثنتين؟؟؟!!!!!

فجر انتبهت وحمرت خدودها وسوت نفسها غبيه: ثنتين؟؟؟

فيصل: لا تستهبلين انتي قلتي بوستين يله عطينيها..

فجر وبكل برائه: انا قلته ..متى؟؟

فيصل: احسن لك عطينياهم لا اخليك تتحسفين قد شعر راسك..

فجر طلع وجها احمررررر: استحي..

فيصل: تستحين هاه.."وسدحها وصار يدغدها ويبوسها من كل مكان.."

فجر دفنت وجها في الكنب: ههههههه صوصو ابعد عني..

فيصل قام عنها: اوووه عشان ما تستحين مره ثانيه..

فجر طلعت وجها من داخل الكنب وطلت عليه وشعرها منثور على وجها..

فيصل شده شكل فجر وبعد شعرها عن وجها: يله اجلسي ما راح اسوي لك شي..

فجر وترمش بعيونها ببرائه: اكيــــــد..

فيصل: شايفتني دركولا يوم انك خايفه..

فجر جلست زين: ايوه..انت دركولا اللي يشرب من دمي..

فيصل طالع بعيون فجر: اوعدك يا فجر اني راح اسعدك طول حياتك..

فجر: وانا مكان اوعدك اني ما اخيب ضنك ابد..

ووصل الفطور..وافطروا ولبسوا وتكشخوا وراحوا لبيت ابو فيصل...

فيصل فتح باب البيت: وينكم يا اهل البيت..

ام فيصل طلت من المطبخ: فيصل..تعال يا قلبي...

فيصل يبوس راس امه: هلا والله بالغاليه...

ام فيصل: صبحيه مباركه يا وليدي ..وين فجر...

فجر دخلت: هلا خالتي"وسلمت عليها وباست راسها"

ام فيصل: هلا والله ببنيتي.صباحيه مباركه يا احلى عروس..

فجر وردت خدودها: الله يبارك فيك خالتي..

فيصل: يمه لا تتغزلين في زوجتي تراني اغار..

فجر استحت من ام فيصل..

ام فيصل: فيصل شوف احرجت البنت..

فيصل يقرص خد فجر: وانا ما ذبحني الا حياها..

فجر تطالعه بنظره"وبعدين معاك"

نزلت شجون على اصواتهم ووقفت في نص الدرج...

شجون: فجوره..قلبي..

وراحت وسلمت عليها: صباحيه مباركه يا حلوووو انت..

فجر: الله يبارك فيك..كيفك؟؟

شجون: بشوفتك تمام..

فيصل: احم احم تراني موجود ولا علينا غبار ما تشوفين..

شجون لفت عليه: معليش يا قلبي ما شفتك..

فيصل: هههه لهدرجه نور فجر مغطي علي..

شجون: اكيد فجر تغطي على الكل..

فيصل: ما اسمح لك تتغزلين في زوجتي..بس انا..

شجون: مسكين...فجر لاتعطينه وجه..تراه ما ينعطا وجه واسأليني انا...

فجر: لا حرام عليك..صوصو بعد قلبي..

ام فيصل: صوصو؟؟؟ وش هذي صوصو؟؟

فجر تقلب وجهها 180 درجه حيويه من الحيا: صوصو..يعني فيصل تصغير يا خالتي..

ام فيصل: يا حليلكم يا هالبنات..احنا اول من اول يوم زواجنا وانا انادي زوجي ابو فيصل..

شجون: ياالله تحبون المشاوير..

ام فيصل: لا هذا من باب الاحترام الحين...

شجون: الحمد لله اني من خدمات الجيل الثالث على قولة العنود.

فيصل: والعنود لا حقتنا هنا..

شجون: ليش وش فيها بنت عم بنات خالتي..

فيصل: كل هالمشاوير عشان الملقوفه عنيد..

شجون ماتت ضحك: هههههه يا حبي لها بس اكيد متليقفه عليك..

فيصل: انا ما اقول الا الله يصبرها على نفسها...

فجر: صوصو ترى ما ارضى عليها بنت خالي..

فيصل: لك الحشيمه يا قلبي..واسفين..وسحبت الكلمه..ويا كلمه ردي مكانك قبل لا تزعل فجر..ويا قلبي ادري اني........

فجر استحت: خلاص طيب خلاص...

فيصل: عشان ما تزعلين يا قلبي..

فجر: ماني زعلانه بس اسكت لا تفشلني قدام اهلك..

فيصل: من عيوني يا عيوني...

فجر: وبعدين..

فيصل: خلاص خلاص..اجل يمه وين ابوي؟؟

ام فيصل: اكيد بالشغل...

فيصل: على بالي اخذ اجازه لانه مسكين امس هلك من الوقفه والسلام..

ام فيصل: أي والهذ امس يون من رجوله بعد قليبي..

شجون: يمه عندي بعض الملاحظات اول شي وش معنى"يون" ثاني شي وش عندك تتغزلين في ابوي ولا غرتي من فيصل...

ام فيصل: اول شي يون معنها يتالم وثاني شي لا يكون عندك مانع اذا تغزلت في زوجي..

شجون: لا عندي دواس هههههههه..

فيصل: ياربيه يا ثقل دمك يا شجون..

شجون: وانت تزوجت ولا ما تزوجت ما تتغير..

فيصل: اصلي مع علامة الجوده..

ومر الوقت لحد ما جاء المغرب..وطبعا فيصل ما جلس عندهم طول الوقت لانه راح عند ابوه..

فجر: شجونه خلينا نروح نبدل ملابسنا قبل لايجون الناس...

شجون: اوكيه يله..

وطلعوا غرفة شجون وتعدلوا وتكشخوا..وعالساعه سبعه امتلى البيت بالناس..

ريم رايحه لعند فجر وتسلم عليها: فجووووره يا قلبي والله وحشتيني...

فجر: وانتي كمان...

رغد من ورى ريم: اهلين يا عروسه ..

فجر ابتسمت: اهلين "وراحت وحضنت رغد"

جات العنود وفكتهم:يله عاد بلا مساخه..هلا والله بفجير المراهقه..

فجر تضحك: مقبوله منك..

وسلمت على عبير ومها والهنوف..وجات نوف طايره 120متر/في الثانيه: اهلين يا قلبي وحشتيني"و ضمت اختها لما بغت تطيح"

فجر وهي مخنوقه: حتى انتي وحشتيني..بس بعدي شوي خليني انتفس..

نوف بعدت عنها وصارت تطالع بوجهها: تصدقين امس ما عرفت انام لاني ما مسيت عليك وقعدت ابكي لاني ما صبحت بوجهك..

فجر خنقتها العبره: والها بفقدكم يا نوف..اليوم صحيت وما حصلت نفسي في غرفتي تكدر خاطري والله..

وقعدوا يسولفون وويتسهبلون ويضحكون..

العنود: تذكرت.... فجير وين اللي قالت لك ريم...

فجر خافت: هاه...ايه نسيته تصدقين..

ريم تطالعها بنص عين: لا يكون بس تلعبين علي..

فجر ارتبكت: انا ابد سلامتك..قلت لك نسيته..

العنود: اوكيه يعني وين بتروحين منا..

وسمعوا ام ماجد تنادي: عبير....عبير...

عبير: ياربيه وش تبي..

رغد: قومي عيب عليك..

عبير: قمت وامري لله "وراحت لعند امها"...سمي..

ام ماجد: سم الله عدوك..روحي المطبخ وجيبي الحلا..

عبير: يمه الحين مقومتني من مكاني ومشوار من هناك الى هنا عشان حلا..كان قلتي للخدامه...

ام ماجد تهمس لها: استحي عيب عليك ..بعدين وش يقولون عنك الحريم خامله..

عبير بسرعه: لالا مدام المسأله فيها حريم وخطبه..من عيوني يا غلاتي..

ام ماجد: والله هالبنت بتقطع وجهي قدام الناس..

وراحت عبير المطبخ وفتحت الباب بقوه لحد ما صقع الجدار..وبدت في الصراخ على الخدم: انتي وياها وين الحلا اللي كان هنا..

وحده من الخدم: مدام انتي ليش في يصارخ..

عبير: هذي اللي اللحين تبيني افقع وجهها..ترى اذا ما سكتي انتي وخشمك المفعوص لا ازوده على اللي فيه ســــــــــــامعـــــــه"ومطيره عيونها فيها"

الا باب المطبخ الخارجي ينفتح ويدخل طلال ومعاه دلال القهوه...

طلال: خير وش هالصراخ<<ما يدري انها عبير..

ولما دخل وشاف اللي تصارخ:عبيــــــــر!!!!!!

عبير وجهها تلون بألوان خشبيه من الفشيله:طــــــلال....!!

طلال حط الدلال: وش فيك تصارخين..

عبير تدور حجه: تخيل....تخيل....ان الخدم لحد الان ما ضيفوا الحريم..

طلال يهديها:طيب ما عليه بس لا تعصبين وترفعين ضغطك..

عبيرتمثل: مثل ما انت عارف اني حريصه واحب كل شي يكون تمام..

طلال ابتسم لعبير ابتسامه تدوخ: والله انك سنعه وخطيره بعد...

عبير بتدوخ من الابتسامه:ااااااا..الله يسلمك ويخليك...

طلال قرب منها ووده يسولف: المجلس داخل مليان؟؟

عبير توترت من قرب طلال: ايه يعني...مليان شوي...

طلال : وكيفك انتي؟؟

عبير تعدل حجابها من التوتر: الحمد لله تمام..وانت كيفك؟؟

طلال ابتسم: بخير دامك بخير...

عبير تطالع عيونه تتأكد وش يقصد من الاهتمام هذا..وتسأل في نفسها"والعنود وش كانت" لانها طالعت نظرات حب في عيونه..تقراهم وتحس فيهم..عيونه تتكلم بكل اللي في نفسه..

طلال يحس بمشاعر تدخل لقلبه وتهزه..بس هالمشاعر ماهي غريبه عليه ولا جديده..قد حس فيها مع شخص واحد...واحد بس...انتي يا عبير...

عبير ابعدت عيونها عن عيون طلال لانها لو طولت تحس انها راح تحترق..وقطعت الصمت اللي بيذبحها: انا.....انا رايحه تبي شي....

طلال: لا سلامتك...

عبير لفت بتروح بس وقفها..

طلال: عبير..

عبير وقفت شوي بعدين لفت وفوق راسها علامة تعجب:آمــــــــر..

طلال: ما يامرعليك ظالم بس حبيت ا قول لك انتهبي لنفسك..زين..

عبير تحس قلبها يرقص من الفرحه وابتسمت: تسلم وانت كمان انتبه لنفسك..اوكيه..بااااي..

طلال: باااي..

لفت عليه نفس الخدامه اللي صرخت عليها عبير: بابا...انت في هب مال هذا بنت...

طلال لف عليها وراحت ابتسامته من وجهه لما شاف وجهها: وانتي وش عليك...

الخدامه تغمز له: انت واهد هيلو وكويس مافي ياخذ وهده مو كويس..وشوف انا مررررررره واجد كويس..

طلال كشر في وجهها: خدامات اخر زمن..تقلعي هناك قبل لا اخليك علبة بيبسي انتي وهالوجه...

وراح لمجلس الرجال...

عبير رجعت للبنات فاتحه فمها من الفهاوه..

العنود: وش كانت امي تبي منك...؟

عبي جلست: تبي قلبي...تبي روحي...تبي عقلي..

العنود: وش فيك محششه..

عبير تضحك: ههههههه تصدقين يا العنود اني اموت ..اموت..اموت فيك يا بعد عمري انتي..وحياتي وكل امالي وروعة سنيني...

العنود رزت كتفها: احم احم..ما يحتاج كل هذا لاني واثقه من نفسي..

ريم: لالا بجد و فيك؟؟

عبير:لا تسأل يا خل عن الحال..لانك لمن سألت تزيد اوجاعي..

ريم: لالا البنت خلاص قولوا عليها السلام...العنود ترى فتحوا عندنا مجمع الامل للطب النفسي ودوها له..

العنود: عندك رقمهم خليني اخذ لها موعد عندهم...

ريم تستهبل: ايوه...سجلي عندك..

عبير: هيه هيه انتي وياها وش تسجل عندها..

ريم: شفتي اصلح ادخل علم نفس..هذا يسمونه العلاج بالروعه..

العنود: يقطع ابو الاسم يا شيخه..بس بصراحه رزتك تنفع دكتوره نفسيه..

ريم: الله يسلمك ويسمنك..

العنود: اكثر من كذا وش اصير...

ريم: تصيرين غساله اتومتيك..

العنود:لا تخلينا نبدا...

ريم:لالا مو قدام الناس..

وكملوا سهرتهم وتعشوا وودعوا فجر لانها بتسافر لندن مدينة الضباب..وكل عائله راحت بيتها...

&& &&

بيــــــــت ابو فواز..

نوف: يالله كرهت بيتنا ماعاد صرت احبه لان فجر مو فيه..هي والله فجر بيتنا ونوره...

طلال رحمها: وانا وين رحت مو اخوك بعد...

نوف وعيونها مليانه دموع: الله يخليك لي...بس انت ولد تروح وتطلع وفجر اختي بعد عمري والله...

طلال: روحي نامي عند وحده من البنات...

نوف: وين اروح...

طلال: روحي لشجون اكيد لحالها وحالتها مثل حالتك..

نوف: شكلي بكره بشيل اغراضي و اروح عندها..

طلا ل: مو تطولين ترى مقوى على غيابك...

نوف: تسلم يا بعد قلبي انت..يله تصبح على خير...

وطلعت نوف غرفتها...وطلال راح لغرفته اللي مازالت تحت عشان الجرح الي في بطنه ما يتحمل ضغط عليه..وزاد عليه بعد الرقص في زواج فجر...

انسدح على سريره قبل لا يبدل ملابسه...

طلال: آآه يا عبير هبلتي فيني...والله اكتشفت اني احبك..بس العنود وش كانت احس اللي معها يمكن اعجاب..اكيد اعجاب لانها الفتت انتباهي والله وقدرتي يا العنود تجريني على وجهي..حبيتك بعدين رميتيني...اخ يا العنود صدمتيني صدمه قويه...ياترى تركتيني عشان عبير صدق ولا هذا عذر لك..طيب عبير تحبني!!! وحتى اذا كنت ما تحبني بأخليها تحبني غصب

ونام هو ما بدل ملابسه...<<نوم العوافي..

&& &&

فجر تجهز شنطتها وفيصل جالس على السرير يراقبها وهي متوتره منه...

فيصل: فجر..ودك تسكنين في بيت اهلي ولا بيت لحالك...

فجر: مع اهلك احسن...وبعدين حرام امك لحالها..شجون اكيد ربي بيرزقها وتتزوج وتتركها لحالها...

فيصل ابتسم: الله لايحرمني منك...والله كبرتي في عيني...

فجر ابتسمت: اقول متى طيارتنا...

فيصل: بعد ساعتين..ما خلصتي..

فجر: الا خلصت"وسكرت الشنطه" يله هذا انا جاهزه..وش رايك نروح نودع اهلك واهلي وبعدها نروح المطار...

فيصل: شورك وهداية الله..الحمد لله ان ربي معطيني زوجه عقلها يوزن بلد..

فجر: ترى يكبر راسي..

فيصل: يحق لك والله...

فجر: يله مشينا...

فيصل: مشينا...

وراحوا بيت ام فيصل..وصار مناحه..ام فيصل تبكي وشجون تشاهق بكي ومعاهم فجر.. وفيصل يهديهم..وبعد ساعه صياح ونياح طلعوا وراحوا كملوا في بيت ابو فواز ..وصدق صار نياح مو طبيعي نوف ام فواز وفجر ولين وبدور كملتها عليهم..وبعد ما طلعوا من عندهم توجهوا للمطار ومعاهم فواز وطلال..والعيال جاو يودعون فيصل...وبعد الوداع..ركبوا طيارتهم وفجر مازالت تبكي بس بصوت واطي...

فيصل: بس يا فجر تكفين..قطعتي قلبي..

فجر والدموع اربع اربع: اهلي يا فيصل اهلي..

فيصل يبي يطلعها من جوها: وانا وش اصير يا فجر..

فجر تطالعه: انت زوجي وحبيبي وهم اهلي..

فيصل: طيب عشان خاطري وقفي دموع..

فجر تحاول تسكت عشان فيصل: بأحاول..

فيصل: والله يا قلبي دمعتك غاليه عندي..

فجر تحاول تبتسم: الله يخليك لي يا فيصل ولا يحرمني منك..

فيصل: ايه كذا تطلعين احلى...

وكملوا رحلتهم..وتخللها بعض الضحك ولا تخلوا من اللقطات الرومنسيه...

وصلوا واخيرا لندن..واول ما طلعوا من المطار ضربهم الهوا على طول فا كشوا منه...

فيصل عليه جاكيته: برد ولا؟؟

فجر وهي تسكر جاكيتها الفرو الطويل:الا برد..

فيصل فتح شنطته المعلقه على كتفه..وطلع "ايس كاب" واحد عطاه فجر وهو لبس واحد..

فجر طبعا ما عليها عبايه ولبسته وكان ملون كل الالوان: شكلي حلو...؟

فيصل يطالعها وهم يمشون وابهرته..طلعت اصغر ماهي صغيره كأنها طفله خدودها ورديه..وخصل شعرها وجهها ..وشعرها منثور على اكتافها..وطبع بوسه على خدها: تهبلين يا قلبي..

فجر ابتسمت وصارت تطالعه..رجال بكل ما تحمله الكلمه من معنى...بجاكيته الاسود وقميصه الابيض الصوفي..وبنطلونه الاسود وغير الايس كاب اللي محليه اكثر واكثر...

فيصل: شوفي سيارتنا...

كانوا متفقين مع مرشد سياحي...

فجر: يله بسرعه خلنا نروح له والله البرد ذبحني..

فيصل: سعوديين اصليين صح..

فجر تضحك: مالنا غنى عن شمسنا..

وركبوا السياره وراحوا فندقهم ..وحطوا شناطهم وبعدها طلعوا مره ثانيه..تمشوا في كل مكان وتعرفوا على معالم لندن وكانت الاجواء خياليه...انبسطوا وفرحوا والابتسامه ما فارقتهم وهم مع بعض..وقدرت الايام تسعدهم وتجمعهم وتفرحهم <<عساه دووم..

وتعشوا ورجعوا وهم هلكانين وناااااموا على طول..

"بالنسبه لدراسة فجر قررت تاخذ اجازه من المدرسه اسبوعين اللي هي شعر العسل وبعدين ترجع تكمل..ورافضه فكره انها تعيد السنه"

مرت الايام سريعه ما يتخللها الكثير من المواقف لنذكرها..حتى ايام لندن مرت سريعه على العروسين ورجعوا اخيرا لارض الوطن..

&& &&

بعــــــــد اسبــــــــوع

في بيــــــت ابو فواز...

كان الكل جالس...ابو فواز وام فواز ونوف وطلال وفواز وبدور وعيالهم..والوقت المغرب...

رن التليفون..

ام فواز وهي تشرب الشاي: نوف قومي ردي عليه...

نوف: ان شالله...الووو..هلا والله...ايوه هذا بيت ابو فواز ايوه...امي ..لحظه شوي...يمـــــــه وحده تبيك..

ام فواز: مين...؟

نوف: ما قالت مين...

ام فواز: الووو...

.......: الوووو..انتي ام فواز..؟

ام فواز: ايوه معاك..

........: كيفك وشلونك عساك بخير..

ام فواز: الحمدلله تمام...بس مين معاي..

.........: انا ام نواف...

ام فواز: هلا والله وغلا كيفك وشلونك..

ام نواف: الحمد لله تمام...

ام فواز: والله يا وخيتي تراني ما عرفتك زين..

ام نواف: ادري انك ما تعرفيني...

ام فواز: امري يا ام نواف...

ام نواف: والله يا ام فواز...انا ولدي نواف صديق عيالك..

ام فواز: هلا والله ومسهلا...

ام نواف: الله يحييك ويخليك...والله ان وليدي نواف يمدح فيكم وما يذكركم الا بالخير والزين..

ام فواز: تسلمين والله...

ام نواف: وانا يا ام فواز جايه اطلب القرب منكم والنسب..

ام فواز: والله هذي الساعه المباركه..ولنا الشرف والله..

ام نواف: والله انا مذكوره لي بنتكم نوف وادري انها صغيره على الزواج..

ام فواز: وانتي الصادقه يا ام نواف هي صغيره ..

ام نواف: عشان كذا ودي نتفق إنا وياكم على انها تكون خطبه بس لحد ما يكتب الله..والله اني ما قبلت ازوج ولدي وهو صغير ولا اخطب له..الا لاني خايفه انها تروح منا..

ام فواز: والله ما ادري وش اقول لك يا ام نواف..

ام نواف: انتي شوفي راي ابوها ورايها هي...وردي علي..

ام فواز: الله يكتب اللي فيه الخير لأثنينهم..

ام نواف: بس متى اخذ الرد سواء موافقه ولا لأ راح تبقى المعزه في القلب...

ام فواز: ان شالله خير...والرد عندك بعد اسبوع..

ام نواف: اجل ما اطول عليك...تامريني بشي..

ام فواز: سلامتك..مع السلامه...

كل الانظار كانت على ام فواز..

فواز: يمه مين كنتي تكلمين..

ام فواز ابتسمت: هذي وحده تخطب نوف...

نوف مصدومه: انااااااااااا؟؟؟

ام فواز: ايه انتي يا بعد قلبي اكيد يا عمري عجبتيهم..

طلال: طيب يمه نعرفهم.

ام فواز: والله هي تقول ان ولدها صديقكم..

فواز: ومن هـــــو؟؟

ام فواز: قالت اسمه..نواف...

طلال فرح: نوااااف..فواز تذكرته..

فواز سمع اسمه كشر: وش يبي هذا؟؟

نوف بس سمعت الاسم وقف شعر جسمها وسكتت...

طلال: وش فيك عليه؟؟

فواز: ايوه يمه وش قالوا..؟

ام فواز: تقول بتخليها خطبه عشان نوف ما تروح منهم..

فواز: انا ماني موافق...

ابو فواز وقف: الراي الاول والاخير يرجع لنوف...

فواز: بس يبه....

ابو فواز: انا ابوها ما عندي مانع اذا كان الولد رجال وما ينعاب..وبعد رايي يجي راي نوف وبس..طلال وش رايك بالرجال..

طلال: والله هو رجال والنعم فيه وما ينعاب..

ابو فواز: بنسأل عنه اكثر مع اني شايف الولد بس نتأكد والله يكتب فيه الخير"وقرب من عند بنته وقال بحنيه"..وانتي يا نوف فكري على راحتك وقرري باللي انتي مقتنعه فيه وانا ابوك..

نوف ما بعد استوعبت اللي صار: ان شالله..

ام فواز دمعت عيونها: والله كبرتوا يا بناتي وصرتوا حريم ورحتوا وخليتوني...

نوف راحت لعند امها وضمتها: ما راح اخليك..

ام فواز: هاو يمه..البنت ما لها الا بيت زوجها ..وانتي الحين صرتي حرمه وما يعيبك شي..بعدين تراها خطبه بس...

نوف تطالع امها: وانتي وش رايك..

ام فواز: انا مع اللي تقوله بنتي حبيبتي...

فواز طلع معصب لغرفته ولحقته بدور...

بدور وهي تسكر الباب: وش فيك فواز...

فواز جلس على الكنبه:وشلون الحقير تجرى وخطب اختي...

بدور: ليه شايف عليه يا فواز شي ماهو زين..

فواز حط ايده على راسه: بدور خليني بروحي شوي..

بدور تدري انها ما راح يقول لها شي..:على راحتك..

وطلعت وخلته في حيرته..

فواز في نفسه"الحقير الوسخ..اكيد يبي يقهرني في اختي...بس هالزواج ماراح يتم لو على قص رقبتي..وانا لك يا نواف الوسخ.."

&& &&

طلعت نوف غرفتها وهي تفكر..اول شي هي مو مقتنعه بفكرة الزواج..ثاني شي مصدومه من خطبة نواف لها هي بالذات من كل البنات..ثالث شي واللي ذابح مخها من التفكير فيه..هو فواز ورفضه لنواف..

رمت نفسها على السرير ورمت مع جسدها دمعه نزلت من عيونها...

نوف: وينك يا فجر رحتي وخليتيني..الحين انا محتاجه لك تعالي يا اختي محتاجه لك..

رن موبايلها وطالعت الاسم وحصلته اختها اللي كانت تناديها وتستنجد فيها من شوي وكأنها سمعتها...

نوف حاولت تضبط صوتها: الووو

فجر: هلا والله وسهلا بزينة البنات..

نوف ببرود شوي:هلا فيك..

فجر سكتت ما تعودت اختها كذا...

نوف: الووو فجوره وينك..؟

فجر: الوو معاك يا قلبي...نوف فيك شي..

نوف بكت: فجر انا محتاجه لك..

فجر اخترعت: وش فيك يا نوف ..صاير معاك شي..

نوف: تقدرين تجين عندنا...

فجر: اكيد يا قلبي دقايق وانا عندك..

&& &&

فجر استأذنت من فيصل وراحت سيده لبيت اهلها عشان اختها ودلوعتها نوف...

دخلت فجر بيت اهلها مستعجله ومتخربطه ومتوتره..

حصلت امها جالسه وراحت لها بسرعه: يمــــه..

ام فواز لفت: مين فجر....هلا والله وغلا..

فجر سلمت على امها وجلست جنبها: وين نوف؟؟

ام فواز: في غرفتها..؟

فجر: وش فيها نوف؟؟

ام فواز: ما فيها شي...ليش؟؟

فجر: ما ادري متصله علي وتقولي تعالي بسرعه...

ام فواز ابتسمت: يمكن عشانها خايفه من الزواج....

فجر مصدومه: الزواااااااااج؟؟

ام فواز: ايه اليوم خطبوها ناس..

فجر صارت تردد كلام امها: اليوم خطبوها ناس؟؟

ام فواز: ايه..نواف صديق طلال.

فجر: اها..عرفته..وهي وش قالت..مو كأنها صغيره..

ام فواز: الله واكبر عاد تراها اصغر منك بسنه..

فجر: انا اقوى منها..يمه نوف احس انها صغيره وضعيفه وغير كذا حساسه ودلوعه..

ام فواز:بتتغير مع الوقت وبعدين هم قالوا خطبه بس والزواج مؤجل واحتمال كم سنه..

فجر: لهدرجه خايفين تروح منهم..

ام فواز: يحق لهم..نوف زينة البنات..وين راح يلاقون مثلها بعد قلبي والله...

فجر: اوكي يمه بروح اشوف وش عندها..

ام فواز: اقنعيها يمه..

فجر: ما راح اضغط عليها..بس بوضح لها..

وراحت لغرفة نوف ودخلت عندها...نوف شافت اختها وعلى طول راحت لحضنها...

فجر تضحك: طيب بشويش بطيح..

نوف تضربها: لا تروحين وتخليني...

فجر بعدتها وغمزت لها: وهذ وانتي بعد بتروحين.

نوف: امي قالت لك..

فجر: ايه توها قايله لي...

نوف: وش رايك انتي؟؟

فجر: الراي رايك هذا اول شي"وجلست على السرير وجلست معها نوف"..ثاني شي استخيري..ثالث شي تذكري انها خطبه والزواج الله اعلم متى راح يكون..يعني فكري في كل شي.

نوف: بس انا ما افكر بالزواج..

فجر: يعني انا كنت افكر بالزواج...اصلا تزوجت وانا ما بعد استوعبت..

نوف تضحك: صدق انك مخفه...

فجر: عن الطنازه...

نوف: طيب وش اللي خلى نواف يخطبني انا بالذات...

فجر تقرص خدها: اكيد يا قلبي اللي يشوفك بيدوخ عندك..وانتي اكيد دوختيه وهبلتي فيه لدرجه انه خايف انك تطرين منه...

نوف: طيب في شي ثاني...

فجر تكتفت: وش بعد!!

نوف: فواز..يوم عرف بالسالفه وخصوصا لما درى انه نواف اعترض..

فجر عقدت حواجبها: فواز اعترض على نواف ليش؟؟

نوف: وهذا اللي محيرني وانا بصراحه اذا فواز مو موافق انا ماراح اوافق..

فجر: ابوي وش قال..؟

نوف: قال الراي الاول والاخير لي...

فجر: تتوقعين في سبب مقنع يخلي فواز يرفض..

نوف: اتوقع عنده اسبابه...

فجر: بس لازم نعرفها...

نوف: وش رايك نسأله...

فجر: مصدقه يقول لك الا اذا كان شي ما ينسكت عنه..

نوف: اجل وش نسوي...

فجر: خبر اليوم بفلوس بكره بلاش....

نوف برضا: على قولتك....

فجر: احلى يا العروسه..وتصرين مثلي حرمه..

نوف: هههه والله ما تخيل شكلي حامل ولا شايله بزر...

فجر: تصدقين ما تخيلت شكلي حامل...

نوف: اقول وش تتوقعين ردة فعل البنات...

فجر: عبير بتنجلط...العنود في العنايه المركزه..ريم في الانعاش..طبعا كل هذا عشانهم ما عرفوا السالفه من قبل مثل يوم زواجي...

نوف: والله انهم نذلات..يوم اخطبك فيصل عارفين ولا قالوا شي...

فجر: ولا ويضحكون ويتطنزون علي بعد...

&& &&

فـــــــي بيت ابو مشـــــاري

ام مشاري: نوف انخطبت..

ريم واكبـــــر علامة تعجب تأشر فوق راسها: نعم وش قلتي؟؟؟

ام مشاري: نوف انخطبت وامها توها متصله علي تقول لي...

ريم تبي تستوعب:نوف....انخطبت.......كيف؟

ام مشاري: ريم روحي استوعبي هناك الله يعافيك...

ريم وهي تمشي وتحاكي نفسها وصقعت في محمد اخو سليمان كان طالع من دورة المياه"الله يكرمكم"

ريم: نوف تنخطب كيف......آآآآآآآآآآآآآآآآه..وجع وجع كل هذا عمى..

محمد: اخ..يعني ما تشوفين قدامك... ولا تحاكي نفسها المجنونه..

ريم: محمد تراني محترمتك لان شخص عزيز علي تصير انت اخوه...

محمد: يا خال ابوي حك ظهري..وش له المشاوير..قول مها وخلاص...

ريم: مو شرط مها...

محمد: اجل مين امي...

ريم: حضرتك تستخف دمك...

محمد: لا استظرف...ههههههه..

ريم: وخر واللي يعافيك ترى اللي فيني مكفيني..

محمد يبي يعرف وش فيها: ليش وش فيك..

ريم انطلقت عليه: تخيل يا محمد نوف انخطبت وبدون ما ندري ولا نحس ولا من مين من نواف..صديق اخوك..تخيل كل هذا وانا اخر من يعلم...

محمد لما عرف السالفه: صدق بنات عقولهم صغيره..على بالي عندك سالفه....

ريم استوعبت انها تحاكي محمد: الله واكبر عاد يا ابو العقل...

محمد: روحي روحي بس..

ريم وصلت معها من اسلوب محمد: محمد عدل اسلوبك احسن لك..

محمد يبي يرفع ضغطها: انتي بنت ولا شي ثاني..؟

ريم انفجرت: شي ثاني هاه....هين اوريك...

وصارت تلحق محمد...ومحمد ينحاش منها ويهبل ويلعب فيها...لحد ما دخلوا مجلس مشعل..وكان فيه مشعل وفهد..

ريم: تعال هنا عشان اعلمك الادب...

مشعل وقف وراح لعندها ومسكها: خير خير ان شالله تلاحقين العيال...

ريم: خلني اربيه اللي ما يستحي على وجهه..

مشعل: اقول روحي هناك وحطي حرتك في الجدران مو في الولد...

ريم بتهديد: الحين تعبت يا محميدوه بس المره الثانيه اللي بياخذ حقي منك واحد ثاني عشان تعرف ان الله حق<<تقصد سليمان...

محمد يطلع لسانه: اعلى ما في خيلك اركبيه...

ريم صرخت: اوووووووووووه..هين اوريك والله ما اسكت لك وطلعت وهي معصبه ورجلها تخبط في الارض..وقابلت مشاري...

مشاري: ارحمي الارض اللي تمشين عليها..

ريم معصبه وماشيه: ما عليك مني..

مشاري: والله بنات اخر زمن...في زمن محد يحترم احد...

ريم طالعته ومشت وخلته وراحت عند رغد.. وفتحت الباب بقوه وصارت تتكلم بصوت عالي اشبه بالصراخ..رغد نقزت من مكانها من الخرعه..

ريم: شفتي وش صار نوف انخطبت من نواف ووصلت معاي..ويجي هذا البزر محمدوه ويكملها علي ويقول عني مجنونه..وخلصنا من هالاثنين يجي مشاريوه ويكملها بعد..ما ادري وش اوس بعمري اذبح نفسي وارتاح ولا اطب من الشباك وافتك ولا وش اسوي علميني وش اسووي...

رغد انسدحت من الضحك: هههههههههه صادرق محمد يوم قال عنك مجنونه..

ريم: رغــــــــــــــــــــــد والله مالي خلقك...

رغد تضحك: وش اسوي فيك...الا صدق نوف انخطبت...

ريم مقهوره: ايه...

رغد: متى؟؟

ريم: اليوم..

رغد: طيب ليش منقهره...

ريم: لاني اخر من يعلم...

رغد كاتمه ضحكتها عشان ما تعصب: طيب هذاك عرفتي..

ريم: انا بروح اشوف عنيد احسن لي...

وراحت ريم ومسكت التليفون واتصلت على العنود...

ماجد: الوووو..

ريم وهي مالها خلق: وين العنود...

ماجد مستقصد: وعليكم السلام...الحمد له بخير وانتي؟؟

ريم: ماجد والله مالي خلقك وين العنود...

ماجد: لهدرجه الوضع متأزم عندك...

ريم: اكثر من كذا والله..وين العنود بس...

ماجد رحمها: طيب ثواني وهي عندك...

بعد ثواني...

وليد: الووو.

ريم: مين ماجد ولا وليد....

وليد: انتي مين؟؟

ريم: اكيد وجه النحس وليد وش تبي متليقف...

وليد: كنت احسبك القمر وطلعلي الشمس...

ريم: وليد ترى محد فاضي لك...

وليد: اصلا انا اللي ما ابيك...

جات العنود وخذت السماعه: الووو

ريم: هلا والله العنود..

العنود: وش عندك...يقول ماجد موصله معاك..

ريم: ما دريتي عن اخر خبر..

العنود: لا والله ما سمعت شي جديد...

ريم: نوف خطبها نواف...

العنود ما استوعبت: وش قلتي؟؟؟

ريم: نوف خطبها نواااااااااف..

العنود: لالا تمزحين...

ريم: والله من شوي متصله عمتي على امي تقول لها...

العنود انقهرت: واحنا اخر من يعلم...

ريم: شفتي عاد...

يتبع ,,,

👇👇👇

تعديل المقال