رواية قلوب بلا ملامح -4

رواية قلوب بلا ملامح -4

غير.. الظـــــــلام..
ابو طارق بتأثر: بس يا ولدي هذا قضاء وقدر.. أحمد ربك إنها جات سليمه وما مت في الحادث..
ياسر: يا ليتــــــني مت.. ولا عشت اعمى..
ابو ياسر منصــــدم: ياســـــــر ..!! إش تقول!
ابو طارق إلي تقطع قلبه على ياسر إلي يحبه مثل حبه لعياله: حبيبي ياسر.. تعرف إنك بمجرد تمنيك الموت.. ترتكب معصية.. وتغضب رب العالمين.. أجل كيف تدعي بالموت على نفسك؟؟
ياسر بعصبيه: خلاص خلوني في حالي.. حتى زوجتي إلي توي ما تزوجتها إلا شهر.. وشفت السعاده معاها.. اول ما حصلي هذا تركتني.. !

ابو طارق عقد حواجبو: اخصرك منها.. هذا لأنها مهي مخلصه لك.. وإصحك تفكر بإلي يخونك.. ربي يعوضك..

ياسر: هه .. مين إلي بترضى بواحد مثلي.. أعمـــــــى؟!!

ابو ياسر: اتعوذ من الشيطان يا ياسر..

ابوطارق: ياسر.. يا ولدي.. ترا وقسم بالله في كثير بيرضون فيك.. صدقني..

ياسر بسخريه: عمي ترا ابويا ما قصر.. خطب لي مره ومرتين.. بس ما حد راضي بمثلي.. انا خلاص.. حأبقى لآخر حياتي وحداني..!

ابو طارق إلي كان عطوف مره وحنون.. وهذا ياسر عزيز مره عليه ويحبه مثل عياله، وولد اعز اصدقائه إلي هوا ابو ياسر..

ما قدر يشوفو .. كذا متألم وفي لحظة مشاعره كلها فاضت..

ابو طارق: أنا عندي عروسه لك..

ابو ياسر: بالله عليك يا بو طارق..

ياسر تفاجئ وسكت..

ابو طارق بثقة: ايوا وما راح ألقالها أحسن منك..

ياسر بضيق: يا عمي معليش بس ما ابغى اخذ بذي الطريقه.. وعطف منك علشاني..

ابو طارق: لا يا ولدي إنتا معزتك زي معزة عيالي طارق ومهند.. ولا يمكن أرضى عليك.. وبعدين بنتي ما راح تلقى احسن منك..

ابو ياسر: بنتك.. ! ..( وقال لنفسه) "وربي ما في مثلك يا بو طارق.."

ياسر: بس يا عمي ..

ابو طارق: لا بس ولا شي.. الملكه حتكون الاسبوع الجاي..

ابو ياسر: لازم تشاور البنت اول..

ابو طارق: ما عليك أنا اعرف مصلحتها.. وبعدين ليه ترفض ولدك..؟ الحمدلله ولد رجال.. ما ألقى مثلو ياخذ بنتي..

ياسر: عمي تراني أعمى..

ابو طارق: وإذا...؟ .. ياسر خليك واثق وما عليك.. وقلتلك ما راح ألقى احسن منك لبنتي..

مسح على جبهته .. حس إنه تعبان مهو قادر يصلح غلطته مهما كانت معزة ياسر.. بالتأكيد ما راح يعزه اكثر من بنته جنا.. بنته ودلوعتو..

تذكر إنها من اول ما قالها.. ما ابدت فعل.. كان واضح له كيف كانت مصدومه.. بس بعدين شافها تجيه وتقوله إنها موافقه .. ما توقع ابدا إنها ما تبا تكسر كلمته ولهذا وافقت .. توقع إنها إقتنعت بكلامه إلي قاله لها بخصوص نفسية ياسر وإنه عزيز عليه.. و..

وحدثت الملكه.. وأهيه ألحين مر عليها اسبوع وجنا بهذا الشكل.. طول الوقت يحسها متضايقه وسرحانه.. حتى الضحك إلي شافه منها اليوم حس إنه مو من قلبها..

"آه يا بنتي.. إيش سويت فيكي..!.. (تذكر يوم الملكه كان يحس إنو الجو بين بنته وياسر غريب). يعني هيّا مكأنها عروسه حتى لما تزبطت.. تزينت على خفيف قالتلي امها انها سمعتها تقول إيش الفايده اتزين وهوا اعمى.. لا والمشكله ما شفتها حتى ترفع نظرها له.. وحتى هوا حسيته حس بالجو ما كمل ربع ساعه وخرج اعتذر إنه تعبان شوي.. ااخ لو ادري إيش إلي حيحل الموضوع.. بدون لا آذي ياسر أو جنا.."

.

.

في بيت ابو حسام..

.

حسام: امي صحيح إلي قالته ليا سمر..؟؟

ام حسام طالعت فيه بتسائل: ..؟؟

حسام: وعد....هنا؟

ام حسام بضيق: ايوا يا ولدي.. شفت إيش حصلها.. !

حسام: الله يعينها..

دخلت سمر عليهم وباين الحزن في وجهها..

ام حسام: نامت؟

هزت سمر راسها بالإيجاب..

حسام: إلا كيف جات..

ام حسام: سامر ولد عمها جابها..

انقهر حسام ما يدري ليه بس الدهشه قضت على قهره: ســـامـــر يؤ إيش جابه.. اا اصلا إيش عرفه بإلي حصلها..؟؟؟

ام حسام تتنهد: .. هي قالت إنو ابوها قبل لا يموت الله يرحمه... اداها رقم سامر.. إلي ما تدري من فين جابه..

حسام: طيب هوا فينه ألحين؟؟

ام حسام: علمي علمك..

حسام: حطها وراح..؟؟

ام حسام: ايوا..

إلا وفي هذي اللحظه يرن الجرس..

حسام: بروح اشوف مين..

.

.

عند الباب..

حسام مندهش..

... : حسام؟

حسام: ايوا.. (ترجع بيه الذاكره).. يقول في نفسه.. "معقول يكون هذا إلي قدامي سامر.. ياالله وقسم بالله ما تغير معنه مده طويـــــــــله ما شفناه.."

حسام: سـ ـامـــر؟؟

سامر بهدوء: ايوا أنا سامر.. كيفك حسام؟

حسام ابتسم وقرب يسلم عليه: الحمدلله وإنتا كيفك يالقاطع؟؟

سامر ببرود سلم عليه: الحمدلله .. إلا فين عمي محمد؟؟

حسام: تعال تفضل.. ألحين أناديه لك..

((::توضيح:: سامر ما جا حبا فيهم.. بس جا علشان يسوي الواجب يعزي ويعطيهم شهادة وفاة عمه فهد..))

.

ابوحسام: هلا سامر..

سامر: اهلين عمي..

ابوحسام: كيفك يا ولدي..؟؟

سامر: الحمدلله.. كيفكم انتو؟؟

ابوحسام: تمام ماشي الحال.. إلا إنتا وينك إش هاذي القطيعه.. ؟

سامر طفش من هذا السؤال وحب يغير الموضوع: شهادة وفاة عمي معايا..

ابوحسام بحزن وغصه بحلقه..: .. الله يرحمو..

سامر: امين ويرحم جميع موتى المسلمين..

ادى سامر شهادة الوفاة لابو حسام.. وكان بيسأل عن وعد بس ما عجبته الفكره..

سامر: عظم الله اجركم..

ابوحسام: اجرنا واجرك يا ولدي.. جزاك الله خير.. والمفروض نعزيك إنتا كمان..

سامر طالع فيه بنظره بارده.. وسكت..

دخل سمير وفاجأهم: احلــــــــــــى يالخطير.. (يكمل بإستهبال) سامـــــر المختفي من ست سنين عن اهله واحبابه يظهر فجأة! محال أن يصدق..

طالع عليه سامر وابتسم بسخريه على جملته وببرود: اهلين..

سمير: ههههههاي ما تغيرت !.. معني كان عمري عشر سنين اخر ما شفتك.. بس وربي فاكرك.. محد ينسى ( بدق في الكلام) العصبي والشراني والـ...

ابوحسام: بس يا سمير..!

سامر بنظرة استحقار: خلي ولدك يقول إلي في قلبه (وبإبتسامه سخريه) يا حبيبي هذا كله مخبيه من وانتا خبل في العشر سنين..!!

سمير بعصبيه: هااااي إنتا لا تغلط..

حسام توه داخل المجلس: هاااااي اشبكم انتو.. اشبها اصواتكم عاليه كذا؟؟

سامر يوقف: انا طالع..

حسام: سامر توك داخل..!!

ابوحسام: اجلس لو شوي خلينا نطمن على احوالك..

سامر في سرو .." خخخخ تظمن على احوالي.. إلا ملقوف وربي.. إنقلع إنتا ووجهك" وبعدين قال: سوري بس لازم اطلع ألحين.. ما احب اجلس في اماكن فيها (وهوا يأشر على سمير من فوق لتحت وبنظرة إستحقار) فيها هاذي الاشكال..

حسام: ليه إيش سوا سمير..!!

سامر طنش الكل وطلع..

ابوحسام في سرو.. " اوووف.. خليه يولي" ..

حسام يطالع في سمير: إنتا لازم تسوي بلاوي لكل أحد..

سمير سكت وبقهر: كذا.. حر.. مزاج..

حسام بقهر: بس هذا ما شفناه من ست سنين وتوه جااااي يا خبل..

سمير: اوهووووووو علينا خلاص فكنا .. يا خي لو اتذكر حركاته زمان إلي ما انساها في يوم انقهر وودي اخذ كل حقي منه ألحين..

ابوحسام رجع لهم: تصدقو يا عيال.. سامر مره ما تغير ابدا!

حسام طالع فيه وسكت..

سمير: ايوااا هذا هوا.. ما تغير..

ابوحسام طالع فيه وما هاوشه .. سكت عنه.. لانه بنظره مو لازم يجبر عياله على احترام ذاك طويل اللسان وإلي من يوم ما عرفه وهوا يكرهه من كل قلبه..

.

.

.

عند وعد فوق فـ الغرفه..

كان الهدوء يغيم حواليها .. ما نامت إلا قليل.. إرتاحت وألحين ما عندها نوم تحس بالتوتر..

"..آآه يا ربي.. ألحين إنتقلت لمنطقه ثانيه اعيش فيها ومادري هل حأغادرها في اقرب فرصه أم سامر حيغدر بيا وما يسوي إلي طلبته منو.. آآه ما ابا اكون عاله على احد.. ابا اكون نفسي على نفسي.. آآه.."

.

تدخل عليها سمر مبتسمه: توقعتك حتنامي أكثر من كذا..

وعد ابتسمت: الحمدلله اكتفيت..

سمر: سامر جا توو..

وعد تذكرته وما تدري ليه حست بغصه: ..

سمر تضحك: بس ما كمل نص ساعه وخرج.. (وبخبث) شكله تهاوش مع سمير..

وعد رفعت حواجبها: تهاوش..!!!

سمر: لا تقلقي صحيح نفتكر إنه حق مشاكل.. بس برضو سمير حق مشاكل.. واصلا حسيت إنه كان وده يسوي شي من يوم ما فكرته بيه.. وقولتله إنه في المجلس.. خخخخ

سكتت وعد شوي وبعدين أكنها أفتكرت: صحيح وين خالي سامي..؟؟

سمر: مسافر..

وعد ابتسمت: اكيد بيحضر الماجستير في الطب.. هذا كان حلمه..

سمر ابتسمت: إلي قولتيه..

وعد: اشتقت له مــــــــره.. متى يجي؟؟

سمر: وربي مدري .. بس يمكن السنه هاذي ولا السنه الجايه..

وعد: ما تكلموه؟

سمر: قليل.. (وابتسمت) وعوده.. حكيني عنك..؟

وعد: حددي..عن ايش يعني؟

سمر: عن كل شي .. بداية غربتك وحياتك هناك..

قبل لا تتكلم وعد رن جوال سمر..

ابتسمت سمر وقالتلها: دقيقه بس وما راح افكك..

.

سمر: هلا والله بجنا..

جنا : هلا سمر..كيفك؟

سمر: تمامووون..وإنتي كيفك؟

جنا بهمس: الحمدلله

سمر بقلق: جنا إشبك..!؟

جنا بتعب: تعبانه شوي.. إنتي فاضيه؟؟

سمر طالعت في وعد شوي بس لما حست إن جنا تحتاجها قالت: ايوا تبي تجي..

جنا: ايوا انا جايه بس عشر دقايق واكون عندك..

ابتسمت سمر: طيب اوكي ..

بعد ما صكت سمر الجوال عن جنا.. طالعت في وعد..

سمر: وعد هاذي جنا بنت خالتي ناديه.. وبنت عمي ماهر وخالك بنفس الوقت ههههههه تفتكريها.. (( ماهر.."ابو طارق" ما كان له احتكاك كبير بوعد ولا ابوها.. ما كأنه خالها..))

ابتسمت وعد وضحكت: هههه اكيد .. انا ما انسى احبابي..

سمر: ألحين هيّا جايه..

وعد بفرحه: والله؟

سمر ابتسمت: إيوا والله.. أنا نازله ألحين استقبلها وعلى طول إن شالله نطلع عندك..

وعد: اوكــــــــي..

.

.

سمر: يا هلا والله يا هلا..

جنا: اهليــــــــن فيكي..

سمر: كيفك حبيبتي؟

جنا تحاول تبتسم: الحمدلله على كل حال..

سمر بخوف عليها: جنا حياتي إيش بك؟؟

جنا: خلينا نطلع لغرفتك وأكلمكي..

سمر ابتسمت: لا غرفتي خليها للـمفاحأة يالحلوه..

جنا ابتسمت وسكتت..

سمر قربت منها: جنا تكلمي..

جنا عينها دمعت: سمر أحس إني ضايعه..

ضمتها سمر وقالتلها: جنا أنا صراحه محتاره معاكي ولا أعرف الحل.. بس بقولك على وحده يمكن تعرف تساعدك..

((::توضيح:: هذا لأن وعد ماشالله عليها من يومها وهي عقلها واسع وتعرف للحلول ..وتفهم النفسيات.. وتعرف كيف تتعامل معاهم.. عشان كذا دايما البنات يستشيرونها.. معنها كانت صغيره بس طول عمرها بعقل كبير..))

تفاجأت جنا وفتحت عينها: ميـــــن؟؟

ابتسمت سمر: وعـــد..

جنا عقدت حواجبها: مين وعد؟؟؟

سمر: ما تفتكرين وعد.. بنت عمتي..

جنا: اها.. طيب وعد مسافره يالذكيه..!

سمر ابتسمت اكثر: (وهي ترفع حواجبها) وعد فوووق..

جنا: إيش بك صاير فيكي شي!!!!!!

سمر ضحكت: ههههههههههههه وربي إنها فوق في غرفتي..

جنا بتريقه: يا غبيه وعد فأمريكا..

سمر بهدوء: رجعت..

رددت جنا ببلاهة: رجعت!

سمر: رجعت..

جنا ببلاهة تضحك: رجعت!

... : رجعت!!

طالعو على جهت الصوت المرح الطفولي متفاجئين..

سمر: هنوف..!

الهنوف: هههههه اشبكم .. رجعت رجعت رجعت رجعت..!!! أكنكم مجانين..

سمر: بس خلاص

ابتسمتلها جنا.. : يا عمري إنتي.. كيفك؟

الهنوف: طيبه

حنا: الحمدلله..(ولفت على سمر) طيب بتأكد خلينا نطلع .. لأني أتوقعه مقلب..

سمر رفعت حواجبها بثقه: ياللا..

جنا: نشوف آخرة الثقه هاذي!

.

بعد ما طلعو...

سمر فتحت الباب بشويش.. وجنا تطالع فيها بمكر..

وابتسمت سمر بثقه وفتحت الباب على كبرو.. : سبرايـــــس!

دخلت بسرعه جنا الغرفه وبعدين ضحكت: ههههه وين إن شالله الوعد؟؟

سمر متفاجأة: وربي ما أكذب.. وين راحت..

جنا: اقووووول اعترفي.. يا كذابه..؟

وفجأة أنفتح باب الحمام.. ،، الله يعزكم ،،

وطلع وجه وعد المورد.. وابتسمت لما شافتهم..

جنا من المفاجأة ما قدرت تتكلم.. : .. (مره ما توقعت هذا الشي.. كانت متأكده إن سمر تضحك عليها)

طالعت في سمر إلي كانت مبتسمه بإنتصار.. ورجعت طالعت في وعد وهي مبلمه

وبشفايف مرتجفه: وعد؟!!

قربت منها وعد مبتسمه: ايوا يا حبيبتي جنا .. انا وعد..

راحت لها جنا بسرعه وضمتها: وحشتيــــــــــــــــــــــــــــــــــني ..

ضحكت سمر: طيب عرفنا.. بس لا تخنقي البنت!

ضحكت وعد: هاااي إنتي إيش دخلك .. أنا ولا أنتي!!

جنا ضحكت وهي تبعد نفسها: هههههههه وربي مني مصدقه..

وعد: ربي يسعدك حبيبتي.. وربي إني مشتاقه لكم كلكم..

سمر وجنا ابتسمو لها

جنا: حمدلله على سلامتك..

وعد: الله يسلمك..

جنا رفعت حواجبها بسخريه ممازحه: ها ها .. ما قالتلي سمر إنك بترجعي بعد كم سنه ليسع..!؟

نزلت وعد راسها بحزن وسرحت شوي..

جنا اتغصصت وحست في شي: وعد إيش فيـــه؟؟

سمر دقت جنا بشويش واشرتلها تسكت..

سمر: وعد.. ما عرفتي آخر خبر

رفعت وعد راسها وابتسمت عرفت إنو سمر تبا تشيلها من حزنها.. "الله لا يحرمني منك يا سمر"..: ها إيش هوه؟؟

سمر طالعت على جنا بنظرة خبث: جنا .. ملكــــــــــت!

وعد اندهشت من جد: إيـــــــــــــــــــــ ش؟؟؟؟؟؟؟؟؟؟

سمر: خيانه.. ملكت قبلنا..هههه

جنا دقتها بقوه: اقوووول بس اسكتي..

وعد: ها ها ها ايش ايش.. قــــــــولي..؟؟( بعدين اتفحصت جنا) اقول وين الخدود المحمره.. والإبتسامه الخجوله..

سكتت جنا ولفت وجهها للجهة الثانيه..

وعد تفاجأت مره وحست إنو في شي..

وعد قربت من جنا ومسكت يدها: جنا حبي.. إنتي منتي مرتاحه ؟؟

سكتت جنا وحست ودها تبكي ودها تصرخ.. تفهم الناس إلي جوا قلبها.. كل هذا عجزت تسويه.. إلي قدرت عليه إنها حطت راسها في حظن وعد.. وحطت قنبلتها..

جنا: تزوجت.. أعمــ ـى!

كانت صدمه كبيره لوعد إلي لمت جنا وما صدقت: جنا إيش تقصدي..؟

سمر طالعت في وعد: وعد.. جنا تزوجت من واحد ما يشوف ..

حست وعد إن الالغاز كثرت عليها..

وعد: يو يا بنات فهموني ..!!

جنا ما قدرت تقول شي.. وسكتت..

سمر نزلت راسها وبعدين رفعته ..: وعد حبيبتي.. عارفه إنك ما راح تصدقين إلي حصلها شي غير طبيعي.. يعني تخيلي ابوها جاها.. وقالها اسبوع الجاي ملكتك على ولد صاحبي .. إلي هوا اعمى.. وانا اعطيته كلمه ما اباكي تنزلينها لي في الارض.. لأنو ولد صاحبي هذا معزتو معزة اخوانك.. ونفسيته ادهورت .. وأنا حاط املي فيكي..

شهقت وعد: هاه يعني الملكه هذا الاسبوع..

بكيت زياده جنا وقالت: خلاص ملكتي راحت.. كانت الربوع إلي راح..

وعد: يؤ قولي والله..

جنا من بين شهقاتها: والله العظيم..

.. مر سكون عليهم لمدة خمس دقايق..

بعدها وعد استجمعت قوتها ورفعت راس جنا..

وعد بحنيه مع بعض الصرامه: جنا مو يعني زوجك اعمى يعني خلاص حياتك تعيسه معاه!

جنا: وعد إيش تقولين..؟

وعد: إلي سمعتيه!

سمر إندهشت من كلام وعد وفضلت تكون مستمعه.. تشوف إيش حتسوي بنت عمتها..

وعد: جنا .. كيف كانت ملكتك..؟؟

جنا بسخريه: تصدقي.. ما رفعت نظري له.. وقسم بالله ما اعرف شكلو.. حتى هوا بس ربع ساعه وخرج..

وعد: إنتي مجنونه؟؟

جنا: ليه أتعب روحي واتأمل في واحد اعمى؟؟

وعد دفت جنا بقوه وبعصبيه قالت: غبيه وقسم بالله غبيه..؟

، ،

يا ترى إيش ناويه وعد على جنا؟؟

وإيش موقف جنا من وعد وهل حيسبب هذا قناعه لجنا او عناد اكثر؟؟

وإيش بيصير بين جنا وياسر.. وهل حيجيها الخميس ويصير شي؟؟

ووعد إيش بيصير لها في الاحداث الجايه؟؟ هل حتلقى السعاده في بيت خالها؟؟

وسامر.. وش موقفه ووش حكايته مع ابوحسام وإيش بيصير بينهم بعد كذا؟؟

وسمــــــر ومهند إلي ما يبا يتزوج غيرها.. هل حيصير شي بينهم؟؟

امواج لا تستقر.. تابعوو معي..!

..::[]::[]::[]::[]::[]::[]::[]::[]::..

~)(~ الفصل الرابع ~)(~

[]**[].. غريبه هالدنيا.. وافعالها اغرب!! ..[]**[]

جنا بسخريه: تصدقي.. ما رفعت نظري له.. وقسم بالله ما اعرف شكلو.. حتى هوا بس ربع ساعه وخرج..

وعد: إنتي مجنونه؟؟

جنا: ليه أتعب روحي واتأمل في واحد اعمى؟؟

وعد دفت جنا بقوه وبعصبيه قالت: غبيه وقسم بالله غبيه..؟

سمر بعصبيه: وعد اش بك عـ البنت.. هاذي مهي طريقه تتعاملي معاها..

وعد: اسكتي يا سمر.. وخليني اكلمها براحتي..

سكتت سمر وحست إنو وعد ناويه على شي..

وعد بهدوء: جنا... ما توقعت تسيري بيوم من الايام ...(وصرت على اسنانها) وقحه..!

تفاجأت اكثر سمر..

وجنا سكتت وبلمت فيها: ...!

وعد: صراحه عمي ظنه خاب فيكي.. توقعك إنك بعقليه اكبر.. إنسانه بكل ما تعنيه الكلمه من انسانه (وذرفت عينها لأنها تذكرت ابوها) جنا.. ابوكي يعز هذا الولد.. ولما شاف نفسيته مدهوره .. حط اماله عليكي بأنك إنتي تقدري تخرجيه من إلي هوا فيه.. رحتي خيبتي اماله كلها.. وطلعتي زي أي بنت من بنات هذا الزمن..

سكتت جنا وحست نفسها صغيره قدام كلام وعد..

وعد: جنا انا طول عمري واحسك اكبر من كذا! غريبه ما توقعت إنك حتتغيري بهذا الشكل..

نزلت جنا راسها وما قدرت تقول شي..

سمر طالعت وعد تسترجيها تخف بكلامها.. تحس إنها تقسي بكلامها كثير على جنا..

وعد: بالله عليكي يا جنا.. إسألي نفسك.. ليه زوجك..(وهيّا قصدت تختار كلمة زوجك.. علشان تأثر فيها..) خرج بعد ربع ساعه وهاذا في ملكته.. ملكـــــــتــ ـــــــه..!! هه.. هذا لأنه ما رتاح.. تخيلي ما يرتاح مع زوجتو,,, لقى منها كل جفاف وتجاهل.. !.. وكيف ألحين تلاقين الدنيا كلها تسكرت في وجهو.. جنا إنتي ما تدرين عن الدنيا .. إيش دريكي إن شالله يتعالج.. خاصة إنه انعمى من حادث يعني بإذن الله له علاج.. ما سألتي ابوكي..؟؟

جنا بتردد: لا..

وعد عصبت: شفتي الاهمال..!! أسألك بالله في أبو.. يتعس حياة بنته.. اكيد ابوكي عارف إنه بإذن الله له علاج..وشايف فيه الرجل المناسب لكي..

ما لقيت جنا كلمه تقولها : ...!

وعد: بعد الملكه ما جاكي..؟؟

جنا بخوف: لا.. بس..

وعد: بس إيش..؟؟

جنا: يمكن يجي يوم الخميس..

وعد: إلي بعد بكره..؟؟

جنا: إيوا..

وعد: اوكي.. جنا.. بليز حطي لنفسك وله فرصه.. وطالعي فيه على إنه مو اعمى.. بليــز..؟

جنا رفعت نظرها لوعد وهي بالفعل حست كل كلامها أثر فيها بقوه.. ((::توضيح::جنا من النوع إلي يتأثر بقوه.. وكان خير كبير جواها.. بس الوساوس حقتها خلتها تعاند..))

قامت جنا وحظنت وعد وهي تقول: وعد والله إنك رائعه طول عمرك.. ما شالله عليكي.. وينك عني من زمان.. حتى امي ما سوتلي إلي سويتيه.. ربي لا يحرمني منك.. ويسعدك دنيا وآخره..

ابتسمتلها وعد وبحنان قالت: امين حبيبتي .. صدقيني إلي سويته واجبي.. بس إنتي اوعديني إنك تحاولي..

ابتسمت جنا: بحاول بإذن الله..

سمر: هههههه وربي إنك شي.. ماشالله عليكي.. إلي قولتيه ما كان بيخطر ببالي.. من جد كنت هبله..!

ضحكت جنا: هههه الاعتراف بالحق فضيله..

سمر: هاي هاي بس انا إلي اسب نفسي.. وأنتي عاد.. اص..

وعد وهي تحس إنهم مدينها اكثر من حقها بس ضحكت بغصة: ههههههه

.

.

.

... : بشار

بشار: هاه..

... : عمى قول نعم..

بشار: عبدالرحمن.. قول الزبده؟

عبدالرحمن ابتسم: يعني إذا قلتلك نفسيتك حتتصلح؟؟

بشار: اوهووو علينا.. متى تخلص إنتا؟؟

عبدالرحمن: سامر..

بشار عقد حواجبو بإستغراب: اتصل؟؟

عبدالرحمن: لا..

عصب بشار: ايش بو اجل.. ؟؟

عبدالرحمن ابتسم: بكبره جا هنا..

قرب منو بشار: ايش ايش ايش؟؟؟؟؟

عبدالرحمن: هههههههههه سامر هنا في جده..

بشار.. بلم فيه: !!

تدخل واحد من الشباب: بشار.. عبدالرحمن.. صحيح إلي سمعته.. سامر رجع..؟؟؟

بشار طالع عليه وعيونو بتطلع: يعني صح يا سالم..؟؟

اندهش سالم اكثر: انا أسأل!

عبدالرحمن ضحك: ايوا ايوا رجع سامر..

سالم: بالله..

عبدالرحمن: ويمين بالله

بشار: اقووول عبدالرحمن.. وينه..؟؟

عبدالرحمن: اليوم حيكون في استراحة الـفيصل في حدود جده هناك عشا له.. واكرم قاعد يجهز هناك.. إحنا ما قلناله.. حنسويها له مفاجأة..

بشار: طيب أنا اوريكم ما تقولولي..!!

عبدالرحمن ضحك: ههههه وربي اسف بس اهوه انا ألحين جاي اقولك.. والعشا سويناه بسرعه علشان ما نتأخر..

سالم: طيب وانتا روح ساعده.. انا حأكلم الشباب الباقين..

عبدالرحمن: اوكي.. انا ألحين رايح..(ولف رايح)

بشار: ابو عبود.. بسألك وينو الحين سامر؟؟

عبدالرحمن ابتسم(عارفه إنو اعز واحد على سامر الصديق الروحي بشار) : هلا

بشار: وينو هوا؟؟

عبدالرحمن حب يرفع له ضغطه: مين؟؟

بشار: اووووف من هذا الغبي.. يعني مين بالله عليك.. مين كنا نتكلم عليه تونا؟؟

عبدالرحمن: اها قصدك سالم.. شوفه رايح للشـ...

قاطعه بشار: اقوووووول لا تستهبل.. وين سامر؟؟

عبدالرحمن: مين سامر.. سامر مسافــــ....

بشار ارتفع ضغطه زياده وعصب وقاطعه: يالدلخ.. يالغبي يالـ..

عبدالحمن: ههههه بس بس خلاص..

بشار دفه بقوه: عبدالرحمن قولي وين سامر؟؟

عبدالرحمن وهوا يبعد بشار: هههه اقول بروح ألحين عندي شغل..

بشار خلاص بغى يذبح عبدالرحمن: هااااااااي انتا رفعتلي ضغطي فكنا ياخي وقولي..

عبدالرحمن: اقولك ايش؟؟؟

بشار هنا ما صبر راح طيح عبدالرحمن وقعد يضربو.. وكان هذا على دخلة اكرم..

اكرم: هااااي انتو اشبكم..... يالشباب خير إيش فيكم؟؟؟؟؟

عبدالرحمن مخنوق: اكرم بعده عني..

بشار: اقوول ما راح افكك.. تلعب بأعصابي هاه؟.. شايفني مغفل عندك!!

اكرم: بشار اش بك.. إيش هذي العصبيه.. ؟

عبدالرحمن: وربي مو جايبها من بعيد.. (وهوا يغمز لأكرم)

اكرم: هههههههههههههههه (يقصدو سامر)

بشار فهم قصد عبدالرحمن وبعد عنه: طيب اوريكم وربي لو بس ألقاه.. (وبصرخه) وينـــــه؟؟

اكرم: ما قلناله حيكسرنا هذا! ههههههههههه

عبدالرحمن: ههههههههههههههههه

بشار نفذ صبره ويقول لنفسه.. "اوووف دايما هذولي يحبو يرفعولي ضغطي ياااااربي ايش اسوي فيهم..!!"

بشار بتريقه: هي هي هي ما تضحِكون.. تعرفو انو إلي تسونو البزران ما يسووه..!

كركرو عبدالرحمن واكرم إلين ما قالو بس بعدين قال اكرم: اوكي اوكي ياللا انا لازم اكمل اعمالي الحين.. ياللا سي يو..

عبدالرحمن سرع مسكه مع يده: وانا معاك لا تتركني مع ذا الشرس..

وبعد ما بعدو مسافه من بشار وهوا واقف يطالع فيهم بطفش وده يقتلهم..

لفو عليه وقال عبدالرحمن: بشار تعال للإستراحه وحتشوفه..

بشار زهق وانرفع ضغطه وكره حياته كلها علشان إلي سووله.. "يووه وربي ما يعرفو معزتك بقلبي يا سامر ولو بيدي كسرت الدنيا علشانك.. ياالله ألحين اعرف إنك بجده واعجز اوصلك.. اووف يعني لازم استنى هاذي الساعتين.. اووووف وقسم بالله لأردها لكم يالحيوانات يالكلاب يالزبالين يالــ ...ّ!" ((خخخخخ طايح سب فيهم .. ههه ما بيده حيله!))

.

.

عند باب الاستراحه..

وقف سامر.. "هاذي الاستراحه إلي قالولي عليها الشباب..!"

دخل بهدوء استغرب لقاها مليانه شباب بالمرررره..

دخل شوي وشاف الشباب يطالعو فيه ويبتسمو.. وإلي يقول "هذا سامر".. وإلي جايله رافع يدينه بالاحضان..

ما توقع هذا العدد كله.. بس مع هذا عينه راحت تجي وتروح في الوجيه.. كان يدور على واحد بحد ذاته بس ما لقاه..

راح يسلم عليهم .. وعينه ما زالت تدور في الوجيه,, بس للأسف مهو فيه..

حس إنه متضايق... نفسه يشوفه هوا فينه؟؟ ويقول لنفسه "معقوله ما جا؟؟"

شاف اكرم.. وراح يسأله: اكرم.. وين بشار؟؟

ابتسم اكرم وتذكر إلي سواه عبدالرحمن ببشار.. وإلي حاصل جوا غرفة الاستراحه..بس بعدين تدارك نفسه وسوا نفسه اكتئب: بشار!

سامر رفع حاجبه الايسر: اقول مني غبي تضحك علي وبلاش تمثيل.. وينه هوا؟؟

عرف اكرم إنو سامر ما ينضحك عليه بسهوله عشان كذا قلب الموضوع نرفزه: مين هوا؟؟

اتنرفز سامر: اوهوو علينا وين بشـــار؟

اكرم ضحك: ههههههه اها..

سامر دقه على كتفه وراح عنو عرف إنو حيطفشه ما نسي ايامهم زمان.. وإلي كانو يسوونه..

راح لغرفة الاستراحه وفي الطريق صدم في واحد كان يجري.. بس ما انتبه لوجهه.. بس أكتفى انو يصرخ: هاي شوف قدامك..!

... : اقووول انقلع.. بروح اشوف الحبيب جاي وإنتا تتضارب معايا..!

سامر بس شاف هذا من ظهره وهوا مندفع ويقول هذي العباره.. ولف على قدام وشاف عبدالرحمن فاطس ضحك استغرب.. ورجع طالع لورا..

يتبع ,,,

👇👇👇

تعديل المقال