رواية الخوف من الحب -39 البارت الأخير

رواية الخوف من الحب -39



رواية الخوف من الحب -39


رهف وهو تنزل راسها: الاثنين
منيره: يعنى لو يتقدم لك واحد ثاني توعدينى تفكرين فيه قبل..
رهف: مادري
منيره: اوعدينى
رهف: اوعدك .. افكر بس مو اقبل
منيره: في ذيك الساعه الله يلحقنا خير
....................

دقت سارا لعبدالعزيز يجي ياخذها من بيت اهلها ...
عبدالعزيز: ماقدر سارا انا سهران مع الربع
سارا: طيب مين بيودينى البيت
عبدالعزيز: سلمان والا عبدالله
سارا: عبدالله نايم .. وسلمان طالع ..
عبدالعزيز: دبري لك احد غيري
سارا: بجي مع السواق
عبدالعزيز: لا السواق لا .. مو في هذا الوقت المتاخر ...
سارا: يووه عزيز ماعندي احد ..
عبدالعزيز: خلاص نامي بيت اهلك
سارا بعصبيه: عزييييييييز
عبدالعزيز: والله سارا ماقدر اجيك
سارا بزعل: طيب باي
عبدالعزيز وهو بتسم بمكر : باي
وسكر منها .. وهي شوي وتنفجر .. ما تغير .. يعنى لمتى ما يتغير حرام عليه... دقت على سلمان..
سارا: سلمااااااااااان
سلمان كان الى الحين معصب .. هو كلم امه والي قهره انها ما تحمست مثله وقالت بكره راح تدق عليهم ..ولانه يعرف نبره صوت سارا هذي .. يعنى تبي شي
سلمان: اخلصى ايش تبين
سارا: سلمان .. تكفى تعالى خذنى وودنى بيتى
سلمان: عندك رجلك ..
سارا: مشغول
سلمان: سارا والي يرحم والديك مو فاضي لك ابد
سارا: سلمااااان ...
سلمان: اسف .. يالله مع السلامه
سارا: واكلم عبدالعزيز الليله عن رهف
كان سلمان توه بيسكر يوم سمع اسم رهف ..
سلمان: ايش قلتى؟؟؟
سارا: اقول لعبدالعزيز انك تبي رهف..
سلمان: والله سارا
سارا: ايه واقنعه بعد..
احيانا ما يفيد الا سلوب الاغراء .. عشان الوالد ينفذ طلباتك
سلمان: ساعه وبجي اخذك
سارا: لا سلمان أي ساعه الحين 12 يعنى بتجينى وحده
سلمان: تبين اوديك والا لا
سارا: الا طبعا
سلمان: اجل جب
سارا: اوووف خلاص وحده
سلمان: هههههه.. حريم ما يجون الا بالعين الحمرى

وعلى الساعه 1 ونص دخلت سارا البيت الي كان غرقان بالصمت .. اكيد الكل نايم الحين .. راح فوق لغرفتها مباشره ... ما دقت على عبدالعزيز ولا شي .. ما يستاهل تسال عنه .. النذل مو راضي يجيبنى ... فتح باب غرفتها وعلى طول طلعت لها ريحه تجنن ... وقفت مندهشه قدام الباب .. تتامل العلبه الكبيره الي على السرير ... غير الشموع الموجوده .. دخلت وهي مو مصدقه .. ايش صاير هنا .. معقوله هذي غرفتى ...
عبدالعزيز من وراها: ما بغيتى تجين ؟؟؟
التفت وشافت عبدالعزيز واقف عند الباب وهو يبتسم لها ...
سارا وهي مو مصدقه: انت الي مسوي كل هذا
عبدالعزيز يهز راسه وياشر على الهديه: افتحيها .. انشالله تعجبك ..
راحت سارا بتردد .. وفتحت الهديه ... كانت عباه عن علبه مخمليه كحليه ... افتحتها بايدها وهي ترتجف .. شافت قلاده الماس كبيره .. مررره تجنن ... ظلت ماسكه العلبه وهي منبهره بشكل القلاده .. جا عبدالعزيز من وراها .. ورفع القلاده من العلبه ...ولبسها سارا.. بعد ما ازاح شعرها على جنب.. الحمد لله كانت لابسه بلوزه جيب صدرها كبير...
عبدالعزيز: مكانها حول رقبتك .. ابي اشوفك دايما لابستها ...
حست سارا انها خلاص بتصيح ... معقوله عبدالعزيز يسوي هالشي.. اخر شي توقعته ان عبدالعزيز يكون بهالرومانسيه ...بعد ما انتهي من اغلاق القلاده .. حط ايده على كتوفها ولفها له عشان يشوفها ..
عبدالعزيز: سارا شوفينى
رفعت له سارا عيونها .. وهي تلمع من الفرح ...
سارا: انت قلت لى انام بيت اهلى
عبدالعزيز وهو يبتسم بمر: لانى اعرف انك مستحيل تسوينها ...
سارا ابتسمت له بارتجاف: ما توقعت .. ما توقعت انك بتسوي كذا
عبدالعزيز: مفاجاه صح
سارا: احلى مفاجاه بعد ...
باسها عبدالعزيز على جبهتها ...
عبدالعزيز: هالشي قليل بحقك .. سارا انتى ما تعرفين انتى ايش بالنسبه لى .. غيرتى اشياء كثيره بحياتى .. كان لك الفضل في تغيري وتغيري الي حولى ... السنه الي فاتت برهنتى فيها على اشيائ واجد ... وقوفك مع اخوتى واهلى من غير استثناء .. والاهم وقوفك معي ..
سارا: انا ما سويت..
حط اصبعه على شفايفها
عبدالعزيز: هشش.. خلينى اكمل .. انتى ما سمعتى ان الرجل اذا جا يعترف لا يقاطعه احد ..
هزت سارا راسها ... ومسح عبدالعزيز دمعتها ...
عبدالعزيز: تصيحين ؟؟؟
سارا: من الفرح
عبدالعزيز ابتسم : سارا في امور كثير كنت فاهمها غلط ... وبفضل الله ثم انتى عرفت ايش قد كنت غلطان ..
سارا شافته بحيره ما فهمت عليه ..
عبدالعزيز يكمل اعترافاته: ترددي بالزواج وجفائي معك اول ما تزوجنى .. وتصرفاتى الغريبه كلها لها سبب واحد .. كنت خايف يا سارا..
سارا باستغراب: انت تخاف..
عبدالعزيز: تستغربين .. ما الومك .. مو دايما اطلع بمنظر القوي ... الا ذيك المره طبعا الي تذكرينها ..
ابتسمت له سارا انها ايه فهمت عليه ...
عبدالعزيز: اكثر شي كنت خايف منه .. هو انتى
سارا: انا!!
عبدالعزيز: ايه .. انتى .. كنت خايف احبك .. كنت خايف من الحب .. ما كنت ادري ان حبك لي هو سبب نجاتى .. وان حبك لى هو سبب قوتى .. والاهم ان الحب الي كنت اهرب منه هو الي فيه خلاصى وسعادتى ...اشكرك يا سارا لانك زوجتى ... ولحبك لى ..
ماعرفت سارا بايش ترد قدام كلمات عبدالعزيز ...فقربت راسها وحطته على كتف عبدالعزيز ...
عبدالعزيز: سارا شوفينى
رفعت راسها وهو لازل على كتفه ...
عبدالعزيز: احبك سارا ..
وباس جبتها ..
سارا: عزيييز..
عبدالعزيز: ههششش..
وشد ساره صدره اكثر ... خلاص اكتفوا من الكلام اللسان .. مافي كلمات تعبر على الي كانوا يحسون فيه في ذيك اللحظه ... اطلقوا للعنان لارواحهم للتخاطب .. بلغه ما يفهمها الا سارا وعبدالعزيز ...


النهااااايه

.....................................


مابعد النهايه ...


منيره: يالله سارا .. بسرعه خلصى ما يصير نتاخر اكثر من كذا ...
فوزيه: شوي شوي المعرض ما راح يطير..
منيره: ادري يمه بس فشيله نروح متاخر .. المفروض نكون اول الناس ...
ساراوهي تنزل: هذا انا جيت ...
منيره تشوفها باستغراب: ليه ما لبستيه ...
سارا: مجنونه اخذه معي بيعفس المعرض عفس... بوديه بيت اهلى عند امي ..
منيره: هيهي .. سلومي اول واحد يدخل المعرض حتى قبلك
سارا: انتى صاحيه .. توه ماكمل السنتين وما بعد يفهم
منيره: مالي دخل .. روحي لبسيه بس..
فوزيه: بنتاخر
منيره: عادي اهم شي سالم يروح ..
سارا وهي تتنهد : براحتك ... بس اذا عصب عبدالعزيز ترى منك منور ...
منيره: ليه وينه عزيز؟؟
سارا: يقول كلها خمس دقايق ويكون عند الباب ..
منيره: ما بيقول شي .. انتى بس اسرعى ...
فوزيه: الحين ارسلتى بطاقات لبيت عمك صالح
منيره: ايه يمه .. رهف تقول ان خالتى لطيفه ماتقدر تجي .. بتجي هي وسلمان ومها بس...
فوزيه: ونوره اختك
منيره: كلهم بنلاقيهم هناك ...
مي داخله باندفاع وراميه نفسها بحضن جدتها ...
مي: جدتى ولهانه عليك مرره
فوزيه: ههههههه .. شوي شوي علي .. الله ميونا ايش هالجلابيه الي عليك تهبل
مي: ماما جواهر شرتها لي عشان المعرض..
منيره: جنن ميو .. شكلى برسم وانتى بالجلابيه ...
عمر : وانا مو راسمتنى ...
التفت منيره وشافت عمر وجواهر واقفه جنبه .. وايد عمر ملتفه على كتفها ...
منيره: لا ايش ارسمك انت .. لو برسم برسم النونو الي بالطريق...
ضحكت جواهر وحطت ايدها على دبتها .. كلها شهر وبتولد باول طفل لها وثاني طفل لعمر ..
عمر: ههههههههه .. تشوفين يهالعفريته ...
جات سارا وهي شايه سالم ولابسه عبايتها ..
سارا: عزيز قطع جوالى يالله بسرعه خل نروح ..
فوزيه: وهالعزيز ما يغير طبعه لازال يعصب اذا تاخر عليه احد وهو بالسياره
منيره: هههههه.. يمه هذا اول الحين سارا قدرت تغيره ...وتعرف كيف تسيطر عليه ...
فوزيه: اقوم البس عباتى لا يعصب اكثر ..
عمر: يمه انتى ومنيره تعالوا معنا..
سارا: شلون يعنى وعزيز
منيره: انا بروح الحين معهم انا جاهزه ..
سارا: اوكي يالله ...
وطلعت سارا ومنيره وسالم الصغير ... عبدالعزيز جالس بالسياره .. وينتظر على احر من جمر ...
سارا: عزيز انزل ركب سالم بكرسيه وانا بساعد منور ..
نزل عبدالعزيز واخذ سارا
عبدالعزيز: وانتوا لازم ساعه على ما تخلصون .. هذي الي داقه على وتقول لى بسرعه بسرعه
منيره: هههههههه .. تدري ايش قاعده اذكر ..
سارا: ايش..
منيره: يوم يعصب عليك عبدالعزيز بالجامعه ... تذكرين سارا
سارا: يووه منور ..
عبدالعزيز: ههههههههه منور الله يقطع شر بليس.. الحين اذا صاحت سارا ايش يسكتها ..
سارا بعصبيه : عزييز..
.................................................. ...........


تم

خلف الكواليس..


-فكره كتابه قصه كانت في بالي كثير .. وتشجعت يوم شفت قصص الاعضاء .. كانت لى محاولات بسيطه خارج النت .. وكلها بالعربي الفصحه .. بس قصه خوف من الحب هي اول قصه عاميه طويله لى ..

- بدت تتمحور لى الفكره وانا بالمحاضره .. ومن زود التركيز قاعده اتخيل قصه .. رجعت البيت وقلت لاختى وشجعتنى .. فكتبتها .. بعدين قريتها ولا عجبتنى وحذفتها .. وعلى طول ندمت .. ورجعت اكتب قصه ثانيه بفكره ثانيه..

- قصتى الاولى البطل فيها كانت شخصيه عمر .. وهذا الي كنت ناويه اسويه من اول .. رجل فاقد زوجته الي كان يحبها بعدين يتزوج عشان يرضى اهله وعشان العيال .. ومع الوقت يحب زوجته .. مادري ليه انقلبت الاحداث وصار عبدالعزيز البطل وعمر شخصيه من الشخصيات ..

- باول يوم نزلت القصه جلست حول ساعه انتظر رد .. وبعدها يأست وطلعت .. في اليوم الثاني دخلت بكل تشوق .. انصدمت يوم شفت رد واحد من الاخت صوغه .. بس موقفها كان مرره حلو .. وتشجيعها لي في البدايه ساعدنى .. قالت لى نصيحه .. انى مع الوقت راح اكسب والمفروض ما اتضايق من تاخر الاعضاء.. وبالفعل .. مشكوره صوغه من كل قلبي اشكرك ..

- القصه كانت احداثها سعيده .. وكنت مقرر ما ادخل الحزن فيها ابدا ...وبيوم كان عندي اختبار مرره صعب ويعقد الواحد .. حامت كبدي وانا ادرس.. فرجعت افكر بالقصه وجاتنى فكره الحادث .. قررت احطها بس ما عرفت اموت مين .. كنت ناويه اخلى عمر هو الي يوصلهم بعدين يموت .. بعدين قلت حرام مين يبقى لمي .. كنت جالسه مع خواتى بالمجلس ونفكر .. انتقل تفكيرنا لمنيره انها هي الي تموت .. ما قدرت اتقبل هالفكره .. شلون قصه من غير منيره .. ماراح يتعدون موتها الا بعد سنين .. فطاح الضحيه سالم مع انه هو بعد غالي ... وقررت اشلل منيره .. ويوم قلت لصديقتى قالت لى ليه ما تشوهينها شفتوا هي الشريره مو انا ...

- ومن الافكار الي غيرتها ردت فعل طلال .. كنت ناويه اخليه يتمسك بمنيره مره ولا يقبل يتركها وهي الي تصر على رفضها له لين يياس.. بعدين قالت لى نفس الصديقه الي شوهت منيره ليه .. مين قال لك كل الناس طيبين ... وشولن تبين من شاب توه في مقتبل العمر يرتبط بانسانه معاقه .. وهو مابعد يكون بينهم أي علاقه حميمه ..وكان معها حق ..

- مواقف ومشاهد في القصه .. استمديت بعد المشاهد من الواقع الحالى .. مواقف صارت لى او صارت لغيري.. منها لبابه من سارا .. صارت لنا نفس القصه وحنا في فرنسا .. والجزائريه الله يهديها ماعرفنا نتفاهم باي لغه معها ... بس لو جينا الصدق ماكان اسمها لبابه ... ومثل موقف منيره بعد ما رجعت من الكوفيرا وغسلت وجهها من المكياج .. اخذته من اختى .. نفس الشي رجعت ولا عجبها وضيعت الفلوس على الفضاي .. وفي النهايه هي الي حطت مكياجها ... موقف فوزيه من بناتها وسالم .. دايما تقول لا تدلعهم .. بناتك مدلعات .. هذا السيناريو دايما يصير لنا مع الوالد والوالده اللله يخليهم .. وعلى قوله ابوي .. بناتى هم نقطه ضعفي ..وقف الام .. اكيد الي بالشرقيه يعرفونه كثير .. عجبتنى الفكره ودخلها بالقصه .. ومثلها مثل مقاطعه المنتجات الامريكيه ...

- مشاهد اضيفت من اجل القراء.. اولها مشهد منيره وعبدالله .. يوم شافها بالغلط .. كنت متعمده عشان اضللكم .. واخليكم تشكون بالموضوع .. وشكلى نجحت كثير ..... وبعد مشهد دخول رهف لغرفه سلمان ... وسلمان وهو يمسك ايد رهف بالمستشفى .. وصوره رهف الي وصلت ه ... والسهره الي جهزتها سارا لعبدالعزيز ولا جا لها ...

- مشاهد حذفت ... اولها رحله للبر كانوا بيروحون لها بالربيع .. بيروحون للسافنيه او شي زي كذا .. ولانى بغيت انهي القصه حذفت هذا المشهد ... احتمال ادخله بقصتى الجديده لانه داخل مزاجي مرره ...

- مشاهد ندمت عليها ... خساره عبدالله .. لانى ما عرفت اكملها او ايش اذكر بالضبط .. كل الي خلانى اذكر هذا الشي.. ابي ابين حنيه محمد ومساعدته لاخوه بعدين انكبت .. والاخير انهيت الموضوع ...

- عنوان القصه حيرنى كثير .. ما حبيت انزل قصه من غير عنوان .. كنت ادور على عنوان يشد القراء.. مابقى قصه بالبيت الا وطلعتها وقريت عنونها .. وفي النهايه حبكت هذا العنوان وكتبته .. وحاولت اخلى الفكره عليه عشان يتناسبون .. المشكله انه عنوان خاص .. والقصه بدوا الابطال الثانين ياخذون حيز كبير منها .. ويقل دور الابطال الرئسيين .. وهالشي خلانى اندم على العنوان كثير.. بس خلاص ما كان بايدي عيله ولا اقدر اغيره ...

- لاقيت تشجيع كبييير من اهلى .. خصوصا اختى الصغيره 16 سنه .. ما كنت اقدر اكتب صفحه الا لازم تقراها وتعلق عليها .. واذا قالت كل شي تمام اكمل الي كتبته .. ماعمري نزلت جزء الا بعد ما تخلص قرايته وتصحح الاخطاء الي فيه لانى ما احب اقرى شي كتبته ... ولا اراجع حتى اوراق الاختبار.. فمهمه المراجعه كانت عليها هي .. يعنى بو نوره وجود البدليات بسببها والله ...

- بنت عمتى ... امم مشكوره يا قلبي على كل مساعده منك .. حبت تكون في موقع القراء.. وكانت تقرى قصتى عن طريق النت .. وتقولى رايها وتشجعنى كثييير ... مع انها الدبه بالبدايه ما كانت متشجعه تقراها ..

- وحده من صديقاتى M&m تدخل المنتدى كثير وتقرى قصص.. حبيت اعرف رايها من غير ما تعرف انى انا الكاتبه .. فسالتها ايش القصص الي تقراهم وطلعت تقرى قصتى .. وحاولت اسالها بطريقه غير مباشره عنها وما كانت حاسه ابد .. بس الله يهديها قبل الجزء الاخير بشهر اشتغلت لنا تشارلز هولمز وقدرت تعرف مين انها .. ومن غير سابق انذار تدق علي وتقول لى .. اهلين بنت امها .. انا انصدمت وجلست جامده مو عارفه بايش ارد عليها .. كان ودي ما تعرفنى الا اذا قلت خلف الكاوليس.. واعرف رايها من غير أي مجامله ...

- ناس كثير قالوا انى اخذت افكار من قصص ثانيه .. وهالشي ما انكر انه ضايقنى .. وخلانى اتعقد ولا افكر اقرى قصه الا بعد ما انهي قصتى عشان عقلي الباطن ما ياخذ افكار غيري ...

- مقطع الحفله يوم تشوف رهف الرجال وتحسبه ابوها .. ترددت كثير وانا احطه خصوصا ان اختى تقول ما يدخل العقل ولا يصير في الواقع ويجي بس في المسلسلات .. وبالفعل قررت احذفه .. وفي نفس اليوم كنا انا واختى امي راجعين من مشوار .. وحنا بالطريق امي شافت واحد بالسياره الي جنبنا يشبه اخوي .. قالت لنا انها بعد فتره من وفاة ابوها كانت تشوف رجال كثير يشبهونه .. وتقول ما عمر مرت جنبهم سياره جمس الا لازم تشوف السايق.. لان بوها كان عنده سياره جمس.. تقول كل على بالي ان الي يسوق هو ابوي .. ولا يرتاح قلبي الا بعد ما اشوف وجهه الرجال واتاكد انه مو الوالد .. تقول ان العقل الباطن ما يتقبل الفكره على طول .. فهالشي خلانى ارجع لفكرتى الاولى واذكر هالموقف...



منتديات غرام ....

بأشراف .... ! غموض بينه !
أحدث أقدم