بداية

رواية أحلى صدفه في حياتي -25

رواية أحلى صدفه في حياتي - غرام

رواية أحلى صدفه في حياتي -25

العنود: هذا شي ما ينسكت عنه...<<ما ادري وش بتسوي
ريم: وانتي الصادقه...
العنود: بس وش نسوي...
ريم: في ايش...
العهنود: في خطبة نوف...
ريم: ناكل شوية هوا ونسكت...
العنود: قهر والله قهر ما انبسطنا مثل خطبة فجير المراهقه...
ريم: حتى ما حسينا ان نواف يحب نوف ولا أي شي من هذا القبيل..
العنود: صادقه وبعدين نواف وصديقه ما جلسوا معنا كثير عشان يمديه يتعلق فيها...
ريم: وهذا اللي محيرني...بس سمعت شي...
العنود: وشو؟؟
ريم: ان فواز مو راضي عليه...
العنود: ليش؟؟
ريم: ما ادري حتى امه ما تعرف...
العنود وترفع وحاجبها: عاد مافي شي يخفا علينا...
ريم: ولا يهمك عارفينه عارفينه وقبل الكل طبعا...
العنود: وش رايك ما دامنا ما انبسطنا يوم انخطبت خلينا نروح نطفر عيشتها ونفلها...
ريم: يله معاك...
العنود: اوكيه الوعد هناك..باي....
&& &&
محمد: والله اختك منتهيه...
مشعل: من زمان وهي منتهيه بس ما لقينا لها قطع غيار هههههه
فهد: هههههه والله لو تدري عنك فجرت فيك...
محمد: ما عليك منها...اقول مشعل من زمان عن لين...
مشعل : اسكت لا تجي الحين..تراها كذا تحس من الله...
والا فعلا بدخلة لين..
لين: هاااااااي...اشتقت لي شعول..
مشعل حط ايده على راسه: قايل لك قايل لك...
فهد: لو انك جايب طاري المليون احسن من هالطاري...
جات لين وجلست جنب مشعل: ما قلت لي اشتقت لي...
مشعل وهو يبعد عنها شوي: الا اشتقت لك..
لين تقرب جنبه: وش بعد...
محمد جاء وخرها وجلس بينهم: وبعد انك توخرين عن الولد شوي...
لين عصبت: وش عليك مني...
محمد بصوت عالي: ما عندنا بنات يرفعون اصواتهم على الرجاجيل..صدق بنات ما تستحي...
لين: مشعل شوفه...
مشعل سكت وحاط ايده على خده ..لان المشاكل اللي بينهم لا نهاية لها...
فهد: لين...خلاص اجلسي معانا وانتي ساكته ومؤدبه...
لين: شكل محد يفهمني الا انت..
فهد خاف تلزق فيه: ايه ايه بس من بعيد لبعيد...
لين خنقتها العبره: حتى انت...
مشعل: واللي يرحم والديك لا تبكين..
لين: انت ما تحبني..واااااااااااااااااع..
العيال حطوا ايديهم على اذانيهم من صراخها لانها مستحيل توقف لو يمر يوم كامل وهي تبكي عادي...
مشعل يصارخ عشان تسمعه: لين اسمعيني...اسكتي شوي..
لين: واااااااااع..
محمد حط ايده على فمها: اسكتي فقعتي اذني..وجع كأنها جرس انذار..
فهد: حلوه منك..
مشعل: اسمعيني شوي يا قلبي يا حبيبتي...
لين هدت شوي بس ما زالت تتعبر..
مشعل: انتي كبيره مو؟؟
لين هزت راسها بالايجاب..
مشعل: حلوو...الكبيره ما تبكي صح...عشان كذا اجلسي هناك وتفرجي علينا وشجعيني عشان افوز لعيونك انتي بس...
لين: اوكيه..
وراحت وجلست بالمكان اللي اشر عليه مشعل...
محمد: شااااااااطره البزر...
مشعل نغز محمد: تكفى اسكت عنها...
محمد: خلني اهبل فيها شوي...
فهد: فكنا واللي يرحم والديك...
&& &&
عبير: نوف بتتزوج قبلي..
العنود: الشكوى لله عاد..
عبير: وهذا وانا اتميلح عند الحريم ما انخطبت..وهالدلوعه انخطبت..
العنود: عاد قولي ما شالله لا تصكينها بعين...
عبير: امزح امزح اصلا عادي تتزوج قبلي بس شلون ما سمعنا بالخبر او حسينا بشي...
العنود: وهذا اللي فاقع مرارتي..عشان كذا بروح افقع مرارة نويف...
عبير: اجل اليوم بنضحك عليها ضحك..
العنود: اجل يله...
عبير: يله..
واجتمعوا في بيت عمتهم ام فواز...وفي غرفة نوف بالضبط..
ريم: مبروك يا الشينه...
نوف: الله يبارك فيك يا الزينه...
رغد: مبروك يا قلبي...
نوف استوعبت: بس انا ما وفقت..
عبير: ولو مقدما...
العنود: نوف اجل بتتزوجين حركاااات هاه...
نوف استحت: قلت لكم ما بعد صار شي...
ريم: بتصرين مثل فجر هاه وحركات نص كم مثل اختك..
العنود: وحموله وحاله وعزايم وزواج ومسؤليه...
نوف خافت شوي: قلت لكم ما بعد قررت...
عبير: الله يعينك يا نويف تجهيز وحوسه...
رغد: حرام عليكم عقدتوها..
نوف: اصلا ما اسمع لكم وما تأثرون فيني...
العنود: تخيلي رجال غريب ما تعرفينه يجي يشوفك ويتملك عليك..
نوف خافت جد: لالا خلاص ماني موافقه..
دخلت فجر: وش تسون بأختي..
رغد: الحقي على اختك تعقدت من الزواج وطاحت في كبد امك..
فجر: عنيد رويم اعقلوا عنها مسكينه اصلا هي خلقه ما ودها توافق.
ريم: ليش؟؟؟
فجر: عشان فواز...
العنود: وليش فواز مو موافق..
فجر: علمي علمك..
&& &&
فواز مسك موبايله ودق الرقم...
فواز: الووووو
.......: نعم..
فواز: انت نواف...
نواف: ايوه معاك نواف.....مين معاي

@@

الجـــــــــــــــــــــزء التــــاســع والثـــلاثــــون
""الفصـــــــل الثـــــــــــانيـــــــــ""
فواز مسك موبايله ودق الر قم...
فواز: الووو
.....: نعــــم..
فواز: انت نواف..
نواف: ايوه معاك نواف....مين معاي..
فواز يتطنز: معاك فواز اخو خطيبتك...
نواف ارتبك: فواز هلا والله وغلا..
فواز: الله لا يهلي فيك يا اللي ما تسحتي على وجهك وتخطب بنات الناس...
نواف: فواز اسمعني بالاول...
فواز: اسمع لواحد حقير ونذل يخطب اختي عشان يقهرني بس..
نواف: فواز انت فاهم الموضوع غلط..
فواز: يله صححي لي اشوف....
نواف: ادري اني غلطان لما كنا بالشاليه وانا اسف وحقك علي..وهذا انا جاي اصلح غلطتي واخطب اختك..ومو بس عشانك عصبت علي او عشاني خايف منك لا..لاني بجد ابي القرب منكم وانا رجال شاريكم..
فواز وده يقتنع:مو علي هالحركات...
نواف: فواز لايعمي عيونك الغضب...وانا مافي نيتي أي شي عليكم ولو كنت العب صدقني ما كنت خطبت اختك او اهتميت بالموضوع من اساسه..
فواز: الخلاصه..
نواف: انا ابي لما اجي اخطب اختك تكون راضي علي ولا في قلبك أي شي علي...
فواز: طيب واذا اكتشفت انك تلعب بذيلك...
نواف: سو اللي تبي فيني حلال عليك...فواز صدقني انا ابي بس القرب وما ابي أي شي ثاني وهذا النسب يشرفني وارفع به راسي...
فواز: الايام تثبت ان شالله...
نواف: اكيد راح تثبت لك الايام عكس اللي في بالك...هاه صافي يا لبن..
فواز عشان خاطر اخته..ولمس الصدق في كلامه: قشطه يا عسل..
نوف: اخبارك يا لنسيب..
فواز: ترى ما بعد ردينا عليكم..
نواف: بنشب لكم لما توافقون..
فوازضحك وفي باله الحق الكذاب الي باب الدار:ههههههههههه


&& &&
من بكره في مدرسة العيال...
نواف جاي للعيال: هلا بالشباب..
الكل: هلا فيك..
نواف: ابشركم خطبت...
تركي: بجد ومن هي اللي داعيه عليها امها هذي..
نواف: تركي احترم زوجتي ما ارضى عليها...
سليمان: نوافوه من هي..؟
نواف: اخت طلال وفواز...
تركي: تقصد نوف...
نواف: ايه..وبعدين عيب تجيب طاري حرمتي قدامي...
سليمان: لا يا الواثق اللي بتوافق عليك...وبعدين شلون تفكر تتزوج وانت ما اشتغلت...
نواف: انا بس بأخطب واول ما تخرج من الثانويه بأتوظف وظيفه مضمونه...
سعود: نواف مخطط على كل شي وجاهز..
تركي: وانت يا القوطي داري بالموضوع..
سعود: ايوه داري....
سليمان: هههه معترف انه قوطي..
تركي: خيركم من عرف قدر نفسه..
سليمان: وقدر نفسك قوطي بيبسي ههههههه حلوه..
سعود: تنطنزوا علي يا الشيون..
سليمان: احلى يا العريس...
تركي: مع اني متاكد اذا نوف بتشوف وجهك بتهج مع الباب...
سليمان: هذا اذا ما طبت من فوق الجدار من الخرعه...
نواف: انا بروح واترك لكم المكان..
تركي: هههههههه آآآه يا بطني واالله بطني...
سعود: خذني معك...
سليمان: وين بتروحون ههههه..
نواف: مكان ما اشوفكم فيه..
تركي: روح يا الدرج مع قوطي البيبسي اللي معاك ههههه.
سليمان: هههههههه خلاص تروك والله بطني...
تركي ياخذ نفس: آآآآآه يا قلبي والله تعبت وانا اضحك..
سليمان: يا حليله خطب واحنا ما حركنا ساكن..
تركي: انت اصبر شوي لما تهدى الاوضاع بعدين نخطب انا وياك في ليله وحده...
سليمان: شكل هالليله ليلة نحس...
تركي: ليش؟؟
سليمان: لانك معي هههههه.
تركي: يعني مسوي قلبت علي لا افرشك فيذا..
سليمان: لا خلاص باسكت...
تركي: ما بقى الا الاولاد يتمسخرون علي...
سليمان: ولد في عينك...
تركي: امش امش ترى علينا ريضيات وكبدي لايعه منه ومن ريحته...
سليمان: ليش وش ريحته..
تركي: يا اخي ريحة شرّابه الله يقرفه..(والشرّاب هو الجورب)
سليمان: هههههه الله يلوع كبدك يا شيخ..
تركي: والله ما عاد اشوف معادلات اشوف شرابات...
سليمان: ههههه امش خلنا نهبل فيه..
تركي: والله لفشله قدام الطلاب...
سليمان: يله عليك به...
&& &&
نوف كل يوم تستخير وتدعي ربها انه يقرب لها اللي فيه الخير ويبعد عنها اللي فيه شر واذى عنها..لحد ما قررت واخيرا في ذاتها بس باقي تبلغ الكل عن القرار اللي اتخذته...اول شي راحت لعند فواز...
وضربت باب غرفته..
فواز: مين؟؟
نوف من ورى الباب: فواز ممكن شوي..
فواز: اوكيه لحظه...
وراح فتح الباب وطلع لها: هلا فيه شي..
نوف: اممم ودي اتكلم معاك في موضوع...
فواز: اوكيه"وسكر الباب وراح معاها لغرفتها" قولي يا بعد قلبي وش عندك...
نوف: آآ...كنت ابي رايك في موضوع خطبتي لنواف..
فواز: نوف انا ما راح اخبي عليك..في البدايه كنت رافض لاني كنت اظن نواف راعي حركات اوكي...بس اكتشفت بعدين انه رجال والنعم فيه..وصدقيني ما راح تلاقين احسن منه..
نوف ابتسمت ورتاحت ان قرارها بيمشي: اوكي ومشكور وما تقصر..
فواز: من عيوني الثنتين كم عندي لانا من نوافه..وحده بس اطالع الله ثم اطالعها..
نوف: تسلم والله..
وطلع فواز وهي نزلت تبلغ امها بالقرار اللي قررته...
نوف جلست جنب امها: يمه..
ام فواز: سمي...
نوف: يمه انا قررت بخصوص نواف..
ام فواز: وش قرارك يا قلبي..
نوف: يمه انا موافقه وترى بس خطبه على الاقل سنه كامله...
ام فواز: الله يبشرك بالخير يا بنيتي ويفرحني فيك واخوانك واشوف عيالكم قولي امين...
نوف: امين...
ام فواز: الله يرضى عليك يا بنيتي والله اني مرتاحه لهم وقلبي مطمن من ناحيتهم..
نوف: يمه ترى اهم شي عندي رضاك...
ام فواز: انا راضيه باللي ترضينه يا قلبي....
نوف ابتسمت: الله يخليك لنا يمه ولا يحرمنا من حنانك وعطفك...
ام فواز: ولا يحرمني منكم...


&& &&
رغد: عرفتي يا ريم ليش كان فواز رافض....
ريم ببرود: ايوه...
رغد: من قال لك..
ريم :مصادري الخاصه..
رغد: لالا بجد ريم وش عرفك...
ريم متردده: سليمان قالي...
رغد طيرت عيونها: سليمـــــــــــان؟؟؟؟؟؟
ريم خافت: يعني هو ما قالي قالي ارسل لي مسج...
رغد: وانتي تراسلينه...
ريم: ليه بايعه نفسي..بس ارسلت له عشان اعرف السالفه..
رغد: وش طلع..؟
ريم: لان قد صار لنواف موقف مع فواز بالمره يفشل ونواف طاح وجهه وفواز بغى يذبحه بس سكت له...عشان كذا نواف ما طول بدبي ورجع للرياض بسبة فواز ..عرفتي الحين...
رغد: اهاااا..طيب قلتي للعنود..
ريم: تدري قبلك..
رغد: وليش ما قلتي لي اول..
ريم: انا اول شي اقول للي يتماشون مع فطرتي وانتي غير فطرتي شوي عرفتي..
رغد: اوريك يا النذله..
ريم: سوي الللي تبين ما خفت منك..
رغد: هالبنت بتذبحني كل الناس عقلت الا هي تنهبل زياده..
&& &&
يـــــــــوم الخطبــــــــه...
نوف كانت نفسيتها دمار شامل..طول الوقت ترتجف وحرارتها مرتفعه وجهها اصفر..ولا داومت .وغير الالام البطن اللي تحس فيها وطبعا هذا بفضل العنود اللي الليله اللي قبلها مسويه لها لليلة رعب بس تخوف فيها..
دخلت عليها ام فواز وشافتها منسدحه ومتغطيه بالبطانيه..راحت وفتحت البطانيه واخترعت من شكلها...
ام فواز: يمه نوف وش فيك...
نوف تتكلم وشفايفها ترتجف: يمـــــه..خااااااايفه..
ام فواز ابتسمت تبي تهديها: يمه نوف شي طبيعي الخوف بس الشي اذا زاد عن حده انقلب ضده...هاه يمه وانتي وحده كبيره وفاهمه وماله ادعي كل هالخوف..ولا تنسين تراها بس خطبه يعني مو شي...
نوف راحت لحضن امها يهديها ويطمنها: يمه انا ما اقدر ابعد عنك..
ام فواز تمسح على راس نوف: حتى انا يا ماما..بس هذا نصيبك..واذا مو الحين بيجيك يوم وتروحين بيت زوجك يعني فيك فيك..وشوفي ما شالله فجر اختك وزوجها فيصل بسم الله عليهم كنهم طيور الكناري..وعسى زوجك مثله واحسن بعد..
نوف ارتاحت نسبيا ورجع لون وجهها ووردت خدودها: الله يديمك فوق راسي يا اغلى مافي الكون...
ام فواز ابتسمت من بين دموعها: الله يوفقكم كلكم..
&& &&
جاء العصر واجتمعوا البنات عندها..رغد اختارت لنوف لبس..شجون قررت تحط لها الميك اب..وفجر تشجعها وترفع معنوياتها بالكلام...والثلاثي طايحين ضحك..
لبست نوف تنوره ميدي(نص الساق) سوداء حرير وفيها شريطه ستان من عند الخصر..وبلوزه بيضا كيوت..وحطت الميك اب ناعم مررره..وسوت لها تسريحه مررره نعومه تناسب نعومة شعرها نعومتها هي ..واخيرا لبست سندل اسود مره انيق...
العنود تصفر: الولد راح ملح...
ريم: شكله بيخليي الزواج بكره...
نوف تلف على نفسها: وش رايكم..
فجر: اكيد بيفتح فمه..
ريم: ليه بعض الناس فتحوا فمهم<<تقصد فيصل..
فجر: فديته صوصو..يوم شافني خق علي..
شجون: احم احم تراني هنا وابعلم اخوي عليك..
فجر: عليمه..حبيبي صوصو ما يزعل علي...
رغد: اقول اقري على نفسك ترى في ناس مشفح..
عبير: شكلك تقصدين نفسك صح...
العنود: اكيد تقصد نفسها ولا شافت نجوم العصر...
ريم: انا اللي اعرفه نجوم الظهر..
العنود: يا بنت الحلال كلها واحد...وبعدين نتاسب الحين احنا العصر..
عبير: عاد العنود وتحريف الامثال شي...

&& &&
دخلت ام فواز: هاه يمه خلصتي..
نوف وقفت وبدت نبضات قلبها تزيد: ايوه خلصت..وش رايك..
ام فواز ابتسمت: قمر يا قلبي قمر..يله انزلي عند الحريم..
نوف: مين جاي من اهله..
ام فواز: امه واخته الكبيره وخالته..
نوف: يله ..وانا وراك..
البنات يحمسونهها: وحده وحده وحده..نوف احلى وحده...
نوف ابتسمت لهم ونزلت ورى امها...دخلت عندهم وهي تحس ان الارض مو ثابته ما درت ان رجليها هي اللي مو ثابته...
ام نواف واخته ندى وخالته كلهم افتحوا افاميهم...
ام نواف تبلع ريقها: بسم الله عليك الرحمن الرحيم...تعالي يمه جنبي...
نوف راحت وجلست جنب امه...
ام نواف: والله بياخذ ولدي قمر..
خالته: ايوه بسم الله عليها قمر...
اخته تناظرها من فوق لتحت وباحتقار وما تكلمت..
نوف ابلعت ريقها: تسلمين خالتي...
وقعدت عندهم حوالي عشر دقايق بعدين استاذنت وطعت لعند البنات...
فجر: بشري..
نوف حاطه ايدها عبى قلبها: اووووه..يمه بغى يغمى علي...
رغد: وش صار..
نوف ابتسمت: فاتكم قعدت امه وخالته يمدحون فيني ساعه ويسمون علي طول الوقت..
ريم: والله ما ينلامون..
العنود: بس عاد لا يكبر راسك..تراك عاديه..
نوف: موتي حره بس..
عبير: واخته وش قالت...؟
نوف عقدت حواجبها: شكلي ما عجبت اخته طول الوقت تطالعني باحتقار وكأني عبده عندها...اصلا شكلها مغروره..
فجر: ما عليك منها اكيد غايره منك...
رغد: لا تهمك..تلاقينها قرويه شينه وعلى قولتهم سحيله ام الخلاقين...
الكل قعد يضحك..
العنود: تبين فزعه...ترانا حاضرين...
نوف: لاوالله تسلمون ما علي منها..بنات تتوقعون نواف بيقول ابي اشوفها....
فجر: اكيد يتزوج وحده بس لمحها..
&& &&
مجلــــس الرجــــــــــــــال..

طلال: ما تبي تشوف البنت؟
نواف مستحي: والله ودي اذا ما كان في مانع..
طلال: لافيه دواس ههه..
نواف: ههه لله يرجك يا لنسيب..
طلال: لا تصير واثق يمكن انا ما اوافق..
نواف: ليش خاطبك انت ولا اختك..
طلال: لا انا واختي شراكه هههه..
ابو فواز: بدال ما تقعد تضحك لي يا طلال روح قول لاختك ان الرجال يبي يشوفها..
طلال تفشل: ابشر يبه...زين كذا أكلنا تهزيئه من تحت راسك..
نواف: وانا قايل لك خفف دمك واقعد اضحك..
طلال: ترا اهون وما اخليك تاخذ اختي..
نواف: اقول روح قبل لا تجيك تهزيئه من الوالد<<الاخ مستعجل
طلال: وانت صادق...
&& &&
العنود: تكفون ابي اشوفها ام خشه مايله<<تقصد اخت نواف..
ريم: وش دراك ان فمها مايل..
العنود: ههههه كذا احس..
نوف: انزلي ومن الباب اللي ورى اطلعي ..وشوفيها من باب المطبخ..
العنود: وانتي صادقه..
ونزلت الدرج ودخلت المطبخ من الباب اللي ورى...وفتحت باب المطبخ الثاني""الداخلي"" اللي يطل على المكان اللي جالسين فيه لحريم...فتحت نصه وقعدت تطل...
دخل طلال من باب المطبخ الخارجي..وشاف وحده ما عليها حجاب..
طلال"من هذي...فجر لالا معقوله فجر سمنت بالسرعه هذي..ولا شكل فيصل يبلع فيها"
طلال: وش تسوين هنا..
العنود من الخرعه سكرت الباب على ايدها: آآآآآآآآآآآآآآآآآآآآآ
وفتحته مره ثانيه وطلعت ايدها وسكرته..ومسكت اصبعها اللي حمر وزرق على طول....
طلال: العنود!!!
العنود رفعت راسها:طلال!!
طلال ما يدري وش يسوي يتركها ويخليها ولا يسلم عليها ولا يقعد يطالعها..
العنود تناظره بشوق ولهفه وتحاول تتحكم في مشاعرها لا تجدد بشوفته..وكانت ضاغطه على اصبعها بقوه لحد ما حست ان الدم وقف وما عاد صار يمشي لاصبعها المورم...
ونزلت عيونها على اصابعها وقعدت تطالعهم عشان ما تطالع طلال...وطبعا متوهقه ما تقدر تطلع لان الحريم فيه ولا يمديها تروح الباب الخارجي طلال وافق عنده واللي موترها زياده انها بدون حجاب..
طلال لاحظ انها تطالع ايدها وقرب لها بالمره..
طلال بهدوء يذوب: يألمك.."ويطالع ايدها"
العنود رفعت عينها في عين طلال"لا ما ابي اتعلق فيك..انا ابي انساك..انساك":..لا .....يعني....
طلا ل مد ايده بيمسكها بس هون: روحي حطي عليها ثلج ولا مويه بارده...
العنود: طيب ان شالله...
طلال: يله روحي الحين...
العنود: اطلع اول..لاحظ اني بدون حجاب..
طلال تفشل ونزل عيونه: اوكي انا طالع""وراح""
العنود تنهدت من قلب: اوووووووووه...
طلال سمعها ولف عليها: لهدرجه ما انتي قاده تتحمليني دقايق...
العنود سكتت ما تدري وش تقول لها انربط لسانها..تقوله انا بدونك لحظه اضيع ..اتوه.. تقوله تراك من لما تركتني وانا ماني بعايشه لاني ميته..لانك هواي اللي اتنفسه..انت الحياة اللي اقدر اعيشها....وانت تركتني بدون حياة ولا امل..وفوق كل هذا جراح..ما ادري الزمن يقدر يداويها ولا بتبقى جراح مفتوحه..
طلال طلع وسكر الباب..وتسكرت الدنيا بوجه العنود كل شي ولا يزعل عليها طلال..معليش يتركون بعض بالطيب بس ما يفهمها غلط....
***
ايه احبك...
من حكى لك انك في حياتي شخص عادي...
لا تصدق يا حياتي من حكى لك اني لو ساعه نسيتك في غيابي لا تصدق يا عذابي..
لو زعلنا من بعضنا وكنت قاسي بعتابي ومن عنادي قلت انك شخص عادي...قول لي كذاب وما تقوى بعادي...
****
جلست العنود بكل حيلها على الكرسي اللي قدامها ودمعتها على هدبها...وفجـــــــــأه انفتح الباب..
طلال مبتسم: الى الحين جالسه.."وكتف ايدينه" وما سويتي اللي قاله لك طلول...
العنود ابتسمت غصب عنها: انقللللللللللللللللللللللللللللع يا تافه..
طلال يضحك: يا حلوك وانتي معصبه..العنود اسمعي نادي نوف..وتراني ادري انك تعزيني وانا بعد اعزك مثل رغد وريم..
العنود فرحت حتى لو ما قال لها اني ما زلت احبك وقال لها اعزك هذي لحالها تكفي: من عيوني...
طلال: تسلم عيونك.."وطلع"
بعد خمس دقايق طلعت العنود على اساس ان طلال امداه راح وجلس عند الرجال...ومرت من ورى الملحق بسرعه وطلع في وجهها طــــــلال..
طلال: بوووووووووه..
العنود اخترعت وبغت تطيح على ورى بس مسك ايدها طلال...
العنود استحت لان اليوم طلال مستقعد لها..
طلال: وشوله هالربشه كلها...
العنود: خفت احد يطلع علي من الرجال...
طلال: وليش انا مو رجال...
العنود تضحك: ليه انت عاد نفسك واحد منهم"وسحبت ايدها منه"
طلال: هين اوريك يا عنيد...بهبل فيك واطلع ريحتك..
العنود: اصلا ريحتي من زمان طالعه...
طلال: ووووع الله يقرفك يا الوسخه..يله بس روحي نادي نوف...
العنود: اوكي..
وراحت لعند البنات..
العنود فتحت الباب بقوه: هااااااااااااي..
ريم: هاي تاخذك بشويش على الباب..
العنود: يله يا نويف رجلك يبيك تحت..
نوف خافت: وش يبي...
العنود: يبي حلاوه..يبي يشوفك يا الحولا..
نوف: بس انا...انا ما ابي...
فجر: على كيفك هو...يله يا قلبي انزلي ترى كلها خمس دقايق وتطلعين...
رغد: يله روحي..
عبير جات من وراها: واااااااااع..
نوف نقزت من مكانها: يمـــــــــــــــه...
ريم والعنود وريم: ههههههههههههههههههههههه..
نوف: والله سخيفات..
شجون: حرام عليك ترى اللي فيها مكفيها..
عبير: هذا في علم النفس يسمونه تخفيف الترويعه..
رغد: والله من الاسم بس...يله نوافه خلصينا...
العنود: انزلي احسن لك بالطيب لا ارميك عنده بالقوه...
نوف: خلاص بأنزل...
نزلت تحت ومعها فجر...والبنات راحوا نفس الشباك يوم فجر...
دخلت نوف وجنبها طلال وجلسها جنب نواف بس بينهم مسافه وجلس معاهم..
نوف منزله عيونها وشعرها نازل على وجهها..
نواف مطير عيونه"معقوله في بنات بالحلا هذا"<<ما قد شاف خير...
طلال: نوافه ارفعي راسك خلاص وصل الارض..
نوف لفت عليه وعطته نظره تسكته ورفعت راسها شوي..
نواف: احم احم كيفك نوف..
نوف الكلام بصعوبه يطلع: الحمدلله...بخير..
نواف: الحمدلله...طيب انتي بأي سنه...
طلال: يعني تسوي نفسك ما تعرف...
نواف: يا اخي وش عليك مني..بس اسكت انت...
طلال: طيب بسكت..
نوف: انا في......"شافت البنات يأشرون لها من فتحة الشباك وابتسمت لهم"
طلال يطالعها: انهبلتي يا نوف..ولا استخفيتي...
نوف تفشلت ووجها قلب احمر: عن اذنكم...
طلال: الولد ما بعد شافك...
نوف ما ردت عليه وطلعت بسرعه..
نواف: حرام عليك احرجت البنت...
طلال: ما ادري عنها تطالع الشباك وتضحك"وتذكر البنات"...لحظه لحظه..
قام وفتح الشباك شاف العنود وريم حاشرين روسهم في الشباك ولما شافوه ابتسموا..
طلال: وانتوا ما تتوبون..
العنود وريم: لا..
طلال هين اوريكم"ودف روسهم عل ورى لحد ما طاحوا على الارض"...احسن تستاهلون..
وسكر الشباك وهو يضحك على خبالهم..
&& &&
العنود: أي يا ظهري اوريك يا طلالوه النذل..
ريم: حسبي الله عليك من ولد...
عبير: هههههه فديته بس مزحه ثقيل...
رغد فاقعه ضحك هي وشجون عليهم...
رغد: احسن تستاهلون يا الملاقيف..
ريم: اسكتي انتي بس..
ووقفت وظهرها متكسر والعنود معها...ودخلوا لعند نوف..
نوف تضحك: حسبي الهع عليكم تفشلت..كله منكم..
العنود: ليشت تفشلتي...
نوف: كنت اكلم الرجال ويوم شفتكم ابتسمت لكم ونسيته..
عبير: بيقول اذا هذي حركاتها من يوم الخطبه اجل يوم الزواج وش بتسوين..
ريم: الله يستر بس...
نوف: والله كله منكم...
فجر: الا انتي اول مره تشوفينهم..
نوف: والله فرحت لما شفتهم..
ريم: بس اخوك النذل كسرنا..
فجر: تستاهلون هذا عن خطبتي وخطبة نوف...
العنود: تراك ازعجتينا بزواجك..
فجر: قاعده على قلبك..
وكملوا سهرتهم وبعدها رجعوا لبيوتهم..
&& &&
مرت الايام سريعه مع الاسابيع..لحد ما صار شهر كامل على اخر احداث مهمه..وماكنا فيه أي شي جديد الا قرب وقت الاختبارات ودخلوهم اجواء ايام المراجعه...باقي على الاختبارات النهائيه والمصيريه اسبوعين بس...
والدنيا حايسه في كل بيت....خلونا نشوفهم..
&& &&
بيـــــــــت ابــو مشــــــــاري...
رغد ماسكه كتبها والدفاتر وحوليها والاوراق واسئلة الوزاره للأعوام اللي فاتت منثره حولها..وحالتها النفسيه رايحه فيها..يوم تبكي...يوم تضحك وما تسكت..وطول الوقت تاكل سنكرس والكراتين مصففه وحولها...
دخلت عليها ريم...
ريم: اقول رغد...ما شفتي شريط الدي في دي..ذاك الاكشن الي في النهايه البطل طلقوا عليه بالبازوكا وتفجر وتقطع ..هاه...
رغد تطالعها بنظرات استحقار: والله انك فاضيه وتحسبين الناس فاضيه مثلك..
دخلت ريم وجلست وخذت سنكرس وشافت القراطيس حقته مرميه وحولها: ابسألك سؤال اذا امكن..
رغد بقلة صبر: خيــــــر...
ريم: انتي داخله مسابقه بعنوان " اللي ياكل اكثر فرصته في اربح اكبر"
رغد: يا خف دمك يا شيخه.
ريم: تصدقين حسبتها منيره هههههههههه..
رغد عصبت: ريم اطلعي برا ترى محد فاضي لك...
ريم: طيب لا تعصبين..بس وين الشريط..
رغد: وانا ش دراني عنه..
ريم وقفت عند الباب: يا بثرك يا الدافوره..
رغد بتقوم عليها بس ريم لحقت عمرها وطلعت...
رغد وهي تفتح سنكرس جديد: ياربيه واحنا وش دخلنا في كتب ذولي وكم مجلد وكم كتاب في قريح ياخذه<<تذاكر مكتبه...
ريم حصلت الشريط وصلحت لها بوب كورن وقعدت تطالعه في غرفتها..
مشعل يذاكر ومقطع نفسه من المذاكره لان النجاحه مفاجأه له..واكيد شي من اللي يحبه...بس موبايله كل شوي يرن..لين تسأله عن اخباره او يشرح لها او تسولف معاه لان امها مانعتها من انها تزورهم..
مشاري خلص اختباراته قبل الكل..وتفرغ للشركه بس..
&& &&
بيـــت ابو مــــاجــد..
عبير خلصت اختبارات من زمان وقاعده تحرّ العنود...
عبير منسدحه على الكنب وتطالع تلفزيون: عنيد يله قومي ذاكري...
العنود جالسه تلعب جيم بوي: اقول انقلعي ترى محد فاضي لك..
عبير: ترى بعلم امي..
العنود وقفت اللعبه: الحين انتي من مسلطك علي..
عبير: انا اختك الكبيره وادرى بمصلحتك..
العنود: مشكوره ما ابي منك شي..وخليك لاهيه في نفسك...
عبير: هيــــن اوريك....يــــــمه...يمـــــــــــه..
العنود حطت ايدها على فم عبير: اسكتي فضحتينا...
عبير توخر ايدها: ابعدي عني... والله اذا ما ذاكرتي لا اعلم امي عليك..
العنود: اوووف قمت الله ياخذك وافتك منك..
مرت ام ماجد: وراك تدعين يا العجزه...حرام تدعين على اختك..
العنود: اجل الله ياخذني وارتاح..
ام ماجد: هاو..وش فيك يا عنيد...
عبير بلعانه: يمه ما تبي تذاكر..
ام ماجد: روحي ذاكري ولك نجاحه مني تنبسطين عليها..
العنود فرحت: صدق وش هي؟؟
ام ماجد: خليها مفاجأه احسن..
العنود: لا يمه الحين عشان اتحمس للبرمشه اقصد المذاكره..
ام ماجد: ابشتري لك سياره..
العنود: كذااااااااااااااابه..
ام ماجد: اول شي انا ما اكذب وبعدين ترى كلها سياره ام ريموت...
العنود بأستهزاء: سياره ام ريموت هاه..
ام ماجد تنطنز على العنود: عشان تفحطين فيها...
عبير كاتمه ضحكتها...
العنود: والله لا ارسب الحين...
عبير فقع ضحك: هههههههههههههه العنود انجحي عشان نفحط انا وياك..هههههه
العنود: هين اوريك انتي بعد..
ام ماجد: ههههه روحي روحي ذاكري بس..
الا وليد نازل بعد هو خلص اختبارات..
وليد: وش فيكم تضحكون..
عبير: ما دريت امي بتشتري سياره للعنود...
وليد منصدم: سيــــــــــاره..
العنود مكتفه ايدينها وتناظرهم..
عبير: ههههههههههه سياره ام ريموت..
وليد فقع ضحك: ههههههههه والله تصلح لك يا عنيد...
العنود: ضحكت من سرك بلا ان شالله..
وطلعت لغرفتها وقعدت تبرشم...
&& &&
بيــــــــــت ابو فـــــــــواز..
نوف تذاكر ساعه وتكلم نواف ثلاث ساعات وعلى هالحال ..
نوف: ايوه وبعدين..
نواف: ما تصدقين قد ايش انحرجت من اخوك فواز والله وجهي ما عاد ينشاف من الفشيله..
نوف:هههههه..
نواف : تضحكين هاه .. أصلا انتي السبب ..
نوف بدلع طبيعي : أناااا...
نواف : والله مادوخني الا انتي ..
نوف استحت : تسلم والله كلك ذوق ..
نواف : شكلك تبيني ارسب ..
نوف : ليش وانا وش دخلني ..
نواف : مشكلتي اني اشتاق لك كل ثانية .. وش اسوي بعمري ..
نوف : عاد اهم شيء النسبة .. اوكي قلبي ..
نواف : اجيب لك ابو النسبة ..
نوف : لا انا ماابي ابوها ابيك انت ..
نواف : الحين انا اذوب ..
نوف : يله نونو الحين ابي اسكر
نواف : اوكي ياقلبي باي ..
نوف : باي ..
دخل طلال عليها ...
طلال : وش تسوي نوافه ..
نوف مسكت الكتاب : اذاكر
طلال يسوي نفسه غبي : كأني سمعتك تضحكين من شوي ..
نوف بربكه واضحه : انا .. متى ؟؟
طلال : يمكن في المطالعة موضوع اللي عنوانه "طرائف احمد "
نوف مااستوعبت وش قال : ايه يمكن ....
طلال : يالنصابه المطالعة تقييم يله اعترفي ..
نوف : طـــــلال ..
طلال: خلاص فهمت اطلع واسكر الباب..
وطلع وقعدت نوف تطالع الكاتب وبالها بعيد عند نواف<<مو وجه عرس..


&& &&
بيــــــــــت ابو فيصــــــــل...
شجون جالسه مع فجر يذاكرون..
فجر: شكلي ببرشم ما فهمت شي..
شجون: لا يمه اخاف انكشف..
فجر: وش اسوي نص الكتاب ما فهمته...
شجون: اسألي صديقاتك..
فجر فجأه أمها بطنها: آآآآآآآآه.
شجون خافت وقامت لها: فجوره وش فيك؟؟
فجر ماسكه بطنها: آآآآآآ ما ادري....ما ادري...آآآآآآ بطني يعورني...
شجون: اوديك الطبيب..
فجر حطت ايدينها على فمها وراحت بسرعه لدورة المياه (الله يكرمكم) وصارت ترجع..
فجر:آآآآآ...يمه وش فيني..."وطلعت لشجون"...
شجون ابتسمت لها: مبروك..حامل..
فجر انصدمت من الفكره: أي حامل واللي يعافيك ما صار لي اربع شهور متزوجه...
شجون: عادي تصير...
فجر: لا تكفين لسه صغيره وما اسعديت نفسيا..
شجون مبسوطه: بس وناسه تكونين ام واصير انا عمه...الله من جد فله..
فجر ابتسمت عجبتها الفكره: تتوقعين وناسه...
شجون: ليه هو ملاهي عشان تقولين وناسه...
فجر: ههههه ما اصلح ام ابد..
شجون: شويه ما تصلحين...
دخل فيصل وسلم على شجون وباس فجر من خدها....
شجون: هيه توني صغيره لا تخربوني...
فيصل: هههه المهم وش اخبار الحلوين...
شجون: عندي لك خبـــــــــــــــ..
ما حست الا بنغزه في جنبها لحد ما بغت تنفقع كليتها....
فجر: الخبر اني ما عرفت اذاكر...
فيصل وهو يطالع شجون تتألم وماسكه جنبها: اهاااا...شجون الحمدلله على السلامه..
شجون وماسكه جنبها: الله يسلمك..
فيصل: وش فيك...
شجون: ما ادري وش جأني فجأه حسيت ان كليتي بتروح في خبر كان"وتطالع فجر"
فجر: ما عليك منها تدلع"وتأشر لها يعني شغلك بعدين"
فيصل: ايوه فجوره وش اللي ما فهمتيه اشرحه لك..
وراحت فجر واخذت كتبها وقعدت جنب فيصل وصار يشرح لها...
شجون تطالعهم: اول مره اشوف زوج يشرح لزوجته...
فيصل: وش عليك ..
فجر حاقده عليها: ما عليك منها الملقوفه..
شجون: خلاص فجوره حصل خير...
فجر رجع لها ألم البطن: آآآآآه..معليش بروح لدورة المياه...
فيصل وهو مستغرب: تفضلي..."راحت فجر"...شجون وش فيها...
شجون ابتسمت بخبث: ما ادري عنها...كل شوي رايحه لدورة المياه..
فيصل ما فهم تلميحاتها: لا يكون جاها السكر...انا قايل لكم لا تاكلون شوكلاته بس ما تسمعون الكلام...
شجون تكلم نفسها: والله لو المح من هنا لبكره ما فهم..
فيصل: قلتي شي...؟
شجون: لا سلامتك..


&& &&
بيــــــــت ابو تركــــــــي..
تركي ماخذ الصاله مكان له..وفارش الاوراق والكتب والدفاتر والاقلام..وكوب الكوفي منكب على الاوراق..ومنسدح على الكنبه بحيث انه راقد على بطنه ورافع رجلينه ويلعب فيهم...
دخلت عليه ام تركي...
ام تركي: تريك وش هالحوسه..وينك قاعد فيه ..في شقة عزابيه...
تركي لف على امه: يمه اذاكر..
ام تركي: واحد يذاكر ويجلس كذا..قم تعدل...
تركي: يمه ما اعرف الا كذا...
ام تركي: الله يهديك بس..انت واختك...
تركي: هنيف وش فيها بعد..
ام تركي: انهبلت وقعدت..
تركي: وش فيها عشان اتشمت عليها..
ام تركي: اختك استح على وجهك...ما ادري وش فيها ما غير تطلع في الملابس وتلبس وتفصخ..ودولابها ما بقى فيه شي ..فاضي..
تركي: هههه بروح اهبل فيها...
ام تركي تناديه: تريك اعقل عنها...
تركي دخل غرفة الهنوف بشويش شاف الهنوف لابسه وكاشخه وتذاكر ومشغله المسجله"اغنية نانسي عجرم ياي سحر عيونه"وترقص وتدور في الغرفه..
تركي: الحمدلله والشكر بس..."ودخل" هنيف وش تسوين...
الهنوف: يااااااي سحر عيونه نظراته اول ما تلاقينا عين بعين..
تركي يكمل معها: ياااااي شو مهضومه كلاماته....انهبلتي انتي ولا استخفيتي وش اللي انتي مسويته بنفسك...
الهنوف: عشان تنفتح نفسي للمذاكره...
تركي: عزيمه مو مذاكره...اقول بلا هبال.وبعدين في احد يذاكر ويغني...
الهنوف: عشان ما امل من البربره الفاضيه...
تركي: اجل قولي على النسبه السلام...
الهنوف: احس ان جاني تبلد ماعاد صرت اهتم..اصلا الله واكبر على الجامعات الحين..ادخل بفلوس وانتهينا...
تركي: ايه هين...ابطلع قبل لا استخف مثلك..
الهنوف: يكون احسن..
تركي دخل عناد:ولا اقول خلني اقعد اضحك عليك واوسع صدري..
الهنوف عصبت: تركي بسرعه برى..
تركي: ولا عليك لبس ما ادري وش يبي..موف.ازرق..واخضر..واصفر..تكفين باقي لون ما لبستيه..
الهنوف وصلت معها: تريك احسن لك اطلع قبل لا افجر فيك...
تركي: والله لو تروحين حفله تنكريه احسن لك..
الهنوف فسخت السندل اللي عليها:والله اذا ما طلعت ولا الكعب على راسك..
تركي: هههههه خلاص بطلع....يا القرويه.."وانحـــــــــاش"
ولحقه سندل الهنوف بس ماجاه شي..
تركي من بعيد يصارخ: ما اشره عليك يا المجنونه...
الهنوف سكرت الباب...وغيرت اللبس ولبست لبس ثاني وغيرت الكتاب معه...
&& &&
فــــي بيــــــت ام سليـــــمان..
مها خلصت اختبارات...سليمان ومحمد كل واحد في مكان يذاكر...
سليمان كل شوي داخل عليه عبدالله اخوه الصغير...يحوس عنده بعدين يطلع..وشوي يدخل مره ثانيه..
سليمان بهدوء: عبود اطلع..
عبدالله: لا ..ابي اقعد هنا..
سليمان من بين اسنانه: روح عند مها تعطيك حلاوه..
عبدالله: لا ابي اقعد عندك...
سليمان: اقول لك روح عند محمد...
عبدالله برضا: طيب...
وراح عنــــــــد محمد...
محمد: عبيد روح عند سليمان..
عبدالله: ما ابي ما ابي..ابقعد هنا..
محمد: اقول لك روح عند سليمان...
عبدالله: اووووف طيب...
وراح عنــــــــد سليمان..
سليمان: صبر جميل والهل المستعان..عبيد قلت لك روح عند محمد...
عبدالله خنقتها العبره: ما ابي.
سليمان: وش اللي ماتبي..قوم حبيبي قوم..
عبدالله بيبدى جرس الانذار عنده: ما بـــــــــــــــــــي..
سليمان صرخ: عبيد..
عبالله اونطلق عنده جرس الانذار: واااااااااااااااااااااااااااااااااااع
سليمان توهق فيه: خلاص خلاص عبود خلاص..
عبود: واااااااااااع..
دخل محمد: وش مسوي بأخوي اعترف يا اللي ما عندك حنيه<<لا يا الرقيق
سليمان: خذ اخوك وانقلع..
محمد: على كيفك تصيح الولد وتبلشه فيني...
سليمان: محمدوه..خذه وفكني...
محمد بيطلع: تحمل غلطتك...ولو سمحت عشان ما يزعجني خله عندك ..كل شوي جاي عندي ترى محد فاضي لك ولاخوك.."وطلع"
سليمان: والله البزارين طلع لهم لسان...
قام وشال عبدالله وحطه عند مها..
سليمان: خذي اخوك وفكيني من شره...
عبدالله مازال يصيح: واااااااع..
مها: وش سويت بأخوي...
سليمان: خذيه ترى وراي نسبه ومحد فاضي لكم..
مها:تعال يا بعد قلبي والله..
"وراح سليمان لرياضياته كتبه"


&& &&
اليــــــــــــوم الثانــــــــــــــي..
ريم العنود من العصر عند فجر وعبير ماجات معاهم نايمه ومالها خلق <<كالعاده..
فجر في المطبخ تصلح لهم قهوه..
شجون تهمس لهم: بنات قربوا...
العنود وريم ما صدقوا على الله: خير وش صاير..
شجون مبسوطه: شكل فجر حامل...
العنود وريم بصوت واحد: حااااااااااااااامل؟؟؟؟
شجون: قصروا اصواتكم وجع...انا قلت شكلها والله اعلم..
ريم والعنود: اهاااا..
دخلت فجر: حيا الله من جانا..
ريم: الله يحيك..."وغمزت للعنود"
العنود: فجر..كأن كرشتك تغيرت...
فجر اخترعت:كرشتــي !! لالا عادي..
ريم: الا تصدقين كأنها كابره شوي...
فجر ابتسمت ترقع لهم: لا عادي يمكن سمنه...
العنود: طيب مو كأن وجهك اصفر..
ريم تأيدها: الا وجهك اصفر...
شجون ساكته وحاطه يدها على فمها عشان ما تضحك..
فجر: وش فيكم علي..عادي وجهي ما فيه شي...
العنود: اكـــــــــيد!!
فجر : ليش احد قايل لكم شي<وتطالع شجون"
ريم: لالا محد قال لنا شي...ليه فيك شي <<قلبت عليها السالفه..
فجر:لا انا مافيني شي...
العنود: اجل خلاص ما فينا شي حنا بعد..
وبالليـــــــل انتشر الخبر بأن فجر حامل....
فيصل: فجر قومي نروح المستشفى...
فجر: مافيني شي عشان اروح..
فيصل: طيب نتــــــأكد..
فجر: حسبي الله على بليسكم من بنات...فيصل قلت لك روحه ماني رايحه ارتاح..
فيصل بحنيه: ليش ماودك اصير ابو..
فجر لفت عليه ورق قلبها: الا ودي...بس انا ادري اني ماني حامل..
فيصل: وش دراك..؟
فجر: ما صار لي اربع شهور..وشلون احمل..
فيصل: عادي تصير..
فجر: احد قال لك اني قطوه..
فيصل: فجر يله عاد عشان نفرح..
فجر: وانا مابي...
فيصل قرب منها وحضنها من ورى: واذا قلت لك عشان خاطر صوصو...
فجر بتذوب وهو عارف هالشي: فيصل بليزا حس ماله داعي الروحه...
فيصل: الا لها داعي..يله البسي عبايتك ..اسنتاك تحت....
فجر: اوكي خلاص عشانك والله...
ولبست عبايتها ونزلت ومرت من عند شجون...
فجر: انتي هين بذبحك بس خليني ارجع...
شجون: وانا وش دخلني..بس ابي اصير عمه...
فجر: انعمت عيون ابليس ان شالله..بس خليني ارجع اوريك شغل الله...
فيصل: فجر يـــــــــله..
فجر: يلـــــــــــــه...
&& &&
رغد: مسكينه والاختبارات..
ريم: لا تخافين عليها ..بسم اله عليها تدبر عمرها..
رغد: بس احس انها لسه صغيره..
ريم: وش عليك انتي هي تبي تصير ام هي قالت لي<<يقطع ابو الصورايخ
رغد: الله يسهل عليها..
ريم: امين..
&& &&
العنود: وهي فرحانه وطايره من الفرحه انها حامل<<هنا رشاشات مو صواريخ
عبير: صدق!! الله يتمم فرحتها..
العنود: بس مسكينه بتروح فيها في الاختبارات..
عبير: الله يسهل عليها...
العنود: ايه والله...
&& &&
نوف تتصل على فجر بالمستشفى: مبروك مبروك تحملين ولا تعلميني..
فجر تدعي جوات نفسها على ريم والعنود: أي حمل واي خرابيط..
نوف: وتغبين علي بعد...
فجر: هذا انا في المستشفى وما بعد حللت اصلا..
نوف: طيب ريم والعنود متصلين علي يبشروني ..كيف؟؟
فجر: الثنتين هذولي شغلهم عندي..
نوف: اجل بشريني اوكي...
فجر: اوكي...
حللت فجر وقالوا النتايج بعد ساعه...
ام فيصل تكلم فيصل: مبروك يا وليدي جعله الولد الصالح..
فيصل: يمه ما بعد صار شي...
ام فيصل: ان شالله خير...
فيصل: ان شالله..
وسكر من امه...
فيصل: فجر ممكن اسأل سؤال...
فجر: اسأل...
فيصل: ممكن اعرف مين اللي ناشر الخبر...
فجر: من غيرهم ملقف عندنا..رويم وعنيد..الله يوريني فيهم يوم كانهم فضحوني..
فيصل: ما شالله اسرع من العربيه...
فجر: الاخبار كلها عندهم..وهذا قليل الحين مو شي عندهم..
فيصل: اجل وراهم بلاوي...
فجر:فجر: الا البلاوي كلها عندهم...
طلعـــــــــــــــت نتيــــــــــــــــــــجة التحليـــــــــــــــــــــــــــــــل....

الجـــــــــــــــــــــزء التــــاســع والثـــلاثــــون
""الفــصــــــــــــــل الثــــــــــــــالثــــــــ""


طلعـــــــــــــت نتيجــــــــــــة التحليـــــــــــــل...
فيصل: بشر يا دكتور..
دكتور: ابشرك المدام حامل..
فيصل سلم على الدكتور بحراره: مشكور مشكور و الله يجزاك خير..
الدكتور:لا شكر على واجب..
طلع فيصل يصارخ: فجر فجـــــــر..
فجر: المستشفى كله عرف اني فجر...
فيصل: مبروك يا قلبي صرتي أم وانا صرت أبو..
فجر: الله يبارك فيك وفي ايامك...
فيصل: اكيد امي بتفرح فرح مو طبيعي..
فجر: اكيد يا قلبي"هم بيفرحون وانا اللي باكلها.."
وبشروا الكـل وصار صياح ونباح<<لازم في الفرح والحزن..
وعمل ابو فيصل عزيمه وانبسطوا فيها..
رغد ما حضرت على قولتها في احد يعزم هالوقت بس كلمت فجر وباركت لها...والباقي فلوها رقص واغاني وهيصه..
&& &&
ام فيصل: يمه فجر لا تقومين ولا تتحركين خلي عنك كل شي ..فيه الخدم..
فجر: بس بودي القهوه..
ام فيصل: لا قهوه ولا شاي..خلي عنك كل شي..
فجر: ا نشا الله من عيوني...
جات ريم: فجير مسويه حرمه تعالي معانا...
ام فيصل: ولا تتحركين خلوها جالسه بعد قلبي والله..
ريم: خالتي قلنا حامل معليش اما تسون لها عقاب بالجسله المؤبده لالا هذي ما ارضاها..
ام فواز: مو لازم ترضينها..
ريم: ترى اذا ما رضينا بتودعون البيبي قبل لا يجي هذا انا حذرتكم..
جات العنود تفحط: خير وش صاير...
ريم: حاكمين على بنت عمتي بالجلسه المؤبده مع امكانية التنفس بس والاكل مسموح..
العنود: والحركه...؟؟
ريم: ممنوعه...
العنود: جيبوا بنت عمتي لا احرمكم من اللي في بطنها..هذا اللي ناقص التفرقه البرعصيه..
ريم: وش شايفتنا معلقين بالجدران..
العنود: ليش؟؟؟
ريم: البرعصيه يعني بريعصي يعني ظاطور الله يكرمك عنه والعنصريه يا قلبي هي الكلمه المفقوده عندك..
العنود: اهااا..المهم بتجبيونها ولا شلون..
ام فيصل خافت: اوكي خذوها بس حطوها بعيونكم...فجر يمه اذا رقصوا لا ترقصين..
ام فواز: ايه يمه وعن حركات الهبال زين...
فجر: والله ما دريت ان الحمل كذا ولا كان ما حملت من الاساس..
ام فواز: يمه لا تقولين كذا بعدين ربي يبلاك..
فجر: اللهم لا اعتراض..اللهم اني لا اسألك رد القضا و لكني أسألك اللطف فيه "وتأشر على امها وخالتها ام فيصل"
ام فواز: هذا جزانا...
فجر: بروح مع البنات احسن لي..بدور تعالي معانا...
بدور: لا انا بجلس هنا مشكوره قلبي...
فجر: براحتك..
العنود: امشي عاد لا تدلعين علينا"ودفتها من ورى"
ام فيصل فزت من مكانها مخترعه وراحت لعند فجر...
ام فيصل: يمه صار لك شي تحسين بشي..
فجر في نفسها"ان لله وانا له لراجعون..صبرك يا ايوب""..: زينه زينه مافيني شي..
ريم: على بالي نحول ههههههههههههه...
ام فيصل عصبت: عنيد عن المزح الشين..
العنود: ومحد حمل الا هذي المفعوصه عشان تسون كل هذا...هذي بدور حملت وما صار شي..
ريم: لا يمكن عشان فجر توها بزر..
فجر ضربت ريم من كتفها: بزر في عينك...
ام فيصل: قلت لكم انتبهوا سامعين..
الثــلاثه: ســـــــــامعيــــــــن...
وراحوا عند البنات...
شجون: هلا بمرت اخوي الحامل..
فجر: يعني لازم سيرتي الذاتيه الكامله..
نوف: يا حلوك وانتي حامل...
فجر: يا نصبك مابان شي...
عبير: فجير كأنك كارهه حملك..
فجر: تبون الصراحه...ايه احس توني صغيره ومالي خلق مسؤليه وابي اعيش شوي شبابي...
البنات: معــــــــاك حـــق..
نوف: بس عادي يا قلبي بتتعودين..وبعدين عشان فيصل تصبري..
فجر: والله ما صبرني الا فرحة فيصل.
&& &&
عـنـــــــــــــــد الرجــــــــــــال...
الكــــــل يبارك لفيصل..وفيصل الدنيا مو سايعته من الفرحه...بيجه طفل ومن اللي يموت عليها..
مشاري: احلى يا اللي صرت ابو..
فيصل: وش رايك اصلح ولا..
فواز: وش لك بالشقا وانت صغير لاحق لاحق..
فيصل: اصلا انت حسيت بالشقا يوم انك تتكلم..الحين لو اسألك وين عيالك بتقول عند امي..
فواز يسهبل: وش دراك....وين هذاك اول الحين صاروا عود في حلقي....
وليد: يله عقبال البقيه..
طلال: امـــــــين...
مشاري: الاخ مستعجل...
طلال: وش ورانا نجرب..
ماجد: هو لعب بزارين تجرب..
فيصل يتفلسف: الزواج شي اكبر مما يتصوره الواحد..الزواج مسؤليه وطولة بال وصبر وتحمل..
طلال: لو تكرمنا بسكوتك ارحم لنا ولا يا شباب..
الشباب: الا والله..
فيصل: مالت عليكم وعلى اللي ينصحكم..
وليد: خلي نصيحتك لك ما نبيها..
&& &&
مرت الايام بسرعة مثل الطيف وبكره اول يوم اختبار..
ورغد في المستشفى...
الدكتور: البنت عندها احتمال يكون عندها مرض السكر...
مشاري طير عيونه: وش سكره الله يهداك..
الدكتور: انا قلت احتمال..وهي معرضه للمرض اذا استمرت في اكل الحلويات وخصوصا ان وزنها زايد...
رغد: خلاص والله توبه ما عاد اكل سنكرس...
الدكتور ابتسم: اجل سنكرس...
مشاري: فضحتينا الله يفضحك..
الدكتور: الحين احنا بنعطيها ابره تعدل نسبة السكر عندها..بس لازم تنتبه لعمرها...
مشاري: ابشر ..
&& &&
رجعت رغد للبـيـــــــــــــــت..
ام مشاري بلهفه: وش صار؟؟
مشاري: معرضه لاصابه بالسكر بسبة البلع في السنكرس ذا...
رغد: لا تبالغ كلها كم كرتون..
ريم: كم كرتون يا الظالمه..السوبر الماركت اللي جنبنا خلصت كراتين السنكرس من عنده والسبه انتي..
ام مشاري: من اليوم وطالع ما فيه اكل سنكرس سامعه..
رغد: طيب ان شا الله..
بعد نص ساعه دخلت ريم غرفة رغد وهي قاعده تراجع مادة بكره عليها بلاغه وعلم اجتماع<<يا حليلها ثالث والله..
ريم: خلصنا من السنكرس وطحنا في الحب"الفصفص"
رغد وهي تقشم: وش عليك مني...وبعدين ما اعرف اقعد كذا...
ريم: انتي نهايتك ما راح تطلعين من الباب من السمنه..
رغد: معليش البنات دايم يقولون يا العصلا...خليني ارضيهم واسمن..
ريم: صدق من قال اصحاب العقول في راحه..
رغد: اقول اطلعي وامسكي كتابك وترى اللي فيني مكفيني..
&& &&
بيــــــــــت ام تركي..
وتقربيا في غرفة الهنوف...الدنيا قالبه مرقص..
كل الملابس مطلعه ومشغل اغنيه اجنبيه وتاركه شعرها وترقص اجنبي قدام المرايه...
دخل تركي عليها: لالا البنت خلاص ما عاد نقدر نلحق عليها.."وراح طفى المسجل"
الهنوف وقفت رقص: خير من سمح لك تدخل غرفتي..
تركي راح يلمس حرارتها: انتي فيك حمى الاختبارات..
الهنوف: اقول تركي خلني بس اكمل رقص..


يتبع ,,,


👇👇👇

تعليقات
    حجم الخط
    +
    16
    -
    تباعد السطور
    +
    2
    -