بداية

رواية أمل موعود -21

رواية امل موعود - غرام

رواية أمل موعود -21

تركي وشهد بيقعد تركي على هالرومنسية على قولة رنا ولا بيتغييير ؟؟
بعد الملكة .. كل البنات جالسين فوق بالصالة يسولفون !
لولو : يللا شهيد قووولي لنا كل شي
هنوف : من طق طق للسلام عليكم
شهد :بل ياالقفكم
هنوف :وبكل فخرر
مشاعل +شيخة +سارة :ههه
شيخة تكلم مشاعل :الحين انتي جايك الدور خل نخلص من شهد ونشوفك
مشاعل : ايه ايه يسييير خير
لولو :يللا شهيييد قولي
شهد :انزين انزيين
وقالت لهم شهد عن كل شي من البداية للنهاية يوم خالد يفشلها
شهد :خايس رفع لي ضغطي
شيخة : والله انه كبر في عيني
شهد : اقول متى تجي ملكتك والله لاشتغل عليك تمسخر
شيخة تغير الموضووع : ايه مشاعل قولي لنا
مشاعل: ابد والله ماصار شي بعدين حضرتك كنتي فييه
شيخة : هاه لا بس مانتبهت واجد
مشاعل : طيب
شيخة :وشوو طيب قولي
ومشاعل بعد قالت كل شي
هنوف :يحليييلكم والله كبرتوا
شيخة :لابينتظرونك لين تأذنين لهم
هنوف:هي هي هي ماتضحك
شيخة :محد قال لك اضحكي
شهد :وانتي كله هواااش
شوي ويدخل عليهم مشعل وراشد وسالم < الثلاثي المرح
شيخة : بل بل بل شجااايبكم هنا انتم
راشد :لهالدرجة ماتبوونا
مشعل :اشوى انا بنرووح ونفتك منهم
شهد :وعلى وين النية
سالم :مااالكم دخل
مشاعل :يللا عااد وين رايحين
هنوف :ايه يمكن نجي معكــم
مشعل : لا مانبي بنااات
هنوف :اصلا انا مابي الروحة معكم ولو ابي ابووي سفرني وين ما ابي ووش ابي بالرووحة معكم
مشعل يطالع ساعته ويطالع هنوف :بل كم كلمة تتكلمين بالثانية
الكل ضحك وهنووف تفشلت وانقهرت من مشعل !!
لولو :الزبدة وين بتروحون
سالم :الزبدة ولا القشطة هاهاي
لولو :لالا مقدر اتحمل بطني بيعورني من الضحك
سالم :مالت عليك محد طلب منك تضحكين
لولو :بيت جدي كييفي
سالم :جدي قبل يصير جدك
لولو تكش على سالم : مالت عليييك
سالم يكش بيدينه عليها :مالت عليك انتي
شهد :جد والله سلووم وين رايحين
سالم :يااطويلين العمر رايحين لبانكوك
هنوف : وعععع مالت عليكم ان كان بتروحون روحوا مكان سنع
مشعل :ليه شفيها بانكوك
هنوف :خااايسة روحوا فرنسا ولا ايطاليا
لولو :ولا روحوا فينيسيا
مشعل ضحك عليها :يالخبلة فينيسيا في ايطاليا
لولو تفشلت بس تبي ترقع :ايه ادري بس يعني
مشعل :مالت عليك بس البحرين والامارات يخبون عليك
لولو :ايه وش ابي بالطيارات بسم الله علي
هنوف :اووف من زماان ماركبت طيارة لي سنة وزيادة
مشاعل كأنها تذكرت شي : مشـعل
مشعل :وشو
مشاعل :متى قلت بتروحون
مشعل :هههه بعد اسبووع
مشاعل :والدراسة متى
مشعل :مب السبت اللي بكرة الاسبوع اللي بعده
مشاعل :ووش بتسوي
مشعل :بسفطها .. يعني تبيني اضيع سفرة مع عيال عمي عشان مدرسة
مشاعل :كم بتقعدون ؟!
مشعل :اسبوع او اسبوعين
هنوف :والله انكم داجين الأخ الكريم ساقط ثالث ثنوي وشكل الاخ الثاني بيلحقه
مشعل :مااافيها شي مب عيب ولا حرام الواحد يسقط بعدين المثل يقول بلا دراسة بلا هم دامك هلالي لاتهتم
شيخة :وحظررة الأخ هلاالي بعد
مشعل : ايه طبعا
شيخة : وع مالت عليكم كلكم هلالين
مشعل :ليه طويلة العمر وشو
هنوف :نصراوية طال عمرها
مشعل يطالع هنوف :والأخت عسى مب نصراوية
هنوف :لاااا أنا هلالية 100%
مشعل :ونعععم والله
هنوف خشت جو مع سالفة الكورة : شفت ياسر يده شفيها
راشد :ايوة دخلنا بالكورة وش بيفكنا اكرمينا بسكوتك يا أخيتي
هنوف تتحلطم على نفسها :بل شذا كيفي أسوي اللي ابي اسولف متى مابغيت واسكت متى مابغيت ان تهاوشت هاوشتوني وان سولفت هاوشتوني مدري وش يبيني اسوي الحمد الله
شيخة ولولو كانوا جنبها ويسمعونها وماااتوا من الضحك عليييها !!

رجعوا كلهم لبيوووتهم !!

في بيت العمة منيرة !!
هنوف في غرفتها تفكــر ....
((مشعل بيرووح تايلند بيقعد هناك اسبوعين يعني اسبوعين كاملين ماراح تشوفه ولا تسمع صوته هي تعودت عليه
بس هو مب اول مرة يسافر دايم يسافر بس هالمرة مدري مدري احس اني مابيه يسافر قلبي ناغزني .!
بس كييفه بعد الولد خل يروح يستانس !! وحتى لو قلت له كأنه بيسمع كلامي !!))
حاولت هنوف تنام لييين ما أنه جاها نوووم!!

عــــــرس سارة بالعصر !...
فيه قاعة كبييييرة ماخذينها للعرس !!
سارة ماسكتها مناحة من يوم قامت لانها بتسكن بالجبييل بعيييييدة 5ساعات الطريق ...
والبنات فيه ويهدووونها ....
شهد :عاادي ياسارة على الأقل بالسعودية مب مكااان بعيد زي اوروبا ولا أي مكااان !!
سارة :..
شهد ابتسمت لسارة : سارة حبيبتي اليوم عرسك مايصيير تصيحين مفروض تستانسين
سارة ابتسمت لشهد بس ماردت عليها :..
شيخة وهنوف توهم جايين ويتهاوشون زي العادة
شيخة : اخيييرا وصلنا كله منك دايم تأخرينا
هنوف :والله أجهز ملابسي
شيخة :وانا امس اقول لك ياهنوف جهزي ترا بكرة بنروح للقاعة بدري بس لااا لازم عناد
هنوف :والله كييييفي اهم شي جينا
شيخة :جينا والحين الناس بيبدون يجون
هنوف تطالع ساعتها :بل بل بل تووونا ترى الساعة ماجت 4
شيخة :خلاص اوص ولاكلمة
هنوف :مالت عليك
شيخة :احترمي نفسك
شهد : الله يعيييينكم على بعض دايم كذا انتم
شيخة وهنوف يطالعون بعض ويضحكون
هنوف :ماانستغني عن بعض
شيخة تكلم شهد :عادي الحين تراضينا خمس دقايق بالكثير واحنا متهاوشين عااادي
هنوف :شلووون العروس
سارة ابتسمت :تماام
شيخة :وليه الخشم احمررر
شهد :اوص لاتذكرينها ماصدقت انها تسكت
وبدوا يسولفون بعدين يتناوبون بعضهم ينزلون وبعضهم يقعدون فوووق عند سارة
. على الساعة 12 وقت الزفة !!
سارة : مشااعل
مشاعل :هلا
سارة :مايصير بس يجي ياخذني بدون زفة
مشاعل :لهالدرجة مستعجلة على الروووحة
سارة :لاااااااااا بس مابي زفة كلهم بيصيرون يطالعونني
مشاعل :لا والله يعني تبينهم يشوفون الجدار ولا وش بعضهم بعد ماجا اللا عشاان يشوفونك !!
سارة :مشاعل لاتزيديني
مشاعل :ههههه طيب طيب خلاص مب صاير شي لاتخافين
شيخة تدخل عليهم :السلااااام يللا سويرة ماتبين تنزفين
سارة : اووف يللا
زفوا ساارة للكوشة حقتها وكاانت كلاسيك مابغت فيها اشياء مبالغ فيها
والحمد الله مررر العرس اللي كانت خااايففة منه على خييير اخذها جاسم وراحوا للأوتيل

يوم الثلاثاء البنات كلهم مجتمعين في بيت بو ناصر "" مشاعل ولولو""
مشاعل :بكرة بيروحون الشباب
شيخة :ايييه قهر ماعاد فيه اللا نواف يودينا ونواف يذل الواااحد
مشاعل :هيييه عن الغلط
شيخة :اوه نسيت حرم السيد نواف وجودة هنا
مشاعل :احم احم
لولو :هنوف شفيك انتي
هنوف بضييق :ابد ولا شي
لولو :يعني عشان مشعل بيسافر
شهد :ايه واذا مشعل بيسافر مفروض تستانسين
هنوف :اقول لايكثر بس وش اللي استانس بعد انتم
شهد :شفيك انتي
شيخة :ايه ترانا ندري انك تحبين مشعل
هنوف : ......
شهد :من يدري وليه ماقلتوا لي
مشاعل :ههههههه مبين عليهم ياخبلة
شهد سكتت :ايه والله من زماااان ماتهاوشوا
هنوف :طيب ايه انا أحب مشعل ارتحتوا خلاص << وراحت لغرفة لولو
لولو راحت فوق عند هنوف
لولو :هنوف حبيبتي شفييك
هنوف :مدري يالولو قلبي ناغزني على روحة العيال مابيهم يروحون
لولو :والله مايسمعون كلامك هم مخططين عليها من زمان
هنوف دمعت عينها: والله يالولو اني احس انه بيصير شي
لولو :تعوذي من الشيطان
هنوف :اعوذ بالله من الشيطان الرجيم
لولو :يرحمكم الله
هنوف :هههههه امشي امشي ننزل تحت
فتحت هنوف الباب وراحت طبعا ماعليها شيلتها لانها ماتدري انه فيه احد ...
هنوف تمشي وهي منزلة راسها ولا شافت من اللي صقعت فيه
هنوف رفعت راسها بتشوف مين وشااافت مشــــــــعل
ماتدري وش الإحساس اللي حست فيه حست بفرررحة بوناسة كأنها ماشافته من شهر وبدون ماتحس بدت تنزل دموعها من جد اللي تحس فيه
الحين غرييييب المفروووض ماصيح لفت هنوف عنه وراحت عند غرفة لولو ودخلت لانه ماكان عليها شيلة
راحت داخل وخلت مشعل بحيرة .. شفيها هنوف تصييح ؟! خل اروح اشوووف لازم اعرف
مشعل طق باب غررفة لولو
لولو :نعمم
مشعل :عادي ادخل
لولو :لحظة شوووي
تغطت هنوف ودخل مشعل !!!
مشعل :السلام عليكم
هنوف + لولو :وعليكم السلام
مشعل :هنوف ممكن اعرف وش فيك
هنوف : ......
مشعل : هنوووف
هنوف :هلا
مشعل :وش فيك تصيحين قبل شوووي ؟!
هنوف :ولا شي عادي
مشعل :وشو اللي عادي اذا عادي عندك انا مب عادي عندي ابي اعرف وش فيك
هنوف نزلت راسها : ....
لولو :مشعل انا بقول لك هنوف تقول قلبها ناغزها على روحتكم بكرة
مشعل اخذ له كرسي وجلس عليه :هنوف تعوذي من ابليس مب صاير اللا اللي كاتبه ربي
هنوف سكتت وفي قلبها ودها تروووح له وتضمه ماتدري ليييه تحس انه خلاص بيروح منها مشعل ....
هنوف :مشعل ..
مشعل بدون مايحس :عيووون مشعل انتي
هنوف مانتبهت لكلامه :تكفى انتبه لنفســـك
مشعل :أفا عليك هنوف .. وانتي بعد انتبهي لنفسك ولا تروحين مكان اللا بعد ماتستأذنين مني
هنوف :نعم نعم نعم
مشعل :ههههه رجعتي على طبيعتك !!
هنوف ماقدرت اكثر من انها تبتسم هذا هو مشعل رجع لها الابتسامة بعد ماكانت تصيح فديييييته والله اموووت فيه

نزلت هنوف ولولو تحت وقعدوا يسولفوووون مع البنات لين ما جا الليل وكلهم رجعوا بيوتهم

بيت العم ابراهيم ""ابو خالد ""
شهد وخالد جالسين مع بعض !!
خالد :شخبار احم احم
شهد :شخبار مين
خالد :شيوووووختي
شهد :تمام
خالد :مابي بس تمام ,,.ابي اخبارها !!!
شهد :خالد انت منت ناوي تخطبها
خالد :من قال
شهد :أنا أقول
خالد :اللا ناوي
شهد :متى ان شاء الله تراها درت خطاب واااجد عشانك والعمر يمشي
خالد :قريب ان شاء الله
شهد :ليه ماتستعجل
خالد :أنا قلت لابوي وقال لي بعدين
شهد :ذكره
خالد :مانساني عشان اذكررره
شهد :خااالد عن العناد ترا اذا راحت من يدك البنت مب نافعك العناد
خالد : قلتها قبل وبقولها الحين .. أنا مارااح اخذ غييير شيخة وشيخة ماراح تاخذ غيري اللا ان فرقنا الموووت
شهد :بعد عمر طوييل ... أنا بس حبيت أذكرك ان كانك ناسي << وراحت شهد فوق غرفتها وكلمت ترركي!

اليووم الأربعاء الشباب راحوا لبانكوك وهنوف ماودها برووووحتهم وصاكة على نفسها الغررفة
شيخة دخلت على هنوف :هنوو الغدا
هنوف :مابي شي
شيخة :لييييه
هنوف :مالي نفس
شيخة :عشان احم احم سافروا
هنوف :شيخوووه لاتذكريني تكفين
شيخة :هههههههه هنوف شفيك مكبررة السالفة
هنوف :اقووول لك هالمررة اول مرة احس قلبي ينغززني
شيخة :لأنها اول مرة مشعل يساافر من بعد ماتعلقتوا ببعض مب من شي واجد انتي مكبرة السالفة
هنوف :الله يسترر
شيخة عصبت :هنوفوووووهـ أعقليي عاد العقل نعمة ترا
هنوف : ...... طيب خلاص بس مابي اكل
شيخة :والله تحلف لك انه مايطب بطنها شي لييين تتغدين
هنوف :شييخة والله مالي نفس
شيخة :أنا حلفت ووالله انا جوووعانة .. أهووون عليييك !؟
هنوف : هههههه ايه
شيخة :مالت عليك اجل تعااالي بالغصب ماتنعطين وجه
هنوف :يللا

أما عند الشباب كانوا رايحين .. مشعل وسالم وراشد وزيادة ربعهم صالح ومحمد وبدر صديق مشعل
يعني 6 عيال وصلوا تايلند "بانكوك" الساعة 4 العصر !

وراحوا طوالي على الاوتيل وناموا !!

مــر أسبوع على روحة الشباب والدراسة بدت ورجع الروتين والشباب كل يوم يكلمون وجا يووم الأربعاء
الكل مجتمع في البيت الكبير .....
ريم :يووهـ متى يجي هاللي ببطني ويلعب معكم
ريناد :ان كانه ولد لعب معي انا وعزوز وان كانها بنت لعبت مع في وضي
ريم :وليييه مب انتي تلعبين مع البنات
ريناد :لاااا انا مع العيال
ريم :ليييه
ريناد :عشاان عزوووز ماعنده اخو
ريم :اهاا طيب طيب روحوا العبوا فوق
ريناد راحت ترض بعدين فحطت وعزوز يقلدها ..
عبير :ههههه مادري متى تعقل هالبنت
ريم :عادي خليها تستانس
عبير:بس معرربجة مرة
ريم :عشان مافيه اللا عزوز بس خل يكبرون في وضي وتصير معهم
------
مشاعل :هنوفووهـ وين وصلتي
شيخة :اللي ماخذ عقلك يتهنا به
هنوف : اليوم ماكلم راشد ولا مشعل ولا سالم صح ؟!
شهد :ايه عادي الحين بيكلمون
هنوف :ان شاء الله
اللا بررنة تلفون البيت لان العيال يدرون ان الكل مجتمع في البيت الكبير
يتبع ,,,
👇👇👇
تعليقات
    حجم الخط
    +
    16
    -
    تباعد السطور
    +
    2
    -