بداية

رواية اعترافات رجل -15

رواية اعترافات رجل - غرام

رواية اعترافات رجل -15

شفت الاغراض ..كانت ملابس وأكل ..
حطيت الأكل للريال وعزمته ..
ــ أخ يوسف ما بتتغدى؟
ــ لا ...ما بتاكل؟؟
ــ لاء ماباكل ..
رغم أني ماذقت شي من الظهر ...بس ماني يوعان ..حطيت راسي ونمت ..بكره الصبح يصير خير ..
الفصل العاشر والأخير .
شربت كاسه الجاي ..اللي حسيت أني محتاجها صحيح ..
تمام (الريال اللي معاي في الحجز)ــ يوسف ما بتاكل؟؟
هزيت راسي بلا ..
تمام ــ بس |أنت ماكليت شي من أمس ..
قبل لا أرد عليه ..
علي ــ يوسف ..
قمت من مكاني بعد ماحطيت كاسه الجاي ...
ــ صباح الخير ..
علي ــ صباح النور ..شكلك اليوم أحسن من أأمس ..
ــ صحيح ..ارتحت شوي أمس كنت على أعصابي ..
علي ـــ كان مبين ...الحمدالله أن كل شي مر على خير ومحد مات ..
سكت ,وماقلت شي ..
علي ــ تفضل ..
ــ شكرا .
دخلت كان بوناصر ومعاه ليال وسمير ..
ــ السلام عليكم ..
ــ وعليكم السلام ..
بوناصر ـ لا اليوم أنت أحسن من أمس ..
ــ الحمدالله ..
بوناصر ــ بروح أ تريق ..وأخليكم براحتكم ..
وطلع من المكتب ..
ليال ماكتمت عبرتها اللي كانت تحاول تكتمها ..
ــ لاتصيحين ليال ..
سمير ـــ حصل ايه يا استاذ؟؟ ماعرفناش ايه حصل ..
ـــ ماشي مهم ..بس أمس تهاوشت ويا الاهل ..بس ..
ليال ــ رغد؟؟؟؟
ــ لاء..مب رغد ..زوجة أخوي المرحوم ..ويات الشرطه ..
ليال ــ بترفع عليك دعوى ؟
ــ ما أدري ..بس هي الحين في المستشفى ..
ليال ــ بحاول أنا أني أمنعها من انها ترفع القضيةو برابط عندها بس ماترفع القضية ..
سمير ــ لها الدرجة يا أستاذ؟؟ ماتوقعنك بهالقسوة ..
ــ شسوي يا سمير .. في نوبة غضب ..
ليال ــ زين من محاميك؟؟
ــ أنا محامي نفسي ..
ليال ــ انت موكلني أنا فاسمحلي أنا بحامي عنك ..
ــ لا ..ماله داعي ..بس رتبي أموري في المكتب وايد عليج ..
ليال ــ أستاذ ..لك جميل علي ..وأنا مصممة أرد هالجميل ..
ـــ جميل ولا قبيح ..هالقضية ماغيري بيقوم فيها ..لاني أنا الشخص الوحيد المعني فيها ..تعال سمير اليوم مقابلتي مع فهد ..
وحاولت أشغلهم عن قضيتي وتكلمت في أمور المكتب .لكن نظرات ليال وعيونها المغرقة بالدموع ..ماقدرت أسلم منها ..
ليال ـــ يبنا لك فطور وغدا ...
ــ ماكان له داعي ..
ليال ــ لا ..أكيد الأكل هنا مب شي ..
ــ الحمدالله كله خير ونعمه ..
انتهت الزيارة ..
دخل بوناصر ــ خلصتوا؟؟
ــ اييه كنت أوصيهم على المكتب .
بوناصر ــ شوف يوسف أنا بأجل القضية شوي وما بحولها للنيابه .. بنطر وأشوف يمكن اللي رفعوا القضية يتنازلون ..عاد وصي الاهل يحاولون لانه لو استلمتها النيابه كل شي بينتهي ...
ـــ والله يا بوناصر ما عرف شلون أشكرك ..كل اللي تسويه ..
قاطعني ــ لا تنسى يا يوسف أني أنا نفسي ممنون لك ..وأنت متردني أبد في شي ...وياما ساعدتني ..فلا تتكلم ولاتقول ..ولاتتشكر ..هذا واجبك وأقل من واجبك ..
سكت ..وماقلت شي...رجعت للحجز ..وأنا أفكر في آخرة هالعنا ..أنا قانونيا مذنب ..وشهادة الطبيب أكبر دليل ..اذا قلت كل اللي صار ..بيتأذون وايد ..وأولهم عيال أخوي وأهلي ..خليني كاتم في قلبي ..وأشوف النهاية ايش بتكون ..
اليوم الثالث في التوقيف ..
مازارني أحد ..بس وصلني أكل وأغراض ..وينك ياجاسم ؟؟ وينك يا محمد؟؟ ولا منصور أخوي وينك.؟
اعتزلت عن الكل حتى علي مر فيني حاول يخفف عني ..بس للأسف ماقدر يطلعني من الهم اللي أنا فيه ..
تمام ــ ماحولوك للنيابه للحين؟؟ أنا بكره بيحولوني ..
ــ ماتنازل ولد عمك؟
تمام ــ لا ماتنازل ..صج كلب كان لازم أكسر عظامه ..
ـــ ليش انت ضربته ؟؟
تمام ــ التيس خرب سيارتي أعطيتها له سلف يوم واحد رجعت مكسرة كأني شاريها من الحراج مب جديد مطلعها ..
ــ ليش الحراج للسيارات؟
تمام ــ قصدت المعنى المجازي ..أنها كأنها مستعمله..أنت ماقلت لي يا يوسف .. ايش تشتغل؟
ــ حاليا عاطل ..
ماعلق تمام ..وأنا سكت ..ونمت .. ..ما أبي أفكر في بكره ايش بيصير ..

ــ يوسف ..قوم افراج ..
التفت لعلي ..وأنا توني صاحي من النوم ماميزت وين أنا ..
علي ــ يوسف ..
قمت ــ شفي؟؟
علي ـــ خلاص صاحبة القضية تنازلت ..قوم يلا ..شيل قشك ..
للحين مب مستوعب اللي صار ..جواهر تنازلت؟؟
شلت الكيس اللي فيه أغراضي ..وقمت ورى علي ..
كان جاسم هو اللي ناطرني بعد ماكتبت تعهد خطي بأني مابتعرض لجواهر ..
ــ شاللي خلاها تتنازل؟
جاسم ــ الناس تقول السلام عليكم ولا صباح الخير بالأول ..شوف شكلك ..ماحلقت لحيتك ليش؟؟
ــ خلنا من هالسوالف ..شاللي خلاها تتنازل ..
جاسم ــ الكل تموا يقنعون فيها لين أمس في الليل ..والصبح قالت لي منال أروح أييبك ..اييه ..في خبر ثاني ..
ــ شالخبر؟؟
جاسم ــ رغد ..
ــ شفيها؟؟
جاسم ــ ربت ..ويابت ولد ..
ــ شلون؟؟ تو الناس ؟؟؟؟ توها في السابع ..
جاسم ــ الولد الحين في الحاضنه ..أهم شي صحتها ..ومبروك ..
ــ شاللي خلاها تربي في هالسرعه ؟؟باقي لها شهرين؟
جاسم ـــ ولد السبع يعيش ..لاتخاف ..
ــ خذني لها ..
جاسم ــ بتروح وأنت بهالشكل؟؟
ــ أنا ماني مطمن ..روح لها ..
استسلم جاسم للأمر الواقع ..وأول شي مرتي بالياهل ...كانت صدمة عنيفه لي ..كان نتفه ..صغير جدا ...
وبعدين رحت لرغد ..
الممرضة ــ ممنوع الدخول ..وأرجوكم ماتخالفوش التعليمات كافي أنها خالفت والحمدالله قدرنا نلحقها والبيبي ..
ــ زوجتي أبي أشوفها ..
الممرضة ــ تعبانه جدا ..أنا طردت الستات من هنا .علشان راحتها ..مافيش دخول ..
مافهمت ليش الممرضة تكلمت جذي ..بس طلعت من عندها وطلبت من جاسم أنه يوصلني المكتب ..
جاسم ــ يوسف ..شوف شلون صحتك ..ويههك شاحب رد البيت تسبح وحلق اللحية ..
ـــ جاسم ..ماتبي توصلني التكسيات في كل مكان.
جاسم ــ بوصلك وأمري لله ..
ــ وبعدين ترجع بيتكم ..
جاسم ــ ليش؟؟
ــ بداوم في مكتبي ليش بعد؟؟

طبعا كنت بقابل ليال آخذ منها الملخص لكل اللي صار ..جاسم ماكان حاضر ..فماعرف ..وأنا أحس أنه شي جايد صاير ..منال ..ما أوثق فيها لانها بعض الاحيان تتكتم ..ومريم ماتتدخل ..
ــ مع السلامة ..
جاسم ــ مابتضيفني ؟؟
ــ روح لزوجتك تضيفيك ..
جاسم ــ طرده عيني عينك ..
ـ مع السلامة ..أشوفك العصر ..
جاسم ــ هذا اذا عشت الحين اختك بتذبحني..
ــ ريال طول وعرض مو قادر على منول العصقول؟
جاسم ــ ماتعرف اختك الظاهر مع السلامة ..
ــمع السلامة .
على طول لمكتب ..ومثل ماتوقعت كانت ليال وسمير في المكتب ..
ليال ــ حمدالله على السلامة استاذ ..
سمير ــ الحمدالله على السلامة .
ـــ الله يسلمكم ليال ..أبيج ...تعالي المكتب ..
ليال ــ حاضر استاذ..
دخلت على طول وجلست على مكتبي ..
ليال ــ ماكان لازم تيي هني على طول ..كان لازم تروح المكتب .ومبروك المولود الجديد ..
ــ الله يارك فيج ..ليال ..أبي تقرير شامل عن اللي صار ..
ارتبكت ليال ..
ــ أعرف أنج تعرفين ..قولي..شصار بالضبط ..
ليال ــ ماكنت بنكر ..وماكنت بقول ..
ـــ ليال ..اذا صدق تعزيني قول اللي صار ..
ليال ــ ماحبذ انك تسمع مني ..أنت بتعرف بتعرف ..اليوم ولا بكره ..
ــ ليال ...تكلمي أرجوج ..
ليال ترددت شوي ..لكن نظرة الصرامة اللي في عيوني خلتها تتكلم ..
ليال ــ ....بقول ..جواهر كانت رافضه ..رحت لها أنا ومنال ,,ورفضت تتنازل واعتبرتك أهنت كرامته ..وطردتنا بره ..منال دخلت عندها للمرة الثانية ..ولكنها اطردتها ..
ــ عيل شلون اقتنعت؟؟
ليال ــ عن طريق رغد ..
ـــ رغد ؟؟
ليال ــ اييه ..رغد يات من مستشفى النساء للطواري مشي ..وطلبت منا انها تدخل لجواهر بروح ..وطلعت من عندها لكنها ماقدرت توصل لين آخر الممر فطاحت ..فاضطروا يولدونها قيصيري علشان حياتها ..
ــ رغد؟؟
ليال ــ وبعدها بساعه جواهر طلبت الضابط علشان تتنازل عن القضية ..هذا كل اللي صار ..وما أعرف شي زياده ..
ازدادت حيرتي أكثر من أول ..وانقهرت أكثر ..والحين من وين أعرف شاللي صار بين رغد وجواهر؟؟
حسيت بغضب شديد ..لايكون رغد ذلت نفسها قدام جواهر؟
ليال ــ يوسف ...يوسف وين سرحت؟؟
ـــ أنا بروح البيت ..ليال المكتب في رقبتج هاليومين ..أنا برتاح ..
ليال ــ الاحسن أنك ترتاح ..

رجعت البيت ولقيت سعد ناطر عند الباب ..
سعد ــ تعال يا يوسف ..
ــ خير يا ريال ..
سعد ــ أبيك تخاويني...أبي أسافر البحرين اليوم ..ومحتاج لشورك ..
طبعا سعد مايعرف باللي مريت فيه ولايعرف أني مانمت عدل من يومين ...ولا أكلت عدل ..
ــ متى السفر ؟؟
سعد ـ الليله ...
ــ تعال بيتي ..تراه فاضي ارتاح شوي وكل لقمة ..وبعدين بنسافر ..
المفروض أرفض .. لان رغد في المستشفى وعندي مكتب ..وواوات كثيرة ..بس حسيت أني بغير جو ..وأن سعد محتاجني .
سعد ــ البيت مثل ماهو من عشرين سنه...
ــ سويت له ترميمات ..وعدلته شوي ..أنت تدل غرفة الضيوف وين ..
سعد من كان صغير وحنا ربع .بس مب كثر راشد ..
دخل البيت ..صعدت لغرفتي بعد مادليت سعد لغرفة الضيوف وقلت له ان البيت بيته ..
بعد وجبة دسمة ..من صنع الخدامة ..
ـــ خلينا نسافر الحين ..
سعد ــ بسيارة ..تبينا ننطبخ في الحر ..
ــ اييه .. أبي ننطبخ في الحر .
سعد ..أنا جاهز ..وأنت؟؟
ــ حطيت لي كم ثوب في الشنطه ..يلا سرينا ..
وأول ماقمت أنا وسعد دخلت مها تركض للبيت ,...
ــ عمي عمي الحق شيخه طاحت غشيانه ..
ــ وين هي الحين؟؟
مها ــ عمي في السياره بره ..كنا يايين نبارك لك وفي الطريق اغمى عليها ..
أنقذنا في هالحالة وجود سعد ..الدكتور ..اللي لحسن الحظ كان شايل معاه شنطته الطبية .. شنا شيخه لداخل البيت ..وقام سعد بشغله وسط دموع مها ..
ــ انخفاض شديد في ضغط الدم ..خلي ننقلها الحن للمستشفى ..
وبسيارة سعد نقلناها للمستشفى ..وبعد ثلاث ساعات اطلعت من المستشفى ..
سعد ــ كان وجودي صدفة غريبه ..
ــ اي والله ..الحمدالله .. مها ..
خذت مها على جنب ــ هاليومين روحوا لبيت محمد ,,لين أرجع من السفر ..
مها ــ بس عمي ..
ــ لاتبسبسين .. خلي مريم تعابلكم لين أيي ..
مها ــ وين بتسافر عمي؟؟
ــ بسافر وأرجع خلال ايام ..يالله ..هذا محمد وصل ..
محمد وصل ..بس ماحط عينه في عيني وأنا تحاشيت أسلم عليه ..
ــ يلا سعد ..
سعد ــ يلا ...
وسافرنا البحرين ..والسفر كان لأغراض صحيه ..وكان عم سعد مريض جدا وسعد اضطر يراعيه طول الوقت ..وكان صدق محتاج لي ..وساعدته ..
ــ ليش عمك عايش بروحه؟؟
سعد ــ تدري ..شكلي بغير فكرة عن العزوبيه ..هذا عمي أشهر عازب في البحرين ..توه دخل السبع وثمانين سنه ..وهو مكسر ولاله ولد ولا حرمه تقابله ...ما أبي أنتهي هالنهاية ..وحيد .
كلام سعد صحيح مافي أسوأ من الوحده وخصوصا والواحد يحتاج لرعاية أو مسن ..
ــ بنآخذه معانا للدوحه؟
سعد ــ ياريت ..بس من بيجابله ويقوم عليه؟؟ بعدين هنا له معاش تقاعدي يمشون له ..
ـــ وين بتوديه عيل؟؟
سعد ــ مافي غير دار العجزة ..
ــ دار العجزة؟؟
سعد ــ لاتنظر للأمر من الناحيه السلبيه ..بل من الناحيه الايجابيه ..في دكاتره ..يوصفون له الاكل الصحي ..في ناس من عمره يستانس معاهم ...على الاقل لاصارت فيه وعكه ولا شي الدكتور مب بعيد ..
ــ لاء ..دار العجزة مكان سيء ..
سعد ــ لو كان أبوي والله ماحطيته في هالمكان ..بس عمي لاله عيال يراعونه ولاحرمه تقوم على طلباته ...وأنا الحين برجع بيت أهلي ..لأن أبوي بدا يتعب ..
ــ خذه معاك ..
سعد ــ ياريت بس ياريت ماتفتح بيت ..
ـــ الريال بترميه في دار العجزه حرام عليك ..
سعد ــ لاء ..حرام عليه هو ..لو أنه متزوج ماانتهى بهالطريقه.
كلام سعد فيه من المنطق شوي..
السفر طول بدل اليومين ..مر أسبوع ...ومر الاسبوع الثاني ..لين تأكد سعد ان عمه صحته رجعت ممتازة ..قررنا السفر ..مابتكلم عن اصرار سعد اني أسافر وأرجع لاهلي ..بس قلت له انه مافي شي يستاهل ..وأن شغلي موقفه حتى اشعار آخر ..خلال هالاسبوعين ماتصلت في حد ...
وصلني البيت ..وراح ..مارضى ينزل يرتاح ..
دخلت البيت ..شميت ريحه من ثلاث أشهر ماشميتها ..ريحة البخور ..والبيت نظيف ..بطريقه افتقدتها ..واللمسات الحلوة الورد ..واللوحات ..
دخلت الصالة وكانت رغد سرحانه ..ويالسه في مكان معطتني ظهرها ..
ــ رغد؟؟
نطت من مكانها ..وخلال لحظات سلمت عليها .. ويلست جنبي ودموعها في عيونها ..
ـــ شفيج ؟؟
رغد ـ كل يوم كنت أنطرك ....شلون قدرت تغيب وماتقول لنا وين مكانك؟؟ خفت عليك وايد ..
ـــ سافرت مع سعد ..بعد اللي صار ماتحملت ..وكنت محتاج تغيير جو ..
رغد ــ الحمدالله على السلامة ..
ــ الله يسلمج ..شلون صحتج وصحة عبدالرحمن؟؟
رغد ــ الحمدالله ..وعبدالرحمن في الحاضنه .مابيطلعونه لين يصير وزنه ثلاث كيلو على الاقل ..
ــ وليش كم وزنه الحين؟؟
رغد ــ ثنين كيلو ..
ـــ مشتاق أشوفه ..خل نمره اليوم ..
صبت لي قلاس عصير وقدمته لي ..
رغد ــ ارتاح توك ياي من السفر .. أحط لك شي تآكله؟؟
ــ لاء ..أنا وسعد من قبل ساعه مرينا مطعم وكلينا ... ليش ييتي هنا بروحج؟؟
رغد ــ أنا مب بروحي ..مها وشيخه معاي ..
ـــ بنات فالح؟؟
رغد ــ اييه ...انحرجوا من مريم ومحمد خصوصا ان بيتهم صغير ..فيوا هنا ...البيت عود ماشاءالله وأنا ماكنت أبي أروح بيت أهلي ..
ــ ليش ؟
رغد ــ ما حبيت ..ما أكذب عليك ان قلت لك أكره بيت أهلي .
ــ لاحظت هالشي ..ليش؟؟
رغد ــ لاتسألني ..أكره وبس..
ــ شلون ثلاث حريم في بيت بروحكم ؟؟
رغد ــ طلال وابراهيم موجودين ..بس في قسم الضيوف ..
استغربت ..وبيت فالح؟؟
ـــ للحين جواهر في المستشفى ؟؟
اسكتت رغد ..وماتكلمت ..
ــ شفيج؟؟
رغد ــ قوم ارتاح الحين يوسف ...وبعدين بخبرك كل شي ..
حسيت بشي مب طبيعي في رغد ..في شي خاشته عني ..بس أنا كنت تعبان صحيح ..فقمت ونمت في غرفتي وصكرت رغد الباب علشان ماتزعجني,,..
ونزلت تحت ..طالعت الساعه كانت عشر الصبح ..غمضت عيوني ..استسلمت لنوم عميق ....
فتحت عيوني على ربشه حولي ..
ــ حمدالله على السلامة يا عمي ..
ـ الله يسلمج يا شيوخ ..شلون ضغطج؟؟
مها ــ حمدالله على السلامة ياعمي ..لاتخاف زي الحمار ..مافيها شي ..
شيخه ــ حمار ريلج..
مها ــ جب ..ما تتكلمين عن بدر جي والا آخر يوم في عمرج ..
ــ ممكن تسوون لي احترام وتفكوني من نجرتكم؟؟
مها ــ عمي ليش نمت هنا ؟؟
ـــ أنا ارتاح أنام هنا ..ما أحب الغرفة الثانية ..اذا بغيت أرتاح أنام هنا ..
شيخه ــ عاد أنا كنت أنام هنا ياعمي ..وانصدمت لما دخلت وشفتك ..
ـــ ماقالت لكم رغد؟؟
مها ــ ماقالت أصلا ماشفناها من رجعنا ..
ــ وين كنتوا؟؟
مها ــ كنا في بيت عمتي منال .. تغدينا هناك واستانسنا لين يا عمي جاسم فاستأذنا ..
ـ هذا حماج ..مب عمج ..
مها ــ في حكم عمي ..ها عمي ..شيبت صوغه لنا؟؟
ـــ مايبت شي ..مافضيت وما آخذت معاي مبلغ يحرز ..
شيخه ــ أسبوعين مسافر ومافضيت تيب لنا صوغه؟
ــ سافرت البحرين ..
دخلت رغد الغرفة ..
ــ آسفة ماقلت لهم أنك ييت ..أكيد= أزعجوك ..
مها ــ رغد ..ما أزعجناه ..
طالعت الساعه كانت خمس ونص ..
ــ بللللل نمت كل هالوقت؟؟
مها ــ اي يا اونكل ..
ــ أنا أحس بنشاط الحين خلينا نمر نشوف عبدالرحمن ..
مها وشيخة = من عبدالرحمن؟
رغد ــ اللي سميتوه كيووت ..
مها ــ واو ..بتسمونه عبدالرحمن؟؟
رغد ـــ اييه يوسف اختار الاسم ..
شيخة ــ عمي مب لايق لك نناديك بوعبدالرحمن ..

يتبع ,,,,
👇👇👇
تعليقات
    حجم الخط
    +
    16
    -
    تباعد السطور
    +
    2
    -